ඉංදියාව කළේ ඌරගේ මාළු ඌරගේ පිටේ තියා කැපූ එක ද?

මෙතෙක් කල් අධිපතිවාදී ඉංදියානු බලපෑමට එරෙහිව ලංකාවේ හිටපු ප්‍රධාන දේශපාලන බලවේගය ජනතා විමුක්ති පෙරමුණ යි. ඒ අය තමයි "ඉංදියානු ව්‍යාප්තවාදය" නම් දේශපාලන සටන් පාඨයක් නිර්මාණය කරලා ලංකාව කෙරෙහි ඇති ඉංදියානු බලපෑම ගැන රට තුල දේශපාලන සවිඥානකත්වයක් ගොඩනැගීමට කටයුතු කළේ...

දේශපාලන ව්‍යාපාරයන් විදිහට ලංකා සමසමාජ පක්ෂය ඇතුළු ලංකාවේ වමේ පක්ෂ රටේ නිදහස/ස්වාධීනත්වය/ස්වෛරීත්වය වගේ දේවල් පිලිබදව නිදහස ලැබෙන කාලේ ඉදන් මතු කළත්, ජනතා විමුක්ති පෙරමුණ තරම් ඔය මාතෘකා පිලිබදව පෙනී හිටපු වෙනත් කිසිම දේශපාලන පක්ෂයක් රටේ තවත් නොතියෙන්න ඇති.

D.S. සේනානායක නම් නිදහස ගත්ත කාලේදීම බ්‍රිතාන්‍යය එක්ක ආරක්ෂක ගිවිසුමක් හදාගෙන, කටුනායක RAF එකයි, ත්‍රිකුණාමලයේ RN එකයි පවත්වාගෙන යන්න ඉඩදීලා ලංකාව කෙරෙහි ඇති ඉංදියානු බලපෑමට මුහුණ දෙන්න කටයුතු කළා. ජෝන් කොතලාවල අගමැති කාලේ දී (1954) ඉංදියාවේ ජවහර්ලාල් නේරු වගේ දැවැන්තයෙකුට එරෙහිව කෙලින්ම විරෝධය දක්වන්නත් කටයුතු කළා ("not to take small neighbors for granted"). බණ්ඩාරනායකලා ඉංදියාව එක්ක සමීප මිත්‍රත්වයක් ඇතිව කටයුතු කරලා ලංකාව කෙරෙහි ඇති ඉංදියානු බලපෑම රටට බලපෑමක් නොවන තැනකට පරිවර්තනය කරගත්තා..

ඒත් ඊට පස්සේ කාලේදී, රටේ ආර්ථික හා දේශපාලනය උපාය මාර්ග මුල්කරගෙන J.R. ජයවර්ධන ඉංදියාව නොතකා කටයුතු කරන්න යෑම නිසා ඉංදියාව ශ්‍රී ලංකා රාජ්‍යයේ ස්වාධිපත්‍යය උල්ලංඝනය කිරීමට කටයුතු කළාම J.R. ජයවර්ධනට අනියමින් හෝ එයට මුහුණ දෙන්න හැකිවුනේ ජනතා විමුක්ති පෙරමුණ ප්‍රමුඛ බලවේග ඒ මොහොතේ දැක්වූ දැවැන්ත ඉංදියානු විරෝධය පදනම් කරගෙනයි. ඕනේ නම් J.N. Dixit ගේ Assignment Colombo (කොළඹ භූමිකාව) පොත කියවලා බලන්න ඉංදියානු හමුදා ලංකාවට ගෙන්නුවේ ඉංදියාව වත්, රජිව් ගාන්ධිවත් නෙමෙයි: J.R. ජයවර්ධන...

ජනතා විමුක්ති පෙරමුණ දකුණේ ඇතිකර තිබූ තත්වයට මුහුණ දෙන්න උතුරෙන් ලංකා හමුදා දකුණට ගෙන්වන්න අවශ්‍ය නිසා උතුරේ සාම සාධනය කරන්න J.R. ජයවර්ධන තමයි ඉංදියාවේන් හමුදාව ඉල්ලුවේ.. ඊට පස්සේ L.T. T. E ය හා ඉංදියානු රජය අතර ගැටළු ඇතිවෙන්නත්, ඒ ගැටළු පස්සේ L.T. T. E ය හා ඉංදියානු හමුදා අතර ගැටුමක් බවට පත්කරන්නත් J.R. ගේ කටයුතු හේතුවුනා කියලා J.N. Dixit කියනවා..

ඒ සියල්ලටම හේතු වුනේ ජනතා විමුක්ති පෙරමුණ දැක්වු ඉංදියානු විරෝධය හා ඒ මත පදනම්ව J.R. ගේ උපායමාර්ගික මැදිහත්වීම. ජනාධිපති ප්‍රේමදාසටත් ඉංදියානු හමුදා රටින් එලවන්න හේතු වුනෙත් ජනතා විමුක්ති පෙරමුණේ ඉංදියානු විරෝධී මැදිහත්වීම. නැවැතත් ජනතා විමුක්ති පෙරමුණේ ඉංදියානු විරෝධය දේශපාලන උපායමාර්ගයක් ලෙස යොදාගත්තේ රනිල් වික්‍රමසිංහ. ඔහු ඉංදියාවේ නරේන්ද්‍ර මෝදීගේ රජයේ මැදිහත්වීමෙන් ඉදිරිපත් වු 'ETCA' (එට්කා) වැඩපිලිවෙළ ඔස්සේ ඒ මොහොතේ රටේ බංකොලොත්භාවයට යම් යම් උදව් උපකාර ගන්න ගමන් 'ETCA' (එට්කා) ගිවිසුමේ කාරණා ඒ වේගයෙන්ම දියත්වීමේ වේගය අඩපන කිරීමට හෝ ක්‍රියාත්මකවීම පමා කිරීමට යොදාගත්තේ ජනතා විමුක්ති පෙරමුණේ විරෝධය.

ඊයේ අනුර කුමාර දිසානායක ජනාධිපතිවරයා හා ඉංදියානු අගමැති මෝදී හමුවේ ද්වීපාර්ශික නිවේදන අනුව දැන් පෙනී යන්නේ මෙතෙක් ඇණ හිට තිබූ 'ETCA' (එට්කා) කාරණා වේගයෙන් දියත්වීමට කටයුතු යෙදීමයි.. මෙතෙක් පමා කරමින් තිබූ ලංකාවේ විදුලි සම්ප්‍රේෂණ ජාලයන් ඉංදියාවට සම්බන්ධ කිරීම, ඉන්දියාවේ සිට ශ්‍රී ලංකාව දක්වා තෙල් නළයක් ඉදිකිරීම වැනි 'ETCA' (එට්කා) ගිවිසුමේ කාරණා ඉක්මනින් ක්‍රියාත්මක කිරීමට ජනාධිපති අනුර කුමාර දිසානායක මහතා ඉන්දීය අග්‍රාමාත්‍ය නරේන්ද්‍ර මෝදි මහතා අතර සහයෝගයක් ගොඩනැගෙන බව දැක්වූවා. ඒ විතරක් නෙමේ ත්‍රිකුණාමලයේ සාම්පූර් සූර්ය බල ශක්ති ව්‍යාපෘතියත් ක්‍රියාත්මක කරන බව මෝදී අනුර ඉදිරියේදීම දක්වනවා...අනුර කර කියාගත හැකි කිසිවක් නොමැතිව මෝදි දිහා බලන් ඉන්නවා...

ඉංදියාව කර ඇත්තේ මෙතෙක් රටේ ස්වෛරීත්වය පිලිබදව දැඩි අදිටනකින් පෙනී සිටි ජනතා විමුක්ති පෙරමුණ මූලිකත්වය දරණ මාලිමාවේ ආණ්ඩුව ලවාම ඉංදියානු අභිලාෂයන් ලංකාව තුල මුදුන්පත් කරගැනීමට යෑම නොවේද? ඌරගේ මාළු ඌරගේ පිටේම තියා කපනවා කියන්නේ මේවට නෙමේ ද?

මෙයට මුහුණ දීමට අතිවිශාල ජනවරමක් සහිත මාලිමා රජය කෙසේ කටයුතු කරාවිද? මෙම පෙලගැසීමට එරෙහිව රටේ වෙනත් බලවේග කෙසේ කටයුතු කරාවි ද? බලා සිටිමු!!

මාකස් ප්‍රියන්ත පෙරේරා

17/12/24

'දේශපාලන අභිලාෂයන්' වෙනුවෙන් ක්‍රියාත්මක වෙන 'බුද්ධි අංශ මෙහෙයුම්' මේ ආණ්ඩුව යටතේත් ක්‍රියාත්මකයි

පසුගිය දා Sunanda Deshapriya මහතා 'Sri Lanka Brief' වෙබ් අඩවියට, 11.12.2024, ලියා ඇති ලිපිය බලන්න....(එය මෙම යොමුවෙන් කියවිය හැක)එම ලිපියේ ඇත්තේ මේ ආණ්ඩුව යටතේත් 'දේශපාලන අභිලාෂයන්' වෙනුවෙන් ක්‍රියාත්මක වෙන 'බුද්ධි අංශ මෙහෙයුම්' තවදුරටත් ක්‍රියාත්මකයි කියන එකයි.

දේශප්‍රිය මහතාගේ ලිපියේ දක්වා ඇත්තේ: "පසුගිය දෙසැම්බර් 2 වැනිදා බත්තරමුල්ල ඉසුරුපාය අධ්‍යාපන අමාත්‍යාංශය ඉදිරිපිට ගුරු පත්වීම් ඉල්ලා පාසල් සංවර්ධන නිලධාරීන් පිරිසක් පැවැත්වූ විරෝධතාවේදී තියුණු ආයුධයකින් කපා පොලිස් නිලධාරීන් තිදෙනකුට තුවාල සිදුකළැයි කියන පුද්ගලයාව පුද්ගලයා අල්ලා තලංගම පොලිසියට බාර දුන්නත්...ආරක්ෂක අමාත්‍යාංශයේ ඉහළම දේශපාලඥයෙකු විසින් තලංගම පොලිසියට කතා කර එම පුද්ගලයාව නිදහස් කරන ලෙස දැන් වූ බවයි." එම ලිපියේම තව දුරටත් දැක්වන්නේ එසේ පොලීසියට කතාකර අදාල යුද්ධ හමුදා නිලධාරීයා නිදහස් කර ඇත්තේ "නියෝජ්‍ය ආරක්ෂක ඇමැති ඇමති මේජර් ජෙනරල් අරුණ ජයසේකර විය හැකි..." බවයි.

මෙයින් පෙනී යන්නේ මොකක්ද? මේ ආණ්ඩුව යටතේත් 'දේශපාලන අභිලාෂයන්' වෙනුවෙන් ක්‍රියාත්මක වෙන 'බුද්ධි අංශ මෙහෙයුම්' තවදුරටත් ක්‍රියාත්මකයි කියන එක නෙමේද?

ඒ විතරක් නෙමේ එම මෙහෙයුම් ක්‍රියාත්මක කරන නිලධාරීන්ට ඒ සදහා අවශ්‍යය රාජ්‍යය ආරක්ෂාවත් ආණ්ඩුවේන්ම, ආණ්ඩුවේ දේශපාලඥයින් විසින්ම සලසා දෙනවා කියන එක නෙමේද?

ඒ වගේම බත්තරමුල්ල සිද්ධිය සම්බන්ධයෙන් අදාල යුද්ධ හමුදා නිලධාරීයාව අත් අඩංගුවට ගත්විට ඔහුව නිදහස් කිරීමට ඉදිරිපත් වෙලා ඇත්තේ මාලිමා ආණ්ඩුවේ නියෝජ්‍ය ආරක්ෂක ඇමති මේජර් ජෙනරාල් අරුණ ජයසේකර යැයි සැක කිරීමෙන්ම පෙනී යන්නේ මේ ආණ්ඩුව සමගත් මිලිටරි හස්තයින් සම්බන්ධ වී ඇති බව නොවේද?

මාලිමාව හැදෙන කාලේම මාලදිවයිනේ පැවැති මාලිමාවේ රැස්වීමකට රෝහණ විජේවීර ඝාතනය සම්බන්ධයෙන් චෝදනා එල්ලවී ඇති, එවකට මාලදිවයිනේ ශ්‍රී ලංකා තනාධිපතිවරයාව සිටි, මේජර් ජෙනරාල් අශෝක තෝරදෙණිය සම්බන්ධවීමත්, ඊට පසුව මාලිමාවට සම්බන්ධ විශ්‍රාම ගිය ත්‍රිවිධ හමුදා සාමුහිකයක් ගොඩනැගීමත්, මාලිමා රජය යටතේ ආරක්ෂක ලේකම්වරයා ලෙස උතුරේ යුද්ධයේ අවසාන අදියරේදී ඉවක් බවක් නැතිව බැරල් බෝම්බ දැමුවායි චෝදනා එල්ලවු එයාර් වයිස් මාර්ෂල් තුයියකොන්තා පත්කිරීමත්, මාලිමා ආණ්ඩුවේ ආරක්ෂක ඇමැතිකම ජනාධිපතිවරයා ලෙස අනුර කුමාර දිසානායකට හිමිවෙද්දි නියෝජ්‍ය ආරක්ෂක ඇමති මේජර් ජෙනරාල් අරුණ ජයසේකරට හිමිවන්නෙත්, මාලිමා රජය දක්වාත් ශ්‍රි ලංකාවේ ඇති ප්‍රබල මිලිටරි රාජ්‍යය හස්තය දිගුවීම නිසා නොවේදැයි පැහැදිලිවම අවධානයට ලක්වන්නක්. මේජර් ජෙනරාල් අරුණ ජයසේකරට නියෝජ්‍ය ආරක්ෂක ඇමතිකම හිමිවීම සම්බන්ධයෙන් ලංඩනයේ Tamil Gurdian පුවත්පත දක්වාලූයේ ඔහු අපරාධකරුවෙකු මෙන්ම ලමා ලිංගික ජාවාරම් හා අපරාධ සම්බන්ධයෙන් චෝදනා එල්ලවූ හයිටියේ සිටි ශ්‍රී ලංකා සාම සාධක බලකායේ ද ප්‍රධානියාව සිටි බවයි (අදාල ලිපිය මෙතනින් කියවිය හැක).

ශ්‍රී ලංකාවේ මිලිටරි බලවේගත්, රට තුල මුල් බැසගෙන ඇති අධිපති සිංහල - බෞද්ධ ස්වෝත්මවාදීන්ගේත් එකතුවක් ලෙස නිර්මාණය වී ඇතැයි සැලකෙන ශ්‍රී ලංකාවේ රාජ්‍යය තුල ක්‍රියාත්මකවන පාර රාජ්‍යය (deep state) හෙවත් අදෘශ්‍යමාන මිලිටරි හස්තය පිලිබදව මුලින්ම මතුකලේ නව සමසමාජ පක්ෂයේ නායකයා වූ ආචාර්ය වික්‍රමබාහු කරුණාරත්න මහතායි. ඒ හිටපු විදේශ ඇමැති ලක්ෂ්මන් කදිරගාමර් මහතාගේ මරණය සම්බන්ධයෙන් ප්‍රකාශයක් කරමින්. වික්‍රමබාහු එහිදී ඇසුවේ: "කදීර්ට එකම තැන, එකම වෙලාවට නාන්න දුන්නේ කවුද?" යන්නයි.

කෙසේ වෙතත් ශ්‍රී ලංකා රාජ්‍යය තුල ක්‍රියාත්මකවන බුද්ධි අංශ නිලධාරීන්ගෙන් සමන්විත පාර රාජ්‍යය (deep state) බලවේග ගැන වඩාත් හෙලිදරව් වුනේ පාස්කු ඉරිදා ප්‍රහාරය පිලිබදව විමර්ශනය කළ ජනාධිපති විමර්ශන වාර්තාවෙන් පසුවයි.. ඉන් අනතුරුව සුනන්ද දේශප්‍රිය මහතා ලියූ 'පාස්කු ඉරිදා ප්‍රහාරය හා පාර රාජ්‍යය හෙවනැලි' කෘතියේ ද මෙම බලවේග පිලිබදව සාකච්ඡාවට ලක්කර තිබෙනවා.

ඇත්ත වශයෙන් පාස්කු ප්‍රහාරයේ සත්‍යය හා යුක්තිය හෙලිකර ගැනීම යනු වත්මන් ශ්‍රී ලංකාවේ රාජ්‍යය සැකැස්ම ගැන පැහැදිලි හෙළිදරව්වක් සිදුකර ගැනීමක් යැයි දක්වන්නේම ඒ අර්ථයෙන්මයි..

මාකස් ප්‍රියන්ත පෙරේරා

13/12/24

නොත්‍ර දාමයේ ඝංඨා නද නැවැත ඇසේ

 

"නොත්‍ර දාමයේ ඝංඨාර නාදය අපගේ ඉතිහාසය සමඟ අප වෙත පැමිණ තිබේ.. අපි මෙම බිඳෙන සුළු බව, නිහතමානය සහ අභිප්‍රාය පිළිබඳ මෙම පාඩම නිධන් කරගත යුතුය.. මෙම දෙව්මැදුරේ ග්‍රේෂ්ඨත්වය සියළු දෙනාගේ කැපවීමෙන් වෙන් කරගත නොහැකිය. එක් එක් පුද්ගලයා කොතරම් වැදගත් ද යන්න කිසිදා අමතක නොකරන ලෙස එය අපට මතක් කර දෙයි..Notre-Dame යේ ඝංඨාර නාදය අපට දැන් නැවත ඇසේ - The bells of Notre-Dame have accompanied our history. We must treasure this lesson of fragility, humility, and will...The greatness of this cathedral is inseparable from the work of all, reminding us to never forget how much each person matters..the bells of Notre Dame are ringing again.."

ප්‍රංශ ජනාධිපති Emmanuel Macron එසේ පැවසුයේ 2019 ලංකාවේ පාස්කු ඉරිදා ප්‍රහාරය සිදුවීමට දින කිහිපයකට පෙර ගිනිගෙන දැවුනු ප්‍රංශයේ පැරිස් ආසන දෙව්මැදුර වන Notre-Dame දේවස්ථානය නැවත පිලිසකර කර ප්‍රතිස්ථාපනය කළ මොහොතේ ය.

මහත් ඓතිහාසික වටිනාකමක් මෙන්ම කලා නිර්මාණ, සංස්කෘතික දායාද රාශියකින්ම යුක්ත වූ පැරීසියේ නොත්‍ර දාමේ දේවස්ථානය දැවී අළුවෙමින් යන මොහොතේ දැනුන හැගීම 'නොත්‍ර දාමය අප හද තුල ඇවිල වූ ගින්න' නමින් මම කලකට පෙර සටහන් කර ඇත්තෙමි.

ගින්නෙන් පසු, ලොව පුරාම වෙසෙන දානපතියන්, ප්‍රභූන්, භක්තිවන්තයින් හා විවිධ ශිල්පීය නිපුණයන් නොත්‍ර දාමය නැවැත ගොඩනන්වන්නට විවිධ අයුරින් දායක වෙන ලදි. එය එක්තරා ආකාරය ඉතිහාසය නැවැත ප්‍රතිස්ථාපනය කිරීමේ ව්‍යාපෘතියක් බදුවිය. මම ද දිනකට හෝ පැරීසියට ගිය සෑම විටම නැවැත බිහිවෙන නොත්‍ර දාමය නැරබීමට අමතක නොකළෙමි. මේ වසරේ පැරීසියේ පැවැති ඔලිම්පික් උලෙළට සමගාමීව එහි ප්‍රතිසංස්කරණ කටයුතු නිමවේ යැයි සිතා සිටිය ද එය තවත් මාස කිහිපයක්ම පමාවිය.

ගිනි ගෙන වසර 5කට පසු, එනම් පසුගිය දෙසැම්බර් 07 වෙනිදා එය නැවැත ප්‍රතිසංස්කරණය කර ජනයාට විවෘත කරණ ලද්දේ ප්‍රංශයේ හා ලොව පුරාම විවිධ රටවලින් පැමිණි කතෝලික රදගුරුවරුන් 150 දෙනෙකුගේ සහභාගීත්වයෙන් පැවැති දිව්‍යය පුජාවකිනි.

තවද එම උත්කර්ෂවත් අවස්ථාවේ වැදගත්කම සටහන්කරීමට ප්‍රංශ ජනාධිපති ඇතුළු ප්‍රංශ රාජ්‍යය තාන්ත්‍රිකයන් ද, ඇමැරිකා එ. ජනපදයේ ඊලග ජනාධිපති ඩොනල්ඩ් ට්‍රම්ප් ද, බ්‍රිතාන්‍යයේ විලියම් කුමරු ද, යුක්‍රේනයේ ජනාධිපති සෙලෙන්ස්කි ද, ජර්මන් ජනාධිපති ඇතුළු යුරෝපා සංගමයට අයත් රාජ්‍යය නායකයි ද පැමිණ සිටියහ.

එම ඓතිහාසික අවස්ථාවේ සංස්කෘතික අගය උත්කර්ෂයට නගමින් කැනේඩියානු ජාතික Garou විසින් නොත්‍ර දාමයේ කුදාගේ (Quasimodo) විලාපය නම් ගායනයද, Julie Fuchs ගේ Laudate Dominum ද, ගිටාරය වාදනය කරමින් Vianney ගැයූ Leonard Cohen's ගේ Hallelujah (ආලේලූයියා) ප්‍රංශය භාෂාවෙන් ගැයුම ද විශිෂ්ඨය. ප්‍රංශයේ Gustavo Dudamel විසින් එම සංස්කෘතික ප්‍රසංගය මෙහෙය වන ලදි.

දැන් Youtube ඔස්සේ නැරඹීය හැකි එම වැඩසටහන නරඹන සෑම විටම මගේ මතකයට නැගෙන්නේ ප්‍රතිස්ථාපනයෙන් පසු නොත්‍ර දාමේ දේවස්ථානය නැවත විවෘත කරමින් ප්‍රංශ ජනාධිපති Emmanuel Macron සිදුකල ප්‍රකාශය ය - the bells of Notre Dame are ringing again!!

මාකස් ප්‍රියන්ත පෙරේරා

11/12/24

ජෝන් ඒ. ප්‍රනාන්දු නම් වූ මීගමුවේ ප්‍රකට අධ්‍යාපනඥයා

මීගමුවේ ප්‍රකට අධ්‍යාපනඥයකු වූ ගරු ජෝන් ඒ. ප්‍රනාන්දු මහතා අභාවප්‍රාප්ත වී ඇත. 1932, දෙසැම්බර් 12 දින උපන් ඒ මහතා මියයන විට වයස අවුරුදු 92 ක් විය. කුරුණෑගල දිස්ත්‍රික්කයේ වාරියපොල ඇතුළු පාසැල් 05 ක ගුරුවරයෙක් හා විදුහල්පතිවරයෙකු ලෙස සේවය කර තිබූ ඒ මහතා මීගමුව සා. පීතර විදුහලට අප ඇතුල්වන විටත් එහි විදුහල්පතිවරයා විය. 1980 දශකයේ දී මීගමුව සා. පීතර විදුහල අත්කරගත් අතිමහත් ජනප්‍රියත්වය හා කීර්තිය පිටුපස සිටි නියමුවා වුයේ ඒ මහතාය.

ගුරුවරයෙකු හා විදුහල්පතිවරයෙකුව සිටියදීම මීගමුවේ ගම් නියන්ගම් පුරා ඒ මහතා දිනා සිටි පිලිගැනීම හා ගෞරවාදරය නිසාම එවකට මීගමුව නියෝජනය කළ එ. ජා. පක්ෂයේ ඩෙන්සිල් ප්‍රනාන්දු ඇමැතිවරයාගේ දේශපාලන අදිකාරියේ ද්වේශයට පාත්‍ර විය. ජේ.ආර් ජයවර්ධන රජයේ හිටපු කර්මාන්ත හා විද්‍යා කටයුතු ඇමැතිවරයෙකු වූ ඩෙන්සිල් ප්‍රනාන්දු මහතා දූෂිතයෙකු නොවූන නමුදු දේශපාලන වශයෙන් අදූරදර්ශිකයෙකු විය. ඔහු වටා සිටි අගක් මුලක් නොදන්නා කේවට්ටයින්ගේ බහට ඇහුම්කන් දෙමින් තමාගෙන් පසු මීගමුවේ දේශපාලකයෙකු ලෙස ඔසවා තැබිය හැකිව තිබූ මීගමු සා. පීතරයේ ජෝන් ඒ. ප්‍රනාන්දු විදුහල්පතිතුමා සමග ඔහු එදිරිවාදිකම් ඇතිකර ගත්හ.

ක්‍රමයෙන් මහත් ජනප්‍රියත්වයට පත්වෙමින් සිටි ජෝන් ඒ. ප්‍රනාන්දු විදුහල්පතිතුමාව එම තනතුරින් හෝ මීගමුවේ සා.පීතරයෙන් ඉවත් කිරීමට ඩෙන්සිල් ප්‍රනාන්දු ඇමැතිවරයා අදිටන් කරගෙන සිටියහ. එහෙත් ඔහුට එය කරගැනීමට නොහැකිවූයේ කතෝලික සභාව ජෝන් ඒ. ප්‍රනාන්දු විදුහල්පතිවරයා සමග වූ බැවිනි.

විශේෂයෙන්ම එවකට කොළඹ අගරදගුරුවරයා වූ ගරු නිකලස් මාකස් අගරදගුරුවරයා ජෝන් ඒ. ප්‍රනාන්දු විදුහල්පතිවරයා සමග සා. ඇලෝසියස් දෙව්සත් හළේ එකට ඉගෙනගත් සමකාලීනයන්වීම නිසාත්, මීගමුවේ අධ්‍යාපනය නන්වාලීමට ජෝන් ඒ. ප්‍රනාන්දු මහතා කතෝලික පල්ලිය සමග බොහෝ කටයුතුවල නිරතවීම නිසාත්, ප්‍රදේශයේ ජනයාගේ විශාල සහයක් හිමිව තිබූ නිසාත්, ඇමැති ඩෙන්සිල් ප්‍රනාන්දු ගේ දේශපාලනය අදිකාරිය තඹ සතයකටවත් මායිම් නොකරමින් කටයුතු කිරීමට ජෝන් ඒ. ප්‍රනාන්දු විදුහල්පතිතුමාට හැකි විය.

ගලන ගඟක් නැවැතිය නොහැක්කාක් සේ දක්ෂයෙකු ලෙස පිලිගැනීමට ලක්ව සිටි ජෝන් ඒ. ප්‍රනාන්දු විදුහල්පතිතුමා ගේ දේශපාලන සම්ප්‍රාප්තිය ඩෙන්සිල්ලාට නැවතිය නොහැකි විය. මීගමුවේ නියෝජ්‍යය නගරාධිපතිවරයා ලෙස පත්වූ ඒ මහතා පසුව බස්නාහිර පළාත් සභාව ද නියෝජනය කළේය. ඉන් අනතුරුව චන්ද්‍රිකා බණ්ඩාරනායක ජනාධිපතිනිය විසින් ජෝන් ඒ. ප්‍රනාන්දු මහතාව රෝමයේ කොන්සාල්වරයෙකු ලෙස ද පත්කර යවන ලදි.

එතුමා ගේ සහෝදරියක් (ව්නී ටීචර්) හා සහෝදරයෙක් (මාරිස්ටෙලා විදුහලේ මරියනස් මාස්ටර්) ද ගුරුවරුන් ලෙස මීගමුවේ නමක් දිනාගෙන සිටියේය. මීගමුව පෙරියමුල්ල ඇලපාරේ පදිංචිව සිටි ඒ මහතා පසුව එම දේපළ විකුණා දමා කටාන දිසාගෙවත්තේ පදිංචියට ගියේය. එසේ පදිංචියට ගිය ද ජෝන් ඒ. ප්‍රනාන්දු මහතා නිතර සිය උපන් ගම් පලාතට පැමිණිමට අමතක නොකළේය. එසේ පැමිණිවිට අපගේ නිවසට ද නිතර පැමිණෙන ඒ මහතා අපේ දෙමාපියන් මෙන්ම ඔවුන්ගේ දෙමාපියන් සමග ද කාලාන්තරයක් පුරා පැවැති හිතවත්කම් සිහි කළේය. අපේ පියා (ෆීලික්ස් පෙරේරා) ජෝන් ඒ. ප්‍රනාන්දු මහතා විදුහල්පතිවරයෙකුව සිටියදී පාසැලේ කටයුතු සම්බන්ධයෙන් ද, එතුමා හා ඩෙන්සිල් ප්‍රනාන්දු ඇමැතිවරයා අතර ආරවුල් පැවති වකවානුවේදී මැදිහත්කරුවෙකු ලෙස ද කටයුතු කර තිබුණි. එම හැදුනුම්කම් නිසාම එතුමාගේ පුතෙක් කාලයක් කරගෙන ගිය මීගමුවේ ලියෝ සමාජ ශාලාවේ snooker, pool, සහ billiards ක්‍රිඩාවේ නිරතවිමට අපිට දිවා කාලයේදී දොරටු විවෘත විය. දැන් මීගමුවේ ගැටවරයන්ට එසේ snooker, pool, සහ billiards ක්‍රිඩාවේ නිරතවීමට අවස්ථාවක් හා ස්ථානයක් නැත්තටම නැති තරම්ය. 

ජෝන්. ඒ ප්‍රනාන්දු මහතා කලාව හා සාහිත්‍යය සම්බන්ධයෙන් ද විශාල උනන්දුවක් තිබූ උගතෙක් විය. මීගමුවේ ආශ්චර්යමත් ක්‍රිස්තු ප්‍රතිමාව මීගමුව සා. පීතර දේවස්ථානයේ තිබෙන කාලයේ දී මෙන්ම, එම සුරුවම මීගමුව නගර මධ්‍යයේ සිට දූවේ සින්දාත්‍රි දේවස්ථානයට රැගෙන ඒම හා රැගෙන යාමේදී ද, සා. පීතර පාස්කු  දර්ශනය සම්බන්ධයෙන් ද මහත් කැපවීමෙන් දායකවිය. අධ්‍යාපන විෂය අලළා ග්‍රන්ථ කිහිපයක්ම කර ඇති ඒ මහතා  මීගමුව සා. පීතර විදුහලේ ප්‍රධාන ශාලාව ඉදිරිපිට උත්ථාන වූ ජේසු ක්‍රිස්තුස් වහන්සේගේ ප්‍රතිමාවක් නිර්මාණය කළේය (මෙම නිර්මාණය මීගමුවේ සුප්‍රකට කලා ශිල්පියෙකු වූ N.S. ගොඩමාන්න කලාකරුවා විසින් සිදුකළේ යැයි පැවැති මතය අනුව මම එතුමාගේ නම සදහන් කළ ද එම නිර්මාණය කළේ ගොඩමාන්න කලාකරුවා නොවේ යැයි එම පවුලේ අය දන්වා සිටින ලදි. ඒ අනුව එම නිර්මාණයේ නිර්මාණ ශිල්පියා කවුරුන් දැයි නිශ්චිත කර ගත යුතුව ඇත).  

බෞද්ධ කලා සම්ප්‍රදායේ පවතින ගෞතම බුදුන් වහන්සේගේ අංග ලක්ෂණ ඇසුරෙන් නිර්මාණය කළ  අඩි 8 ක් පමණ උස වූ ජේසු ක්‍රිස්තුස් වහන්සේගේ එම ප්‍රතිමාව බොහෝ විචාරකයින්ගේ උදහසට ලක්වූවක් විය. එහෙත් ක්‍රිස්තියානි කලාව ප්‍රකට කරණ විවිධ සමාජයන් හී සම්මිශ්‍ර ලක්ෂණ පිළිබඳව වූ  විශ්වීය කතිකාවන් ඇසුරින් කරුණු ඉදිරිපත් කරමින් එම ක්‍රිස්තු ප්‍රතිමාවේ නිර්මාණාත්මක අගය ජනයාට අවබෝධකර ලීමට ජෝන් ඒ. ප්‍රනාන්දු මහතා විශාල වැඩ කොටසක් ඉටු කළේය. එකල එම ප්‍රතිමාව ගැන රූපවාහිනී වැඩසටහනකට එතුමා අදහස් දක්වා ලූ ආකාරය මට අදත් මතකය. එතුමාගේ විස්තර කිරීම් හුදෙක් එම නිර්මාණය හා අප විදුහල ද ලාංකිකයන් අතරට ගෙන ගියේය.

මීගමුව සා.පීතර විදුහලේ ප්‍රධාන ශාලාව ඉදිරිපිට තිබූ එම ප්‍රතිමාව විදුහලේ පිහිණුම් තටාකය ඉදිකිරීමට විදුහල් පුස්තකාලය දෙසට රැගෙන යන ලදි. මහත් සංස්කෘතික වටිනාකමක් ඇති එම ප්‍රතිමාව පාසැල් භූමියේ කොනකට සීමා නොකර, මීගමුව සා. පීතර විදුහලේ තාප්පයක් කඩා හෝ ඉඩක් වෙන්කරගෙන, රටේ ජනයාට ද දැක බලා ගත හැකි සේ නැවැත ස්ථානගත කළ හැකි නම් එය මීගමුව සා. පීතරය විදුහලට ද, අදාල කලාකරුවා ඇතුළු මීගමුවේ සංස්කෘතික අනන්‍යතාවයට ද, ජෝන්. ඒ ප්‍රනාන්දු නම් මීගමුවේ කීර්තිමත් අධ්‍යාපනඥට ද සිදුකරන මහා උපහාරයකි. 

මාකස් ප්‍රියන්ත පෙරේරා  

30/11/24 

* පසුව ලියමි - මීගමුව සා. පිතර විදුහලේ ප්‍රතිමාව නිර්මාණය මීගමුවේ සුප්‍රකට කලා ශිල්පියෙකු වූ N.S. ගොඩමාන්න කලාකරුවා විසින් සිදුකළේ යැයි පැවැති මතය අනුව මම එතුමාගේ නම සදහන් කළ ද එම නිර්මාණය කළේ ගොඩමාන්න කලාකරුවා නොවේ යැයි එම පවුලේ අය දන්වා සිටින ලදි. ඒ අනුව එම නිර්මාණයේ නිර්මාණ ශිල්පියා කවුරුන් දැයි නිශ්චිත කර ගත යුතුව ඇත.

"නිධානය"- නිර්මාණාත්මක යාථාර්ථයක්ද?

ඔය නිධන් ගොඩගන්න යන කථා ඇහැද්දී මට මතක්වෙන්නේ කාලේකට කලින් ලෙස්ටර් ජේමිස් පිරිස් සිළුමිණ පුවත්පතට ලබාදී තිබූ සම්මුඛ සාකච්ඡාවක්.

ලෙස්ටර් ජේමිස් පීරිස් 'නිධානය' චිත්‍රපටය කරන්න කලින් ඒ චිත්‍රපටය පදනම් වූ 'නිධානය' කෙටිකතාව ලියූ ජී. බී සේනානායකව හමුවෙන්න ජී. බී. සේනානායකගේ කදානේ නිවසයට ගිහින් එහිදී ඇතිවූ කතා බහක් ගැන විස්තරයක් ඒ සම්මුඛ සාකච්ඡාවේ පළවෙලා තිබුනා.

කෙටිකතාවක් ඇසුරෙන් චිත්‍රපටයක් කිරීම ලේසි නැති නිසා, එම කෙටිකතාවට පදනම් වූ කිසියම් සිද්ධියක්, වස්තු බීජයක්, වෙනත් කතාවක් තියෙනවා ද කියලා තොරතුරු හොයා බැලීම තමයි ලෙස්ටර් ජේමිස් පීරිස් හා ජී. බී සේනානායක අතර ඇතිවූ එම හමුවේ මුඛ්‍යය අරමුණ වී ඇත්තේ.

එම හමුවීමෙන් පසුව ලෙස්ටර් ජේමිස් පීරිස් තේරුම් ගත්තු දෙයක් තමයි ලූ ජී. බී. සේනානායක 'නිධානය' කෙටිකතාව ලියලා තියෙන්නේ අභ්‍යන්තර වශයෙන් කඩාවැටුන මනුෂ්‍යයෙක්ගේ චිත්ත ස්වභාවය මනෝ මූලිකව විනිවිද දැකීමට බව.

ඒ ප්‍රස්තුතයම තමන්ගේ 'නිධානය' චිත්‍රපටය තුලින් ද නිරූපනය කිරීමට තමන් උත්සාහ ගත් බවක් ද සිළුමිණ පත්තරේ පලවු ලෙස්ටර් ජේමිස් පීරිස් ලබා දුන් එම සම්මුඛ සාකච්ඡාවේ දක්වා තිබුනා.

'නිධානය' චිත්‍රපටය විචාරය කරපු බොහෝ ලාංකික සිනමා විචාරකයෝ ලෙස්ටර් ජේම්ස් පීරිස් සිළුමිණ පුවත්පත්ට ලබාදුන් එම සම්මුඛ සාකච්ඡාව 'නිධානය' චිත්‍රපටය විචාරය කිරීමේ පදනම ලෙස භාවිතා කළ බවක් ද පෙනී යනවා. "එය කළේ මා නොව මා තුළ සැඟ වී සිට එවේලෙහි මට ආවේශ වූ යක්ෂයකු විසිනැයි සිතමි” යැයි කියන දෙබස් කාණ්ඩය එම චිත්‍රපටය විචාරය කරද්දී නිතර මතුවෙන්නේ ඒ නිසා වෙන්න පුලුවන්.

මගේ අවධානය ඒ ගැන නෙමේ..

මගේ ප්‍රශ්ණය, ජීවිතය ජී. බී. සේනානායක වගේම ලෙස්ටර් ජේම්ස් පීරිස් ද ඔවුන් ඔවුන්ගේ 'නිධානය' නිර්මාණයන් ඔස්සේ කියන්න හදන්නේ 'මිනිසෙකු අභ්‍යන්තර වශයෙන් කඩාවැටුනාම මොනතරම් පිරිහෙනවා ද' යන්න නම්:

අධිකරණය, පොලීසිය, හමුදාව, පතල් හා කැනීම්, පුරාවිද්‍යා දෙපාර්තමේන්තුව ඇතුළු රාජ්‍යය මැදිහත්වීමෙන් සිදුකළ 'වේයන්ගොඩ නිධානය' කැනීමෙන් කියවෙන්නේ නිධන් විස්වාස කරන්න තරම් ශ්‍රී ලාංකා රාජ්‍යය මනෝ මූලික හා මතවාදීමය වශයෙන් පවා අභ්‍යන්තර වශයෙන් මොන තරම් පිරිහෙලා යන්න නෙමේ ද?

මාකස් ප්‍රියන්ත පෙරේරා

24/11/24

දෙවියෝ ට්‍රම්ප්ගේ ජීවිතය බේරුවේ ද?

"God spared my life for a reason" - 

දෙයියෝ එයාගේ ජීවිතය බේරුවේ හේතුවක් ඇතිවයි කියලා ජනාධිපතිවරණය දින්නයින් පස්සේ ට්‍රම්ප් කිව්වා.. දැන් ඒක හැම මධ්‍යයකම ලොකු අකුරින් පළවෙලා තියෙනවා. 

ඝාතන තැතකින් දෙය්යෝ ඔහුගේ ජිවිතය බේරුවේ මොන හේතුවක් ඇතිව ද? යන්න ගැන කියන්න අපි කවුරුත් දන්නේ නෑ.. ඒත් ඇමැරිකානු ක්‍රිස්තියානි කණ්ඩායම් ට්‍රම්ප්ගේ ජය වෙනුවෙන් දැඩි මැදිහත්වීමකින් කටයුතු කළා. විශේෂයෙන්ම Alabama, Arkansas, Georgia, Louisiana, Mississippi, Missouri, Nebraska, North Carolina, Oklahoma, South Carolina, Florida, South Dakota සහ Tennessee වගේ ඇමැරිකානු Bible Belt එකේ දැවැන්ත සහයෝගය හිමිවුනේ ට්‍රම්ප්ට. කමලා හැරිස්ට ඒ ප්‍රදේශය වල නිසි සහයක් නොලැඹීම ඇගේ පරාජයට එක් හේතුවක්. 

ට්‍රම්ප් ආගමික අනන්‍යතාවයක් නියෝජනය කරනවද? නැද්ද? කියන එක කොහොම වුනත් ගබ්සාවට විරුද්ධවීම, බයිඩන්ලගේ, කමලා හැරිස්ලගේ ඩිමොක්‍රටික් පක්ෂය සහයෝගය දෙන ලිබරල් වැඩපිලිවෙළ හැකිලීම, වැනි එරට ක්‍රිස්තියානි කණ්ඩායම්වල ඉල්ලිම් ඉටුකිරීමට නම් ට්‍රම්ප්ගේ සහයෝගය හිමිවේවි. 

ඒ වගේම යුක්‍රේන - රුසියානු යුද්ධය, මැදපෙරදිග අර්බුදය ආදියටත් මැදිහත්වේවි. ඒ සියල්ලටම වඩා ඇමැරිකාව තුල මතුවි ඇති අභ්‍යන්තර ආර්ථික අර්බුදය, විරැකියාව, සංක්‍රමණික අර්බුදය, නිවාස අහිමි ජනයාගේ ප්‍රශ්නය, සෞඛ්‍ය හා අධ්‍යාපන අර්බුදය ගැන අවදානය යොමු කරන්න ඔහුට තදින්ම සිදුවේවි. ඔහුගේ ඒ මැදිහත්වීම තුල දෙවියෝ ඔහුගේ ජීවිතය බේරුවේ කුමන හේතුවකට ද යන්න කාලයත් සමග විමසා බැලිය හැකිවේවි. අන්න ඒ තත්වයන් තුල අර ඇල්බට් අයින්ස්ටයින් වරක කිව්ව වගේ දෙවියෝ දාදු කෙළින්නේ ද? යන්න හෙළිවේවි

 - "God does not play dice" !!

මාකස් ප්‍රියන්ත පෙරේරා

06/11/24

Quincy Jones ලාංකික සංගීත ක්ෂේත්‍රය තුල අවධානයට ලක් නොවුයේ ඇයි?

දැන් ලංකාව තමන්ගේම වූ ලෝකයක හිරවෙමින් තියෙන්නේ...සෙසු ලෝකයේ වෙන්නේ මොකක්ද කියන්න දන්නේ නෑ... මෙච්චර උණුසුමක් තියෙන ඇමැරිකානු ජනාධිපතිවරණය ගැන පවා එහෙට එහෙම දැනෙන්නේ නෑ... එහෙව් එකේ Quincy Jones ගේ මරණය කොහොමත් අදාල වෙන්නේ නෑ... Quincy Jones කියන්නේ කවුද කියලාවත් බොහෝ දෙනෙක් දන්නේ නෑ... හැබැයි Quincy Jones ගේ නම නොදන්නවා වුනත් අතිශය ජනප්‍රිය වූ ඔහුගේ ඇතැම් සංගීත නිර්මාණ නම් රටේ මිනිස්සු අහලා තියෙනවා. විශේෂයෙන්ම මයිකල් ජැක්සන්ගේ Billie Jean, We Are the World, Thriller, Bad, Don’t Stop වගේ සින්දු.

ඒවත් අහලා තියෙන්නේ මයිකල් ජැක්සන් කියන සින්දු විදිහට මිසක් ඒ සිංදු හැදුව කෙනා දන්නේ නැතිවයි. අපි "නිර්මාණකරුවා දන්නේ නැති, නිර්මාණ පමණක් රසවිඳින ජාතියක්" කියලා මම facebook ආපුම කාලේ නිමල් මෙන්ඩිස් ගැන ලියද්දි ලිව්වා (ඒ ලිපිය මෙතනින් පිවිස කියවන්න පුලුවන්). ඒ වගේම තමයි අපි මයිකල් ජැක්සන්ගේ සින්දු අහලා තිබුනට, ඒවා දන්නවා වුනාට, ඒවා බලලා තියෙනවා වුනාට, මයිකල් ජැක්සන්ගේ සිංදු විතරක් නෙමේ මයිකල් ජැක්සන්ගේ ස්වතන්ත්‍ර සංගීත ජීවිතයම ගොඩනැගුවේ Quincy Jones කියලා ලංකාවේ මයිකල් ජැක්සන්ගේ සිංදු අහන හුගාක් දෙනෙක් දන්නේ නෑ.

මයිකල් ජැක්සන්ගේ නිර්මාණ ඔස්සේවත් Quincy Jones ව හදුනා නොගත් කෙනෙකුට Frank Sinatra ගේ Fly Me to the Moon සින්දුව, Ray Charles ගේ One Mint Julep සින්දුව, Lesley Gore ගේ My Party වගේ සිංදු නිර්මාණය කළේ ඔහු, Elvis Presley ගේ සින්දුවල second trumpet part එක ගහන්නේ ඔහු...The Pawnbroker වගේ චිත්‍රපටිවල ඉදන් Prince of Bel-Air, The Color Purple වගේ චිත්‍රපටිවල සංගීතය නිර්මාණය කළේ ඔහු වගේ කාරණා කිසිසේත්ම හදුනාගනී කියලා හිතන්න බෑ...

Quincy Jones වගේ අය විතරක් නෙමේ, බටහිර ජනප්‍රිය, pop, මෙන්ම ශාස්ත්‍රීය සංගීතය ගැන වගේම පෙරදිග සංගීතය ගැන වුනත් ලංකාවේ ඒ හැටි මුල් බැසගත්ත කතිකාවක් නෑ... විවිධ සංගීත ශානර ගැන ගැඹුරු කතිකාවක් නෑ... instrument එකක්, සංගීත භාණ්ඩයක්, වාදනය කරන්න පුලුවන් ගොඩාක් අය හිටියට music notes කියවන්න, ලියන්න පුලුවන් අය ඉතා අඩුයි. ගීත රචනය, තනු නිර්මාණය හා නිෂ්පාදනය ආදිය ගැන අවධානය යොමු කළත් සංගීතය කියන්නේ ප්‍රසාංගික හා නිර්මාණාත්මක (performance and composition) මාදිලියකට (featured) පමණක් සීමා නොවූ මානව ශාස්ත්‍ර සංස්කෘතික දෘෂ්ටිකෝණයකින් (perspective) මානව චර්යාව විශ්ලේෂණය කළ හැකි විෂයක් ලෙස සංගීතය හැදෑරීම ලංකාවට තවමත් ආගන්තුකයි.

එතරම්ම දුරකට නොගියත් අඩුම තරමේ සමකාලීන සංගීත නිර්මාණ පිටුපස සිටින විශිෂ්ඨයන් පිලිබදවත් ලාංකිකයන්ට එතරම්ම අවබෝධයක් නෑ...ඒ නිසා තමයි මයිකල් ජැක්සන් ගේ සින්දු ඇහැව්වත් එම නිර්මාණ පිටුපස සිටි Quincy Jones වගේ කෙනෙකුව මගහැරෙන්නේ... එහෙත් ඇත්තම ප්‍රශ්නය අවුරුදු 91ක් ජීවත්වූ, ඒ වගේ දැවැන්තයෙක්ව ලාංකිකයන්ට මගහැරෙන්නේ කොහොමද? සංගීතය පිලිබද ලාංකික කතිකාව තුලට ඔහුව හසු නොවෙන්නේ කොහොමද? කියන එකයි...ඒ අපි සෙසු ලෝකයෙන් ක්‍රමයෙන් දුරස්වෙමින් යන නිසා ද?

මාකස් ප්‍රියන්ත පෙරේරා

05/11/24

විමුක්ති දේවධර්මයේ පියා ගුස්ටාවෝ ගුටෙරෙස් (Gustavo Gutiérrez) පියතුමා අභාවප්‍රාප්ත වෙයි

විමුක්ති දේවධර්මයේ පියා ලෙස සැලකූ පේරූ (Peru) රටේ ගුස්ටාවෝ ගුටෙරෙස් (Gustavo Gutiérrez) පියතුමා වසර 96 ක් ආයූ වළදා අද (23/10/24) මියගොස් තිබෙනවා. 1928 ජුනි 08 වෙනි දින පේරූ රටේ ලීමා (Lima) නුවර උපත ලැබූ එතුමා ඩොමිනිකානු නිකායේ පියතුමෙකු ලෙස 1959 දී පුජාත්වරයට පිවිසූවෙක්. බෙල්ජියමේ ලුවේන් කතෝලික විශ්ව විද්‍යාලයේ (Catholic University of Leuven) හා ප්‍රංශයේ ලියෝන් විශ්ව විද්‍යාලයේ අධ්‍යාපන හැදෑරූවෙක්. පසුව පැරීසියේ Notre Dame විශ්ව විද්‍යාලයේ ආචාර්යවරයෙක් ලෙස සේවය කළ පියතුමෙක්.

1971 ගුස්ටාවෝ ගුටෙරෙස් (Gustavo Gutiérrez) පියතුමා පල කළ A Theology of Liberation කෘතිය කතෝලික සභාව තුල විශාල සාකච්ඡාවක් ජනිත කළ කෘතියක් බවට පත්වූවා. එම ප්‍රකාශණය තුල නිර්ධන පාංතීක විමුක්තිය, මාක්ස්වාදී න්‍යායන්, ෆැසිස්ට්වාදී ප්‍රවනතා ගැනත්, යටත් විජිත පාලන සමයන්හී ප්‍රවර්ධනය කළ කිතුණු ශුභාරංචි ආඛ්‍යානවල ඇති රළු බවත්, එහි බටහිරවාදී අර්ථ නිරූපනයන් ගැනත් සංශ්ලේෂණාත්මක අධ්‍යයනයක් (synthesis study) ලෙස සලකුණු ලැබූවා.

ඒ සමග ඔහු මධ්‍යම සහ දකුණු ඇමරිකාවේ විමුක්ති දේවධර්මාචාර්යවරුන් (liberation theologians) වූ බ්‍රසීලයේ ලෙනාඩෝ බොෆ් (Leonardo Boff), උරුගුවේහි ජුවාන් ලුයිස් සෙගුන්ඩෝ (Juan Luis Segundo) ආදීන් පනපෙවු කතෝලිකයන්ගෙන් “කාලයේ සලකුණු කියවන්න” (Read the signs of the times) කණ්ඩායමේ/කවුන්සිලයේ ප්‍රධාන න්‍යායාචාර්ය වරයා ලෙස ද සලකනු ලැබූවා.

එහෙත් නිල කතෝලික සභාව තුල ගුස්ටාවෝ ගුටෙරෙස් (Gustavo Gutiérrez) පියතුමා ගේ කෘතිය (Theology of Liberation) මෙන්ම විමුක්ති දේව ධර්මය පිලිබද කතිකාවත් කිසියම් ආකාරයක තර්ජනයක්, අනතුරක් ලෙස සැලැකූ කාලයක් ද තිබුනා.

දෙවන ජුවාම් පාවුළු පාප්වහන්සේ වතිකානුවෙහි මූලධර්ම කාර්යාලය වන 'ඇදහිල්ලේ ධර්මය සඳහා වූ සභාවෙ' හි (Congregation for the Doctrine of the Faith - C.D.F) ප්‍රධානියා ලෙස (පසුව 16 වෙනි බෙනඩික්ට් පාප් වහන්සේ - Pope Benedict XVI) ලෙස පත් වූ කාදිනල් ජෝසෆ් රැට්සිංගර්ව 1981 දී පත් කිරීමෙන් අනතුරුව කතෝලික සභාවට නව යුගයේ මුහුණදීමට ඇති මූලධර්මවාදී ගැටළු ගැන අධ්‍යායනය හා ක්‍රියා කිරීම ඇරබුවා.

කාදිනල් ජෝසෆ් රැට්සිංගර්ගේ මුල්ම කාර්යන් අතර කතෝලික විශ්ව විද්‍යාල තුල ජනප්‍රිය වෙමින් පැවැති විමුක්ති දේවධර්මයේ (liberation theology) ඉගැන්වීම් පිලිබදව අවධානය යොමු කිරීම දැකිය හැකි වුනා. කතෝලික සභාව තුලින්ම මතුවෙමින් පැවැති විමුක්ති දේවධර්මය පිලිබදවූ ඉගැන්වීම් කිසියම් ආකාරයක දේශපාලන ප්‍රවනතාවයක් ලෙස ද සැලකුවා.

විමුක්ති දේවධර්ම පිලිබව ද පූර්ණ අධ්‍යයනකින් අනතුරුව කාදිනල් රැට්සිංගර්ගේ කාර්යාලය (C.D.F) කතෝලික සභාව තුල ජනප්‍රිය වෙමින් පැවැති විමුක්ති දේවධර්මයේ (liberation theology) ඇතැම් ඉගැන්වීම් නිවැරදි නොවන බවත් එමගින් "දෙවියන් වහන්සේ ඔහුගේ පල්ලියට භාර දුන් ක්‍රිස්තියානි පණිවිඩය විකෘති කිරීමක්" (“a perversion of the Christian message as God entrusted it to His Church”) කර ඇති බවත් ප්‍රකාශයට පත්කළා.

එමෙන්ම විමුක්ති දේව ධර්මය ප්‍රචලිත කල පේරු හි ගුස්ටාවෝ ගුටෙරෙස් (Gustavo Gutiérrez) පියතුමා ආදින් පිළිබඳ විමර්ශනයක් කිරීමටත් 'පැහැදිලි කිරීම්' ඉල්ලා සිටීමටත් දැඩිව කටයුතු කළා.

එම ක්‍රියාමාර්ග මධ්‍යම සහ දකුණු ඇමරිකාවේ විමුක්ති දේවධර්මාචාර්යවරුන් (liberation theologians) ගේ බලය බිදීමටත්, කතෝලික පල්ලිය තුල ඔවුන් අත්කරගත් සුවිශේෂී අවධානය අහිමි කිරීමටත් හේතුවූවා.

එහි වගකිවයුත්තා ලෙස ඇගිල්ල දිගුවුයේ දෙවන ජුවාම් පාවුළු පාප්වහන්සේට නොව වතිකානුවෙහි මූලධර්ම කාර්යාලය වන ඇදහිල්ලේ ධර්මය සඳහා වූ සභාවෙහි (Congregation for the Doctrine of the Faith - C.D.F) ප්‍රධානියා ලෙස කටයුතු කළ කාදිනල් ජෝසෆ් රැට්සිංගර් වෙතයි.

විශේෂයෙන්ම 1989 දී එල් සැල්වදෝරයේ මධ්‍යම ඇමරිකානු විශ්ව විද්‍යාලය තුල එරට හමුදාවට අනුයුක්ත මිනීමරුවන් විසින් ඉග්නාසියෝ එල්ලකුරියා පියතුමා (Father Ignacio Ellacuría) ඇතුළු විමුක්ති දේවධර්මය වෙනුවෙන් හඬ නැගූ ජේසු නිකායික පියතුමන්ලා හය දෙනෙකු, ඔවුන්ගේ ගෘහ සේවිකාව සහ ඇගේ දියණිය ඝාතනය කිරීමට එරෙහිව කතෝලික සභාව දැඩි පියවරක් නොගැනීමට කටයුතු කිරීම සම්බන්ධයෙන් අප්‍රසාදය යොමුවුයේ ද කාදිනල් ජෝසෆ් රැට්සිංගර්ට යි. ලංකාවේ තිස්ස බාලසූරිය පියතුමාට අතුරු තහනම් නියෝගයක් පනවමින් බාලසූරිය පියතුමා ලියු 'Mary and human Liberation' කෘතිය සම්බන්ධයෙන් විමර්ශනයක් කලේ ද කාදිනල් ජෝසෆ් රැට්සිංගර්ගේ කවුන්සිලය ය. (එම කෘතිය පිලිබදව වූ තහනම මෙන්ම තිස්ස බාලසූරිය පියතුමාට පැනවූ අතුරු තහනම් නියෝගයද විමර්ශනයකින් පසුව වතිකානුව ඉවත් කරගත්තා)

කාදිනල් ජෝසෆ් රැට්සිංගර් පිලිබදව වූ විරෝධය හා අප්‍රසාදය ඔහු 16 වෙනි බෙනඩික්ට් පාප් වහන්සේ - Pope Benedict XVI - වූ පසුවත් විමුක්ති දේවධර්ම පිලිබදව අදහස් දැරූවන් දිගින් දිගටම ගෙනගියා. 16 වෙනි බෙනඩික්ට් (කාදිනල් ජෝසෆ් රැට්සිංගර්) පාප්තුමා වාමවාදී/ මාක්ස්වාදී මුහුණුවරක් ගත් විමුක්තිවාදී දේශපාලන ප්‍රවනතාවයන්ගෙන් කතෝලික සභාව බේරා ගත්තෙක් ලෙස ද ඇතමෙක් සලකන අතරම ගුස්ටාවෝ ගුටෙරෙස් (Gustavo Gutiérrez) පියතුමා සභාගත කළ විමුක්ති දේවධර්මය පිලිබද ඉගැන්වීම් ක්‍රිස්තියානි ආගමේ විමුක්තිවාදී හරය නැවැත මතු කර ගත් මහා ප්‍රවනතාවයක් ජනිත කළ පියතුමෙක් ලෙස ද සැලකෙනවා.

කෙසේ වෙතත්, 2017 ජනවාරියේ ස්පාඤ්ඤයේ El País පුවත්පත සමඟ කළ සම්මුඛ සාකච්ඡාවේදී ෆ්‍රැන්සිස් පාප් වහන්සේ සිය මව් රට වූ ආර්ජන්ටිනාව ඇතුළු ලතින් ඇමරිකාවේ පැතිරුණු විමුක්ති දේවධර්මය ධනාත්මක දෙයක් ලෙස සදහන් කර තිබෙනවා.

එහෙත් යථාර්ථය මතු කරළීම සදහා විමුක්ති දේවධර්මය මාක්ස්වාදී විශ්ලේෂණ තෝරා ගැනීම හෙළා දැකීමට කාදිනල් ජෝසප් රැට්සිංගර් (පසුකාලීන16 වෙනි බෙනඩික්ට් පාප් වහන්සේ - Pope Benedict XVI ) පියවර ගැනීම නිවැරදි යැයි ද දැක්වූවා.

"ඔහු (කාදිනල් ජෝසප් රැට්සිංගර්) ඇදහිල්ලේ මූලධර්මයේ ප්‍රධානියා (C.D.F) වූ විට ගුස්ටාවෝ ගුටෙරෙස් (Gustavo Gutiérrez) පියතුමා ඇතුළු විමුක්ති දේවධර්මය පිලිබදව ඉගැන්වීම් දැඩි අධ්‍යානයකින් අනතුරුව මූලික නිරීක්ෂණ දෙකක් ඉදිරිපත් කළ බවත්, එකක් නම් විමුක්ති දේවධර්මය පිලිබදව ඉගැන්වීම් හී යථාර්ථය ඉස්මතු කිරීම සදහා මාක්ස්වාදී විග්‍රහය භාවිතා කර ඇති" බවත්, දෙවැන්න නම් "විමුක්ති දේවධර්මයේ ධනාත්මක ප්‍රවේශයන් සම්බන්ධයෙන් සභාවේ නිසි අවධානය යොමුවිය යුතු බවත්" දැක්වු බව ෆ්‍රැන්සිස් පාප් වහන්සේ 2017 ජනවාරියේ ස්පාඤ්ඤයේ El País පුවත්පත සමග දී තිබූ එම සාකච්ඡාවේදී ප්‍රකාශ කර තිබුනා.

එම නිර්දේශ දෙවන ජුවාම් පාවුළු පාප්වහන්සේ වෙත, වතිකානුවෙහි මූලධර්ම කාර්යාලය වන ඇදහිල්ලේ ධර්මය සඳහා වූ සභාවෙහි (Congregation for the Doctrine of the Faith - C.D.F) ප්‍රධානියා ලෙස කටයුතු කළ කාදිනල් ජෝසෆ් රැට්සිංගර් “'විමුක්තියේ දේවධර්මයේ' ඇතැම් අංශ පිළිබඳ උපදෙස්" - Libertatis Nuntius (1984) හා ක්‍රිස්තියානි නිදහස සහ විමුක්තිය පිළිබඳ උපදෙස්" - Libertatis Conscientia (1986) යන ලේඛන දෙකක් වශයෙන් ඉදිරිපත් කර ඇති බව දැන් පැහැදිලියි.

වසර ගණනාවක් පුරාම වතිකානුව ගුස්ටාවෝ ගුටෙරෙස් (Gustavo Gutiérrez) පියතුමාගේ ලේඛණ පරීක්ෂා කර ඒ සම්බන්ධයෙන් දේවධර්ම පිලිබදව සිය ස්ථාවරයන් සහිතව සිය විචාරයන් ඉදිරිපත් කළ බවත් කියවෙනවා. 2006 දී පේරූ බිෂොප්වරුන්ගේ සමුළුව වාර්තා කළේ වතිකානුව 2004 දී ගුස්ටාවෝ ගුටෙරෙස් (Gustavo Gutiérrez) පියතුමාගේ සමහර කෘතිවල අඩංගු ගැටළුකාරී කරුණු පැහැදිලි කරගැනීමේ ක්‍රියාමාර්ග අවසන් කර ඇති බව දැන්වූ බවයි.

දශක ගණනාවක් පුරා ගුස්ටාවෝ ගුටෙරෙස් (Gustavo Gutiérrez) පියතුමා හා වතිකානුව අතර ඇති වූ මතවාදී අරගලය දෙපිලම කිසියම් ආකාරයක පෝෂණයක් ලබා දෙමින් අවසන් වී ඇති බව ගුස්ටාවෝ ගුටෙරෙස් (Gustavo Gutiérrez) පියතුමාගේ "Ecclesial Koinonia" ලිපිය සංශෝධිත දෙවන අනුවාදය ලෙස 2004 දී පලකිරීම ඔස්සේ පෙනී යන බව විචාරකයින්ගේ මතයයි.

එය වතිකානුවත් ගුස්ටාවෝ ගුටෙරෙස් (Gustavo Gutiérrez) ත්, විමුක්ති දේවධර්ම කණ්ඩායම අතරත් එකගතාවයකට පැමිණීමක් හා දෙපාර්ශවයේම එකිනෙකාගෙන් පෝෂණය ලබමින් අන්‍යොන්‍ය අවබෝධයකට පැමිණීමක් ලෙස ද දැක්විය හැකියි.

ගුස්ටාවෝ ගුටෙරෙස් (Gustavo Gutiérrez) පියතුමාට ස්වර්ගීය ජීවනය අත්වේවා!!❤️

මාකස් ප්‍රියන්ත පෙරේරා

23/10/24 

කාදිනල් ජෝසප් රැට්සිංගර් හෙවත් XIV වෙනි බෙනඩික්ට් පාප්වහන්සේ ගැන මෙම යොමුවෙන් කියවන්න

Carlsberg හැදූ ඩෙන්මාර්කයේ Little Mermaid ප්‍රතිමාව

 

අහලා තියෙනවද The Little Mermaid කියන සුරංගනා කතාව...

අර රජ කුමාරයෙකුට ආදරේ හිතිලා මනුස්සයෙක් වෙන්න ගිය දියකිදුරිය ගැන කතාව... 

ඒ ආදරේ නිසාම මායාකාරියෙකුට සිය කටහඩ  දීලා, වලිගේ හලලා, මනුස්සයෙක් වුනු 15 හැවිරිදි දියකිදුරිය ..

ඒත් හිරිමල් වියේ උන්නු දියකිදුරියට අර කුමාරයාව හිමිකරගන්න බැරිවෙනවා... 

කුමාරයා, කුමාරියෙක් කසාද බදිනවා...සිය ජීවිතේ සියල්ල අතහැරලා මනුස්සයෙක් වූ ඒ දියකිදුරියගේ පපුව පැලිලා මැරෙනවා...

එහෙත් ඇගේ ආත්මය සදාතන ජීවන අත්කරගන්නවා.. 

නවකතා, චිත්‍රපට, බැලේ ආදී  විවිධ කලා නිර්මාණ රාශියකට වස්තුවිෂය වූ මේ අනුවේදනීය කතාව මුලින්ම ලිව්වේ ඩෙන්මාර්කයේ Hans Christian Andersen කියන ලේඛකයා. ඒ 1837 තරම් ඈතක..ඒ ලේඛකයා වගේම මේ කතාවත් ඉතාම ජනප්‍රියයි. 

සුරංගනා කතාවලට පෙම්බදින අය මේ කුඩා දියකිදුරිය ගැන හරියට දුක්වෙනවා.. ඒ තරමටම ලයාන්විත කතාවක්. 

මේ කුඩා දියකිදුරිය සිහිකරමින් ඩෙන්මාර්කයේ කෝපන්හේගන් අගනුවර කුඩා මූර්තියක් නිර්මාණය කර තිබෙනවා...

මම ගියා ඒක බලන්න... එය ඉදිකර ඇත්තේත් 1913 යි, අවුරුදු 100කටත් වඩා පරණයි.. 

ඒ නිර්මාණය සදහා මුදල් වියදම් කර ඇත්තේ ඒ කාලේ ඩෙන්මාර්කයේ කෝපන්හේගන් නුවර විශාල තැබැරුම් හිමියෙක්වූ දානපතියෙක්.. 

ඔහු නමින් Carl Jacobsen...

ඔහු තමයි Probably The Best Beer In The World කියලා ඇඩ් දාන Carlsberg බියර් කොම්පැනියේ නිර්මාතෘ. හැබැයි ඔහුගේ නමවත් මේ මුර්තියේ ගහන්න දිලා නෑ...

කතාව ලියූ Hans Christian ගේ නමයි, මුර්තිය නිර්මාණය කල Edvard Eriksen ගේ නමයි විතරයි ගහන්න ඔහු යෝජනා කරලා තියෙන්නේ.. ඔය ප්‍රතිමාව හදන්න වියදම් කල තැබෑරුම් හිමියාත් අර කුඩා දියකිදුරියට ආදරේ කරපු කෙනෙක් හෝ ඒ කුඩා Little Mermaid ට ආදරය කල කෙනෙකුට ආදරය කල කෙනෙක් වෙන්නම ඕනෑ....

කතාවට කියන්නේ Carl Jacobsen ඔය කුඩා දියකිදුරියට ආදරේ කරන්න ගත්තේ Little Mermaid බැලේ එක බලලලු...එහි රගපෑ නිලියක් ගැන වහවැටිල ලු...

Marcus Priyantha Perera

17/10/23

අනුරගේ විදානය හා අයියන්දේගේ ඉරණම

 

ජනාධිපති අනුර කුමාර දිසානායක මෙවර මහමැතිවරණයට ඉදිරිපත් වී සිටින සිය අපේක්ෂක කණ්ඩායම අමතා සිදුකල කතාව සම්බන්ධයෙන් බොහෝ යහපත් ප්‍රතිචාර පලවී තිබුණා. එය විශිෂ්ඨ කතාවක් බවත් ඔහු අති දක්ෂ සංනිවේදකයෙක් බවටත් විවාදයක් නෑ. මේ මොහොතේ ලාංකික සමාජය තුල සිටින විශිෂ්ඨතම දේශපාලන සංවේදකයා අනුර කුමාර දිසානායක මහතා වන බැවින් ඔහු ඉදිරිපත් කරන අදහස් සම්බන්ධයෙන් කිසියම් හෝ ඇබ්බැහිවීමකින් හෝ ආසක්තවීමකින් තොරව නිසි විචාරයකින් යුතුව එම අදහස් විමසුමකට ලක්කරන්නේ ද යන්න සැක සහිතයි.

ජනාධිපතිවරයා සිය අපේක්ෂක කණ්ඩායම අමතා ඉරිපත් කළ කතාව තුල පැහැදිලිව කරුණු 3ක් අඩංගු වූ බව පෙනී යන්නක්. එක් කරුණක් නම් (1) ජනාධිපතිවරණයේ ප්‍රතිඵල ගැන ඔහුගේ කියවීමයි. (2) දෙවැන්න නම් මෙවර මැතිවරණයට ඉදිරිපත් කර ඇති ඔවුන්ගේ කණ්ඩායමට පැවැරී ඇති වගකීම පිලිබදව පැහැදිලි කිරීමයි. තුන්වැන්න නම් (3) එම නියෝජිතයන් වගකිවයුතු පාර්ශ්වය පිලිබදව අපේක්ෂක කණ්ඩායම දැනුවත් කිරීමයි.

ප්‍රථමයෙන්ම (1) සලකා බැලුවහොත් මෙවර ජනාධිපතිවරණයේ ප්‍රතිඵලය අනුර කුමාර දිසානායක මහතා ව්ග්‍රහ කළේ "(A) නව ආර්ථික ගමනක උවමනාව වෙනුවෙනුත්, (B) නව දේශපාලනය සංස්කෘතියක උවමනාව වෙනුවෙනුත්, (C) ජනතාව හා දේශපාලකයා අතර නව සම්බන්ධයක උවමනාව වෙනුවෙනුත්" ප්‍රකාශ කළ ජන්දයක් ලෙසයි. ජනාධිපතිවරණයේදී ඔවුන් ලැබූ චන්ද ප්‍රමාණය හා ප්‍රතිශතය පිලිබදව යම් අවධාරණය කිරීමකට ලක් කිරීමකින් තොරව වුනත් ඔවුන්ට ලැබූ චන්දය පැහැදිලිවම මතවාදීමය හා දේශපාලනය සංස්කෘතියේ වෙනසක් වෙනුවෙන් ප්‍රකාශ කළ චන්දයක් ලෙස අර්ථ නිරූපනය කරගැනීම ඕනෑම දේශපාලන ව්‍යාපාරයක දේශපාලන ව්‍යාපෘතියේ කොටසක්.

ජනාධිපතිවරණයේදී ඔවුන්ට ලැබූන චන්ද ප්‍රමාණය ප්‍රකාශිත චන්ද සංඛ්‍යාවෙන් 42% ක සුළුතර චන්දයක් වුවත් එය "අලුත් දේශපාලන ගමනකට රට ප්‍රවිශ්ට කරනවාද ? නැතිනම් පරණ දේශපාලන ගමනම යනවාද? සම්බන්ධයෙන් ජනතාව ගත් දැඩි දේශපාලන තීරණයක්" ලෙස අතිශයෝක්තියට නැන්වීම (exaggerate) යතාර්ථයට තරමක් දුරස්. එහෙත් අනුර කුමාර දිසානායක ජනාධිපතිවරයා ඔවුන්ගේ මහමැතිවරණ අපේක්ෂකයින් ඉදිරියේ එම චන්ද ප්‍රතිඵලය රටේ සමස්ථ සමාජයේම ඒකායන ප්‍රකාශණයක් ලෙස සමාජ ගත කරන්නේ ඔවුන්ගේ ඉදිරි දේශපාලන ව්‍යාපෘතියේ පදනම 'ප්‍රමාණයට වඩා ගුණය' පදනම් කරගත්, නිශ්චිත දේශපාලන අභිලාෂයක් පෙරදැරි කරගත්තක්, බව මතුකරලීමටයි.

එම දේශපාලන අභිලාෂයන් මුදුන් පත්කිරීමට ශක්තිමත් දේශපාලන බලයක් අවශ්‍ය බවත්, එම ශක්තිමත් දේශපාලන බලය පාර්ලිමේන්තුවේ තුනෙන් දෙකක ඔළු ගෙඩි වලින් සැදුම් ලත් ප්‍රමාණාත්මක බලයක් නොවන, ගුණාත්මක අගයකින් යුතු, පිරිසක් විම සිය අපේක්ෂක කණ්ඩායමට පැවැරී ඇති වගකීම ලෙස ඔහුගේ කතාවේ දෙවන (2) කරුණ ලෙස දිසානායක මහතා මතුකරණු ලැබුවා.

අනුර කුමාර දිසානායක මහතා සිදුකල කතාවේ බොහෝදෙනකු වසග කළ කොටස දිග හැරෙන්නේ කතාවේ එම කොටස සමගින්.

විශේෂයෙන්ම 'පැවැති පාර්ලිමේන්තු නින්දා සහගත, ජනතා අපේක්ෂා අමු අමුවේ වළලා දමන ලද, ධනය, බලය කේන්ද්‍ර කරගත් හොරුන්ගේ ගුබ්බෑයමක් බව ජනතාව අතර මුල් බැසගෙන ඇති මතයට තිත තබා, උසස් වටිනාකම්, උසස් ගුණ ධර්ම පෙරටු කරගත්, ආදර්ශමත් පාර්ලිමේන්තුවක් නිර්මාණය කිරීමේ වගකීම පැවරී ඇත්තේ ඔබට බවත්, එවැනි ගුණාත්මක පාර්ලිමේන්තුවක් බිහි කිරීමේ ගුණාත්මක බලය ඇත්තේ ඔබ සතුව බවත්, ඔවුන්ගේ අපේක්ෂ කණ්ඩායම හමුවේ ප්‍රකාශ කිරීම සම්බන්ධයෙන්' අනුර කුමාර දිසානායක මහතාට බොහෝ පැසසුම් ලැබී තිබුන බව පෙනීයන්නක්.

මීට පෙර සිටි ජනාධිපතිවරුන්ද අවස්ථා කිහිපයකදීම ඔවුන්ගේ අපේක්ෂක කණ්ඩායම අමතා එවැනි ගුණධර්ම, යහපත්කම් ඇති මංත්‍රීවරුන් වීමේ වැදගත්කම පහදා දුන් අවස්ථා තිබුණි. එහෙත් ඒවා 'බිහිරි අලීන්ට විණා වාදයන්' විතරක් නොව 'ජනතාව ඇන්දවන' කයිකතන්දර පමණක් බවත්, ඔවුන් බලයට පත්වූ පසුව කටයුතු කරන්නේ කෙසේද යන්න ගැන සියල්ලන්ම හොව තක්සේරුවක් තිබුන බව ඒකාන්තයයි.

එහෙත් මෙවර පාර්ලිමේන්තුවේ 'ගුණාත්මක බලය තිරණය කරන්නේ ඔබ යැයි' ජනාධිපති අනුර කුමාර දිසානායක මහතා සිය අපේක්ෂ කණ්ඩායම හමුවේ ප්‍රකාශ කළ විට ජනතාව පැතූ, 'පැතුම් මල් පිපුණාක්' මෙන් හැහීමක් ඇති කරණු ලැබූවා. සීයට 3ක් වූ සීමිත, කුඩා, පිරිසක් වූ ඔවුන්ව රටේ ප්‍රධාන බලවේගයක් ලෙස ඔසවා තැබී ම "ආශ්චර්යයක්" බවත්, ජනතාව ඔවුන් කෙරෙහි තබා තිබෙන "විශ්වාසය බිදකින් හෝ බිද වැට්ටවීමට අපිට අයිතියක් නැති බවත්" අනුර කුමාර දිසානායක මහතා මතු කළේ අපේක්ෂකයින්ගේ පමණක් නොව, එම කතව අසන ජනතාව ද එක මිට ට ගොනු කරගනිමින්.

ඒමෙන්ම "එම ජනතා අපේක්ෂා බිද දමන්නේ නම් ඔවුන් මිනිසුන් නොවන බවත්" ප්‍රකාශ කළේ 'මිනිසුන් අතර මිනිසුන් ගැනත්' / 'මිනිසුන් අතර සිටින නරුමයන්'/ ද්‍රෝහියන් / පිලිබදවත් වූ වාමාංශික දේශපාලනය සාහිත්‍යයේ හා භාවිතයේ ද පරිචයක් ඇතිව විය යුතුයි.

එහෙත්, බලය හා සාමාන්‍ය මිනිස් ස්වභාවය පිලිබදව අත්දැකීම් ඇති ඒ මහතා "අපි දන්නවා අපි කවුද කියන්න, ඒත් මිනිස්සු අප කෙරෙහි විශ්වාසය තබනවා.. එය බිද දැමීමට අපිට අයිතියක් නෑ" යනුවෙන් දක්වනුයේ හර්දයාංගම ආකාරයකටයි.

'වෙනස් කළ යුතු දේ වෙනස් කිරීමට ඉවසිවන්තව කටයුතු කරන, ග්‍රාමීය ගැටුම් සහිත ව්‍යාපාරයක් වෙනුවට, සමාජයේ මිනිසුන් අපේක්ෂා කරන සාධනීය උසස් ගුණාංග රැස්කරගත්, උසස් ගුණාංගවලින් යුතු අලුත් දේශපාලන ව්‍යාපාරයක් බවට පරිවර්තනය වීමට ජනතාව ලබාදෙන ප්‍රමාණාත්ම බලයේ ගුණාත්මක කොටස කැටුව එන පිරිස' බවට පත්වීමට සිය මැතිවරණ අපේක්ෂකයින්ට දිසානායක මහතා එයින් ආරාධනා කර තිබුණා.

එය වාමාංශික ව්‍යාපාරයේ අධ්‍යාපන සම්ප්‍රදායේ වූ (ජනතාව දේශපාලන වශයෙන්) 'පෝෂණය කිරීමට ඔබ පෝෂණය වන්න' යන්නට වඩා වෙනස්, ඉදිරිගාමී විවෘත ආරාධනයක්. එනම් 'සාධනීය දේවල් අරන් එන්න, අපිට ඔබෙන් පෝෂණය විය හැකියි' වැනි අදහසක්.

එහෙත් එම කතාවේ බරපතලම කොටස කියවෙන්නේත් එසේ ඇරයුම් කරමින්මයි.

මුළු කතාවම එක් කේන්ද්‍රයක් වෙත නාභි ගතකරමින් අනුර කුමාර දිසානායක මහතා සිය අපේක්ෂකයින්ට පසක් කරදීමට උත්සහ කරන්නේ මැතිවරණයට ඉදිරිපත්කර ඇති "අපේක්ෂකයන් යනු ආණ්ඩුකරණය සදහා සුදානම් වූ පිරිසක් පමණ" ය යන්නයි.

ආණ්ඩුවක් පවතින්නේ ආණ්ඩුකරණ ක්‍රියාදාමය තුලම පමණක් නොවන බව ජනාධිපතිවරණයේදී 'පොහොට්ටුව' ට අත්වු ඉරණම ඇසුරෙන් පෙන්වා දෙමින් අනුර කුමාර දිසානායක මහතා අවධාරණය කරන්නේ "ආණ්ඩුවක් පවතින්නේ ආණ්ඩුකරණ පිරිස් මතම නෙමෙයි, ඒ පිටුපස ඇති දේශපාලන ව්‍යාපාරයක් තුලයි" යන්නයි. ඒය ඔහුගේ කතාවේ තුන්වන (3) කොටසේ සාරය ලෙස සැලකිය හැකියි.

පසුගිය මැතිවරණයේදී ඔවුන් සීයට 3 ට වැටුන අවස්ථාවේ පවා සම තරගකරුවන් ලෙස ඔවුන්ව නැවත ඔසවා තැබුවේ, නමක් ගමක් නොදන්නා, දැන් මේ මොහොතේ පවා වැස්සේ තෙමෙමින්, බයිසිකල් පදමින්, ජනතාව සංවිධානය කරමින්, කෑමක්, බීමක්, රෑ ක් දවාලක් නැතිව, දිවිහිමියෙන් වෙහෙස මහන්සි වී වැඩ කරන, කිසිදු පෞද්ගලික අරමුණක් වෙනුවෙන් නොවන, ඊට වඩා පැතිරුණු, පොදු සමාජ අරමුණක් වෙනුවෙන් වගකීම් පවරා ගත් පිරිසකගේ අප්‍රතිහත කැපවීම මත ගොඩනැගූ ව්‍යාපාරයක් තුලින් බව ඔහු සිත් කාවදින ලෙසත්, ඉතා තීව්‍රවත් අවධානයට ලක් කරයි.

එම කරුණු අවධානයට ලක් කරමින් ඔහු කියා සිටින්නේ: "ඔබ එම ව්‍යාපාරයට වගකිවයුතු, එහි ප්‍රකාශකයන් විය යුතු, පිරිසක් විය යුතුයි" යන්නයි.

ඒ ව්‍යාපාරය ජනතා විමුක්ති පෙරමුණ බව අපි දනිමු. මාලිමාවේ පිටුපස සිටින්නේ ජනතා විමුක්ති පෙරමුණ බව නොරහසකි.

එහෙත් මාලිමාවේ මැතිවරණ අපේක්ෂයන් හමුවේ අනුර කුමාර දිසානායක මහතා කළ කථාවේ ප්‍රධාන විදානය වන්නේ - "ඔබ එම ව්‍යාපාරයට වග කියන, එහි ප්‍රකාශකයින් පිරිසක් වන්න" යන්නයි.

එය, රැස්ව සිටි අපේක්ෂක කණ්ඩායම වගකිව යුත්තේ කාටද යන්න ඉතා ප්‍රබලව දැක්වීමකි.

එම කතාවේ එක් අවස්ථාවකදී මහජන නියෝජිතයන් වගකිව යුත්තේ ජනතාවට ද? නැතිනම් ව්‍යාපාරයට ද? පක්ෂයට ද? යන්න හා සමපාතවීමක් හා නොවීමක් අතර වෙනස පැහැදිලි කිරීමකට ආසන්න වෙන අවස්ථාවක් එළබුනත් අනුර කුමාර දිසානායක මහතා සිය කතාව එතරම් ගැඹුරට ගෙන නොයාමට තරම් පරිස්සම් විය.

"ඔබ එම ව්‍යාපාරයට වග කියන, එහි ප්‍රකාශකයින් පිරිසක් වන්න" යැයි සිය අපේක්ෂකයින් අමතා අනුර කුමාර දිසානායක මහතා ලබා දෙන විදානය තුල මාලිමාව තුල සිටින ජනතා විමුක්ති පෙරමුණේ නොවන පිරිස් වෙත මොනයම් ආකාරයේ අදහසක්, බරක් පතිත කළේද? නැද්ද? යන්න අපිට දැම්ම පැහැදිලි නැති නමුත් එය කාලයකට පසුව හෝ දැනගැනීමට හැකිවේවි.

ඒ කෙසේවෙතත්, අනුර කුමාර දිසානායක මහතා මෙවර (2024) මහමැතිවරණය සදහා මාලිමාවේන් ඉදිරිපත් කර ඇති අපේක්ෂක/ අපේක්ෂාවන් අමතා 13/10/24 කළ කතාව මට කිසියම් ආකාරයකින් චිලී (Chile) හි Salvador Allende (සැල්වදෝර් අයියන්දේ) විසින් 05/09/1970 සිදුකළ 'ජයග්‍රාහී කතාව' (Victory Speech) සිහිපත් කළේය.

1970 චිලී රටේ බලයට පැමිණි සැල්වදෝර් අයියන්දේ (Salvador Allende) ලෝකයේ මැතිවරණයකින් බලයට පැමිණි ප්‍රථම මාක්ස්වාදී පාලකයා ලෙස හදුන්වයි. චිලියේ එම මැතිවරණයත් පසුගිය දා ලංකාවේ පැවැති ආකාරයේම තුන් කොණ් මැතිවරණයක් විය. 1970 චිලියේ පැවැති එම මැතිවරණයේ දී Popular Unity වාමාංශික එකතුවෙන් තරග කළ සැල්වදෝර් අයියන්දේ (Salvador Allende) 36.61% චන්දයක් ද, ස්වාධීනව තරග කළ හිටපු ජනාධිපති Jorge Alessandri, 35.27% ක් ද, Christian Democratic පක්ෂයෙන් තරග කළ Radomiro Tomic 28.11% ක චන්දයක් ලැබූහ. එහෙත් කිසිවෙකුට 50% ක පැහැදිලි බහුතරයක් නොලැබූ නිසා චිලී පාර්ලිමේන්තුවේ මංත්‍රී මණ්ඩල දෙකම එකතුවී වැඩිම චන්ද ලැබූ අපේක්ෂකයින් දෙදෙනා අතරින් වාමාංශික සැල්වදෝර් අයියන්දේ (Salvador Allende) එරට ජනාධිපතිවරයා ලෙස 1970 දී තෝරා පත් කරගත්තේය.

එම තෝරා පත්කරගැනීමෙන් අනතුරුව ඔහු පැවැත්වූ 'ජයග්‍රාහී කතාවේදී' (Victory Speech) සැල්වදෝර් අයියන්දේ ප්‍රකාශ කළේ: 'චිලීය අපේක්‍ෂා කරන දේ යථාර්ථයක් බවට පත් කිරීමේ ඓතිහාසික කර්තව්‍යයක් ඔවුන් මත පැවරී ඇති බවත්, ජාතියේ ප්‍රගතිය, සමාජ සාධාරණත්වය තුළ, සෑම පිරිමියෙකුගේම, සෑම කාන්තාවකගේම, තරුණයෙකුගේම අයිතිවාසිකම්, බලාපොරොත්තු මුදුන්පත් කරන අසමසම රටක් බවට පත් කිරීමට සිය ව්‍යාපාරය හා බලමුළු ගන්වන ලෙසයි'.

එහෙත් 1970 මැතිවරණයෙන් බලයට පැමිණි ලෝකයේ ප්‍රථම මාක්ස්වාදී පාලකයා වූ සැල්වදෝර් අයියන්දේට බලයේ සිටිය හැකිවූයේ වසර තුනක් පමණි. ඔහු ඉදිරිපත් කළ ආර්ථික ප්‍රතිසංස්කරණ රට අරබුදයෙන් අර්බුදයට පත් කළේය. ව්‍යවස්ථා ප්‍රතිසංස්කරණ යෝජනා පරාජයට පත්ව ඔහු ව්‍යවස්ථාව උල්ලංඝනය කරන්නෙක් බවට චෝදනාවලට ලක්විනි. විදේශ සබදතා අවුල් ජාලයක් විනි. පාර්ලිමේන්තුවේ බලයට පිටින් සිය පක්ෂය ලවා රට ආණ්ඩුකරණ පාලකයෙක් බවට ඔහුට චෝදනා එල්ලවුනි. එරට හමුදාවට, පොලීසියට හා මිලිටරි පාලකයන්ට එරෙහිව සිදුකළ විමර්ශණ නිසි සාර්ථකත්වයක් පෙන්නුම් නොකෙරුවද එයින් හමුදා කුමන්ත්‍රණවලට පාර කැපුනි. අවසානයේ අන්ත දක්ශිණාංශික, සිය දහස් ගණන් මිනිස්සුන්ගේ ජීවිත මහා විනාශයකට ගෙන ගිය, මිනීමරු Augusto Pinochet (පිනෝචේ) නම් මිලිටරි පාලකයා හමුදා කුමන්ත්‍රණයකින් චිලීයේ බලය අල්ලා ගත්තේය. පිනෝචේ වැනි ගහලයෙකුට යටත්වීම වෙනුවට සැල්වදෝර් අයියන්දේ සිය දිවි නැති කර ගැනුනි.

1970 චිලීයේ ජනයා දැල්වූ බලාපොරොත්තු 1973 වන විට නිමී ගියේ ඇමැරිකානු රූකඩයක්වූ පිනෝචේ (Pinochet) යටතේ අන්ත දක්ශිණාංශික මේලේච්ච හමුදා පාලනයක් බිහි කරමිනි. පිනෝචේ ගේ හමුදා පාලනය 1973 සිට 1990 දක්වා පැවතුනි. එය මිනිස්සු සිය දහස් ගාණක් බිලිගත් අධම යුගයක් විනි. බලයෙන් පහවූ පසු, පිනෝචේ ට විරුද්ධව පැවැති අපරාධ චෝදනා විභාග කිරීමට පෙරම ඔහු මිය ගියේය. වසර ගාණනාවක 'තට්ටු මාරු' බල හුවමාරුවලින් අනතුරුව 2022 මාර්තුවේ පැවැති චිලී ජනාධිපතිවරණයෙන් 38 හැවිරිදි Gabriel Boric බලයට පැමිණියේය. එහෙත්, අදත් පිනෝචේ (Pinochet) යටතේ සිදුවූ අපරාධ සම්බන්ධයෙන් විපතට පත් ජනතාවට යුක්තිය ඉටුවී නොමැත .

ලංකාවේ පසුගිය මැතිවරණයෙන් බලයට පැමිණි අනුර කුමාර දිසානායක මහතාගේ ජයග්‍රහණය ලෝකයේ බොහෝ මාධ්‍යය හදුන්වා තිබුනේ ද මාක්ස්වාදීයෙකුගේ ජයග්‍රහණයක් ලෙසය. ඒ ලෝකයේ මැතිවරණයකින් බලයට පැමිණි ප්‍රථම මාක්ස්වාදී පාලකයා ලෙස සලකන 1970 බලයට පැමිණි චිලියේ සැල්වදෝර් අයියන්දේ ගෙන් පසුවය..

අනුර කුමාර් දිසානායක මහතාගේ රජය සැල්වදෝර් අයියනගේ පාරේ යාවිද? නැති නම් චීලියේ වාම බලාපොරොත්තු ඉහල නන්වමින් දැන් බලයට පැමිණ ඇති Gabriel Boric ගේ පාරේ යාවි දැයි තවමත් කිව නොහැක. එවැනි සසදා බැලීම් කිසිසේත්ම අදාල නොවන්නට ද පුළුවන. එත් අවශ්‍ය වන්නේ වාම බලය පරාජය කර දක්ශිණාංශය බලයට පැමිණියහොත් සිදුවන්නේ කුමක්ද යන්න වටහා ගැනීමය. එය චිලීයේ පිනෝචේ (Pinochet) ලාගෙන් පමණක් නොව ලංකාවේ J. R. ලාගෙන්, R. ප්‍රේමදාසගෙන් වුවද උගත හැකිය.

මාකස් ප්‍රියන්ත පෙරේරා

15/10/24

පාස්කු ඉරිදා ප්‍රහාරය විමර්ශනය මේ ආණ්ඩුවේ අම්ල පරීක්ෂණයයි. සුරේෂ් සලේ තවමත් රාජ්‍යය බුද්ධි අංශ ප්‍රධානියා

ජේෂ්ඨ මාධ්‍යවේදී සුනන්ද දේශප්‍රිය මහතා එසේ දක්වා ඇත්තේ ඊයේ (25/09/24) මරදාන සමාජය හා සාමයික කේන්ද‍්‍රයේ (CSR) හි පැවැති 'පාස්කු ඉරුදින ප්‍රහාරය පාර රාජ්‍යයේ සෙවනැලි සහ නොවිසඳුණු අහිරහස්' නම් සිය කෘතිය එළිදක්වමිනි.

පාස්කු ඉරිදා ප්‍රහාරය පිලිබදව මෙතෙක් සිදුකර ඇති විමර්ශන වාර්තා ඇසුරෙන් මෙන්ම ගවේෂණාත්මක මාධ්‍යයවේදියෙකු ලෙස තමා රැස්කරගත් කරුණු ද ඔස්සේ ලියා ඇති එම කෘතිය, පාස්කු ඉරිදා ප්‍රහාරය පිළිබඳව බොහෝ කරුණු ඉදිරිපත් කිරීමට අමතරව ශ්‍රී ලංකා රාජ්‍යය තුල ක්‍රියාත්මක වන 'පාර රාජ්‍යයේ' (deep state) මිලිටරි සෙවනැලි 2021 අප්‍රියෙල් 21 වෙනි පාස්කු ඉරුදින එල්ලවූ ප්‍රහාරයන් මත ද වැටී ඇති බව පෙන්වා දෙන බව කෘතිය හදුන්වමින් දක්වා තිබේ. ශ්‍රි ලංකා රාජ්‍යයේ අභ්‍යන්තරයේ සිට ක්‍රියාත්මක වෙන මෙම මිලිටරි 'පාර රාජ්‍යය' (deep state) සම්බන්ධයෙන් නිසි ක්‍රියාමාර්ග නොගතහොත් බලයට පත් වූ නව රජය පවා අනතුරකට මුහුණ දීමේ අවධානමක් ඇති බව ද ඒ මහතා තවදුරටත් පෙන්වා දෙනවා.

එම කෘතිය එළිදැක්වීමේ උලෙළ අමතමින් කථා කළ ජේෂ්ඨ මාධ්‍යවේදී තරිඳු ජයවර්ධන මහතා සහරාන්ගේ අන්තවාදී මුස්ලිම් කණ්ඩායම සමග සුරේෂ් සලේ හා රාජ්‍ය හා හමුදා බුද්ධි සේවා අතර පැවැති සම්බන්ධතා එකිනෙක කරුණු සහිතව ගෙන හැර පා තිබෙනවා.

එමෙන්ම පාස්කු ඉරිදා ප්‍රහාරය පිලිබද විමර්ශන නොමග යැවීමට මෙන්ම අදාල විමර්ශන කඩාකප්පල් කිරීමට රාජ්‍ය හා හමුදා බුද්ධි සේවා පමණක් නොව ගෝඨාභය රාජපක්ෂ රජය ද කටයුතු කර ඇති ආකාරය සුනන්ද දේශප්‍රිය මහතාගේ එම කෘතිය එළිදැක්වීමේ උලෙළට සහභාගීවෙමින් අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂක ශානි අබේසේකර මහතා විස්තර සහිතව පෙන්වා දී තිබෙනවා.

එම අදහස් දැක්වීම් තුනට සවන්දීමෙන් පමණක් වුවද ශ්‍රි ලංකා රාජ්‍යය තුල කෙතරම් බරපතළට විහිදුනු මිලිටරි 'පාර රාජ්‍යය' ක (deep state) හස්තයක බලපෑමට ලක්ව ඇත්ත යන්න පිළිබඳව සිතා ගත හැක්කක්.

දැන් ප්‍රශ්ණය වී ඇත්තේ එකී 'පාර රාජ්‍යය' යෙන්, මිලිටරි හස්තයන්ගෙන් මිදී ශ්‍රී ලංකාව තුල ආණ්ඩුවකට පැවැතිය හැකිද? යන්නයි.

1. ජාතික ජනබලවේගයේ (මාලිමාවේ) වේදිකාවට ජනතා විමුක්ති පෙරමුණේ නිර්මාතෘ රෝහණ විජේවීර අමු අමුවේ මරා දැමුවේ යැයි චෝදනා එල්ල වූ විශ්‍රාමික මේජර් ජෙනරාල් අසෝක තෝරදෙණිය ගොඩවීමත්;

2. ශ්‍රී ලංකා සිවිල් යුද්ධයේ අවසන් අදියරේදී, විශේෂයෙන්ම 2009 මැයි මාසයේ, අසීමිත ලෙස කාපට් බෝම්බ ප්‍රහාරවල නිරත වූ බවට චෝදනා එල්ල වී ඇති අංක 09 බලඝණයේ, Fleet 24 සම්බන්ධ මෙහෙයුම් අධීක්ෂණය කළ, මුල්ලිවයික්කාල් සමූල ඝාතන බෝම්බ ප්‍රහාර සම්බන්ධයෙන් චෝදනා එල්ලවී ඇති කුප්‍රකට හිටපු විංග් කමාන්ඩර් තුයකොන්ත, මාලිමාව ආණ්ඩුවේ ආරක්ෂක ලේකම්වරයා ලෙස පත්කිරීමත්;

3. පාස්කු ඉරිදා ප්‍රහාරය සම්බන්ධයෙන් දැඩි චෝදනාවන්ට ලක්ව ඇති සුරේෂ් සලේ අනුර දිසානායක ජනාධිපතිවරයාගේ මාලිමා ආණ්ඩුව යටතේ පවා තවදුරටත් බුද්ධි අංශ ප්‍රධානියා ලෙස කටයුතු කිරීමත්;

ශ්‍රී ලංකා රාජ්‍යය තුල ඇති එකී 'පාර රාජ්‍යය' යේ, මිලිටරි හස්තයන් සමග ජාතික ජනබලවේගය (මාලිමාව),අනුර කුමාර දිසානායක මහතාගේ රජය සමග කිසියම් ආකාරයක සම්මුතියකට එළබීමක් ද?

ඒ පිලිබදව තවදුරටත් නොදුරේදීම කතා කළ හැකිවනු බව නියතය.

මෙම අර්ථයෙන් ගත් කල සුනන්ද දේශප්‍රිය දක්වන්න පාස්කු ඉරිදා ප්‍රහාරය පිළිබඳව විමර්ශන කිරීම පමණක් නොව, ලසන්ත වික්‍රමතුංග, ප්‍රදීප් එක්නැලිගොඩ, ඝාතන විමර්ශනය කිරීම් ද, මේ ආණ්ඩුවට මුහුණදීමට ඇති බරපතළ අම්ල පරීක්ෂණය (litmus test) මන්ද යත් එම ඝාතන සම්බන්ධයෙන් ද ශ්‍රී ලංකා රාජ්‍යයේ ඇති 'පාර රාජ්‍යය' යේ, මිලිටරි හස්තයන් ගැන චෝදනා එල්ල වී ඇති බැවිනි.

'පාස්කු ඉරුදින ප්‍රහාරය පාර රාජ්‍යයේ සෙවනැලි සහ නොවිසඳුණු අහිරහස්' නම් සිය කෘතිය හදුන්වා දෙමින් සුනන්ද දේශප්‍රිය මහතා ඉදිරිපත් කළ කථාව ද, එම එළිදැක්වීමේ උලෙළේ දී අදහස් වූ ප්‍රවීන මාධ්‍යයවේදී තරිඳු ජයවර්ධන මහතාගේ හා අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂක ශානි අබේසේකර මහතා ගේ අදහස් දැක්වීම් ද පහතින් දක්වා ඇත.

මාකස් ප්‍රියන්ත පෙරේරා

26/09/24 

ජයග්‍රහණයේ සංයුතිය සහ ප්‍රමාණය පිළිබඳව හොඳ අවබෝධයක් තිබෙනවා"

"ජයග්‍රහණයේ සංයුතිය සහ ප්‍රමාණය පිළිබඳව මට හොඳ අවබෝධයක් තිබෙනවා. අපට සහාය නොදුන්, අපව විශ්වාස නොකරන පුරවැසියන්ගේ විශ්වාසය ගොඩනඟා ගැනීමට ද අප කටයුතු කරනවා" - නව ජනාධිපතිවරයා ලෙස දිවුරුම් දෙමින් අනුර කුමාර දිසානායක මහතා එසේ ප්‍රකාශ කර තිබෙනවා. එය ඉතා වැදගත් ප්‍රකාශයක්. ඒ වගේම යහපත් ප්‍රවේශයක්.

එම ප්‍රකාශය තුලම: "රටේ ජනතාව විසින් පාලකයෙක් තෝරා ගැනීමෙන්, මැතිවරණයට ඡන්ද ප්‍රකාශ කිරීමෙන් සහ පාලකයා තෝරා ගැනීමෙන් පමණක් ප්‍රජාතන්ත්‍රවාදය අවසන් වන්නේ නැහැ..." යනුවෙන් ද දක්වා තිබුනා. එනම් ජනතාවගේ සක්‍රීය දේශපාලන මැදිහත්වීම මැතිවරණ කාලෙන් පසුත් දිගින් දිගටම සිදුවිය යුතු බව ඔහු විශ්වාස කරනවා.

මැතිවරණ කාලෙන් පසු ජනතාවගේ දේශපාලන මැදිහත්වීම දැකිය හැක්කේ විවේචන, විරෝධතා, උද්ඝෝෂණ, වර්ජන, පෙළපාලි, නීති ක්‍රියාමාර්ග හා මැදිහත්වීම් ලෙස බව එවැනි භාවිතයකින් පැමිණි ජනාධිපතිවරයෙකු ලෙස ඔහු ඉතා හොදින් දන්නා කරුණක්. ඒ අයිතිය තහවුරු කිරීම ප්‍රජාතන්ත්‍රවාදය පිලිබදව ලිට්මස් පරික්ෂාවක් බවත් එම අයිතීන් මර්ධනය කිරීම කිසිසේත්ම පිලිතුර නොවන බවත් ඔවුන් පැමිණි ඉතිහාසය ඔස්සේම ඔවුන් උගත් බව තවුරු කිරීම අතිශයින්ම අවශ්‍ය වන්නක්.

එමෙන්ම, 'අර්බුදය නිමා කිරීමේදී පොදු පුරවැසියාටත් වගකීමක් තිබෙන බවත්, තමා ඉන්ද්‍රජාලිකයෙක් හෝ මැජික්කරුවෙක් නොවෙන බවත්, රටේ සාමාන්‍ය පුරවැසියෙක් ලෙස දන්නා දේවල් මෙන්ම නොදන්නා දේවල් තිබෙන බැවින් අන් අයගේ ද හැකියාවන් යොදාගෙන, නොදන්නා දේ එක්රැස් කරගනිමින්, වඩා හොඳ තීන්දු තීරණ ගැනීම' තමාගේ අරමුණ ලෙස ද ඔහු දක්වා තිබුනා. 

එම සංදර්භය තුලම අනුර කුමාර දිසානායක මහතා අභිනව ජනාධිපතිවරයා ලෙස දිවුරුම් දෙමින් සිදු කළ ඉහත ප්‍රකාශය අගය කළ යුත්තක්.

එකී අරමුණු සාක්ෂාත් කරගැනීමට ඔහුට අවශ්‍යය ශක්තිය හා ධෛර්යය ලැබේවා යැයි සුබ පතමු!!

මාකස් ප්‍රියන්ත පෙරේරා

23/09/24

ගමක ඉතිහාසය ප්‍රදර්ශණය කළ දේවස්ථාන ජුබිලියක්

දැන් මාස කිහිපයකට පෙර අප මෙහි ජීවත්වන ප්‍රදේශයේ දේවස්ථානයකට වසර 150ක් පිරීමේ ජුබිලිය පවත්වනු ලැබුවා.

දේවස්ථානයක ජුබිලි සමරුවක් තුල සාමාන්‍යයෙන් සිදුවන ආගමික කටයුතු හා දේවස්ථානය පිළිසකර කර වර්ණ ගැන්වීම වැනි කටයුතු වලට එහා ගිය ජුබිලි සමරු වැඩසටහනක් එම දේවස්ථානය විසින් සංවිධානය කර තිබුණා.

ඒ තමයි එම දේවස්ථානය පිහිටි ප්‍රදේශයේ වසර 150ක ඉතිහාසය දැක්වෙන ප්‍රදර්ශණයක් සංවිධානය කර තිබීම.

එවැනි ප්‍රදර්ශණයක් සංවිධානය කිරීම ලෙහෙසි පහසු කටයුත්තක් නෙමේ. ඒ සදහා දේවස්ථානයේ පියතුමාගේ අනුශාසකත්වයෙන් කමිටුවක් පත්කර තිබුණා. විශ්‍රාමික විදුහල්පතිවරු, විශ්‍රාමික ගුරුවරු වගේම පල්ලියේ ක්‍රියාකාරීන්, ප්‍රදේශයේ විශ්ව විද්‍යාල සිසුන් ආදියත් ඊට සම්බන්ධ වී සිටියා. ඔවුන් පල්ලියේ වාර්තා මෙන්ම පල්ලියට අයත් පාසැලේ වාර්තා ද, බ්‍රිතාන්‍යය ජාතික පුස්තකාලයේ, ජාතික ලේඛණාගාර දෙපාර්තමේන්තුවේ සහ නගර සභාවෙත් උදව් ලබාගෙන තිබුණා.

එහෙත් මෙම වැඩසටහන සම්පුර්ණයෙන්ම දියත්වී තිබුනේ ස්වෙච්ඡා පදනමකින්. ප්‍රදර්ශණයට අවශ්‍ය අමුද්‍රව්‍යය වල පිටපත් ගැනීමට හෝ මුද්‍රණය කටයුතු කරගැනීමටත්, ප්‍රදර්ශණ භාණ්ඩ සකස්කර ගැනීමටත් පමණක් අරමුදල් සපයාගෙන තිබුණා.

එය අපි හුගාක් දෙනෙකු පුරුදු වී ඇති මුදල් හොයාගෙන වැඩ කිරීමේ ක්‍රමයට වඩා වෙනස් විදිහේ වැඩ කිරීමේ පිළිවෙළක්. මුදල් හොයාගෙන වැඩකිරීම වෙනුවට ස්වෙච්ඡාවෙන් පොදු අරමුණක් වෙනුවෙන් කටයුතු කරන විට එහිලා අවශ්‍ය සහය, ආධාර නිතැතින්ම ගලා තමයි මෙහිදී සිදුවී ඇත්තේ. එය එක්තරා ආකාරයට අදාල කාරණයට අවශ්‍යය ජීවය ගෙන එමක්.

ප්‍රදර්ශණය දින ගණනාවක්ම පැවැත්වූවා. පාසැල් ළමුන් වගේම රැකියාව අවසන් වී ගෙදර යන වැඩිහිටියන් ද ප්‍රදර්ශණය නැරඹීමට පැමිණ තිබුණා.

ප්‍රදේශයේ පැරණි සිතියම්, පසුගිය වසර 150 තුල ප්‍රදේශයේ වීදි, මංමාවත්, ගොඩනැගිලි ආදිය වෙනස්වී ඇති ආකාරය, දෙවන ලෝක යුද්ධ සමයේ ජර්මාණු ගුවන් ප්‍රහාරවලින් ප්‍රදේශයේ ගොඩනැගිලිවලට සිදුවූ හානි දැක්වෙන ජයාරූප, රාශියක්ම එහි ප්‍රදර්ශණයට තබා තිබුණා.

මෙම ප්‍රදර්ශණය මහා පරිමාණයෙන් වියදම් කළ හෝ ඉහල ප්‍රමිතියට සැකසූ ප්‍රදර්ශණයක් නොවුනත් එය ප්‍රදේශයේ ජීවත්වෙන ජනයාට කිසියම් ආකාරය අධ්‍යාපනක්, දැනුවත්වීමක්, පණගැන්වීක් ඇති කළ ප්‍රදර්ශණයක්. එය අලුත් පරම්පරාවකට පවා තමන් ජීවත්වන ප්‍රදේශයේ ඉතිහාසය ගැන කිසියම් මතකයක්, ආවර්ජනයක්, ඉතිහාසයක්  ගොඩනැගීමට හේතු වූ ප්‍රදර්ශණයක්.

මම මේ කාරණය බෙදාගත්තේ මා හැදී වැඩුන ගම වන මීගමුවේ මේ වසරේ සහ ලබන වසරේ පල්ලි කිහිපයකම ජුබිලි සැමැරීම් යෙදී ඇති නිසයි.

පෘතුගීසි යුගයේ සිට පැවැත එන මීගමුව පිටිපන විදිය කන්‍යා ශුද්ධවූ දේව මාතා දේවස්ථානයට මේ වසරේ වසර 400යක් පිරෙනවා. මීගමුව පෘතුගීසි - ලන්දේසි සිට ස්ථාන කිහිපයකටම රැගෙන ගිය මීගමුව මහවීදිය සා. මරියා දේවස්ථානයේ වර්තමාන දේවස්ථානයට මේ වසරේ වසර 100යක් පිරෙනවා.

මේ දේවස්ථානවල, ඒ ඒ මීසම් වල ඉතිහාසය දැක්වෙන ප්‍රදර්ශණයක් සංවිධානය කරන්න හැකි නම් කොපමණ අගේද? මොන තරම් නම් තොරතුරු ප්‍රමාණයක් බෙදාගැනීමට හැකිද? ප්‍රදේශයේ කෙතරම් ජනතාවක් අධ්‍යාපනික වශයෙන් දැනුවත් කිරීමට හැකිද?

මා දන්නා ලෙස හැම දෙනෙක්ම එහි ඇති වැදගත්කම දකීවි. එහෙත් එහෙම දෙයක් කරන්නේ කොහොම දැයි අසාවි. මම නම් කියන්නේ සුළුවෙන්ම හිතන්න. පුළුවන් තැනින් පටන් ගන්න. ගමේ මිනිස්සුගාව ඇති පැරණි ජයාරූප, පින්තුර, පැරණි සමරු කලාප සොයාගත හැකියි. පල්ලියේ පැරණි වාර්තාත් බලන්න...කුඩාවට හෝ ප්‍රදර්ශණයක් කරන්න ඇති තරම් අමුද්‍රව්‍ය වගේම සම්පත ආදියත් ලැබේවි. එවැනි උත්සාහයක් ඇතැම්විට අර බයිබලයේ 'අබ ඇටය' ගැන දැක්වෙනවා වගේ කුඩා දෙයක් විය හැකියි. එහෙත් ඔබ එයින් ප්‍රදේශවාසීන්ට ගෙනෙන ජීවය අපමණයි... ආශ්වාදය අමරණීයයි.

අප එය මා දැනට ජීවිතවන  ප්‍රදේශයේ දේවස්ථානයක පැවැති ජුබිලි ප්‍රදර්ශණයේදී අත්දකිනු ලැබූවාක්, එහි ජයාරූප සමහරක් පහතින්..

මාකස් ප්‍රියන්ත පෙරේරා

04/06/24

උසාවියේ තීන්දුවෙන් ට්‍රම්ප් ගේ ගමන නැවතිය හැකිද?

 

ඇමැරිකාවේ නිව්‍ යෝර්ක් අධිකරණය අද ලබාදුන් නඩු තීන්දුවත් සමග ඩොනල්ඩ් ට්‍රම්ප් (Donald Trump) එරට අධිකරණයක් මගින් අපරාධයකට වරදකරු වූ පළමු ඇමැරිකානු ජනාධිපතිවරයා බවට පත්ව තිබෙනවා. ඔහු වරදකරු වී ඇත්තේ 2016 මැතිවරණයට පෙර ඉදිරිපත් කළ සිය ව්‍යාපාර ගිනුම් ලේඛණවල 'Stormy Daniels' නම් නිරුවත් නිරූපන ශිල්පිනියකට (Porn star) ගෙවූ ඇ. ඩො.ලර් 130, 000 මුදල් සැඟවීමට කූට ලේඛන සකස් කිරීම සම්බන්ධයෙනුයි. ඒ සම්බන්ධයෙන් දඩුවම් නියම කිරීම ජුලි 11 වැනි දින දක්වා කල් තබා ඇති අතර ඔහුව සිරගත කිරීම හෝ බෝහෝ දුරට දඩයක් නියම කිරීම හෝ සිදුවිය හැකියි.

එහෙත් එසේ දඩුවමක් නියම වූවත්, අපරාධ වාර්තාවක් (criminal record) ලැබුනත්, ඔහුට තවමත් ජනාධිපති ධුරයට තරඟ කිරීමට පමණක් නොව ජනාධිපති ධුරය භාර ගැනීමටත් හැකිවීමයි.

ඒය ඇමැරිකානු ප්‍රජාතන්ත්‍රවාදයේ ලොකු හිඩසක් ලෙස අර්ථකථන කළ හැකිවූවත්, එහි අනෙක් පැත්ත තමයි නඩු පටලවා කිසිවෙක් ජනාධිපතිවරණයට ඉදිරිපත්වීම කඩාකප්පල් කිරීමට නිතිය යොදාගැනීම වැලැක්වීමයි.

ට්‍රම්ප්ට අනුව මෙම නඩුව “දූෂිත” / "දේශපාලනය අරමුණක්" ඇති නඩුවක්. තමා “අහිංසක” බවත් ඔහුගේ නීතීඥයින් මාර්ගයෙන් අභියාචනයක් ඉදිරිපත් කිරීමට සැලසුම් කර ඇති බවත් ඔහු දක්වනවා.

ජනාධිපති Biden මේ නඩු තීන්දුව ගැන මෙන්ම ජනාධිපතිවරණය ගැනත් කියන්නේ ට්‍රම්ප් ව පරාජය කිරීමට ඇති හොදම මාර්ගය වැටී ඇත්තේ මැතිවරණ ව්‍යාපාරය හරහා ඡන්ද පෙට්ටිය තුළින් ප්‍රකාශවන 'මහජන මතය' තුල පමණක් බවයි.

මේ නොවැම්බරයේ යෙදී ඇති ඇමැරිකානු ජනාධිපතිවරණය තුල ඩොනල්ඩ් ට්‍රම්ප් නැවැත ජනාධිපති වේ යැයි විශාල මතයක් ගොඩනැගී තිබෙනවා. ඒ වගේම ඩොනල්ඩ් ට්‍රම්ප් නැවැත ජනාධිපතිවෙනවාට දැඩි විරෝධයකුත් ඇමැරිකානු සමාජය තුල ගොඩ නැගී තිබෙනවා.

ඇත්ත වශයෙන්ම ඉංදියාවේ උපත ලැබූ මේ මොහොතේ ඇමැරිකාවේ ප්‍රකටම දේශපාලන විචාරකයා වන Fareed Zakaria යා ගේ නවතම කෘතිය වන 'Age of Revolutions: Progress and Backlash from 1600 to the Present' (2024) හී විස්තර කිරීමට උත්සහ කරන පරිදි ට්‍රම්ප් සහ ට්‍රම්ප්වාදය, එක්තරා ආකාරයක අපට දැන් පසු කලයුතු අවදියක් (Trump and Trumpism was a kind of phase that would pass, and it's not passing..). එය දේශපාලන ව්‍යාපාරයක් නොවේ (it's not even really a political movement..political movement) ඊටත් වඩා එය දේශපාලන කල්ට් එකක්, දේශපාලන ලබ්ධියක් - It's a cult. It's a personality cult.

එහෙත් Fareed Zakaria ගේ පොතේ පවා පෙන්වා දෙන්නේ වර්තමානයේ ඇතිවෙමින් ඇති දේශපාලනය ප්‍රවාහනයන් තුලින් කියවෙන්නේ තවදුරටත් 'පසුගාමීත්වයන්ට' (backwardness) ඉඩක් නැති බවයි. ලෝකය ගමන් කරමින් සිටින්නේ බහු සංස්කෘතික අනන්‍යතාවයන් සහිත සමාජයකට බවත් (world we're going into, a multicultural world) එය හුදෙක් බහු සංස්කෘතික අනන්‍යතාවයන් ඉවසාදරාලණ සමාජයක වඩා බහු සංස්කෘතික අනන්‍යතාවයන් උත්කර්ෂයට නන්වන (not just tolerated but celebrated) සමාජයක් බවත් තවදුරටත් සීමා කිරීම්, සංවෘත භාවයන් කිසිසේත්ම අදාල නොවන විවෘත සමාජයකට (openness) අප අවතීරණය වෙමින් පවතින බව Fareed Zakaria සිය කෘතියේ දක්වනවා.

පුදුමයකට මෙන් පසුගිය මැයි 20 දා ෆ්‍රැන්සිස් පාප්තුමා ඇමැරිකාවේ CBS රූපවාහිනී නාලිකාවේ Norah O'Donnell සමග පැවැති සම්මුඛ සාකච්ඡාවේදී ද එවැනිම අදහස් රාශියක් දක්වනවා. ෆ්‍රැන්සිස් පාප්තුමා දක්වන්නේද විවෘත භාවය, බහු සංස්කෘතික අනන්‍යතාවය, සංක්‍රමණය ආදිය පිලිගැනීමකින් තොරව ඉදිරි ගමනක් නැති බවයි.

ඒ කෙසේවුවද, එදිරි ගමනක් සදහා මේ දුෂ්කර තීරණාත්මක මොහොත පසුකරගත යුතුමයි. එහිලා ට්‍රම්ප් ලා පමණක් නොව සියළු පසුගාමිකත්වයන් පරාජය කල යුතුමයි.

මාකස් ප්‍රියන්ත පෙරේරා

30/05/24

තිළිනා හර්ෂණී වැනි පාස්කු වින්දියන්ට ඉටුකළ හැකි යුක්තිය කුමක්ද?

පාස්කු ඉරිදා බෝම්බ ප්‍රහාරයන්ට ලක්ව වසර 5ක් ගිලන්ව, එකතැන්වූ තිළිනා හර්ෂණී මහත්මියද මියගොසින් ය. මිය යනවිට වයස අවුරුදු 40ක් පමණක් වූ ඇය තිදරු මවක් විය. 2019 අප්‍රියෙල් 21 එල්ලවූ පාස්කු ඉරිදා ප්‍රහාරයන්ගෙන් කටුවපිටිය දේවස්ථානය තුලදී ඇයගේ කුඩා පුතුනුවන් ඇගේ උකුළේ එතනම මිය යනවිට ඇය සදාකාලික අබ්බගාතයෙක් විය. දරුවාගේ දේහයට පස් මිටක් දැමීමට තියා සිය දරුවා මළ බව වත් ඇය දැන ගත්තේ ඉන් දින ගණනාවකට පසු ශල්‍යකර්ම රාශියකින් අනතුරුව ඇය පියවි සිහියට පත්වූ කල්හි ය. එකෙනෙහිම ඇගේ සිහිය ඇයට නොලැබුනා නම් හොද යැයි ඇය සිතන්නට ඇත් ද? එහෙත් ඇය ඇගේ අනෙක් දරු දෙදෙනා වෙනුවෙන් ජීවත්වීමට අදිටන් කරගන්නට ඇත. ගිලන් ඇදේ හෝ සිටිමින් අනෙක් දරු දෙදෙනාගේ සුව දුක් විමසා බලන්නට ඇය සිත යොමු කරන්නට ඇත. සිය දරුවා නැති වී, බිරිද ඔත්පල වී, ඔවුන්ගේ කැදැල්ල සී සී කඩ යෑමෙන් විකල්වූ පියා ද යුක්තිය ඉල්ලා කාදිනල් හමුවේද, දේශපාලකයන් ඉදිරියේද, විලාප තබන්නට විය. ඔහුගේ විලාපය මැතිවරණ දේශපාලනයේ චන්ද රැස්කිරීමේ මෙවලමක් කරගත් දේශපාලකයෝ ඔවුන්ගේ දේශපාලන වේදීකාවලද, මාධ්‍යයවලද ඔහුට අත්වූ ඉරණම පෙන්වා ජය කෙහෙළි නන්වන්නට වූහ. ජනපතිකම්, අගමැතිකම්, මැති ඇමැතිධුර අත්කර ගන්නට වූහ. තමාට සිය දරුවා ද, බිරිද ද, පමණක් නොව තමාට තමාද අහිමිවූ බව තේරුම් ගත් ඔහු සිය පවුලද, නෑ හිතවතුන්ද, අතහැර, හිස ලූ ලූ අතේ කටයුතු කරන්නට විය.

පාස්කු අපරාධයෙන් වින්දිතයන් වූ ජනයාට යුක්තිය ඉටුවීම වෙනුවට ඔවුන්ව දිගින් දිගටම වේදනාවේ පතුලටම ගිල්වමින් මරණය වැළදගැනීමට සැලැස්වීම හැර ඔවුන්ගේ රුධිරය වැගිරීම්වලට, ඔවුන්ගේ වද වේදනාවලට සැබෑ අර්ථයක්, සැබෑ වටිනාකමක්, එක් කරලීමට අප සියල්ලන් තවමත් අසමත් ය..

2019 පාස්කු ඉරිදා එල්ල කළ මරාගෙන මැරෙන බෝම්බ ප්‍රහාරවලින් ඇය මෙන්ම, ඇගේ දරුවා ඇතුළු 316 දෙනෙකු දැනටමත් මියගොස් ඇත. සිය ගණනක් විපතට පත්වූහ. පාස්කු ඉරිදා ප්‍රහාරය එල්ල කළේ "බලය ලබාගැනීමේ කුමන්ත්‍රණයක ප්‍රතිඵලයක්" ලෙස නම්: එසේ ජන ඝාතක කුමන්ත්‍රණයකින් හටහත් මහජන කැලඹිල්ල ඔස්සේ 69 ලක්ෂයක ජන්දයක් ගෙන බලයට පැමිණි ගෝඨාභය රාජපක්ෂ එවැනිම මහජන කැලඹිල්ලකින්ම ගෙදර යවා ඇත.

ඉතින් ඒ ගැන තිළිනාට සතුටු විය හැකිව තිබුණි. එහෙත් ඒ සතුට කුමකට ද, තවමත් බලයේ ඉන්නේ ඔවුන් නම්.. ඔවුන්ගේ නියෝජතයෙක් නම්...

නැටුමෙන්, ගැයුමෙන්, සිත් පිනා යන සිනහවකින් මුව සරසාගෙන, ජවසම්පන්නව සිටි ඇය සදාකාලිකව ඔත්පල විය. ඇය ආබාධිත තත්වයට පත් වුයේ, තොරතුරු ලැබී තිබියදීත්, මරාගෙන මැරෙන බෝම්බ ප්‍රහාරයක් එල්ලවෙන බව දැන දැනත්, මහජන ආරක්ෂාව සලසන්නට නොහැකි වූ රාජ්‍යය යාන්ත්‍රණයක අසමත්කම පෙන්වා දෙන්නට නම්: ඇය මිය ගියේ, "ගැලනිගම මුරපොළේදී බෝම්බ ලොරිය පරික්ෂා කිරීමට ඉඩ නොදුන්", වර්තමාන පොලිස්පති දේශබන්දු තෙන්නකෝන් ඇය වැතිර හුන් ගිලන් ඇද අසලටම පැමිණ බඩු මල්ලක් දී යෑ මෙන්‍ ය. ප්‍රහාරයක් එල්ල වෙන බව දැන දැනත් එය වැලැක්වීමට කටයුතු නොකර නිවාඩු ගිය කොළඹ උතුර පොලිස් කොට්ඨාසය භාරව උන් දේශබන්දු තෙන්නකෝන් මහතා පොලිස්පතිවීමෙන් අනතුරුව පාස්කු ප්‍රහාරයෙන් ඔත්පලව සිටි ඇය අසලටම පැමිණ බඩු මල්ලක් දී යෑමෙන් කියවෙන්නේ: "තොප සිටින්නේ අපගේ බිලි පුජාවන්ට බිලි වීමට මිස අන් කිසිවෙකට නෙමේ" යන්න නොවේ ද?

ඇය ගොදුරු වූයේ ලෝකය පුරාම මූලධර්මවාදී ඉස්ලාමීය රාජ්‍යයක් ගොඩ නැගීමේ භයානක සැලැස්මට ශ්‍රී ලංකාවත් ඇතුල් කරලීමේ ජෙහාඩි ත්‍රස්තවාදීන්ගේ බිහිසුණු ප්‍රහාරයක ප්‍රතිඵලයක් ලෙස නම්: ඇය මිය යන්නේ ඇගේ අල්ලපු ගම වූ මීගමුව පෙරියමුල්ලේ පවා කරක් ගැසූ isis ත්‍රස්තයන් කණ්ඩායමක් ඉංදියාවේ හයිද්‍රාබාද් හීදී අත් අඩංගුවට ගත් පුවතක් කණවැකී සතියක් යන්නටත් පෙරය. ඇගේ දරුවා ඇතුළු ගම්වාසීන් රැසක් බිලිගත්, ඇයව ඔත්පල කළ, මරාගෙන මැරෙන isis ත්‍රස්තවාදීන් අවතාර නැවත නැවතත් හොල්මන් කරමින් සිටින පසුබිමක ඇය වැනි සිය ගණන් දෙනා ජීවිත පුජාකල ඊනියා "ආරක්ෂාව බිද වැටීම" තවමත් තහවුරු වී නැද්ද?

ඇය පමණක් නොව පාස්කු ඉරිදා ප්‍රහාරයෙන් විපතට පත්වූ සිය ගණනක් වූ ජනයාට හවුහරණක් වූ ශ්‍රී ලංකා කතෝලික පල්ලිය විපතට පත්වූවන්ගේ වේදනාවන්ට අවතීරණය වෙමින් ඔවුන්ගේ අගහිගකම්වල සිට සිත් තැවුල් දක්වාද, රෝගාබාධවල සිට දරුවන්ගේ අධ්‍යාපනය දක්වාද සියලු බර පැණ දරමින්, විවිධ සහන සැලැසූහ. තිළිනා සම්බන්ධයෙන් ද එසේය. ශ්‍රී ලංකාවේ කතෝලික පල්ලිය නොවන්නට ඇය මිය ගොස් බොහෝ කල්ය. ඇගේ දරුවන් ඇතුළු බොහෝ දරුවන් ද, දරු පවුල් සිය ගණනාවක් ද, මහ මගට වැටී බොහෝ කල් ය. ශ්‍රී ලංකා කතෝලික පල්ලිය පාප්තුමා ඇතුළු ජාත්‍යන්තර ක්‍රිස්තියානි ජනයාගේ සහයෝගය ඇතිව පාස්කු ඉරිදා වින්දිතයන්ගේ දුක් වේදනාවන් සදහා සහන සැලැසූ බව සැබෑය. සීරීමක් ඇතිවූවන්ට පවා මුදලක් ගෙවා සහනයක් සැලසූ බව සැබෑය. බරපතළ සත්කම් අවශ්‍ය වූවනට අවශ්‍යය සැත්කම්වලට කෝටි ගණන් මුදල් වියදම් කළේය. වින්දියන්ගේ දරු පවුල් වල අධ්‍යාපනය සදහා දෙස් විදෙස් ශිෂ්‍යත්ව දී ඔවුන්ගේ අධ්‍යාපනය සදහා ඇප කැප වූහ. ඒ සියල්ලටම වඩා වින්දියන්ගේ මානසික සුවය වෙනුවෙන් බොහෝ දේ කළහ.

ඒහෙත් ඒ සියල්ල තුල පමණක් පාස්කු වින්දිතයන්ට යුක්තිය සහ සාධාරණය ඉටු නොවන බව ඔවුහු දන්නාහුය. යුක්තිය ඉටුකරගැනීමේ මුලිකම දේ සත්‍යය හෙළිකරගැනීම බව ඔවුහු දන්නාහුය. එහිලා ඔවුන් මෙතක් අනුගමනය කළ ක්‍රියාමාර්ග ගැන ඔවුන්ට සතුටුවිය හැකිද? පාස්කු ප්‍රහාරය විමර්ශනය කර, වරදකරුවන්ට දඩුවම් ලබාදීමට ගෝඨාභය රාජපක්ෂ කටයුතු කරතැයි තමා බලාපොරොත්තු වූ බව කාදිනල්තුමා ප්‍රසිද්ධියේ ප්‍රකාශ කර සිටියේය. එහෙත් මේ සටකපට දේශපාලකයන්ගෙන් එතුමාට තියා ගහක් කොලයකටවත් යුක්තියක්, සාධාරණත්වයක්, ඉටුවන්නේ නැත. දේශපාලකයෝ තීන්දු තීරණ ගන්නේ සිය 'බල - පැවැත්මේ - අභිලාෂයන්' මත සිට මිස යුක්තිය, සත්‍යය සහ සාධාරණත්වය මත පදනම්ව නොවේ.

පාස්කු ප්‍රහාරයට යුක්තිය සෙවීමේදී දේශපාලකයන් තීන්දු තීරණ ගන්නා 'බල - පැවැත්මේ - අභිලාෂයෙන්ට' සැබෑ ලෙසම අභියෝග කළ හැකි, බලපෑම් කළ හැකි ජාතික හා ජාත්‍යන්තර වශයෙන් සහය ලබාගත් මූලෝපායන් සකස්කර ගැනීමට ශ්‍රී ලංකා කතෝලික සභාව තවමත් අසමත්ව ඇත. ජිනිවා හී ජාත්‍යන්තර මානව හිමිකම් කොමිසම හමුවට ගිය පමණින් සිදුවන කිසිවක් නොමැත. තවත් සිදුකල යුතු කාර්‍යභාරයන් රාශියක්ම තිබේ

එහිලා මූලික වශයෙන්ම පසක් කරගත යුත්තක් නම් පාස්කු ඉරිදා ප්‍රහාරයෙන් මිය ගියේ, රුධිරය වැගිරුවේ, වද වේදනාවලට පත්වූයේ අන් කිසිවෙකුත් නොව 'ක්‍රිස්තියානි සමාජ ආගමික සංස්කෘතික ඇගයුම්' ජීවත් කිරීමට වෙර දැරූ පිරිසක් බව අවබෝධ කරගැනීම වැදගත් ය. ඔවුන් කුමන ආගමකට, ජාතියකට, කුමන වර්ගයකට, කුමන රටකට, කුමන භාෂාවකට අයත්වුව ද, ඔවුහු එදින සෑදී පැහැදි සිටියේ ක්‍රිස්තියානි සමාජ, ආගමීක, සංස්කෘතික අංගයන් ජීවත් කරවීමටය. ක්‍රිස්තුස් වහන්සේගේ උත්ථානය සමරමින් ආගමික වතාවත් සදහා දේවස්ථානවල දිව්‍යය පුජා සදහා එක් රැස්වූව සිටි කිතුනු බැතිමතුන් හෝ වේවා, තරු පහේ හෝටල්වල පාස්කු ඉරුදින සුප්‍රකට උදෑසන භෝජන සංග්‍රහයන්ට (Easter Sunday brunch) එක්ව සිටියේ අන් කවරෙකුත් නොව 'ක්‍රිස්තියානි සමාජ, ආගමීක, සංස්කෘතික ඇගැයුම්' ජීවත් කරවූ පිරිස්‍ ය. ජාතික ආරක්ෂාව අහිමි වූයේ එම පිරිස්වලටය. සත්‍යය මතුකර ගැනීම යනු එසේ වුයේ ඇයි දැයි හෙළිකරගැනීම ය.

වින්දියන්ට යුක්තිය ඉටුවන්නේ පාස්කු අපරාධය ගැන දේශීය විදේශීය එකතුවක් තුලින් නිසි විමර්ශනයක් කර වරදකරුවන්ට දඩුවම් දීමෙන්ම පමණක් නොවේ. එමගින් පමණක් පාස්කු ඉරිදා ප්‍රහාරයෙන් විපතට පත්වූවනට යුක්තිය ඉටුවන්නේ නැත. පාස්කු ඉරිදා ප්‍රහාරයේ වින්දිතයන්ට සැබෑ යුක්තියක් ඉටුකළ හැක්කේ පාස්කු ඉරිදා ප්‍රහාරයෙන් මියගිය, රුධිරය වැගිරවූ, ආබාධිතයන් බවට පත්වු, වද වේදනාවන්ට ලක්වූ ජනයාගේ ජීවිතවලට සැබෑ අර්ථයක්, සැබෑ වටිනාකමක්, එක් කරලීමෙනි.

එසේ සෑබෑ වටිනාකමක්, අර්ථයක් එක් කල හැකි ව්‍යායාමයකට පාස්කු ඉරිදා ප්‍රහාරය වෙනුවෙන් යුක්තිය සොයන සියල්ලන් ප්‍රවිශ්ට විය යුතුය. ඒ තුලින් දැන් ක්‍රමයෙන් දියවෙමින් හෝ දියකරමින් තිබෙන සැබෑ 'ක්‍රිස්තියානි සමාජ, ආගමීක, සංස්කෘතික ඇගැයුම්' නැවත පණගැන්විය හැක. පාස්කු ඉරිදා ප්‍රහාරයෙන් විපතට පත්වූවන් වැගිරීවූ ලේ, කදුළු, දහඩිය වලට සැබෑ වටිනාකමක්, සැබෑ අර්ථයක් එක් කළ හැක්කේ එවැනි උත්සාහයක් තුලය. එය එක්තරා ආකාරයට පාස්කු ඉරිදා ප්‍රහාරයෙන් පවා බිද දැමීමට නොහැකි, මරණයෙන් පවා නතර කළ නොහැකි, ක්‍රිස්තුස් වහන්සේගේ උත්ථානීය (resurrective) පණිවිඩය ආගමික අර්ථයෙන් පමණක් නොව සමාජ, දේශපාලන, ආර්ථික, සංස්කෘතික සහ වෙනත් බොහෝ අංශ ඔස්සේ ද සොයායෑමකි, පසක් කරගැනීමකි, ක්‍රියාවට නැන්වීමකි. තිළිනා හර්ෂණී වැනි පාස්කු ඉරිදා ප්‍රහාරයෙන් විපතට පත්වූනට සැබෑ යුක්තියක් ඉටුකරලීමට මරණයෙන් පවා නතර කළ නොහැකි 'ක්‍රිස්තියානි සමාජ, ආගමීක, සංස්කෘතික ඇගැයුම්' නැවත පණගැන්වීමට එක්වෙමු!!

මාකස් ප්‍රියන්ත පෙරේරා

29/05/24