This blog is dedicated to my home town Negombo, its people, its history, culture, its life, politics and the norms and the values which I learned from them.

Saturday, 24 June 2017

ඩෙංගු මර්ධනයට මීගමුවෙන් නව විසදුමක් !!!!!

ඉතාමත් දරුණු ලෙස මීගමුව නගරය පුරාම පැතිර යන  ඩෙංගු උවදුර මර්ධනය කිරීම සදහා මීගමුව එක්සත් ජාතික පක්ෂ සංවිධායක, බස්නාහිර පලාත්සභා මන්ත්‍රී, රොයිස් විජිත ප්‍රනාන්දු මහතා නව විසදුමක් අත්හදා බලා තිබේ. 

එම විසදුමවනුවේ නගරයේ ක්‍රමවත්ව ජලය  බැස නොයන කාණු සහ ජලය රැදී ඇති ස්ථානවලට මුහුදුවතුර මුදා හැරීමය. නාගරික මන්ත්‍රීවරයෙකු වන ගිහාන් ප්‍රනාන්දු මහතාගෙන් සහ ව්‍යාපාරිකයෙකුගේ සහයෝගයෙන් බවුසරයක් සපයාගෙන ඇති රොයිස් විජිත ප්‍රනාන්දු මහතා මීගමුව වෙරළ අද්දරින් මුහුදුවතුර සපයාගෙන නගරයේ ජලය රැදී ඇති කාණු සහ වෙනත් ස්ථානවලට මුහුදුවතුර මුදාහැර ඇත. 

ඩෙංගු මර්ධනය සදහා ප්‍රමාණවත් පහසුකම් සහ අරමුදල් නැතයැයි කියමින් එකිනෙකාට චෝදනාකරගන්නා තත්වයක් තුල මීගමුව එක්සත් ජාතික පක්ෂ සංවිධායක, බස්නාහිර පලාත්සභා මන්ත්‍රී, රොයිස් විජිත ප්‍රනාන්දු මහතා මීගමුවේ උග්‍රව පැතිර යන ඩෙංගු උවදුර මර්ධනය කිරීම සදහා මෙවැනි ආකාර නිර්මාණාත්මක සහ අඩුවියදම් විසදුමක් අත්හදා බැලීමට කටයුතුකිරීම අගයකල යුතු, ඉතාමත් ප්‍රසංසනීයය ක්‍රියාමාර්ගයකි.

මේ වසර තුල පමණක්, මේ වනවිට, මීගමුව දිස්ත්‍රික් මහ රෝහල  ඩෙංගු රෝගීන් 4000කට ආසන්න ප්‍රමාණයකට ප්‍රතිකාර ලබා ඇති අතර දැනටමත් මරණ 07ක් වාර්තාවී තිබේ. ඩෙංගු රෝගයට ලක්වී මීයගිය අලුත්ම රෝගියා වාර්තාවුයේ මීගමුව, දළුවකොටුව, කොච්චිකඩේ ප්‍රදේශයේ 54 හැවිරිදි සන්ධ්‍ය ශ්‍රීමතී මහත්මියය. ඊට පෙර මීගමුව කුරණ, කුට්ටිදුව ප්‍රදේශවලින්ද ඩෙංගු මරණ වාර්තාවී තිබේ. 

මීගමුව සහ ඒ අවට ප්‍රදේශවලින් දිනපතා ඇදී එන ඩෙංගු රෝගීන්  නිසා මීගමුව දිස්ත්‍රික් මහ රෝහල  ඩෙංගු රෝගීන්ගෙන් පිරී ගොස් ඇත. ඇදන් පමණක් නොව වාට්ටුද රෝගීන්ට ප්‍රමාණවත් නොව තත්වයක් රෝහලේ උදාවී ඇත. ඒ විනාශවීයෑමට ඉතා ආසන්නව තිබු මීගමුව දිස්ත්‍රික් මහ රෝහලේ සත්මහල් ප්‍රධාන ගොඩනැගිල්ලේ (එය මෙතනින් කියවිය හැක) ප්‍රතිසංස්කරණ කටයුතු තවමත් ඉතා මන්දගාමීව සිදුවෙමින් පවතින තත්වයක් තුල රෝහලේ උද්ගතව ඇති තදබදයට අමතරවය. සති කිහිපයට පෙර සනත් ප්‍රනාන්දු මහතා ඇතුළු ප්‍රංශයේ වෙසෙන මීගමු ක්‍රියාකාරීන් සහ වෙනත් පරිත්‍යාගශීලීන්ගේ දායකත්වයෙන් මීගමුව රෝහලට ඇදන් සහ රෝදපුටූ පරිත්‍යයක් සිදුකර තිබුණි. ඔවුන් ඩෙංගු රෝගයට ප්‍රතිකාර කිරීමට සමත් වෛද්‍යවරු කණ්ඩායමක් ප්‍රංශයේ සිට ලංකාවට රැගෙන ඒමට කටයුතු කරන බවක් ද වාර්තා වේ. කෙසේවුවද, පවත්නා ඉතාමත් කාර්යබහුල සහ අවම පහසුකම් යටතේ පවා මීගමුව දිස්ත්‍රික් මහ රෝහලේ වෛද්‍යවරුන්, හෙදියන් සහ එහි කාර්යමණ්ඩලය ඩෙංගු රෝගීන් සුවපත් කිරීමට දක්වන කැපවීම සම්බන්දයෙන් අප සියල්ලන්ගේම ප්‍රසංසාව ඔවුනට හිමිවිය යුතුය. 2014 වසරේ ඩෙංගු මර්ධනය සදහා ලංකාවේ හොදම රෝහල ලෙස සම්මාන ලැබුවේ මීගමුව දිස්ත්‍රික් මහ රෝහලය.
එහෙත් ගැටළුව වනුයේ ඩෙංගු උවදුර පැතිර යෑම පාලනය කරගැනීමට තවමත් නොහැකිවීමය. කාලාන්තරයක් තිස්සේ ආසියානු සංවර්ධ බැංකුව සහ වෙනත් ජාතික සහ අන්තර්ජාතික ආයතනවලින් ණය සහ ආධාර ලබාගෙන ඉදිකරණ ලද මීගමුව නාගරික කාණු පද්ධතිය සම්පුර්ණයෙන්ම පාහේ අවුල් ජාලයක් බවට පත්වී තිබේ. තැන තැන වතුර රැදෙන එම කාණු පද්ධතිය ඩෙංගු මදුරුවන් බෝකරන ඩෙංගු මදුරු ටැංකි සහ මදුරු තවාන් බවට පත්ව තිබේ. ඒ නගරේ තැන්තැන්වල ඇති  වතුර බැස නොයන අගල්, වලවල් සහ වෙනත් වතුර රැදෙන ස්ථානවලට අමතරවය. 

රටේ සෙසු පලාත්පාලන ආයතන මෙන්ම මීගමුව මහ නගර සභාවද විසුරුවා හැර ඇති බැවින් ඩෙංගු මර්ධනයේ සමස්ත වගකීම මීගමුව ප්‍රදේශයේ දේශපාලකයන්ගේ සිට නාගරික කොමසාරිස්වරයා සහ එහි කාර්යමණ්ඩලය මතට පැවරී තිබේ. එහෙත් ඔවුන්ගෙන්  අපේක්ෂාකරන කාර්යභාරය නිසිලෙසකින් ඉටුනොවන බවත්, ඔවුන් සිය රාජකාරිය පුද්ගලික සහ දේශපාලන හිතවත්කම් මත සිදුකරමින් සිටින බවට චෝදනාද එල්ලවී තිබේ. ඩෙංගු මර්ධනය මෙන්ම කැණීකසල කලමනාකරණයටද මීගමුව නාගරික කොමසාරිස්වරයා මෙන්ම එහි කාර්යමණ්ඩලයද අසමත්ව ඇත. එහෙත් මීගමුව නාගරික කොමසාරිස්වරයා රජය මගින් ජපානයේ පැවති කැණීකසල කලමනාකරණය පිළිබද විශේෂ පුහුණුවකට  පවා යවා විශේෂයෙන් පුහුණුකරනු ලැබූ තැනැත්තෙකි.

තත්වය මෙසේ තිබියදී, මීගමුව නගරයේ ක්‍රමවත්ව ජලය  බැස නොයන කාණු සහ ජලය රැදී ඇති ස්ථානවලට මුහුදුවතුර මුදා හැරීමට මීගමුව එක්සත් ජාතික පක්ෂ සංවිධායක, බස්නාහිර පලාත්සභා මන්ත්‍රී,  රොයිස් විජිත ප්‍රනාන්දු මහතා කටයුතු කිරීම තුල මීගමුවේ ඩෙංගු උවදුර  මර්ධනය කිරීම සම්බන්දයෙන් මීගමු ජනයා තුල නව බලාපොරොත්තුවක් ඇතිකර තිබේ. පසුගිය සතිකිහිපය තුල රොයිස් විජිත ප්‍රනාන්දු මහතා සහ මීගමුව එක්සත් ජාතික පක්ෂයේ ක්‍රියාකාරීන් සහ වෙනත් පිරිස් එක්වී ඩෙංගු රෝගය පැතිර ගොස් තිබු ප්‍රදේශ ශුද්ධ පවිත්‍ර කිරීමේ ශ්‍රමදානයක් සංවිධානය කර තිබුණි. මෙවැනි ශ්‍රමදාන ඔස්සේ හෝ මීගමුව නගරයත් එහි වෙරළත් නිතර පිරිසිදුකරන්නේ නම් නගරේ සෞඛ්‍ය තත්වයත් , අලංකාරයත්, නොඅඩුව පවත්වාගෙන යෑහැකි බැවින් රොයිස් විජිත ප්‍රනාන්දු මහතා විසින් ඉදිරියේදීද නොකඩවා මෙවැනි ක්‍රියාකාරකම්වල නිරතවේතැයි මීගමුව නගර වැසියන් අපේකෂා කරති. 

නගරය දැවන්ත ඩෙංගු උවදුරකට ලක්ව තිබියදීත් මීගමුවෙන් විශාල මනාප ප්‍රමාණයක් ලබා  පාර්ලි‌‌මේන්තු මන්ත්‍රීවරුන් සහ ඇමතිවරුන් බවට පත්වූ නිමල් ලාන්සා, සුදර්ශනී ප්‍රනාන්දුපුල්ලේ සහ කාවිද්‍යා ජයවර්ධන ආදීන්ගෙන් ප්‍රමාණවත් කාර්යභාරයක් සිදුනොවන බවද චෝදනා එල්ලවේ. 

1977 මහා මැතිවරණයට එක්සත් ජාතික පක්ෂයෙන් තරගකල ඩෙන්සිල් ප්‍රනාන්දු මහතාගෙන් මීගමුව මුන්නක්කරයේ ජනයා සිය වැසිකිලි ප්‍රශ්නය විසදාදෙන මෙන් ඉල්ලුවිට ඩෙන්සිල් ප්‍රනාන්දු මහතාගේ උත්තරයවුයේ 'වැසිකිලි වෙනුවට ඌරන් ඇති කරන්න' යැයි කීමය. අද මීගමුව නගරයේ ඉතාමත් දරුණු ලෙස පැතිරයන ඩෙංගු වසංගත තත්වයකට නගරය මුහුණදී ඇති මේ මොහොතේ, ඩෙංගු උවදුර මර්ධනය කිරීම සදහා අවශ්‍ය නිවැරදි, ස්ථීරසාර සහ විද්‍යාත්මක විසදුම් භාවිතයකට ගෙන ඒමට සිය මුළු ශක්තිය යොදවා කටයුතු නොකර 'ඇයි මම මුහුදු වතුර දැම්මානේ වැනි' ප්‍රදර්ශනාත්මක සහ බොරු පැලැස්තර විසදුම් වලින් මීගමුවේ ඩෙංගු වසංගතය පිටුදැකිමටත්, මීගමුව ජනයාව තැම්බීමටවත් නොහැකි බව මීගමුව එක්සත් ජාතික පක්ෂයේ සංවිධායක, බස්නාහිර පලාත් සභා මන්ත්‍රී, රොයිස් විජිත ප්‍රනාන්දු මහතාට මෙන්ම නාගරික මන්ත්‍රී ගිහාන් ප්‍රනාන්දු මහතාටද මතක්කර දියයුතුය. 
 මාකස් ප්‍රියන්ත පෙරේරා.
25/06/17.

Monday, 12 June 2017

නව ඉස්ලාම් රාජ්‍ය බිදවැටීමට ඉතා ආසන්නය.


මීට වසර 3කට පෙර මතුවූ ISIS හෙවත් ‘ඉරාකයේ සහ සිරියාවේ ඉස්ලාමීය රාජ්‍ය’ (Islamic State of Iraq and the Levant or Islamic State of Iraq and Syriaor Islamic State of Iraq and al-Shamor IS ) නමින් හැදින්වූ ඉස්ලාමීය සටන්කරුවන් විසින් බිහිකළ 'ඉස්ලාමීය රාජ්‍යය' දැන් බිදවැටීමට ඉතා ආසන්නව ඇත. සිරියානු හමුදා 'ඉස්ලාමීය රාජ්‍ය' සටන්කරුවන් අත්කරගෙන සිටි සිරියානු භූමිය සහමුලින්ම පාහේ නිදහස් කරගෙන ඉරාක දේශසීමාවට ආසන්නවෙමින් සිටී. සිරියානූ සහ ඉරාක දේශසීමාව ආසන්නයේ ඇති al-Tanf කපොල්ල (Al-Tanf crossing)ට සමීපවෙමින් ඇති සිරියානු හමුදා පසුවන්නේ ඉතා ජයග්‍රහී මානසිකත්වයකය. මේ අතර ඉරාකයේ ISIS ඉස්ලාමීය සටන්කාමීන්ගේ ඉතාම තීරණාත්මක නගරය ලෙස සැලකෙන Mosul නගරය අත්කර ගැනීමේ මහා සටනෙහි ඉරාක හමුදා නිරතව සිටී. එහිලා ඇමෙරිකාවේ සහ බටහිර රටවල නොමද සහයෝගය හිමිව ඇත. මේ සියල්ල තුල කියවෙනුවේ  ISIS සටන්කාමීන් බිහිකළ  'ඉස්ලාමීය රාජ්‍යය' බිදවැටීමට ආසන්න බවකි. ලොව පුරාම දිගින් දිගටම එල්ලවෙන ISIS ත්‍රස්‌ත ප්‍රහාර 'ඉස්ලාමීය රාජ්‍යය' අත්කර ගැනීමට එල්ලකරන ප්‍රහාරයන්ට පලිගැනීමක් ලෙසද, 'ඉස්ලාමිය රාජ්‍යය' එරෙහිව එල්ලවන ප්‍රහාරයන් මැඩ පැවැත්වීමට සිදුකරන උපක්‍රමයක් ලෙසද විග්‍රහ කළහැක.

ඒමෙන්ම භූමිය අහිමිවුවද ISIS ත්‍රස්‌තයන්ගේ ප්‍රහාර නවත්වනු ඇත්දැයි යන්න තවම නිගමනය කල නොහැක. කෙසේවුවද මෙම ත්‍රස්‌ත ව්‍යාපාරය මතුවන අවධීයේම මම 'සමබිම' පුවත්පතට ලියූ ලිපිය පහතින් වේ. එය ඉදිරියේදී  සාකච්ඡා කිරීමට නියමිත  ISIS ත්‍රස්‌තයන් සහ ඉස්ලාමීය රාජ්‍යය පිලිබදවූ සිහිනය පිළිබද ලිපි පෙලට යම් ප්‍රවේශයක් සපයනු ඇති බව මගේ විශ්වාසයයි.  


නව ඉස්ලාම් රාජ්‍ය: සිහිනය සහ යථාර්තය අතර රික්තකයක

මීට‍ සති කිහිපයකට ඉහතදී උතුරු සහ බටහිර ඉරාකයේත්, උතුරු සහ නැගෙනහිර සිරියාවේ ප්‍රදේශවලිනුත් ඉදිරියට පැමිණි ISIS හෙවත් ‘ඉරාකයේ සහ සිරියාවේ ඉස්ලාමීය රාජ්‍ය’ (Islamic State of Iraq and the Levant or Islamic State of Iraq and Syriaor Islamic State of Iraq and al-Shamor IS ) නමින් හැදින්වූ ඉස්ලාමීය සටන්කරුවන් දැන් උතුරුදිග සිරියාවේ සිට උතුරු ඉරාකය දක්වා නිල නොලත් ‘ඉස්ලාම් රාජ්‍යක්’ ප්‍රකාශයට පත්කර තිබේ. මෙම නව ඉස්ලාම් රාජ්‍ය විසින් මිට වසර සීයකට පමණ පෙර පැවති අරාබියාවත්, එයටත් වඩා ඈතට දිවයන (එනම් ක්‍රි.ව. 661-750 දක්වා) පෘතුගාලයේ සහ ස්පාඤ්ඤයේ සිට ඉන්දියාවේ ප්‍රදේශ කිහිපයක් දක්වා ව්‍යාප්තව පැවති පැරණි මුස්ලිම් ලෝකයත්, ලෝකයේ සියලුම මුස්ලිම්වරුන් වෙනුවෙන් ‘උම්හා’ (Ummah) රාජ්‍යයකුත් ස්ථාපනය කිරීමට කටයුතු කරන බව ප්‍රකාශ කරයි.

එහෙයින් මධ්‍යතන යුගයේ පැවති මුස්ලිම් ප්‍රදේශයන්ගේ පාලන තන්ත්‍රය සදහා භාවිතා කළ ‘ක්ලීෆාට්’ (Caliphate orkhilāfa) යන්න ඔවුන් සිය නව ඉස්ලාම් රාජ්‍ය සදහා යොදාගෙන ඇත. මෙම ‘ක්ලීෆාට්’ හි නායකයා හෙවත් ‘ක්ලිෆා’ (Caliph / the head of state) වශයෙන් Abu Bakr al-Baghdadi පත්කරගෙන තිබේ. දැන් ඔවුන් ලොව සියලු මුස්ලිම්වරුන්ට සහ ඔවුන්ගේ පාලන තන්ත්‍රයන්ට මෙම නව ‘ක්ලිෆා’ ව පිළිගන්නා ලෙසත් ඔහුගේ අණට යටත් වන ලෙසත් අණකර තිබේ.

ලෝකයේ අවසන් වරට ‘ක්ලීෆාට්’ රාජ්‍යක් හෝ ‘ක්ලිෆා’වරයෙකු යටතේ මුස්ලිම් පාලනයක් පැවතියේ පැරණි දෙවැනි අබ්දුල්මෙජ්ස්ඩ් (Abdülmecid II) අධිරාජ්‍යා යටතේ ඔටෝමන් තුර්කි අධිරාජ්‍යය (Ottoman Turkish Empire ) පැවති කාලයේදීය. එහෙත් පළමු ලෝක යුද්ධයෙන් ඔටෝමන් තුර්කි අධිරාජ්‍යය පරාජය වීමත් සමග 1924 දී ජාතීන්ගේ සංගමය (League of Nations) විසින් එයට අයත් ප්‍රදේශ බෙදා වෙන්කොට නව රාජ්‍යයන් ගණනාවක්ම මැද පෙරදිග අරාබියානු අර්ධද්වීපයේ පිහිටුවන ලදී. ඉරාකය සහ සිරියාව නමින් රාජ්‍යයන් දෙකක් බිහිවුයේ එලෙසිනි. එහෙත් මෙම ඉරාකයට සහ සිරියාවයට අයත් වන්නාවූ භුමි කලාපයන් පිළිබද තීරණය කෙරුනේ ජාතීන්ගේ සංගමය පිහිටවීමටත් පෙර ප්‍රංශ සහ එංගලන්ත අධිරාජ්‍යවාදීන් විසින් 1916 මැයි මාසේදී අත්සන් තැබූ කුප්‍රකට සයික්ස්-පිකොට් ගිවිසුම (Sykes–Picot agreement) මගිනි. රුසියාවේ සාර් රජය ද පාර්ශ්වකරුවන් කරමින් අත්සන් කළ මෙම ගිවිසුම, රුසියාවේ ලෙනින්ගේ බෝල්ෂෙවික් විප්ලවය (1917) මගින් පිහිට වූ රජයේ විදේශ කටයුතු පිළිබද කොමසාරිස්වරයා වූ ලියොන් ට්‍රොට්ස්කි ( Leon Trotsky) විසින් ලොවට හෙළි කරනු ලැබුනි. (ඉස්තාන්බුල් ඇතුළු තුර්කි ප්‍රදේශ රැසක් රුසියාවට ලැබීමට නියමිතව පැවති මෙම ගිවිසුමෙහි වාසිය ලබා නොගෙන එය ප්‍රසිද්ධියට පත් කිරීමෙන් ට්‍රොට්ස්කි රුසියානුවන්ගේ වුවමනාවන් දෙවැනි තැනට ඇද දැමුවෙ යැයි ජෝශප් ස්ටාලින් විසින් ට්‍රොට්ස්කිට එරෙහිව නගන චෝදනා මුලින්ම පැන නැගුනේ මෙහිදීය). දැන් ඉරාකයේ පිහිටුවා ඇති ‘නව ඉස්ලාම් රාජ්‍ය’ ප්‍රකාශ කරනුයේ මෙම ප්‍රංශ සහ එංගලන්ත අධිරාජ්‍යවාදීන්ගේ වුවමනාවන් අනුව සකස් කළ සයික්ස්-පිකොට් ගිවිසුම මගින් පිහිට වූ සියලු අරාබියානු දේශ සීමා කඩාබිද දමන බවයි.

කරණු එසේ වුවද, ලෝකයේ විවිධ රටවල, විවිධ පාලන තන්ත්‍රයන් යටතේ ජීවත්වෙන බිලියන 1.6 ක් නොහොත් ලෝක ජනග්‍රහනයෙන් 23% වන සමස්ථ මුස්ලිම් ජනයාත්, ලෝක මුස්ලිම් සහයෝගිතා සංවිධානයේ සමාජිකත්වය (Organisation of Islamic Cooperation –OIC) දරණ රටවල් 57ක පාලන තන්ත්‍රයන්ද මෙම නව ‘ක්ලීෆාට්’ ඉස්ලාම් රාජ්‍ය සහ එහි ‘ක්ලිෆා’ සිය නායකයා වශයෙන් පිළිගනු ලබයිද ? එම නායකයාගේ අණසක අනුව කටයුතු කරයිද ? බොහෝ දුරට එය එසේ නොවීමට වැඩි ඉඩක් තිබේ.

මන්ද යත්, දැඩි ආගමික අන්තවාදයක සිට කටයුතු කරන මෙම නව ‘ක්ලිෆා ඉස්ලාම් රාජ්‍ය’ දැනටමත් වගවිභාගයකින් තොරව දහස්ගණන් ජනයා ඝාතනය කරමින් තිබෙන බවත් අසල ප්‍රදේශවල ජීවත්වෙන මුස්ලිම් ජනයා පවා එයට බොහෝ බියක් දක්වන බවත් බොහෝ ජනමාධ්‍ය දක්වයි. ඒ අතරම, ලොව පුරාම රැඩිකල් මුස්ලිම් කොටස් මේ ISIS සටන්කාමින් සමග එකතුවෙමින් සිටන බවත්, මෙතෙක් එකිනෙකාට විරුද්ධව සිටි කණ්ඩායම් පවා දැන් ඔවුන් සමග කටයුතු කරන බවත් එම වර්තාම දක්වයි. සිය අරමුණු සක්ෂාත් කර ගැනීමට වෙන විකල්පයක් නොමැති බව පෙනී යන හෙයින්, මෙම එකතු වන පිරිස් සමග ISIS සටන්කාමින් සිය අරමුණවලට එරෙහිවන කුමන බලවේගයක් සමග හෝ දැවන්ත යුදයකට යාමට සැරසෙන බවද දැක්වේ.

එහෙත් ඔවුනට එවැනි යුද්ධක් කළ නොහැක. ඒ මන්ද යත් ISIS සටන්කාමින්ට හෝ වෙනත් ඕනෑම මුස්ලිම් සටන්කාමීට වඩා ඔවුන්ගේ සතුරන් සතුව දැවන්ත යුද්ධ බලයක් (Firepower ) පවතී. එය මරාගෙන මැරෙන බෝම්බ ප්‍රහාරවලට හෝ දීර්ඝ කාලීන ගරිල්ලා යුද්ධයකට පහසුවෙන් බිද දැමිය නොහැක්කකි. එමෙන්ම සම්පත් අතින්ද ISIS සටන්කාමින්ට වඩා සෙසු ලෝකය පසුවන්නේ පහසු තැනකය.

එය එසේ වුවද, ඔවුන්ගේ වර්ධනය තීරණය කිරීමට තවත් කරුණක් ඉවහල් වන බව පෙනේ , ඒ ලෝකයේ මුස්ලිම් ප්‍රජාවට කෙතරම් සාධාරණයක් ඉෂ්ට වේද යන්නයි. ලෝකයේ ඕනෑම තැනක වෙසෙන මුස්ලිම් ප්‍රජාවකට දිගින් දිගටම සිදුවෙන අසාධාරණයන් මගින් සිදුවනුයේ ලොව පුරාම වෙසෙන මුස්ලිම් ජනයා ඔවුන්ගේම ඉස්ලාමීය රාජ්‍යක් තුළ ජීවත්වීමට වුවමනාවක් වර්ධනය කරන්නක් වන අතර, ඒ සදහා වන දැවන්ත යුද්ධයකට පෙලඹවීමක්ද වේ. යහපත් සමාජයක් බලාපොරත්තු වන සැමගේම අද දිනයේ වගකීම වනුයේ එවැනි තත්ත්වයක් ඇති නොවීමට කටයුතු කිරීමයි.

මාකස් ප්‍රියන්ත පෙරේරා
(Jul 7th, 2014 සමබිම පුවත්පතට ලියූ ලිපියකි.)

Wednesday, 7 June 2017

මෙවර බ්‍රිතාන්‍ය මහ මැතිවරණය ගෙනෙන අත්භූත ප්‍රථිපලය කවරේද?


ඉකුත් වසරේ (23/06/2016) බ්‍රිතාන්‍යය යුරෝපා සංගමය සමග තවදුරටත් සිටින්නේද? නැතිද? යන්න සම්බන්දයෙන් පැවති ජනමත විචාරණයට (Brexit)  දිනකට පෙර, එනම් 22/06/2016 දින, බ්‍රිතාන්‍යයේ ප්‍රකට දේශපාලන සගරාවක්වන 'New Statesman' සගරාව දැක්වුයේ Brexit ජනමතවිචාරණය යනු පැන්ඩෝරාගේ අත්භූත පෙට්ටිය (pandora's box)  විවෘත කිරීමකට සමානවන්නක් බවයි. එහි අදුරු සහ දරුණු ප්‍රථිපල ඉදිරිකාලයේදී බ්‍රිතාන්‍යයන් විසින් අත්විදිය හැකි බව එම සගරාව දක්වා මෙසේ දක්වා තිබුණි: 'Pandora’s box has been opened. The referendum has unleashed dark forces and furies into the body politic and we shall be living with the consequences for years to come.'). 

ඉහත 'New Statesman' සගරාව දැක්වූ අදහස අනුව යමින් ශ්‍රී ලංකාවේ රූපවාහිනී සේවයක් විසින් පවත්වන ලද බලය බෙදීම පිළිබද දේශපාලන සාකච්ඡාවකදී ශිරාල් ලක්තිලක මහතාද Brexit ජනමතවිචාරණය හැදින්වුයේ පැන්ඩෝරාගේ පෙට්ටිය විවෘත කිරීමක් ලෙසය. 

පැන්ඩෝරාගේ පෙට්ටිය (pandora's box) හෙවත්  'වරක් ක්‍රියාත්මක කළ විට උභතෝකෝටික ප්‍රශ්න රාශියක් ඇති කරන' තත්වයක් Brexit ජනමතවිචාරණයත් සමග බ්‍රිතාන්‍යයේ උද්ගතවූ බව පැහැදිලිය: 

ජනමතවිචාරණය අතරතුර කම්කරු (Labour) පක්ෂයේ මන්ත්‍රී Jo Coxව සහාසික වර්ගවාදියෙකු විසින් මරා දමන ලදී. (ඒ සම්බන්දයෙන් මා ලියූ සටහන මෙතනින් කියවිය හැක). 'ක්‍රම විරෝධී' දේශපාලන ප්‍රචන්ඩත්වය සංවිධානාත්මක තලයක සිට තනි තනි පුද්ගලයන් මගින් වුවද දියත්විය හැකි බවට ඉන් අනතුරු ඇගවිනි. 

ජනමත විචාරයේ ප්‍රථිපල නිකුත්වීමෙන් අනතුරව නැගෙනහිර යුරෝපියානූ ජාතිකයන්ට එරෙහි විරෝධය සහ ප්‍රචන්ඩත්වය ප්‍රධාන නගරවල මෙන්ම ඈත එපිට ගම්මානවලින්ද වාර්තා විය. බ්‍රිතාන්‍යය නිතර ආඩම්බරවන බ්‍රිතාන්‍ය වටිනාකම් 
(British values) වලට කණකොකා හැඩීම ඇරබුවේ දැයි සැකයක් ඉන් මතුවිණි. 

David Cameron අගමැතිවරයා (13/07/2016 දින) ඉල්ලා අස්වූ අතර කොන්සර්වේටිව් පක්ෂයේ ගතානුගතික-දක්ෂිණාංශිය නියෝජනය කල, ඇංග්ලිකන් පල්ලියේ පුජකවරයෙකුගේ දුවෙකු වූ, ස්වදේශීය කටයුතු පිළිබද ඇමති, Theresa May කොන්සර්වේටිව් පක්ෂයේ නායිකාව බවටත්, බ්‍රිතාන්‍යයේ අගමැති ධූරයටත්  පත්වන ලදී. බ්‍රිතාන්‍යයේ නුතනත්වයේ සංකේතයක් බවට සැලකු Boris Johnson ලත් තැනම ලොප් වී ගතානුගතිකත්වයට ඉදිරියට ඒමට ඉඩදෙන ලදී.

කුමන  නීතිමය සහ දේශපාලන බාධක පැමිණියද යුරෝපා සංගමයෙන් ඉවත්වීමට දුන් ජනමතවිචාරණයේ ප්‍රථිපලය ක්‍රියාත්මක කිරීමට තමා කටයුතු කරන බවත්, ඒ සදහා නැවත මහ මැතිවරණයක් කැදවීමේ අවශ්‍යතාවයන් නොමැති බවත් මුලදී ප්‍රකාශකල Theresa May අගමැතිනිය, හෙට (08/06/16) පැවැත්වීමට නියමිත හදිස්සි මහා මැතිවරණයක් කැදවා තිබේ. 

ඒ Brexit ජනමතවිචාරණයත් සමග බ්‍රිතාන්‍යයේ උද්ගතවූ පැන්ඩෝරාගේ පෙට්ටිය (pandora's box)  හෙවත්  'වරක් ක්‍රියාත්මක කළ විට උභතෝකෝටික ප්‍රශ්න රාශියක් ඇති කරන' තත්වයන්ගෙන් කිහිපයක් පමණි.

අගමැති 
Theresa Mayගේ  මෙම හදිස්සි මහ මැතිවරණය කැදවීම ඔස්සේ බලාපොරොත්තු වන්නේ යුරෝපා සංගමයෙන් ඉවත්වීම පිළිබද ක්‍රියාපටිපාටිය සදහා අවශ්‍ය දේශපාලන බලය ගොඩනගාගැනීම බව දක්වා තිබේ. එහෙත් අදාල ක්‍රියාපටිපාටිය සදහා  කටයුතු කිරීමට අවශ්‍ය දේශපලන සහය සහ දේශපාලන සහයෝගය බ්‍රිතාන්‍යයේ ප්‍රධාන විරුද්ධ පක්ෂය වන කම්කරු (Labour) පක්ෂය සපයමින් සිටියදීත් Theresa May අගමැතිනිය  මහ මැතිවරණයක් කැදවනුවේ වෙනත් දේශපාලන න්‍යාය පත්‍රයක් ඇයට තිබෙන නිසා බව පැහැදිලිය. 

විශේෂයෙන්ම, බ්‍රිතාන්‍යය ලෝක ආර්ථිකයේ 05වෙනි විශාලතම ආර්ථිකය ඇති තනි රටක් බැවින් යුරෝපා සංගමයට තමන් සමග දෙපාර්ශවයටම වාසිදායක ආර්ථික සහ ආරක්ෂක එකගතාවයන්ට පැමිණීමට සිදුවෙන බවත්,  එහින් යුරෝපා සංගමයෙන් ඉවත්වීම (Brexit)  බ්‍රිතාන්‍යයට එතරම් අවුලක් ඇති කරන්නක්  නොවන බවටත් වූ මුල්  බලාපොරොත්තුව දැන් වියැකී ගොස් තිබේ.  යුරෝපා සංගමයේ නායකයන්  'බ්‍රිතාන්‍යයට පාඩමක් ඉගැන්වීමේ' ස්ථාවරයක සිටින බැවින් බ්‍රිතාන්‍යයට හිතුතරම් වාසි සහගත පිටවීමක් යුරෝපා සංගමයෙන් ලබාගත නොහැකි බව පෙනේ.

ඒ අනුව ඉදිරියේදී බ්‍රිතාන්‍යයට අනිවාර්යෙන්ම මුහුණදීමට සිදුවන ආර්ථික විචල්‍යතාවයන් සහ දුෂ්කරතාවයන් හමුවේ දැඩි ආර්ථික ක්‍රියාමාර්ග ගැනීමට Theresa Mayගේ  කොන්සේවෙටිව් පක්ෂයට සිදුවේ. ඒ අතර මහජන සුබසාධන වියදම් කප්පාදුව, සහනාධාර කප්පාදුව, බදු වැඩිකිරීම ආදී (austerity) ක්‍රියාමාර්ග ගැනීම් සදහා අවශ්‍ය දේශපාලන බලය අත්කර ගැනීම මෙම හදිස්සි මහ මැතිවරණයේ යටි අරමුණ බව පැහැදිලිය. 

මැතිවරණය කැදවන අවස්ථාවවූ පසුගිය අප්‍රියල් මාසේ දෙවන සතිය වනවිට බ්‍රිතාන්‍යයේ ප්‍රධාන විපක්ෂය වන කම්කරු (Labour) පක්ෂයේ ජනප්‍රියත්වය එහි ඉතිහාසයේ පහලම මට්ටමට වැටී තිබීමත්, කම්කරු (Labour) පක්ෂයේ නායකයා වන Jeremy Corbyn සම්බන්දයෙන් ප්‍රබල විරෝධයක් පක්ෂය තුලත් ඉන් පිටතත් වර්ධනයවී තිබීමත්, දක්ෂිණාංශික ජාතිකවාදී බ්‍රිතාන්‍ය නිදහස් පක්ෂය (UKIP) Nigel Farage නායකත්වයෙන් ඉවත්වීමත් සමග නායකත්ව ආර්බුධයකටත්, පක්ෂය දේශපාලන වශයෙන් 'ගමනක අවසානයට' ලගාවී තිබීමත්, ලිබරල් ඩිමොක්‍රටික් පක්ෂය නව නායකයෙකු (Tim Farron) යටතේ නැවත ප්‍රතිසංවිධාන කටයුතුවල නිරතවෙමින් සිටීමත් තුල  Theresa Mayගේ කොන්සේවෙටිව් පක්ෂයට පැහැදිලි බහුතරයක්  අත්කර ගතහැකි වෙතැයි පෙනීගියාමද මෙම හදිස්සි මහා මැතිවරණය කැදවීමට අවස්ථාව උදාකරන ලදී.

ඒ අනුව Theresa May 1983 දී හිටපු අගමැතිනී Margaret Thatcher ලබා ගත්තා (43.9 %) කටත් වඩා වැඩි චන්ද ප්‍රතිශතයක් සහ Thatcher ලබාගත් ආසන 397ට වඩා ලබා ගනු ඇතැයි පුරෝකතනය කළේය. පුවත්පත් වාර්තා සදහන් කලේද එයමය. එනම් "Theresa May will win the biggest landslide since Thatcher" ලෙසය. එම තත්වය තුල  Jeremy Corbynන්ගේ කම්කරු (Labour) පක්ෂය Margaret Thatcher සමග තරගවැදුණු Michael Foot ලබාගත් (28 %) වඩා අඩු චන්ද ප්‍රතිශතයක් සහ කම්කරු (Labour) පක්ෂය ලබාගත් අඩුම ආසන සංබ්‍යාවක් වන 209කට වඩා අඩු ආසන සංඛාවක් ලබාගනු ඇතැයි අපේක්ෂා කලේය.

හෙට (08/06/17) පැවැත්වෙන මැතිවරණය කැදවීමට පෙර  බ්‍රිතාන්‍යය පාර්ලි‌‌මේන්තුවේ පහල මන්ත්‍රී මණ්ඩලයේ (House of Commons) ආසන 650 සමන්විත වුයේ පහත ආකාරයටය, එනම්:

කොන්සර්වේටිව් පක්ෂයට  ආසන 330 ක් ද
ලේබර් පක්ෂයට ආසන 229 ක් ද 
ස්කෝට්ලන්ත ජාතික පක්ෂයට ආසන 54ක්ද 
ලිබරල් ඩිමොක්‍රටික් පක්ෂයට ආසන 09ක් ද 
සෙසු පක්ෂවලට  ආසන 28 ක්, ලෙසය. 

ඒ අනුව කොන්සර්වේටිව් පක්ෂයට පාර්ලිමේන්තුවේ සෙසු සියළු පක්ෂවල එකතුවට වඩා ආසන 20ක පැහැදිලි බුහුතරයක් තිබිණි. (කථානායක, කාරක සභා ප්‍රධානීන් තිදෙනා හැරුණු විට ඇත්තේ 17 දෙනෙකුගේ-Working Government Majority යක් පමණි).

දැනට සිදුකර ඇති මැතිවරණ පුරෝකතනයන් වලට අනුව නම් කොන්සර්වේටිව් පක්ෂය (43-44 %) බුහුතරයක් ද, ලේබර් පක්ෂය (34-37%) අඩු චන්ද ප්‍රමාණයක්ද ලබාගනීයැයි විශ්වාස කෙරේ. මේ අනුව Theresa Mayගේ කොන්සර්වේටිව් පක්ෂයට (43-44%) බුහුතරයක් ලැබූනද  ඇයට දිනාගත හැක්කේ ආසන 360කට ආසන්න ප්‍රමාණයක් පමණි. එය Margaret Thatcher ගේ වාර්තාවවූ ආසන 397 අභිබවායාමට නොහැකිවනු ඇත. එහෙත් Theresa May පැහැදිලිවම තවත් ආසන 30කට වඩා වැඩි ප්‍රමානයක් රැස්කර ගැනීමේ ඉඩප්‍රස්ථාවක් පවතී. 

එහි අනෙක් පැත්ත වන Jeremy Corbynන්ගේ කම්කරු (Labour) පක්ෂයට ඇත්තේ එතරම් විශිෂ්ඨ තත්වයක් නොවේ. මැතිවරණයට පෙර සහ මැතිවරණය අතරතුර  Jeremy Corbynන්ට  එරෙහිව නැගෙන විරෝධයේ සහ ප්‍රසාදයේ  අඩු-වැඩිය කෙසේවුවද බ්‍රිතාන්‍ය තුල කම්කරු පක්ෂයට හිමි අවම චන්ද ප්‍රතිශතය වන (30-37%)  සීමාව පසුකර යෑමට ඔවුන්ට හැකිවී ඇති බවක් නොපෙනේ. එහි ප්‍රථිපලය වනුයේ Jeremy Corbynන්ගේ කම්කරු (Labour) පක්ෂය කෙතරම් සමාජ සුබසාධන සහ ප්‍රගතිශීලී යෝජනා ඉදිරිපත්කර තිබුනද ආණ්ඩුවක් පිහිටුවීමට අවශ්‍ය තවත් ආසන 98ක් වැඩිපුර දිනාගැනීමේ අති විශාල අභියෝගය ජයගැනීම අභියෝගයක් වී තිබේ. අඩුම වශයෙන් ඔවුන්ට ආසන 250-260ක් කරා ලගාවීමට හැකිව ලැබුනහොත් පාර්ලිමේන්තුව තුල තනි පක්ෂයකට සන්ධානයකින් තොරව ආණ්ඩුවක් පිහිටවීමට නොහැකි වනු ඇත. ඔවුන්ගේ පැත්තෙන් එයද ජයග්‍රහණයකි. එහෙත් මැතිවරණ පුරෝකත්නයන් දක්වා ඇති ආකාරයට කම්කරු පක්ෂය 30-37% චන්ද ප්‍රතිශතය ගතහොත් ඔවුන්ගේ ආසන සංඛාව 210-215 දක්වා පහත වැටීමට ඇති හැකිව හෙවත් පවත්නා ආසන සංබ්‍යාවට වඩා ආසන 15-20ක් අතර සංබ්‍යාවක් අහිමිවීමට ඇති ඉඩකඩද බැහැර කල නොහැක. 

ලිබර් ඩිමොක්‍රටික් පක්ෂය පැහැදිලිව සිය ආසන සංබ්‍යාව 9යේ සිට 12-15 අතර සංඛාවක් කරා ගමන් කරනු ඇත. 

ස්කොට්ලන්ත ජාතික පක්ෂයට ඇති ආසන 56ය මීට වඩා වැඩිකරගත නොහැකි බව මගේ පෞද්ගලික අදහසයි. බොහෝදුරට ඔවුන්ගේ  ආසන සංඛාව 14-6 අතර ප්‍රමාණයකින් අඩුවෙනු ඇති බව මගේ අදහසයි. 

අයර්ලන්තයේ  Sinn Féin ආසන සංබ්‍යා 4-5 කට වඩා වැඩි නොවණු ඇත. ඔවුන්ගේ ප්‍රතිවාදී Democratic Unionist Party පක්ෂය  Sinn Féin මෙන් දෙගුණයක් ගැනීමේ ප්‍රවණතාවය මෙවරද ලොකු වෙනසක් නොපෙන්වනු ඇති බව පෙනේ. 

එමෙන්ම, ගියවර (2015)  වාර්තාගත ලෙස ආසියානු-අප්‍රිකානු සම්භවයක් ඇති මංත්‍රීවරුන් 42ක් බ්‍රිතාන්‍යය පාර්ලි‌‌මේන්තුවට තේරීපත්වූ අතර මෙවර එම වාර්තාව අභිබවා යාහැකි බවක් පෙනේ. ඉතිහාසයේ වෙන කවරදාටත් වඩා ඉන්දියානු සම්භවයක් ඇති පුද්ගලයන් 56 ක් මෙවර මැතිවරණයට ඉදිරිපත්වී සිටින අතර හිටපු මන්ත්‍රීවරුන්/වරියන් (10) සහ ඇමතිවරුන් (Priti Patel) මෙන්ම කුප්‍රකට කීත් වාස්ද නැවත මැතිවරණයට ඉදිරිපත්වේ. 

හිටපු පාකිස්ථාන සම්භවයක් ඇති මන්ත්‍රීවරුන්/වරියන් 10 දෙනාම මෙවර මැතිවරණයට තරග කරන අතර ඊට අමතරව තවත් 8 දෙනෙකු මැතිවරණයට ඉදිරිපත්වී සිටී. 

ගියවර බංග්ලාදේශ සම්භවයක් ඇති පුද්ගලයන් 8 දෙනෙකු මැතිවරණය සදහා ඉදිරිපත්වුවද ඉන් තේරී පත්වුයේ 3ක් පමණි. ඒ අතර බංග්ලාදේශයේ නිර්මාතෘ ෂේක් මුජුබල් රහමන්ගේ මිනිබිරිය වන ටියුලිප් රිස්වානා ඉදිරියෙන් සිටින අතර  ගාර්ඩියන් පුවත්පතට ලිපි ලියන රූපා හක්ද ප්‍රකට චරිතවේ. 

(පසුගිය මැතිවරණයෙන් ජයගත් ආසියානු-අප්‍රිකානු සම්භවයක් ඇති මංත්‍රීවරුන් පිළිබද තොරතුරු  මා මීට පෙර ලියූ 'වාර්තාගත ආසියානු-අප්‍රිකානු සහ සුළු ජාතික මන්තී‍්‍රවරු පිරිසක් මෙවර බ්‍රිතාන්‍ය පාර්ලි‌‌මේන්තුවට'  යන ලිපිය මෙතනින් කියවිය හැක .) 

මෙවර මැතිවරණයට ඉදිරිපත්වී ඇති  ශ්‍රී ලාංකික සම්භවයක් ඇති අපේක්ෂකයින් ගණන 01කි. ඒ පසුගිය මැතිවරණයේදී දැඩි වර්ගවාදී ප්‍රහාරයකට කලක්වූ (එය මෙතනින් කියවිය හැක) නමුත් දකුණු හැම්ශේයර් පළාතේ කොන්සර්වේටිව් පක්ෂය නියෝජනය කරමින් ජයගත් රනිල් මැල්කම් ජයවර්ධන පමණි. සිංහල ජනයා අතර වැඩි උනන්දුවක් පැවති චමාලි ප්‍රනාන්දුට මෙවර කොන්සර්වේටිව් පක්ෂයෙන් නාම යෝජනා හිමි නොවුන අතර දෙමළ ජාතිකයන් අතර වැඩි කථාබහට ලක්වූ උමා කුමාරන් මෙවර මැතිවරණයට තරග නොකරයි. එහෙත් ඇය ලේබර් පක්ෂයේ මැතිවරණ මෙහෙයුම් කමිටුව තුල ඉතා විශාල කාර්යභාරයක් ඉටුකරමින් සිටින තැනැත්තියක්වේ. 

සියළු මැතිවරණ පුරෝකතනයන් අගමැති Theresa Mayගේ කොන්සර්වේටිව් පක්ෂයට ඇත්තේ පැහැදිලි ජයක් යැයි දක්වා තිබුනද බ්‍රිතාන්‍යයේ චන්ද දායකයාගේ තීරණය මැතිවරණ ප්‍රථිපල නිල වශයෙන් දක්වනතුරු  නිශ්චිතව ප්‍රකාශ කල නොහැකි බව පොදු පිළිගැනීමයි. විශේෂයෙන්ම, 1992 දී බලාපොරුත්තුවූ ලෙස අගමැති ජෝන් මේජර් (John Major) පරදා ලේබර් පක්ෂයේ නීල් කීනොක් (Neil Kinnock)   යටතේ කම්කරු පක්ෂ රජයක් පිහිටවුනු ලබන්නේ යැයි කී සියළු මැතිවරණ පුරෝකතනයන් කණපිට පෙරලමින් ජෝන් මේජර් (John Major) නැවත වරක් අගමැතිවන ලදී. 

පැහැදිලිවම, මෙවර මැතිවරණයේදී Theresa May ගේ කොන්සර්වේටිව් පක්ෂය Margaret Thatcherගේ වාර්තාව අභිබවමින් වාර්තාගත ජයග්‍රහණයක් ලැබීම  හෝ Jeremy Corbynන්ගේ කම්කරු (Labour) පක්ෂයට ආසන සංබ්‍යාව වැඩි කරගැනීමට හැකියාවක් ලැබීම හෝ ස්කෝට්ලන්ත ජාතික පක්ෂයට සිය ආසන සංබ්‍යාව පවතින ලෙස රැකගැනීම හෝ වැඩිකර ගැනීම මෙම මැතිවරණය තුල තීරණාත්මක සාධකයක් වනු ඇත. 

කෙසේවුවද, Brexit ජනමතවිචාරණය නම් වූ පැන්ඩෝරාගේ පෙට්ටියේ (pandora's box) තවත් දිගහැරුමක් ලෙස පැමිණි මේම හදිස්සි මහ මැතිවරණය කුමන අත්භූත ප්‍රථිපලයක් උදාකරදේ දැයි තවම නොදන්නා  බ්‍රිතාන්‍යයන් තුරන්කල නොහැකි 'ත්‍රස්ත ප්‍රහාරයන්' ගේ අනතුර පිළිබද අවධානය විසින් දල්වන ලද ජාතික ආරක්ෂාව (national security) සහ බ්‍රිතාන්‍යය වටිනාකම්  (British values) අතර  ගොඩනැගෙන සම්මුතිය කුමනාකාර වේදැයි විමසීල්ලෙන් සිටී. 

මාකස් ප්‍රියන්ත පෙරේරා.
07/06/17. 

Sunday, 4 June 2017

ඊලග මහා ගංවතුරෙනුත් මීගමුව බේරේයිද?

ගිය වසරේ මෙන්ම මේ වසරේද ශ්‍රී ලංකාවට දරුණු විනාශයක් ගෙනදුන් මහා ගංවතුර මීගමුව අවට ප්‍රදේශවලට බලපෑවේ නැත. එයට හේතුව ගංවතුර බලපෑ  රටේ සෙසු ප්‍රදේශවලට ලැබුන තරම් මහා වර්ෂපතනයක් මීගමුව අවට ප්‍රදේශවලට නොලැබීමය. කාලයක සිට මීගමුව අවට ප්‍රදේශවලට 'ඉස්සර තරම්' වැසි නොලැබෙන බව බොහෝ පැරුන්ණන් කියනු මා අසා ඇත. විශේෂයෙන්ම ගුවන් තොටුපල විශාලවීමත්, කටුනායක නිදහස් වෙළද කලාපය පිහිටවීමත් නිසා මෙම ප්‍රදේශවල උෂ්ණත්වය ඉහල ගිය බවත්, වැසි ලැබීම අක්‍රමවත්වූ බවත්, දැන් මේ ප්‍රදේශවල ඇත්තේ 'කෘතීම කාලගුණයක්' බවත් 1996-97 අතර කාලයේ පලවූ 'නිවෙකා' පුවත්පතට කටුනායක අමන්දොලුවේ පදිංචිකරුවෙක් විසින් සපයන ලද විස්තරයක පලව තිබුණ බව මට මතකය.  එවකට කටුනායක නිදහස් වෙළද කලාපය කේන්ද්‍ර කරගෙන ක්‍රියාත්මකවූ බ්‍රිටෝ ප්‍රනාන්දු සහ ජයන්ති දන්දෙනිය විසින් පවත්වාගෙන ගිය 'කලාපේ අපි' සංවිධානය විසින් පලකල 'නිවෙකා' පුවත්පතට මා ද කොළඹ විශ්ව විද්‍යාලයේ සිසුවෙකු ලෙස සිටියදී ලිපි ලියූ අතර ඉහත විස්තරය හා සම්බන්ද තොරතුරුද,  එම සංවිධානයේ ක්‍රියාකාරීත්වයන් සම්බන්දයෙන්ද මට නොඅඩු මතකයක් තිබේ. මෑතකදී කටුනායක ගුවන්තොටුපලේ ගුවන් පථය අළුත්වැඩියා කිරීමේදී නැවතත් මීගමුව අවට ප්‍රදේශවලට වැසි නොලැබීම සහ ඊට කටුනායක ගුවන්තොටුපලත්, නිදහස් වෙළද කලාපයත් බලපා ඇතැයි සදහන් කරමින් පලව තිබු විවිධ පුවත් වාර්තා සමග ඉහත  සදහන්කල 'කෘතිම කාලගුණය' පිළිබද මගේ මතකය නැවත අවධිවිය. 

මීගමුව අවට ප්‍රදේශවලට 'ඉස්සර තරම්'  වැසි ලැබීම-නොලැබීම කෙසේවුවද පොඩි වැස්සකට පවා මීගමුව නගරය දනක් යටවෙන නගරක් විය. 2005 වසරේදී නෙදර්ලන්ත රජයේ සහ ලෝක බැංකුවේ ආධාර ඇතිව මීගමුව නගරයේ රැස්වෙන ජලය මීගමු කලපුවට පොම්පකිරීමේ ව්‍යාපෘතිය ක්‍රියාත්මකවීමට පෙර මීගමුව නගරයේ තත්වය එසේවිය. 

ස්වභාවයෙන්ම මීගමුව නගරයේ බොහෝ ප්‍රදේශ පිහිටා ඇත්තේ මුහුදුමට්ටමින් තරමක් පහලිනි. කලපුව මෙන්ම කුඩා පොකුණුද, දිය කඩිති රාශියකින්ද සමන්විතවුයෙන් මීගමුව එක්තරා ආකාරයක 'තෙත්බිමක්' විය. පෘතුගිසි සහ ලන්දේසි යුගවලදී ඉදිවූ කුඩා ඇළ මාර්ග මගින් එකී ඇතැම් පොකුණු සහ දියකඩිති එකිනෙකට සම්බන්ද කිරීම් හෝ කලපුවට සම්බන්ද කිරීම් රාශියක්  සිදුවී ඇති බවට තොරතුරු තිබේ. දෙපා ඇළ, දළුපොත ඇළ, ඩීන් ඇළ, දිය හොද ඇළ, දෙහිමල්වත්ත ඇළ ආදිය මීට උදාහරණ කිහිපයකි. එමගින් වර්ෂා සමයේදී මීගමුව අවට සිදුවන ගංවතුර ගැලීම් කළමනාකරණය කරගැනීමට හැකිවිය. ලන්දේසීන් මීගමුවේ හැමිල්ටන් ඇළ ඉදිකළ විට ඒ අවට පැවති කුඩා පොකුණු සහ දියකඩිතිවලින් වර්ෂා කාලයේදී උතුරා ගලන ජලය හැමිල්ටන් ඇළට ගලායන ලෙස කුඩා ජල මාර්ගද සකස්කර තිබේ. පෙරියමුල්ල 'බින්තුරා හේන' ප්‍රදේශයේ පැවති මෙවැනි කුඩා ඇළක් 1916 දී ඉදිකළ මීගමුව-හලාවත දුම්රිය මාර්ගය නිසා වැසී ගොස් තිබේ. එය ඉන් වසර ගණනාවකට පසුව, එනම් 1943දී, ඇද හැලුන මහා වර්ෂාපතනයක් නිසා ඇතිවූ ගංවතුර තත්වයකට හේතුවී තිබිණි. මීගමුව-පුත්තලම දුම්රිය මාර්ගයේ ගමනාගමනයද අඩාලවූ මෙම ගංවතුර තත්වය පාලනය කිරීමටත්, ජලය හැමිල්ටන් ඇළ දෙසට හරවා යැවීමට වෙනත් ජල මාර්ගයක් ඉදිකිරීමටත් එවකට පැවති කටුනායක රාජකීය ගුවන් හමුදා කදවුරේ භටයන් (R.A.F. Negombo)  යෙදවූ බවට  ඔවුන්ගේ Flarepath සගරාවේ  පලවී තිබේ. 

මේ අනුව පෙනී යනුවේ වර්ෂාපතනය නිසා මීගමුවේ විවිධ තැන්හී රැස්වන ජලය  විවිධ ජලමාර්ග ඔස්සේ හැමිල්ටන් ඇළට හෝ දිය හොද ඇළට රැගෙනවිත් එය මීගමුව කලපුවට මුදා හැරීමේ ක්‍රමයක් යටත්විජිත පාලන සමයේ සිට මීගමුවේ ගොඩනංවා තිබෙන බවත්, එම නිසාම ගංවතුර තත්වයක් වැඩි  විනාශයකින් තොරව පාලනය කරගැනීමට මීගමුවට හැකියාවක් පවතින බවය. 

එහෙත් මීගමුවේ විශාල ගංවතුර තත්වයක් වාර්තාවූ අවස්ථාක් තිබේ. මීගමුවේ ඇතිවූ විශාලතම ගංවතුර ලෙස වාර්තාවනුවේ 1958 ජනවාරියේ දී මුළු රටටම ලැබුණු මහා වර්ෂාව සහ කුණාටුව නිසා මීගමුව නගරය සහමුලින්ම යටවීමය. ඒ සම්බන්ද තොරතුරු විමසා බැලීමේදී පෙනීයනුවේ මහ වැස්ස පමණක් නොව, රටේ බොහෝ ප්‍රදේශවලට ඇතිවූ අධික වර්ෂාපතනය නිසා මහ ඔය, දිය හොද ඇළ, හැමිල්ටන් ඇළ, අත්තනගාලු ඔය, ජා-ඇළ ඇළ සහ කිදි ඔය ආදිය ඔස්සේ ඇදී ආ අතිවිශාල ජලකද  නිසා මීගමුව කලපුව උතුරා යෑමද මීගමුව නගරය සහමුලින්ම යටවීමට හේතුවූ බවය. එවකට මීගමුව නගරාධිපතිවරයාව සිටි, පසුව කටාන ආසනයෙන් පාර්ලි‌‌මේන්තුවට ගිය, විජයපාල මෙන්ඩිස් මහතාගේ පියාවූ මුදලිදු ඩේවිඩ් මෙන්ඩිස් මහතා මෙම ගංවතුර ගැන ඉංග්‍රීසි පුවත්පතකට "වතුර මගේ (ගෙයි) පඩියටම ආවා'' යන්න ඉංග්‍රීසියෙන් කිව්වේ 'water coming to my salary' ලෙස බව කියමින් සිනාසෙන්නන් අදද මීගමුවේ සිටී.  1958 ගංවතුරට මීගමුව කොටුව බන්ධනාගාරයේ සිටි රැදවියන් පවා ඉවත්කිරීමට කටයුතු කිරීමට හේතුවන තරම් නගරයේ ජල මට්ටම ඉහල යෑමේ අනතුරක් තිබී ඇත. 

කෙසේවුවද, සුළු වැස්සකින් වුවද යටවෙන මීගමුව මහා ගංවතුරකින් පවා ආරක්ෂාවනුවේ මීගමුව කලපුව නිසා බව පැහැදිලිය.  මහා ජලකදක් රදවා තබා ගැනීමට සමත් මීගමුව කලපුව සුනාමියෙන් පවා මීගමුව ගලවා ගත්තේ එය සතු මෙම අතිවිශාල ජල ධාරිතාවයක් රදවාගැනීමේ  හැකියාවය. 

එහෙත් දැන් මීගමුව කලපුව හතර වටින්ම ගොඩකරමින් තිබේ. එක් පැත්තකින් කටුනායක අධිවේගී මාර්ගය ඉදිකිරීම නිසාද, අනෙක් පැත්තෙන් විවිධ පුද්ගලයන් සහ කණ්ඩායම් දේශපාලන බලයක් ඇතිව හෝ නැතිව කලපුව, ඇළ මාර්ග, කුඩා පොකුණු සහ දියකඩිති ගොඩකරමින් සිටී. මීගමුව ලෙල්ලම අවට ප්‍රදේශයද, දූව සහ පිටිපන වීදිය අතර ප්‍රදේශවල කුඩා කලපු තීරයන්ද මේ දිනවල ලහි ලහියේ ගොඩකරමින් සිටී. දේශපාලන බලය යොදා කොච්චිකඩේ ඇළ ඉවුර හරස්කර හෝටලයක් ඉදිකර තිබේ. පසුගිය වසරේ මහින්ද රාජපක්ෂ මහතාගේ රැස්වීමක් පැවැත්වුයේද මෙම හෝටලයේමය. කලපුව අවට හෝටල් සහ නිවාස ඇතුළුව සිය ගණනක්වූ කලපුව ගොඩකර  ඉදිකල ඉදිකිරීම් රාශියක් දැකිය හැකි අතර ඒ සදහා දේශපාලන බල අධිකාරීත්වයන්ගෙන් නොඅඩු අනුග්‍රහයක් ලැබී තිබේ. මීගමු නගර මධ්‍යයේ ඇති 'සමනල' ගොඩනැගිල්ලේ වාහන නැවතුම (Car Park) ඉදිකර ඇත්තේද දෙහිමල්වත්ත ඇලේ ඉවුරු උඩින් කොන්ක්‍රිට් ලෑලි දමා වසා දැමීමෙනි. එයට මීගමු නගරසභාවේ අවසරයද හිමිව තිබේ. තවත් එවැනි ගොඩකිරීම රාශියකි.

මේ තත්වය තුල නැවත වැඩි කාලයක් යෑමට පෙර ඇතිවෙන ඊලග මහා ගංවතුරකින් මීගමුව යටවෙනු නියතය. එවිට "අපේ මීගමුව හරි වාසනාවන්තය" යැයි කියමින් සිටින සියල්ලෝම සිදුකර ඇත්තේ කකුළුවා වතුර උතුරමින් සිටින තාක්කල් සිදුකරන ක්‍රියාව බදු ක්‍රියාවක් නොවේදැයි සිතනු ඒකාන්තය. එහින් දේශපාලන බලයක් ඇතිව හෝ නැතිව කලපුව, ඇළ මාර්ග, දිය කඩිති සහ කුඩා පොකුණු ආදිය ගොඩකරමින් සිදුකරන මේ මහා විනාශය වහා නැවැත්විය යුතුය.  විධිමත් නගර සංවර්ධන සැලැස්මක් වහා ක්‍රියාත්මක කලයුතුය. එය නීති ක්‍රියාමාර්ග තුලින් පමණක් සිදුකල නොහැක්කකි. ඒ සදහා මහජන ක්‍රියාකාරීත්වයක් අවශ්‍යය. තවද අවසරයක් ඇතිව හෝ නැතිව සිදුකරන සියළු ගොඩකිරීම් නිසා ඇතිවන ගංවතුර තත්වයකදී අනතුරට ලක්වන්නන්ට, හානිවන්නන්ට සිය අලාභය සහ වන්දි එම ගොඩකිරීම්වලට අදාල පුද්ගලයන්ගෙන් කෙලින්ම අය කරගැනීමේ ක්‍රමයක් හදුන්වා දිය යුතුය. එබදු ක්‍රියා මාර්ග ඔස්සේ හෝ ගංවතුර වැනි මහා ව්‍යසනයන් වලට පාර කපන මේ මහා විනාශයන් නැවැත්වීමට කාලය එලබ තිබේ.


මාකස් ප්‍රියන්ත පෙරේරා 

04/06/17 

Wednesday, 31 May 2017

සුනිල් මිහිඳුකුල මීගමු පුත්‍රයාට මොක්සුව පතමු.

සුනිල් මිහිඳුකුල ඊයේ (30/5/17) නික්මගොස් ඇත.  ඔහුගේ මරණය ගැන සිය facebook පිටුවල සටහන් තබා ඇති සියළු දෙනාගේම සටහන් දෙස බැලීමේදී පෙනීයනුවේ ඔහු අදාල පුද්ගලයන්ට අදාල ගෞවරවය පුදකළ, කිසිවෙකුට කුහකකම් නොකළ  පුද්ගලයෙකු බවය.

මට මාගේ ජීවිතයේදී ඔහුව මුණගැසී ඇත්තේ කිහිපවරක් පැමිණි. ඒ 90 දශකයේදී සහ 2006 දීය. මට ඔහු ගැන  කීමට ඇත්තේ ඔහු කිසිවිටක මුදල්, තනතුරු සහ ප්‍රසිද්ධිය වෙනුවෙන් කටයුතු නොකළ  උදාර මිනිස් අරමුණු වෙනුවෙන් පමණක් පෙනීසිටි උදාර පුද්ගලයෙක් පමණක් වන බවය.  ඒ සදහා ඔහුට වමේ දේශපාලනයෙන් මෙන්ම තමන් හැදීවැඩුන වටපිටවාද බොහෝ සේ බලපා තිබුණි. 

ප්‍රවීන මාධ්‍යවේදියකු, සිනමා විචාරකයකු සහ ගත්කතුවරයකු වූ සුනිල්  අභාවප්‍රාප්ත වනවිට වයස 58ක් විය. පසුගිය කාලය පුරාම ඔහුගේ සෞඛ්‍ය තත්වය ක්‍රමයෙන් පිරීහී ගියද ඔහුගේ උද්යෝගයේ අඩුවක් නොතිබිණි. 

මීගමුවේ ඉපදුනු, එහිම හැදී වැඩුණු සුනිල් පසුව සිය දෙමාපියන් සමග මෝදරට සංක්‍රමණයවිය.  සිය ජීවිතය රැකියාවක් කේන්ද්‍රකර ගෙන ගොඩ නොනැගු ඔහු සිය දිවිය  සිනමාවට ඇති ලැදියාව කේන්ද්‍රකරගෙන ගෙවුහ. ඔහුගේ  ජීවිතය ගොඩනගන්නේද  එම ලැදියාවමය. සිනමාවට  ඇති ලැදියාව නිසාම ඔහු සිනමාව ගැන  ලිපි ලිව්වේය. ලිවීම ඔහු ලේඛකයකු කිරීමටත්, සිනමාව සහ කලාව ගැන හදාරන්නෙක් කිරීමටත් සමත්විය. එහි ප්‍රථිපලය වුයේ සුනිල් මිහිදුකුල නම් දක්ෂ සිනමා විචාරකයෙක්, සිනමා ලේඛකයක්, සිනමා වේදියෙක් සහ ‘සරසවි', පුවත්පතේ හිටපු ප්‍රධාන කතෘවරයෙක් සහ සිළුමිණ පුවත්පතේ රසඳුන අතිරේකයේ සංස්කාරකවරයෙක් බිහිවීමය. 

වසර 39 ක් ලේඛකයකු ලෙස කටයුතු කල සුනිල් මිහිඳුකුල සිනමාව ඇතුළු කලා ක්‍ෂෙත්‍රය සම්බන්ධ පර්යේෂණාත්මක ග්‍රන්ථ රාශියක් රචනා ඇත. එම නිසාම ඔහු මියයාමට මසකට පෙර ඔහුගේ සේවය අගයමින් උපහාර උළෙලක් පැවති අතර  සිනමා සාහිත්‍යයට කළ සේවය ඇගයීම පිණිස පසුගිය ජනාධිපති සිනමා සම්මාන උළෙලේදී 'පුරෝගාමී' සිනමා සම්මානයෙන්ද පිදුම් ලද තවත් මීගමු පුත්‍රයෙක් විය.

මීගමුවේ විවිධ සංස්කෘතික අංගයන් ගැන නිතර පුවත්පත්වලට ලිපි ලියූ ඔහු මීගමුවෙන් පිටත ජීවත්වුවෙක්වුවද මීගමුව සමග බිදිය නොහැකි සම්බන්දයක් පවත්වාගෙන ගියහ. ඔහු ප්‍රකාශයට පත් කල ‘රුක්මනීදේවි, නිළිය, ගායිකාව හා ජනප්‍රිය සංස්කෘතිය' සහ ‘කඩවුණු පොරොන්දුව හා මිනර්වා චිත්‍රපට' වැනි කෘති ලංකාවට සිනමා කර්මාන්තයක් බිහිකර දීම සම්බන්දයෙන් මීගමුවේ දායකත්වය මනාව හෙළිකළේය. ඔහුගේ ජීවිතයේ පදනමවූ සිනමා විෂය පිලිබදව වූ උනන්දුව තමාට ලැබුනේ මීගමුවෙන් බව නිතර හෙලිකල ඔහුව හමුවූ වරක මා විමසා සිටියේ මීගමුවේ කලා කරුවන් ගැන දත්ත එකතුවක් ආරම්භ කිරීම වැදගත් නේද? යන්නය. 

එම කටයුත්ත ඔහු අතින් ඉටු නොවුනද බර්නාඩ් ශ්‍රී කාන්ත  මහතා අතින් අද බොහෝ දුරට ඉටුවී ඇත. 

සුනිල් ට ඒ සියල්ල ගැන සතුටුවිය හැක. 

ඔබ මීගමුවේ කලා ඉතිහාසය ලංකාවේ සිනමා කලා ඉතිහාසය තුල රැන්දීමට කල සේවයට සෑම සියලු මීගමු වැසියෙකුගේම භක්තිය, ආදරය සහ ගෞවරය ඔබට පුද කල යුතුය. 

සුනිල් මිහිදුකුල උදාර මිනිසාට මොක්සුව පතමු.

ඔහුගේ දේහය පිළිබඳ අවසන් කටයුතු ජුනි මස (01) බ්‍රහස්පතින්දා පන්නිපිටිය රුක්මලේ පොදු සුසාන භූමියේ දී සිදුකරන්නට නියමිතය.


මාකස් ප්‍රියන්ත පෙරේරා.
31/05/17.

Monday, 22 May 2017

ඥානසාර සාධු අපිට මතක් කරන නිජබිමේ අයිතිය සහ සිංහල-බෞද්ධ වාර්ගිකත්වයේ බලහත්කාරය

''ලංකාව සිංහල-බෞද්ධ රටක් කියලා පිලිගන්නවාද?.... නෑ ඇමතිතුමා මේකට උත්තර දීලා ඉන්න...මේක සිංහල-බෞද්ධ රටක් ලෙස පිළිගන්නවාද?... නෑ.. මන් අහන්නේ... මේක සිංහල-බෞද්ධ රටක් කියලා  පිළිගන්නවාද?... නැත්ද ?'' 

දබර ඇගිල්ල දිගු කරමින් බොදුබල සේනාවේ ඥානසාර හාමුදුරුවෝ ජාතික ඒකාබද්ධතා ඇමති  මනෝ ගනේෂන් මහතාගෙන් එසේ අසන විට තුවක්කු කටක් ගනේෂන්ගේ මෙන්ම මගේද හිස මතට තබා ඇතැයි මට සිතේ. ඒ මනෝ ගනේෂන් මෙන්ම මම ද සිංහල-බෞද්ධයෙක් නොවන නිසාය. සිංහල-බෞද්ධ නොවන මගෙන් ශ්‍රී ලංකාව සිංහල-බෞද්ධ රටක් ලෙස පිළිගන්නවාද? නැතිද? කියා අසන සෑම අවස්ථාවකම මට එය දැනෙනුයේ එහි කිසියම් ආකාරයක අනතුරු ඇගවීමක් සහ බලහත්කාරයක් ඇති බවය. මගේ මුල්ම විශ්ව විද්‍යාලයවූ කොළඹ විශ්ව විද්‍යාලයේදීද, සමාජ-දේශපාලන ප්‍රශ්න වෙනුවෙන් ක්‍රියාකාරීව මැදිහත්වූ සංවිධානවල වාමාංශිකයින් සහ ප්‍රගතිශීලීන් මෙන් සිටි ඇතමුන්ද, එංගන්තයේදී මට හමුවූ බොහෝ සිංහල-බෞද්ධයන්ද මගෙන් එම ප්‍රශ්නය ඇසූ සෑමවිට මට කීමට තිබුනේද මනෝ ගනේෂන් කී දෙයම. එනම් ශ්‍රී ලංකාව යනු බෞද්ධ, හින්දු, මුස්ලිම්, ක්‍රිස්තියානි ආදී මෙරට වෙසෙන සියලු  ජන කොටස්වලට අයත් රටක් බවය.

සිංහල-බෞද්ධ නොවන කිසිවෙකුගෙන් තමන් ඉපදී-හැදී වැඩුණු රට, තමන් අයත් නොවන වෙනත් වාර්ගීක අනන්‍යතාවයට අයත් බව පිළිගන්නා ලෙස ඉල්ලීම, එම පුද්ගලයා අන්ත අසරණභාවයකට පත්කර ඔහු හෝ ඇය මත ආධිපත්‍යයක් පැතිරීමක් නොවන්නේද?  එය අදාල පුද්ගලයාගේ නිදහස් කැමැත්තට විරුද්ධව සිදුකරන බලහත්කාරයක් නොවන්නේද

එහෙත් ඒ පිලිබදව කිසිදු වග විභාගයක් හෝ අවධානයක් යොමුකිරීමකින් තොරව ශ්‍රී ලංකාව සිංහල බෞද්ධ රටක් ලෙස පිළිගත යුත්තේ ඇයි දැයි යන්න තවදුරටත් තහවුරු කිරීමට ඔවුන් වෙර දරූ බව ඉහත අවස්ථාවන්ට මුහුණපා ඇති මගේ අත්දැකීමයි. 

පැහැදිලිව ඔවුන්ගේ එක් තර්කයක් වුයේ අද ලංකාව තුල විවිධ ජාතීන් සහ ආගම් අදහන විවිධ පිරිස් සිටියද ඔවුන් එක් එක් කාලවලදී මෙරටට පැමිණි සංක්‍රමණිකයන් බවත්, එම පිරිස් අද ක්‍රිස්තියානි /හින්දු/මුස්ලිම් ආදී ආගම් ඇදහීමට පෙර ඔවුන්ද සිංහල-බෞද්ධයෝ බවත් ඒහින් ලංකාවේ සංස්කෘතිය, ශිෂ්ටාචාරය, සභ්‍යත්වය ගොඩනැගුවේ මෙරට ප්‍රධාන ජාතියවන සිංහල-බෞද්ධ ජනයා විසින් බැවින් ලංකාව සිංහල-බෞද්ධ රටක් ලෙස පිළිගත නොහැක්කේ ඇයි? යන්නයි. මා හා වාද කල අය පමණක් නොව ඥානසාර හාමුදුරුවෝද, නලීන් ද සිල්වාද, චම්පික රණවක ආදී වෙනත් බොහෝ දෙනෙක්ද මේ තර්කයම ඉදිරිපත් කරන බව මම මෙන්ම මුළු රටම දනිති. 

ශ්‍රී ලංකාවේ සමස්ථ සංස්කෘතිය, ශිෂ්ටාචාරය, සභ්‍යත්වය ගොඩනැගී ඇත්තේ 'සිංහල-බෞද්ධපදනමකින් යැයි කියන සෑමවිටම මට එය පිළිගැනීමට අපහසුවිනි. එයට හේතුව වුයේ මට එය පිළිගැනීමට කිසිදු පදනමක් නොතිබීමය.

මම හැදී වැඩුනේ මීගමුවේය. එහි ඇති 'සිංහල-බෞද්ධ' කමක් ගැන මම නොදනිමි. එහෙත් මීගමුව ඇත්තේ ශ්‍රී ලංකාවේය. ඒහින්  'සිංහල-බෞද්ධ' නම්වූ මහා ආඛ්‍යානයට අයත් නොවන පෙදෙස්ද ලංකාවේ තියෙන බව මගේ අත්දැකීමයි. මීගමුව පමණක් නොව වෙන්නප්පුව, හලාවත, තලවිල, උතුරු-නැගෙනහිර, වතුකරය ආදී තවත් බොහොමයක් 'සිංහල-බෞද්ධ’ නොවන පෙදෙස් ලංකාවේ තිබෙන බව මම දනිමි. එම ප්‍රදේශවල ජීවත්වෙන ජනයාගේ  සංස්කෘතිය, ශිෂ්ටාචාරය සහ සභ්‍යත්වය ගොඩනැගීමට මුලික වශයෙන් දායක වී ඇත්තේ 'සිංහල-බෞද්ධ' සංස්කෘතිය හෝ ශිෂ්ටාචාරය හෝ සභ්‍යත්වය නොවේ.

ඇරත් මේ කියන 'සිංහල-බෞද්ධ’සංස්කෘතිය, ශිෂ්ටාචාරය සහ සභ්‍යත්වය යනු කුමක්දැයි මගෙන් ශ්‍රී ලංකාව  සිංහල-බෞද්ධ රටක් ලෙස පිළිගන්නවාද?... නැතිද? යනුවෙන් ඇසූවන්ගෙන් විමසුවිට ඔවුන් දක්වනුයේ වැව්-දාගැබ්-මහාවංශය ආදී කරණාය.

මම ඒවා  ඉදිකලේ මෙරට සිටි සහ සිටින සිංහල-බෞද්ධ ජනයා පමණක්ද? අවුකන සහ බුදුරුවාගල ආදී පිළිමවල සිංහල-බෞද්ධයන්ගේ බුද්ධාගමවන ථෙරවාදී නොවන  මහායාන / වජිරයාන ලක්ෂණ දරන්නේ ඇයි? සීගිරි චිත්‍ර ඉන්දියාවේ අජන්තා චිත්‍රවලට සමාන ඇයි? සෙනරත් පරණවිතාන මෙන්ම සුජිත් අක්කරවත්ත ආදීන් දක්වා ඇති පරිදි සීගිරියේ සාර්ථකත්වයට පෙරදිග ක්‍රිස්තියානින් සමග තිබු සබදතා කෙතෙක් අදාලවී ඇත්තද ? මෙරට විවිධ කාලවල පැමිණි ජනයා විවිධ ජනවර්ගයන් ඉහතකී සිංහල-බෞද්ධ රටක් වන ශ්‍රී ලංකාව ගොඩනැන්වී මෙහිලා කෙතක් දායක වී ඇත්දැයි යනුවෙන් ප්‍රශ්න කල වාර අනන්තය.

තවද,‘සිංහල-බෞද්ධ’ යනු යුරෝපීයානු ජාතිකවාදය (Nationalism) නම් කතිකාවේ ආභාෂය ලබා බ්‍රිතාන්‍ය යටත්විජිත යුගය අවසාන කාලයේදී ගොඩනගා ගත් ප්‍රබන්ධයක් නොවේදැයි R. A. L. H. ගුණවර්ධනගේ සිට නිර්මාල් රන්ජිත් දේවසිරි ආදී විද්‍යාර්ථයින් විසින් ඉදිරිපත්කර ඇති ලියවිලිවල ඇති කරුණු ඇසුරින් ඒ ගැන විවාදයන්ගේ පැටලුනු අවස්ථාද ඒමට විය.

එහෙත් එම කරුණු බිද දමමින් ශ්‍රී ලංකාව  සිංහල-බෞද්ධ රටක් ලෙස මට ඒත්තු ගැන්වීමට ඔවුනට නොහැකිවිය. ඔවුන්ද මම කියන පරිදි ශ්‍රී ලංකාව යනු බෞද්ධ, හින්දු, මුස්ලිම්, ක්‍රිස්තියානි ආදී විවිධ ආගම් අදහන සිංහල, දෙමළ, මුස්ලිම් සහ බර්ගර් ආදී මෙරට වෙසෙන සියලු  ජන කොටස්වලට අයත් රටක් බව ද පිළිනොගන්නා ලදී.
  
එහෙත්, මට ඒ ගැන කණගාටුවීමට කිසිසේත්ම උවමනාවක් නැත. මන්දයත් ශ්‍රී ලංකාව 'සිංහල-බෞද්ධ' සංස්කෘතියක්, ශිෂ්ටාචාරයක්, සහ සභ්‍යත්වයක් ඇති 'සිංහල-බෞද්ධ' රටක් යැයි කියන රටේ සිංහල අවුරුද්දේ කෑම පිගානේ සිට ඇදුම්-පැළදුම්, සිරිත්-විරිත්, චාරිත්‍ර-වාරිත්‍ර, භාෂාව සහ කලා ශිල්ප ආදී  ‘සිංහල-බෞද්ධ’ සංස්කෘතියේ සහ ශිෂ්ටාචාරයේ ඇති සියළු අංග-උපාංග ගොඩනගා ගෙන ඇත්තේ ‘සිංහල-බෞද්ධ’ නොවන වෙනත් සංස්කෘතින්ගෙන් සහ ශිෂ්ටාචාරයන්ගෙන් ණයට ගත් ‘පොළීයත්-ණයත්’ දෙකම නොගෙවා සින්නකරගත් දේවලින් බව  අප දන්නා නිසාය.

ඉතින් අප ශ්‍රී ලංකාව 'සිංහල-බෞද්ධ' රටක් ලෙස පිලිගන්නේ කෙසේද?

 ශ්‍රී ලංකාව ‘සිංහල-බෞද්ධ’ රටක් යැයි යන්න පිලිගැනීම-නොපිළිගැනීම කෙසේවුවද, ශ්‍රී ලංකාව කිසිසේත්ම ‘සිංහල-බෞද්ධ’ රටක් නොවිය යුතුය. ඒ වෙන කිසිවක් නිසා නොව එවිට ශ්‍රී ලංකාව වාර්ගික රාජ්‍යක් වන නිසාය. වාර්ගික රාජ්‍යයක් යනු යම් වාර්ගික අනන්‍යතාවයක අධිකාරීත්වය කේන්ද්‍ර කරගත් රාජ්‍යයකි. ශ්‍රී ලංකාව 'සිංහල-බෞද්ධ රටක්' විය යුතුයැයි ඉල්ලීම තුල කියවෙනුවේ ලංකාව තුල ජීවත්වෙන බෞද්ධ-අබෞද්ධ, සිංහල-සිංහල නොවන සියල්ලෝම ශ්‍රී ලංකාවේ 'සිංහල-බෞද්ධ ආධිපත්‍ය' පිළිගෙන ජීවත්විය යුතු බවයි.  'සිංහල-බෞද්ධ' යන් යැයි තමන්ව හදුන්වා ගැනීමට  කැමති වාර්ගිකයන්ට හැර සෙසු සියල්ලන්ගෙන් ශ්‍රී ලංකාව සිංහල-බෞද්ධ රටක් ලෙස පිළිගැනීමට ඉල්ලීම පැහැදිලිවම ඔවුන්ට එරෙහිව සිදුකරන බලහත්කාරයකි. 

ශ්‍රී ලංකාව යනු බෞද්ධ, හින්දු, මුස්ලිම්, ක්‍රිස්තියානි ආදී විවිධ ආගම් අදහන සිංහල, දෙමළ, මුස්ලිම් සහ බර්ගර් ආදී විවිධ සංස්කෘතික අනන්‍යතාවයන්ට අයත් පරම්පරා ගණනාවක් තිස්සේ විවිධ ප්‍රදේශවල ජීවත්වූ ජනයාට අයත් ඒ ඒ ජන කොටස්වල නිජ භූමියක් මිස එක් වාර්ගික  අනන්‍යතාවයකට පමණක් අයත් භූමියක් නොවේ. එහෙත් නිදහසින් පසු දිග හැරුණු දේශපාලන ව්‍යාපෘතින් ඔස්සේ ශ්‍රී ලංකාව සිංහල-බෞද්ධ රාජ්‍යයක් ලෙස ගොඩනැංවීමට බොහෝ ක්‍රියාමාර්ග අනුගමනය කල බව පැහැදිලිය.

ශ්‍රී ලංකාව සිංහල-බෞද්ධ රාජ්‍යයක් නම් උතුරු-නැගෙනහිර දෙමළ නිජභූමිය පදනම් කරගත් දෙමළ ඊලාම් රාජ්‍යයක් බවට පත්විය යුතුයැයි දක්වමින් යුද්ධය දියත්වූ බව අප අමතක නොකළ යුතුය. එහෙත් යුද්ධය අවසානයේ දෙමළ නිජභූමිය පදනම් කරගත් දෙමළ ඊලාම් රාජ්‍යයක් පිලිබදවූ ව්‍යාපෘතිය පරාජය කරමින් ඉදිරියට පැමිණ ඇත්තේ සමස්ත ශ්‍රී ලංකාව වහා වහා සිංහල-බෞද්ධ රාජ්‍යයක් බවට පත් කලයුතු යැයි යන්න නම්,  එයද පැහැදිලිවම පරාජය කල යුත්තකි. මන්දයත් වාර්ගික රාජ්‍යයක් තුල ජීවත්වීම යනු එක් ජාතියකගේ වාර්ගික ආධිපත්‍යයට යටත්ව, ඔවුන්ගේ සහනශීලීත්වය මත යැපෙමින් බයාදු ලෙස ඔවුන්ගේ යටත්වැසියන් ලෙස ජීවත්වීමකි.

එහින් අපි ශ්‍රී  ලංකාව ‘සිංහල-බෞද්ධ’ රටක් යැයි යන්න පිලිගැනීමට පමණක් නොව ශ්‍රී ලංකාව කිසිසේත්ම ‘සිංහල-බෞද්ධ’ රටක් නොවිය යුතුය යන ස්ථාවරයක පිහිටා කටයුතු කරමු. 

මාකස් ප්‍රියන්ත පෙරේරා.
22/05/17.

Wednesday, 17 May 2017

මරිය බැතිය, පාතිමා පණිවිඩ සහ කතෝලික සභාව

දින කිහිපයකට පෙර, එනම් 2017 මැයි 12 සහ 13, ප්‍රැන්සිස් පාප්තුමා පෘතුගාලයේ පාතිමා (Fatima) නුවරට පැමිණ ලක්ෂ 05කට වඩා වැඩි ජනකායක් ඉදිරියේදී  කුඩා එඩේර ළමුන් දෙදෙනෙකු කතෝලික සභාවේ ඉහලම 'වරම' වන 'ශුද්ධවරයට' ඔසවා තබන ලදී. මෙලෙස  පාප්තුමා විසින් ශුද්ධවරයට ඔසවනූ ලැබුවේ 1917 මැයි 13වෙනි දින  පෘතුගාලයේ අගනුවර සිට වැඩි ඈතකින් නොපිහිටි කුඩා ගම්මානයක් වූ පාතිමා හීදී 'දේවමාතාවන් දර්ශනය' (Marian apparitions) වුයේ යැයි වාර්තාකල දරුවන් තිදෙනාගෙන් දෙදෙනෙකු වූ ජසින්තා සහ ෆ්‍රැන්සිස්කෝ මර්ටෝය(Jacinta  and Francisco Marto). කෙටි කාලයක් පමණක් ජීවත්වූ එම දරුවන් දෙදෙනා පාතිමා දේවමාතා දර්ශනය සිදුවී වසර 2-3ක් ඇතුලත මිය ගියහ. 1919 දී ෆ්‍රැන්සිස්කෝ මියයන විට ඔහුට වයස  අවුරුදු 10යකි, 1920දී ජසින්තා මියයන විට ඇයට වයස අවුරුදු 09යකි. ‘පාතිමා දේවමාතා දර්ශනය’  සහ  එම දර්ශනය ඔස්සේ ලබාදුන් පණිවිඩය ප්‍රකාශ කල ඉහතකී ළමුන් තිදෙනාගෙන් වැඩි මහල්ලාවූ, ලුසියා සන්ටෝස් (Lúcia Santos) පසුව පැවිදි දිවියට ඇතුළත්වූ අතර ඇය අවුරුදු 98 ක් ජීවත්වී 2005 දී මිය ගියේය.

ප්‍රැන්සිස් පාප්තුමා පෘතුගාලයේ පාතිමා නුවරදී ශුද්ධවරයට උසවා තැබුවේ කතෝලික පල්ලිය විසින් මෙතෙක් ශුද්ධවරයට ඔසවා   තැබූ බාලම තැනැත්තන් දෙදෙනාවීමට ඉඩ ඇත. එහෙත් සියවසක් (1917-2017) සැමරූ පාතිමා 'දේවමාතා දර්ශනය' කතෝලික සභාවට වඩා වැදගත් වනුයේ කුඩා දරුවන් දෙදෙනෙක් ශාන්තුවරයට එසවීමටත් වඩා එම දර්ශනය තුලින් ලබාදුන් පණිවිඩය ඔස්සේ කතෝලික සභාව කාලාන්තරයක් තිස්සේ දැඩි විශ්වාසයකින් සහ භක්තියකින් ගොඩනැගූ මරිය බැතිය (Mariology) සහ තවත් දේව ධර්මයේ (theological) ඉගැන්වීම් කිහිපයක් සාක්ෂාත්කල අවස්ථාවක්වීමත්, ඒ මගින් කතෝලික ඇදහිල්ල තව තවත් ශක්තිමත්වීමත් නිසාය. 

අනෙක් අතට, 'පාතිමා දේවමාතා දර්ශනය' පෘතුගාලයට වඩා වැදගත්වුයේ ප්‍රංශයේ 'ලුර්දු දේවමාතා දර්ශනයෙන්' (1858) පසු කුඩා ගමක්වූ ලූර්දු (Lourdes) නුවර ක්‍රිස්තියානි ජනයා දස ලක්ෂ ගණනින් (මිලියන ගණනින්) පැමිණෙන විශාල සිද්ධස්ථානයක් බවට පත්වූවාක් මෙන් පාතිමා නම් කුඩා ගම්මානයද ක්‍රිස්තියානි ජනයාගේ ප්‍රධාන වන්දනා ස්ථානයක් බවට පත්වීම නිසාම නොවේ. එය එරට පැවති සමාජ-දේශපාලන ව්‍යාකූලතාවයන් නිසා ජනයා අතරින් දියවෙමින් පැවති කතෝලික විශ්වාසය නැවත ශක්තිමත් කිරීමට හේතුවූ නිසාද බව පෙනේ. විශේෂයෙන්ම ආර්ථික අවරෝධනය ක්‍රමයෙන් උග්‍ර අතට පත්කරමින් පෘතුගාලයට උදාවූ 1900 වෙනි සියවස වසර දහයක් ගෙවීයෑමට මත්තෙන් දේශපාලන විප්ලවයක් බවට පත්කරමින් 1910 'ඔක්තෝබර් 05' විප්ලවය මගින් එරට රජ පවුල බලයෙන් පහකර පෘතුගාලය ජනරජක් බවට පත්කළේය. ඒ සමග උදාවු කාලය දේශපාලන මති මතාන්දර අනුව බෙදී එකිනෙකා මරාගන්නා භීෂණ සමයක් පෘතුගාලය තුල නිර්මාණය කළේය. මෙම කාලය තුල සමාජ සදාරණත්වය සහ සාමය වෙනුවෙන් ක්‍රියාකාරීව මැදිහත්වූ කතෝලික පූජකවරුන් සහ කන්‍යා සොහොයුරියන් 2000කට වඩා මරා දමන ලදී. ගිනිතබා විනාශකල සහ බලහත්කාරයෙන් වසාදමන ලද කතෝලික සහ ක්‍රිස්තියානි දේවස්ථාන සහ සිද්ධස්ථාන සංබ්‍යාව 67කි. පළමු ලෝක යුද්ධය (1914-18) ආරම්භවීමත් සමග මෙම දේශපාලන අර්බුධය තව තවත් දරුණු අතට පත්විය. එහිදී පෘතුගාලය මිත්‍රපාක්ෂිකයන්ගේ පැත්ත ගන්නා ලදී. එමගින්  අප්‍රිකානු මහාද්වීපයේ ඒවන විටත් ඉතිරිවී තිබු සිය යටත්විජිත කිහිපයත්, බ්‍රිතාන්‍ය සහ ප්‍රංශය සමග තිබු වෙළද සම්බන්දතාත් ආරක්ෂා කරගැනීම අරමුණු කරගත්තද එම තීරණය ක්‍රිස්තියානි විරෝධී, පැසිස්ට් සහ කොමියුනිස්ට්වාදීන් විසින් දියත්කර තිබූ භීෂණ රැල්ල තවදුරටත් තීවූර කරන ලදී. පළමු ලෝක යුද්ධය නිසා උද්ගතවූ සාගතයත්, ඒ සමයේම පැතිර ගිය 'ස්පාඤ්ඤ උණ' (Spanish flu) වසංගතයත්, අභ්‍යන්තර දේශපාලන ගැටුම් ආදියත් නිසා පෘතුගාලය තුල 1910 සිට 1919 දක්වා කාලයේදී පුද්ගලයන් 220,000 ක් මියගිය බව වාර්තාවේ. 
පාතිමා නුවර දී ලුසී, ජසින්තා සහ ෆ්‍රැන්සිස්කෝ යන කුඩා එඩේර දරුවන් තිදෙනාට 1917 මැයි 13 දින 'දේවමාතාවන්  දර්ශනය' වී පණිවිඩයක් දුන්නේ යැයි වාර්තාවන්නේ පෘතුගාලයේ පැවති ඉහත දැක්වූ වාතාවරණය තුලය. එහෙත් මුලින්ම මේ දරුවන්ගේ දෙමාපියන් හෝ වෙනත් කිසිවකු හෝ මෙම දර්ශනය පිළිබද පුවත පිළිගැනීමට අකමැතිවන ලදී. දරුවන් තිදෙනාද තමන්ට ලැබුණු පණිවිඩය කුමක්දැයි හෙළිකිරීමටද කැමැතිවී නැත. ඒ වෙනුවට සෑම මසකම 13 වෙනි දින අදාල දර්ශනය සිදුවූ ස්ථානයට නොකඩවා පැමිණ ඉදිරි මාස 06යේදීත් යාච්ඤා කරන ලෙස දේව මෑනියන් ඔවුන්ට දැන්වූ බවත් අවසානයේ ප්‍රාතිහාර්යක් පාන බවට පොරොන්දුවූ බව පමණක් ප්‍රකාශකරන ලදී. 

ඉන් අනතුරුව යෙදුන මාස 06 තුල දරුවන් තිදෙනා සෑම මසකම 13දා අදාල ස්ථානයට ගොස් 'දේව මෑණියන්ට' යාච්ඤා ගියහ. ඔවුන් පසු පස මෙම පුවත ගැන ඇසු ජනයාද ඇදුනි. මෙය තවත් මහජන පෙරලියක පෙළගැස්මක් විය හැකියැයි සැකකල පාලකයින් වරක් මෙම දරුවන් තිදෙනාව අත්අඩංගුවේද රදවා තබන ලදී. එහෙත් ඔවුහු  සෑම මසකම මෙම දර්ශනය සිදුවූ ස්ථානයට පැමිණ යාච්ඤා කලහ. හයමසක් පිරුණු 1917 ඔක්තෝම්බර් 13 දින මහා වර්ෂාව  පවා නොතකමින් 70,000 කට අධික පිරිසක් මෙම  ස්ථානයට පැමිණියේ පොරොන්දුවූ පරිදි ප්‍රාතිහාර්ය නැරබීමටය. සිරිත් පරිදි දරුවන් තිදෙනා පැමිණ මහා වැසි නොතකමින් යාච්ඤා  කරමින් සහ රැස්ව සිටි ජනයාට නොපෙනුන කෙනෙක් සමග කථා කරමින් සිට ඇත. මිනිස්සුන් තමන්ට පොරොන්දුවූ පරිදි තවත් තමන්ගේ කාලය නාස්ති නොකර  ප්‍රාතිහාර්ය පාන මෙන් ඉල්ලා කෑගසමින් සිටියහ. 

ඉන් අනතුරුව සිදුවූ දෙය පිලිබදව පෘතුගාලයේ ලිස්බන් නුවර  පලකරන ක්‍රිස්තියානි විරෝධී/ රැඩිකල් පුවත්පතක්වූ 'O Seculo' (29/10/1913) පවා වාර්තාකර තිබුනේ පාතිමා හීදී  ප්‍රාතිහාර්යක් සිදුවූ බවය. “Miracle of the Sun,” සහ “the day the sun danced” නමින් පළවූ ලිපිවලින් දක්වා තිබු එම විස්තරය රැස්ව සිටි ජනයාගේන් ලබාගත් තොරතුරු ඇසුරින් සකස්වී තිබුණි. එම ලිපිවල දක්වා තිබු ආකාරයට සිද්ධිය මෙසේය:

"දවස තිස්සෙම ඇද හැලුන ධාරණීපාත වර්ෂාව එක වරම නතර විය. තෙත බරිත  ඇදුම් පමණක් නොව වැස්ස නිසා එතෙක් මඩ ගොහුරක්ව තිබු භූමියද එකවරම වියලී ගියහ. අහස ඉතා පැහැලිවූ අතර සූර්යා යම් කිසි වලාවකින් වැසී යනවා සේ පෙනුනි. එක්වරම සුර්යාගේ ප්‍රභාව වැඩිවී උඩට, පහලට, පැත්තෙන්-පැත්තට පැද්දෙමින් නටන්නට පටන් ගත් අතර හාත්පස විවිධ පැහැයන් ප්‍රදර්ශනය වන්නට විය. විනාඩි කිහිපයක් පැවති මේ දසුන අවසානයේ  සූර්යා කැරකී කැරකී පොලොව මතට කඩාවැටීමට මෙන් ඇදී ආහ. ජනයා භීතියට පත්ව කෑමොර දුන්හ. එහෙත් මොහොතකින් සියල්ල අවසන්විය... ඒ සමග කිහිලිකරුවකින් පැමිණි තරුණයෙක් දෙපයින්  ඇවිදීමට පටන්ගත්හ. පෙනීම අහිමී සිටි ස්ත්‍රියක් පෙනීම හිමිවූ බව දක්වමින් කෑ ගසන්නට වුහ."  පාතිමා හී සිදුවූ මෙම සිදුවීම පෘතුගාලයේ පමණක් නොව ලෝකයේ වෙනත් රටවල පුවත්පත්ද වාර්තාකර තිබේ.


මේ සිද්ධිය ගැන පසුව එකතුකිරීමක් කල ‘පාතිමා දේවමාතා දර්ශනය’ වාර්තාකල ළමුන් තිදෙනාගෙන් වැඩි මහල්ලාවූඅවුරුදු 98 ක් ජීවත්වී 2005 දී මිය ගිය,  ලුසියා සන්ටෝස් (Lúcia Santos) කන්‍යා සොයුරිය දැක්වුයේ 'දේව මාතාවන් දෙවියන් වහන්සේගේ ගේ ප්‍රභාව සූර්යා මත පතිත කල බවත් එවිට සූර්යා ඉහත ආකාරයට හැසුරුණු බවත්ය.' ඒ ඔස්සේ 'දෙවියන්ගේ ප්‍රභාව සුර්යාගේ ප්‍රභාවට වඩා අති ප්‍රභාවත්' බවක් සහ 'සූර්යා පවා ප්‍රභාවත් වන්නේ දෙවියන්ගෙන්' යැයි යන්න කියවෙන බවක් පෙනේ.  එය එක්තරා ආකාරයකට බයිබලයේ මැවිල්ලේ කථාවේ එන එක්  විස්තරයක් ඇසුරින් පැන නගින 'දෙවියන් වහන්සේ පළමු දිනයේදී නොව 04 වෙනි දිනයේදී සූර්යා මැව්වේ ඇයි?' යන්නට උත්තර සැපයීමකි. එනම් සූර්යාට වඩා ශක්තියක්/ප්‍රභවක්/බලයක් දෙවියන්ට ඇතැයි යන්න සහ 'දෙවියන්ගෙන් තොරව සූර්යා පවා නොමැත' යන්න හෙවත් 'සියල්ල දෙවියන්ය', ඉන් පිටත කිසිවක් නැත යන 'ක්‍රිස්තියානි-ඇරිස්ටෝටලියානු' තර්කය ඉස්මතු කිරීමකි.   


කරුණු කෙසේවුවද, අදාල ප්‍රාතිහාර්ය  (“Miracle of the Sun”/ “the day the sun danced”) සම්බන්දයෙන් ආගමික නොවන අර්ථ නිරූපනයන්ද තිබෙන බව දැක්විය යුතුය. විශේෂයෙන්ම එය ස්වභාවධර්මය තුල ක්ෂණිකව ඇතිවෙන වෙනස්වීම් මහජනයා වැරදි ලෙස භක්තිය තුල නිලංකාරවීමකින් අවබෝධකරගැනීම හෙවත් 'mass illusion' ලෙස දක්වන පිරිස්ද සිටින බව අමතක නොකළ යුතුය. එහෙත් මෙම පාතිමා ප්‍රාතිහාර්ය ගැන CNA (Catholic News Agency) ප්‍රවෘත්ති සේවයට අදහස් දැක්වූ 'දේවධර්මය පිලිබදව ආචාර්යවරයෙක් (theologian) මෙන්ම පාතිමා සිද්ධස්ථාන කෞතුකාගාරයේ (Fatima shrine museums) පාලකයාවන Dr. Marco Daniel Duarte දක්වා තිබුනේ මෙම පාතිමා ප්‍රාතිහාර්ය තුලින් පෘතුගාල ජනයාටත් සමස්ථ ලෝකයටත් පෙන්වා දුන්නේ එවකට ක්‍රිස්තියානි විරෝධී මතවාදීන් විසින් නිතර ජපකළ නීට්ෂේ ගේ (Friedrich Nietzsche) ගේ 'The Gay Science' (1882) කෘතියෙන් උපුටාගත් "දෙවියන් මියගොසින්"
 (God is dead) ය යන්න තවදුරටත් වලංගු නොවන බවත් ඒ වෙනුවට "දෙවියන් තවමත් ජීවමානය, මිනිසා එකිනෙකා සමග යුද්ධවදිමින් පසුවුවද දෙවියන් තවදුරටත් මිනිසා වෙනුවෙන් මැදිහත්වේ" (“God is alive and still attentive to humanity, even though humanity is waging war with one another”) වන බවට සාක්ෂියක් සපයන බවය.  
ඉන් පෙනීයනුවේ, කතෝලික ආගම කෙරෙහිවූ විශ්වාසය සහ භක්තිය පෘතුගාලය තුල පමණක් නොව සමස්ථ කතෝලික සභාව තුලද නැවත නැවත තහවුරු කිරීමේ අවස්ථාවක් ලෙසද පාතිමා 'දේවමාතා දර්ශනයකතෝලික සභාවට වැදගත්වන බවය. විශේෂයෙන්ම කතෝලික සභාව කාලාන්තරයක් තිස්සේ දැඩි විශ්වාසයකින් සහ භක්තියකින් ගොඩනැගූ 'මරිය බැතිය' (Mariology) සහ දේව ධර්මයේ (theological) ඉගැන්වීම් කිහිපයක් සාක්ෂාත් කිරීමේ අවස්ථාවක් ලෙසද පාතිමා 'දේවමාතා දර්ශනය'  සලකනු ලැබේ. 

මරිය බැතිය (Mariology) හෙවත් ක්‍රිස්තුස් වහන්සේගේ මව වන මරියතුමියට ඇති විශේෂ-භක්තිය (Veneration of Mary) කතෝලික සභාව තුල ක්‍රමයෙන් 'ස්ථාපිතවූ ආගමික ඉගැන්වීමකි' (methodically presents teachings). මරියතුමිය කෙරෙහිවූ විශේෂ-භක්තිය (Veneration of Mary) ගොඩනැගෙනනුයේ ජේසුස් වහන්සේ දේව පුත්‍රයාය (son of God /Christology) යන ඉගැන්වීම්වලට සමාන්තරවය. එනම් මරියතුමී දේව අම්මාය, දේව මෑණියන්ය (Mother of God) යන ආගමික ඉගැන්වීම බයිබලයේ ඉගැන්වීම් සහ සභා සම්ප්‍රදාය ඇසුරින් පැන නැගී විකාශනයවුවකි. ක්‍රිස්තු වර්ෂ 300-400 අතර කාලයේදී (එනම් ක්‍රිස්තුස් වහන්සේ මරාදමා වසර තුන්සිය ගණනකට පමණ පසු) කතෝලික සභාව තුල පෙරට පැමිණි මෙම මරියතුමී දේව අම්මාය/ දේව මෑණියන්ය යන (Mother of God) ආගමික ඉගැන්වීම ක්‍රි.ව. 431 'Council of Ephesus' රදගුරු සමුළුවේදී සභා සම්මත කරගත් නිල කතෝලික ඉගැන්වීමක් බවට පත්විය. 

මින් අදහස් වන්නේ  ක්‍රි.ව. 431 පෙර මරියතුමියට විශේෂ භක්තියක්, ආදරයක්  කිතුනුවන් අතර නොතිබි බව නොවේ. මුල්ම කිතුනු සභාවේ ක්‍රියාකාරකම් තුල පවා මරියතුමී විශේෂ කාර්යභාරයක් ඉටූකල බවත්, විශේෂ සැලකිල්ලකට ලක්වූ බවත් සදහන්වේ. එම නිසාම සභා මාතාව (mother of the church) ලෙසද, ඉන් පසුකාලයේදී (කානානි විවාහ මංගල උත්සවයේදී සිදුවූ ලෙස) 'දෙවියන් ඉදිරියේ මිනිසුන් වෙනුවෙන් මැදිහත්වෙන පිණිස   යාච්ඤාවට පාත්‍රවූ මාතාවකි ලෙසද මරියතුමිය සලකන ලදී. ඒ සම්බන්ද තොරතුරු  මුල් ක්‍රිස්තියානි සිතුවම්වලින් පවා හෙළිවේ (උදා. දෙවෙනි සියවසේ Catacomb of Priscilla (Rome) චිත්‍ර). 

කෙසේවුවද, Mother of God යන ඉගැන්වීම පැරණි ආගම්වල පැවති 'mother goddess' (උදා. රෝම - Diana / ග්‍රීක -Artemis /හින්දු - දූර්ගා) සංකල්ප අතර ඇති සමාන්තර පදනම පිළිබද විවාදයද අමතක කලයුතු නැත. එහෙත් ක්‍රි.ව. 431 Council of Ephesus රදගුරු සමුළුව මගින් කතෝලික සභාව තුල මරියතුමියට ඇති විශේෂ-භක්තිය (Veneration of Mary) වඩාත් වෙනස් පදනමකින් ගොඩනැංවූ අතර එහිදී මරියතුමිය දේව අම්මා/ දේව මෑණියන් ලෙස සලකණු ලැබුවේ ඇය දෙවියන් වහන්සේ විසින් විශේෂයෙන් තෝරාගත් ශුද්ධවූ තැනැත්තියක්ය යන්න පදනම් කරගත් බව පෙනේ. මෙම අදහස (Mother of God / Mother of the church) කිතුනු ජනයා අතර විශේෂ භක්ති-ආදරයකට ලක්ව කිතුනු ඇදහිල්ලේ මූලික අංගයක් බවටත්, කිතුනු භක්තියේ සහ කතෝලික ඉගැන්වීමේ නිරවද්‍යතාවය පිළිබද සාක්ෂියක් බවටත් පත්වෙනුවේ 'දේවමාතාවන් දර්ශනය' (Marian apparitions) වීම සහ ඇය ලබාදුන් පණිවිඩ ගැන වාර්තා ලැබීමට පටන් ගැනීමත් සමගය.  

1854 දී නමවන පියුස් පාප්තුමා (Pope Pius IX) ඉරිදිපත්කල මරියතුමිය ජන්ම පාපයෙන් (Original Sin) නිර්දෝෂව පිලිසිදගත් තැනැත්තියක්ය යන ඉගැන්වීම (Immaculate Conception) 1858 දී සිදුවූ ලූර්දු (Lourdes) 'දේවමාතා දර්ශනය' තුලදී  Bernadette Soubirousට (St. Bernadette) "I am the Immaculate Conception" ලෙස ප්‍රකාශ කිරීමත් සමග  සාක්ෂි සහිතව තහවුරු වූ බව පිළිගනී.  මේ ආකාරයට කතෝලික සභාව තුල දිනෙන් දින වර්ධනයවූ  මරිය බැතිය පාතිමා දේව මාතා දර්ශනය තුලින්ද තව තවත් තහවුරුවූ අතර 1950 දී දොළොස්වන පියුස් පාප්තුමා (Pope Pius XII) ඉදිරිපත්කල 'The Assumption of Mary into Heaven' (මරියතුමීගේ ස්වර්ගාරෝහණය) නම් ඉගැන්වීමටද එය ඉවහල්වූ බව කියවේ. 

තවද ‘පාතිමා දේවමාතා දර්ශනය’ වාර්තාකල, එම දර්ශනය දුටු වැඩිමහල් දරුවා වූ ලුසියා සන්ටෝස් (Lúcia Santos කන්‍යා සොහොයුරිය)  1920 දී ඉදිරිපත්කල  පාතිමා  දර්ශනයේදී  ඇයට ලබාදුන් පණිවිඩ ලෙස  පසුව ලොවට හෙලිකල කරුණු අනුව 'නිරාගින්න' යන්න (Hellfire නම් වූ කතෝලික ඉගැන්වීම) සත්‍යක් බවත් (දේවමාතාවන් ඇයට පළමුවෙන් පෙන්වූ දර්ශනය නිරාගින්න සහ නිරාගින්නට හෙලා ඇති මිනිස් රූපවලට සමාන රූපය), තවද කතෝලික සභාවේ චිරස්ථිතිය තීරණය වනුයේ එය සිය අභ්‍යන්තර සහ බාහිර 'ශුද්ධවත් බව' වෙනුවෙන් කෙතෙක් මැදිහත්වන්නේ ද (එය දේවමාතාව විසින් ඇයට පෙන්වූ 3 වන දර්ශනයවේ) යන්න මත බවත් දැක්වීය. දේවමාතාවන් ඇයට පෙන්වූ දෙවෙනි දර්ශනයවුයේ පළමු ලෝක යුද්ධය නිමවන බවත්, ඊටත් වඩා දරුණු ලෝක යුද්ධයක් ඉන්පසුව ඇතිවෙන බවත්, අනතුරුව සාමයක් ඇතිවෙන බවය. එහෙත් එම සාමයද තාවකාලික බව තුන්වන දර්ශනයෙන් කියවේ. කෙසේවුවද, පළමු සහ දෙවන ලෝක යුද්ධ සම්බන්ද ඇය ඉදිරිපත් කල අනාවැකිය නිවැරදිවූ බව දනිමු. ඒ අනුව තුන් වන අනාවැකිය වන 'කතෝලික සභාවේ චිරස්ථිතිය' සම්බන්ද කාරණය පිලිබදව ඔවුන් කුමනාකාරයෙන් සුදානම්වන්නේදැයි අපි තවම නොදනිමු.  කෙසේවුවද පාතිමා දර්ශනය කතෝලික සභාවේ මරිය තුමිය කෙරෙහිවූ විශේෂ භක්තිය සම්බන්දයෙන් පමණක් නොව මුළුමහත් කතෝලික සභාවේ සම්බන්දයෙන්ම මුළුමනින්ම  වැදගත්වන බව නම් නම් ඉතා පැහැදිලිය.
මාකස් ප්‍රියන්ත පෙරේරා
17/05/17.