This blog is dedicated to my home town Negombo, its people, its history, culture, its life, politics and the norms and the values which I learned from them.

Wednesday, 20 April 2016

අනූවිය සපුරන එලිසබෙත් රැජිනගේ මීගමූ සංචාරය සහ මීගමු වෙරළ පිළිබද ගැටළුව


1954 අප්‍රියල් මස 10 සිට 21 වෙනිදා දක්වා යෙදී තිබු බ්‍රිතාන්‍ය දෙවෙනි එලිසබෙත් මහ රැජිණගේ පළමු ශ්‍රී ලංකා (Her majesty's Royal visit to  Ceylon) සංචාරයේදී  ඇය මීගමුවටද පැමිණ තිබේ. 



ඒ එවකට 'මීගමුව ගුවන් තොටුපල' ලෙස හැදින්වූ, අද බණ්ඩාරනායක ජාත්‍යන්තර  ගුවන් තොටුපල ලෙස හදුන්වන, කටුනායක පිහිටුවා තිබු බ්‍රිතාන්‍ය රාජකීය ගුවන් හමුදා කදවුර හෙවත් මීගමුව රාජකීය ගුවන් හමුදා කදවුර (Royal Air Force Negombo (RAF Negombo)) නිරීක්ෂනය කිරීමෙන් අනතුරුවය. 

බ්‍රිතාන්‍ය වින්සර් මාලිගයේ ඇති රාජකීය ලේඛනාගාරයේ (The Royal Archives at Windsor Castle) රැස්කර ඇති රාජකීය චාරිකා පිළිබද විස්තර එකතුවේ සහ ලංඩනයේ කිව් ප්‍රදේශයේ පිහිටා ඇති ජාතික ලේඛනාගාරයේ (The National Archives Kew, London) තොරතුරුවලට අනුව බ්‍රිතාන්‍ය දෙවෙනි එලිසබෙත් මහ රැජිණගේ මීගමු සංචාරය සදහා හේතුවූ කරුණු කිහිපයක් තිබුණි. එකක් නම් කොළබ සිට කටුනායකටත්, නැවත කටුනායක සිට කොලබටත් ආපසු යන ගමනේදී ඇයට විවේකයක් අවශ්‍යබවත්, ඒ සදහා හොදම ස්ථානය මීගමුවයයි ඇයගේ ගමන සංවිධානය කල පිරිස් ගෙනතිබු තීරණය. අනෙක නම් ඇගේ සීයා වූ පස්වෙනි ජෝර්ජ් රජ සහ මේරි බිසව (King George V and H.M. Queen Mary) 1901 අප්‍රියල් 12-15 දිනවල ලංකාවේ සිදුකල සංචාරයේදී මීගමුවට පැමිණ තිබීම ගැන සංවිධායකයන් සැලකිල්ලට ගෙන තිබීමය. (පස්වන ජෝර්ජ් රජගේ ලංකා ගමන සහ ඔහුගේ සංෂිප්ත මීගමු ගමන ගැන පසු අවස්ථාවක ලිවීමට අපේක්ෂා කරමි).

තවද එම සංචාරයේදී ජෝර්ජ් රජ නවාතැන්ගත් මීගමුව නව තානායම (Negombo New Rest House) 1940 දශකය වනවිට රටරටවල වෙළද දැන්වීම් පළකරන, ජාත්‍යන්තර වශයෙන් මුහුදු මත්ස්‍ය ආහාර පිලිගැන්වීම සදහා ප්‍රසිද්ද තානායමක්වී තිබුණි. එම තානායමට පසකින් තිබු පාර King George Drive ලෙසද නම් කර තිබුණි. අවට මීගමු වෙරළ තීරය ලෝක ප්‍රසිද්ද චිතාකර්ශනීය වෙරළක් (world famed glamours beach Negombo) ලෙස දැන්වීම් පලව තිබුණි. මේ සියළු කරුණු කටුනායක පිහිටුවා තිබු බ්‍රිතාන්‍ය රාජකීය ගුවන් හමුදා කදවුර නිරීක්ෂණය කිරීමෙන් අනතුරැව එලිසබෙත් රැජිණව ඉන් සැතපුම් 5 කට එපිටින් පිහිටි මීගමුවේ සංචාරයක් සදහා යොමුකිරීමට හේතුවූ බව පෙනේ. (එම තානායම ගැන සහ මීගමු වෙරල ගැන එවකට පළවූ දැන්වීමක් පහතින් වේ)
ඒ අනුව රැජිනගේ මීගමු ගමන කටුනායක රාජකීය ගුවන් හමුදා කදවුරේ සිට මෝටර් රථ පෙරහැරකින් මීගමුව දක්වා දියත්වී ඇත. 

මග දෙපස රැස්ව සිටි ජනයාට ආචාර කරමින් පැමිණි ඇයව මීගමු ලුනුකඩේ හන්දියේ දී එවකට මීගමුවේ  නගරාධිපති වරයා වූ A.N. De Abrew අබේසිංහ (Abeysinghe) මහතා විසින් පිළිගෙන තිබේ. සෙමින් ඇදුන රිය පෙරහට අතරමැදි අවස්ථාවන් කිහිපයකදීම මල් කළබ පිලිගැන්වීම්ද සිදුකර ඇත.

අනතුරුව ගමනේ ප්‍රධාන නැවතුමවූ මීගමුව කොටුව පිටිය අසල වෙරළේ ඇති මීගමුව නව තානායමේ කාමර අංක 07 හී ඇය ගිමන් නිවාගැනීම සදහා නවාතැන් ගෙන තිබේ. එහිදී ඇයට නැවුම් මුහුදු මත්ස්‍යයින්ගෙන් සකස්කල ප්‍රණීත ආහාරත් විවිධ බීම වර්ගත් සංග්‍ර කර තිබේ. පාස්කු සමයවූ එකල මීගමුවේ ප්‍රධානතම සංස්කෘතික අංගයක්වන පාස්කු නාට්‍යවල එන ජවනිකාවක් සහ ගීත කිහිපයක් මීගමු දූවේ පාස්කු නාට්‍ය කණ්ඩායම විසින් ඉදිරිපත්කර තිබේ. තවද ප්‍රදේශයේ ප්‍රභූවරු කිහිපදෙනකුද, එංගලන්ත සභාවේ සහ කතෝලික සභාවේ පියතුමන්ලා තිදෙනෙකුද පැමිණ ඇයට ආචාරකල බව සදහන්ය. ඇය ගිමන් නිවාගැනීම සදහා නවාතැන් ගෙන ඇත්තේද ඇයගේ සීයා වූ පස්වන ජෝර්ජ් රජ සහ ආච්චී වූ මේරි බිසව නවාතැන්ගත් තානායමේම බව ඉහත ලේඛනාගාරවල ඇති වාර්තාවලට අනුව පැහැදිලිය.

ඇයගේ මෙන්ම ඇයගේ සීයාගේ සංචාරයත් නිසා මීගමුවේ නව තානායම (Negombo New Rest House) ලංකාවේ මෙන්ම බ්‍රිතාන්‍යයෙත්, විවිධ රටවලත් සංචාරකන්ගේ විශේෂ අවදානයක් දිනාගෙන තිබේ.  මීගමුවේ මෙම නව තානායම සදහා පමණක් post-card කිහිපයක්ම නිකුත්කර තිබුනේ එහි නවාතැන් ගැනීම ඔවුන්ට සංඛේතාත්මක වශයෙන් වැදගත්වූ නිසා වියයුතුය. මේම ලිපියේ මුලින් පලවන ඡයාරූප අතර ඉන් කිහිපයක්ද වේ.   


බ්‍රිතාන්‍ය දෙවෙනි එලිසබෙත් මහ රැජිණගේ පැමිණීමට පෙර මෙරට ප්‍රථම නිදහස් උත්සවයේ රාජාසන කතාව සඳහා පැමිණි ග්ලෝස්ටර් ආදිපාදවරයා සහ එම ආර්යාව සදහා වූ නික්මයාමේ භෝජන සංග‍්‍රහය, එවකට අගමැතිවරයා වූ D.S. සේනානායක මහතාගේ ප්‍රධානත්වයෙන් පැවත්වා ඇත්තේද මෙම මීගමුව නව තානායමේම බව මම මීට පෙර ලියූ 'ලංකාවේ ප්‍රථම නිදහස් සැමරුම මීගමුවේ පැවැත්වූ ආකාරය' ගැන ලියූ ලිපියේ දැක්වුවෙමි (එය මෙතනින් කියවිය හැක).  

එහෙත්, ඒ තානායමට පැමිණි සුවිශේෂී අමුත්තන් ගැන මතකයත්, ගාලුමුවදොර Galle Face හෝටලය සේ නැගී සිටිය හැකිව තිබු සම්භවනීය අමුත්තන්ගේ නවාතැන්පොලක් වූ අනගිභවනීය මීගමුවේ නව තානායමේ ඉතිහාසයත්, එදා ලෝක ප්‍රසිද්ද චිත්තාකර්ෂ්නීය වෙරලක් ලෙස හැදින්වූ  මීගමුවේ වෙරළත් (world famed glamours beach Negombo) අද විනාශ වී ගොස් තිබේ.

ඒ මෙම තානායම අවට වෙරල කරවල මුදලාලිලා දෙදෙනෙකුට දේශපාලන අධිකාරිය විසින් පවරාදී ඇති නිසාය. මෙම කරෝල මුදලාලිලා දෙදෙනා විසින් අසල වෙරළ තීරයේ පරිසරය වනසමින්, අවට පරිසරයම දුගන්දයෙන් ජරාජීරන කරමින් කරෝල සැකසීමෙන් සිදුකරන විනාශය ගැන කොතෙක් දෙනාගේ ඇස් ඇරලුවද කිසිවෙක් කිසිවක් නොකර සිටී. ඒ පවතින දේශපාලන බලපෑම් නිසා වියයුතුය. තවද මීගමු මහ අධිකරණ සංකීරණය ඇත්තේ මීටර් සීයක්වත් දුරින් නොවේ. එහෙත් එහි සිටින මහත්වරුන්ටද මේ සිදුවන විනාශය ගැන කිසිදු හාන්කවිසියක් නැත. ඔවුහුද ඕනෑම දුගන්දයක්, විනාශයක් මීගමු ජනතාව මෙන්ම කිසිවක් කල නොහැකිව හොදින් විදදරාගෙන සිටිති.  ඒ මීගමුවේ සෙසු වෙරල තීරයන් හොටල් ව්‍යාපරිකයන් සහ දේශපාලකයන් විසින් අල්ලාගෙන සිටීමට අමතරවය. රජයේ තානායමක් ලෙස පවරාගැනීමෙන් අනතුරුව මෙම තානායම විවිධ දේශපාලන සම්බන්දකම් මත විවිධ පුද්ගලයන්ට බදුදෙමින් ඇති අතර ඔවුන් ද මෙහි නඩත්තුව පිලිබදව කිසිදු සාධනීය කටයුත්තක් නොකිරීම නිසා පැරණි ලන්දේසි යුගයේ සිට පැවැත එන මෙම නව තානායම් ගොඩනැගිල්ලද දැන් ගරා වැටෙමින් තිබේ. 

මේ සියල්ල සාකච්ජා කලේ හුදෙක් රජවරුන්ගේ, සිටුවරුන්ගේ චාරිකා ගැන පුනපුනා කීමට නොවේ. මීගමුවට ඇති සීමිත එතිහාසික සහ ස්වභාවීක වටිනාකම් කිහිපය ආරක්ෂා කර ගැනීමේ වැදගත්කම පසක් කරදීමටය. මෙම වටිනාකම් ආරක්ෂා කරගැනීමට කිසිදු පියවරක් නොගෙන, ඒවා විනාශයට යෑමට  ඉඩදී 'මෙගා නගර (Megapolis) සංවර්ධන සැලැස්ම'  යටතේ මීගමුව සංචාරක නගරයක් ලෙස සංවර්ධනය කරනවායැයි කීම අරුත් සුන් කථා පමණි. (පහතින් ඇත්තේ අද මෙම නව තානායමේ, රැජින නවාතැන් ගත් කාමරයේ සහ අවට වෙරළ තීරයේ වර්තමාන තත්වයයි)
මාකස් ප්‍රියන්ත පෙරේරා
18/12/16.

8 comments:

  1. සංචාරක කර්මාන්තයේ හොඳම යුගය වූ අසූව මුල් කාලයේ මීගමුව කියන්නේ එන කාගෙත් එක් නැවතුම් පොලක් වුනා. එවන් මීගමුවට අද වෙලා තියෙන දේ, නැවත ගොඩනගා දීම රජයේ යුතුකමක්.

    ReplyDelete
    Replies
    1. ඇත්තටම රජයේ මැදිහත්වීම් අවශ්‍යයි. රාජ්‍ය මැදිහත්වීමක් සහ නිවැරදි කළමනාකරණ ප්‍රතිපත්තියක් හදුන්වාදීම තුල රටට අදායමකුත්, ලස්සනත්, ප්‍රදේශයේ මෙන්ම රටේ ජනයාටත් යහපත් !!!

      Delete
  2. ශ්‍රී ලාංකේය ජාතිකත්වයක් ගොඩනැඟීමේදී ප්‍රාදේශීය විවිධත්වයන් යම් තරමකට කැපකල යුතුයි. උදාහරණයක් ගෙස ඉස්සර අවුරුදු නැකැත් කිහිපයක් පාවිච්චි වුනා. ඉස්සර සිංහල මඟුල් ඇඳුම්වල උඩරට පහතරට භේදය පැහැදිලිව නිරූපණය වුනා. නමුත් දැන් උඩරට ඇඳුම් අසීමිතව මොඩ් වෙලා. ඉස්සර වැඩවසම් යුරෝපයේ ප්‍රාදේශීය හමුදා/රජ්‍ය ලාංජන/ කොඩි ආදිය පාවිච්චි කලා. මෙම බෙදුනු දුර්වල රාජ්‍යයන්ට ඉහලින් කතෝලික සභාව සුපිරි බලයක් ලෙස පැවතුනා.
    ජාතික රාජ්‍ය බිහිවීමේදී මධ්‍යගත ජාලනයන් සහ ජාතික අනන්‍යතාවන් ගොඩනැඟුනා. මේ නිසා කතෝලික සභා බලය හෑල්ලු වුනා. එමනිසාම කතෝලික සභාව ජාතිකත්වයට විරුද්ධ වුනා. ලංකාවේ කතෝලිකයොත් ඒ වගේමද? මුස්ලිම් ආගමත් ජාතිකත්වයට විරුද්ධයි. නමුත් එය පෙනී සිටින්නේ අරාබිය කේන්ද්‍ර කරගත් ජාත්‍යන්තර වාදයකක් වෙනුවෙන් (උදාහරණයක් හැටියට දෙමළ ප්‍රශ්ණයේදී නියම විදියට ජාත්‍යන්තරවාදී ලෙස හැසිරුනේ මුස්ලිම්වරු පමණයි). කතෝලික ආගම පෙනී සිටින්නේ ප්‍රාදේශීය වාදයන් වෙනුවෙන්
    කොහොම වුනත් ශ්‍රී ලාංකික ජාතිකවාදියෙක් හැටියට මීගමු වෙරළ කරවල මුදලාලිලාට සින්නවීම ප්‍රගතිශීලී දෙයක් ලෙස සැලකිය හැකියි. මීගමුවේ අයට වෙරළ පෑගීමට අවශ්‍යනම් අධිවේගී මාර්ගයක් ඔස්සේ ගොස් වෙනත් වෙරළකට යා හැකියි.

    ReplyDelete
    Replies
    1. ///// මීගමු වෙරළ කරවල මුදලාලිලාට සින්නවීම ප්‍රගතිශීලී දෙයක් ලෙස සැලකිය හැකියි. /////////
      විහිලුවටද ලිව්වේ.....නැත්නම් මේ ඔහෙගේ හැටිද?

      Delete
    2. ඔහු 'ශ්‍රී ලාංකික ජාතිකවාදියෙක්' ලෙස තමාව හදුන්වාදෙන ගමන්ම රටේ සම්පත් ඒක එක්කෙනාට සින්නවීම හොදයිලූ !! ගමේ වෙරළ තියෙද්දී ඈත පළාතක වෙරළ හොයන් යන්නලු ඔයා හරි අපුරු ජාතිකවාදියෙක්නේ. ඔය ජගත් මම හිතුවා ඔයා මෙයට වඩා හරවත් සංවාදයක නිරතවෙන්නෙක් කියලා.

      Delete
    3. ඔහු 'ශ්‍රී ලාංකික ජාතිකවාදියෙක්' ලෙස තමාව හදුන්වාදෙන ගමන්ම රටේ සම්පත් ඒක එක්කෙනාට සින්නවීම හොදයිලූ !! ගමේ වෙරළ තියෙද්දී ඈත පළාතක වෙරළ හොයන් යන්නලු. ඔයා හරි අපුරු ජාතිකවාදියෙක්නේ. ජගත්, මම හිතුවා ඔයා මෙයට වඩා හරවත් සංවාදයක නිරතවෙන්නෙක් කියලා.

      Delete
    4. කරවල වේලන අයත් ලංකාවේම අය නේද? එයාලා එතන කරවල වේලන්නෙත් ඒකෙ වාසියක් තියෙන නිසා නේද? විනෝදවෙන්න වෙලර තීරයක් අවශ්‍යනම් ඒකත් ළඟපාතකින්ම හොයා ගන්න බැරිද? මීගමු වෙරළක් අල්ලාගෙන අනවශ්‍ය කලබලයක් ඇතිකිරීම ප්‍රදේශ වාදයක් පැතිරවීමක් වෙන්න පුළුවන්. මුස්ලිම්වරු අරාබි නම් පාවිච්චි කිරීම, දෙමළ ගැහැණු නළලේ තිලක තබාගෙන ප්‍රසිද්ධ ස්ථානවල හැසිරීම, සිංහලේ ස්ටිකර් අලවා ගැනීම වගේ දේවළුත් මේ වගේම නරක පුරුදු.

      අනිත් එක සංචාරක කර්මාන්තය ගැනනම් මගේ පැහැදීමක් නෑ ලෝකෙ කොහෙත් ඕක කෙරෙන තැන දුරාචාරය පැතිරෙනවා. ඊට වඩා කරවල හොඳයි.

      Delete
  3. නැහැ ජගත්, අපි කථා කරන්නේ අපේ ප්‍රශ්න. අපිත් අසයි අපේ මීගමු කොටුව, ඔය නව තානායම, පැරණි වෙරළ තීරණය වගේ පළාතේ වටිනා කියන තැන් ලස්සනට, පිළිවලට හදලා, විනයක් නීතියක් ඇතිව ජීවත්වෙන්න. මම පැහැදිලිවම දන්නවා අපි වගේ ප්‍රශ්න තියෙන්නේ අපිට විතරක් නෙමේ රටේ හැම පළාතේම මේවගේ ගැටළු තිබෙනවා. ඒ හැමදෙනාම තමන්ගේ, ගම, ප්‍රදේශය, නගරය ක්‍රමවත්ව පවත්වාගෙන යන්න කැමතියි. රට ලස්සන වෙන්නේ එතකොටයි. එහෙත් මෙහෙම විවිධ පළාත්වල ජනයා තම තමන්ගේ ප්‍රශ්න ඉදිරිපත් කරද්දී ඒවා ප්‍රාදේශීය ප්‍රශ්න, නැතිනම් එක් ජනකොටසකගේ ප්‍රශ්න, එක ආගමකගේ ප්‍රශ්න, එක කුලයකගේ ප්‍රශ්න කියලා නොසලකා හැරලා රටක් කොහොමද හැදෙන්නේ ? ඒවා ඒ විදිහට ලේබල් කිරීම, වර්ගකිරීම ඇත්තටම මර්ධනය කිරීමක්, එක හරිම අසාධාරණයි ජගත්. අපිට ඕනෑ රජයේ මැදිහත්වීමෙන් අපේ පළාතේ ප්‍රශ්න ටික විසදගෙන, අපේ පළාතත් ලස්සනට පිලිවටට හදාගෙන අපේ පාඩුවේ කුඩාපාඩුවේ ඉන්න. (කුඩාපාඩුව යනු මීගමුවේ කුඩා ධීවර ගමකි - 'අපේ පාඩුවේ කුඩාපාඩුවේ ඉන්නවා' යනු මීගමු ජනවහරේ එන පැත්තකට වී නිස්කලංකව ඉන්නවා යන්නය).

    ReplyDelete