This blog is dedicated to my home town Negombo, its people, its history, culture, its life, politics and the norms and the values which I learned from them.

Friday 14 December 2018

අධිකරණ තීන්දුවෙන් පසු ජාතිවාදය එලිබසීයි - ක්‍රිස්තියානීන්ට රතු එළියක්?

ජනාධිපති සිරිසේන පාර්ලිමේන්තුව විසුරුවා හැරීම නීති විරෝධී බවත්, ජනාධිපතිවරයාටවුවද පාර්ලිමේන්තුව විසිරුවා හැරිය හැක්කේ වසර 4 1/2 කින් පසුව පමණක් බවත්, එයට පෙර පාර්ලිමේන්තුව විසිරුවා හැරිමට උවමනා නම් පාර්ලිමේන්තුවේ 2/3ක බහුතරයකින් සිදුකල හැකියැයි දක්වමින් ඊයේ (13/12/2018) ශේෂ්ඨාධිකරණය ලබාදුන් ඓතිහාසික නඩු තීන්දුවත් සමග ජාතිවාදය සහ ආගම්වාදය පෙරට පැමිණ තිබේ. මෙවර එය පැහැදිලිවම ක්‍රිස්තියානී ජනයා ඉලක්ක කරගෙන තිබේ. 

මෙහිලා ප්‍රමුඛයා වී ඇත්තේ  ශ්‍රී ලංකාවේ දශක 3ක කාලයක සිට ජාතික චින්තය ලෙස දක්වමින් පට්ට ජාතිවාදයක් ප්‍රවර්ධනය කර ප්‍රචලිත කල මහාචාර්ය  නලීන් ද සිල්වාය. ඔහු දශක ගණනාවක් තිස්සේ පවත්වාගෙන යන  කාලය නම් වෙබ් පිටුවේ අද (14/12/2018) පළකර ඇති 'ජාතික-විජාතික ගැටුම' නම් ලිපියේ දක්වනුයේ මෙසේය: "බෝන් අගේන් ක්‍රිස්තියානි නිකාය රටේ ඉහළ යැයි කියන පුද්ගලයන් තම මතවාදයට බාගෙන. බෝන් අගේන් සාමාජිකයන් පරණකඩවලත් අලුත්කඩවලත් ඉන්නවා... බෞද්ධ සංස්කෘතිය ඇත්තේ නමට පමණයි. ආධිපත්‍යය ඇත්තේ යුදෙව් ක්‍රිස්තියානි මතවාදවලට...රනිල්ගේ පියා ක්‍රිස්තියානි...සුමන්තිරන් ආගමෙන් ම මෙතෝදිස්ත... රනිල් සංස්කෘතියෙන් යුදෙව් ක්‍රිස්තියානි...යුදෙව් ක්‍රිස්තියානි සංස්කෘතියට රෝම ලන්දේසි නීතියට අනුව ඉටු කෙරෙන යුක්තිය එකම යුක්තිය වන්නේ ඊනියා ප්‍රබුද්ධ ජනමාධ්‍යවේදීන්ටයි...'' ආදී ලෙස දක්වා තිබුණි.  

ඔහු  සිය වෙබ්අඩවිය ඔස්සේ මෙන්ම ඔහුගේ සමාජ-දේශපාලන මැදිහත්වීම් ඔස්සේ දිගින් දිගටම පේන්වාදීමට උත්සහ කරන්නේ ලංකාව තුල ක්‍රිස්තියානිය සහ බටහිර ආදිය ගෑවී ඇති සියල්ලෙන්ම නිදහස්වීමකින් තොරව නැවත ශ්‍රී ලංකාවට  සිය  අතීත  විභූතියට යා නොහැකි බවකි. එය එක හෙලාම ගැලපෙනුයේ මිලියන 6ක යුදෙව් ජනයා ඝහතනයකල ජර්මනියේ හිට්ලර්ගේ නාසි පක්ෂය දැක්වූ ''(ඊනියා) ආර්ය  ජර්මන් ජනතාවගේ විභූතිය නැවත ඇතිකරගත හැක්කේ ජර්මනිය යුදෙව් ජනයාගෙන් මෙන්ම යුදෙව් යැයි ගෑවී ඇති සියල්ලෙන්ම නිදහස් වීමෙන් පසුව පමණි'' වැනි අදහස් සමගය.  

නලින් ද සිල්වාගේ මතය අනුව යන ගෝලබාලයන් මෙන්ම ඔහුගේ මතවාදය පිළිගන්නා ප්‍රමාණයද දැන් දැන් ක්‍රමයෙන් ලංකාව තුල ඉහල යමින් සිටී. ඔවුන්ගේ මේ මොහොතේ දේශපාලන නායකයා ලෙස ඔවුන් තෝරාගෙන ඇත්තේ මහින්ද රාජපක්ෂවය. නලින් ද සිල්වා ගේ වචනයෙන්ම දක්වතොත් 'රනිල් ඇතුළු බටහිර යුදෙව් ක්රිතියානි අධිපත්යෙන් රට ගලවා ගත හැක්කේ මහින්දට පමණි.' සිරිසේන - මහින්ද එකතුව ඔවුන් දකින්නේ ජාතික කදවුරේ එකතුවක් ලෙසය. ඉන් පිටතින් සිටින්නෙ විජාතික ගතිසිරි-සංස්කෘතීන් ඇති දේශද්‍රෝහීන්ය. ඔවුන් සිංහලද, මුස්ලිම්ද, දෙමළද, ක්රිස්තියානිද, කතෝලිකද, අනාගමිකද, වාමාංශිකද, ආදීය ඔවුන්ට ඇදලා නැත. ඔවුහු ද්‍රෝහීන්ය.
(ඊනියා) සිංහල-බෞද්ධ අතීත ශ්‍රී විභූතිය ගෙනෙන්නට එරෙහිවන ද්‍රෝහීන්ය. 

මෙම නඩු තීන්දුවට පෙර එනම් 04/12/2018 ලංකා ඊ නිවුස් වෙබ් අඩවියේ පලකල ''ඓතිහාසික නඩු විභාගය ඇරඹේ..! ගම්මන්පිල අගවිනිසුරු ටැකල් කරන්න ගිහින් ඇනගනී..!'' යන ලිපිය අනුව දැක්වුයේ මහින්ද පිලේ ප්‍රකට ජාතිවාදී කසකරුවෙකුවන  උදය ගමන්පිල  මන්ත්‍රීවරයා අගවිනිසුරු නලීන් පෙරේරා මහතා රහසිගතව හමුවීමට උත්සාහ කර ඇති බවය. එම පුවතට අනුව අගවිනිසුරුවරයා සිය ආගමික කටයුතු සඳහා පැමිණෙන දේවස්ථානයක් ලෙස කොළඹ ඩීන්ස් පාරේ Fatima දෙව් මැදුර හඳුනාගෙන උදය ගම්මන්පිල එහි ගොස් දේවස්ථානය බාර පියතුමා හමුවී තමන්ට රහසිගතව අගවිනිසුරුවරයා හමුවීමට අවස්ථාවක් සලසා දෙන ලෙස ඉල්ලා තිබේ. හමුවේ රහසිගත භාවය තමා විසින් ආරක්ෂා කරන බවටද පියතුමාට ගම්මන්පිල පොරොන්දු වී තිබේ. එහෙත් පියතුමන් විසින් ගම්මන්පිලගේ ඉල්ලීම එක හෙළා ප්‍රතික්ෂේප කර ඇත. ඉන්පසුව තමාගේ ඉල්ලීම රහසක් ලෙස තබා ගන්නා ලෙස ගම්මන්පිල පියතුමන්ට කනපින්දම් කියා ඇතැයි දැක්වේ.


දැන් මෙම නඩු තීන්දුවෙන් අනතුරුව අගවිනිසුරුතුමා සහ සෙසු විනිසුරුවන්ගේ ආගම  ආදිය ඉලක්ක කරගනිමින් විවිධ අපවාද, හෙලාදැකීම් මඩ ප්‍රචාර අදිය facebook ආදී සමාජ ජාලවලට මුදා හැර තිබේ. මෙහිදී ඔවුන් ක්‍රිස්තියානීන් යැයි දැක්වීම ශ්‍රී ලංකාවේ ජාතිවාදී ව්‍යාපෘතීයේ ඊලග අංගය බවට පත්ව ඇත. මීට පෙර ශ්‍රී ලංකා ක්‍රිකට් කණ්ඩායමේ පරාජයන් පිටු පස ඇත්තේ ඔවුන් බහුතරයක් සිංහල-බෞද්ධ නොවන කතෝලිකයන් සහ ක්‍රිස්තියානීන් යැයි දැක්වීම ජයටම කෙරීගෙන ගිය,දැන්ද කෙරීගෙන යන්නකි. 

මේ තත්වය තුල ලංකාවේ ක්‍රිස්තු භක්තිකයන්ට යම් රතු එළියක් දැල්වෙමින් තිබේ යැයි යන්න පෙනීයන්නකි. කන-බොන ජෝලිකරන ක්‍රිස්තියානීන්ද මේ සම්බන්දයෙන් අවධානයෙන්  පසුවිය  යුතුය.  නැතහොත් මිසර දේශය ධන-ධාන්‍යයෙන් පෝෂණය කල ජෝසප් ගෙන් පසු ඔවුන්ගේ පරම්පරාවලට අත්වූ ඉරණමට වඩා වෙනස් ඉරණමක් අත්නොවෙනු ඇත. 

මාකස් ප්‍රියන්ත පෙරේරා
14/12/2018

4 comments:

  1. oya deshapalakyo monawa kiwwath lankawe samanya janaya athara ewani bedeema na mithrayaa

    ReplyDelete
    Replies
    1. ඇත්තටම එහෙම බේදයක් අවශ්‍ය නැහැ. ඒ සදහා සිදුකල යුත්තේ මෙවැනි වර්ගවාදී ප්‍රවණතා හෙළිදරව් කල යුතුයි.

      Delete
  2. නලින්ද සිල්වා හෝ ඔහුගේ ක්‍රියාවන් ගැන පිටු ගණන් ලියන එක අපරාදයක් මිත්‍රයා ,සරලම නිර්වචනේ ,මිනිහා තමන්ට පිස්සු බව නොදන්නා ,උද්දච්ච අනුන්ගේ අදහස් වලට කන් නොදෙන පිස්සෙක්

    ReplyDelete
    Replies
    1. එත් ඔහුට ලංකාව තුල යම් පිළිගැනීමක් තිබෙනවා. ඔහුගේ බලපෑම දිනෙන්දින ඉහල යනවා. ඒ ගැන සැලකිලිමත්විය යුතුයි.

      Delete