ජනාධිපති සිරිසේන මෝදිගේ පදවිප්‍රාප්තියේ විශේෂ ආරාධිතයෙක්වීම

ඉන්දීය මහමැතිවරණයට අගමැති මෝදි ඉදිරිපත්වෙන්නේම පසමිතුරු පාකිස්ථානය සමග යුද්ධයකට අරඅදිමිනි. එහෙත් පාකිස්ථානයේ ඉම්රාන් ඛාන් ඒ ගින්න ඇවිලීමට ඉඩ දුන්නේ නැත.

නමුත් මෝදී දිගටම ''ආක්‍රමණිකයින්ට සහ සංක්‍රමණිකයන්ට එරෙහිව හින්දු ඉන්දියාවක්'' වෙනුවෙන් සිය මැතිවරණ ව්‍යාපාරය මෙහෙයවීය. මේ අතර ඉන්දියානු ඔත්තුසේවා ලංකාවට අනතුරු අගවනවා මුස්ලිම් අන්තවාදී කණ්ඩායමකින් ප්‍රහාරයක් එල්ලවිය හැකිබව දැන්වීය. එය හුදු අනතුරු ඇගවීමකි. ප්‍රහාරය එල්ලකරන අයගේ නම්ගම්, ප්‍රහාරය එල්ලවිය හැකි ස්ථාන ආදී කරුණු එම අනතුරු ඇගවීමේ අඩංගුවිය. කොටින්ම, ප්‍රහාරයට පැයකට කලින් පවා ප්‍රහාරකයෝ දැන් පිටත්වු බව දැන්වීය. ඒ තරම් තොරතුරු ඔවුන් සතුවිය. 

පාර්ලිමේන්තුව විසින් පත්කල පාස්කු ප්‍රහාරය ගැන සොයාබැලීම පත්කළ කමිටුවේ සාක්ෂි කැදවීමේදී නැවත නැවත හෙළිවී ඇත්තේ ශ්‍රී ලංකා ආරක්ෂක ඇමති, ජනාධිපති සිරිසේන ප්‍රහාරය ගැන දැනගෙන හිටියා බවය. එය කෙතෙක් මතුව ආවේදයත් ජනාධිපති මාධ්‍ය ලේකම්වරයෙකු විශේෂ නිවේදනයක් නිකුත්කරමින් ජනාධිපතිවරයා ප්‍රහාරය ගැන කලින් දැනගෙන නොසිටි බව කියන්නට විය. කෙසේවුද, හිටපු පොලිස්පති පුජිත ජයසුන්දර අද (31/05/2019) ගොනුකළ පෙත්සමේ දකවා ඇත්තේ ප්‍රහාරය නොවැලක්වීමේ වගකීම ජනාධිපතිවරයා සතුවෙන බවය. ලංකාවේ පාස්කු ඉරිදා ප්‍රහාරය මෝදිගේ මැතිවරණ සටන උච්චම අවස්ථාවට පත්කළ බව පැහැදිලිය.

දැන් ජනාධිපති සිරිසේන ඉන්දියානු මැතිවරණයෙන් අතිමහත් බහුතරයක් දිනූ අගමැති මෝදිගේ දෙවනවර පදවිපාත්‍රියේ විශේෂ අමුත්තෙකු ලෙස ඉන්දියාවට සම්ප්‍රාප්තවී සිටී. පසුගියවර ඉන්දියාවට ගියවිට ජනාධිපති සිරිසේනව නොසලකාහැර තිබු මෝදී මෙවර උත්සවාකාරයෙන් ඔහුව පිලිගෙන තිබේ. ඉන්දීය ඔත්තුසේවය (රෝ) තමන්ව මරන්න යනවා යැයි කියූ ජනාධිපති සිරිසේන දැන් මෝදි සමග ඉතා කුළුපගය. 

මේ වෙනසට හේතුව පාස්කු ප්‍රහාරයද? එය නොවැලක්වීමද? 

පැහැදිලිවම මෝදිගේ චන්ද ව්‍යාපාරය මෙම ප්‍රහාරයෙන් වඩාත් කුල්මත්විය. ඔවුන් නිතර මැතිරූ ''මුස්ලිම් හතුරා'' මෙන්න මේතමයි දැක්විය හැකි ආකාරයට මෝදුවී ආවේය. ඔහුගේ ජන්ද ව්‍යාපාරය මෙම ප්‍රහාරය දිගින් දිගටම භාවිතාකලේය. ඒ අර්ථයෙන් මෝදී ලා මේ ප්‍රහාරයෙන් ප්‍රහාරයෙන් ලැබුවන්ය. ඔහු හැර තවත් පාර්ශව තිබේ. ඒ අය කවුද යන්න ක්‍රමයෙන් හෙළිකරගත යුතුව ඇත. ඇත්තවශයෙන්ම, මම පාස්කු ප්‍රහාරය සම්බන්දයෙන් ලියන මෙවැනි රචනාවල එක් අරමුණක් වනුවේ එම ප්‍රහාරය නිසා සුගතියට සහ අගතියට පත් පාර්ශව මොනවාද යන්න සොයාබැලීමය. මේම ප්‍රහාරයෙන් විපතට පත් මූලික පාර්ශවයවනුවේ ලංකාවේ කිතුනුවන් බව පැහැදිලිය. එමෙන්ම මුස්ලිම් ජනයාද මේම ප්‍රහාරයෙන් අගතියට පත්ව තිබේ. ඔවුන් දැන් කබලෙන් ලිපට වැටී ඇත. ඒමෙන්ම ලංකාවේ සංචාරක කර්මාන්තය සහ වෙළද ක්ෂේත්‍රයද, පොදුවේ මුළු මහත් ලංකාවමද අනතුරට හෙලා තිබේ. පැහැදිලිවම අගතියට පත්ව ඇති පාර්ශ්ව හදුනාගැනීම අපහසු නැත. එහෙත් සුගතියට පත්ව ඇති පාර්ශව මොනවාද කියලා හදුනාගැනීම එතරම් ලෙහෙසි නැත. ඒ සදහා අප දිගින් දිගටම විවිධ පෙළගැසීම් ගැන සලකා බැලිය යුතුයි. 

ප්‍රහාරය සිදුකලේ සහරාන්ලා බවට සැකයක් නැත. මා කියවූ ලෙස සහරාන් ලාගේ මුල් ඉල්ලකය වී ඇත්තේ දිගන ප්‍රහාරයට අවුරුද්දක් පිරෙන විට ප්‍රහාරයක් එල්ල කිරීම බව දක්වා තිබේ. ඒ අයගේ මුල් ඉල්ලකය වෙනස් කලේ කවුද? ISIS ලු. ඒ කවුද? කොහොමද? කෙසේද? යන්න ආදී හෙලිවීමට තව බොහෝ කල් යනු ඇත. ISIS ගැන විශ්ලේෂණය කරන විශ්ලේෂකයින්ට අනුව ISIS ලංකාව තෝරාගත්තා නොව, ලංකාවේ ආන්තවාදීන් ISIS වෙනුවෙන් එම තෝරාගැනීම කල බව දක්වා තිබුණි. එහෙත් ලංකාවේ කණ්ඩායම් සහ ISIS අතර සම්බන්ධීකරණය සම්බන්දයෙන් ඉන්දියාවේ කණ්ඩායම් (එහි ඔත්තුසේවා) යම් ආකාරයකට දායකවී තිබේද? එසේම කිසිදු බාධාවකින් තොරව මෙම ප්‍රහාරය දියත්වීමට ලංකාවෙන්ම සහයෝගයක් ලැබී තිබේද? එය පහල තැනකින් නොව ඉහලින්ම තැනකින්වුද විය හැක. සහරාන්ව අත්අඩංගුවට ගැනීමට සිටි නි. පොලිස්පතිවරයා අත්අඩංගුවට ගැනීම, ආරක්ෂක මණ්ඩලය තමන්ට කැමති අය පමණක් කැදැවීම, ප්‍රහාරය වැලැක්වීමට කිසිවක් නොකිරීම වැනි කරුණු සම්බන්දයෙන් ආරක්ෂක ඇමති ජනාධිපති සිරිසේනට එල්ලවෙන චෝදනාවලින් ඔහුට පැන යෑමට නොහැක. 

කෙසේවුවද කාදිනල්තුමා දැක්වූ ලෙසම මේම ප්‍රහාරය පිටිපස අප නොහිතන ජාත්‍යන්තර බලවේග පවා සිටිය හැකි බව ඉවත් හෙළිය නොහැකි පදනමකි. අවාසනාවට මේ සියලු බලවේගවල සිය අරමුණු මුදුන්පත්කර ගැනීමට යන්නේ මහජනයාගේ ලේ ගංගා මතිනි.

ජයාරූපය: ලංකාවේ පාස්කු ඉරිදා ප්‍රහාරයට විරුද්ධව ඉන්දියාවේ මෝදිගේ පාලනය නිසා වඩාත් පීඩාවට පත්ව ඇති ඉන්දියානු මුස්ලිම් සහ කිතුනු ජනයා එක්ව 24/04/19 පැවැත්වූ 'United against Hate' උද්ගෝෂණයකින් උපුටා ගත්තක්. එම උද්ගෝෂණයේදී මතුවූ අදහසක්වුයේ ත්‍රස්තවාදය යනු හුදෙක් මුස්ලිම් දෙයක්ම පමණක්ම නොවන බවය: "Terrorism is not just about Muslims; it's a much bigger problem. The two great religions, Christianity and Islam, can walk together, as suggested by the pontiff. But we need more dialogue to eliminate the chain of bloodshed. For us, the attack on the mosques of Christchurch and against the churches in Sri Lanka have the same importance."

මාකස් ප්‍රියන්ත පෙරේරා.

31/05/2019.