මෝදිගේ ජයග්‍රහණය ගැන ඉන්දිය කිතුනුවන් භීතියට පත්ව ඇත්තේ ඇයි?

ඉන්දියාවට ක්‍රිස්තියානි ආගම හදුන්වාදුන්නේ ක්‍රි.ව. 52 තරම් ඈත කාලයේදීය. ඒ ජේසුගේ ගෝලයෙකුවූ තෝමස් අපෝස්තුළුවරයා විසිනි. ඔහුට මෙන්ම ඔහුගේ ශ්‍රාවකයින්ටද අත්වූ ඉරණ ඛෙදනීයය. තෝමස් අපොස්තුවරයා තමිල්නාඩුවේදී මරාදමන ලදී. සෙසු ක්‍රිස්තියානීන් බොහෝ දෙනෙකුද මරා දැමු අතර ඉතිරිවූ ස්වල්පය ඉතා රහසිගතව සිය විශ්වාසය සහ ඇදහිල්ල ආරක්ෂාකර ගත්හ. 

අද ඉන්දියාවේ කිතුනු ජනගහනය මිලියන 28ක් හෙවත් එරට ජනගහනයෙන් 2.3%ක් තරම්වූ සුළුතරයකි. ඉන් මිලියන 19.9ක් හෙවත් මුළු කිතුනු ජනයාගෙන් 1.55% ක්ම කතෝලිකයින්ය. එහෙත් 14%ක් වූ මුස්ලිම් ජනගහනය හැරුණු විට කිතුනුවන් ඒරට දෙවන සුළුතරය. ඒරට ජනගහනයෙන් 80%ක බහුතරයක් වන හින්දුන් හා සැසදීමේදී කිතුනුවන් නොසැලකිය හැකි තරම් කුඩා පිරිසක්වුවද, ඔවුන්ට එල්ලවෙන තර්ජන, ප්‍රහාර, මරාදැමීම්, දුෂණය කිරීම්වල නම් අඩුවක් නැත. 

පසුගිය වසර 10ක කලය තුලදී එවැනි සිද්ධීන් 12,000 ක් වාර්තා වී ඇති අතර කතෝලික මෙන්ම ක්‍රිස්තියානි පල්ලි 1200යකට වැඩි ප්‍රමාණයට පහරදී සුරුවම් පවා විනාශ කරන ලදී. මරාදැමූ සහ ශාරීරක හිංසනයට ලක්වූ පියතුමන්ලා, මෙන්ම කන්‍යා සොයුරියන්ද එමටය. කිතුණුවන්ව පණපිටින් පුළුස්සා මරා දැමූ සිද්ධීන් වාර්තාවේ. අවාසනාවකට ඉන්දියාවේ සිදුවූ වැඩිම ක්‍රිස්තියානි විරෝධී ප්‍රචන්ඩ ක්‍රියා වැඩියෙන්ම සිදුවී ඇත්තේ ඉන්දියාවේ මෝදී අගමැතිවරයා වශයෙන් පත්වූවාට පසුවය. එමෙන්ම ක්‍රිස්තියානීන්ට එරෙහිව වැඩිවශයෙන් හිංසාකාරී ක්‍රියා සිදුව ඇත්තේ කේරලය, ගෝවේ, කල්කටා වැනි කිතුනුවන් වැඩිවශයෙන් ඉන්න පලාත්වල නොව ගුජරාත්, ආන්ද්‍රා, මධ්‍ය ප්‍රදේශ්, උත්තර ප්‍රදේශ්, ඔරිස්සා සහ තෙලගනා වැනි ප්‍රාන්තවල ජීවත්වෙන කුඩා කුඩා ක්‍රිස්තියානි ජන කොටස්වලටය

දැන් ඔහු නැවත වරක් කලින් අවස්තාවටත් වඩා වැඩි බහුතරයකින් බලයට පත්ව ඇත. සංක්‍රමණිකයින්ගෙන් සහ ආක්‍රමනිකයින්ගෙන් විනාශවූ හින්දුස්තානය නැවත ගොඩ නැගීමට බලාපොරුත්තුවන ඔහු සහ ඔහුගේ අනුගාමිකයන් ක්රිස්තියානින්ට මරණ බය ගෙන දීමට සමත්ව සිටී. ප්‍රධාන විපක්ෂයේ අගමැති අපේක්ෂකයා වූ ඉන්දියානු කොංග්‍රසයේ රාහුල් ගාන්ධි පවා "මහගෙදර" තිල්සිට පරාජය විය. එහිදී ඔහුගේ මව ඉතාලි ජාතික කතෝලික කාන්තාවක්යැයි කියවූ වාර අනන්තය. අම්මා කතෝලිකයෙක්වීම පමණක් නොව සීයා මුස්ලිම්වීමත් රාහුල් ගාන්ධිට මෙන්ම ගාන්ධි පවුලට විරුධවද, ඉන්දීය කොංග්‍රසයට විරුද්ධවද යොදාගන්නා ලදී. එසේ සිදුවුයේ මෝදිගේ හින්දුත්ව ප්‍රතිපත්තිය තවතවත් තහවුරු කිරීමෙන් අටියෙන්ය. පාකිස්තානයට විරුද්ධව යුද්ධයකට අර ඇදීම මෙන්ම ලංකාවේ පාස්කු ඉරිදා ප්‍රහාරයත් මෝදිගේ මුස්ලිම් විරෝධී, සංක්‍රමණිකයින්ට සහ ආක්‍රමණිකයන් එරෙහි හින්දුස්ථානයක් වෙනුවෙන්වූ මැතිවරණ ව්‍යාපාරය විසින් දිගින් දිගටම යොදා ගත් එම මතවාදීමය පදනම සමග මුසුකල ආර්ථික වර්ධනය පිළිබද පුරාජේරුද මෝදිගේ දැවැන්ත ජයග්‍රහණය තහවුරුකිරීමට හේතුවිය තුනෙන් දෙකක බලයකට ආසන්න මේ මැතිවරණ ජය එරට සුළුජන කොටස්වලට දැවැන්ත අනතුරු ඇගවීමක් සිදුකර ඇත. 

මන්දයත් මහජාතිය ජාතිවාදයෙන් මුසපත්වන සෑමවිටම එහි ගොදුර බවට පත්වන්නේ සුළු ජන කොටස් වන බැවිනි.

මාකස් ප්‍රියන්ත පෙරේරා 

25/05/2019