Father, ෆාදර්ගේ ගම පෝරුතොටද?

''Father, ෆාදර්ගේ ගම පෝරුතොටද?

කොහෙද මීගමුවේ පෝරුතොටද?

ඔව්... 

නැහැ... නැහැ මම මාරවිල...

ඒ පැත්තේ පෝරුතොටක් නැහැ නේද?..'' 

ඒ 1995දී පමණ මම අර්නස්ට් පෝරුතොට පියතුමා හමුවීමට වත්තල පල්ලියට ගිය අවස්ථාවේ මම එතුමාගෙන් මුලින්ම ඇසු ප්‍රශ්නය...

මම අර්නස්ට් පෝරුතොට පියතුමා හමුවීමට ගියේ එකල මා සොයමින් සිටි පොතක් එතුමා ලග ඇතැයි මට තවත් පියතුමෙක් දුන් හෝඩුවාවක් මතය. පොතේ නම 'කතෝලික සමාජ දර්ශනය' ය. සීමිත පිටපත් ගණනක් මුද්‍රණයකර තිබු ඒම පොතේ ඔහු ලග තිබු පිටපත මට ලබාදුනි...ඉන් ටික කලකට පසුව මම එතුමාට එම පොත නැවත බාරදීමට ගියෙමි. පොතෙන් උකහාගත්තේ මොනවාදැයි ඇසීය...අපි පොතේ ඇති මාගේ අවධානය යොමුවූ කරුණු ගැන කථා කළේය...කථාව දහවල් කෑම කා යන්නට යැයි කියන තරමට දික්විය...අවසානයේ පිටත්වී යන්නට මත්තෙන් පොත නැවත බාරගන්නවා වෙනුවට එතුමා මට ඒ පොත තියාගන්නටම දුන්නේය. අදද මා සතුව ඇති 'කතෝලික සමාජ දර්ශනය' පොත එතුමා දුන් ඒ පොතය. ඒ පොත තවමත් මා සතුව ඇත... එහෙත් අර්නස්ට් පෝරුතොට පියතුමා නික්ම ගොස්ය...

කරුණාවන්ත විචාරශීලී පියතුමෙක්වූ එතුමා..බොහෝ ඇසුපිරු තැන් දැන සිටි...උගත්, බුද්ධිමත් පියතුමෙකු විය. වත්තලින් ගිය පසුව වරක් හෝ දෙවරක් මට එතුමාව 6වෙන පාවුළු මධ්‍යස්ථානයෙදී හමුවී ඇත. කථා බහකිරීමට වැඩිවෙලාවක් නොතිබුණද කලකට පසු එතුමා හමුවෙන සෑම විටම මම එතුමා හමුවට ගියේ ''Father, ෆාදර්ගේ ගම පෝරුතොටද?'' කියා අසමිනි. එසේ කියන විටම සිනාසී ''හරි හරි මට ඔයාව මතකයි'' කියා සැප-දුක විමසා වචනයක් දෙකක් කථාකිරීමට තරම් එතුමා කරුණාවන්ත විය.

පසුකාලීනව නිදහසින් පසු යුගයේ ලංකා කතෝලික සභාවේ විවිධ සමාජ දායකත්වයන් ගැන මගේ කියවීම් අතර එතුමාගේ නම මතුවූ අවස්ථා රාශියක් තිබේ. වරක ලංකාවේ පල්ලියක මංගල්‍යකට ප්‍රථමයෙන්ම ගොක්කොළවලින් තොරණක් ගසා දේශීය උරුවට පල්ලියේ සැරසිලි කිරීමට කටයුතු කලේ එතුමා යැයි සදහන්වී ඇත. ඒ බෝලවලාන පල්ලියේය..එහෙත් එතුමා බෝලවලාන මීසමේ කටයුතු කලේ දැයි මම තවම හරියටම නොදනිමි. එමෙන්ම එතුමා කතෝලික සිනමා පර්ෂදයේ කටයුතු කරමින් සිටින විට ලංකාවේ සිනමා කර්මාන්තය මෙන්ම විචාර කලාවේ දියුණුව සම්බන්දයෙන්ද විශාලා අවධානයක් යොමුකළ බව කියවේ...එමෙන්ම 1972 දී ප්‍රංශයේ Organisation Catholique Internationale du Cinéma et de l'audiovisuel (OCIC) (Catholic Organization for Cinema and Audiovisual) අනුව යමින් හිටපු කාදිනල් තෝමස් කුරේ අගරදගුරුතුමා ලංකාවේ ජාතික කතෝලික සිනමා පර්ෂදය (OCIC) ගොඩනැංවීමට කටයුතු කිරීමේදී අර්නස්ට් පෝරුතොට පියතුමාව එහිලා තෝරාගත්තේ එතුමා එකී ක්ෂේත්‍ර පිලිබදව දැක්වූ කෘතහස්තභාවය නිසා යැයි ද කියවේ. ඒ පිලිබදව තවදුරත් දැනගැනීමට කැමැත්තෙන් සිටියෙමි.

එහෙත් එතුමා නික්ම ගොසිනි...ගිය වසරේදී එතුමා ගැන නව පොතක් පළවූ බවද දැනගත්තෙමි..තවම එය ලබාගැනීමට හැකිවී නැත.. ඇතැම්විට මම එතුමාගෙන් අසා දැනගැනීමට සිටි යම් යම් කරුණු එහි තිබීමට ඉඩ ඇත..

Rest in Peace Father Ernest Poruthota!!!

මාකස් ප්‍රියන්ත පෙරේරා

16/06/2020