පාස්කු ඉරිදා ප්‍රහාරය ගැන ජාත්‍යන්තර වශයෙන් පිලිගත හැකි ස්වාධීන විමර්ශනක් අවශ්‍යයි

 

හරි, ඔය සියළු වාද විවාද, දේශපාලන කතා, අදහස්, මතවාද ටිකකට පැත්තකට තියමුකෝ...

මෙතන ඉන්නවා අපිත් එක්ක එකට පන්ති ගිය, එකට හැදුන, බස් ස්ටෑන්ඩ් එකේ උකුළු මුකුළු ගාපු, අපේ ඉස්කෝලවලට ආව, එක එක වැඩවලට ආව ගිය, ගමේ එකට හැදුන, දන්න නොදන්න යාළු මිත්‍රයෝ, ගුරුවරුන්ගේ දරුවෝ, ඒ අයගේ පවුල්වල අය, දෙමාපියෝ, හරි අමාරුවෙන් ජීවිතය ගොඩනගාගෙන සිය දරු පවුල් හදාගත්ත මිනිස්සු, මල් වගේ පෙපෙන පුංචි ළමයි, පියවරින් පියවර ජීවිතයේ සාර්ථකත්වය හොයාගෙන ගිය මිනිස්සු. ශ්‍රී ලංකාවේ සුන්දරත්වය දැන කියාගෙන ඒක බලන්න දරු පවුල් එක්ක නිවාඩුවට ලංකාවට ආව වෙනත් රටවල මිනිස්සු. පාස්කු මංගල්‍යය සතුටින් ගතකරන්න හොද්ද මද ගින්නේ තියලා පල්ලි ආව මිනිස්සු, Easter brunch එක ගන්න හෝටල්වල අවන්හල්වලට ආව මිනිස්සු - ඔය කවුරුත් සහරාන්ලාගේ ඊනියා ඉස්ලාමීය රාජ්‍යයක් වෙනුවෙන් බිලිවෙන්න ඕනෑ නෑ නේ... එහෙම බිලිගන්න ඉඩ දෙන්නත් බෑ නේ..

සහරාන්ලා මෙහෙම දෙයකට ලෑස්වෙනවා කියලා දැන දැනත් ඇයි ශ්‍රී ලංකාවේ ආරක්ෂක අංශ ඔවුන්ව නවත්වන්න කටයුතු නොකළේ? ප්‍රහාරය දැන දැනත් ඒක නවත්වන්න කටයුතු නොකළේ ඇයි? මෙහෙම දෙයක් වෙන්න යනවා කියලා පල්ලිවලට, හෝටල්වලට දැනුම් දුන්නා නම්, එහෙම හරි මේක වළක්වන්න තිබුණේ. එහෙමවත් නොකර වෙන්න දීලා බලන් හිටියා නේ - ඒ ඇයි?

අපිට දැනගන්න ඕනෑ ඒ සත්‍යය නෙමෙයිද? ඒ මිනිස්සුන්ට යුක්තිය ඉෂ්ට කරන්න පුළුවන් වෙන්නේ ඒ සත්‍යය මතුකරගෙන, මේ විනාශය වළක්වාගන්න කටයුතු නොකළ සහ ඊට අනුබල දුන් අයට දඩුවම් දීමෙන් නෙමෙයිද?

ඇත්තටම පරීක්ෂණ සිදු කරන්න ඕනෑ මේ ප්‍රහාරය දැන දැනත් එය වළක්වාගන්න කටයුතු නොකළේ කවුද?, ඒ ඇයි? කියන එක හොයන්න නේද?

ඒ ගැන අවධාරණය යොමු නොකර, පාස්කු ප්‍රහාරය කියන්නේ එවකට පැවති ආණ්ඩුව පෙරලන්න කරපු කුමන්ත්‍රණයක් ද?, ඒ කුමන්ත්‍රණය මෙහෙයවූයේ රාජපක්ෂලා, ඔවුන්ට බලයට එන්න ද?, සහරාන් පිටිපස්සේ හිටිය කවුද? ඉංදියාවේ ඔත්තු සේවය මේ පිටුපස ඉන්නවා ද? —මේවා ද්විතීය, තෘතිය පරීක්ෂණ. ඒවාත් වෙන්න ඕනෑ..

ඒත්, ඒ සියල්ලටම පළමුව,

පාස්කු ප්‍රහාරය ගැන දැන දැනත් එය වළක්වා නොගැනීමට කටයුතු කළේ කවුද?, ඒ ඇයි ?, ඊට අනුබල දුන් අය ඉන්නවා ද? , ඒ කවුද?, ඒ ඇයි? කියලා පරීක්ෂණයක් කරලා ඉන්න ඕනෑ.

ඒක ලංකාවේ කිසිම ආණ්ඩුවක් කරන්නේ නෑ. මේ ආණ්ඩුව කරයි කියලා මට විශ්වාසයකුත් නෑ.

හේතුව, ලංකාවේ ඕනෑම ආණ්ඩුවකට අවශ්‍ය සිය දේශපාලන අභිලාෂයන් මුදුන්පත් වෙන ආකාරයට විමර්ශන කටයුතු දියත් කිරීම මිසක්, සත්‍යය හෙළිකරගන්න කටයුතු කිරීම නෙමෙයි.

අපි නම් දිගින්දිගටම විශ්වාස කරන්නේ, පාස්කු ඉරිදා ප්‍රහාරයේ සැබෑ සත්‍යය හෙළිකරගන්න නම් දේශීය හා විදේශීය විමර්ශකයින්ගෙන් සමන්විත ජාත්‍යන්තර වශයෙන් පිළිගත් විමර්ශනයක් අවශ්‍යයි කියන එක. ඊට මෙහා සිදුකරන කිසිදු විමර්ශනයකින් හෝ පරීක්ෂණයකින් සැබෑ සත්‍යය හෙළිවෙන්නේත් නෑ, යුක්තිය ඉටුවෙන්නේත් නෑ.

එක එක ආණ්ඩු යටතේ විවිධ අරමුණු මුල්කරගෙන පාස්කු ප්‍රහාරය ගැන සිදුකරන එවැනි කිසිදු පරීක්ෂණයකට හෝ විමර්ශනයකට ජාත්‍යන්තර වශයෙන් නෙමේ රට තුලවත් නිසි පිළිගැනීමක් ලැබෙන්නේත් නෑ, සුජාතභාවයක් ලැබෙන්නේත් නෑ. ඒ නිසා දේශීය හා විදේශීය විමර්ශකයින්ගෙන් සමන්විත ජාත්‍යන්තර වශයෙන් පිළිගත් විමර්ශනයක් අවශ්‍යයි කියන එක හැර වෙන විසදුමක් නෑ.

මාකස් ප්‍රියන්ත පෙරේරා

22/04/26