ම‍‍ංගල සමරවීර මෙන්ම සුසිල් සිරිවර්ධනද එකම විභවයක ද්විත්ව (වි) පරිවර්තනයන්ද?

පසුගිය පැය 24 තුල (24/08/2021) සිය දිවිගමන් නිමාකල ම‍‍ංගල සමරවීර මෙන්ම සුසිල් සිරිවර්ධනද එක්තරා ආකාරයකට එකම විභවයක ද්විත්ව (වි) පරිවර්තනයන් ලෙස සැලකිය හැකි බව මගේ අදහසයි. මේ දෙපලගේම 'එකම විභවය' ලෙස මා මෙහිදී සදහන් කරනුයේ 1956 S.W.R.D බණ්ඩාරනායකගේ යුග පෙරලියය.   

1956 S.W.R.D බණ්ඩාරනායකගේ යුග පෙරලිය සම්බන්ධයෙන් සටහන් තබන බොහෝ දෙනෙක් ඔහුගේ පාලනය තුලදී සිංහල භාෂාව රාජ්‍යය භාෂාව කිරීමේ පනත සම්මත කිරීම, පෞද්ගලික සමාගම් ජනසතු කිරීම, සග-වෙද-ගුරු-ගොවි-කම්කරු පංච මහා බලවේග ආදිය බලගන්වා බලයට පැමිණිම ආදීය ගැන නිතර ඉස්මතු කරති. එහෙත් 1956 S.W.R.D බණ්ඩාරනායකගේ  යුගපෙරලිය ගැන බණ්ඩාරනායකගේම  අදහස කුමක්වීදැයි සොයා නොබලති. S.W.R.D බණ්ඩාරනායකගේ දේශපාලන දැක්ම ගැන සාකච්ඡා කරන James  Manor, (1989), 'The Expedient Utopian: Bandaranaike and Ceylon', දක්වනුයේ S.W.R.D බණ්ඩාරනායකගේ දේශපාලන දැක්ම මුලුගැන්වී තිබුනේ නිදහස පිලිබද බණ්ඩාරනායකගේ  දැක්ම අනුව බවයි. නිදහස පිලිබදව නිදහස ලබන අවධියේ රටේ තිබු  කතිකාව තවදුරටත් ප්‍රවර්ධනය කල S.W.R.D බණ්ඩාරනායක, නිදහස සම්බන්දයෙන් ඉදිරිපත් කරතිබූ අදහසවුයේ ''සමාජ සහ ආර්ථික නිදහස අත්කරගැනීමකින් තොරව දේශපාලන නිදහස අත්කරගැනීමෙන් පමණක් නිදහස සාක්ෂාත් නොවන'' බවයි (Freedom is something that came alive only when the people had won not only political freedom, but the social and economic freedom too). දේශපාලන නිදහස බලාත්මක කිරීම සදහාවූ ආර්ථික සහ සමාජ නිදහස සාක්ෂාත් කරගැනීම පිළිබද S.W.R.D බණ්ඩාරනායකගේ ඉහත දැක්ම සුසිල් සිරිවර්ධනගේ මෙන්ම මංගල  සමරවීරගේ ජිවිත සහ දේශපාලන දර්ශනය තුලද ගැබ්ව තිබු බව මගේ නීරීක්ෂණනයයි. 

සුසිල් සිරිවර්ධන නම් S.W.R.D බණ්ඩාරනායකගේ ඥාති පුත්‍රයෙකි. බණ්ඩාරනායක මෙන්ම ඔස්ෆෝර් විශ්ව විද්‍යාලයේ  අධ්‍යාපනය ලැබූ ඔහු ගුරුවරයෙකු ලෙස අනුරාධපුර මධ්‍යම මහා විද්‍යාලයේ ඉගැන්වීය. පසුව සිවිල් සේවයට එක්වූ ඔහු ඩඩ්ලි සේනානායක රජය සමයේ 'තරුණ ගොවි සමාජ' පිහිටවීමට රටපුරාම ගමන් කළේය. අනුරාධපුරයේදී ජනතා විමුක්ති පෙරමුණේ කණ්ඩායමක් සමග ගොඩනගාගත්  සම්බන්තාවයක් මත ජනතා විමුක්ති පෙරමුණට සම්බන්දවන ඔහු 1971 මහා නඩුවේ විත්තිකරුවෙක්ව වසර 4කට වඩා සිරදඩුවම් වින්දේය. පසුව නැවත සිවිල් සේවයටත් අනතුරුව අගමැති ප්‍රේමදාස  මහතාගේ නිවාස අමාත්‍යංශයේ ලේඛම් ධුරයටත් පත්විය. ඔහු වඩා ජනප්‍රියවන්නේ ප්‍රේමදාස ජනාධිපතිවරයාවීමෙන්  අනතුරුව හදුන්වාදුන් ජනසවිය ව්‍යාපාරය නිසාය. 'නැති-බැරි අය ඇති  හැකි අය කිරීම' තේමාව කරගත් ජනසවිය ව්‍යාපාරයේ නිර්මාතෘවරයාවුයේ ඔහු යැයි හැදින්වේ. ඩඩ්ලි සේනානායකගේ 'තරුණ ගොවි සමාජ ව්‍යාපාරය' ඔස්සේද, ප්‍රේමදාස ජනාධිපතිවරයාගේ ජනසවිය ව්‍යාපාරය ඔස්සේද ගැමි, ගොවි, දිලිදු, තරුණ කොටස් ආර්ථික වශයෙන් ශක්තිමත් කිරිමට සුසිල් සිරිවර්ධන මහතා කිසියම් ආකාරයක ප්‍රායෝගික දැක්මක් ඇතිව ක්‍රියාත්මකවූ මිනිසෙක් බව පැහැලිය. ඔහුගේ එකී ක්‍රියාකාරිත්වයන්ගේ මතවාදීමය පිවිසුම S.W.R.D බණ්ඩාරනායක යුගපෙරලියේ එක ප්‍රස්ථාවනාවක් වූ 'දේශපාලන නිදහස බලාත්මක කිරීම සදහාවූ ආර්ථික නිදහස සාක්ෂාත් කරගැනීම' යන්න සුසිල් සිරිවර්ධන මහතාගේ සමාජ දේශපාලන ක්‍රියාකාරිත්වයන් තුල කිසියම් ආකාරයකට දැකිය හැකියැයි යන්න මාගේ නිරීක්ෂනයයි. එම අදහස පිලිබදව කිසිවෙකුට සුසිල් සිරිවර්ධන මහතාගේ රචනා, සාකච්චා සහ දේශපාලන ක්‍රියාකාරිත්වයන් පිලිබදව ගැබුරි විමර්ෂණයකින් තහවුරු කිරීමට  හෝ නොකිරීමට හැකිය. 

1956 අප්‍රියල් 21 මංගල සමරවීර උපත ලබනවිට  මංගලගේ පියා, මහානාම  සමරවීර, S.W.R.D බණ්ඩාරනායක රජයේ  ඇමතිවරයෙකි. ඔහු මරණ දඩුවම අහෝසිකර ඒ වෙනුවට ජීවිතාන්තය දක්වා සිරදඩුවම හදුන්වාදීමේ පනත ඉදිරිපත්කල  ඇමතිවරයා ලෙස ඉතිහාසගතවිය. සිය පුත් මංගල සමරවීරට දස වසර පිරෙද්දීම (1966දී) මහානාම සමරවීර දිවියෙන්  සමුගත්තේය. ඉන් අනතුරුව ඔහුගේ ජිවිතය තුල පිය භූමිකාවද ඉටුකර ඇත්තේ සිය මව විසිනි. මංගල 'මහානාම සමරවීරගේ පුත්‍රරත්නය' වෙනවා වඩා 'ඛේමාගේ කොළුවා' ලෙස තමන්ම හදුන්වන්නේ එවැනි පසුබිමකය. මහානාම සමරවීර මිය ගියද, S.W.R.D බණ්ඩාරනායක මියගියද, ඛේමලා සහ සිරිමාවෝ බණ්ඩාරනායකලා අතර පැවති ඇසුර, සමබ්න්දය, අහෝසිවී යන්නේ නැත. එහි කුටප්‍රාප්තිය ලෙස 1994 චන්ද්‍රිකා බණ්ඩාරනායක සමග බලයට එන රජයේ ප්‍රබලයෙක් ලෙස මංගල සමරවීර ලංකා දේශපාලනය තුල සිය නාමය සලකුනුකර ගැනීම සැලකිය හැක. මංගලගේ දේශපාලනය තුල දිගින් දිගටම ප්‍රවර්ධනයවූ තේමාව වුයේ  'නිදහස' යන්නය. ලාංකික සමාජය දේශපාලනීක, ආගමීක, සංස්කෘතික සහ ලිංගික අධිපත්‍යන්ගෙන් නිදහසකර ගැනීමට මංගල සිය දේශපාලන ප්‍රාගුණය  යෙදවූ බව පිළිගත හැක. පෞද්ගලික මාධ්‍ය ආයතනවලට ඉඩ ප්‍රස්ථාව ප්‍රවර්ධනය කිරීමේ සිට ඇතම් පුවත්පත් සගරා පවත්වාගෙනයෑමට ඔහු සිය 'දේශපාලන මූලධනය' යෙදවිය. එමෙන්ම රට තුල  මුල්බැසගෙන ඇති සංස්කෘතික පරිමිතයන් විවේචනය කිරීමේ සිට, දේශපාලන සහ ආගමික ආධිපත්‍යන්ට අභියෝග කිරිමටද මංගල කටයුතු කළේය. එහෙත් මංගලගේ දේශපාලන ජීවිතය තුල සවිඥානිකව හෝ අවිඥානිකව ක්‍රියාවට නැන්වුයේ  'දේශපාලන නිදහස බලාත්මක කිරීම සදහාවූ ආර්ථික සහ සමාජ නිදහස සාක්ෂාත් කරගැනීම' පිළිබද S.W.R.D බණ්ඩාරනායකගේ දේශපාලන දැක්මද යන්න  පිලිබදව  කිසිවෙක්  මේ දක්වා විමර්ශනය කර නොමැත. ඒ ඇතැම් විට බණ්ඩාරනායකලාගේ දේශපාලන අධිනිෂ්චයවීම් ඉක්මවා ගොස් ඔහුටම විශේෂ වූ සුවිශේෂි අනන්‍යතාවයක් ගොඩනගාගැනීමට මංගල සමත්වූ බව පෙනියන නිසාවිය හැක. එහෙත් මංගලගේ මෙන්ම සුසුල් සිරිවර්ධනගේද දේශපාලන විභවයන් එකම මූලයක ද්විත්ව (වි) පරිවර්තනයන් බව මගේ අදහසයි. 

එහෙත් අද අප ජීවත්වන්නේ එම විභවයන් පමණක් නොව එකී විභවයන්ගේ මූලයන් පවා අවුල්වියවුල්වී හෝ අන්ධමන්දවී හෝ අකර්මන්‍යවී හෝ අහෝසිවී ගොස් ඇති 'ඉන්ද්‍රජාලිත රාජපක්ෂ යුගයකය'. එවන් යුගයක මංගල සලකුණ මෙන්ම සුසුල් සිරිවර්ධනලාද මිලින්වී යෑම නියතයකි. අපට කල හැක්කේ ඔවුන් පිළිබද මතකය යාවත්කාලීන කර ගැනීමය. ඔවුන්ගේ විභවයන්ගේ මූල සොයායෑමය. එහි හරයන් ධනාත්මක කිරීමය. ඔවුන්ට ලබාදිය හැකි උපරීම ගෞවරවය  ලබාදිය  හැක්කේ එවිටය. ඔවුන්ගේ ආත්මයන්ට සාමය, සතුට, නිදහස අත්වේවා.      

මාකස් ප්‍රියන්ත පෙරේරා. 

24/08/2021

තැපැල්පත්, සමරු පලක, දේවාලවලට පවා මුල්වූ මීගමුවේ නුග ගස්

ඉහතින් දැක්වෙනුවේ 1910 දී නිකුත්කළ මිගමුවේ නුගගස (Banyan Tree Negombo) නම් තැපැල්පතකි (Post Card). මේම තැපැල්පතේ දැක්වෙන තරම් අති විශාල නුග ගහක් මීගමුවේ පැවතියේද යන්න අද බොහෝ දෙනෙකුට කුතුහලය  දනවන්නකි. ඇත්තවශයෙන්ම, මේසා විශාල නුග ගස් දැන් මීගමුවේ නොමතිවුවද මීගමුව කොටුව අසල පැරණි මහාධිකරණ ශාලාව ඉදිරිපිටද, පැරණි මීපුර පුරහල පැවති මාළු වෙළදපොල අසලද, නව තානායම අසලද, මීගමුව ග්‍රීන් පාර්ක් පිටිය අසලද, වයි (Y) හංදිය අසලද, කාමච්චෝඩයේ පොලේද, මීගමුවේ තවත් තැන් රාශියකද විශාල නුග ගස් තිබේ. එහෙත් මෙම තැපැල්පතේ දැක්වෙන ආකාරයේ සුවිශාල නුගගසක් දැන් මීගමුවේ නොමැති තරම්ය. ඊටත් වඩා නුග ගස වටේ හිදගෙන  ගිමන් හැරිය හැකිසේ ගල්බැම්මක් බැදී නුග ගහක් දැන් මීගමුවේ නැති තරම්ය. රටේ මිනිස්සු කාන්සියට ගිය නගරයවූ  මිගමුවේ කාන්සිය නිවාගෙන ගිමන් හැරිය හැකි පොදු ස්ථානයක්වත් දැන් මීගමුවේ නැත. ගස් කෝලන් මෙන්ම වෙරල තිරයද දේශපාලකයින්ට වියදම් කරන මුදලාලිලා අල්ලාගෙනය.         

අද මීගමුවේ ඇති නුගගස් අතරින් වඩාත් අවධානයට ලක්වී ඇත්තේ මීගමුව කාමච්චෝඩයේ ඇති නුගගහය. මීගමුව කාමච්චෝඩයේ පැවැත්වෙන මීගමු ඉරිදා පොළට යන කාටත් දැකගතහැකි දැක ගත හැකිව තිබු එම නුගගස වටකොට දැන්  දේවාලයක් ඉදිකර තිබේ. එයද දේශපාලන අනුග්‍රහය මත සිදුවුවකි. එම දේවාලය අටවා ගත් පිරිස දැන් එයට ව්‍යාජ ඉතිහාස කතාවකුත් එක්කර තිබේ. ඊටත් වඩා 2013 වසරේ අප්‍රියල් 14 ඉරිදා 'ලක්බිම පත්තරයේ' පිටු අංක 15, 'රාවණාගේ සහෝදරියකට අදත් පුජා පවත්වන මීගමුවේ කාමච්චෝඩය: ලංකාවේ දිගම ඉරිදාපොළ පැවැත්වෙන්නේ මෙතැනයි' යනුවෙන් ලිපියක් පලකරන ප්‍රකට ලේඛක පීටර් කැන්යුට් පෙරේරා මහතා සදහන් කර ඇති ආකාරටය නම් එම කාමච්චෝඩයේ නුගගස ඉතාමත් ඈත අතීතයකට හිමිකම් කියන ගසකි. 

එම ලිපියට අනුව එක් එක් මිනිසුන් කාමච්චි දේවතාව වෙනුවෙන් මෙම ප්‍රදේශයේ පුදපුජා පවත්වා ඇති බවත් පසුකලෙක මෙම නුග ගස ආශ්‍රීතව දේවාලයක් ඉදිවු බවත් සදහන්වේ. එම ලිපියේම තම අදහස් දක්වන දැන් ඉදිකර ඇති එම දේවාලයේ කුරුක්කාල්වරයා යැයි කියන 'මුරලිදරන්' ප්‍රකාශකර ඇත්තේ 'වසර 300කටත් වඩා ඈත කාලයක සිට මෙම නුගගහට ආධිගෘහිත කාමච්චි දේවතාවා වෙනුවෙන් පුදපුජා පැවත්වෙන දේවාලයක් මෙහි තිබු බවයි.'

එහෙත් එම මතය පටපල් බොරුවකි. අප  පාසැල් යන සමයේ පවා එම කාමච්චෝඩයේ නුගගස වටා තිබුනේ දේවාලයක්  නොව මිනිසුන්ට නිස්කලංකව වීඩා නිවා සිටීය හැකි ලෙස සැකසු ගල් බන්කු කිහිපහයක් පමණි. එමෙන්ම පැරණි බ්‍රිතාන්‍ය යටත් විජිත පළාත්වල අදායම් වාර්තාවලට අනුව නම් මේ නුගගස අසල තිබී ඇත්තේ ඉතා විශාල තැබරුමක්, දුන්කොල කඩ කිහිපයක්, මස්කඩ 04ක් සහ කරවල කඩ 03කි. එහි කිසිම දේවාලයක් තිබී ඇති බව එම වාර්තාවල සදහන් නොවේ. දෙවන ලෝක යුද්ධ සමයේ බ්‍රිතාන්‍ය පාලකයින් විසින් මීගමුවේ ජනයාට අවශ්‍ය සහල්, ධාන්‍ය ආදීය රැස්කර තිබු 'කිත්තම් ගෙය' නම්  කාමර 16කින් සමන්විත ගබඩා සංකීරණය පැවත්වුයේ කාමච්චෝඩයේ මෙම නුගගස අසලය. පොලව අභ්‍යන්තරයට හෑරු වලකින් යුතුවූ මෙම ගබඩා සංකීරණයට ලොරිවලින් සහල් සහ ධාන්‍යය ආදිය ගෙනවිත් කෙලින්ම බාගැනීමට හැකි ලෙස සකස්කර තිබී ඇත. පසුව කඩා ඉවත්කළ එම ගබඩා සංකීරණයේ අත්තිවාරම මෑතක්වනතුරුම කාමච්චෝඩේ කරවල කඩ පිහිටි භූමියෙන් දැකගත හැකිවිය. මෙවැනි තොරතුරු මිස මෙම ප්‍රදේශය ගැන දන්නා ඕනෑම කෙනෙකුට 2010 වනතුරු කාමච්චෝඩයේ නුග ගස අසල කිසිම දේවාලයක් නොතිබුබව නොරහසකි. 

මුදල් ඉපයීම පිණිස ආගම සහ දෙවියන් පවා විකුණන මෙම යුගයේදී, මෙවැනි විවිධ පල්ලි, පන්සල්  දේවාල, කෝවිල් ආදිය ඉදිකිරිමේ  අරුමයක් නැතත්, අපේ නගරයේ ඇති සුන්දර තැන් මෙලෙස එකිනෙකා කොටුකරගෙන එක එක විකාර සිදුකිරීම නම් කිසිසේත්ම අනුමත කල නොහැක. 

එහෙත් කාමච්චෝඩය ආශ්‍රීතව පැරණි දේවාලයක් තිබු බවත්, එය 'රාම-රාවණා කථා' දක්වා ඈතට දිවයන බවත්, එය පෘතුගීසින් පැමිණීමටත් බොහෝ කලකට පෙර මුහුදුබත්ව ගොස් ඇතිබවත්, එහෙත් පෘතුගීසි යුගයේදී පවා සැම වසරකට වරක්ම ලංකාවේ වෙරළබඩ සහ දකුණු ඉන්දියාවේ සිට මුහුදු යාත්‍රා වලින් පැමිණි හින්දු ආගමික ජනයා රතුමල් මුහුදට දමා එකී  මුහුදුබත්ව ගොස් ඇති දේවාලයේ දේවතාවන්ට ගරුබුහුමන් දැක්වු බවත් ජනප්‍රවාදයේ සදහන්වේ. 

එහෙත් නුගගහට ආධිගෘහිතව කාමච්චි දේවාලයක් අතීතයේ සිට පැවති බවනම් පටපල් බොරුවක්. අද මීගමුවේ  කාමච්චෝඩයේ පොළ මැද නුග ගස වටකොට ඉදිකර ඇති දේවාලය අනවසරයෙන් ඉදිකර ඇති හොර දේවාලයකි. විවිධ ආගමික සහ දේශපාලන උවමනා වෙනුවෙන් ජයටම කෙරීගෙන යන මෑතකදී  ඉදිකළ  දේවාලයක්  මිස අතීතයේ පැවති  දේවාලයක් නැවත ඉදිකිරීමක්  නොවේ. කිසිවෙක්  එසේ කියන්නේ නම් එය මීගමුවේ ඉතිහාසය ගැන මෙලෝ අධ්‍යානයකින් තොරව ඉදිරිපත් කර ඇති ප්‍රබන්ද මගින් මීගමුවේ පමණක් නොව මුළු රටේම ජනයා නොමග යැවීමකි. කරුණු හරි හැටි නොදැන හෝ විවිධ අරමුණු පෙරදැරි කරගෙන කටයුතු කරන පුද්ගලයන් 2011 මැයි මසදී 'මීගමුව' නමින් පලවෙන ප්‍රකාශනයක සහ 2013 අප්‍රියල් 14 ඉරිදා ලක්බිම පත්තරයේ පිටු අංක15 වේ පීටර් කැන්යුට් පෙරේරා විසින් ලියු ලිපියක සදහන් කර ඇති ආකාරයට 'එක් එක් මිනිසුන් කාමච්චි දේවතාව වෙනුවෙන් මෙම ප්‍රදේශයේ පුදපුජා පවත්වා ඇතිබවත් පසුකලෙක මෙම නුග ගස ආශ්‍රීතව දේවාලයක් ඉදිවු බවත්,වසර 300කටත් වඩා ඈත කාලයක සිට මෙම නුගගහට ආධිගෘහිත කාමච්චි දේවතාවා වෙනුවෙන් පුදපුජා පැවත්වෙන දේවාලයක් මෙහි තිබු බවත් සදහන් කරයි. එහෙත් ක්‍රි.ව.1500 සිට මෑත භාගය වනතුරුම මීගමුව ගැන සදහන් පෘතුගීසි, ලන්දේසි, ඉංග්‍රීසි මෙන්ම දේශීය වාර්තා රාශියක් අධ්‍යානය කර ඇති මම මීගමුව කාමච්චෝඩයේ කාමච්චි දේවාලයක් මීට වසර 300යක පෙර එම ප්‍රදේශයේ නොතිබුණු බව එකානත්යෙන්ම දක්වා සිටීමට කැමැත්තෙමි.         

අඩුම වශයෙන් අපි පාසැල් ගිය 1980 හෝ 90 කාලවලවත්  කාමච්චෝඩයේ එම නුගගහ ආශ්‍රිතව දේවාලයක් නොපැවතිනි.අද එහි පවතින්නේ පසුගිය වසර කිහිපයක් තුල අනවසරයෙන් ඉදිකල හොර දේවාලයකි. 1878 බ්‍රිතාන්‍ය යටත්විජිත ආණ්ඩුව පිහිටවූ 'Negombo Local Board' (මීගමුව ප්‍රාදේශීය මණ්ඩලයට) අයත් බල ප්‍රදේශයේ කිසිම් තැනක නුගගහටක් යට දේවාලයක් තිබී නොමැත බව ස්ථීරවම ප්‍රකාශකල හැක. පසුව 1922 දී තවත් විශාල කර පිටවූ 'Negombo Urban District Council' බල ප්‍රදේශයට අයත් ප්‍රදේශ වලද එවැනි නුගගහටක් යට දේවාලයක් ගැන හෝ සදහන් නොවේ. මේ සමග පල කර ඇති මීගමුවේ එකල පැවති නුගගස් දැකීමෙන් එය අවබෝධ කරගත හැක. එකී එක් ජයාරුපයක දැක්වෙන්නේ 1944 දී මාර්තුවේ මීගමුවේ සිටි 'සවුත්තුවා' යැයි නම් ලද දාමරිකයාව මාරදැමීමෙන් පසුව නඩු විභගය අවසාන වනතුරු පොලිස් ආරක්ෂාව යොදා වසාදැමූ නුගගසකි. පුවත්පත් වාර්තාවලට අනුව 'සවුත්තුවා' නම් දාමරිකයා මරාදමා ඇත්තේ  කාමච්චෝඩයේ රා තැබැරුමේ ගැටුමකි. කිනිස්සකින් බඩවැල් එලියට එනලෙස  බඩකපා දැමු සවුත්තුවාගේ රුදීරය වැහුණු සිරුර රෝහලට ගෙන ගොස් ඇත්තේ  කරත්තයකිනි. කාමච්චෝඩයේ රා තැබැරුමේ ඇතිවූ ගැටුම දුරදිග ගියවිට සවුත්තුවා නම් දාමරිකයා පලාගොස් ඇති අතර ඔහුව ලුහුබැද ඇති 'මාකර්' නම් මීගමුව එළවලු වෙළදපොළේ තැනැත්තෙක් එකී මිනීමැරුම සිදුකර තිබේ. ඉහත මිනීමැරුම  ගැන සදහන් පුවත්පත් වාර්තාවේ දැක්වෙන නුග ගස සහ ඉහත දැක්වෙන 1910 නිකුත්කර ඇති තැපැල්පතේ දක්වා ඇති  මීගමුවේ නුගගහ අතර පැහැදිලි සමානකමක් දැකිය හැක. එහෙත් ඒම තැපැල්පතේ දැක්වෙන නුග ගහ කාමච්චෝඩයේ නුග  ගහම දැයි නිෂ්චිතව කිව නොහැක්කේ කාමච්චෝඩයේ රා තැබැරුමේ ඇතිවූ ගැටුමෙන් අනතුරුව පලාගිය සවුත්තුවා ලුහුබැද ගොස් මරාදමා ඇති  බව සදහන්වීම තුලය. (කාමච්චෝඩයේ රා තැබැරුම ගැන තව විස්තර මෙම යොමුවෙන් කියවිය හැකhttps://marcuspriyanthaperera.blogspot.com/2016/05/blog-post_29.html?m=1) කෙසේවුවත් එකී මිනීමැරුම ගැන සදහන් පුවත්පත් වාර්තාවට අනුව පවා විශාල නුග ගස් කිහිපයක්ම යටත් විජිත යුගයේදී මීගමුවේ පැවති බව සහ ඒවා ඡයාරූප කිහිපයටම හසුකරගෙන ඇති බව පැහැදිලිය. 

මෑතක සිට මීගමුවේ නුග ගස් සහ 'රාම-රාවණා' කතා අතර සම්බන්දයක් තනන්නටද පිරිසක් උත්සහකරන බව පෙනේ. 'රාම-රාවණා' යුගයේදී මීගමුව හැදින්වුයේ 'නිගුම්භීලා' ලෙස යැයි දක්වයි. එසේ  දක්වා ඇත්තේ වාල්මිකිගේ 'රාමායනයේ එන කුමන පද්‍ය පන්තියේදැයි මම දැන ගැනීමට කැමැත්තෙමි. එයද මීගමූවට ටොලමිගේ සිතියමේ 'පරඩොක්ස්' බොක්ක යැයි  කියා ඇතැයි කිව්වා සේම අසංයුක්ත ප්‍රකාශනයකි. ඇත්තවශයෙන්ම මීගමුවේ එවකට සිටි හින්දු භක්තික ජනයා රාම-රාවණාගේ කථා ගැන  සදහන්කල බව පැරණි පෘතුගීසි සහ ලන්දේසි යුගවල ලේඛකයන්ගේ වාර්තාවලද සදහන්ය. මීගමුවේ  ද්‍රවිඩ නම වන 'නීර්කොලොම්බු' යන්න ගොඩ නැගීම සිදුව ඇත්තේ රාම-රාවණ කතාවල එන චරිතයක් පදනම් කරගෙන බව  සදහන්ය. එහෙත්  කාමච්චි දෙවිකෙනෙක් ගැන  කිසිදු  සදහනක්‍  නොමැත.(මීගමුවේ නම ගොඩනැගුන අයුරු මතු දිනයක මම වෙනම කථා කරන්නට තබමි). පැහැදිලිවම එකී වාර්තාවල සදහන්වන්නේ ජනවහරේ එන සහ  සිදුකෙරෙන දෑ ගැන මිස නුගගහටක් යට  කාමච්චි දේවාලයක් තිබු බව නොවේ. ඒ සමග මීගමුවේ තෙල්වත්ත, උදම්මිට, තම්මිට, කුණ්ඩන්විල, මල්වත්ත, දෙහිමල්වත්ත යන ප්‍රදේශ වල පැවතියා යැයි විශ්වාස කරන පැරණි ඇදහීම් ගැන සලකා බලනවිට බිලිපුජා පැවැත්වූ ප්‍රදේශයක් පැවතියේ කාමච්චෝඩයේදැයි සැක සහිත බව පෙනේ. මෙහිදී මා ඉදිරිපත් කරනුයේ නිවැරදි අධ්‍යනයක් තොරව හුදු ප්‍රබන්ද ඉදිරිපත්  කිරීමෙන්, මීගමුව ගැන කලයුතු නිවැරදි අධ්‍යනයක් වල් මත් නොකළ යුතුය. වඩාත් අදාලව කථා කළහොත් මනරම්ව පැවති කාමච්චෝඩ්යේ නුගගස වටකොට අනවසරයෙන් ඉදිකල හොර දේවාලවල් වැනි මිත්‍යා මත වපුරන දෑමගින්ද  සිදුකර ඇත්තේ  මීගමුවේ සුන්දර පරිසරය විනාශ කිරීමය. වෙරල කරෝල මුදලාල්ලාට පවරා දුන්නාසේ නුගගහ යට  දේවාලයක්  ඉදිකිරීමට ඉඩදීමෙන් සිදුකර ඇත්තේ මුදලාලිලා කිහිපදෙනෙකුට මඩි තද කරගැනීමට ඉඩදීමය. මීගමුවේ තිබෙන ඉතිහාසය සහ සංස්කෘතික වටිනාකමක් සියල්ල විනාශ කරමින් කටයුතු කරන දේශපාලුවන් කිහිපදෙනෙකුගේ  අනුග්‍රහයෙන් සිදුකරන මේ විනාශයට විරුද්ධව පෙළගැසීය යුතුය. 

ගහක කොලක වටිනාකමක් නොදන්නා මීගමුවේ දේශපාලුවන් දැවැන්ත ගස් කපාබිම දමමින් ඇති මෙවන් යුගයක අතීතයේදී  තමන්ට සෙවන් දුන් ගස් මීගමුවේ නුගගසක් යට  සමරු පලකයක් ඉදිකළ පාලකයන්  ගැනද සදහන්ය. ඒ 1913 පලකල John Penry Lewis ගේ ලංකාවේ සොහොන්පලක සහ  සමරුපලක ගැන  සදහන්  'List of inscriptions on tombstones and monuments in Ceylon' කෘතියට  අනුවය. එකී කෘතියේ 154 වෙනි පිටුවේ සදහන් ලෙස එවකට මීගමුවද අයත්වූ කොලබ දිස්ත්‍රිකයේ  ඒජන්තවරයාවූ C. P. LAYARD මහතා 1863 මීගමුවේ නුග ගසක් යට නැවතී සිය වෙහෙස මහන්සිය නිවාගැනීමේ සතුට  සිහිකරිම සදහා එකී නුග ගස යට සමරු පාලකයක් ඉදිකර ඇති බවත් එය 'Esplanade, under the Banyan Tree, Negombo' හෙවත් කොටුව පිටිය අසල නුග ගස ලෙස නම් කර ඇති බවත් සදහන්වේ. තවද  එකී සමරු පලකයේ ලතින් භාෂාවෙන් 'DEUS NOBIS HAEC OTIA FECIT. Arbori per annos XIV. Summa cura servat hunc lapidem supposuit' සදහන්ව ඇත. එහි අර්ථය 'God has given us these days of leisure. Trees are 14 years old. Keep this a stone, put the utmost care - දෙවියන් අපිට විවේකී දිනයක් දුන්සේක. ගස් වසර 14ක් පැරණිය. මෙම පුවරුව තබනුයේ, හැකි ඉහලින්ම එය රැකබලා ගැනීමටය'. ඇත්තවශයෙන්ම තවදුරටත්  කරුණු  සොයාබැලීමේදී පෙනී ගිය කරුනක්වුයේ මීගමුවේ ඇති දැවැන්ත නුගගස් රාශියක් මෙන්ම මාරගස් බොහොමයක්ද ඉබේ ඇතිවූ ගස් නොව සිටවා ඇති ගස්ය. එකී ගස් දැන් ඇති තැන්වල සිටවා ඇත්තේ  බ්‍රිතාන්‍ය යටත්විජිත පාලකයන් විසිනි. හැමිල්ටන් ඇල අසබඩ මාරගස්ද, නගරයේ බොහොමයක් ගස් සිටවීමට බ්‍රිතාන්‍ය රජය  වියදම් කර ආකාරය ගැන වාර්තා පවතී. කොලබ දිස්ත්‍රිකයේ  ඒජන්තවරයාවූ C. P. LAYARD මහතා 1863 මීගමුවේ නුග ගසක් යට ඉහත සමරුපලකය පිහිටුවන විට  එම ගස  වසර  14ක්  පැරණි යැයි  සදහන්  කරන්නේ එම තොරතුරු අනුව විය හැක. තවද එකී පලකයේ ලතින් භාෂාවෙන්  සදහන්  සදහන් 'Deus Nobis Haec Otia Fecit' (God has given us these days of leisure) යන්න බ්‍රිතාන්‍යයේ ලිවර්පූල් නගරයේද  තේමාවය (Liverpool's motto). C. P. LAYARD මහතා 1806 දෙසැම්බර් 6වෙනි දින කොලබ උපත ලැබුවද ඔහුගේ දෙමාපියන්ගේ සිට බිරිදගේ පාර්ශවයේ බොහොමයක් දෙනා සිය උපන් නගරය  ලෙසද සලකා ඇත්තේ බ්‍රිතාන්‍යයේ ලිවර්පුල් නගරයයි. 

කෙසේවුවද,  ඉහත  පලකයවත්, ඉහත ආකාරයේ  නුගගසක්වත්  දැන්  මීගමුවේ  නැත. එහෙත්  1950 ගගන්වල සුළිසුලගේදී කඩාවැටුන දැවැන්ත නුගගසක් ගැන සදහන් වේ. එය පිහිටා තිබී ඇත්තේ  මීගමුව කොටුව අසල වර්තමාන මීගමුව අධ්‍යපන කන්තෝරුව අසලය. එකී කඩාවැටුන නුගගස ගැන ඒ අවට ඇති ඉඩම් ඔප්පුවලද සදහන්වෙන බව නීතිවේදීන් පිලීෂියන් ප්‍රනාන්දුපුල්ලේ මහතා පවා වරක් මා සමග  පැවසීය.    

මේ තොරතුරු විමසා බැලීමේදී පවා මීගමුවේ නුග ගස්  පවා අනුස්මරණිය ඉතිහාසයක් දරා සිටින බව පැහැදිලිය. එකී දැවැන්ත ගස් කපා මීගමුවේ ඉතිරිවී ඇති  ඉතිහාසයත් නොවනසමු !!!

   

මාකස් ප්‍රියන්ත පෙරේරා.

19/08/2021  

ඔව් මච‍ං ශේප්

ලංකාවේ අද තත්වය අහපුවහම විශාල කනගාටුවක් දැනෙනවා. අහන අහන හැම කෙනාටම නැතිනම් ඒ අය දන්න කියන කාටහරි කොරෝනා. ඉස්පිරිතාල පිරිලලු. මෝචරි පිරිලලු. ආදහනාගාර පැය 24රෙම මිනී පුච්චනවලු. අළුතින් රෝගීන් 2000ක් වාර්තා වෙනවා කියද්දි අනෙක් පැත්තෙන් දිනක මරණ සංඛ්‍යාව 90-100ක් අතර අගයක් ගන්නවා. මේ සංඛ්‍යාලේඛන කෙතරම් නිවැරැදිද යන්න කෙසේවෙතත් ඉන් පෙනීයන දෙයක් තමයි ශ්‍රී ලංකාව ඉන්නේ ඉතාමත් දරුණු කෝවිඩ් රැල්ලක කියන එක. සමහරු කියන්නේ එය ඉංදියාවටත් වඩා දරුණු තත්වයක් කියලයි.

ඇත්තටම මම නම් හිතෙන්නේ ලංකාව මුල ඉදලම මේ කෝවිඩ් අනතුරට මුහුණ දුන්න ආකාරය වැරදියි කියලයි. මුල ඉදලම ලංකාව කලේ ඇන්දීමයි, රැවටීමයි, නොමගයැවීමයි, මර්දනයයි. මුලින්ම ආසාදිතයින් කිහිපදෙනෙක් හොයාගත්තාම එයාලව නිරෝධනයට අරන් යනවා T.V. එකේ පෙන්වනවා. ඊලඟට ඇසුරුකල ලිස්ට් එකක් එනවා. ඊටපස්සේ පවුල් පිටින් නිරෝධනයට උස්සන් යනවා. හරියට අර හමුදා මෙහෙයුම් වගේයි ඒවාකලේ. මේකෙන් වුනේ රෝගය පැතිරීම පාලනයවුන එක නෙමේ, රෝගීන් හැංගුන එකයි, රෝගය යටගිය එකයි විතරයි.

ඊලගට මුලින්ම සම්පුර්ණ ලොක්ඩවුන් එකට ගියා, පලාත් ලොක්ඩවුන් එකකට ගියා, ස‍ංචරන සිමාවන්ට ගියා. ඒත් රටපුරාම කෝවිඩ් පැතිරීම ඉහල අගයක් ගනිද්දී රටම ඇරන් ඉන්නවා. ආර්ථිකයට තවදුරටත් දරාගන්න බැරි නිසාලූ එහෙම ඇරන් ඉන්නේ. පැතිරීම ඉතාම අවම මට්ටමක තියෙද්දී සම්පුර්ණ ලොක්ඩවුන් එකකට යන්නයි, පැතිරීම ඉතාමත් ඉහල අගයක තියෙද්දී කොහෙත්ම ලොක්ඩවුන් එකකට නොයෑමෙයි ඇති තාර්කිකත්වය මොකක්ද? ආර්ථික කලමනාකරන සැලැස්ම මොකක්ද? ඔය මොන සැලැස්මකවත්, කලමනාකරන දැක්මක්වත් තිබිලා නැහැ කියලයි මට නම් හිතෙන්නේ.

බලන්න අර මුලින්ම නිරෝධන මාධ්‍යස්ථාන හදන්න හැදුව හැටි. ඒකට තෝරගත්තේ හැදල ලාදුරු රෝහල. ඉතාමත් ජනාකීර්ණ තැනක නිරෝධන මාධ්‍යස්ථාන හදන්න හදන්නේ මොන වයිරස විශේෂවේදීයාද? කවුරු කොහොම කිව්වත් ගම්වැසියෝ, පල්ලියේ පියතුමා, පන්සලේ හාමුදුරුවෝ එකතුවෙලා ඊට විරෝධය දක්වපු එක හරි. මොකද ඒක එතනට ගැලපෙන්නේ නැහැ. ඊට පස්සෙ තමයි අර කන්දකාඩු වගේ තැන් ආවේ. අපේ පලාත්වල කන්දකාඩු කියන නම් මීට කලින් අහලා තිබුනේ කුප්‍රකට මත්ද්‍රව්‍ය නිරෝධන මාධ්‍යස්ථානයක් විදිහටයි. කොයි මනුෂ්‍යයද එකට යන්න කැමතිවෙන්නේ, නැතිනම් මුලතිව් හරි කොහේ හරි හමුදා කදවුරකට අරන් යන්න කැමතිවෙන්නේ. මම් මේ කියන්නේ අපි කොරෝනා ආසාදිතයින් නිරෝධනයකලෙත් දැඩි හස්තකින්. මිලිටරි මුහුනුවරකින්. මර්දනකාරී ප්‍රතිපත්තියකින්. ඒකෙන් ආසාතයන්ට සහනයක්වත්, වසංගතයට මුහුණ දෙන්න සනසුන් වතාවරණයක්වත් ගොඩනැගෙනවා වෙනුවට ඇතිවුනේ තැතිගැන්මයි, භීතීයයි විතරයි.

ඒ එක්කම අර මාධ්‍යය යොදාගෙන කරපු මලවිකාර. මම මේ කියන්නේ මුට්ටිදාපු එක හරි තෙල් බෙදපු එක හරි මාධ්‍යය උස්සන් ගිය හැටි නෙමේ. එහෙම මිනිස්සු අන්දන්න බුදු උත්සහයක්දීලා රෙදි නැතිවෙන්න ඇන ගත්තා කියලා හොදටම දන්නවා නේ. මම මේ කියන්නේ ඒ දවස්වල ලොකේන්ම හොදින් කලේ අපි තමයි කියලා අන්දන්න හදපු ඇන්දිල්ල ගැනයි. ලංකාවේ එයාර්පොර්ට් එකේ උණ පරික්ෂාකරන එකයි, ලංකාවෙන් ආපු සුද්දෙක් කිව්ව ලංකාවේ කෝවිඩ් මර්දනය වැඩපිලිවෙල අගය කිරීම් ගැනයි. කෝවිඩ් හොදටම මර්ධනය කරපු ලිස්ට් එකේ ලංකාව ඉන්න තැනයි පෙන්වමින් අපි ආඩම්බරවුනා මතකද?

ඒ දවස්වල එංගලන්තය, ඇමරිකාව, ඉතාලිය වගේ රටවල් කෝවිඩ් ව්‍යාප්තියෙන් ඉතාමත් ඉහලින්ම බැටකකා හිටියේ. දවසකට වාර්තාවෙන රෝගීන් ප්‍රමාණය 20 000, 30 000, 60 000 වෙනකම් ඉහල ගියා. මරණසංඛ්‍යාව 400-500 ඉදන් 900-1000 දක්වාත් එක් දිනක් 1800 ගනන් දක්වාත් ඉහල ගියා. ඒ දවස්වල ලංකාවේ මාධ්‍යය ඒවා පෙන්වමින් ලෝකේ දියුණු රටවලටත් කොරෝනා මර්දනය කරන්න බැරිව තියෙද්දී මේ පුංචි රටේ කොරෝනා මර්දනය කලේ රටේ දේශපාලන නායකත්වයේ දක්ෂතාවයෙන් කියලා උදේ හවස පරම්බෑවා. ජනාධිපතිවරයත් "මම තමයි හොදටම කලේ කවුරුත් ඒ ගැන කතා කරන්නේ නැහැ" කියලා කිව්වා. අගමැතිවරයා ඇවිත් "ලෝකේ දරුනුම ත්‍රස්තවාදීන් පරාජය කල අපිට කෝවිඩ් මර්දනය මහ කජ්ජක්ද" කියලා ඇහැව්වා. ඒවා හොදයි ජනතාවගේ විශ්වාස, අභිමානය ඉහල නන්වන්න. ජනතාවත් ඒවා තදින්ම විශ්වාස කරමින් බොහොම උද්දාමයෙන් උන්නේ.

ඒ කාලේ ලංකාවේ ඉන්න සමහර අපේ යාලුවෝ අපිට උදේ හවස ඉතාලියේ එ‍ංගලන්තයේ කොරෝනා මර්දනයේ ආසාර්ථකත්වය ගැන නිතර එක එක ඒවා එවනවා. කෝල්කරලා "ඔහේ ලෙඩ්ඩුන්ව ඉස්පිරිතාලවලට ගන්නේ නැතිව මැරෙන්න ඇරලා තියෙනවාලූ නේද?" කියලා අහනවා. "අද මෙච්චර මැරුනා නේද?" කියලා අහනවා. "ඔව් මච‍ං අපි නිව්ස් බලනවා" කියල අපි ඔවුන්ට කියනවා. ඊට පස්සේ කියනවා උබලත් පරිස්සමින් ඉදපල්ලා" කියනවා. අපි කියනවා "ශේප් මච‍ං අවුලක් නෑ" කියලා. ලංකාවේ ඒහෙම කතාකරපු මිත්‍රයන්ගෙන් මේ දවසවල නම් කිසිම ආරංචියක් නෑ. මම හිතන්නේ එයාලා පරිස්සමින් ඇති.

කොහොමත්, කොහේ හිටියත් කවුරුත් පරිස්සමින් ඉන්න ඕනේ. වැක්සින් එක ගැහැව්වා කියලත් එහෙම ලොකු සහතිකයක් නෑ. මේ ලොකෙන්ම මේ වයිරසය තුරන්වෙනකම් කාටත් එහෙම ගැලවීමක්වත්, පූර්ණ රැකවරණයක්වත් නෑ. ඒ රටවල්, මේ රටවල් කියලා නෑ, ඒක තමයි ඇත්ත. වෙනසකට තියෙන්නේ ඒ ඒ රටවල ආන්ඩු ඒ ඒ තත්වයනට මුහුන දෙන ආකාරයයි. ඇන්දීමයි, රැවටීමයි, නොමගයැවීමයි, මර්දනයයි නැතිව ඇත්ත ඇති සැටියෙන් ඇත්තට මුහුණ දිලා වැඩකරනවා නම් එච්චරයි. මේ වෙලාවේ බලාපොරොත්තු වෙන්න පුලුවන් එච්චරයි. වෙන දෙයක් නෑ. ඇත්ත ඇති සැටියෙන් ඇත්තට මුහුණ දිලා වැඩකරමු. කරන්න පුලුවන් එච්චරයි.

ඉතින් පරිස්සමින් ඉන්න.

මාකස් ප්‍රියන්ත පෙරේරා

10/08/21

මැටිල්ඩාගේ අශ්වයා විකුණනවාද?

කවුරුහරි මැටිල්ඩා කාල්සන්ගෙන් අහන් නැද්ද ඔය අශ්වයා විකුණනවාද   කියලා?

ගන්න නෙමේ. අපිට ඔය අශ්වයා ගන්න රුපියල් කෝටි 142ක්වත්, යුරෝ මිලියන 6ක් වත් නෑ. හැබැයි ඒ ගාන දීලා අශ්වයෝ ගන්න මිනිස්සු ලෝකේ ඕනේ තරම් ඉන්නවා.

මැටිල්ඩා කාල්සන් සහ එයාගේ සහකරුව කරන්නේ ජර්මනියේ හැම්බර්වල ඉදන් ඔය වගේ ඉහල මිලකට අලෙවිකල හැකි අශ්වයෝ හදන එකයි, පුහුණුකරන එකයි.

ඒවා පොඩි පොඩි වෙලද ව්‍යාපාර නෙමේ ඩොලර්/යුරෝ/පවුම් මිලියන ගානක ව්‍යාපාර. 2012 වසරේදී කුඩාවට පටන්ගත්ත මැටිල්ඩලගේ Grönwohld Hof නම් සමාගම  විසින් කරගෙන යන පුහුණු කරනලද අශ්වයන් විකිණීමේ වෙලදාම මේ වනවිට කිසියම් විශාල සාර්ථකත්වයක් ලබාගෙන තියෙනවා. මැටිල්ඩා කාල්සන් ඉදිරිපත්වූ මෙම ටෝකියෝ ඔලිම්පික් උළෙලේන් අනතුරුව ඔවුන්ට අලුත් සල්ලිකාරයෝ වැහිවැහලා ඉන්න ආසියානු, මැද පෙරදිග කලාපවලත් හොද වෙලදපොලක් විවර කරගන්න හැකිවෙන බව නොඅනුමානයි.

මැටිල්ඩා කාල්සන් පහුගිය දවස්වල ලංකාවේ වගේම විදේශීය මාධ්‍යයවලිනුත් ලබාගත්ත ප්‍රචාරණය ඊට හොද ඉඩ ප්‍රස්ථාවක් ඇති කර ඇති බව නම් පැහැදිලියි.

ඇත්තටම, මැටිල්ඩා ඔලිම්පික් පදක්කමක් දින්නත්, පැරදුණුත්, ඒ අය දිනුම්. ඒ අයගේ Grönwohld Hof ආයතනය යටතේ සිදුකරන පුහුණු කරනලද අශ්වයන් විකිණීමේ වෙලදාම ඒ අය කලින් කලාටත් වඩා හොදට කරයි.

හැබැයි, අර ලංකාවට පදක්කමක් ගෙනත්දෙනකම් ඇස්දල්වා බලන්හිටිය, පහන් හැගුමෙන් පවන් සලපු, 'අපේ කෙල්ලට පදක්කමක් ලබාදියන් චෝපින්වා' කියලා අශ්වයාටත් පහන් පත්තුකරපු අපේ මිනිස්සුන්ට නම් පව්.

කොච්චර අමාරුවෙන් ජීවත්වුනත් මොහොතකට හරි ආත්මාභිමානයෙන් ආඩම්බර වෙන්න, රටේ ජයග්‍රහණයක් වෙනුවෙන් සංතෝෂ වෙන්න බලන් උන්නු අපේ රටේ මිනිස්සු පව්.

ඒ වගේම අර උනුත් කන ගමන් ජනතාවටත් කැවුම් කවන මාධ්‍යය සෙට් එකට නම් හොද වැඩේ... බලා නොබලා එන ඕනෑ කෙහෙල්මලක් කරේ තියන් දුවනවට හොද වැඩේ... කාව කාව හරි පුම්බමින් අශ්වයින්ටත් වඩා වේගයෙන් දුවන, උන්ටත් වඩා උඩින් පැනලා ලංකාවේ මිනිස්සුන්ව අන්දන මාධ්‍යයකාරයින්ට නම් මේ පාරත් උනේ දඩස් ගාලා බිමට කඩන්පාත්වෙන එක විතරයි. හැබැයි ඉතින් ඒ අයටත් ඒවා හොදට පුරුදුයි. ඒවා ඒ ඔගොල්ලෝ පුරුදුවෙන්න කරන වැඩ නෙමේ. හැබැයි මෙහෙම වූනහම ඒ අයටත් ටිකක් බිම ඉදලා බැලුව හැකියි.

ඒත් ඒ අය තවමත් ලියන්නේ, කියන්නේ, පරන කයි-කතන්දරමයි; ඩන්කන් වයිට්ලා ගැනයි, සුසන්තිකාලා ගැනයි. නැත්නම් ක්‍රිඩා තරගවලට ගිහිලා වෙන රටවලට පැන්න 'මචං' ලා ගැනයි.

ලෝකයේ ක්‍රිඩාවේ නව ප්‍රවනතා ගැන අපේ මාධ්‍යවල පලවෙන්නේ ඉතා අඩුවෙන්. ක්‍රිඩාවේ නව තාක්ෂණික වර්ධනයන් ක්‍රිඩාවේ සහ ක්‍රිඩක/ක්‍රිඩිකාවන්ගේ දක්ෂතාවලට සිදුකර ඇති, සිදුකරමින් ඇති බලපෑම් ගැන, ඒ ඒ රටවල ක්‍රිඩාවේ අභිවෘද්ධියට වෙන්කර ඇති ප්‍රතිපාදන ගැන, ඒ ඒ රටවල ක්‍රිඩාවේ වර්ධනයට ගෙන ඇති ක්‍රියාමාර්ග ආදිය ගැන කිසිම අවධානයක් අපේ රටේ මාධ්‍යය යොමු නොකිරීම අපේ රටේ ක්‍රිඩාව කඩා වැටීමට එක් හේතුවක්. ඒ අය එහෙම හොයාබලා තොරතුරු ගෙන එනවා නම් අපේ රටේ ක්‍රිඩාවේ සහ ක්‍රිඩක/ක්‍රිඩිකාවන්ගේ අභිවෘද්ධියට මෙන්ම ක්‍රිඩාවේ තීන්දු තීරණ ගන්නා ආයතන සහ නිලධාරීන්ටත් විශාල පිටුවහලක්වේවි. ඒහෙත් අපේ මාධ්‍යය වඩා කැමති කාව කාව හරි පිම්බීමට. නැත්නම්, තියෙන එකම තලුමැරීමට විතරයි.

කොහොමවුනත්, රටේ ක්‍රිඩාව යකාට ගියත් ව්‍යාපාරික අරමුණින් ක්‍රිඩාවට ප්‍රවිශ්ඨ වෙන ක්‍රිඩක/ක්‍රිඩීකාවන්ට නම් ලංකාව වගේ රටවල ඉඩකඩ තවදුරටත් වැඩි වැඩියෙන් විවෘත කරන බව නම් පැහැදිලියි. ඒ අනුව මැට්ල්ඩා වුනත් ජර්මනියේ සිය ව්‍යාපාර හොදින් කරගෙන යන ගමන් ලංකාවේ නම සහ කොඩිය යටතේ නැවත නැවත ක්‍රිඩාවේ නිරතවෙයි. ක්‍රිඩකයෙක්, ක්‍රිඩාවක් වෙලද දැන්වීමකට පෙනී සිටිනවාට වඩා වැඩි මුදලක් ඒ අයට සිය ව්‍යාපාර ඔස්සේ ඉපැයීමට ඇති ඉඩ අතිවිශාලයි. ඒ අනුව ආසියානු වෙලද පොලේ ලොකු ඉඩක් විවර කරගන්නා තුරු ඔවුන් අශ්වයෝ පදියි. සමහරවිට ඇයගේ ඊලඟ ඉලක්කය ආසියානු ක්‍රිඩා උලෙළ වෙන්නත් පුලුවන්.

එදාටත්, ඒ අයගේ ව්‍යාපාර කෙසේවුනත්, දෙමව්පියෝ අපේ රටේනේ, අපේ සිංහ කොඩියනේ ඒ අය  ඔසවන්  යන්නේ  යැයි කියමින් රටේ මොන ප්‍රශ්න තිබුණත්, ආත්මාභිමානයෙන් ආඩම්බර වියහැකි ඉඩප්‍රස්ථාවක් ක්‍රිඩා පිටියේද සොයමින් ලංකාවේ මිනිස්සු ඇස්  දල්වා බලා සිටීයි.      

මාකස් ප්‍රියන්ත පෙරේරා

05/08/21