පෘතුගාලේ පෝර්තෝ (Porto) නගරය - පෙරේරා ලා සහ පෝර්ට් වයින්

Porto Portugal - මම පෘතුගාලේ පෝර්ටො /පෝර්තෝ (Porto) ගැන මුලින්ම දැන ගත්තේ නගරක් විදිහට නෙමේ, වයින් ජාතියක් විදිහට යි. ඒ මම ලංඩන් යනවා කිව්වහම අපේ ගමේ, මීගමුවේ, ආච්චි කෙනෙක් කිව්වා එයාට 'පෝර්ට් වයින්' බෝතලයක් අරන් එන්න කියලා. 

ඒ කාලේ මීගමුවේ පෝර්ට් වයින් ගැන දන්න අය හිටියා. මීගමුවේ මහවිදිය පල්ලිය ඉස්සර තිබුන ඇපෝතිකරි (Apothecary) එකේ විතරක් නෙමේ ගෝමස් වයින් සාප්පුවෙත් පොර්ට් වයින් විකුණන්න තිබිලා තියෙනවා. පෝර්ට් වයින් හදන්නේ පෘතුගාලයේ කියලත් දැනන් ඉදලා තිබුනා. මීගමුවේ පැවැති ඔය සාප්පු දෙක ගැන මම මීට පෙරත් ලියා තිබෙනවා ඒ ගැන මෙතැනින් පිවිස කියවිය හැකියි.

 පෝර්ට් වයින් අනික් වයින්වලට වඩා thick. ඒ වගේම පැණි (sweet) රසයි. අනෙක් වයින්වලට වඩා වදිනවා, සැරයි. හැබැයි රහයි. ඒ වයින් හදන්නේ පෘතුගාලයේ මෙම පෝර්ටො/පෝර්තෝ පලාතේ හැදෙන මිදිවලින්. අර ආච්චි ඒ ගැන දැනන් හිටියා. කොහොමත් ඒ ආච්චි වයින් ගැන හොදට දන්නවා. ඇය තැඹ්ලි වලින් විතරක් නෙමේ ලොවි වලිනුත් වයින් හදනවා.

නත්තල් කාලේදී මට ඇයව නිතර මතක් වෙනවා.. ඇගේ කේක්, වයින්, කෑම ජාති, තවමත් මතකයි. කොහොම හරි පෝර්ට් වයින් වගේම ලංකාවේ /මීගමුවේ පිරිසක් විශ්වාස කරනවා ඔය පෙරේරා ලාගේ නමත් පෝර්තෝ නගරය හා සම්බන්ධයි කියලා. ඒ ගැන තවම මට හරියටම කියන්න බෑ.. හොයන්න ඕනේ.. 

කොහොම වුනත් පෘතුගාලයේ දෙවෙනි විශාලතම නගරය වන පෝර්ටො/පෝර්තෝ (Porto) නගරය පිහිටා ඇත්තේ එරට අගනුවර වන ලිස්බන් නුවරට පැය 5ක පමණ දුරකින්, රටේ උතුරට වෙන්න. පෘතුගාලයේ පාතිමා දේවමතා සිද්ධස්ථානයට පිහිටා තිබෙන්නේ ලිස්බන් සහ පෝර්තෝ නගර අතර එක්තරා ආකාරයකින්  රට මැද්දට වෙන්න. ඒ නිසා පාතිමා යන අය ඔය නගර දෙකෙන් කොයිකට හෝ ඇවිත් තමයි යන්නේ. 

මේ පොර්තො නගරයේ ශා. ජුසේ වාස් පියතුමා අයත්වූ ඔරතෝරියානු (Oratorian) නිකායට අයත් පැරණි අලංකාර පල්ලි කිහිපයක්ම පිහිටා තිබෙනවා. නගරය මැදින් වැටී ඇති Douro ගඟ හරහා ඉදිකර ඇති Maria Pia පාලම ඉදිකර ඇත්තේ පැරීසියේ අයිෆල් කුලුණ තැනූ Gustave Eiffel විසින්. ඒ 1877 දී. පෘතුගාලේ පෝර්ටො /පෝර්තෝ (Porto) කියන්නේ හරිම අලංකාර, එයටම උරුමවූ අනන්‍යතාවයක් ඇති ලෝක ප්‍රකට පැරණි අලංකාර නගරයක්. ඒ නිසාම යුනෙස්කෝව එම නගරයම පුරා විද්‍යාත්මක වටිනාකම් ඇති නගරයක් හෙවත් Unesco World Heritage Site එකක් ලෙසත් නම් කර ඇති නගරයක්. 

පෝර්තෝ නගරය ගැන වැඩි විස්තර පසුව ලියන්නම්.

මාකස් ප්‍රියන්ත පෙරේරා

07/12/23

චැනල් 4 - කාදිනල්, ශෙහාන්, කීර්ති, චම්පික, අනුර සහ සිරිල් ගාමිණී පියතුමා

බ්‍රිතාන්‍යයේ චැනල් 4 නාලිකාව විකාශනය වූවායින් පසුව ශ්‍රී ලංකාව තුලත් රටින් පිටතත් දිගහැරුනු, අදටත් දිගහැරෙමින් ඇති කතිකා, සංවාද, විශ්ලේෂණ, සම්මුඛ සාකච්ඡා , මාධ්‍ය සාකච්ඡා, පුවත්පත් නිවේදන, ලිපි, වාර්තා, තීරු ලිපි සහ වෙබ් ලිපි ආදි මාධ්‍ය ප්‍රකාශණ රාශියකටම පසුගිය සතිය පුරාම අවධානය යොමු කලෙමි.

අවම වශයෙන් 100 කටත් වඩා වැඩිවු එකී මාධ්‍ය ප්‍රකාශිතයන් අතරින් මට තවමත් මුළුමනින්ම අවධානය යොමුකල හැකිවුයේ 42කට පමණි. ඒ අතරින් දේශිය වශයෙන් වැඩි පිරිසක් නැරබුවේ යැයි සදහන් වන සම්මුඛ සාකච්ඡා සහ මාධ්‍ය සාකච්ඡා 07 ක් සම්බන්ධයෙන් මගේ නිරීක්ෂණ කිහිපයක් ඉදිරිපත් කිරීමට කැමැත්තෙමි. එකී වැඩසටහන් පහත පිලිවලින් මෙසේය:

1. කාදිනල්තුමා සහ සිරිල් ගාමිණී පියතුමා සම්බන්ධ වූ මාධ්‍ය හමුව,

2. හිරු මාධ්‍ය නාලිකාව දයාන් ජයතිලක මහතා සමග පැවැත්වූ සාකච්ඡාව.

3. චමුදිත සමරවික්‍රම ශෙහාන් මාලක සමග පැවැත්වූ සාකච්ඡාව.

4. සිරිල් ගාමිණී පියතුමා කපිල ගුණරත්න මහතා සමග පැවැත්වූ සාකච්ඡාව.

5. චමුදිත සමරවික්‍රම කීර්ති රත්නායක සමග පැවැත්වූ සාකච්ඡාව.

6. පාඨලී චම්පික රණවක මහතා පැවැත්වූ මාධ්‍ය සාකච්ඡාව

7. අනුර කුමාර මහතා බදුල්ලේ පැවැත්වූ රැස්වීම.

චැනල් 4 වැඩසටහන විකාශනය වුවායින් පසුවදාම පැවැත්වූ කාදිනල්තුමා සහ සිරිල් ගාමිණී පියතුමා සම්බන්ධ වූ මාධ්‍ය හමුව චැනල් 4 වැඩසටහන ගැනත්, ඒ වන විටත් එකී වැඩසටහන විකාශනය වීමට මත්තෙන් පවා ලංකාවේ පාර්ලිමේන්තුව තුල පැන නැගී තිබු විවිධ කරුණු කාරණා ගැනත් අවධානය යොමුකර තිබුනි.

එහිදී කාදිනල්තුමා දැක්වුයේ 2019 පැවති ජනාධිපතිවරණයේදී තමා ගෝඨාභය රාජපක්ෂට චන්දය දෙන්න කියා හෝ සජිත් ප්‍රේමදාසට චන්දය නොදෙන්න කියා හෝ කිසි තැනක නොකී බවයි...එසේ කියා ඇත්නම් සාක්ෂි ඉදිරිපත් කරන මෙන් අභියෝගයක් ද කලේය. "උදේම ගොස් චන්දන දෙන්න" කියා මිස 'අරයට හෝ මෙයාට' චන්දය දෙන්න යැයි නොකී බව කීහ. තවද 69 ලක්ෂයක් දෙනා ගෝඨාභය රාජපක්ෂ මහතාට චන්දය දුන්නේ කාදිනල්තුමා හෝ වෙනත් ආගමීක නායකයින්ගේ කීම අසාදැයි විමසූ සිරිල් ගාමිණී පියතුමා කාට චන්දය දෙන්නේද? නොදෙන්නේද? යන්න තීරණය කිරීම මිනිස්සුන්ගේ වැඩක් මිස ආගමික නායකයින්ගේ වැඩක් නොවන බව ද කීහ. පොදුවේ චැනල් 4 නාලිකාව විකාශනය කල වාර්තා වැඩසටහන නගන චෝදනා ගැනත්, පාස්කු ඉරිදා ප්‍රහාරය ගැනත්, ජාත්‍යන්තර වශයෙන් පිලිගත හැකි විමර්ශනයක් කරන මෙන් ඉල්ලා සිටීම කාදිනල්තුමා සහ සිරිල් ගාමිණී පියතුමා සම්බන්ධ වූ එම මාධ්‍ය හමුවේ අරමුණ විය.

ඊට සමාන ඉල්ලීමක් හිරු මාධ්‍ය නාලිකාව දයාන් ජයතිලක මහතා සමග පැවැත්වූ සම්මුඛ සාකච්ඡාවේද ඉදිරිපත් විය. පාස්කු ඉරිදා ප්‍රහාරය ගැන ජාත්‍යන්තර සංඝටක සහිතව අනිවාර්යයෙන්ම ජාත්‍යන්තරව පිලිගත හැකි පරික්ෂණයක් සිදුකල යුතු බවත් එසේ නොවුනහොත් බිලියන 2.6 වන ලෝක කිතුණු ප්‍රජාව තුලින් පැනනැගෙන විරෝධය ලංකාවට දැඩි ආනිසංස කැදවන දරුණු කළුවලාවක් බවට පත්වෙන බවත් ඔහු සහසුද්දෙන්ම කියාපෑහ.

එමෙන්ම පිලිගත හැකි පරීක්ෂණයක් පවත්වා නිසි නිගමයක් ලැබෙන තුරු සුරේෂ් සලේ සිය තනතුරුවලින් ඉවත්විය යුතු බවද ඔහු ද සදහන් කලේය. සුරේෂ් සලේ පමණක් නොව නිලන්ත ජයවර්ධන, දේශබන්දු තෙන්නකෝන් ආදී පොලිස් නිලධාරීන්ද තාවකාලිකව හෝ ඉවත්වී අපක්ෂපාතී පරීක්ෂණයකට ඉඩදිය යුතු බව කාදිනල්තුමා සහ සිරිල් ගාමිණී පියතුමා සම්බන්ධ වූ මාධ්‍ය හමුවේද ඉදිරිපත් කරන ලද ඉල්ලීමකි.

ජාත්‍යන්තර වශයෙන් පිලිගත හැකි පරීක්ෂණයක අවශ්‍යතාවය දිගින් දිගටම පෙන්වාදුන් හිටපු රාජ්‍ය තාන්ත්‍රිකයෙකු වු දයාන් ජයතිලක මහතා දැක්වූ එක් ප්‍රබල අදහසක් වූයේ එක් පුද්ගලයෙක් හෝ කිහිප දෙනෙකුගේ ක්‍රියාපටිපාටියක් නිසා සමස්ථ රටක්, ජනතාවත් උවදුරේ නොවැටිය යුතු බවයි.

තවද, පාස්කු ඉරිදා ප්‍රහාරය එල්ල කල සහරාන්ගේ ත්‍රස්තවාදී කණ්ඩායම සමග ශ්‍රී ලංකා බුද්ධි අංශ නිලධාරීන් පවත්වාගෙන ගිය සම්බන්ධතා පිලිබදව ඉදිරිපත් වී ඇති තොරතුරු ශ්‍රී ලංකාවට අතීශයින් අවාසිදායක බව ද දයාන් ජයතිලක මහතා පෙන්වා දුන් කරුණු අතර විය. එහිදී ඔහු උදාහරණ ලෙස ගත්තේ දෙහිවල බෝම්බය පුපුරුවාගත් ජමීන්ව හමුවීමට බුද්ධි නිලධාරීන් යෑම, පොලිස් අත් අඩංගුවට ගත් හමුදා බුද්ධි අංශ සමාජිකයා නිදහස් කරගැනීමට හමුදා බුද්ධි අංශය සම්බන්ධ වීම ආදී කරුණුය.

සහරාන්ගේ ත්‍රස්තවාදී කණ්ඩායම සමග ශ්‍රී ලංකා බුද්ධි අංශ නිලධාරීන් පවත්වාගෙන ගිය සම්බන්ධතා පිලිබදව කියවෙන වාර්තාවක් ශ්‍රී ලංකාවේ කතෝලික සභාවේ විශේෂ කමිටුවක් විසින් මේ දිනවල සකසමින් සිටින බවත්, එකී ලැයිස්තුව ඉදිරියේදී ඉදිරිපත් කරන බවත්, කාදිනල්තුමා සහ සිරිල් ගාමිණී පියතුමා සම්බන්ධ වූ මාධ්‍ය හමුවේදී දැක්වීය. එම තොරතුරු ලැයිස්තුවට පාස්කු ඉරිදා ප්‍රහාරය ගැන විමර්ශනය කල වාර්තාවලින් මෙන්ම හිටපු පොලිස් පරීක්ෂක ශානි අබේසේකර මහතා ශ්‍රේෂ්ඨාධිකරණයට ඉදිරිපත් කල දිවුරුම් ප්‍රකාශය ඔස්සේ ද ඉදිරිපත් වූ කරුණු ඇතුලත් වන බව දැක්වීය.

දයාන් ජයතිලක මහතා හිරු නාලිකාව සමග පැවැත්වූ සම්මුඛ සාකච්ඡාවේදී රාජපක්ෂ කදවුරෙන් නිතර මතුකරන ප්‍රශ්ණ දෙකක් සම්බන්ධයෙන්ද ඔහු සිය අවධානය යොමුකලේය. එකක් නම්

* "මුස්ලිම් සහරාන් සිංහල බෞද්ධ නායකයෙක් බලයට ගෙන ඒමට ත්‍රස්තවාදී ප්‍රහාරයක් දියත් කරයිද?"

අනෙක නම්

* "යහපාලනය දියාරු වෙලා තිබුනේ, පොහොට්ටුව කොහොමත් දිනන්න හිටියේ එහෙව් එකේ බෝම්බ පුරුවයිද?" යන්නය.

මුල් කාරණය සම්බන්ධයෙන් 1978 දී රතු බ්‍රිගේඩ් නම් කල්ලිය විසින් ඝාතනය කල හිටපු ඉතාලි අගමැතිවරයෙකුවු Aldo Moro ගේ සිද්ධිය උදාහරණයට ගත් ඔහු ඝාතකයන් ඉෂ්ට කලේ කාගේ උවමනාවක් දැයි ඝාතකයන් පවා දැන නොසිටින්නට ඇති බවට තර්ක කලේය.

තවද රනිල් වික්‍රමසිංහ අගමැතිව සිටියදීම මහින්ද රාජපක්ෂව අගමැති කරමින් බිහිකල දින 52කේ ආණ්ඩු සමයේදී ජනාධිපති සිරිසේන පොහොට්ටුවේ අපේක්ෂකයා වශයෙන් මහින්ද රාජපක්ෂගේ සහයෝගයෙන් නැවැත ජනාධිපතිවරණයට ඉදිරිපත් වෙතයි ගෝඨාභය රාජපක්ෂ ජනාධිපති කරවීමේ කටයුත්තේ යෙදී සිටි පිරිසට දැඩි සැකයක් සහ අවිනිශ්චිතතාවයක් පැවැති බව දැක්වීය.

ඔහු දක්වන එම කරුණ ගැන අවධානය යොමුකලහොත්, එවැනි ද්වීඝට්ටණාත්මක අවස්ථාවක් පැවැතියේ නම් පාස්කු ඉරිදා බෝම්බ ප්‍රහාරය එක් අන්තයකට පැහැදිලිවම සිය අභිප්‍රායන් සාක්ෂාත් කරගැනීමට බොහෝසේ දායකවී ඇත. මන්ද යත් පාස්කු ඉරිදා බෝම්බ ප්‍රහාරය නිසා ජනාධිපති සිරිසේනට නැවත ජනාධිපතිවරණයකට ඉදිරිපත්වීමට ඇති හැකියාව නැත්තටම නැතිකර දැම්මා සේම ගෝඨාභය රාජපක්ෂට ජනාධිපතිවරණයට ඉදිරිපත්වීමට වැඩි ඉඩක් විවර කලේය.

ඒ අනුව දයාන් ජයතිලක මහතා මතුකරන පොහොට්ටුවේ අපේක්ෂකයා සම්බන්ධයෙන් මිහින්ද - සිරිසේන දින 52කේ ආණ්ඩු කාලයේ පැවැති අභ්‍යන්තර ආතතිය පිලිබද තොරතුරු චැනල් 4 වැඩසටහන මතුකරන පාස්කු බොම්බ ප්‍රහාරය යනු ගෝඨාභය රාජපක්ෂ ජනාධිපති කරවීමට සිදුකලායි යන්න සනාථ කරන එක්තරා ආකාරයක ඌන පූර්ණකයෙකි.

එකී සම්මුඛ සාකච්ඡාවලින් දින දෙකක් යන්නට මත්තෙන් චමුදිත සමරවික්‍රම ශෙහාන් මාලක සමග පැවැත්වූ සාකච්ඡාවක් විකාශනය විය. එම සම්මුඛ සාකච්ඡාව මූලික වශයෙන්ම නැඹුරු වූයේ චැනල් 4 වැඩසටහනින් ඉදිරිපත් වුවද, නොවූවද, "ඔය මතුවූයේ අපි මෙතෙක් කලක් කිය කියා සිටි කරුණු මයි" යන ශෙහාන් මාලකගේ ප්‍රස්තුථයක් සනාථ කිරීමටය. එම වැඩසටහන පුරාම ශෙහාන් මාලක කිසියම් ආකාරයකින් තහවුරු කිරිමට වෙර දැරුවේ පාස්කු ඉරිදා ප්‍රහාරයේ මහමොළකරු සුරේෂ් සලේ යන්න සම්බන්ධයෙන් ඉදිරිපත් වී ඇති කරුණු දැන් පැහැදිලිවම ඔප්පු වි ඇති බවක් පෙන්වාදීමටය. තවද පසුගිය කාලේ රට තුල සිදුවූ මනුෂ්‍ය ඝාතන රාශියක් පිටුපස හමුදා බුද්ධි අංශයේ පිරිසක් සිටින බව නැවත නැවතත් තහවුරු වෙන වගක් පෙන්වාදීමටද ශෙහාන් මාලක දිගින් දිගටම කරුණු ඉදිරිපත් කලේය. කුරාලයට නැගි කට්ටඩියෙකු සේ ඉස්පාසුවක් නැතිව විවිධ කරුණු, තොරතුරු, චෝදනා, නිගමන, මතවාද, එලඹගැනීම්, උපකල්පන සහ සිතාගැනීම් සියල්ල ශෙහාන් මාලක එක පොදියට කියාගෙන කියාගෙන යන්නට විය. ශෙහාන් මාලකගේ ඉදිරිපත් කිරීම හමුවේ චමුදිත සමරවික්‍රම නිරුත්තර වූවායැයි ඇතමෙකුට පෙනී යන්නට පුලුවන. එහෙත් සියල්ල එලියට දමන්න යැයි කියන්නාක් මෙන් සම්මුඛ සාකච්ඡාව මෙහෙයවූ චමුදිත සමරවික්‍රම ශෙහාන් මාලකට වැඩි බාධාවකින් තොරව ඔහුගේ කතාව කරගෙන යන්නට ඉඩ ලබාදුන්නාද විය හැක. සම්මුඛ සාකච්ඡා මෙහෙයවන්නගේ එවැනි උපාය උපක්‍රම අප හදුනාගත යුතුය. කෙසේවෙතත්, ලද එම ඉඩ තුල ශෙහාන් මාලක සිය සංයමය බිදගත්තා දැයි මට සිතුනි.

චමුදිත සමරවික්‍රම සමග පැවැති එම සාකච්ඡාවේදී ශෙහාන් මාලක විසින් අතුරලියේ රතනසාර හිමියන් කොළඹ අගරදගුරු නිවසට විටින් විට රිංගා කාදිනල්තුමාගේ මොළය හෝදා ගෝඨාභය කදවුරු දෙසට නැඹුරු කරගත් බවට දරුණු චෝදනාවක්ද ඉදිරිපත් කලේය...

අතුරලියේ රතනසාර හාමුදුරුවන් යනු "ගෝඨාභය ඊලග ජනාධිපති කරමු", "ගෝඨාභය ඊලග ජනාධිපති කෙරුවොත් හොදයි නේදැ?" යැයි අසමින් තමාටද මුල පටන් ගෝඨාභය ගැන යෝජනා කරමින් සිටි ගෝඨා කදවුරේ කසකරුවෙක් යැයි දයාන් ජයතිලක මහතා හිරු නාලිකාව සමග පැවති සාකච්ජාවේදීද දක්වා තිබුනි.

එහෙත්, "අතුරලියේ රතනසාර හාමුදුරුවෝ කොළඹ අගරදගුරු නිවසට විටින් විට රිංගා කාදිනල්තුමාගේ මොළය හේදුවේ" යැයි ශෙහාන් මාලක නැගූ බරපතල චෝදනාව සිරිල් ගාමිණී පියතුමා කපිල ගුණරත්න මහතා සමග පැවැත්වූ සාකච්ඡාවේදි මුළුමනින්ම ප්‍රතික්ෂේප කලා පමණක් නොව "ශෙහාන් මාලක එවැන්නක් දන්නේ කෙසේදැයි" සිරිල් ගාමිණී පියතුමා ප්‍රශ්න කලේය.

"ශෙහාන් මාලක දන්නේ කෙසේද?" යන ප්‍රශ්නය සිරිල් ගාමිණී පියතුමාට පමණක් නොව බොහෝ දෙනෙකුට ද ඇති ප්‍රශ්නකි. ශෙහාන් මාලක ඉදිරිපත් කරන කරුණු, තොරතුරු, චෝදනා, නිගමන, මතවාද, එලඹගැනීම්, උපකල්පන සහ සිතාගැනීම් ඔහු දන්නේ කෙසේද? ඔහුට ඒවා කිසිවෙක් විසින් ලබා දුන් දෑ ද? ශෙහාන් මාලක කිසිවෙකු ගේ ආදිසි හස්තයක්ද? කිසිවෙකුගේ බළල් අතක්ද? යනුවෙන් ප්‍රශ්න කරන්නන් අප අතර නැත්තා නොවේ...ඊට ශෙහාන් මාලකගේ පිලිතුර නම් ඔහු මතුකරන දෑ වසර 4 පුරා ඔහු කල අධ්‍යයනයක ප්‍රතිඵලයක් ලෙස සොයාගත් දෑය යන්න ය. එහෙත් ඇතැම් කරුණු හෙලිවී ඇති කාලවකවානුව සමග සැසදීමේදී එකී කරුණු ඔහුට අධ්‍යයනය කිරීමට හැකිවූයේ කුමන මූලාශ්‍ර ඇසුරින් ද යන්න ගැන අවධානය යොමුවීම සහේතුකය.

එහෙත් පාස්කු ඉරිදා ප්‍රහාරයේ සත්‍යය මතුකර ගැනීමටත්, කිසිදු බාධාකයක්, අභියෝගයක් හමුවේ නොපසුබටව වින්දිතයන් වෙනුවෙන් යුක්තිය ඉල්ලීමට නැගී සිටීමටත්, පෙරමුණ ගත්තෙක් ලෙස ශෙහාන් මාලක සොහොයුරාට අපේ ප්‍රණාමය යොමුවිය යුතුමය. ඔහුගේ ආරක්ෂාව වෙනුවෙන් අපි එකපෙළට, එක ලෙසට සිටගත යුතුමය. ඔහුව කිසිසේත්ම අත්නොහැරිය යුතුය. අපි නැතිවූ, මංමුළාවූ බැටළුවන් සොයායන එඩේරෙකුගේ කාර්යභාරයක් ගැන විශ්වාස කරන්නන් බව නැවත නැවත් පසක් කර ගතයුතුමය.

නැවතත් අපි සිරිල් ගාමිණී පියතුමා කපිල ගුණරත්න මහතා සමග පැවැත්වූ සාකච්ඡාව වෙත අවධානය යොමු කලහොත් එම සාකච්ඡාව වු කලී චැනල් 4 නාලිකාව විකාශනය කල වැඩසටහන සම්බන්ධයෙන් කතෝලික සභාවේ ස්ථාවරය ඉතාමත් පැහැදිලිවම ප්‍රකාශයට පත්කළ සම්මුඛ සාකච්ඡාවක් ලෙස දැක්විය හැක.

සිරිල් ගාමිණී පියතුමා ප්‍රකාශ කලේ චැනල් 4 නාලිකාව විකාශනය කල වැඩසටහන තුලින්ද පාස්කු ඉරිදා ප්‍රහාරය ගැන විමර්ශනය කල කොමිෂන් සභා වාර්ථාවලින් මතුකලාක් මෙන් අවධානය යොමුකල යුතු කරුණු රාශියක් නැවත මතුකර ඇති බවයි. එහෙත් එය ජාත්‍යන්තර මාධ්‍ය වාර්තාවක් පමණක් බවත්, මධ්‍ය වාර්තා ඔස්සේ විවිධ කරුණු මතුවිය හැකි වුවත්, එහෙත් තීන්දු තීරණ ගත හැක්කේ ජාත්‍යන්තර වශයෙන් පිලිගත් පරික්ෂණයකින් පමණක් බව කතෝලික සභාවේ ස්ථාවරය යැයි දැක්වීය.

එකී ස්ථාවරය තුල චැනල් 4 නාලිකාව හෝ එම නාලිකාව විකාශනය කල වැඩසටහන මත්තේ එල්ලී සිටීමට වඩා කතෝලික සභාවේ අරමුණ එකී වාර්තා වැඩසටහන තුල මෙන්ම පාස්කු ඉරිදා ප්‍රහාරය ගැන විමර්ශනය කල කොමිෂන් සභා වාර්ථාවලින්ද මතුකල කරුණු ගැන ජාත්‍යන්තර පරීක්ෂණයක අවශ්‍යතාවය මතුකරලීම බව නැවත නැවතත් නිවැරැදිව සනාථ කලේය.

තවද සිරිල් ගාමිණී පියතුමා කපිල ගුණරත්න මහතා සමග පැවැත්වූ සාකච්ඡාවේදී හිටපු ජනාධිපති ගෝඨාභයගේ නිවේදනයේ සදහන්වූ

"අපි පල්ලියේ විවිධ වැඩසටහන් සදහා උදව් උපකාර කලා" යැයි වූ 'කරපුවා කිවීමේ ගතිය' ට උත්තර දෙමින් ප්‍රකාශ කලේ; ගෝඨාභය රාජ්‍යය නායකයා වශයෙන් හෝ රාජ්‍යය නිලධාරීයෙකු වශයෙන් හෝ රටේ ව්‍යවස්ථාවේ සදහන් අන්‍යාගමිකයන්ට ලබා දෙන සහයෝගය ලබා දීම සිදුකලා මිස ඊට වඩා වැඩි යමක් ශ්‍රී ලංකාවේ කතෝලික සභාව ඔහුගෙන් හෝ ශ්‍රී ලංකාවේ රජයෙන් ඉල්ලා සිටියේ හෝ ලබා දුන්නේ හෝ ලැබුනේ නැති බවයි.

සිරිල් ගාමිණී පියතුමා මතු කලේ ඔහු එසේ කලා කියා අපි පාස්කු ඉරිදා ප්‍රහාරය ගැන නිහඩව සිටිය යුතුද? යන්න ය. එය අපේ ක්‍රිස්තියානිකම නොවන බව එතුමා දැක්විය.

තවද හිටපු ජනාධිපති ගෝඨාභය බලයට පැමිණි වහාම එතෙක් පාස්කු ඉරිදා ප්‍රහාරය ගැන විමර්ශනය කරමින් සිටි ශානි අබේසේකරව ඉවත් කිරීම ගැන සදහන් කරමින් දක්වා තිබු "ඔහු (ශානි) ට චෝදනා එල්ලවී තිබූ නිසා ඉවත්කළා" යැයි යන්න නිලන්ත ජයවර්ධනට, දේශබන්දු තෙන්නකෝන්ට, සුරේෂ් සලේට අදාල නොවුයේ මන්ද යන්න විමසූහ. ගෝඨාභය ජනාධිපති වූ වහාම සිදුවූයේ පාස්කු ඉරිදා ප්‍රහාරය ගැන විමර්ශනය කරමින් සිටි ශානි අබේසේකර ඇතුළු තවත් නිලධාරීන් 14 දෙනෙකු ඉන් ඉවත් කිරීමත්, වෙනත් අංශ වෙත මාරුකර හැරීමත් සහ පාස්කු ඉරිදා ප්‍රහාරය ගැන චෝදනා එල්ල වූ නිලන්ත ජයවර්ධන, දේශබන්දු තෙන්නකෝන්, සුරේෂ් සලේ ආදී නිලධාරීන්ට උසස් නිලතල සහ සේවා වර්ධනයන් ලබාදීමය. සිරිල් ගාමිණී පියතුමා කපිල ගුණරත්න මහතා සමග පැවැත්වූ සාකච්ඡාවේදී මේ කරුණු කාරණා මතුකරලිම තුල හිටපු ජනාධිපති ගෝඨාභය රාජපක්ෂ මහතා ඉදිරිපත් කර තිබූ මාධ්‍ය නිවේදනය පුස්ස බින්දා සේ බොරු, හිස් ලියවිල්ලක් සේ හිස් අහසට මුසුවිය.

චැනල් 4 වැඩසටහන "අපේ පවුලට එරෙහිව කුමණ්ත්‍රණයක්" යැයි කියූ සිය පවුලේ පැවැත්ම හැර වෙනත් ලෝකයක්, මානයක් නොදකින නාමල් රාජපක්ෂගේ ප්‍රකාශය ගැන සිරිල් ගාමිණී පියතුමාගේ අවධානය යොමු නොවිම හැර වෙනත් බොහෝ කරුණු කාරණා ගැන සාධාරණ, විශ්වාසනීය ප්‍රවේශයකින් පිලිතුරු සැපයූ වැඩසටහනක් ලෙස සිරිල් ගාමිණී පියතුමා කපිල ගුණරත්න මහතා සමග පැවැත්වූ සාකච්ඡාව දැක්විය හැක.

එම වැඩසටහනෙන් පසු දිනක විකාශනය වූ චමුදිත සමරවික්‍රම කීර්ති රත්නායක සමග පැවැත්වූ සාකච්ඡාව ද මම නැරඹුවේමි. එය නැරඹීමට හේතුවූයේ කීර්ති රත්නායක කාලාන්තරයක් තිස්සේ ලංකා ඊ නිව්ස් මාධ්‍යයට පාස්කු ඉරිදා ප්‍රහාරය ගැන ලියන්නෙක්, පාස්කු ඉරිදා ප්‍රහාරය ගැන මුලින්ම ලිව්වෙක්, අනතුරු ඇගවූවෙක්, අභ්‍යන්තර තොරතුරු හෙලිකල තැනැත්තෙක් ලෙස ඔහු නමක් ගොඩ නගාගෙන තිබූ නිසාය. "සිංහල - මුස්ලිම් ගැටුමක් ඇති කිරීමට ගෝඨාභය සුරේෂ් සලේ නම් හමුදා නිලධාරියෙකු පත් කර ඇතැයි" පාස්කු ඉරිදා ප්‍රහාරය එල්ල වීමට වසර 10කට පෙර සිට ලියූවෙක් වු ඔහු චමුදිත සමරවික්‍රම සමග පැවැති වැඩසටහනේදි දැක්වූයේ සුරේෂ් සලේ යනු පාස්කු ඉරිදා ප්‍රහාරයේ "වාටියක" සිටි නිලධාරීයෙකු මිස මහමොළකරු නොවන බවයි. ඔහුට අනුව මහමොළකරු ඉංදියාවේ සහ සිංගප්පූරුවේ ඔත්තු සේවාවන්‍ ය. රටට අවශ්‍ය වන්නේ ඊශ්‍රායලයේ මොසාඩ් පන්නයේ ඔත්තු සේවාවකි යැයි යන්න ඔහුගේ අදහසය.. ඔහු පෙනී සිටින්නේ ද එවැන්නක් වෙනුවෙන්ය. වර්ගවාදී, ජාතිවාදී, මිලිටරිවාදී රාජ්‍යය යාන්ත්‍රණයක් මිස නිසි පැවැත්මක් ඇති රාජ්‍යයක් ගැන ඔවුන් නොදනී, නොදකී. විවිධාකාරයේ පරස්පර ප්‍රකාශණ, හිතලු, එලඹගැනිම් මෙන්ම ඇතැම් කරුණු කාරණාද ඇතුලත්වූ කීර්ති රත්නායකගේ අරමුණ වන්නේ පාස්කු ඉරිදා ප්‍රහාරය ගැන වූ විමසුම නොමග යැවීමද? වෙනතක යොමු කිරීමද? පඹගාලක පැටලවීමද? කීර්ති රත්නායකලා ඉටුකරමින් සිටින්නේ තවත් බුද්ධි මෙහෙයුමක් ද? අපි ඒ සියල්ල ගැන විමර්ශනශීලිව සිටිය යුතුය.

මෙකී දිගහැරිම් වලින් පසුව පැවති පාඨලී චම්පික රණවක මහතා ගේ මාධ්‍ය සාකච්ඡාවේ හා අනුර කුමාර මහතා බදුල්ලේ පැවැත්වූ රැස්වීමේත් විඩීයෝපට මෙන්ම මාධ්‍ය වාර්තා කෙරෙහිත් අවධානය යොමුකලෙමි.

දෙදෙනාම චැනල් 4 වැඩසටහන ප්‍රස්තූතය කරගනිමින් පැවැත්වූ එම අදහස් දැක්වීමේදී වැඩි අවධානයක් යොමු කලේ රාජපක්ෂවරුන්ගේ විවිධ මගඩි, කුමණ්ත්‍රණ, දුෂණ, ඝාතන, ත්‍රාඩ ජඩ පැවත්ම ආදිය ගැන අවධානය යොමු කිරීමට ය. යුද්ධ ජයග්‍රහණයේ අයිතිය සහ යුද්ධය දිනාදීමට දායක වූ සිය කාර්යභාරය ගැන චම්පික රණවක එම සාකච්ඡාවේදි ද උදම් ඇනූ අතර රාජපක්ෂලා යුද්ධ ජයග්‍රහණය අවභාවිතා කිරීම ගැන ද කරුණු ඉදිරිපත් කලේය. යුද්ධය සම්බන්ධයෙන් ජනතා විමුක්ති පෙරමුණේ දායකත්වය ගැන දැන් ප්‍රසිද්ධියේ කතා නොකරන අනුර කුමාර දිසානායක පාස්කු ප්‍රහාරය ප්‍රස්තුතයවූ බදුල්ලේ රැස්වීමේදී කියා සිටියේ යුද්ධයෙන් පසුවද රාජපක්ෂලාට නැවත යුද්ධයක් අවශ්‍ය වූ බවයි. මුස්ලිම් මෙන්ම සිංහල අන්තවාදී කණ්ඩායම් ඔවුන් එහිලා පෝෂණය කර යොදාගත් බව අනුර කුමාර මහතා දැක්වීය. චම්පික රණවක මෙන්ම අනුර කුමාර ද එහිලා දියත්වූ වැඩපිළිවෙළ ක්‍රමයෙන් සිය කතාවලදී විස්තර කර තිබුණි.

මෙහිදී එක් වැදගත් කරුණාක් පිලිබදව වූ මගේ නිරීක්ෂණයක් ගැන ඔබේ අවධානය යොමුකරමි. එය නම් වව්නතිව් පොලිස් නිලධාරීන් දෙදෙනාගේ ඝාතනය, ඉන් දින කිහිපයකට පසු අවට බෝක්කුවකින් මරාගෙන මැරෙන ඇදුම් කට්ටියක් සොයාගැනිම සහ එකී පරීක්ෂණ අජන්තා නම් පුනරුත්ථාපන වූ LTTE සමාජිකයාගේ නිවස වෙත යොමුවීමය.

චම්පික රණවක වව්නතිව් පොලිස් නිලධාරීන් දෙදෙනාගේ ඝාතනය අවස්ථා කිහිපයකදි මතුකල ද එකී පරීක්ෂණ අජන්තා නම් පුනරුත්ථාපන වූ LTTE සමාජිකයා වෙත යොමුවිම පිලිබදව එතරම් මතු නොකරයි. මීට හේතුව ශ්‍රී ලංකා හමුදා බුද්ධි අංශයේ පිරිසක් බේරා, තවත් පිරිසකට චෝදනා කිරීමට චම්පික රණවකට උවමනාවක් පැවතීමද? අනෙකුත් සෑම තැනකම මෙන්ම ශ්‍රී ලංකා හමුදා බුද්ධි අංශයේ ද තමන්ගේ පිරිසකගේ බලය තහවුරු ගැනීමේ අභිප්‍රායක් චම්පික රණවකට තිබේද? සුරේෂ් සලේව ඉලක්ක කරගැනීමත් එහිම කොටසක් ද? අපි මේ පිලිබදව නොදන්නෙමු. අපි දන්නේ චම්පික රණවක ද කෙක්කෙන් හෝ කොක්කෙන් බලය අත්කරගන්නට දගදරන දේශපාලන ගේම් කාරයෙකු බවය.

චම්පික රණවක මහතාගේ මාධ්‍ය හමුව තුලදි 2018 පලාත් පාලන චන්දය දැවැන්ත ආකාරයට දිනා තිබුනද පොහොට්ටුවට ජනාධිපතිවරණය දිනා ගැනීමට හැකියාවක් නොමැතිවූ බව සංඛ්‍ය දත්ත විශ්ලේෂණය කරමින් දක්වන්නට විය. චම්පික රණවක මහතා ඉදිරිපත් කල කරුණු, සංඛ්‍යා දත්ත ශෙහාන් මාලක ද ඊට පෙර ඉදිරිපත් කර තිබුනි. දෙදෙනාගේම කරුණු ඉතා හොදින් පෑහුණි. ශෙහාන් මාලකව චම්පිකගේ ගොඩට දමන්නට පුලපුලා බලාසිටිය අයට එය ඉනිමං සැපයීමක් බදුවිය. ශෙහාන් මාලක ට කරුණු, තොරතුරු එන්නේ චම්පික රණවකලාගෙන් යැයි කීමට බලාසිටි අයට එය අතටම ලැබුන උඩ පන්දුවක් බදුවිය. එහි ඇත්ත නැත්ත කෙසේවුවද, ශෙහාන් මාලකගේ සහ චම්පික රණවකගේ කරුණු එකට පෑහුනද, චම්පික රණවක ඉදිරිපත් කල සංඛ්‍යා දත්ත විශ්ලේෂණය ශෙහාන් මාලකගේ ඉදිරිපත් කිරීමට වඩා epistemological ඉදිරිපත් කිරීමක් විය.

කෙසේවුවද පාඨලී චම්පික රණවක මහතාගේ මාධ්‍ය සාකච්ඡාවේත්, අනුර කුමාර දිසානායක මහතා බදුල්ලේ පැවැත්වූ රැස්වීමේත් කියවුනු කරුණු වලින් පෙනී ගියේ ඔවුන් පාස්කු ඉරිදා ප්‍රහාරය සම්බන්ධයෙන් ජාත්‍යන්තර පරික්ෂණයක අවශ්‍යතාවය මතුකරන්නේ නැති බවයි. ඒ වෙනුවට ඔවුන්ට අවශ්‍ය පාලන තන්ත්‍රයේ වෙනසක් හෙවත් 'රෙජීම් චේන්ජ්' එකක් කිරීමය. ඔවුන්ගේ පාලනයක් යටතේ නිසි පරීක්ෂණයක් කරන බව ඔවුන් අපිට දෙන ප්‍රතිඥාවයි. එවැනි ප්‍රතිඥාව කීයක් නම් විවිධ දේශපාලකයින් කිතුනුවන්ට ලබාදී ඇත්ද!! ආණ්ඩු මාරුවූ පමණින් පාස්කු ඉරිදා ප්‍රහාරය ගැන සත්‍යය මතුවෙයිද? කුමන ආන්ඩුවක් බලයට පත්වූවද ශ්‍රී ලංකාවේ රාජ්‍යය යාන්ත්‍රණය පිටුපස ඇති වර්ගවාදී, ජාතිවාදී සහ මිලිටරි බලවේග පාස්කු ඉරිදා ප්‍රහාරය ගැන නිසි පරික්ෂණයකට ඉඩදේද? "එයා නැතිනම් මෙයා" පත් කිරීමේ දේශපාලන පොරොන්දු අපිට තවත් අවශ්‍ය නැත. ජාත්‍යන්තර පරික්ෂණයක් මිස ඉන් මෙහා කිසිවක් වෙනුවෙන් අපි පෙනී නොසිටිමු!!

මාකස් ප්‍රියන්ත පෙරේරා

13/09/23

රනිල් මඩු මංගල්‍යයට සහභාගීවීම කතෝලික පල්ලියේ ප්‍රතිපත්තිමය වෙනසක් නිරූපණය කිරීමක්ද?

පසුගිය අගෝස්තු 15 දා මඩු පල්ලියේ පැවැති වාර්ෂික මංගල්‍යයට ජනාධිපති රනිල් වික්‍රමසිංහ ආවනේ.. ඔහු එහිදී කතාවකුත් කලානේ... "රනිල් වික්‍රමසිංහට මඩු මංගල්‍යයට එන්න කිව්වේ කවුද?", "එයාට කතාවක් කරන්න ඉඩ දුන්නේ කවුද?",  "එයා එතන කලේ සම්පුර්ණ දේශපාලන කතාවක් නේද?", "රනිල් වික්‍රමසිංහට හෝ වෙනත් ඕනෑම  දේශපාලකයෙක්ට මංගල්‍යය පුජාව අතරතුර කථා පවත්වන ඉඩදීලා මංගල්‍යය පුජාව දේශපාලන වේදිකාවක් බවට පත්කරගන්න ඉඩ දෙනවද?", "මිනිස්සුන්ගේ සද්ධාවට, භක්තයට සහ ශුද්ධ භූමියට එමගින් හානිවෙනවා නේද?"  ආදි ලෙස ඒ සම්බන්ධයෙන් කිතුනුවන් අතර මතුව ඇති  විරෝධයත්, කතිකාවත් පිළිබඳව මම ඉතා උනන්දුවෙන් බලා සිටියා...

මගේ අදහස නම් රනිල් වික්‍රමසිංහ ජනාධිපතිවරයා මඩු දේවස්ථානයේ ප්‍රධාන වාර්ෂික මංගල්‍යයට සහභාගීවීමත්, එහිදී කතාවක් පැවැත්වීමත් ඉතා වැදගත් සංදිස්ථානයක් සටහන් කරනවා කියන එකයි. 

මම එහෙම කියන්නේ වෙන මොකවත් නිසා නෙමෙයි දැන් බලන්න අර මතුවෙලා තියෙන්න කරුණු: "රනිල් වික්‍රමසිංහට මඩු මංගල්‍යයට එන්න කිව්වේ කවුද?", "එයාට කතාවක් කරන්න ඉඩ දුන්නේ කවුද?"...ඕවා බලද්දීම අපිට තේරෙනවා නේද රනිල් වික්‍රමසිංහ ජනාධිපතිවරයාට අපේ තියෙන විරෝධය. අපි දන්නවා ජනාධිපති රනිල් වික්‍රමසිංහ පත්වෙද්දීම කාදිනල් තුමා ඕමල්පේ සෝභිත හාමුදුරුවෝ එක්ක එකට හිටගනිමින් කිව්වා "අපි රනිල් වික්‍රමසිංහ ජනාධිපතිවරයාව වගේම ඔහුගේ පත්වීමත් පිලිගන්නෙත් නෑ" කියලා. ඔහුට ජනවරමක් නෑ කියලාත් කිව්වා. 

රනිල් වික්‍රමසිංහ ජනාධිපතිවරයා ජනාධිපතිවරණයකින් ජයගෙන පත්වූ ජනාධිපතිවරයෙක් නොවන බව ඇත්ත. ඒත් ඔහු පත්වුනේ දැන් තියෙන ආණ්ඩුක්‍රම ව්‍යවස්ථාවට අනුව. එහෙම පත්වූ ජනාධිපතිවරයෙක් අපි පිලිගන්නේ නෑ කිව්වහම ඒක එක්තරා ආකාරයකින් අපි ආණ්ඩුක්‍රම ව්‍යවස්ථාව පිලිගන්නේ නෑ කියනවා වගේ කතාවක්... මම දන්නේ නෑ කාදිනල් තුමා ඒ ප්‍රකාශය කලේ රදගුරු මණ්ඩලයේ තීරණයක් අනුවද? දේශපාලන දැනුවත්භාවයක් උඩද? නැතිනම් ඕමල්පේ සෝභිත හාමුදුරුවන්ගේ ලණුවක් කාලද කියලා... අනික අපි රනිල් වික්‍රමසිංහගේ ජනවරම ගැන ප්‍රශ්ණ කරනවා නම් එහෙම ප්‍රශ්න කරන්න තිබුනේ ඔහු පැරදිලා ඒත් ජාතික ලැයිස්තුවේ මංත්‍රිවරයෙක් ලෙස දිවුරුම් දීමේ ඉදලමයි. අන්න එහෙම කලා නම් රනිල් වික්‍රමසිංහ ජනාධිපතිවරයා ලෙස පත්වීම අපි පිලිගන්නේ නෑ කියන්න අපිට පැහැදිලි පදනමක් තියෙනවා. 

කොහොමත් අපිට රනිල්ට විරුද්ධ වෙන්න පැහැදිලි කාරණා රාශියක් තියෙනවා. මූලික දේ තමයි පාස්කු ප්‍රහාරය එල්ල වෙද්දී ඔහු තමයි අගමැති. ඔහුට ඒ වෙලාවේ ජාතික ආරක්ෂාව ගැන වගකීමක් තිබුනේ නෑ කියන කාරණය ගැන පදනමක් තියෙන්න පුලුවන්, එහෙත් ඔහු තමයි සිරිසේන ජනාධිපතිවරයා කර අරිද්දී රජයක් විදිහට ජාතික ආරක්ෂාවේ බිදවැටීම නිසා ප්‍රහාරය එල්ලවුනා කියලා වගකීම බාරගත්තේ..අද ඔහු ජනාධිපති ඒත් පාස්කු ප්‍රහාරය ගැන නිසි නීතිමය ක්‍රියාමාර්ග තවම අරගෙන නෑ...පාස්කු ප්‍රහාරය සම්බන්ධයෙන් චෝදනා එල්ලවෙන නිලන්ත ජයවර්ධලා, දේශබන්දු තෙන්නකෝන්ලා, සුරේෂ් සාලි ලා තවම තනතුරුවල ඉන්නවා..රනිල් වික්‍රමසිංහට ඕනේ නම් කියන්න පුලුවන් එයා ජනාධිපතිවරයා වුනාට ආණ්ඩුව පොහොට්ටුවේ නිසා එයාට එහෙම්ම ක්‍රියාමාර්ග ගන්න බෑ කියලා. ඒත් අපි විශ්වාස කරනවද රනිල් වික්‍රමසිංහ එහෙම ක්‍රියාමාර්ග ගනියි කියලා.. නෑ රනිල් වික්‍රමසිංහ ලංකා රාජ්‍යය ආරක්ෂා කරන්නෙක් මිසක් රාජ්‍යය යට ක්‍රියාත්මක වෙන ජාතිවාදී, වර්ගවාද, මිලිටරි, බල දේශපාලන හස්තයන් හෙලිකරන්න, ඒවා එක්ක හැප්පෙන්න යන්නේ නෑ...ඒවා එක්ක හැප්පිලා එයාගේ දේශපාලන න්‍යාය පත්‍රය අවුල් කරගන්න එයා යන්නේ නෑ...ඇත්තම කිව්වොත් එයා විතරක් නෙමේ රාජ්‍යය බලය ගැන උනන්දු ඔය කිසිම සිංහල දේශපාලකයෙක් ශ්‍රී ලංකා රාජ්‍යය යට ක්‍රියාත්මක වෙන, ශ්‍රී ලංකා රාජ්‍යය තුල මුල්බැසගෙන ඇති, ජාතිවාදී, වර්ගවාදී, මිලිටරි, බල දේශපාලන හස්තයන් එක්ක හැප්පෙන්න යන්නේ නෑ...එනිසා තමයි රනිල්ගේ පාලනයක් තුල පවා පාස්කු ප්‍රහාරය ගැන විතරක් නෙමේ අතුරුදන් කල, ඝාතනය කල උතුරේ පියතුමන්ලා, ගිහියන් පිලිබදව විතරක් නෙමේ රෝෂාන් චානක, හලාවත ඇන්ටනී, ලසන්ත වික්‍රමතුංග, ප්‍රදීප් එක්නැල්ගොඩ ආදීන්ට පවා යුක්තිය ඉටුවෙයි කියලා හිතන්න බැරි. 

ඉතින් අපි රනිල් වික්‍රමසිංහව ප්‍රතික්ෂේප කරන්න ඕනේ නේද? ඔහුට විරෝධය දක්වන්න ඕනෑ නේද? ඔව් ඇත්ත. හැබැයි කතෝලික පල්ලිය එහෙම කටයුතු කරන්න යන්නේ නෑ..මොකද එහෙම කටයුතු කරන්න ගිහිල්ලා එගොල්ලන්ට කිසිදෙයක් කරගන්න බෑ විතරක් නෙමේ පවතින්නත් බෑ කියලා ඒගොල්ලෝ දන්නවා... එක තමයි ඒගොල්ලන්ගේ තක්සේරුව... 

එගොල්ලන්ගේ විතරක් නෙමේ ෆාස්‍ටර් ජෙරම්ගේ තක්සේරුවත් එහෙමයි. ඒ නිසා නේ විරෝධාර දිවැසිවරයෙක් වගේ ප්‍රකාශ කරලා දැන් අම්මා-තාත්තව දාලා ඕමල්පේ සෝභිත හාමුදුරුවෝ හරහා කිසියම් පිලිසරණක් හොයන්න හදන්නේ... ඔය කවුරුත් දන්නවා "දෙවියන්ගේ දෙවියන්ටත්, සීසර්ගේ දේ සීසර්ටත්" දෙන්න කියලා ජේසු කිව්වත් ක්‍රිස්තියානි පල්ලියේ බලය තිබ්බ, පල්ලියත් රාජ්‍යයත් එකට බද්ද වෙලා තිබ්බ, මධ්‍යතන යුගය බිදවැටිලා බිහිවුනු නූතන ජාතික රාජ්‍යය තුල දේශපාලනයෙන් තොරව පවතින කිසිවක් නෑ කියලා. දේශපාලනයෙන් තොරව පල්ලිවල මංගල්‍යයක්වත් කරගන්න බෑ කියලා ඒගොල්ලෝ දන්නවා. ඒ නිසා අපි රනිල් වික්‍රමසිංහ ජනාධිපතිවරයාව පිලිගන්නේ නෑ, මාව බලන්න කිසිම දේශපාලකයෙක් එන්න එපා කියන කාදිනල්ගේ තද ස්ථාවරය තුල පල්ලියට දිගටම පවතින්න බෑ කියලා පල්ලිය දන්නවා...ඒ නිසා කාදිනල්ගේ ස්ථාවරය පැත්තකින් තියෙද්දී  කතෝලික සභාව ජනාධිපති රනිල් වික්‍රමසිංහ එක්ක කටයුතු කරන්න තීරණය කරනවා. 

මෙවර මඩු පල්ලියේ වාර්ෂික මංගල්‍යයට රනිල් වික්‍රමසිංහ ජනාධිපතිවරයා පැමිණීම තුල සටහන් කරන්නේ කතෝලික සභාවේ එම ප්‍රතිපත්තිමය වෙනස වෙන්න පුලුවන්. එයා මීට කලින් 2018 දීත් ආවා, ඊටත් පෙර ජනාධිපති ප්‍රේමදාසත් මඩු මංගල්‍යයේ පුජාවට 1982දී ඇවිත් තියෙනවා...

ඒ කොහොම වුනත්, ඇත්තටම රනිල් වික්‍රමසිංහ ජනාධිපතිවරයාට මඩු පල්ලියේ වාර්ෂික මංගල්‍යයට එන්න ආරාධනා කලේ කවුද? අල්‍තාරේ නොවුනත් අල්තාරේ පැත්තකින් ඉදලා හරි කතාවක් කරන්න ඉඩ දුන්නේ කවුද? මන්නාරම රදගුරු එමානුවෙල් ප්‍රනාන්දු ද රනිල්ට ආරාධනා කලේ, රදගුරු සමුළුවේ තීරණයක් අනුවද ආරාධනා කලේ නැතිනම් ශ්‍රී ලංකාවේ වතිකානු තනාපති (අපෝස්තලික නන්සියෝ) බ්‍රයන් උදයිග්වේ ද රනිල් ට ආරාධනා කලේ කියලා අහන,කතෝලික ගිහි ක්‍රියාකාරීන්, ගිහි සංවිධානය ලංකා කතෝලික සභාවෙන් අහන්න ඕනෑ ඒවා නෙමේ... ඒ අය අහන්න ඕනෑ කතෝලික සභාව රනිල් වික්‍රමසිංහ ජනාධිපතිවරයා එක්ක සහයෝගයෙන් වැඩ කරන්න තීරණය කළාද? කියන එකයි...එහෙම නම් ඒ මොන පදනමින්ද? පාස්කු ඉරිදා  ප්‍රහාරට යුක්තිය ඉටුකරගන්න,  සත්‍යය මතුකරගන්න, ඔහු සහයෝගය දෙන්නේ කොහොමද? ස්කොට්ලන් යාඩ් එක සම්බන්ධ කරගන්නවාද? ආදිය තමයි අහන්න ඕනේ..

අනෙක් පැත්තෙන් ශ්‍රී ලංකාවේ වතිකානු තනාපති (අපෝස්තලික නන්සියෝ) බ්‍රයන් උදයිග්වේ එම මංගල්‍යය පුජාවේ සදහන් කල සංහිඳියාව ගොඩනැගීමට ජනාධිපතිවරයා දරණ උත්සාහයට  වතිවානුවේ සහය හිමිවෙනවා කියන එක ගැනත් පැහැදිලි කරගන්න ඕනේ...එහිදී ඔහු  සංහිඳියාව කියලා සදහන් කලේ පල්ලිය සහ ජනාධිපතිවරයා අතර සංහිඳියාවද නැතිනම් ජාතීන් අතර සංහිඳියාවද කියන එකත් පැහැදිලි කරගන්න ඕනේ. මොකද ජනාධිපතිවරයා සංහිඳියාව ගොඩනගවා කියන්නේ 13වෙනි ආණ්ඩුක්‍රම ව්‍යවස්ථාව ක්‍රියාත්මක කිරීම හා එකට එක් කරලා කතා කරන නිසා කතෝලික සභාව 13 ගැනයි මේ කියන්නේ කියලා වෙනත් අර්ථ නිරූපණයන් ඇති වෙන්නත් ඉඩ ඇති නිසා...

ඒවගේම ජනාධිපතිවරයා මඩු පල්ලියේ දේශපාලන කතාවක් කෙරුවා කියන එක ගැනත් කියන්න ඕනේ... දේශපාලකයෝ කරන්නේ දේශපාලන කතා මිසක් වෙන මොනවද? හැබැයි රනිල් එතැන ක්‍රවුඩ් එක, රැස්වෙලා ඉන්න පිරිස, ගැන අදහසකින් තොරවයි කතා කලේ.. ඔහු, ඔහුගේ කතාව තුල මන්නාරමේ සංවර්ධන සැලසුම් ගැන කතා කලේ එතැන ඉන්න වැඩි පිරිසක් මන්නාරමේ ය කියලා හිතන්ද? වන්දනාකරුවන්ට  දුම්රියක් දාන එක තමයි ඔහු වන්දනාකරුවන් ඉලක්ක කරන් සදහන් කලේ... ඇත්තටම රනිල් කතා කලේ එතැන හිටපු පිරිසට වඩා එතැන නැති පිරිසට... මුළු රටටම.. සහ ඉංදියාවට...ඉංදියාවේ අද්වානිලාගේ ආයෝජකයන් විදිහටනේ ඔය මන්නාරමේ සහ පුනරින් බලශක්ති උත්පාදන වැඩසටහන් දියත්වෙන්න යන්නේ...රනිල් ඔහුගේ කතාව තුල ඉංදියාවක් ගැන කිව්වේ නම් නෑ තමයි, නමුත් වැඩපිළිවෙළ ගැන කිව්වා... 

පල්ලි, පංසල්, පාසැල් කියලා නෑ,  රනිල් ඕනෑ තැනක ගිහින් දැන් කියන්නේ එයාගේ වැඩපිළිවෙළ ගැන.. එහෙම කියලා එයා අපෙන් අහන්නේ  මම මේක කරන්න යන්නේ ඔයලා එකතුවෙනවද? නැද්ද? කියන එකයි... මඩු පල්ලියේ දී රනිල් එයාගේ වැඩපිළිවෙළ ඉදිරිපත් කරලා වතිකානුවෙන්, රදගුරු මණ්ඩලයෙන් වගේම රටේ කතෝලියන්ගෙන් ඇහැව්වේත් ඒකයි: "මම මේක කරන්න යන්නේ...ඔය ගොල්ලෝ එකතුවෙනවද? නැද්ද?"

අපිට තියෙන්නේ විසදුම් තුනයි..එක්කෝ රනිල් එක්ක එකතුවෙන්න ඔනේ...නැතිනම් රනිල්ව පන්නන්න ඕනේ..ඒත් රනිල්ව පැන්නුවා කියලා වැඩක් නෑ.. මොකද අර වැඩපිළිවෙළ යනවා..කවුරු ආවත් ඒ වැඩපිළිවෙළ දැන් යනවා.. IMF හරහා, IMF එකෙන් උදව් ගන්නවා කියලා වෙලා තියෙන්නේ ඒක.. අර වැඩපිළිවෙළ ස්ථාපිත වෙන එකයි වෙන්නේ...ඒ නිසා රනිල් එලෙව්වා කියලත් වැඩක් නෑ වැඩපිළිවෙළ දිගටම යයි... ඉතින් ඔය විසදුම් දෙකම වැඩක් නෑ...තුන්වෙනි විසදුම තමයි ඔය වැඩපිළිවෙළ පරාජය කරන්න කටයුතු කරන එක..ඒක ලේසි නෑ.. ඉක්මනින් කරලා ඉවර කරන්නත් බෑ, සංකිරණයි, පුළුල්, සීමාවක් නෑ, ජාත්‍යන්තරයි, ක්ෂේත්‍ර ගණනාවකට විහිදෙනවා..හැබැයි උත්සාහයක් දරන එක, දායක වෙන එක වටිනවා...මොකද ඒකෙන් මුළු මනුෂ්‍ය සංහතියටම,  ලෝක ගෝලයටම අද්විතීය ප්‍රතිඵලයක් ලැබෙනවා, හරියට අර බයිබලයේ සදහන් කරන විමුක්තියේ සුභාරංචිය වගේ!! 

මාකස් ප්‍රියන්ත පෙරේරා 

21/08/23

පල්ලියට හෝ පාලකයින්ට සීමා කල නොහැකිවූ මෙඩ්ජුගෝර්ජේ (Medjugorje) බැතිය!!

බොස්නියාවේ මෙඩ්ජුගෝර්ජේ නොහොත් මෙජගොරේ (Medjugorje) යනු ප්‍රංශයේ ලූර්දු, පෘතුගාලයේ පාතිමා, මෙක්සිකෝවේ ගුවාදලූපේ තරම්ම කිතුණුවන් අතර අති මහත් භක්ති-ආදරයකට ප්‍රාප්තවූ දේවමාතාවන් වහන්සේ දර්ශණය වුයේ යැයි ප්‍රකාශයට පත්වූ සිද්ධස්ථානයන්ය. එහෙත් ලූර්දු, පාතිමා හෝ ගුවදලූපේ මෙන් නොව මෙඩ්ජුගෝර්ජේ /මෙජගොරේ (Medjugorje) දේවමාතා දර්ශණය කතෝලික සභාව තවමත් නිලවශයෙන් සනාථ කිරීමට හෝ පිලිගැනීමකට ලක් කර නොමැත.

දේවමාතාවන් දර්ශණය වූයේ යැයි වාර්තා වූ මෙජගොරේ (Medjugorje) කඳු පෙදෙසට (Apparition Hill) නොයන මෙන් එරට කතෝලිකයන්ගෙන් ඉල්ලා සිටීමට පවා කතෝලික සභාව මුලින්ම පියවරගෙන තිබුනි. කතෝලික සභාව තුල එවැනි දේවමාතා දර්ශණයන් හෝ ප්‍රාතිහාරයන් ගැන දීර්ඝ අධ්‍යනයකින් මිස එක එල්ලේම පිලිගැනීමේ සම්ප්‍රදායක් නොවිනි. ඇරත්, 1980 දශකයේ මුල් කාලය වන විට එවැනි දේවමාතා දර්ශණ ගැන ඉතාලියෙන්, අයර්ලන්තයෙන් සහ තවත් බොහෝ ස්ථානවලින් වාර්තාවන්නට විය. ඒ සියල්ල මෙන්ම මෙඩ්ජුගෝර්ජේ/මෙජගොරේ (Medjugorje) දේවමාතා දර්ශනය ගැන ද අදටත් එවැනි පිලිගැනීමක් කතෝලික සභාව ලබාදී නැත.

කතෝලික සභාවට වඩා දැඩි ස්ථාවරයක් අනුගමනය කළේ එරට පාලකයින්‍ ය. ඔවුහු දේවමාතා වහන්සේ දර්ශණය වූයේ යැයි වාර්තාවූ පද්බ්‍රොදෝ කඳු පෙදෙසට (Padbrodo /Apparition Hill) පොලීසිය සහ හමුදාව යොදා මහජනයාට ඇතුල්වීම තහනම් කරන ලදි. එපමණක් නොව දේවමාතාවන් දර්ශණය වූ දරුවන් හය දෙනාව දැඩි ප්‍රශ්ණ කිරීම්වලට ලක් කිරීම් මෙන්ම ඔවුන්ගේ දෙමාපියන්ව අත් අඩංගුවට ගැනීම් හා විවිධ තාඩන පීඩන එල්ල කිරීමද සිදුකර තිබුනි. එකල බොස්නියා - හර්සගොවීනියාව (Bosnia and Herzegovina) අයත්ව තිබුනේ පැරණි යුගොස්ලෝවියානු සමාජවාදී සමූහාණ්ඩුවටය.

ස්ලොවේනියාව, ක්‍රොයේෂියාව, බොස්නියා - හර්සගොවීනියාව, සර්බියාව, මොන්ට්‍රිනෙග්රෝ සහ උතුරු මැසිඩෝනියාව අයත්ව තිබූ යුගොස්ලෝවියානු සමුහාණ්ඩුව බැද තැබූ බැම්ම වූ එරට හිටපු පාලක මාර්ෂල් ටිටෝ (Josip Broz Tito) 1980 දී මියගියේය. ඒ සමග සර්බියානු සහ කොසෝවෝ ජනයා අතර වාර්ගික ගැටුම්ද මතුවන්නට විය. ක්‍රොයේෂියාව ද ස්වාධීන රාජ්‍යයක් වීමේ අභිලාෂයක් ප්‍රකාශයට පත්කර තිබුනි. දේවමතා දර්ශණය වාර්තාවූ මෙඩ්ජුගෝර්ජේ/මෙජගොරේ (Medjugorje) පිහිටා ඇත්තේ බොස්නියාවේ ක්‍රොයේෂියානු ජනයා බහුල පෙදෙසේය. බොස්නියාව යනු ක්‍රොයේෂියානු, බොස්නියානු සහ සර්බියානු යන ජන කණ්ඩායම් තුනකින් සමන්විත රාජ්‍යයකි. ක්‍රොයේෂියානුවන් කතෝලිකයන්‍ ය, සර්බියානුවන් ඔර්තස්ඩෝක්ස් ක්‍රිස්තියානි ආගම අදහන්නන්‍ ය. බොස්නියානුව ඉස්ලාම් ආගම අදහන්නෝය. මෙකී ත්‍රිවිධ ජාතීන් ජීවත්වූ බොස්නියා - හර්සගොවීනියාවේද 1981 වන විට වාර්ගික ගැටුමක් නිර්මාණයවීමේ ලකුණු ද දැකිය හැකිවිය.

දේවමාතාවන් වහන්සේගේ දර්ශණයක් වාර්තාවෙන්නේ එවැනි පසුබිමකය. ඒ මුලින්ම 1981 ජුනි 24 දී ය. එදින සවස 6:30 ට පමණ, පහළොස් හැවිරිදි ඉවන්කා ඉවන්කොවිච් (Ivanka Ivankovic) සහ දහසය හැවිරිදි මිර්ජානා ඩ්‍රැගිචෙවිච් ( (Mirjana Dragicevic) යන මිතුරියන් දෙදෙනාට අසල වූ, දැන් Apparition Hill නමින් හදුන්වන, පද්බ්‍රොදෝ (padbrodo) කන්ද මත දීප්තිමත් ආලෝකයක් විහිදෙන ලද කාන්තාවකගේ දිලිසෙන චායාවක් දැක ඇත. ඒ දෙසට ඇදුනු ඔවුන් දෙදෙනා ඇය කවුරුන්දැයි විමසූ විට තමන් දේවමාතාවන් බවත්, විශේෂ දූත කාර්යයක් සඳහා ඔවුන්ව තෝරාගෙන ඇති බවත් මරිය මාතාවන් ප්‍රකාශ කර ඇත.

පසුදින ඔවුන් දෙදෙනා 16 හැවිරිදි අයිවන් ඩ්‍රැගිචෙවික් (Ivan Dragicevic), 20 හැවිරිදි ජැකොව් කෝලෝ (Jakov Colo) ද, 13 හැවිරිදි මරිජා පවියෝවිච් (Marija Paviovic) සහ 17 හැවිරිදි විකා ඉවන්කොවිච් (Vicka Ivankovic) යන ඔවුන්ගේ මිතුරු මිතුරියන් 04 දෙනෙකු සමග එම කඳු මුදුනට ගොස් ඇති අතර එදින ද මෙම දරුවන් හය දෙනාටම දේවමාතාවන් දර්ශනය වී ඇත. එම දර්ශනය ගැන ඔවුන් දෙමාපියන්ට සහ ගම්වාසීන් ට දැන්වු අතර ඔවුන්ද එම කන්ද කරා ඇදෙන්නට විය. දිනපතාම ඔවුන් මේ ආකාරයට කන්ද කරා ගමන් කළ අතර ඒ සෑම අවස්ථාවකම ඔවුන් සියලු දෙනාම එකම දර්ශනයක් දුටු බවත් මෙම සෑම දර්ශනයකදී ම දේවමාතාවන් ඉල්ලා සිටියේ නොකඩවා යාච්ඤා කරන ලෙසත්, නිරාහාර ශීලය රකින ලෙසත්, පශ්චාත්තාපී ක්‍රියාවන් වල නිරත වන ලෙසත් බව දැනුම් දුන්නේය.

මේ සිදුවීම් මාලාව වාර්තා වෙන්නේ දෙවන ලෝක යුද්ධ සමයේ නාසි ජර්මනියේ සහය ලැබූ ක්‍රොයේෂියානු වර්ගවාදි Ustaše හමුදා සෝවියට් රුසියාවේ සහය ලැබූ ඔර්තඩොක්ස් සර්බියානු ජාතිකයන් මරා දමා වසර 40 ගතවීමේ සමරුවෙන් දින කිහිපයකට පසුව නිසා මෙඩ්ජුගෝර්ජේ/මෙජගොරේ (Medjugorje) දේවමාතා දර්ශනය ගැන දෙගිඩියාවත්, සැකයත්, ප්‍රශ්න කිරීමත්, දේශපාලන කෝණවලින් බලා විග්‍රහ කිරීමේත් අඩුවක් නොවුනි.

එම නිසාම යුගොස්ලෝවියානු හමුදාවේ, පොලීසියේ සහ දේශපාලන බල අධිකාරියෙන්ද දේවමාතා දර්ශනය වාර්තා කල නවයොවුන් වියේ පසුවූ එම තරුණ තරුණියන්ට සහ ඔවුන්ගේ පවුල්වලට විශාල බලපෑමක් එල්ලවන්නට විය. එම තරුණ දරුවන්ව දැඩි ප්‍රශ්න කිරීම්වලට පමණක් නොව බලහත්කාරයෙන් මනෝ චිකිත්සකයින් වෙත සහ සායනික පරික්ෂණ වෙත නිරන්තරයෙන් යොමු කිරීමත් දිගින් දිගටම සිදුව තිබේ. ඒ සෑම පරික්ෂයකින්ම දේවමාතා දර්ශනය වාර්තා කල දරුවන් හය දෙනා පවසන්නේ සත්‍යයක් බව සහ ඔවුන් පැහැදිලි මනසකින් යුතු දරුවන් බව දිගින් දිගට තහවුරු කර තිබුණි.

එසේ තිබියදීත් කතෝලික සභාව මෙඩ්ජුගෝර්ජේ/මෙජගොරේ (Medjugorje) දේවමාතා දර්ශනය එකහෙලාම පිලිගත්තේ නැත. සභාව කලේ එම ස්ථානයට වන්දනා ගමන් යෑම පවා තහනම් කිරීමය. අඩුම තරමින් මීසම්භාර පියතුමා වු ෆ්‍රැන්සිකන් නිකායේ Father Jozo Zovko පවා මුලින්ම දරුවන් හයදෙනාට දේවමාතාවන් දර්ශනය වූ බව පිලිගත්තේ නැත. එහෙත් ඔහු ඔවුන්ගේ විශ්වාසය තුල දරුවන් පවසන්නේ ඉදුරාම සත්‍යය යැයි ඒත්තු ගත් කල දරුවන් වෙනුවෙන් පමණක් නොව මෙඩ්ජුගෝර්ජේ/මෙජගොරේ (Medjugorje) දේවමාතා දර්ශනය ගැනත් එකහෙලාම සාක්ෂි දරන්නට ඉදිරිපත්විය. පලාතේ මීසම් බාර පියතුමා ලෙස මෙඩ්ජුගෝර්ජේ/මෙජගොරේ (Medjugorje) මීසමේ ප්‍රධාන දේවස්ථානයවූ St. James දේවස්ථානය මෙඩ්ජුගෝර්ජේ දේවමාතාවන් වෙනුවෙන් වූ යැදීමට පැමිණෙන ජනයාගේ ප්‍රධාන සිද්ධස්ථානය ලෙස ඉඩ සලසාදීමටත් කටයුතු කලේය. අද ද මෙඩ්ජුගෝර්ජේ දේවමාතාවන්ගේ පිහිට පතා එන ලක්ෂ සංඛ්‍යාත වන්දනාකරුවන්ගේ මෙම දේවස්ථානයත් අවට භූමියත් පිරී ඉතිරී යයි.

කතෝලික පල්ලිය නිල වශයෙන් පිලිනොගත්තද කිතුනුවන්ගේ දැඩි භක්තියට ප්‍රාප්තවීම නිසාම 2017 මැයි 13 දින ෆ්‍රැන්සිස් ශුද්ධෝත්තම පාප්වහන්සේ විසින් මෙඩ්ජුගෝර්ජේ හී දේවමාතාවන් කෙරෙහි වූ ගැඹුරු යාඥාවන් සිදුවන නිසාත්, ජීවිත වෙනස් වන නිසාත්, ප්‍රාතිහාර්යයන් පවා එහිදී අත්දකින නිසාත්, මෙය මුළුමනින්ම ප්‍රතික්ෂේප නොකළ යුතු, ඒ පිළිබඳව තව තවත් ගැඹුරු අධ්‍යයනයකට කතෝලික සභාව යොමු විය යුතු බව ප්‍රකාශ කලේය. වා‍ර්තාවන ආකාරයට කතෝලික සභාවේ විශේෂ කමිටුවක් විසින් මෙඩ්ජුගෝර්ජේ දේවමාතා දර්ශනය ගැනත්, මෙඩ්ජුගෝර්ජේ දේවමාතා බැතිය ගැනත් එහි සත්‍යය, අසත්‍යතාවයන් පිළිබඳවත් ගැඹුරු අධ්‍යයනයක නිරතව සිටී.

එහි කිසියම් ප්‍රගතියක් පෙන්නුම් කරමින් 1981 මෙඩ්ජුගෝර්ජේ දේවමාතා දර්ශනය වාර්තාවූ කාලයේ සිට කතෝලික සභාව පනවා තිබු එහි වන්දනා ගමන් යෑමේ තහනම 2019 මැයි 12 වෙනි දින ඉවත් කරන ලදි. දැන් මෙඩ්ජුගෝර්ජේ යනු වන්දනා ගමන් යෑමට කතෝලික සභාව නිල වශයෙන් අවසර ලබාදී ඇති ස්ථානයකි. මෙඩ්ජුගෝර්ජේ දේවමාතා දර්ශනය කතෝලික සභාව නිල වශයෙන් පිලිගත්තද, නොගත්තද මෙඩ්ජුගෝර්ජේ හී ප්‍රවර්ධනය කරන්නේද නිල කතෝලික ධර්මය ය. යාච්ඤාව, පශ්චත්තාපය සහ ආපසු හැරීම එහි ප්‍රධාන හරයයි. 1.සෑම දිනකම හදවතින්ම ජපමාලය යාච්ඤා කිරීම. 2. සෑම සතියකම දෙවරක් නිරාහාරව සිටීම. 3.සෑම මසකම පාපොච්චාරණය කිරීම. 4. සෑම ඉරිදාවකම දිව්‍ය පූජාවට යෑම සහ 5. සෑම දිනකම බයිබලය කියවීම මෙඩ්ජුගෝර්ජ්ගේ මූලික ඉගැන්වීම් (The Five Stones of Medjugorje) වශයෙන් ප්‍රකාශිතය. එය මෙඩ්ජුගෝර්ජ් දේමාතා දර්ශනය තුලින් අනාවරණයවූ කරුණු 10 අතරින් ප්‍රකාශයට පත්වූ බවද දැක්වේ. 'සාමයේ මෑණියෝ' ලෙස සලකන මෙඩ්ජුගෝර්ජ්ගේ දේවමාතාවන් වන්දනාවට පැමිණෙන ජනයා අත්දකින අත්දැකීම වෙනම ම අත්දැකීමකි. සුවිශේෂි භක්ති අභ්‍යාසය කි. එහි තරම් හඩා වැටෙමින් යාච්ඤා කරන තරුණ තරුණියන්, පශ්චාත්තාපය හෙවත් කොමිසන් කරන තරුණ තරුණියන් මම වෙන කොහේදීවත් නොදැක්කෙමි. එය එතරම්ම සුවිශේෂී වූ වන්දනා මධ්‍යස්ථානකි. අද ද එහි දිනපතාම පාහේ දේවමාතාවන් දර්ශනය වීම් වාර්තාවේ. 

1981 දී එහි මුලින්ම දේවමාතාවන් දර්ශනය වු දරුවන් 06 දෙනාට වසර ගණනාවක් යනතුරුම දේවමාතාවන් දර්ශනය වී ඇති බවත්, තවමත් ඔවුන්ට දේවමාතාවන්ගේ දර්ශනය වන බවත් ගරු ටෙරන්ස් බෝදියාබදුගේ පියතුමා ලියූ සටහනක දක්වා තිබේ. දැන් වැඩිහිටියන් බවට පත් වී ඇති ඔවුන් පිලිබදව ටෙරන්ස් බෝදියාබදුගේ පියතුමා දක්වා තිබුනේ මේ ආකාරයටය:

1. ඉවන්කා ඉවන්කොවිච් (Ivanka Ivankovic)

මෙම දේව මාතා දර්ශනයන් ලැබූ 6 දෙනා ගෙන් මුලින්ම දේව මෑණියන් දර්ශනය වූයේ ඇයටය. 1985 මැයි 7 තෙක් අයට දිනපතා දේවමාතාවන් දර්ශනය වූ අතර රහස් 10ක් ඇයට ලබාදී ඇත. 1985 මැයි 7 න් පසුව වසරකට වරක් ජූනි මස 25 වන දින දේවමාතාවන් ඇයට දර්ශනය වන බවට පවසා ඇති අතර ඇයට ලබාදී ඇති මූලික දූත කාර්යය වන්නේ පවුල් වෙනුවෙන් යාච්ඤා කිරීමය. දැනට විවාහ වී ඇති ඇය දරුවන් තිදෙනෙකුගේ මවකි.

(2). මිර්ජානා ඩ්‍රැගිචෙවිච් (Mirjana Dragicevic).

1965 මාර්තු 18 උපන්න ඇයද ඉවන්කා මෙන් 1981 ජුනි 24 දේවමාතා වන් දුටු දියණියකි. 1982 දෙසැම්බර් 25 තෙක් දිනපතා දර්ශනයන් ඇයට ලැබුණු අතර, ඇයට ද රහස් 10 ම ලබා දී ඇත. සෑම මසකම 2 දින ඇය දේවමාතාවන් සමග දෙවියන් වහන්සේ විශ්වාස නොකරන අය වෙනුවෙන් යාඥා කරනු ලබන බව කියැවේ. දැනට විවාහ වී සිටින ඇය දරුවන් දෙදෙනෙකුගේ මවක් වන අතර ඇය ලබා ඇති විශේෂ කැඳවීම වන්නේ දෙවියන් වහන්සේ විශ්වාස නොකරන අය වෙනුවෙන් යාච්ඤා කිරීමය.

(3). ජැකොව් කෝලෝ (Jakov Colo)

1961 මාර්තු 06 ඉපදී ඇති ඔහුට 1981 ජූලි 25 තෙක් දේව මාතාවන් දිනපතා දර්ශනය වී ඇත. ඔහුට ද වසරකට වරක් නත්තල් දින දේවමාතාවන් දර්ශනය වන බව පැවසෙන අතර ඔහුව කැඳවා ඇත්තේ රෝගීන් වෙනුවෙන් යාච්ඤා කිරීමට ය. දැනට විවාහ වී සිටින ඔහු දරුවන් තිදෙනකුගේ පියෙකි.

(4). අයිවන් ඩ්‍රැගිචෙවික් (Ivan Dragicevic).

1965 මැයි 25 ඉපදී ඇති ඔහුට තවමත් දිනපතා දේවමාතාවන් දර්ශනය වන බව කියැවේ. ඔහුට රහස් 9ක් ලබා දී ඇත. ඔහුට ලබා දී ඇති විශේෂ කැඳවීම නම් තරුණ දරුවන් සහ ගරු පූජාප්‍රසාදිවරුන් වෙනුවෙන් යාච්ඤා කිරීමය. දැනට විවාහ වී සිටින ඔහු දරුවන් හතර දෙනෙකුගේ පියෙකි.

(5). විකා ඉවන්කොවිච් (Vicka Ivankovic).

1964 සැප්තැම්බර් 9 ඉපදුනු ඇයට තවමත් දිනපතා දේවමාතාවන් දර්ශනය වන බවත් රහස් 9ක් ඇයට ලබාදී ඇති බවත් ප්‍රකාශ වේ. රෝගීන් වෙනුවෙන් විශේෂයෙන්ම යාඥා කරන ලෙස කැඳවා ඇත. ඇය විවාහ වී ඇති අතර දරුවන් දෙදෙනෙකුගේ මවකි.

(6). මරිජා පවියෝවිච් (Marija Paviovic).

1965 අප්‍රේල් 01දා ඉපදුණු ඇයට ද දිනපතා දේවමාතාවන් තවමත් දර්ශනය වන බව කියැවේ. ඇය තුළින් තම මීසමට ද, මුළු ලෝකයටම ද දේවමාතාවන් විශේෂ පණිවුඩ ලබා දෙන බව පැවසේ. රහස් 9ක් ඇයට ලබා දී ඇත. ශුද්ධගිනිස්ථානයේ ඇති ආත්මයන් වෙනුවෙන් යදින්නට විශේෂයෙන්ම ඇයව කැඳවා ඇත. ඇයද විවාහ වී ඇති අතර දරුවන් හතර දෙනෙකුගේ මවකි.

මාකස් ප්‍රියන්ත පෙරේරා

07/08/23

Barbie සහ Oppenheimer පරම්පරා දෙකක යුග වෙනස නිරූපණය කරන සිනමා සමාර්ථයන්ද?

ගිය සතියේ Barbie සහ Oppenheimer චිත්‍රපට දෙකම නැරඹුවේමි. එම චිත්‍රපට දෙක මෑත යුගයේ බිහිවූ විශිෂ්ටතම චිත්‍රපට දෙක දැයි මම නොදන්නෙමි. එහෙත් මෑත කාලයකදී මම බැලූ විශිෂ්ටතම චිත්‍රපටි කිහිපයෙන් දෙකක් යැයි පැහැදිලිවම කිව හැක.

Barbie බොළද ළමා චිත්‍රපටයක් යැයි කිසිවෙකු ඒ නම ඇසූ පමණින්ම සිතනු ඇත. එහෙත් එය වැරදිය. එහි හරය, සන්දර්භය, පමණක් නොව නිර්මාණයක් ලෙසද Barbie සිත් ඇදගන්නා සුළු, එක් වයස් කාණ්ඩයකට පමණක් සීමා නොවූ විශිෂ්ට නවීන සිනමා නිර්මාණයකි. ජනප්‍රිය Barbie බෝනික්කෙකුට ජීවය ලබාදෙමින් දිගහැරෙන එම චිත්‍රපටය ක්‍රමයෙන් ජීවිතයේ ගැඹුරු සහ සංකීර්ණත්වය කරා ගමන් කරයි. මල් මල් Barbie බෝනික්කෙකුගේ සරල චරිතයක් ඔස්සේ ප්‍රේක්ෂකයාව එවැනි මානයක් දෙස චිත්‍රපටයේ අධ්‍යක්ෂිකාව වන Greta Gerwig ගෙන යනුයේ කෘතිමව නොවේ. එය දිගහැරෙනුයේ සරල සුන්දර බාර්බිගේ අලංකාරයට සහ චමත්කාරයට කිසිදු හානියකින් සිදුනොවන ආකාරයටය. චමත්කාරත්වයත්, බුද්ධියේ සාරයත්, දෝෂ රහිතව ග්‍රහණය කරමින් දිගහැරෙන Barbie චරිතයට පණ පොවමින් Margot Robbie මෙන්ම කෙවින්ගේ චරිතයට පණ පොවන Ryan Gosling ගේ රංගනයන් Barbie චිත්‍රපටයට ජීවය ගෙන එන්නේ සම්පූර්ණයෙන්ම අව්‍යාජවය. කිසිදු අයාසයකින්ද තොරවය. සින්තටික් චරිතවල සිට එදිනෙදා ජීවිතයේ යථාර්තයන් යථාවත්කරන වපසරියකින්, ෆැන්ටසිමය සිහින ලෝකවල් හා එදිනෙදා ජීවිතයේ දුක්දොම්නස් සියුම්ව හුවාලන ඔවුන්ගේ චරිත නිරූපණයන් චිත්‍රපටයේ පරිනිර්මාණයට උපරිම සාධාරත්වයක් එක් කරන අතර චිත්‍රපටියේ ආශ්වාදය සහ එහි සරල සින්තටික් ස්වරූප උපරිම ඉහලකින් ඔසවා තබයි චිත්‍රපටි අධ්‍යක්ෂිකාවක් ලෙස Greta Gerwig මෙතෙක් පිරිමින් රජකල චිත්‍රපට අධ්‍යක්ෂකවරුන් ගේ ලෝකයට හසුනොවූ වෙනම ම ස්ත්‍රීමය/කාන්තාමය (feminine) පැතිකඩක් සිනමා ලෝකයට ඇතුල් කරමින් සිටින්නේදැයි සිතෙන තරමට Barbie චිත්‍රපටය විශිෂ්ට ලෙස නිර්මාණය වී ඇති බව මගේ හැගීමයි.

අනෙක් අතට Christopher Nolan අධ්‍යක්ෂණය කල Oppenheimer චිත්‍රපටය අප ජීවත්වන අවධානම් සහගත නිරව් යුද්ධයේ නිර්මාපකයා වූ පරමාණු බොම්බයේ පියා (father of the atomic bomb) ලෙස සැලකෙන ජර්මානු - යුදෙව් ඇමරිකානු - භෞතික විද්‍යාඥයෙකු වූ J. Robert Oppenheimer ගේ ජීවින චරිතයකරා රැගෙන යැයි. වමාංශිකයෙකු, කොමියුනිස්ට් පක්ෂ හිතවතෙකු, ස්ත්‍රී ලෝලියෙකු, ස්පාඤ්ඤ සිවිල් යුද්ධය මෙන්ම යුරෝපයේ යුදෙව් ජනයාගේ සමුල ඝාතනයන් ගැනද මැදිහත්ව කටයුතු කරන, විශිෂ්ටතම ශිෂ්‍යයෙකු නොවුනද එම යුගයේ ප්‍රකට භෞතික විද්‍යාඥයන්ගේ අවධානයට ප්‍රාප්තවූ කැපී පෙනෙන භෞතික විද්‍යාඥයෙකුවූ J. Robert Oppenheimer ඇමැරිකාවේ න්‍යෂ්ටික බෝම්බ වැඩසටහනේ (Manhattan Project) ප්‍රධානියා ලෙස කටයුතු කිරීමත්, ඒ හා මෙන්ම ඉන් අභ්‍යන්තරයේ සහ ඊට පරිබාහිරවත් දිග හැරෙන ක්‍රියා දාමයන් එකට කැටි කොට ගැනීම අතින් Christopher Nolan ගේ Oppenheimer චිත්‍රපටය දක්වන සාමාර්ථද සුළු පටු නොවේ.

Oppenheimer යනු එකී සියළු සිදුවීම් චිත්‍රපටි‍යක් තුල ඒකාබද්ධ කරමින් දිගහැරෙන අපූර්ව සිනමා චිත්‍රනයකි. එක් එක් ක්‍රියාදාම‍යන් රූපරාමු වශයෙන් ගලපමින් ද, සංගීත සහ ශ්‍රව්‍ය සූක්ෂම ලෙස මිශ්‍රණය කරමින් ද, අභ්‍යන්තර කතාව සහ එලිපිට කතාව ලෙස කළු-සුදු සහ වර්ණ රෑප රාමු වෙනසක් නොපෙන්වන ආකාරයට දර්ශන තලයන් වශයෙන් මුසු කරමින් ද Christopher Nolan අධ්‍යක්ෂකවරයා ප්‍රේක්ෂකයාට ලබාදෙන්නේ අද්විතීය සිනමා අත්දැකීමකි. පරමාණු අණුවක, ඉලෙක්ට්‍රෝන ධාරාවක, විද්‍යුත් පරිපථයක ගමන් කරන කුමක් දෝ විදුලි ආලෝකයක චිත්තවේගයන් සහ ඇඩ්‍රිනලින් ක්‍රියාකාරිත්වයන් උද්දීපනය කරමින් Robert Oppenheimer ගේ ජීවන චරිතයට පණගන්වමින් Cillian Murphy දක්වන චරිත නිරූපනය අති විශිෂ්ටය. හුස්ම ඉහල පහල යන හෘද ස්පන්දන ක්‍රියාවලියක අනුපිළිවෙලවල් වල සිට දුම්වැටියක, නුරාවක, මධුවිතක මැදි වෙන Robert Oppenheimer ගේ බුද්ධිමය සහ මානුෂික හැගීම් මනාව සංකලනය වන අයුරු දක්වන Cillian Murphy රංග නිරූපණය ඔහු මෙතෙක් රගපෑ Peaky Blinders ටෙලි නාට්‍යය මාලාවේ Tommy Shelby ගේ චරිතයෙන් පසු ඔහු නිරූපණය කල විශිෂ්ටතම රංගනය බවට කිසිදු සැකයක් නැත. Cillian Murphy ව සෑම අතින්ම Robert Oppenheimer ට සමාන කරලීමට වේෂ නිරූපණ ශිල්පීන් ප්‍රදර්ශනය කර ඇති නිර්මාණාත්මක කාර්භාරයද ඇගයීමට ලක්විය යුතුමය. ඒ සෑම අතකින්ම ගත්කළ Oppenheimer චිත්‍රපටය යනු සැබවින් අද්විතීය සිනමා නිර්මාණයකි.

Oppenheimer චිත්‍රපටයට වඩා සම්පූර්ණයෙන් වෙනස් මගක ගමන් කල සිනමා නිර්මාණයක් වුවද Barbie ද එවැනිම විශිෂ්ඨ සිනමා නිර්මාණකි. මෙම චිත්‍රපට දෙකේම විශිෂ්ත්ව‍ය කෙතක්දයත් චිත්‍රපටි දෙකම එකිනෙකට නොදැවෙනි තරගයකින් සියළු ආදයම් වාර්තා බිද දමමින් සිටී. සිනමා ශාලා අතුරු සිදුරු නැතිව පුරවාලමින් සිටී. සියළු Box office වාර්තා අළුත් කරමින් සිටී. මේ ගෙවීයන්නේ කෝව්ඩ් වසංගතයෙන් පසුව පමණක් නොව දශක කිහිපයකට පසුව වුවද සිනමාවට උදාවූ හොදම කාලයකි.

මගේ අදහසේ හැටියට නම් මෙම චිත්‍රපටි දෙක පරම්පරා දෙකක අභිලාෂයන්, චෛතසිකයන් වෙන්වෙන්ව නිරූපණය කරන සංක්‍රාන්තියම වශයෙන් පරම්පරා දෙකක යුග වෙනස නිරූපණනය කරන සංකේතාත්මකව වැදගත් කලා නිර්මාණන්ය. Oppenheimer අපේ පරම්පාවේ හැගීම් දැනිම්, බල - කාමයන්, අභිප්‍රේරණයන්, නිරූපණය කරන්නේ නම් Barbie යනු Generation Z සහ Generation Alpha ලෙස හදුන්වන 1980 පසු උපන් පරම්පරාවල ශාරිරික, මානසික, සමාජ, සංස්කෘතික සහ සංවේදී සීමා මායිම් ආමන්ත්‍රණය කරන නිර්මාණය යන්ය. අපි ඒ ගැන තව තවත් කතා කල යුතුය.

මාකස් ප්‍රියන්ත පෙරේරා

21/07/23

බ්‍රිතාන්‍යයන්ගේ ගෞරවාදරයට ප්‍රාප්තවූ ජෝර්ජ් අලගායා නම් නිහතමානී මිනිසා

BBC ප්‍රවෘත්ති සේවයේ සවස හයට ප්‍රවෘත්ති කියූ ජෝර්ජ් අලගායා (George Alagiah) නික්ම ගොසිනි. වසර 10කට ආසන්න කාලයක් පිලිකා රෝගයකින් පීඩා විදි ඒ මහතා මට අවස්ථා කිහිපයකදීම මුණ ගැසී ඇත. ඔහු පමණක් නොව ඔහුගේ පවුලේ අයවද මම කාලයක් තිස්සේ දන්නා හදුනමි. 

ජෝර්ජ්ට පෙර මට මුණ ගැසුනේ ඔහුගේ පියා සහ සහොදරියන් ය. ඒ 2001 තරම් ඈත කාලයේදීය. ඩොනල්ඩ් අලගායා (Donald Alagiah) වු ජෝර්ජ් ගේ පියාට මාව හදුන්වා දුන්නේ  Samuel Durham නම් මාගේ මිතුරෙකි. ඔහු මාව ඩොනල්ඩ් අලගායා ට හදුන්වා දුන්නේ මෑතකදී  ලංකාවේන් පැමිණි ශිෂ්‍යයෙකු ලෙසිනි. ඔවුන් ජීවත්වුයේ අප ජීවත්වන ප්‍රදේශයට තදාසන්න ප්‍රදේශයකය. අපි දේශපාලන විද්‍යා ධාරාවෙන් අධ්‍යයනය හැදෑරුවන් නිසා ජොර්ජ් ගේ පියාවූ ඩොනල්ඩ් අලගායා (Donald Alagiah) කෙලින්ම කතාවට බැස්සේ රටේ දේශපාලන තත්වය ගැන විමසමිනි. ඒ අපි ලංකාවේ සිට ආ අළුතමය. අපේ දේශපාලන විග්‍රහයන් සහ භාවිතය ගැන මා හදුනාගත් මුල් දිනයේ සිටම ඔහුට කිසියම් පැහැදීමක් තිබුනි. 

ඔහු සිංහල භාෂාව රාජ්‍යය භාෂාව කිරීමත් සමගම ලංකාව පිලිබදවු බලාපොරොත්තු අත්හැර වෙනත් රටවල රැකියා සොයා ගිය, බටහිර අප්‍රිකාවේ (ඝානාවේ) කාලයක් ජිවත්වී, සිය දරු පවුල සමග බ්‍රිතාන්‍යයේ පදිංචියට පැමිණියෙකි. ඔහු බ්‍රිතාන්‍යයට පැමිණෙනවිට සිය ජීවිතයේ තරුණ කාලයත් පසුකර අවසන්ය. අප ඔහු හදුනාගන්නා විටත් ඔහු වයවෘද්ධය. ඒ වනවිට ඔහුගේ බිරිද මිය ගොස් තිබිනි. එහෙත් සිය දියණියන් 4 දෙනාගේ සහ පුතාගේ ආදරය සහ අනුහස හොදින් ලබමින් ඔහු සතුටින් ජීවත්විය. ජොර්ජ්ගේ පියා, ඩොනල්ඩ්, මා හමුවූ හැමවිටම, දිගින් දිගටම, ලංකාවේ යුද්ධය, නිමක් නැති මනුෂ්‍යය ඝාතන, අතුරුදහන්වීම් සහ වදහිංසා ගැනත්, වර්ගවාදී දේශපාලනය ගැනත්  දීර්ඝ වශයෙන් අදහස් බෙදාගත් තැනැත්තෙකි. ඒ සෑම විටම ඔහු කැටව ආ දියණියන් ඔහුගේ අදහස් දැක්වීම ඉවර කරන්නට ඉඩදී බලාසිටියහ. එලෙස හමුවූ බොහෝ අවස්ථාවල ඔවුන් දැක්වුයේ "let me introduce you to my son/our brother" යනුවෙනි. 

කලකට පසු ඒ අවස්ථාව උදාවුනි. ඩොනල්ඩ් සහ ඔහුගේ දියණියන් වරක් මට ඔහුව, ජෝර්ජ් අලගායා (George Alagiah) ව, හදුන්වා දුනි. ඉන් අනතුරුවත් මට ඔහු කිහිප අවස්ථාවකම හමුවිනි. ඩොනල්ඩ් (පියා) ට මෙන් නොව ජෝර්ජ් (පුතා) ට ලංකාව ගැන තද බැදීමක් නොවිනි. අලගායා පවුල ලංකාවෙන් පිටත්ව යන විට ජොර්ජ් අවුරුදු 06ක ළමයෙකු විය. ඔහුට ලංකාව ගැන එතරම් ගැබුරු මතකයක් නොවුනි. එහෙත් සුනාමි ව්‍යාසනය සිදුවූ සමයේ BBC වාර්තකරුවෙකු ලෙස ඔහුගේ පියාගේ පියාගේ (සීයාගේ) නිවස පිහිටි ලංකාවේ නැගෙනහිර ප්‍රදේශයට ගොස් තිබුනි. සුනාමියට ඔවුන්ගේ නෑ පරම්පරාවේ කිහිපදෙනෙකුම බිලිවී සියාගේ නිවසේ ලිඳ පමණක් ඉතුරුවී සෙසු සියල්ල විනාශවී ගොස් තිබුනි. සුනාමිය, යුද්ධය ගැන ඔහු තරමක් කතා කලද. ඔහුට ලංකාව සම්බන්ධයෙන් තිබූ බැදීම සීමා සහිතය යන්න මගේ හැගීමයි. 

ඔහුට ලංකාවට වඩා අප්‍රිකාව ගැන විශේෂ උනන්දුවක් , අවධානයක් සහ ලැදියාවක් තිබුනි. ඒ ඔහු සිය පාසැල් දිවියේ මුල්ම කොටස එහි ගතකර තිබීම නිසාත්, සිය මාධ්‍යවේදී  දිවිය ආරම්භ කරන්නේ BBC යේ අප්‍රිකානු වර්තාකරුවෙකු ලෙස වීමත් එයට හේතුවන්නට ඇත. ඔහු සෑම අතින්ම වෘත්තියවේදියෙකු (professional) ලෙස කටයුතු කරන බවක් පෙනුනි. බ්‍රිතාන්‍යයේ එලිසබෙත් රැජිනගේන් OBE (Order of the British Empire) සම්මානය ලැබීමට තරම් ඔහුගේ එකී වෘත්තිය භාවය හේතුවිය. ඔහුගේ සමාජ සම්බන්ධතාවල ස්වරූපයත් ඒ ආකාර විය. භාෂාව භාවිතයේදි මෙන්ම හැසිරීමේද ඔහු දැක්වූයේ එවැනි ස්වරූපයකි.  ඔහු මුලින්ම ලියූ 'A Passage To Africa' පොත මට ඔහුගේ සොහොයුරියකගෙන් ලැබුනි. එම කෘතියේ භාෂාව මෙන්ම ස්වභාවයද ඇමැරිකාවේ හිටපු ජනාධිපති Barack Obama ලියූ 'Dreams from My Father' කෘතියට සමාන යැයි මට හිතේ. ජෝර්ජ් අලගායා (George Alagiah) ද බැරැක් ඔබාමා  (Barack Obama) මෙන් ලෝකයක් දිනාගත්තෙක් යැයි මට සිතේ. 

ඔවුන් දෙදෙනාම එම සමාජයන්වලට ඉතා හොදින් අනුගතවූ, එම සමාජවල කොටසකරුවන් වූවන් විය. ඒ දෙදෙනාටම එකී සාමාජයන් තුල හොදින් අනුගත්වීමට ඔවුන්ගේ අධ්‍යයනය මෙන්ම ඔවුන්ගේ ක්‍රිස්තියානි  සංස්කෘතියද එක සේ හේතුවිය. එය කෙතෙක් දුරට ඔවුන්ගේ අනන්‍යතාවය සමග බැදී තිබුනේදැයි කිවහොත් BBC ය ජෝර්ජ් අලගායා (George Alagiah) ගේ මරණය ගැන දන්වමින් පලකල නිල නිවේදනයේ දැක්වූයේ ඔහු ශ්‍රී ලංකාවේ දෙමළ ක්‍රිස්තියානුවකු (a Tamil Christian) ලෙසය.

 Your soul lives on in the people you touched - RIP George!!

මාකස් ප්‍රියන්ත පෙරේරා

 25/07/23

 

ව්‍යාපාරිකයෙකු සාර්ථකත්වය ඩෙල්මා තේ මෙරිල් ගෙන් මනිමුද?

ඩෙල්මා (Dilmah) තේ නිර්මාතෘ මෙරිල් ජේ ප්‍රනාන්දු (Merrill Joseph Fernando) මහතා අවුරුදු 93 ක් දිවිගෙවා මියගිය පුවත දුටුවෙමි. ඔහු සාර්ථක තේ සන්නාහ නාමයක නිර්මාතෘවරයෙකු වගේම සාර්ථක ව්‍යාපාරකයෙක් ලෙසද ලංකාවේ මෙන්ම පිටරටත් නමක් දිනා සිටි අයෙක්. ඔහු අපේ ගමේ, මීගමුවේ (පල්ලන්සේනේ), උපන්, මීගමුව මාරිස්ටෙලා විදුහලෙන් සහ කොළඹ,මරදාන, සා. ජෝශප් විදුහලෙන් සිප්සතර හැදෑරූවෙක්. ධීවර කර්මාන්තයට, සංචාරක කර්මාන්තයට ප්‍රකට, කලාකරුවන් බුරුතු පිටින් බිහිවෙන මීගමුවෙන් වතු වගාකරුවන්, තේ වතු පාලකයින් බිහිවෙන්නේ ඉතා කලාතුරකින්. එහෙත් එහෙම බිහිවුණු කාලයකුත් තිබුනා. ඒ ලංදේසී සහ බ්‍රිතාන්‍යය යටත් විජිත පාලන යුගයේදී. පහතරට වැවිලි කරුවන්ගේ සංගමයේ ප්‍රබලයෙක්වූ, මීගමුවට දුම්රිය ගෙන ඒමට දැඩිව මැදිහත් වූ, ඩී කෲස් (de Croos) ලා, පල්ලන්චේන වතු සමාගම අයත්ව තිබු ලියෝ පෝල් (Leo Paul) ලා, දකුණු පලාතෙන් මීගමුවට සංක්‍රමණය වී විශාල ඉඩම් හිමි ව්‍යාපාරිකයන් වූ A. E. රාජපක්ෂලා ඩේවිඩ් මෙන්ඩිස්ලා, මිරැන්ඩෝ ලා, බන්දුල මුදලාලිලා ආදීන් එහෙම බිහිවූ වැවිලිකරුවන් කිහිපදෙනෙක්.

මෙරිල් ජේ ප්‍රනාන්දු මහතා එහෙම පසුබිමකින් නිර්මාණය වන්නෙක් නෙමේ. ඔහුගේ පියා බ්‍රිතාන්‍යය යුගයේදී කොම්පැනියක පරිපාලන නිලධාරියෙක් ලෙස සේවය කල, ඉහල මධ්‍යම පාන්තික, බ්‍රිතාන්‍යය සම්ප්‍රදායට ගොඩනැගූනු භක්තිමත් කතෝලිකයෙක්. මෙරිල් ජේ ප්‍රනාන්දු මහතා ඉංග්‍රීසි අධ්‍යාපනයක් ලැබූ , දැඩි විනයකින් සහ කතෝලික පසු බිමකින් ගොඩනැගූනු බව නිතර දැක්වුවෙක්. එහෙත් ඔහු වතු කර්මාන්තයට පිවිසෙන්නේ ඔහුගේ පියාගේ අභාෂයකින් නොවේ. ඔහුගේ පාසැල් මිතුරෙකුවු, ආර් තොණ්ඩමන් ගේ ඥාති සහෝදරයකුවූ මාධවන් නැමැති යාළුවෙකුගේ ගේ ඇසුරෙන්. මාධවන් සමග නිවාඩුවට පූඩළුඔය තොන්ඩමන්ලාගේ තේ වතුවල කාලය ගත කිරීමට යෑමේ ප්‍රතිඵලයක් විදිහට තමයි ඔහු තේ කර්මාන්තය පැත්තට යොමුවන්නේ.

මුලින්ම ඔහු ඩාලි බට්ලර් සමාගමේ Tea Taster කෙනෙක් ලෙස පුහුණුව ලබා පසුව ලංකාවේ එවකට ක්‍රියාත්මක වු A.F ජොන්ස් ලාගේ තේ වතුවල කලමනාකාරුවෙක් ලෙස තේ කර්මාන්තයට යොමුවන්නෙක්. ඒ අයගේ (A.F ජොන්ස් ලාගේ) මැදිහත්වීමෙන්, ඔහුගේ පෞද්ගලික මුදලින් බ්‍රිතාන්‍යයට ගොස් තේ කර්මාන්තය ගැන වැඩි විස්තර හදාරන්නට මෙරිල් ජේ ප්‍රනාන්දු මහත්තයා යොමුවී තියෙනවා. විශේෂයෙන්ම ලංඩන් තේ වෙළද පොලේ ක්‍රියාකාරීත්වයත් එහි කාලෙන් කාලේට විවිධ තේ වර්ග වෙනුවෙන් ඇතිවෙන ඉල්ලුමේ උච්චාවචනයන් ගැනත් හොද අවබෝධයක් ලැබූ බව ඔහු පුවත්පතකට ලබා දුන් සම්මුඛ සාකච්ඡාවක දක්වා තිබුනා.

තමන්ගේම, ‘මෙරිල් ජේ. ෆර්නැන්ඩු කම්පනි ලිමිටඩ්’ නමින් කොම්පැනියක් පටන් අරන් ඔහු මුලින්ම තේ පිටරට යවන්නේ 1962 දී පමණ කාලයක සිටයි. ඔහුගේ 'පියෝ සිලෝන් ටී.' ගෙනියන්න "රුසියාවෙන් අහස් යාත්‍රා අරන් දෙපාරක් ම ආවා" යැයි ඔහු තවත් පුවත්පතකට ලබා දුන් interview එකක දක්වා තිබුනා. තේ වතු ජනසතු කිරීම යටතේ ඔහුගේ තේ ඉඩම් අක්කර 320 ක් එවකට පැවැති සිරිමාවෝ බණ්ඩාරනායකගේ රජය විසින් පවරා ගැනීම ගැන ඔහු දැඩි කනගාටුවකින් අවස්ථා කිහිපයකදීම කතා කර තිබුනා. ඔහු උපයාගත් මුදලින් මිලදී ගත් එකී තේ වතු රජයට පවරාගෙන ක්‍රමයෙන් විනාශවී යෑම ගැන ඔහුගේ කනගාටුව තේරුම් ගත හැක්කක්. ඉතිරිවූ තේ වතුවලින් ඔහු මහා පරිමාණයෙන් තේ නිෂ්පාදනය කරනු වෙනුවට ‘value added’ තේ කර්මාන්තය රටට හදුන්වා දෙමින් ඉදිරියට පැමිණෙනවා. 1988 දී ඔහුගේ ඩිල්මා තේ සන්නාහ නාමය බිහිකරන්නේ ඒ ක්‍රියාදාමයේ ප්‍රතිඵලයක් ලෙසයි. එතැන් සිට ‘මෙරිල් ජේ. ෆර්නැන්ඩු' යනු රටක් ලෝකයක් දන්නා ඩෙල්මා (Dilmah) තේ නිර්මාතෘ නමින් චිර ප්‍රසිද්ධ පුද්ගලයෙක් බවට ඔහු පත්වෙනවා.

මෙරිල් ජේ. ෆර්නැන්ඩු මහතාගේ මරණයත් සමග ඔහු වතුකම්කරුවන් ගේ ජීවන තත්වය දියුණු කිරීමට මොනවද කලේ, ඔහු රටේ තේ කර්මාන්තය වෙනුවෙන් මොනවාද කලේ.., ඔහු Ethical Trader කෙනෙක්ද? මීගමුව දියුණු කිරීමට යමක් කල කෙනෙක්ද? ආදී ප්‍රශ්න මතු කරනවා දැක්කා. ඔහු 'Tea School' යනුවෙන් තේ කර්මාන්තය ගැන පාසැල් කල බවත්, ලංකාවේ තේ වල ගුණත්වය රැකගැනීමට දැඩිව හඩ නැගුවෙක් බවත්, ඔහුට අයත් වෙලෝනා වතු යායේ කොටසක තේ වතුකම්කරුවන්ට නිවාස සංකීර්ණයක් තනා දුන් බවත්, වතු කම්කරුවන්ගේ අධ්‍යාපන වෙනුවෙන් අරමුදල් ලබා දුන් බවත්, අංගවිකල සහ ඩවුන් සින්ඩ්‍ර්ම් රෝගයෙන් පීඩාවට පත්, විශේෂ අවශ්‍යතා සහිත වතු කම්කරුවන්ගේ දරුවන් වෙනුවෙන් විශේෂ පාසැලක් වතුකරයේ ආරම්භ කලබවත් කියවෙනවා. ඒවා කෙතරම් ප්‍රමාණවත් ද යන්න වෙනම ගැටලුවක්..

ඒත් මම අර අදහසට කැමැතියි; ඒ කියන්නේ අපි ව්‍යාපාරයෙකුගේ සාර්ථකත්වය මනින්න ඕනේ ඔහුගේ ව්‍යාපාරයේ සාර්ථකත්වය තුලින්ම විතරක් නෙමේ, ඔහු සමාජයට ලබාදුන් දායකත්වය කුමක්ද? උපයාගත් ධනය,බලය, සමාජය ගොඩනැගීමට කෙතෙක් භාවිතා කලාද කියන කාරණය මතයි. එය ඩෙල්මා (Dilmah) තේ නිර්මාතෘ මෙරිල් ජේ. ෆර්නැන්ඩු මහතාට විතරක් නෙමේ සියලුම ව්‍යාපාරිකයින්ව, ධනවතුන් ව මැනීමට භාවිතා කල යුතු මිනුම්දණ්ඩක්...

මාකස් ප්‍රියන්ත පෙරේරා

22/07/23

මිලාන් කුන්දෙරාගේ සාහිත්‍යය ධ‍්‍රැව ගතවූ චෛතසිකයන් ප්‍රකෘතිමත් වීමට ගත් උත්සාහයක් ද?

මිලාන් කුන්දෙරා (Milan kundera) ගැන බොහෝ දෙනෙක් ලියා තියෙනවා දැක්කා. ඔහුගේ මරණය ගැන ශෝකය පලකර තිබෙනවා දැක්කා. කොලරා කාලේ ආලේ (Love in the time of Cholera) ලියු ගබ්රියෙල් මාර්කේස් (Gabriel Márquez) වගේ මිලාන් කුන්දෙරා ( Milan kundera) වත් ලංකාවේ සාහිත්‍යයකාමීන් හදුනාගෙන තිබුනේ පරිවර්තන සාහිත්‍යය තුලිනුයි. ඔවුන් විශිෂ්ඨ නවකතා කරුවෙක් බව ඇත්ත. ඔවුන් රචිත වාක්‍යය තුල ඇති රිද්මයානුකූල බව පාඨකයාව බදා වැලද ගන්නා සුළු, තියුනු, ආකර්ශණීය රචනා ශෛලයකින් යුක්ත බව ඇත්ත.

එහෙත් ගබ්රියෙල් මාර්කේස් (Gabriel Márquez) සත්‍යය ලෝකය තුල හිමිකරගෙන තිබු ප්‍රබවය මිලාන් කුන්දෙරා ( Milan kundera)ටත් හිමිවෙනවද යන්න සැක සහිතයි. මිලාන් කුන්දෙරා ( Milan kundera) ට එරෙහිව ගොනුවෙන සාහිත්‍යය මෙන්ම දේශපාලන විවේචන ඒතරමට තියුණුයි. ගැබුරුයි. බැහැර කළ නොහැකියි.

මුලික වශයෙන් එම විවේචන එල්ල වෙන්නේ මිලාන් කුන්දෙරා ( Milan kundera) යනු කිසියම් ආකාරයක දෘෂ්ටිවාදයක් නැති ලේඛකයෙක් යන පදනම්න්. සාහිත්‍යයකරුවෙකු යනු දෘෂ්ටිවාදයක්, අදහසක්, මතයක් ඉදිරිපත් කරන්නෙක්ම වෙන්න ඕනෑ නෑ කියන, සාහිත්‍යය සාහිත්‍යය සදහාම ය, කලාව කලාව සදහාම විය යුතුයි විශ්වාස කරණ ගුරුකුල තුලත් මිලාන් කුන්දෙරා ( Milan kundera) ගේ සාහිත්‍යය රචනා ඒ කාරණයමද? කියා ප්‍රශ්ණ කරන්නන් විශාල වශයෙන් සිටින බව මේ දවස්වල ඔහු සම්බන්ධයෙන් පලවී ඇති විවිධ මරණානුස්මරණ ලේඛන (obituary) කියවද්දි පෙනීයන්නක්. විශේෂයෙන්ම ඔහුගේ The Joke (1967), Life Is Elsewhere (1969), The Book of Laughter and Forgetting (1979), The Unbearable Lightness of Being (1984), Immortality (1988), Slowness (1995), Identity (1998), Ignorance (2000), The Festival of Insignificance (2014) ආදි කෘති දක්වමින් අදහස් ඉදිරිපත් කරන්නන් දක්වන්නේ ඔහුගේ නිර්මාණ සමහරක් දේශපාලන අභිලාෂයන් සහිත සහ සමහරක් දේශපාලන අභිලාෂයන්වලින් තොර, කිසියම් ආකාරයක රික්තකයක වරින් වර දෝලන වී අවසාන වශයෙන් අදේශපාලනික අස්ථානයකට සේන්දුවූ බවයි.

ඇත්තවශයෙන්ම, ඔහුගේ ජීවිතයත් ඒ වගේමය. මුලින්ම චෙක්/චෙකොස්ලොවැකියානු කොමියුනිස්ට් පක්ෂයේ ප්‍රබල ක්‍රියාකාරිකයෙකුවු ඔහු පසුව පක්ෂයේ සාධනීය විවේචකයෙකු ලෙසත්, පසුව චෙකොස්ලොවැකියානු කොමියුනිස්ට් පක්ෂයේ දැඩි අභ්‍යන්තර සහයකයෙකු ලෙසත්, පසුව පක්ෂයෙන් මෙන්ම රටිනුත් පන්නා දමන්නෙකු බවටත් පත්වුවෙක්. එම කාලය තුල ඔහු නාසි විරෝධියෙකු ලෙසත්, හිට්ලර් විරෝධී එහෙත් රැසියාවේ ස්ටැන්ලිට පක්ෂ, ස්ටැලින්වාදී චෙකොස්ලොවැකියානු කොමියුනිස්ට් රජයක් හදන්න ස්ටැන්ලින්ගේ රුසියාව සමග එක කදවුරේ එකට සටන් කරන්නෙකු බවටත්, චෙකොස්ලොවැකියානු කුමන්ත්‍රණ කාලයේ චෙකොස්ලොවැකියාව රැසියාව අක්‍රමණය කිරීමට විරුද්ධ ක්‍රියාකාරිකයෙකු බවටත්, පසුව ප්‍රංශයේ සරණාගතයෙකු බවටත්, අනතුරුව දේශපාලනයෙන් වියුක්ත වූවෙක්, ස්වයං ආන්තික හුදකලාවූවෙක් බවටත් පත් වෙනවා..

ඔහු සිය ජීවිතයේ ලගාවූ අන්තය ඔහුගේ නවකතා ඇසුරෙනුත් සාකච්ඡා කල හැකි බව ඔහු සම්බන්ධව ලියවී ඇති මරණානුස්මරණ ලේඛන (obituary) විමසද්දී පෙනී යන්නක්. ඔහු නවකතාකරුවෙක් ලෙස ඕනෑම දැක්මක්, ප්‍රඥාවක්, තනතුරක්, දේශපාලනයක්, ඕනෑම ආගමක්, දෘෂ්ටිවාදයක්,සදාචාරාත්මක මූලධර්මයක්, කණ්ඩායමක්, අනන්‍යතාවයක් සමග එක පෙලට එකට හිට ගන්නෙක් නොවේ.. සාහිත්‍යය කරුවෙකු ලෙස නවකතාව තුල සෞන්දර්යාත්මක උටෝපියාවන් සොයා යන්නෙකුත් නොවෙයි. අඩුම තරමින් පුද්ගල සංවේදීතාවයන් නියෝජනය කරන්නෙකු වත් නොවන බව කියවෙනවා. එසේ නම් ඔහු කවරෙක්ද? ඔහුගේ සාහිත්‍යය නිර්මාණ කවරාකාරද? ඔහු සාහිත්‍යය ලිවීමට වෙහෙසෙන්නේ ඇයි? මේ රටවල කෙසේවෙතත් ඔය කාරණා ගැන ලංකාවේ නම් විශාල වශයෙන් අවධානය යොමුනොවනු ඇති. එහෙත් ඔහුගේ පොත් තව තවත් පරිවර්තනය වනු ඇත. පාඨකයන් ඔහුව තව තවත් වැලදගනු ඇත.

එහෙත් ඔවුන් වැලද ගන්නේ කුමක්ද? මිලාන් කුන්දෙරා ( Milan kundera) ගේ සාහිත්‍යය නිර්මාණ යනු මොනවාද? ඔවුන් ඒ ගැන ප්‍රශ්න කරුණු ඇද්ද? රුසියානු ව්ප්ලවීය සාහිත්‍යයේ මහා ගත්කතුවරයකු වු මැක්සිම් ගොර්කි (Maxim Gorky) ලෙනින්ගේ සෝවියට් රුසියාව තුල ද්‍රෝහියෙකු ලෙස සැලකූ ලෙසම චෙකොස්ලොවැකියානු කොමියුනිස්ට් ආණ්ඩුව මිලාන් කුන්දෙරා (Milan kundera) කොමියුනිස්ට්

චෙකොස්ලොවැකියාවේ ද්‍රෝහියෙකු ලෙස සැලකුවේ ඇයි යන්න සලකා ගැන බලයිද? වාමවාදී දෘෂ්ටිවාදීයෙකුවු කුන්දේරාව ප්‍රංශයේ ධනේශ්වර - ප්‍රජාතන්ත්‍රවාදී ලෝකය තුල දරාගත නොහැකි සැහැල්ලුවක පත් කලේ කෙසේද? කුන්දිරා යනු වම - දකුණ, බටහිර - නැගෙනහිර, ධනවාදය - සමාජවාදය ලෙස බෙදී ගිය සීත යුද්ධ සමයේ ධ‍්‍රැව ගතවූ චෛතසිකයන් ගේ ප්‍රකාශණයක්ද? කුන්දිරාගේ සාහිත්‍යය යනු එකී ධ‍්‍රැව ගතවූ චෛතසිකයන් ගේ ප්‍රකෘතිමත් වීමේ උත්සාහයක් ද? මිලාන් කුන්දෙරා (Milan kundera) ව අපි එලෙස කියවන්නේ කවදා ද?

මාකස් ප්‍රියන්ත පෙරේරා

14/07/23

ඔස්වල්ඩ් ෆර්ත් (නිමනි) පියතුමාගේ මරණය ගැන කම්පාවූවෙමි

Rest In Peace Fr. Oswald Firth!! ගරු ඔස්වල්ඩ් ෆර්ත් (නිමනි) පියතුමා ස්වර්ගස්ථවූ බව දැන කම්පාවූවෙමි. කම්පාවුයේ වෙන කිසිවක් නිසා නොව ගෙවී ගිය පහුගිය වසර 20ක කාලය තුල එක් දිනකදීවත් මට එතුමාව දැක බලාගැනිමට යෑමට නොහැකිවු නිසාය...

මට එතුමාව අවසාන වශයෙන් හමුවූයේ 2001 දී විය යුතුය. ඒ හොංකොං නුවර සිට පැමිණෙද්දී ආසියානු මානව හිමිකම් කොමිසමේ ප්‍රධානි බැසිල් ප්‍රනාන්දු මහතා ලබාදුන් පොතක් එතුමාට ලබාදීමට යෑමේදීය. මම ඊට පෙර පටන් ඔස්වල්ඩ් ෆර්ත් පියතුමාව දැන උන්නෙමි. ඒ එතුමා ශ්‍රී ලංකා කතෝලික රදගුරු සමුළුවේ සමාජ සත්කාරක කාර්‍ය්ංශය ලෙස සලකන සෙඩෙක් (SEDEC) ආයතනයේ ජාතික අධ්‍යක්ෂ ලෙස කටයුතු කරමින් සිටි අවදියේ සිටය.

'ඇමරිකන් හඩ' ව්‍යාපෘතිය නිසා හලාවත ඉරණවිල ග්‍රාමයේ ජනතාවගේ ඉඩම් අහිමිවීමට එරෙහිව එතුමා ප්‍රමුඛ සෙඩෙක් (SEDEC) ආයතනය දැඩිව මැදිහත් වි කටයුතු කලේය. අපි එතුමා ප්‍රමුඛ එම කණඩායම් සමග ඉතා සමීපව කටයුතු කළෙමු. වගකීම් දරමින්, කැපවීමෙන්, අප්‍රතිහත ධෛර්යෙන් යුතුව කටයුතු කළෙමු. ඉන් පසුව එතුමා මරදාන සමාජ සාමයික කේන්ද්‍රයේ අධ්‍යක්ෂ ලෙස කටයුතු කරද්දී ද එතුමා සමග විවිධ කටයුතු වලට සම්බන්ධව කටයුතු කළේය.

එතුමා මාව තරුණ ක්‍රියාධරයන් සදහා පිදෙන 'රීබොක්' මානව හිමිකම් සම්මානය (Reebok Human Rights Awards) සදහා නිර්දේශ යෝජනා කලේය. එවැනි ජාත්‍යන්තර සම්මානයක් සදහා නිර්දේශ යෝජනා කරමින් ඉදිරිපත් කල ලිපිය පාසැලේ ප්‍රධාන ශිෂ්‍ය නායකයා වශයෙන් පාසැලෙන් සමුගැනීමේ දී ලබාදෙන ලිපියෙන් පසුව එවකට මා ලද හොදම ඇගැයුමය.

ඉන් අනතුරුව විශ්ව විද්‍යාලවලින් ලද විවිධ උපාධි සහතික, වාර්තා සහ ඇගැයුම් සටහන් නිසා ගරු ඔස්වල්ඩ් ෆර්ත් (නිමනි) පියතුමා Reebok සම්මානය සදහා මා ඉදිරිපත් කරමින් ලබාදුන් සටහන මගේ ලිපිගොනුවල යටට තල්ලුවී ගියද එතුමාගේ මරණය ගැන අසා මම නැවත එය කියවු විට මහත් කම්පාවක් දැනුනි. කෙනෙකු ඇගයීමට එතරම් නොපැකිලෙන කෙනෙක් ෆාදර් ෆර්ත් තරම් තවත් නැති තරම්‍ ය. කම්පාවට කරුණ නම් පහුගිය වසර 20ටම මම ඔහුව හමුවීමට ගොස් නැත.

පසුගිය වසර 20 තුල මම ලංකාවට හය-හත් වතාවකට වඩා ගොස් තිබුනද ඒ එකවතාවක් හෝ එතුමා නේවාසික පියතුමෙක් ලෙස නතරවී සිටි මට්ටක්කුලිය 'ද මැසනඩ්' නිවාස වෙත යාමට නොහැකි විය. 2004 සිට 2010 දක්වා එතුමා රෝමයේ සිටි කාලය තුලදී කිහිපවතාවක්ම රෝමයට ආවගියද එතුමා හමුවීමට එහිදී හෝ යෑමට නොහැකිවිය... ඊටත් වඩා ගිය වසරේ දිනක ශෙහාන් මාලක සොයුරා ෆර්ත් පියතුමා හමුවීමට ගොස් එතුමාගේ සුවදුක් විමසා එතුමා සමග සිට මට එවු ජයාරූපය දුටු විගස "ඊලග පාරේදී ලංකාවට ගියහම අනිවාර්යෙන්ම ෆාදර් ෆර්ත්ව බලන්න යනවා" යැයි සිතාගත්තද මේ වසරේ ලංකාවට ගියවිටද මට එය කිරීමට නොහැකිවිය; ආත්මය කැමැතිය එහෙත් ශරීරය දුර්වල"!😥

ගරු ඔස්වල්ඩ් ෆර්ත් (නිමනි) පියතුමාට මොක් සුව අත්වේවා!!❤️❤️❤️

මාකස් ප්‍රියන්ත පෙරේරා

19/06/23

පුරාවිද්‍යා දෙපාර්තමේන්තුව අතකොලුවක්ද?

දැන් ඔය පුරාවිද්‍යා අධ්‍යක්ෂක ජෙනරාල් අනුර මනතුංග මහාචාර්යවරයා ඉල්ලා අස්වීමට තුඩුදුන්නා යැයි කියන ජනාධිපති රනිල් වික්‍රමසිංහ, උතුරු-නැගෙනහිර දෙමළ සංධානයේ මංත්‍රිවරු සහ රාජ්‍ය නිලධාරින් අතර වු සාකච්ඡාවට අදාල වීඩියෝපට කිහිපයක්ම ලැබුවා...

ඒවා බලපුවහම මට පෙනීගිය කරුණු කිහිපයක් තිබුනා...

ඒ කරුණු රනිල් වික්‍රමසිංහ ජනාධිපතිවරයා; අනුර මනතුංග මහාචාර්යවරයා වගේ උගතෙක් ගෙන් "මට ඉතිහාසය උගන්වන්න එනවද?" වගේ රනිල්ගේ උඩගු, අහංකාර, දරදඩු ප්‍රකාශණ... /පුරාවිද්‍යා දෙපාර්තමේන්තුවේ උගත් බුද්ධිමත් නිලධාරින්ටත් වඩා රනිල් ඉතිහාසය දන්නවාද?.../දෙමළ සංවිධානය රනිල් ලව්වා ඒයාලගේ උවමනාවන් ඉෂ්ටකර ගන්න හදනවද?.../ "රනිල් නිකන් අර කුරාලයට නැග ගත් යකදුරා වගේ නේද?" වගේ කතාවලට වඩා අවධානය යොමු කරණ සුළුයි.

මම නිරීක්ෂණය කරපු එක කරුණක් තමයි ලංකාවේ පුරාවිද්‍යා දෙපාර්තමේන්තුව තමන් සතු බලතල පාවිච්චි කරලා අක්කර සිය ගණනින් පවරා ගන්නවා පුරාවිද්‍යාත්ම රක්ෂිත ප්‍රදේශය කියලා නම් කරලා. එහෙම ඉඩම් පවරා ගද්දි ඒ ඉඩම්වල පරම්පරා ගණනාවක් වගාකරන්, ගෙවල් දොරවල් හදාගෙන ජීවත්වු මිනිස්සුන්ට යන එන මං නැතිවෙනවා...ඒ සම්බන්ධයෙන් නිසි ක්‍රියාපටිපාටියක් තියෙන බවක් පෙන්නේ නෑ...එහෙම තියෙනවා නම් දෙමළ සංධානය හෝ වෙනත් අයෙකුට පුරාවිද්‍යා දෙපාර්තමේන්තුවේ වැඩනිසා ඉඩම් අහිමිවුනා කියලා ප්‍රශ්නයක් ඇතිවෙන්න ඉඩක් නෑ..

එහෙම පුරාවිද්‍යාවට පවරගත්ත ඉඩම් 'නැගෙනහිර කාර්‍යසාධක බලමණ්ඩලය' හරි මොකක් හෝ වෙනත් නමක් හෝ දාගෙන නැවැත එම ගොවීන්ට වගා කරන්න සල්ලිවලට බදු දෙනවා කියලා එම සාකච්ඡාවේදී කියවුනා... එහෙම බදු දෙන හෝ බදු දෙන්න ගිය භික්ෂූන් වහන්සේ නමගේ නමකුත් කියවුනා... අර පරම්පරා ගාණක් වගාකර කර හිටිය මනුෂ්‍යයාගේ ඉඩම පවරාගෙන "වගා කරන්න ඕනේ නම් බද්දට ගනින්" කියන එක කොච්චර සාධාරණද? ඇරැත් එක කරන්නේ බෞද්ධ භික්ෂූවක්. පුරාවිද්‍යා දෙපාර්තමේන්තුව වත් රජයේ අමාත්‍යාංශයක්වත් නෙමේ. එහෙම බදු දිලා ලබාගන්න ආදයම් යන්නේ රජයටද? නැතිනම් පුද්ගලයන් හෝ පෞද්ගලික ආයතනය වලටද? ඒ ගැන පැහැදිලි විස්තරයක් නෑ. ඒ දෙවැනි කරුණ.

තුන්වන කාරණය තමයි රටේ පුරාවිද්‍යාත්මක කැනීම් සහ සංරක්ෂණය සදහා පෞද්ගලික මුදල්/ආධාර/ප්‍රදාන/ප්‍රතිපාදන යොදා ගන්නවා කියන එක...දැන් බලපුවහම පුරා විද්‍යා වැඩවලට වැඩියෙන් මුදල් යොදවලා තියෙන්නේ බෞද්ධ භික්ෂූන්, බෞද්ධ සංවිධාන, ඒ බෞද්ධ සංවිධානය පිටරටවලින්/පිටරටවල වෙසෙන ලංකිකයන්ගෙන් (ඩයස්පෝරාවෙන්) පවා මුදල් එකතුකරගෙන තියෙනවා. කුරින්දිමලේ පුරාවිද්‍යා කැනීම් කරලා පැරණි බෞද්ධ විහාරයක් සොයාගෙන එය නැවත ගොඩනගන්න රුපියල් මිලියන 15 කට වඩා 'බෞද්ධාලෝක පදනම' කියලා සංවිධානයක් වියදම් කරලා තියෙනවා. පාර්ලිමේන්තු මංත්‍රි තිලංග සුමතිපාලගේ සහෝදරයා ජගත් සුමතිපාල එහි නායකයෙක්. උතුරු-නැගෙනහිර විතරක් නෙමේ රටපුරාම පුරාවිද්‍යා කැනීම් වලට විවිධ බෞද්ධ භික්ෂූන්/ බෞද්ධ සංවිධාන පුරාවිද්‍යා දෙපාර්තුමේන්තුව එක්ක විවිධ ව්‍යාපෘති දියත් කරලා තියෙනවා... ඒ ඒ ව්‍යාපෘති සදහා පුරාවිද්‍යා දෙපාර්තමේන්තුව සතු සම්පත් සහ නිලධාරින් යෙදෙවොත් රටේ අනෙක් පුරාවිද්‍යාත්ම වටිනාකම් ඇති තැන් සංරක්ෂණය වෙන්නේ කොහොමද? ජාතික උරුමය කියන්නේ ඒවා විතරක්ද? පුරාවිද්‍යා දෙපාර්තමේන්තුව ඉන්නේ එක් එක්කෙනාගේ ව්‍යාපෘති ක්‍රියාත්මක කරන්නද? ඔහොම බැලුවහම පේනවා නේද මීගමුව පෘතුගීසි-ලංදේසී කොටුව සංරක්ෂණය කරලා දෙන්න කියලා අපි කොච්චර ඉල්ලුවත් ඒක හරියටම නොවෙන්නේ ඇයි කියලා..

හතරවන කාරණය තමයි ජනාධිපති රනිල් වික්‍රමසිංහ සමග සාකච්ඡාවේදී පුරාවිද්‍යා අධ්‍යක්ෂක ජෙනරාල් මහාචාර්යවරයා අනුර මනතුංග මහතා දක්වපු ප්‍රතිචාරවල ඇති දුර්වල කම. එක පැත්තකින් හොදට පෙනුන දෙයක් තමයි මහාචාර්ය අනුර මනතුංග මහතා ඔය සාකච්ඡාවට ඇවිත් තිබුනේ කිසිම සුදානමකින් තොරවයි කියන එක. ඒ නිසා තමයි අර ඉස්සර කුඩා යාත්‍රා වලින් තිරියායේ (ත්‍රිකුණාමලය) ඉදන් හොරොව්පතානට, එතැනින් අනුරාධපුරයට, එතැනින් මල්වතු ඔය හරහා මන්නාරමට යාත්‍රා කරන්න පුලුවන්.. නැගෙනහිර මූහුද ඉදන් බටහිර මුහුදට පිවිසෙන්න ජල මාර්ග පද්ධතියක් තිබුනා... පැරණි අඩුවියදම් ලයිට් හවුස් එකක් තිබුනා, වෙලද ආදිපත්‍යයක් තිබූ තපස්සු - භල්ලුකලා ඉදිකලා කියන ගිරිහඩු සෑය... අනුරාධපුරේ මහා විහාරයට ඉඩම් අක්කර කොච්චර තිබ්බද? මහා විහාරයටයි, ජේතවනාරාමයටයි අක්කර දාහක්වත් තිබුන්නේ නැහැ කියලා රනිල් කියාගෙන කියාගෙන යද්දි මහාචාර්ය අනුර මනතුංග කොරවෙන්නේ...

පුරාවිද්‍යා අධ්‍යක්ෂක ජෙනරාල් මහාචාර්ය අනුර මනතුංග වගේ නෙමේ ජනාධිපති රනිල් ඔය සාකච්ඡාවට ආවේම ඉතා හොදට සුදානම් වෙලා..හොදට කරුණු හදාරලා..ඊට මුහුණදීමට තරම් සුදානමක් ඇතිව නෙමේ මහාචාර්යවරයෙක් වුනත් අනුර මනතුංග මහත්තයා පැමිණෙන්නේ...රනිල් සමග හරි හරියට කරුණු ඉදිරිපත් කරන්න ඔහු අපොහොසත් වෙනවා..රනිල් ඉස්සරපිට ඔහු ඉතා කුඩා වෙනවා..රනිල්ගේ මුෂ්ටි පහරවලින් මුනින්තලා වැටෙනවා. දෙමළ සංධානයත් කොරවෙනවා. ඔය පුරාවිද්‍යාවේවත්, අනෙක් දෙපාර්තමේන්තුවකවත් එකෙක් හිටියේ නෑ නේ කියන්න "මේ සර් ඕක ඔහොම නෙමේ...මෙහෙමයි ඉතිහාස අධ්‍යානවල ලියවෙලා තියෙන්නේ"... කියන්න... ඇයි අපි රනිල්ගේ බයිලම විතරද අහන්න ඕනේ... ඕනෑ තැනට එහෙම කතාකරන්න කොන්දක් අපේ මිනිස්සුන්ට නෑ...අපේ අධ්‍යාපනෙත් එහෙම උගන්වලා නෑ...එතන යටහත්පහත්ව ඉදලා ගෙදර ඇවිත් ඉල්ලා අස්සෙනවා.. පස්සේ මාධ්‍ය සාකච්ඡාවකුත් තියයිද මන්දා..

අනෙක් කාරණය තමයි රනිල්ට ගහන්න ආපහු රට/ජාතිය/ආගම/සම්බුද්ධ සාසනය පෙරට ගන්න එක. ජෙරමි ප්‍රනාන්දුගේ සිද්ධියේ ඉදන් නටාෂාගේ සිද්ධිය දක්වාත් දැන් කුදිරමලේ ඉඩම් හෝ උතුරු-නැගෙනහිර ඉඩම් හෝ දෙමළ සංවිධානයේ ඉල්ලිම් දක්වා හෝ දිවයන්නේ අර පරණ සටන් පාඨ ටිකම තමයි. රනිල්ට ගහන්න රට/ජාතිය/ආගම ගේන්න ඕනේ නෑ..රටේ මිනිස්සු විදින දුකම ගන්න..මොන තරම් උග්‍ර ජීවන අරගලයකද ඒ මිනිස්සු ඉන්නේ.. ඔය රට/ජාතිය/ආගම මුල්කරගත් ජාතිවාදී වර්ගවාදී උත්සාහයන් වලට උඩගෙඩි දෙන්න එපා...එවට අහුවෙෙන්නත් එපා. "මේ යකාව පරද්දන ඕනෑ යකෙක් එක්ක එකතුවෙනවා" කියන පරණ ඔලමොට්ටල වැඩේට ආපහු සෙට්වෙන්න එපා.. එහෙම ගේන එක එක යකා එක්ක ඔට්ටුවෙවී ඉන්නවා මිසක් ලෙඩා ගොඩදාගන්න විදිහක් නෑ... අපි ඒක හොයමු.. උතුරේද, දකුණේ ද, සිංහල ද දෙමළ ද නෙමේ මිනිස්සුගේ ප්‍රශ්න වෙනුවෙන් පෙනී සිටිමු... ඒ වෙනුවෙන් පෙලගැසෙමු!!

මාකස් ප්‍රියන්ත පෙරේරා

13/06/23

Tina Turner මීගමුවට Set වීම

මීගමුව කාමාච්චෝඩේ රා තැබෑරුම අසල තිබුන නඩරාජා ටෝකීෂ් හෙවත් කිංග්ස් සිනමා ශාලාවේ චිත්‍රපටි පෙන්වන්න කලින් චිත්‍රපටි ශාලාවේ සෙනග අසුන් ගන්නා අතර තුර ශාලාව කුල්මත් කරමින් නිතර වාදනය වෙන ගීත එකතුවක්  තිබුනා. ඒ ගීත එකතුවේ තිබුනේ එක ගීත ඇල්බමයකට (album) අයත් ගීත නෙමේ. නමුත් එක් ගායිකාවකට අයත් ගීත එකතුවක්. ගායිකාව තමයි Tina Turner. 

නඩරාජා ටෝකීෂ් හෙවත් මීගමුව කිංග්ස් සිනමා ශාලාවේ වාදනය වුනු Tina Turner ගේ ගී එකතුවට 1990 ගණන්වල අලුතින් නිකුත්වු ඇගේ I Don't Wanna Fight, Simply The Best, We Don’t Need Another Hero, What's Love Got to Do with It, වගේම ඇය Ike Turner එක්ක නිර්මාණය කල Proud Mary, Nutbush City Limits වගේ ගීතත්, ඇය Ike Turner ගෙන් වෙන් වෙලා තනියම performed කරන්න ගත්ත 1980 ගණන්වලින් පසු ගැයූ Private Dancer, Better Be Good to Me, Steamy Windows වගේ ගීතත් තිබුනා.  මීගමුව කිංග්ස් සිනමා ශාලාවේ වාදනය වුනු එම ගී එකතුව පිටු පස පැහැදිලිවම Tina Turner ගේ දැඩි රසිකයෙක් ඉන්න ඇති. එම රසිකයා Tina Turner ගේ music career එක මුල ඉදලා අගට follow කල තැනැත්තෙක් බවට කිසිම සැකයක් නෑ. අපිට ඒ සිංදු එකතුව තුබූ කැසට් එක අයිති කාටද, එම රසිකයා කවුද කියලා හොයන්න වුවමනාවක් තිබුනේ නෑ... අපි හෙව්වේ Tina Turner ගැන.. ඇගේ music ගැන..

ඔය කියන 1990 ගණන්වල යුරෝපය දෙවනත් කල pop රැල්ල ලංකාවට ගසාගෙන ආව කාලය. ඔය කාලේ මැඩෝනලා, විට්නි හියුස්ටන් ලා, සින්ඩි ලූපර් ලා, ටිනා ටර්න ලා, ජෙනට් ජැක්සන්ලා, සමන්තා ෆොක්ස් ලා, සෙලින් ඩියෝන්ලා වගේ ගායිකාවන් තොග පිටින් අපේ ලෝකවල හොල්මන් කරපු කාලේ... 

ඔය අතරින් Tina Turner ව අපේ ගමට සෙට් වෙන ගතියක් තිබුනා..ඒ ඇගේ කඩ හඩ. ටී වී එකෙන් අපි දැක්ක ඇගේ ජව සම්පන්න ගායනය. කට ඇරල කෑ ගහලා, ස්ටේජ් එකේ දගල ලා ෆුල් විසෙන් ඇය සිංදු කියන විදිහ, උස මහත කළු මාළු ගෑනියෙක් වගේ ඇගේ පෙනුම...ඕවා සියල්ල අපේ ගමට, මීගමුවට හොදට සෙට්වෙලා ගියා.. ටිනා ටුනා (tuna) කියලත් සමහරු කිව්වා. කොහොමත් ටීන ලා, tuna ලා (කෙලවල්ලෝ) අපේ පැත්තේ එමටයිනේ...

Tina Turner ගැන කියද්දී අපේ ගම්වල නිතර කියවුන දෙයක් තමයි "ඔය ඔක්කොම පල්ලියේ ගීතිකා කණ්ඩායමෙන් ආව අයනේ" කියන එක. ඒක ඇත්ත. ටීනා ටර්නත් පල්ලියේ ගීතිකා කණ්ඩායමේන් (church choir) එකෙන් අත්පොත් තැබූ  gospel singers ලා වගේ පසුබිමක් සහිත අය තමයි. එහෙත් ඇයව ගායිකාවක් කලේ පල්ලියේ කන්තාරු කණ්ඩායම නෙමේ, ඇගේ සැමියා වූ Ike Turner. 

එතෙක් Anna Bullock වු ඇයව Tina Turner කලේ Ike Turner. ඔහු ඒ වන විටත් සංගීත කණ්ඩායමක් ඇති club වල සින්දු කියන්නෙක්. ටිනා තමයි ඔහුව හොයාගෙන ගිහින් ඔහුට එකතුවෙන්නේ. ඒ එකතුව තුල දෙදෙනාටම දිගු ගමනක් යන්න පුලුවන් වෙනවා...එතෙක් අන්ත දරිද්‍රතාවයෙන්, දෙමාපියන් ගේ පවා ආදරය අහිමි කමින්, නොසලකා හැරීමට ලක්ව, අනාගතයක් ගැන බලාපොරොත්තු නැතිව, ජීවිතයේ ගැහට සංගීතයට යට කිරීමට ඉඩ දෙමින් නිස්සාර ජිවිතයක් ගතකරමින් සිටි Anna Bullock ට Ike Turner ජීවිතයක් ගෙනත් දෙන්නෙක් වුනා. ගැහැනු ළමයි තුන් දෙනෙක්වුනු Anna Bullock හෙවත් ටිනා ටානර්ගේ පවුලේ බාලම දැරිය වු ඇය නිතර කියපු දෙයක් තමයි ඇය ඇගේ දෙමාපියන්ට අවශ්‍ය නොවූ (unwanted child) දැරිවියක් බව. පියාගේ වදබන්ධනයන්ගෙන් පීඩා විදිමින් සිටි ඇගේ මව පියාගෙන් වෙන්වී යෑමට උත්සහ කල මුත් ඇගේ උපත නිසා ඇගේ මවට තවත් අවුරුදු ගණනාවක් සිය පියාගේ වදබන්ධනයන් ඉවසා සිටීමට සිදුවූ බව ඇය දක්වා තිබෙනවා. එය ඉතා වේදනාකාරී හැගීමක්...එහෙම හැගීමක් එක්ක ඇයට සිය ළමා කාලය වගේම ගැටවර වියත් ගෙවන්න වීම මොන තරම් නම් වේදනාත්මකද? ඊ ලගට ඇයට ඇගේ ජීවිතයටම එය අත්දකින්න වුනාම මොන තරම් අභාග්‍යයක්ද? 

Tina Turner ගේ සැමියාවූ Ike Turner ගෙන් ඇයට විදින්න වුනෙත් බරපතල වදබන්ධනයක්. ඇය එක තැනකදී කියනවා ඇගේ ශරීරයේ එක කොටසක් නැතිව ඇතිලු ඔහුගෙන් වද නොවින්ද.. හිංසාවට වේදනාවට පත් නොවෙච්ච..Ike Turner සමග 16 වසරක ඇගේ විවාහය මුල් කාලයේ ඉතා සාර්ථක වූවක්. ඔවුන් දෙදෙනාම ප්‍රසිද්ධ වෙනවා, හොදින් මුදල් උපයනවා, රට පුරාම සංගීත ප්‍රසංග පවත්වනවා, පිරිමි දරුවන්ම 4 දෙදෙනෙක් ලැබෙනවා.. එත් ඒ විවාහය, ඒ එකතුව, ක්‍රමයෙන් බිද වැටෙනවා..එයට හේතුව  Ike Turner මත්ද්‍රව්‍ය වලට තදින්ම ඇබ්බැහි වීම කියලා කියනවා...ඒත් මත්ද්‍රව්‍ය වලින් Ike Turner මුදවාගන්න ටිනාට හැකිවෙන්නේ නෑ...දෙදෙනාම එකිනෙක්කෙනාගෙන් දුරස්වෙනවා.. Ike Turner ටිනා ව ගොඩ නගන්න, ගොඩ දාන්න, කටයුතු කලත් ඔහුට අවශ්‍යම අවස්ථාවේ Tina Turner ගෙන් ඒ උදව්ව ඔහුට හම්බවෙන්නේ නෑ..Ike Turner ව ගොඩ දාන්න ටිනට බැරිවෙනවා. එනිසාම Ike Turner වරක් ටිනව මරන්න ගියා ගියලා ඇගේ ජීවිත කතාව අයත් චිත්‍රපටයේ තියෙනවා.. ගැහැනියෙක් කොහොමද  "මේ මිනිහා මාව මරන්න යන්නේ" කියලා හිතන තැනක ඉදන් තවදුරටත් එකට පවුල් කන්නේ ? ඔවුන් කටුක ලෙස දීර්ඝ දික්කසාද නඩුවකින් පස්සේ වෙන් වෙනවා.. Ike Turner තමන් සමග කාලයක් ජීවිතේ එකට සැප දුක බෙදා ගත්ත Tina Turner ගේ නම තමන්ට අයිතියි කියලා Tina Turner කියන නමේ අයිතිය ඉල්ලනවා.. ඒ නම යටතේ උපයූ වත්කම් ඉල්ලනවා... සල්ලිත් එක්ක මිනිස්සු මොන තරම් නම් නරුමයෝ වෙනවද? උසාවිය Tina Turner ගේ නමේ අයිතිය Tina Turner ටම දෙනවා. ඒත් දික්කසාදයෙන් පස්සෙත් Ike Turner බාරගත්ත ප්‍රසංග කිහිපයකම  එකට වැඩ කරන්න ඇයට නියෝග කරනවා..

ඉන් අනතුරුව Tina Turner වගේම Ike Turner ත් ක්‍රමයෙන් නිවී යනවා.

එහෙත්, දික්කසාදයෙන් පස්සේ, ඔය කලබැගෑනි ඔක්කොම ඉවරල වෙලා, අවුරුදු 4 - 5 කට පස්සේ, හදිස්සියේම ටීනා ආපහු පත්තුවෙනවා...ඉතා දීප්තිමත් ව පත්තුවෙනවා...නැවතත් බැස නොයන්නටම පත්තුවෙනවා - We Don’t Need Another Hero...We Don’t Need Another He.ro.. ඔව් අපිට තවත් වීරයෙක් ඕන නෑ.. ඇයම වීරයා වෙනවා... වේදිකාව දෙවනත් කරන...මුළු වේදිකාවම එක මිට ට, එක පොදියට කැටිකර ගන්න..දැවැන්ත වීරවරියක් වගේ ඇය සංගීත රසකාමීන්ගේ ලෝකය ආක්‍රමණය කරනවා... ඇගේ What's Love Got to Do with It ගීතය සමග ඇය අපේ ලෝකයේ සදහටම වාඩිලා ගන්නවා...එය අපේ විතරක් නෙමේ මුළු ලෝකයටම ගායිකාවක් ගැයූ අති සාර්ථක ගීත කිහිපයෙන් එකක් බවට පත්වෙනවා... 

ඇගේ මේ දෙවෙනි ගමනට ප්‍රධාන වශයෙන් හේතුවුනේ සංගීත ලෝකයට ඒවන විට අළුතින්ම හදුන්වා දුන් Synthesiser නැතිනම් ඉලෙක්ට්‍රොනික ඕගන් සංගීතය හේතුවුනා කියලත් කියනවා...අපි දන්නවා Tina Turner වගේම Ike Turner ගේ මුල් කාලින සින්දු ඔක්කොම වගේ Cover Songs. ඒ කියන්නේ කලින් කෙනෙක් කියපු සින්දු අළුත් විදිහට කියපු එක. ඒත් ඇගේ දෙවෙනි ගමන එහෙම නෑ. ඇය ඇගේම අනන්‍යතාවක් එක්ක එන්නේ...අපි දන්න Tina Turner අර 80/90 ගණන්වල ආව ඇග කුල්මත් කල ජවසම්පන්න Tina Turner මිසක්, 60/70 කාලේ Covers කියපු ටිනා ටානර් නෙමේ...

මම නම් විශ්වාස කරන්නේ Tina Turner ගේ අති සාර්ථක දෙවන සම්ප්‍රාප්තියට හේතුව Synthesiserවත්, ඉලෙක්ට්‍රොනික සංගීතයවත් නෙමේ...ඇගේ ජීව්ත අත්දැකීම...යටපත්කල නොහැකිවූ ඇගේ හැකියාව..අප්‍රතිහත ධෛර්යය.. නොනැවතිය නොහැකිවු අභිප්‍රාය...ඇගේ passsion එක... මම හැමදාම කියන දෙයක් තමයි...fashion එක නෙමේ කාරණය passsion එකයි කාරණය කියන එක...passsion එකට ඕනෑ දුක්ප්‍රාප්තියක් විදින්න පුලුවන් හැබැයි යටපත් කරන්න බෑ.. fashion (විලාසිතා/ විච්චුරණ) කරන ගැනූන්ට වඩා passsion ( අභිප්‍රායක්/දැඩි උවමනාවක්/ ලලසාවක්) තියෙන ගැහැනුන්ව කිසිසේත්ම නවත්වන්න බෑ..යටපත් කරන්නත් බෑ..ඒ අය නැගිටිනවා නැගිටිනවාමයි..Tina Turner කියන්නෙත් එහෙම passsion එකක් තිබ්බ ගැහැනියෙක් !!❤️❤️

මාකස් ප්‍රියන්ත පෙරේරා 

25/05/23

රාජාභිෂේකය සහ කතෝලික පල්ලිය

මීට වසර 70කට පෙර, එනම් 1953 දී, පැවැති දෙවන එලිසබෙත් රැජිනගේ රාජාභිෂේකය හෙවත් මෞලි මංගල්‍යයට බ්‍රිතාන්‍යයේ සිටින කතෝලිකයින්ට ආරාධනා කලේ නැත. ඒ යුගය වන විටත් කතෝලික සභාව සහ එංගලන්ත සභාව ඇතුලත් ප්‍රෙතස්තන්ත සභා අතර තිබුන විරසකය එයට හේතුවයි.

කොටින්ම කිවතොත් 1558 දී එංගලන්තයේ අටවන හෙන්රි රජ එංගලන්තය කතෝලික සභාවෙන් ඉවත් කර, පාප්තුමාගේ නොව එරට රජ හෝ රැජිනගේ නායකත්වයෙන් යුතු, එංගලන්ත සභාව හෙවත් ඇංගිලිකන් නමින් අලුත්ම ප්‍රෙතස්තන්ත කිතුනු සභාවක් ගොඩනැගුවායින් පසුව රාජාභිෂේකය හෝ වෙන මොනයම්ම හෝ රාජකීය කටයුත්තකට එරට කතෝලික සභාව සම්බන්ධ කරගත්තේ නැත. 1908 දී නැවැත ප්‍රතිස්ථාපනය කරන තුරුම කතෝලික සභාව මෙරට පැවැත ඇත්තේ කිසියම් ආකාරයට නොනිල තත්වයකය.

ඉන් අදහස් වන්නේ කතෝලිකයන් එංගලන්තයේ නිල රාජ්‍යය කටයුතුවලට, සැමරුම්වලට බදවා ගැනීම හෝ සහභාගි නොවු බවක් නොවේ. මට ඊයේත් පල්ලියේදී හමුවු තැනැත්තියක් දක්වා සිටියේ දෙවන එලිසබෙත් රැජිනගේ රාජාභිෂේකය ඔවුන් පවුලක් ලෙසත්, එකතුවක් ලෙසත්, සැමරු බව ඒ වන විටත් වයස අවුරුදු හතරක්වු ඇයට හොදින් මතක බව දක්වා සිටියාය.

ඇත්ත වශයෙන්ම දෙවන එලිසබෙත් රැජිනගේ යුගයේදී කතෝලික සභාවත්, බ්‍රිතාන්‍යය රජ පවුලත්, එංගලන්ත සභාවත් අතර සම්බන්ධය දැඩිව වර්ධනය විය. ඇය පාප්වරු කිහිපදෙනෙකුවම වතිකානුවටම ගොස් බැහැ දැකි, දෙවන ජුවාම් පාවුළු පාප්තුමාට බකින්හැම් මාලිගාවට පවා ආරාධනා කළ, හිටපු අගමැති ටෝනි බෙලෙයාර්ට කතෝලික ආගමට බැදීමට ඉඩ දුන්, එංගලන්ත සභාවේ පියතුමන්ලාට සහ බිශොප්වරුන්ට කතෝලික සභාවේ පුජකවරය ලැබීමට ඉඩදුන්, තැනැත්තියකි.

එකී වර්ධනයේ ප්‍රතිඵලයක් ලෙසම මෙවර තුන්වන චාල්ස් රජතුමාගේ රාජාභිෂේකයට එංගලන්තයේ සභ වේල්සයේ අගරදගුරු කාදිනල් Mark O'Toole අගරදගුරුවරයාට නිලවශයෙන් ආරාධනා කලා පමණක් නොව අභිනවයෙන් පත් තුන්වන චාල්ස් රජට ආශිර්වාද කිරීමටත් ආරාධනා කලේය.

වසර 500යකට පසු ලද මේ අවස්ථාව බ්‍රිතාන්‍යයේ කතෝලිකයන් මහත් හරසරයෙන් සැමරීය. ඊයේ (07/05/23) අප අයත් මෙරට මීසමේ, අපේ පල්ලියේද, එම සැමරුව මහත් උද්‍යෝගයකින් සංවිධානය කර තිබුනි.

විවිධ අර්ථ දැක්වීම් තුල බෙදී වෙන්වී ඇති සියල්ලන් එකට එක්වී එකම අවස්ථාවක් එකට සමරනු දැකීම තරම් තවත් ප්‍රීතියක් එහි නොවිනි.

මාකස් ප්‍රියන්ත පෙරේරා

08/05/23

ඊජිප්තුවේ ෆාරුක් රජ කී අවසාන රජ සහ බ්‍රිතාන්‍යයේ තුන්වන චාල්ස් රජ

ලොව අවසාන වශයෙන් ඉතිරිවන්නේ එංගලන්තයේ රජත්, කාඩ් කූට්ටමේ රජවරුනුත් පමණක් යැයි 1952 දී බලයෙන් පහ කළ ඊජිප්තුවේ සහ සූඩානයේ අවසාන රජ වූ පලමු වන ෆාරුක් රජ වරක් දක්වා තිබුනි: Soon there will be only five Kings left - the King of England, the King of Spades, the King of Clubs, the King of Hearts and the King of Diamonds.

ෆාරුක් රජගේ එම ප්‍රකාශයට පෙරත්, ඉන් පසුවත් ලෝකය රජවරුන්ගෙන්, රජ පවුල්වලින්, එකින් එක නිදහස් වෙමින්, ඉවත් කරමින්, පලවා හරිමින් තිබුනි. එම නිසාම අද වන විට ලෝකයේ කිසියම් ආකාරයකින් මහේශාක්‍යය අර්ථයෙන් අර්ථ දක්වන රජ පවුලක් ඉතිරිවී ඇතොත් ඒ අතර ඉහලින්ම ඇත්තේ බ්‍රිතාන්‍යය රජ පවුල බවට කිසිදු සැකයක් නැත.

ප්‍රතිසංස්කරණවාදීන්ගේ සිට ජනරජවාදීන් දක්වා ද, රාජාණ්ඩු විරෝධීන් දක්වා ද, බ්‍රිතාන්‍යයේ දේශපාලන ධාරාවන් වරින් වර ඉස්මතු වෙමින්, තීව්‍ර වෙමින්, තහවුරු වෙමින් ගලා යන නමුත් බ්‍රිතාන්‍යයේ රාජකීයත්වය මෙන්ම රජ පවුලද අදටත් එරට තුළ තදින්ම මුල්බැස්ගෙන ඇත.

එහිලා හේතුවී ඇත්තේ බ්‍රිතාන්‍යයන් සිය රාජකීයන්ට දක්වන පක්ෂපාතීවය ද, ගතානුගතික සම්ප්‍රදායන් හා පෞරාණික වටිනාකම් පිලිබදව එරට ජන සමාජය තුළ තහවුරු වී ඇති ආකල්ප ද, රජ පවුල සහ රාජකීයත්වය එරට ජාතික සහ සංස්කෘතික අනන්‍යතාවයේ කේන්ද්‍රීය අංගයක් වශයෙන් සලකන නිසා ද, එරට ක්‍රමික දේශපාලන විකාශනයේ අදටත් ශේෂව ඇති එහෙත් වියකී යා නොදී රැකගත යුතු සලකුණක් වශයෙන් සලකන නිසා ද, එක්සත් රාජධානිය මෙන්ම පොදු රාජ්‍යය මණ්ඩලය ද එකට බැද තබන බැම්ම ලෙස එරට රාජකීයත්වය සලකන නිසා ද, එරට මෙන්ම එහි යටත් විජිතයන්ගේ, ඩොමීනියන් රාජ්‍යයන්ගේ සහ ස්වායත්ත රාජ්‍යන්ගේ ද රාජ්‍ය නායකයා හෝ නායිකාව ලෙස බ්‍රිතාන්‍යයේ රජ හෝ රැජින සලකන්න නිසා ද, නැතහොත් මෙකී සහ නොකී සියළු හේතු සාධක නිසා ද, යන්න වෙනම වෙන්කර ගත නොහැක්කකි.

එම නිසාම අද (06/05/ 23) බ්‍රිතාන්‍යයේ පැවැත්වෙන තුන්වන චාල්ස් රජගේ රාජාභිෂේකය හෙවත් මෞලි මංගල්‍ය මේ යුගයේ පවත්වන අද්විතීය රාජාභිනන්දන රාජාභිෂේකයක් බව පැහැදිලිය.

බ්‍රිතාන්‍යයේ රජගේ ඔටුනු පැලදවීම රාජාභිෂේක - මෞලි මංගල්‍යය ඒ පදනමින්ම විග්‍රහ කරගැනීමට රාජකීයත්වයට ඇලුම් කරන්නෙකු වීමට හෝ බ්‍රිතාන්‍යයෙක් වීමට හෝ ඔවුන්ගේ ගැත්තෙක් වීමට අවශ්‍ය නැත. අවශ්‍ය වන්නේ යමක ඇති, එයටම හිමිවූ හෝ එයට ආරෝපණය කර ඇති අගය එම වටිනාකමින්ම විමසා බැලීමය. අන්ධයාට මැණිකෙන් ඇති වැඩක් නැත්තා සේම ඒ ඒ කරුණු ඒ ඒ ආකාරයෙන් විමසා බැලීමට ‍යොමු නොවී අපි අපේම සීමා තුළ හිර වන්නෙමු නම්, අපිට බ්‍රිතාන්‍යයේ තුන්වන චාල්ස් රජගේ රාජාභිෂේකයේ ද කිසිදු කලාවක්, වටිනා කමක්, අගයක්, විචිත්‍රණයක්, සම්ප්‍රදායක් හා සංස්කෘතියක් දැකිය නොහැක්කාය.

අද පවත්වන බ්‍රිතාන්‍යයේ මෞලි මංගල්‍යය සැලසුම් කර, සුදානම් කර ඇත්තේ ද එහිලා යොදාගන්නා ඔටුනේ සිට අත් පලදනාව දක්වා ද, ඇදුම් ආයිත්තම් වල ඇති බොත්තම් හී සිට සෑම අංගයක්, අංගයක් පසාම කිසියම් පදනමක්, කලාවක්, ඉතිහාසයක්, වටිනාකමක් හා අගයක් ජවලිත කිරීමේ අටියෙනි.

එකී සෑම අංගයක් සහ අයිතමයක් ගැන වෙන වෙනම විමසා බැලිය හැක. පොත් ගණන් ලිවිය හැක. එහෙත් අවශ්‍යය වන්නේ යමක වටිනාකම එහි ඇති වටිනාකමින්ම විමසා බැලීමය. බ්‍ර්තාන්‍යයේ තුන්වන චාල්ස් රජගේ රාජාභිෂකය ද විමසා බැලිය යුත්තේ ඒ අර්ථයෙන්මය. අපට නැත්තේ එවැනි සංස්කෘතික කියවීම්‍ ය. 

දකුණු අප්‍රිකාවෙන්, ඉංදියාවන් සහ වෙනත් රටවලින් රැගෙනා රජගේ ඔටුන්නේ ඇති දියමන්ති/මැණික් ආදිය එකී යටත් විජිතයන්ට නිසි වටිනාකමක්  නොගෙවා රැගෙනා දියමන්ති යැයි කීමට අපි ඉතා හොදින් හුරුවී සිටන්නෙමු. එහෙත් පොලොවෙන් මතුවූ වටිනා පාෂාණයකට වඩා වැඩි යමක් නොවු එකී දියමන්ති සහ මැණික් ආදියට අද ඇති වටිනාකම හිමිවී ඇත්තේ එවා ඉතා සියුම් ලෙස, සිය දහස් වාරයක්, කපා, ඔපදමා, සුවිශේෂී හැඩයක් සහ විශිෂ්ඨ ස්ථානයක වැජබවීම නිසා යැයි අපි අමතක කරති. අපට නැත්තේ එවැනි සංස්කෘතික කියවීම්‍ යැයි මම දැක්වුයේ එහිනි.

මාකස් ප්‍රියන්ත පෙරේරා

06/05/23