Negombo Fort Ground's Carnival - කානිවල් නම් ඉතින් මීගමුව කොටුව පිට්ටනිය තමයි.

ඉස්සර නත්තල් කාලේ වෙද්දී මීගමුව කොටුව පිට්ටනියේ කානිවල් දානවා. රෑ එළිවෙනකම් සංගීත සංදර්ශන. නත්තල් කාලෙට විතරක් නෙමේ අවුරුද්දේ කිහිප සැරයක්ම ඔය පිට්ටනියේ විවිධ සැණකෙළි, සංගීත සංදර්ශන තියෙනවා. ඒ වගේම විවිධ පුද්ගලයෝ විවිධ වාර්තා තියන්න විවිධ දේවල් කලා ඔතන. වරක් ගිනස් වාර්ථාවක් තියන්න මිනිහෙක් ඔතන නොනවත්වා නැටුවා. මිනිස්සු සල්ලි කොළ අමුණලා මාල හදලා ඒ මිනිහට ගෙනත් දැම්මා. පාසල්වල නිවාස අන්තර ක්‍රීඩා උළෙලවල් විතරක් නෙමේ පාසැල් ළමුන් ක්‍රීඩා පුහුණුවුණේත් මේ කොටුව පිට්ටනියේ. නිදහස් දින සමරු උත්සව තිබ්බෙත් ඔතන. ජුබිටර්ස්, යුත් පාපන්දු කණ්ඩායම් පාපන්දු පුහුණුවුනෙත් ඔතන.

මේ කොටුව පට්ටනිය ක්‍රීඩා පිටියේ තිබුන මණ්ඩපයේ කාලයක් කිසිම නඩත්තුවක් නැතිව තිබිලා දැන් වහල බිමටම කඩාවැටිලා. පිට්ටනියේ තණකොළ කපන්නේත් නැහැ. සර්පයෝ ඉන්නත් පුළුවන් කියලා ළමයි සෙල්ලම් කරන්න එන්නෙත් බයෙන්.

කෝ මේ ලන්සලා? කෝ මේ මීගමුවේ නගරාධිපති දයාන් ලන්සා? අර දවසකට එක වැඩක් කිය කිය facebook එකේ පොටෝ දාගෙන මීගමුව හදනවා කිය කිය හිටිය දයාන් ලන්සා කෝ? මීගමුවේ මහා කතෝලිකයා තමන් යැයි කිය කිය ගිය නිමල් ලන්සා කෝ? මීගමුවෙන් චන්ද ගන්න සුදර්ශනීලා, ප්‍රසන්නලා කෝ? මීගමුව එක්සත් ජාතික පක්ෂයේ නව සංවිධායක පාර්ලිමේන්තු මන්ත්‍රී කාවින්ද තවම මේක දැක්කේ නැද්ද? මීගමුව නගර සභාව මේ ගැන මොකද කරන්නේ? ඈත ඉන්න අපිට පේන දේවල් ලග ඉන්න ඔයාලට පෙන්නේ නැද්ද? නැතිනම් උවමනාවක් නැද්ද?

මතක තියාගන්න, මීගමුව කැඩිලා බිදිලා, විනාශවෙලා යනවා දකින්න ඕනෑ තරම් මිනිස්සු ඉන්නවා එත් එක රැකගන්න ඉන්නේ කිහිපදෙනයි. ඒ නිසා ඒ ටිකවත් එකතුවෙලා, ඔය සමාගමකින් ආධාරයක් හරි අරන් ඕක හදන්න කටයුතු කරන්න. 

Long ago, this ground was famous for carnivals, funfairs and musical shows not only at Christmas time but throughout the year. People said there was no carnival better than Negombo Fort Ground's Carnival.

It was a playground for many kids, many sports and many inter-school sports competitions and sports meetings. It was the home ground to St. Mary's College, Newstead Girls College, Jupiters and Youth Football clubs of Negombo. I remember once a man tried to get the Guinness World Record of non-stop dancing. People rewarded him with a necklace of money.

That was exactly on this pavilion. Now due to the neglections, it's run down and the roof has fallen.

Where is our Mayor, Dayan Lanza? Can't he see this? Don't they want to repair it? Where is the MP, Nimal Lanza? And the new UNP organiser, Kavinda Jayawardena? And the other MPs who got the votes from Negombo? What about our Municipal Council? What are they going to do about it?

Please don't let the heritage of our glorious city of Negombo fall apart. We know many people who want to see that happen. Please don't allow them to succeed.

Let's join together and demand to keep our Negombo a safe, beautiful and glorious place again. Try to draw the attention of everybody to repair and restore this memorable pavilion and the Negombo Fort Ground.

Marcus Priyantha Perera.

නත්තලේ ජීව ගුණය අඩුකර නොගනිමු !!

මෙවර නත්තල් දිනයේදී මට කීමට ඇත්තේ අප කිසිසේත්ම නත්තලේ ඇති නත්තල් ජීව ගුණය අඩුකර නොගත යුතුය බවය. 

නත්තල යනු අපට ඇති මහගුම මංගල්‍යයයි. අප සමරණ අනෙකුත් සියලු මංගල්‍යයන්ට වඩා එය උසස්ය. උද්වේගකරය. විශිෂ්ඨතමවුත්, අති උදාරම වුත් මංගල්‍යයය. මන්දයත් ඒ අප සමරන්නේ මුළු මහත් මිනිස්  සංහතියටම විමුක්තිය රැගෙනා විශිෂ්ඨතම විමුක්තිදායකයාගේ උපතය. නත්තලේ උපන් ජේසු නොවන්නට අද ලෝකය මීටත් වඩා යහපත්, නිදහස් තැනක්වීමට ඉඩ තිබුණිද? සමාජය වඩා යහපත් තැනක් කිරීමට ක්‍රිස්තු ධර්මය මහත්පිටුවහලක් සපයා ඇත. අද අප භක්තිවිදීන සෑම මිනිස් අයිතිවාසිකමක්ම, නිදහසක්ම, පොදු සමාජ සත්තාවන්ද මෙම පරිමාණයෙන් හෝ අප වෙත පැමිණ ඇත්තේ අද අප නත්තල් දිනයේ  සමරණ ජේසුස් ක්‍රිස්තුස් වහන්සේගේ ධර්මය පැමිණීම ඔස්සේය. මුළු මිනිස් ඉතිහාසය පුරාම වඩාත් දීර්ගකාලීනව බලපවත්වන ලද විප්ලවයක්වුයේ නම් ඒ ජේසුස් ක්‍රිස්තුස්වහන්සේගේ ධර්මය තහවුරුවීමය. අප සියල්ලන් අද එහි ප්‍රතිපල භුක්තිවිදින්නෝය.

ජේසුස් ක්‍රිස්තුස්වහන්සේගේ විමුක්තිදායක පණිවිඩය නොවන්නට අද අප මොනවගේ සමාජයක ජීවත්වෙන, මොනවගේ පුද්ගලයන්වීමට ඉඩ තිබුණිද? එය අප සියල්ලන් තනි තනිවම තම තමන්ගෙන් ඇසිය යුතු ප්‍රශ්නයකි. ක්‍රිස්තියානින් වුවද, නොවුවද, අප සියල්ලෝම ක්‍රිස්තු ධර්මය මතුකළ පොදු මිනිස් වටිනාකම්වල හරය විදින්නෝය. 

මුළු මිනිස් සමාජයටම එවැනි වෙනසක් ගෙනදුන් උදාර පුත්‍රයෙක්ගේ උපතක් සැමරීමේදී අප කිසිසේත්ම උකටලී වන්නො නොවෙමු. 

ඇත්ත, අපේ සහෝදර ජනයා පාස්කු ප්‍රහාරය නිසා විපතට පත්ව ඇත. මේ නත්තලේදීද ඔවුන් අප අතර නැති බව ඔවුන්ගේ පවුල්වලට මෙන්ම අපටද දැනේ. එහෙත් ලොවපුරාම ක්‍රිස්තුස් වහන්සේගේ විමුක්තිදායක සුභාරංචිය වෙනුවෙන් ලොව සෑම තැනම දිවිපිදු, සහ අදටත් දිවිපුදන දහසකුත් එකක් ප්‍රාණපරිත්‍යාගීන් අතර පාස්කු ප්‍රහාරයෙන් විපතට පත් අපේ ජනයාද සිටිනු බව දැක අපට ඔවුන් ගැන අභිමානයෙන් ඇතිවිය යුතුය. අද අප ජීවත්වෙන මේ ලෝක තලය වඩා යහපත් තැනක් කරගැනීමට දිවිපිදු ජේසුස් ක්‍රිස්තුස් වහන්සේගේ ධර්මයේ උපත සමරණ නත්තල අපට ගෙන එම සදහා පුරාණයේ සිට දිවිපුජාකල ජනයා අතරට ඔවුන්වද ගැනෙන බව දැන අප සතුටු විය යුතුය. 

පාස්කු ප්‍රහාරය නිසා හෝ අබල දුබලතා නිසා හෝ අප කිසිසේත්ම නත්තලේ ඇති නත්තල් ජීවගුණය නැති කරගතයුතු නැත. නත්තල් ජීව ගුණය ඇත්තේ අපි අදින ඇදුමේවත්, කනබොන දේවලවත්, නත්තල් සැරසිලිවලවත් නොව අපේ සිත් තුලය. අප නත්තල් කියා සමරන්නේ ලස්සනට සරසා, ලස්සනට සැරසී, හොදට කෑම බීමෙන් සප්පායම්වීම නම් එය නත්තලක් නොව විවාහ මංගල්‍යයක් වැනි යමකි. නත්තල යනු ඊට වඩා උසස් මංගල්‍යයකි. උස්සම මංගල්‍යයය. මුළු මහත් සමාජ සත්තාවම වඩා යහපත් තැනක් කල, තවදුරටත් එසේ කිරීමට මගපෙන්වන මහගු විමුක්තිදායක සුභාරංචියක් ගෙනා විමුක්තිදායකගේ පැමිණීම සමරණ මංගල්‍යය. එය අප සැමරිය යුත්තේ තමන් වඩාත් ප්‍රේමාන්විතව ආදරය කරන, තමන්ගේ මුළු මහත් ජීවිතය ගොඩ දැමු, ඉන් එහා කෙනෙකු නොවූ තරම්වූ වීරයෙකුගේ පැමිණීම සමරණ ආකාරයට. 

එවැනි මහගු මංගල්‍යයක් 'මගේ නත්තල දුගියා බත්කන දාය, වැරහැලි නැතිවෙන දාය, පව පල්ලි යන දෑය', 'නත්තල යනු ආධ්‍යාත්මික භාවනාවකි', 'පාස්කු ප්‍රහාරය නිසා නත්තල සමරන්නේ නැහැ',නත්තල පුහු ආටෝපවලින් මුදාගනිමු' ආදී යෙදුම්වලට ලඝුකල නොහැක.  නත්තල තුල කිසිම ප්‍රතිගාමීත්වයකට ඉඩ නැත. එහි ඉඩ ඇත්තේ  ප්‍රගතිශීලීත්වයටය. විශිෂ්ඨ, උදාර, උද්වේගකර ප්‍රගතිශීලීත්වයටය. 

අවශ්‍යව ඇත්තේ ජේසුගේ උපත තුල මතුකරන විමුක්තියේ පණිවිඩය මතුකරගෙන සැබෑ සතුට අත්කර ගත හැකි, සැමට සතුටින් සිටිය හැකි සමාජ, දේශපාලනික, ආර්ථික සහ පාරිසරික වටපිටාවක් ගොඩනැගීමට ජව සම්පන්නව මැදිහත්විය හැකි උදාර, ප්‍රේමයෙන් යුතු පුද්ගලයින් මෙන්ම ජන සමාජයක් බවටද පත්වීමය. 

ඒ සදහා අප  නත්තලේ ඇති ජීවගුණය කිසිසේත්ම අඩුවීමට නොදී හැකි උපරිමයෙන්ම පවත්වා ගෙන යමු !!!

ඔබ සැමට සුභ නත්තලක් !!!!

මාකස් ප්‍රියන්ත පෙරේරා. 

24/12/2019

**** මාධ්‍යතන යුගයේ ඉතාලි චිත්‍ර ශිල්පියෙකුවූ Sandro Botticelli ගේ Mystic Nativity (1501) ඉහලින් වේ.  

ගෝඨාභය ජනාධිපතිට, ආණඩුවට සහ ආරක්ෂක අංශවලට මල්මිටක්

චාල්ස් මහතා කරගෙන යන 'කදුල' වැඩසටහනට පසුගියදා මතුගම ප්‍රදේශයේ භික්ෂුන්ගෙන් විරෝධයක් එල්ලවුනා. බොදුබල සේනාවේ ඥානසාර හාමුදුරුවෝ ඒ ගැන මාධ්‍ය සාකච්චාවක් පවත්වමින් 'කදුල' වැඩසටහන මතුගම ප්‍රදේශයේ කරන්න දෙන්න එපා කියලා ජනාධිපති ගෝඨාභය රාජපක්ෂගෙන්, ආණ්ඩුවෙන් සහ එය සංවිධානය කල ජගත් විතාන මහත්මයාගෙන් ඉල්ලා සිටියා. එත් එක නැවතුනේ නැහැ. ආණ්ඩුව පොලිසියේ සහ හමුදාවේ ආරක්ෂාව ලබා දුන්නා. බලාපොරොත්තු උනාටත් වඩා හොදට මතුගම 'කදුල' වැඩසටහන සාර්ථක වෙලා.

ඊට පස්සේ මඩකලපුවේ ඉවැන්ජලික් කණ්ඩායමක් කරන්න ගිය නත්තල් කැරොල් වැඩසටහනක ප්‍රචාරක වැඩවලට මඩකලපුවේ සුමන හාමුදුරුවෝ මැදිහත්වෙලා නවත්වන්න කරන උත්සහයක් ගැන වීඩියෝ එකක් සංසරණය වෙන බව දකින්න ලැබුණා. ඒ හිදී ඒ හාමුදුරුවෝ මේකේ ඉන්නේ කොටි, මුන් බලෙන් ආගම ප්‍රචාරය කරනවා වගේ විවිධ චෝදනා එල්ල කරපු නිසා පොලිසියට ගෙනවිත් කරුණු සොයා බලා තියෙනවා. පස්සේ ඒ කිතුනු කණ්ඩායමට තමන්ගේ වැඩේ කරගෙන යන්න පොලිසිය ඉඩ දීලා විතරක් නෙමේ ආරක්ෂාවත් සපයලා තියෙනවා.

මේ අවස්ථා දෙකේදීම ජනාධිපති ගෝඨාභය රාජපක්ෂ මහතාගේ රජයෙන්, පොලිසියෙන් සහ හමුදාවෙන් ලබාදුන් සහයෝගයට අපි ස්තූතිවන්ත විය යුතුයි.

ඒ වගේම ඉහත අවස්ථා දෙකේදීම අර හාමුරුවරු රටේ නීතිය අතට ගන්නටත්, ඊට පිටින් කටයුතු කිරීමටත්, ශ්‍රී ලංකා ආණ්ඩුක්‍රම ව්‍යවස්ථාව සහතිකකර ඇති අන්ආගමිකයන්ට ඇති නිදහස උල්ලංඝනය කිරීමටත්, රජය සහ ආණ්ඩුව අපහසුවට පත්කිරීමටත් කටයුතු කර තිබෙනවා. මේ තත්වය තවදුරටත් වර්ධනයවීමට නොදී යම් ක්‍රියාමාර්ගයකට එළබෙන්නේ නම් මැනවි.

මාකස් ප්‍රියන්ත පෙරේරා 

20/12/2019

'ලෝක විවාහක රූ රැජින' කැරෝලයින් ජුරි සහ 'අපේ උරුමය'

මම ඔය රූපරැජින තරගවලින් දිනන්නේ කවුද කියන ගැන උනන්දු නැත, ඒවායින් ප්‍රවර්ධනය (promote) කරන්නේ මොනවාද යන්න ගැන තමයි මා වඩාත් උන්නදු. මේ වසරේ 'විවාහක රූ රැජින' ලංකාවේනුත්, 'විශ්ව රූ රැජින' දකුණු අප්‍රිකාවෙනුත් තෝරාගත්තා. ඒ අය ගැන ලියා තිබු දේවල් අතර ඒ අයගේ සමේ පැහැය ගැනද සදහන් කර තිබෙනු දුටුවෙමි. එය ඇතැම්විට රූපලාවන්‍ය ආලේපන වර්ග ප්‍රවර්ධනය සහ එකී නිෂ්පාදනවල ඊලග වෙළද පොළ ගැන දක්වන ඉගිකිරීමක්ද විය හැක.

ඒ වගේම මා උනන්දු තවත් දෙයක් තිබේ. ඒ විශේෂයෙන්ම ලංකාවේ කැරෝලයින් ජුරි (Caroline Jurie) ගැනය. මුලික වශයෙන්ම ඇය ජයග්‍රහණයෙන් අනතුරුව සිදුකල ප්‍රකාශයක් ගැනය: “I'm so honored to share my heritage and culture on the global stage”.

ක්‍රිස්තියානි, බර්ගර්, නම කියුවිට ද ලංකාවේ කෙනෙක් වගේ නෙමේ යැයි හිතෙන 'කැරෝලයින් ජුරි' (Caroline Jurie) මගේ "උරුමය" (heritage) සහ "සංස්කෘතිය"(culture) "ගෝලීය තලයට (global stag) ගෙන යෑමට ලැබීම භාග්‍යයක්" ලෙස සලකන බව එම ප්‍රකාශයෙන් දක්වා තිබුණි. ඇත්තටම, ඇය එයින් අදහස් කර තිබුනේ කුමක්ද? ඇය කියන 'උරුමය' සහ 'සංස්කෘතිය' කුමක්ද? කලින් කියූ ලෙස මගේ උනන්දුව ඇත්තේ ඒ ගැනය. ජයග්‍රහණයෙන් අනතුරුව ඇය ඇගේ Facebook profile පින්තුරය යාවත්කාලීන කරමින් මෙසේ දක්වා තිබුණි: ''All Glory to Jesus"!!! එය ඇය දක්වා ලූ ඇගේ 'උරුමය' සහ 'සංස්කෘතිය' කුමක්ද යන්න ගැන විස්තර කිරීමක්ද?

එය එසේය. ලංකාවට පැමිණි පසුව ඇය සිදුකල ප්‍රථම මාධ්‍ය සාකච්චාවේදීම සිය ආගම අනුව දෙවියන් පසසමින් ඇය ඇගේ සංස්කෘතික අනන්‍යතාවය ගැන පැහැදිලි අදහසක් ඉදිරිපත් කරන ලදී. එහෙත්, එම මාධ්‍ය සාකච්චාවේදී ඇය දෙවියන් පසසමින් කල ප්‍රකාශය ලංකාවේ කිසිදු මාධ්‍යකින් නොපෙන්වීමට ශ්‍රී ලංකාවේ විද්‍යත් මාධ්‍ය කටයුතු කරන ලදී. 

එයට හේතුව ඇය නියෝජනය කරන අනන්‍යතාවය ලංකාවේ මේ වනවිට ගොඩ නැගෙමින් ඇති 'සිංහල-බෞද්ධ ජාතික අනන්‍යතාවය' සමග  අනන්‍ය නොවීමද?

මේවන විට ශ්‍රී ලාංකීක  අනන්‍යතාවය 'සිංහල-බෞද්ධ' අනන්‍යතාවය තුල පමණක් ලඝු කිරීමට උත්සහයක් ඇති බව පැහැදිලිව පෙනීයයි. ඒ සමග අනෙක් අනන්‍යතා සහිත පිරිස් සිංහල බෞද්ධයාට තර්ජනයක් ලෙස සලකා ඔවුන් ලාංකීක සමාජයේ පිටස්තරයන් ලෙස සලකන තත්වයක්ද ක්‍රමයෙන් මතුවෙමින් තිබේ.  ක්‍රිස්තියානි / බර්ගර් අනන්‍යතාවයක් සහිත පිරිස් 'සිංහල-බෞද්ධ' සංස්කෘතිය කාදමන ''පරදේසක්කාර විලිසංගෙ නැති සංකර'' පිරිසක් ලෙසද, මුස්ලිම් නම් 'ආක්‍රමණිකයන්' පිරිසක් ලෙසද, දෙමළ නම් රට බෙදන ඩයස්පෝරාවේ එකෙක් ලෙසද සලකන තත්වයක් උද්ගතවී තිබේ.

යටත් විජිත පාලකයින් යටතේ 'සිංහල-බෞද්ධ උරුමය' විනාෂවුවා යැයි දක්වමින් ගොඩනැගු 'සිංහල-බෞද්ධ' ස්වොත්තමවාදී ව්‍යාපෘතිවල අවසාන ඉලක්කය වී ඇත්තේ ශ්‍රී ලංකාව සිංහල-බෞද්ධ රටක් බවට පත්කරගැනීමය. එහිදී 'සිංහල-බෞද්ධ' නොවන දෙමළ, මුස්ලිම් සහ ක්‍රිස්තියානි ඇතුළු අනෙක් සියළු ජන කොටස් පිටස්තරයන් ලෙස දැක්වීම පියවරෙන් පියවර සිදුවුවකි. දැන් එය එසේ කිරීම, එසේ සිතීම පවා රටේ ජාතිමාපක, දේශමාපක, දේශප්‍රේමීත්වයේ අනිවාර්ය ලක්ෂණයක් බවට පත්වී තිබේ. එය අනෙක් ජනකොටස්වලට සෑම අතින්ම අහිතකර ලෙස බලපානවා පමණක් නොව, ලංකාවට දියුණු රටක් ලෙස නැගී සිටීමට ඇති ඉඩත් සීමා කර ඇත.

මා ලියන්නේ මහජාතියේ එකී වර්ගවාදී, ජාතිවාදී, ආගම්වාදී, අධිපතිවාදී (hegemonic) ව්‍යාපෘතියට විරුද්ධවය. ඒකී ප්‍රවාහය විසින් යටපත්කර සම්පුර්ණයෙන්ම අතුගා දැමීමට දගලන චූල, (මීගමුව වැනි) ප්‍රාදේශීය, ප්‍රගතිශීලි අනන්‍යතාවයන් මතුකරලීම සදහාය. ඒක-වාර්ගික අනන්‍යතාවයක් මුල්කරගෙන දියත් වෙන වාර්ගික-ජාතිකවාදී (ethno-nationalism) ප්‍රවණතා මෙන්ම එය යටතේ ඉදිරියට පැමිණ ඇති 'වාර්ගික ජාතික රාජ්‍ය ගොඩනැගීමේ ව්‍යාපෘතියද (ethno-cultural nation-state building projects) පරාජය කලයුතුය. 

කිසිවෙකු ඉහතකී මහජාතියේ, වර්ගවාදී, ජාතිවාදී, ආගම්වාදී, අධිපතිවාදී (hegemonic) ව්‍යාපෘතියට වඩ වඩා අනන්‍ය වෙන තරමට ඔවුනට මා හතුරෙකු ලෙස පෙනීයාම සිදුවන බව මම දනිමි. එහෙත් මම දේශපාලනය ලෙස දකිනුයේ 'රාජ්‍ය' සහ 'බලයට' ප්‍රතිචාර දැක්වීමය. එහෙයින් පුද්ගලයන් සමග පැටලීම අනවශ්‍ය. අඩුම වශයෙන් බොහෝ පුද්ගලයින්ගේ කොමෙන්ට් වලට පවා ප්‍රතිචර දැක්වීම තේරුමක් නොමැති වැඩක් බව සිතන්නේ ඒහිනි. 

වැඩිකල් නොගොස්ම අහන ප්‍රශ්නයක් වනුවේ කැරෝලයින් ජුරි (Caroline Jurie) කොතරම් ශ්‍රී ලාංකිකද? යන්නය. ඒය එවැනි නම් සහ වෙනත් අනන්‍යතාවයන් තියෙන බොහොමයක් දෙනෙකුට මුහුණ පෑමට සිදුවෙන ප්‍රශ්නයකි. එදිනට කිරුල දිනූ නිසා 'කැරෝලයින් ජුරි' (Caroline Jurie) ශ්‍රී ලංකා කියමින් උඩදාන සියල්ලෝම ඇයව උඩම දාලා කොන්ද කැඩේන්න වැටෙන්න අත්හරිති. නැතිනම් හැකිතාක් විගස ඇය මෙන්ම ඇගේ කිරුලද සම්පුර්ණයෙන් අමතකර ඉතිහාසයෙන්ම අකාමකා දැමීමට කටයුතු කරති.

මාකස් ප්‍රියන්ත පෙරේරා.

09/12/2019

පාප්වහන්සේ නාගසාකි නුවරට යාම

පාප්වහන්සේ ඉකුත් 23/11/2019 දින ජපානයේ නාගසාකි නුවරට ගියේය. අපිට ජපානයේ නාගසාකි කියපුවහම මතක් වෙන්නේ හිරෝෂිමා-නාගසාකි පරමාණු බෝම්බ ප්‍රහාරය. ඒ නිසා විනාශවූ මිනිස් ජීවිත. ඒ මහා විනාශය. පාප්වහන්සේ හිරෝෂිමා-නාගසාකි නගර දෙකටම ගියේය. විපතට පත්වූවන් වෙනුවෙන් දුක්වුයේය. ඔවුන් වෙනුවෙන් දෙවියන් යදින ලදි. නැවත එවැනි විනාශයක් නැවත සිදුනොවීමට කටයුතු කිරීම සියල්ලන්ගේම වගකීම බව පසක් කලේය. 

ඊට අමතරව පාප්වහන්සේ නාගසාකි නුවර තවත් විශේෂ ස්ථානයකට ගියේය. ඒ සා. පෝල් මිකී ඇතුළු ක්‍රිස්තියානීන් 25 දෙනෙකු 1597 දී කුරුසියේ ඇනගසා මරා දැමු ස්ථානය ය. අද එහි පල්ලියක්ද ඉදිකර තිබේ. එහෙත් ජපානය 1560 ගණන්වල සිට 1900 පමණ වනතුරු ක්‍රිස්තියානි ආගම තහනම් කර, ක්‍රිස්තියානි ආගම ඇදහු ජනයව මර දමන ලදි. විදේශීය මිෂනාරීන් බුරුතු පිටින් අත් අත් අඩංගුවට ගෙන දසවද දීලා මරාදමන ලදී. ක්‍රිස්තියානි ආගම එන්නේ පෘතුගාලයෙන් සහ බටහිර ජාතිකයන්ගෙන් යැයි සලකා කිසිම පෘතුගීසිකාරයෙකුට ජපානයට එම තහනම් කර තිබුණි. අවුරුදු 200ක් කිසිම කතෝලික /ක්‍රිස්තියානි පියතුමෙකු ජපානයේ සිටියේ නැත. 

එත් මිනිස්සු කතෝලික ආගම රහසින් ඇදහැවුහ. ඒ අයගේ දරුවන් රහසින්ම ක්‍රිස්තියානි කරමින් සිය විශ්වාසය දිගටම අරගෙන ගියේය. අද එහි මිලියන 5ක කතෝලිකයින් පිරිසක් සිටී. එහෙත් අතීතයේ තිබු ක්‍රිස්තියානි මර්ධනය කෙතරම් දරුණුද යන්න දන ගැනීමට අවශ්‍යය නම් 2016 තිරගතවූ Martin Scorsese ගේ Silence චිත්‍රපටිය බලන්න. එය කෙතරම් කෘර මර්ධනයක්ද ඔබට උගත හැක.

ඒ ජපානයේ ජපන් ජාතිකවාදය තහවුරුවීම ආරම්භවූ වකවානුවේ. ජපන් ජාතිකවාදය ජපානය රණශූර ජාතියක් බවට පත්කළේය. එකී යුද්ධවාදී ජපන් ජාතිකත්වය අවසනවුයේ හිරෝෂිමා-නාගසාකි වැනි දෙවන ලෝක යුද්ධයෙන් ජපානය පරාජය කිරීමට හෙළු පරමාණු බෝම්බ ප්‍රහාරයට මග පාදමිනි. එම විනාශයෙන් අළුදුවිලි වුනු ජපානය නැවත ඇමරිකාව සහ බටහිර ජාතීන් මැදිහත්වී ගොඩනගැන ලදී. ජපානය නැවත ගොඩනැගීමට පැහැදිලිවම ජපන් ජනයාගේ කැපවීමද ඒ සමග අමතක නොකළ යුතුය. 

ජාතිකවාදය ගෙන යන්නේ මොනතරම් විනාශයකටද යන්න දෙවන ලෝක යුද්ධයේ විනාෂය ඔවුන් තේරුම් ගන්නා ලදි. අද ඔවුන් එයින් පාඩම් ඉගෙන ගෙන යහපත් මිනිසුන් පිරිසක් ලෙස අන්අයගේ නිදහසක් ගරුකරමින් ජීවත්වීම පාප්තුමාගේ ගමන තුල සාක්ෂාත් කරනු ඇත. 

මාකස් ප්‍රියන්ත පෙරේරා.

01/12/2019

කිතුණු මර්ධනයට එරෙහි රතු බදාදා (Red Wednesday)

අද රතු බදාදා (Red Wednesday) දිනයයි. ලොව පුරාම මරාදැමු, වද හිංසාවට ලක්කළ, දුෂණයකල සහ තර්ජනයන්ට මුහුණපා සිටින කිතුනුවන් සමරමින් ලොව පුරාම කිතුනු දේවස්ථානවල රතු පැහැය ප්‍රදර්ශනය කිරීම අද සිදුකරයි. තවමත් ලෝකයේ වැඩියෙන්ම පීඩාවට පත්ව අති ජන කොටස කිතුනුවන් බව පසුගිය කාලය පුරාම වාර්තා වී ඇති සිද්ධීන් අතුරින් පෙනී යන්නක්. ලොව පුරාම රටවල් 50ක කිතුනුවන් 11 දෙනෙක් දිනකට මරාදමන තත්වයක් උදාවී තිබේ. ඒ තර්ජනයන්ට, දුෂණය කිරීම්වලට සහ වද හිංසනයන්ට ගොදුරුවුන්ට අමතරවය. විශේෂයෙන්ම අප්‍රිකාවේ, මැද පෙරදිග, දකුණු ආසියාවේ සහ නැගෙනහිර ආසියාවේ කිතුනුවන්ට එරෙහිව එල්ලවී ඇති අනතුර වඩා වේගයෙන් ඉහල ගොස් ඇත.

ඒ අතරින් දකුණු සහ නැගෙනහිර ආසියාවේ තත්වය ක්‍රමයෙන් උග්‍ර අතට හැරෙමින් තිබේ. මන්දයත් අප්‍රිකානු සහ මැදපෙරදිග කලාපවල කිතුනුවන්ට බොහෝ සෙයින් තර්ජන එල්ලවී ඇත්තේ මුස්ලිම් අන්තවාදීන්ගෙන් පමණක් වුවත්, දකුණු සහ නැගෙනහිර ආසියානු කලාපවල කිතුනුවන්ට තර්ජන එල්ලවී ඇත්තේ මුස්ලිම් අන්තවාදයෙන් පමණක් නොව එකී කලාපයේ රටවල නැගී එන ආගමීක සහ වාර්ගික ජාතිකවාදීන්ගෙන් සහ අත්තනෝමතික පාලකයන්ගෙන්ද වීම නිසාය.

මුස්ලිම් අන්තවාදීන්ගෙන් මෙන්ම ආගමීක සහ වාර්ගීක ජාතිකවාදීන්ගෙන්ද, අත්තනෝමතික පාලකයන්ගෙන්ද පීඩාවට පත්ව ඇති කිතුණුවන් අතරට පාකිස්ථානය, ඉන්දියාව, පිලිපීනය, චීනය,උතුරු කොරියාව, බුරුමය (මියන්මාර්) මෙන්ම දැන් ශ්‍රී ලංකාවද ඇතුලත්ව ඇත. ඒ හුදෙක් පාස්කු ප්‍රහාරය නිසාම නොව පසුගිය කාලයේ පුරාම වර්ධනය වී ඇති තත්වයන්ද සැලකිල්ලට ගනිමින්. 2017 ජුනි මාසේදී ආණ්ඩුවේ ඇමතිවරයෙක්වූ විජේදාස රාජපක්ෂ මහතා මානව හිමිකම් නීතිවේදියෙකු වූ ලක්ෂාන් ඩයස් මහතාට රූපවාහිනී නාලිකාවක දිගහැරුණු සංවාදයකදී ප්‍රසිද්ධියේ තර්ජනය කිරීම මෙන්ම, හිටපු නීතිපති මොහාන් පීරිස්ට තර්ජනය කිරීමද, පල්ලිවලට සහ කිතුනු ආගමික ස්ථාන 50කට වැඩි ප්‍රමාණයකට පහරදීම, තර්ජනය කිරීම සහ විනාශ කිරීමත්, වලක්වාගත හැකිව තිබියදීත් ශ්‍රී ලංකා රාජ්‍යයේ නොසලකා හැරීම සහ ආරක්ෂාව නොසැලසීම නිසා ජීවිත 300 කට අධික ප්‍රමාණයක් බිලිගනිමින් 500 කට අධික ප්‍රමාණයකට තුවාල සිදුකල පාස්කු ඉරිදා ප්‍රහාරයත් සැලකිල්ලට ගනිමින් ශ්‍රී ලංකාව කිතුනුවන්ට එරෙහිව ඇති අනතුර ඉහල යන රටක් ලෙස සැලකීමට හේතුවී තිබේ.

ඉන්දියාව, බුරුමය, පාකිස්ථානයේ මෙන්ම ශ්‍රී ලංකාවේද ආණ්ඩුක්‍රම ව්‍යවස්ථාව මගින් ආගමික නිදහස තහවුරුකර තිබුනද, ක්‍රමයෙන් වර්ධනය වන ආගමික සහ වාර්ගික ජාතිකවාදී ප්‍රවණතා, අත්තනෝමතික පාලකයන්ගේ කටයුතු සහ ඉස්ලාමිය අන්තවාදීන්ගේ ක්‍රියාවන් නිසා එකී ආගමික නිදහස කිතුනුවන්ට අහිමිකරන තත්වයක් එම රටවල් සියල්ලේම ඇතිවී ඇත. ඊට අමතරව වෙනත් ආගම් අදහන අය හා මිශ්‍ර විවාහවලට එළබි තැනැත්තන්ට සිය කිතුනු විශ්වාසය සහ ඇදහිල්ල තුල ජීවත්වීමට අවස්ථාව අහිමිවීමත්, ඔවුන්ගේ දරුවන්ව පවා කිතුනු ඇදහිල්ලෙන් ඈත්කර තැබීමට ලක්කිරීමත් අවධානය යොමුවෙමින් පවතින තත්වයකි. මෙම ප්‍රවනතාවය ඉන්දියාව, බුරුමය, පාකිස්ථානයේ මෙන්ම ලංකාවේද ක්‍රමයෙන් ඉහල යමින් තිබෙන බව පෙනේන්නට තිබේ. ඒ කිතුනු සංස්කෘතික අංගයන් ක්‍රමයෙන් අතුගා දමමින් සිටීමට අමතරවය.

ලංකාවේ තත්වය දැන් ක්‍රමයෙන් ලගාවෙමින් ඇත්තේ පාකිස්ථානයේ කිතුණුවන්ට එරෙහි මර්ධනය හිස එසවූ 1980 අගභාගයේ තත්වයට යැයි ගණන් බලා ඇත. ඒ අනුව ලංකාවේ කිතුනුවන්ට උදාවෙමින් ඇත්තේ ඉතා දුෂ්කර තත්වයක් යැයි යන්න එහි නිගමනයයි.

ලොවපුරාම කිතුනුවන්ට එරෙහිව උද්ගතවී ඇති මෙම බිහිසුණු මර්ධනකාරී තත්වය ගැන ලොව පුරාම කිතුනුවන් දැනුවත් කිරීම මෙම රතු බදාදා (Red Wednesday) දිනයේ අරමුණුය. ඒ සදහා කතෝලික සභාව සියලුම ක්‍රිස්තියානි, අපෝස්තලික සහ ඉවන්ජලික් කිතුනු කණ්ඩායම් සමග එකට එක්ව කටයුතු කරන අතර කිතුනු සංහාරයට එරෙහිව එක් පෙරමුණක් ලෙස මුහුණදීමට තීරණය කර ඇත.

ඒ අනුව අද දිනයේදී ලොව පුරාම රාජ්‍යයන් ගණනාවක පාලකයින්ට සහ එක්සත් ජාතීන්ගේ සංවිධානයට ලොව පුරාම කිතුනුවන් මුහුණදී ඇති පීඩාවන්, මර්ධනයන්, දුෂණයන්, ඝාතනයන් සහ තර්ජනයන් ගැන පුර්ණ වාර්තාවක් ලබාදීමටද ඒ වෙනුවෙන් ක්‍රියාකරන සංවිධාන කටයුතු කරමින් සිටී. එකී සංවිධානවල ක්‍රියාකාරීත්වය නිසාම බුරුමයේ Kachin පළාතේ කිතුනුවන්ට, ඉන්දියාවේ සහ පාකිස්ථානයේ එරෙහිව එල්ලවී ඇති ඇතැම් තර්ජන සහ මර්ධනයන් පිටු දැකීමට යම් ආකාරයක නැබුරුවකට එකී රටවල පාලකයන්ගේ අවධානය යොමුකරවීමට සමත්ව ඇත.

කෙසේවුවද, කිතුනුවන්ට එරෙහිව ඇති තර්ජන සහ මර්ධන එලෙස ලේසියෙන් සහ ඉතා ඉක්මනින් ඉවත්වන බවක් පෙනී නොයයි. එසේ හෙයින් මෙම රතු බදාදා (Red Wednesday) දිනයේදීවත් කිතුනු සංහාරය ගැන අවධානයෙන් සිටින්න.

''එබැවින්, සහෝදරයෙනි, ආසියාවේදී අපට පැමිණි පීඩාව ගැන නුඹලා නොදැන සිටිනවාට නොකැමැත්තෙමුව. එනම් ජීවිතය ගැන පවා අපට බලාපොරොත්තුවක් නැති තරමට, උසුලන්ට බැරි පමණ, අප පිටට බර පැමුණුණ බවය(2 කොරින්ති 1:8)'' (We do not want you to be uninformed, brothers and sisters,[a] about the troubles we experienced in the province of Asia. We were under great pressure, far beyond our ability to endure, so that we despaired of life itself.'' - 2 Corinthians 1:8).

''If they persecuted me, they will persecute you also.'' (John 15; 20.)

මාකස් ප්‍රියන්ත පෙරේරා.

27/11/2019

පොහොට්ටුව මීගමුවේදී පැරදුනේ ඇයි?

පොහොට්ටුවෙන් තරගකළ ගෝඨාභය රාජපක්ෂ මහතා සිංහල-බෞද්ධ ප්‍රදේශවල අතිවිශිෂ්ඨ ජයග්‍රහණයක් ලැබුවද මීගමුවේදී දරුණු පරාජයකට ලක්විය. ඒගැන ගෝඨාභය රාජපක්ෂ මහතා රටපුරාම විශිෂ්ඨ ජයග්‍රහණයක් ලැබීමටත් වඩා විශාල ගෝෂාවක් පැන නැගී ඇත. 

මීගමුවේ මැතිවරණ ප්‍රථිපලය ගැන පොහොට්ටු පාක්ෂිකයින් කෙතෙක් කිපී අදත්දැයි කිවහොත් ඔවුහු සිය facebook පිටුවල 1. "මීගමුවේ එවුන්ට බෝම්බ ගහලත් උන් බෝම්බකාරයන්ටමයි වෝට් කරලා තියෙන්නේ"  2. "මීගමුවට බෝම්බ ගහල මදි වගේ" 3. "මීගමුවේ එවුන්ට බෝම්බ කාලත් ලැජ්ජ නැහැ"  4. "මීගමුවට බෝම්බ පිට බෝම්බ ගැහුවත් මදි"  5. ''සහරාන් මචෝ මීගමුවේ තව පල්ලි තියෙනවා''  6. ''තව එක පල්ලියකට දෙකකට වදිනවා නම් දැනෙන සතුට කියලා නිම කරන්න බැහැ'' 7. ''මීගමුවට පරමාණු බෝම්බයක් ගහන්න ඕනේ නැත්තටම නැතිවෙලා යන්න'' 8. ''මීගමුවේ චන්ද ප්‍රථිපලයෙන් පේන්නේ දෙමෙල්ලු, හම්බයෝ විතරක් නෙමේ කුරුසකාරයින්වත් අතුගාලම දාන්න ඕනේ'' ආදියද, ඊට අමතරව ''අවජාතක'', ''කලවම්'', ''සුද්දට ඇල්ලුව'', ''පරගැති බල්ලෝ'' ආදී සැහැසික, මේලේච්ච, කෘර, වර්ගවාදී, තිරිසන්, අමානුෂික සහ තුච්ඡ ප්‍රකාශ රාශියක් මුදාහැර තිබුණි. 

  

ඒකී පහත්, නින්දිත ප්‍රහාරයන්ට මුහුණදී ගත නොහැකිව හෝ එකී මැතිවරණ ප්‍රතිපලවලට තමන්ගේ සම්බන්දයක් නැති බව කීමට හෝ ඇතැමුන් සිය facebook පිටුවල 1. ''අපිට මීගමුවේ කියන්නත් ලැජ්ජයි'' 2.''කටුවපිටිය තියෙන්නේ මීගමුවේ නෙමේ කටානේ, කටාන පොහොට්ටුව දින්නනේ''  3.  ''මීගමුවේ හැම ජාතියක්ම ජීවත්වෙනවා ඔය මුස්ලිම් මිනිස්සුන්ගේ ජන්දවලින් තමයි හංසයා දින්නේ'' ආදී ලෙස මුස්ලිම් ජනයා බිල්ලට දී තමන්ගේ මුහුණ හොද කරගැනීමට හෝ උත්සහ දැරූවන්ද විය. 

එහෙත් ඇත්ත තත්වය නම් මීගමුවේ චන්ද ප්‍රතිපලය හුදෙක් මුස්ලිම්, ක්‍රිස්තියානි හෝ බෞද්ධ ජන්ද ප්‍රතිපලයක් නොව මීගමුවේ අනන්‍යතාවය නියෝජනයවූ ජන්ද ප්‍රතිපලයක් බව එහි ප්‍රතිපල විශ්ලේෂණය කිරීමේදී පෙනී යයි. මට ලැබී ඇති චන්ද ගණන් කිරීමේ  මධ්‍යස්ථානවල ප්‍රතිපල වාර්තා මෙසේය:

1. චන්ද කොට්ටාශ 8, 16, 24, 32, 40, 48, 56, 64, 72, 77 ඇතුලත්වූ    ශාලා අංක 17; 

        අනුර - 533  සජිත් -5116 ගෝඨාභය 4089.

2.  චන්ද කොට්ටාශ 7, 15, 23, 31, 39, 47, 55, 63, 71, 76 ඇතුලත්වූ ශාලා අංක 16; 

        අනුර - 503  සජිත් -6109 ගෝඨාභය 3654. 

3.  චන්ද කොට්ටාශ 6, 14, 22, 30, 38, 46, 54, 62, 70, 78 ඇතුලත්වූ ශාලා අංක 15; 

        අනුර - 429  සජිත් - 6179 ගෝඨාභය 3843.

4.  චන්ද කොට්ටාශ 05, 13, 21, 29, 27, 45, 53, 61, 69, ඇතුලත්වූ ශාලා අංක 14; 

        අනුර - 577  සජිත් -5649 ගෝඨාභය 3040. 

5. චන්ද කොට්ටාශ 24, 12, 20, 38, 44, 58, 60e, 60g, 68 ඇතුලත්වූ ශාලා අංක 13; 

        අනුර - 437  සජිත් -5414 ගෝඨාභය 4021. 

6. චන්ද කොට්ටාශ 3, 11, 19, 27, 35, 43, 51, 59, 67, 75 ඇතුලත්වූ ශාලා අංක 12; 

        අනුර - 555  සජිත් -5184 ගෝඨාභය 4440.

7.  චන්ද කොට්ටාශ 2, 10,18, 26, 34, 42, 50, 58, 66, 74 ඇතුලත්වූ ශාලා අංක 11; 

        අනුර - 554  සජිත් -5127 ගෝඨාභය 3823. 

8.  චන්ද කොට්ටාශ 1,9, 17, 25, 33, 41, 49, 57, 65, 73  ඇතුලත්වූ ශාලා අංක 10; 

        අනුර - 544  සජිත් -5263 ගෝඨාභය 4033. 

ඒ අනුව චන්ද ගණනය කල සෑම ශාලාවකම ප්‍රතිපල අනුව පෙනී යන්නේ එකී සෑම ශාලාවකම බහුතරය හිමිකර ගත්තේ සජිත් ප්‍රේමදාස මහතාය. එමෙන්ම ඉතා විශ්වාසනීය ලෙස පැවසිය හැක්කේ මීගමුවට අයත්වන කටුවපිටිය කොට්ටාශ දෙකද, කටාන ආසනයට අයත් කටුවපිටිය  කොට්ටාශද පැහැදිලිවම ජයගත්තේ සජිත් ප්‍රේමදාස මහතාය. මේ අනුව කිව හැක්කේ පාස්කු ඉරිදා ප්‍රහාරය සම්බන්දයෙන් ආණ්ඩුවට විරුද්ධව කෙතරම් විශාල ජනමතයක් ගොඩනැගුවද මීගමුවේ චන්ද දායකයින්ගේ චන්දය ප්‍රකාශකිරීම සම්බන්දයෙන් ඉන් විශාල බලපෑමක් සිදුකර නැති බවය. 

එසේ නම් මීගමුවේ චන්ද දායකයින්ගේ චන්දය ප්‍රකාශකිරීම සම්බන්දයෙන් පැහැදිලිවම බලපා ඇත්තේ කුමක්ද? 

මීගමුව කාලාන්තරයක් තිස්සේ එක්සත් ජාතික පක්ෂයේ බලකොටුවක් නිසා මීගමුව නිසැකයෙන්ම එක්සත් ජාතික පක්ෂයට හිමිවෙන්නේ යැයි පොදු කථාවක් තිබේ. එහෙත් 2010 පාර්ලිමේන්තු මැතිවරණයේදී මීගමුව ජයගත්තේ මහින්ද රාජපක්ෂ මහතා නායකත්වය දුන් එක්සත් ජනතා නිදහස් සන්ධානයයි. 1956දී ලංකා සමසමාජ පක්ෂයේ දොස්තර හෙක්ටර් ප්‍රනාන්දු මහතා මීගමුවේ ජය ලැබීය. 1947 ලංකාවේ මුල්ම මැතිවරණයේදී එක්සත් ජාතික පක්ෂය ජයගත්තද, ලංකා සමසමාජ පක්ෂයේ අපේක්ෂකයාවූ ව.ස. ප්‍රනාන්දු මහතා පරාජයවුයේ ජන්ද 800ක් තරම් සුළු ප්‍රමාණයකිනි. කෙසේවුවද, මීගමුවේ වැඩිම මැතිවරණ ප්‍රමාණයක් ජයගෙන ඇත්තේ එක්සත් ජාතික පක්ෂය විසිනි. එසේ එක්සත් ජාතික පක්ෂයට මීගමුවේ වැඩිම මැතිවරණ ප්‍රමාණයක් ජයගැනීමට හැකිවී ඇත්තේ ඇයි? එයට ඇත්තේ එක පිළිතුරකි. එනම් එක්සත් ජාතික පක්ෂය සියළු ජනකොටස්වලට සාධාරණව සලකන, සුළු ජාතීන්ට සමානව  සලකන, වර්ගවාදී හෝ ආගම්වාදී දේශපාලන ප්‍රතිපත්තියක් නොදරන ප්‍රධාන දේශපාලන පක්ෂයක්යැයි මීගමුවේ බුහුතර ජනයා විශ්වාස කිරීමය. මීගමුවේ පමණක් නොව දෙමළ ජනයා ජීවත්වෙන ප්‍රදේශවලද, මුස්ලිම් ජනයා ජීවත්වෙන ප්‍රදේශවලද එක්සත් ජාතික පක්ෂයට එවැනිම පිළිගැනීමක් ඇති බව මෙම ජනාධිපතිවරණ ප්‍රතිපල තුලින්ද පෙනීයයි. එම නිසාම ලංකාවේ සිංහල - බෞද්ධ බුහුතරයේ දේශපාලන අභිලාෂය නියෝජනය කල ගෝඨාභය රාජපක්ෂ මහතා දෙමළ සහ මුස්ලිම් ජනයා බහුලව ජීවත්වෙන ප්‍රදේශවල අන්ත පරාජයක් ලබන අතරේ එක්සත් ජාතික පක්ෂය පෙරටුකරගත් ප්‍රජාතන්ත්‍රවාදී සන්ධානය අති විශාල ජයක් ලැබීය. එහෙත් සිංහල භාෂාව කථා කරන ප්‍රදේශ අතර පිහිටි මීගමුව එසේ වෙන්නේ ඇයි? (අවශ්‍යනම් කොලබ දකුණේ සිට වත්තල ආදී ප්‍රදේශද එසේ ජය ගන්නේ ඇයි යන්නටද දිය හැකි පිළිතුරද මේ සමග කැටිකොට තිබේ)   

ඕනේ නම් ඕනෑ කෙනෙකුට විවාද කල හැකිවුවද, මීගමුවේ  චන්ද දායකයින්ගේ ඉහත චන්දය ප්‍රකාශ කිරීමට බලපානුයේ මීගමුවේ ඇති අනන්‍යතාවය. මීගමුවේ එකී අනන්‍යතාවය ගොඩනැගී ඇත්තේ කතෝලික-ක්‍රිස්තියානි පදනම තුලය. ශ්‍රී ලංකාව සිංහල බෞද්ධ රටක් ලෙස දැක්වුවද ලංකාවේ සිංහල-බෞද්ධ නොවන ප්‍රදේශ රාශියක් තිබේ. මීගමුවද ඉන් ප්‍රධාන එකකි. මීගමුව සිංහල-බෞද්ධ අනන්‍යතාවය තුල නොව කතෝලික-ක්‍රිස්තියානි සංස්කෘතිය අනන්‍යතාවය මත ගොඩ නැගුන නගරයකි. එය සිංහල නගරයක්වත්, දෙමළ නගරයක්වත් නොව ක්‍රිස්තියානි නගරයකි. මීගමුව යනු සිංහල, දෙමළ මෙන්ම බර්ගර් කතෝලික-ක්‍රිස්තියානි ජනයා පුංචි රෝමය ලෙස සලකන ක්‍රිස්තියානි නගරයකි.  මීගමුවේ ජන මනස ගොඩනැගී ඇත්තේ ක්‍රිස්තියානි අනන්‍යතාවය මත මිස බෞද්ධ හෝ හින්දු හෝ මුස්ලිම් පදනම් මත නොවේ. ක්‍රිස්තියානි අනන්‍යතාවය යනු කන-බොන-ජොලිකරන මිනිස්සු ලෙස වඩා ජනප්‍රියව දැක්වුවද එහි ඇත්ත හරය දෙවියන් අදහන, දසපනත අනුව දිවිගෙවිය යුතුයැයි පිලිගන්නා, අසල්වැසියාට ප්‍රේම කරන, සතුරාට පවා සමාව දීම මුලික හරය කරගත් අනන්‍යතාවයකි. මෙකී කතෝලික-ක්‍රිස්තියානි අනන්‍යතාවය මීගමුවේ මුල් බැසගත් අනන්‍යතාවය ය.  එම නිසාම කවුරු කෙසේ උත්සහ කලද සහරාන්ලාගේ බෝම්බ නිසා සිය අසල්වැසි මුස්ලිම් ජනයා කෙරෙහි වෛර බැද නොගත්තේය. මුස්ලිම් ජනයා පිටුදැකීම  නොකල, ඒ වෙනුවට අන්තවාදය පිටු දැක්ක පිරිසකි. එම නිසා පාස්කු බෝම්බ ප්‍රහාරයෙන් කිතුනු ජනයා සහ මුස්ලිම් ජනයා අතරේ වෛරයක් ඇතිකිරීමට උත්සහකලේ නම් එය පැහැලිවම මීගමුව තුල ක්‍රියාත්මක කල නොහැකි බව පෙන්වා දී ඇත්තේ වෛරය වෙනුවට ප්‍රේමය සහ සමාවදීම නම්වූ කිතුනු වටිනාකම් මීගමුව තුල මුල්බැසගෙන අති නිසාය. ඒ අර්ථයෙන් ගත්කල එය එක්තරා ආකාරයකට කාදිනල්තුමා පසුගිය කාලය පුරාම මීගමුවේ නැවත නැවත දේශනාකළ ප්‍රේමය, සාමය, සමාවදීම, සහෝදරත්වය ආදීය යලිත්වරක් ස්ථාපිතවී ඇති බවටවූ ප්‍රකාශනයක් ලෙසද සැලකිය හැක.

මේ මැතිවරණය සම්බන්දයෙන් කතෝලික රදගුරු සම්මේලනයේ අදහසක් ලෙස ඉදිරිපත්වී තිබුනේ 1. ජාතිවාදය පිටු දකින, 2. ප්‍රජාතන්ත්‍රවාදය සුරකින නායකයෙක් පත්කරගන්න යන්නය. එය එක් පක්ෂයක අපේක්ෂකයෙක් ඉලක්ක කරගත්තක් නොවීය. පැහැදිලිවම පොදු මුලික යහපත් අරමුණක් මුල්කරගත්තකි. මීගමුවේ චන්ද දායකයෝ එය අකුරටම පිළිපැද ඇත. 

එමෙන්ම, පාස්කු ඉරිදා ප්‍රහාරයෙන් විපතට පත්වී ඇති අපේ ජනයාගේ ලේ කදුළු දේශපාලන වාසි සදහා යොදා ගැනීමට පොහොට්ටුව සහ ඔවුන්ගේ නියෝජිතයින්වූ ලන්සලාව ප්‍රතික්ෂේප කිරීමක්ද මීගමුවේ චන්ද ප්‍රතිපල තුල නිරූපණය වේ. ලන්සලාගේ ගම වන වැල්ලවීදියේ සා. සෙබස්තියන් විද්‍යාලයේ ජන්ද පෙට්ටියෙන් පවා ලන්සලාගේ පොහොට්ටුව චන්ද 300කින් පරාජයවිය. කුඩාපාඩුවේ තත්වයද එසේමය. පාස්කු ඉරිදා ප්‍රහාරය අලෙවි කරමින් දේශපාලන වාසි සෙවූ ඔවුන්ට මීගමුවේ ජනයා පැහැදිලි උත්තරයක් ලබාදී ඇත. සිය ජාවාරම් දිගටම කරගෙනයෑමට අවශ්‍ය දේශපාලන ශක්තිය ලබා ගැනීමට පාස්කු ප්‍රහාරයෙන් විපතට පත් ජනයාගේ දුක්සෝ කදුළු අලෙවිකල ඔවුන්ව ගෝඨාභය රාජපක්ෂ සමගම  මීගමුවේ ජනයා ප්‍රතික්ෂේප කර තිබේ.  ''මතකද 21/4?'' යනුවෙන් ගෝඨාභයගේ පොස්රටයක් මීගමුවේ ඇලවුයේද ඔවුන්ය. එය කිතුනු ජනයා තේරුම් ගත්තේ එක්තරා ආකාරයක තර්ජනයක් ලෙසය.  මෙසේ පෝස්ටර් අලවමින් සිටි පොහොට්ටුවේ ආධාරකරුවන් පිරිසක් 13/11/19 දින මීගමුවේදී හසුවිය. ඔවුන්ට පෝස්ටර් ගැසීමට දී ඇත්තේ කවුදැයි ඔවුන් හෙළිකර තිබේ.  පාස්කු ඉරිදා ප්‍රහාරයෙන් අපේ මිනිසුන්ටවූ විනාසයෙන් පවා දේශපාලන වාසි සොයන තත්වයට පොහොට්ටුව මෙන්ම ලන්සලාද ඇද වැටී තිබීම ගැන මීගමුවේ ජනයා සිටියේ දැඩි පිළිකුලකිනි. එම නිසාම පාස්කු ඉරිදා ප්‍රහාරය පිටුපස පවා ඔවුන්ගේ සැගවුණු හස්තයන් තිබීමට ඉඩඇති බව ඇතමේක් සැකකළේය. හලාවත ධීවර ඇන්ටනීට සහ කටුනායක රොෂේන් චානකට වෙඩි තබා ඝාතනය කිරීම, රතුපස්වල වතුරු ඉල්ලු ජනයාට පල්ලියට පැන පහරදීම ආදිය ගැන මීගමුවේ ජනයාට තවම අමතකව නැත. කිතුනුවන් සිය පීඩකයා ගැන  නිතර අවධානයෙන් සිටී. ඔවුහු යක්ෂයාගේ දුෂ්ටකම්වලටත් ඔහුගේ සතුරුකම් ගැනත් අමතක නොකර පරීක්ෂාවෙන් සිටී. එහින් දුෂ්ට දේශපාලන ව්‍යාපෘතිවලින් බලය සොයන්නේ මොකාද යන්න ඔවුන්ට පහසුවෙන්ම හදුනාගත හැක. නාග ලොවින් නොව, කපාල කන්දෙන් ධාතු ගෙනාවා කීවද ඔවුන් රැවටිය නොහැක. 

මීට අමතරව 14/11/19 දින කටාන ප්‍රදේශයේ මුස්ලිම් පිරිසකට ''චන්දේ දෙන්න ගියොත් බලාගෙනයි'' යනුවෙන් තර්ජනය කිරීමට ගිය කාණ්ඩායමක එකෙක් අල්ලාගත් බව මුස්ලිම් ජනයා අතර මෙන්ම බෝලවලාන, කුරණ ආදී ප්‍රදේශවල කිතුනු ජනයාටද දැන ගැනීමට ලැබී තිබේ. ජනයාගේ නිදහස් කැමැත්තට මේ ලෙස සිදුකරන අනිසි බලපෑම් නිදහස, සාමය සහ සහෝදරත්වය අගයන මීගමුවේ ජනයා දැඩිව ප්‍රතික්ෂේප කළේය.

තවද චන්දයට පෙරදින කොලබ අගරගුරු නිවසින් නිකුත්කළ video පටියක් තුලින් පියතුමෙක් දක්වා තිබුනේ කතෝලික ප්‍රදේශවල කතෝලික පියතුමන්ලා මෙන් ලෝගුවක් පැලදී පුද්ගලයින් දේශපාලන වේදිකාවට නංවා පාස්කු ප්‍රහාරයට විරුද්ධව පොහොට්ටුවට චන්දේ දෙන්න යැයි ඉල්ලන වැඩසටහනක් දියත්වී ඇති බවත් එහෙත් කතෝලික සභාවේ කිසිම පියතුමෙකු එසේ කිසිම දේශපාලන වේදිකාවකට ගොඩවී නැති බවත් දක්වන ලදී. ඒවා මිනිස්සු නොමග යැවීමට කරන දේවල් ලෙසත්, පාස්කු ප්‍රහාරයෙන් දේශපාලන උවමනාවන් ඉෂ්ට කරගැනීම නවත්වන ලෙසත් ඉල්ලා සිටියහ. 

ඒ වන විටද අපේ පළාතේ මන්ත්‍රී කෙනෙකු වන කුප්‍රකට නිමල් ලාන්සා මහතා ඔහුගේ Facebook පිටුවේ රදගුරුවරයෙක් කිව්වේ යැයි කියා ගෝඨාභයට ජන්දේ දෙන ලෙස ඉල්ලා සිටින වීඩියෝවක් නිකුත්කර තිබුණු. ඔහු එ සදහා යොදාගත් රදගුරුවරයාවුයේ කතෝලික රදගුරුවරයෙක් නොවූ, එංගලන්ත සභාවේ සිටි, මුදල් වංචාවක් නිසා එම සභාවෙන් ඉවත්කළ  තැනැත්තෙකි. මහා කතෝලික මන්ත්‍රීවරයෙක් ලෙස තමාව හදුන්වා ගන්නා නිමල් ලාන්සා, මෙන්ම ඔහුගේ සහෝදරයා වන මීගමුවේ චන්ද බලයෙන් නොව සල්ලි බලයෙන් නගරාධිපතිවූ දයාන් ලන්සාත්, පාස්කු ප්‍රහාරයෙන් දේශපාලන වාසි ලබාගැනීමට පාස්කු ප්‍රහාරය විකුණන්නේ ඇයි? ආගම බේරාගැනීමටද? කතෝලිකයින්ව බේරාගැනීමටද? නැතිනම් ඔවුන්ව බේරා ගැනීමටද? ඔවුන්ගේ ජාවාරම් බේරාගැනීමටද? තමන්ගේ නිවසේ නීතිවිරෝධී ද්‍රව්‍ය ඇතයි සිතා තමන්ගේ නිවසට පොලිස් විශේෂ කාර්ය බලකාය යොදා වැටලීමක් කරමින් ඔවුන්ගේ පරම්පරා ගණනාවකට මහා නින්දාවක් කල ගෝඨාභය රාජපක්ෂව ජනාධිපති කරවන්න ලන්සලා දගලන්නේ මීගමුව තවත් විනාශ කරදීමීටදැයි යන සැකය මීගමුවේ ජනයා තුල නිතර කැසකැවුණු ප්‍රශ්නයක්විය. 

මේ සියලු කරුණු සැලකිල්ලට ගැනීමේදී මීගමුවේදී ගෝඨාභය රාජපක්ෂ දරුණු පරාජයකට පත්වීම නොවැලක්විය හැක්කකි. එසේම ගෝඨාභයගේ පරාජයෙන් අනතුරුව මීගමුවේ ජනයාට එල්ලවූ තර්ජන ගර්ජන සහ නින්දිත ප්‍රහාර හමුවේ මීගමුවේ ජනයාට තමන් කවරහුද? ඔවුන් නියෝජනය කරන අනන්‍යතාවය කුමක්ද? යන්න තේරුම්ගැනීමටද අවස්ථාවක් උදාවිය.  නිදහසින් පසු ක්‍රියාත්මකවූ මීගමුවේ ජනයාගේ සැබෑ අනන්‍යතාවයවූ කතෝලික-ක්‍රිස්තියානි අනන්‍යතාවය ක්‍රමයෙන් දියකර හරිමින් සිංහල-කතෝලික යනුවෙන් එහෙටත් නැති, මෙහෙටත් නැති, ව්‍යාජ අනන්‍යතාවයක් ගොඩනැගීමේ ව්‍යාපෘතියද හෝදා යන ලදී. පැහැදිලිවම කියන්නේ නම් මේම ජනාධිපතිවරණය මීගමුවේ ජනයාගේ  කතෝලික-කිතුනු අනන්‍යතාවය වඩ වඩා සහතික කල, වඩ වඩාත් ඔවුන්ගේ සිත් තුලට කාවැද්දු ජනාධිපතිවාරණයක් විය. ජනාධිපතිවරණයේ ප්‍රතිපල නිකුත්වෙන විට ''බෙදුන දේශයක, බහුතරයේ ආධිපත්‍යට එරෙහිව සුළුතරයේ ප්‍රතිවිරෝධය දැක්වූ ජන්දයක්'' යැයි මගේ Facebook පිටුවේ මම සදහන් කලේ ඒ නිසාය. 

කෙසේවුවද දැන් මීගමුව වඩ වඩා පරික්ෂාකාරී විය යුතුය, ඒ යක්ෂයාගේ හෝරාවා පැමිණ ඇති නිසාම නොව සතුරන්ද අප අතරම වන නිසාය. 

මීගමුවට ජයවේවා !! සුළු ජන කොටස්වල අයිතිවාසිකම් ආරක්ෂා වේවා!! පීඩිතයින්ට විමුක්තිය අත්වේවා!! සියළු ජනයා සාමයෙන්, සහෝදරත්වයෙන් පසුවේවා!!!

මාකස් ප්‍රියන්ත පෙරේරා

18/11/2019 

නුවර ටවුමේ මුස්ලිම් ස්කෝලයක් හදලා දෙන්නවා කිව්ව මහින්දානන්ද නාවලපිටියේ සා.මරියා පාසලේ නම වෙනස් කිරීමටත් පොරොන්දුවෙලා

මහනුවර ටවුමේ 10%යක් වන ගෝඨාභය රාජපක්ෂගේ ජන්ද පදනම 25% දක්වා වැඩිකර දෙන්නේනම් මුස්ලිම් ජනයාට මුස්ලිම් පාසැලක් මහනුවර නගරයේ ඉදිකරදෙන බව පොහොට්ටුවේ මහනුවර මන්ත්‍රී මහින්දානන්ද අළුත්ගමගේ  පවසන වීඩියෝවක් පසුගියදා සමාජ මාධ්‍යයන්ට මුදාහැර තිබුණි.

ඔහු එසේ ප්‍රකාශ කිරීමට පෙර පවා, පසුගිය පාර්ලිමේන්තු මැතිවරණ කාලයේ සිට, ඔහුගේ ආසනය වන නාවලපිටියේ පිහිටි සා. මරියා පාසැලේ නම වෙනස් කර දෙන බවට එම ප්‍රදේශයේ මුස්ලිම් කොටසකට පොරොන්දුවී ඇති බව දැනගැනීමට ලැබුණි.

නාවලපිටියේ සා. මරියා පාසැල යනු නාවලපිටිය සා. මරියා කතෝලික පල්ලියට අනුබද්ධව 1915 දී පිහිටවූ කතෝලික පාසැලකී. කදිරේෂන් හින්දු විද්‍යාලය, අනුරුද්ධ බෞද්ධ පාසැල ආදී පාසැල් අතරින් නාවලපිටිය සා.මරියා පාසැලට වැඩි අවධානයක් එකල යොමුවූයේ එහි පැවති කිතුනු අධ්‍යාපනයත්, නාවලපිටිය සා. මරියා පල්ලියේ සහ පියතුමාගේ දායකත්වයත්, Young Mariyans පාපන්දු කණඩායම ආදිය ඔස්සේ විනය, අධ්‍යපනය, ක්‍රීඩාව ආදී ක්ෂේත්‍රවලට ප්‍රසිද්ධවීම නිසාය. ආරම්භයේ සිටම සුවිශේෂ නමක් දිනාගත් මෙම පාසැල ප්‍රදේශයේ කිතුනු ජනයා සදහා පමණක් නොව කිතුනු නොවන ජනයා සදහාද වීවෘතවූ මිශ්‍ර පාසැලක් විය.

එම නිසාම නාවලපිටිය නගරයේ ක්‍රමයෙන් වර්ධනයවූ මුස්ලිම් ජනයාගේ දරුවන් වැඩි වශයෙන් මෙම විදුහලට ඇතුල්කිරීම සිදුවූ අතර අද වනවිට එහි වැඩි වශයෙන් ඉගෙනුම ලබන්නේ මුස්ලිම් සිසුසිසුවියන්ය. එම විදුහලේ ප්‍රධාන දොරටුවට ඉහලින් සා. මරියාතුමියගේ සුරුවමක් තිබුනද, ඇතුල් ශාලා කිහිපයකම කුරුස සලකුණ තිබුනද, එය දැන් මුස්ලිම් විදුහලක්යැයි ප්‍රදේශවාසින් කියති. එවැනි තත්වයක් තුල තවදුරටත් සා. මරියා වැනි කිතුනු නමකින් එම පාසැල හැදින්වීම තේරුමක් නැතයි යන අදහසක්ද ප්‍රදේශයේ රැඩිකල් මුස්ලිම් තරුණ කොටසකගෙන් මතුවී තිබුණි.

එම අදහස වඩා දළුලා ඇත්තේ නාවලපිටිය ආසනයේ පොහොට්ටුවේ සංවිධායකයාවන මහින්දානන්ද අළුත්ගමගේ මහතා නාවලපිටිය සා. මරියා පාසැලේ නම වෙනස් කරදීමට තමා කටයුතු කරන බව දැක්වීම තුලය. අළුත්ගමගේ මහතා වරක දක්වා ඇත්තේ නාවලපිටිය කදිරේෂන් හින්දු විද්‍යාලයට තමා ඉඩම් පවා ලබා දුන්නද, අනුරුද්ධ බෞද්ධ පාසැලට ගොඩනැගිලිපවා ලබා දුන්නද, ප්‍රදේශයේ මුස්ලිම් ජනයාට එසේ යමක් කර නැති නිසා අඩුම තරමින් මුස්ලිම් දරුවන් දැන් බහුලව සිටින නාවලපිටිය සා. මරියා පාසැලේ නම වෙනස්කර මුස්ලිම් ජනයාට කැමති නමක් දාගැනීමට හෝ ඉඩදෙන බවය.

මහින්දානන්දගේ සහය ලැබූ මුස්ලිම් තරුණ කණ්ඩායමක් පසුගිය කාලයේදී විදුහලේ ඇති සා. මරියතුමියගේ සුරුවම ගලවා දැමීමට සහ ශාලාවල ඇති කුරුස සහ සුරුවම් ගලවා දැමීමට උත්සහකලද ප්‍රදේශයේ ජනයාගේ, පල්ලියේ සහ පොලීසියේ මැදිහත්වීමෙන් එම උත්සහය ව්‍යාර්ත කෙරුණි.

දැන් අළුත්ම තත්වය වී ඇත්තේ නාවලපිටියේ සහ අවට ප්‍රදේශවල මුස්ලිම් ජනයා මෙවර ගෝඨාභය රාජපක්ෂ මහතා දිනවීමට පොහොට්ටුවට චන්දය දෙන්නේ නම් අනිවාර්යෙන්ම නාවලපිටිය සා. මරියා විදුහලේ නම වෙනස්කිරීමට ඔවුන් කටයුතු කරන බවට රාවයක් පතුරුවා හැරීමයි.

පැහැදිලිවම මහින්දානන්ද අළුත්ගමගේ මහතාට ගෝඨාභය රාජපක්ෂ මහතා බලයට ගෙන එමට අවශ්‍ය ඔහුට විරුද්ධව ඇති නඩුවලින් බේරීමට බව ප්‍රදේශවාසීන් දනී. එමෙන්ම සා. මරියා විදුහලේ පමණක් නොව දැන් මුස්ලිම්වරුන්ගේ ක්‍රීඩා සමාජයක්වී ඇති නාවලපිටිය Young Mariyans පාපන්දු කණඩායමේ නමවත් වෙනස්කිරීමට ප්‍රදේශයේ බොහෝ මුස්ලිම් ජනයා පවා අකැමතිව සිටී. මන්දයත් එකී නම් වලට ඇති කීර්තිනාමය නම වෙනස්කිරීම තුල මුළුමනින්ම අහෝසිවී යන නිසාය.

එවැනි තත්වයක් තුල සිය පෞද්ගලික වාසි සදහා ජාතිවාදී, ආගම්වාදී කාණ්ඩයම්වලට වරදාන දෙමින් ජාතිවාදය සහ ආගම්වාදය පතුරුවමින් මෙම මහින්දානන්දලා ප්‍රමුඛ ගෝඨාභය පෙරටුකරගත් පොහොට්ටුවේ දේශපාලනය පැහැලිවම පරාජය කලයුතුය.

මාකස් ප්‍රියන්ත පෙරේරා.

ගෑස් හිගය සහ පොහොට්ටුවේ ජනාධිපතිවරණ උපාය මාර්ගය

ගෑස් හිගයක් හදලා ජනාධිපතිවරණයක් දිනන්න පුලුවන්ද? මම හිතන්නේ බැහැ. මොකද, ලංකාවට ගෙන්වන මුළු LPG (Liquefied petroleum gas) ගෑස් ප්‍රමාණයෙන් 88% (169,000Mts) ක් භාවිතා කරන්නේ ගෘහ ආශ්‍රිතව ඉවුම් පිහුම් කටයුතු සදහා උනත්, හෝටල් සහ කර්මාන්ත මට්ටමින් ගෑස් භාවිතා කරන්නේ 11%ක් (20,000Mts) සහ ප්‍රවාහනය සදහා භාවිතා කරන්නේ 1% (2,000) විතර ප්‍රමාණයක් උනත්; රටේ ජනතාවගෙන් තවමත් ගෘහ ආශ්‍රිතව ඉවුම් පිහුම් සදහා ගෑස් පාවිච්චි කරන්නේ ජනග්‍රහණයෙන් 30% ක් විතරයි. ඒ අයගෙනුත් අතිබහුතරයක් ඉන්නේ බස්නාහිර පලාතේ. කොටින්ම ගෑස් හිගයක් රටේ වැඩිපිරිසක් වන ග්‍රාමීය ජනයාට සිදුකරන බලපෑම ඉතාම සීමිතයි.

ලංකාවට ගෙන එන ගෑස්වලින් වැඩි හරියක් ඉවුම් පිහුම් සදහා භාවිතා උනත්, ගෑස් භාවිතා කරන අයගෙන් වැඩිදෙනෙක් ඉවුම් පිහුම් සදහා ගෑස් විතරක්ම භාවිතා කරන, වෙනත් කිසිම ද්‍රව්‍යයක් ඉන්ධන ලෙස භාවිතා නොකරන, පිරිස ඉතා ස්වල්පයයි. ලංකාවේ ගෑස් භාවිතා කරන බොහෝ දෙනෙක් ගෑස් භාවිතා කරන්නේ හදිස්සියට, ඉක්මනින් යමක් උයාගන්න විතරලු. ගෑස් එක ගෙදර තියෙන අතරේ තවමත් ඉවුම් පිහුම් සදහා වැඩියෙන්ම භාවිතා කරන්නේ දරළු. ඒ කියන්නේ ගෑස් භාවිතා කරන අයගෙත් වැඩි හරියකටත් ඉවුම් පිහුම් සදහා ඉන්ධනමය වශයෙන් ගෑස්  අත්‍යවශ්‍යම නැහැ. ඒ නිසා ගෑස් හිගයක් හදලා ලංකාවේ ජන්දවලට කරන්න පුළුවන් බලපෑම අල්පයි.

අනෙක් අතට ඉවුම් පිහුම් සදහා ගෑස් වැඩිපුරම භාවිතා කරන බස්නාහිර පළාතේ නගරබද, මධ්‍යම පාන්තික ජනයාගේ දේශපාලන තීන්දු තීරණ ගැනීමේදී එකවර, මැතිවරණයේ පස්වන සතියේ, ඇතිවෙන ගෑස් හිගයක් ඇතිකරන බලපෑම සීමා සහිතයි. මොකද ඉහල දේශපාලන සබුද්ධිකතාවයක් තියෙනවායි කියන එකී පිරිස පසුගිය කාලේ පුරාම සිදුවුණු වැඩ වර්ජන රැල්ල ගැන යම් කිසි විචක්ෂණයකින් තමයි පසුවෙන්නේ.

ඕනේ නම් ගෑස් හිගයක් තුලින් හරි, නැතිනම් එසේ මවාපෑම තුලින් හරි, කරන්න පුළුවන් එකම දේ තමයි රටේ ප්‍රශ්නයක් ඇති කිරීම හෝ ප්‍රශ්නයක් තියෙන බව පෙන්වීම පමණයි. එසේ කිරීමෙන් ආණ්ඩුවේ අසමත්කම පෙන්වීමට හැකියි. පසුගිය කාලේ පුරාම පොහොට්ටුවේ දේශපාලන උපාය මාර්ගයවුනේ ඒක. කෙසේ හෝ කුමන තත්වයක් යටතේ හෝ රටේ ප්‍රශ්නයක් මතුකරලා, ඇතිකරලා, නැතිනම් මවලා පෙන්වලා හරි ආණ්ඩුව අසාර්ථකයි කියලා පෙන්වන්න හදන ඒක තමයි ඒ අයගේ දේශපාලන උපාය මාර්ගය වුනේ. ඒ උපක්‍රමය යම් විදිහකට හරි සාර්ථක වෙන්නේ ආණ්ඩුව ප්‍රතිචාර දැක්වීමේදී දක්වන මන්දගාමී තත්වය තුලයි. ආණ්ඩුවට ඕනේ නම් මේ වෙලාවේ උනත් කරන්න පුළුවන් ගෑස් කවුරු හරි හංගන් ඉන්නවා නම් වැටලීම් කරන ඒක. එහෙම කරලා ගෑස් හංගන් ඉන්නේ කවුද කියලා පෙන්වන ඒක. නැතිනම්, ගෑස් නැත්නම් වහාම ගෑස් ගෙන්වන ඒක. එහෙම නැතිව ''රාජපක්ෂලා බලය ගන්න මොනවද නොකරන්නේ?'' කියා කියා ඉන්න ඒක විතරක් සෑහෙන්නේ නැහැ.

අනෙක් අතට ගෑස් හිගයක් ඇතිකිරීම තුල හෝ එසේ මවාපෑම තුල පොහොට්ටුව කිසියම් දේශපාලන වාසියක් අත්කරගන්න උත්සහකරනවා නම් එකත් එච්චරම සාර්ථක නැහැ. මොකද එකෙන් රටේ බහුතරයකට කලහැකි බලපෑම ඉතා සීමා සහිතයි. ඕනේ නම් නාගරික ජනයාට යම් බලපෑමක් කල හැකියි. පසුගිය කාලය පුරාම සිදුවූ වැඩවර්ජන, කොළබ පාරවල් අහුරා කරන පෙළපාලි, සහ අනෙකුත් ආණ්ඩු විරෝධී ක්‍රියාමාර්ග පොහොට්ටුවේ දේශපාලන උවමනාව උඩ සිදුවුවක් නම් පැහැදිලිවම කිව යුත්තක් තමයි ඒවායේ බලපෑ වැඩියෙන් සිදුවුයේ නාගරික ප්‍රදේශවලට විතරයි. ඇත්තටම පොහොට්ටුවේ ජනාධිපතිවරණ ප්‍රතිපත්ති ප්‍රකාශණය පවා නාගරික මැද පන්තිය මුල් කරගත්තක්. දිළිදු ජනයා ගැන දක්වන අවධානය ප්‍රමාණවත් නැහැ. ඒ නිසාම, සජිත් ප්‍රේමදාස, ඊට ප්‍රතිපක්ෂව, ග්‍රාමීය දිළිදු ජනයා කේන්ද්‍ර කරගෙන සිය මැතිවරණ ව්‍යාපාරය මෙහෙයවන බවක් තමයි පේන්න තියෙන්නේ.

මේ අනුව ගෑස් හිගය එක්තරා ආකාරය ජනාධිපතිවරණයේ ප්‍රචාරක උපක්‍රමයන්ගේ පිලිබිබුවක් ලෙසත් ඕනේ නම් සලකන්න පුළුවන්. තත්වය එසේ නම්, සීමිත බලපෑමක් ඇති ගෑස් හිගයවගේ දෙයක් නෙමේ, ජනාධිපතිවරණයේ අවසාන සතිය වනවිට රටපුරාම ඉන්ධන හිගයකුත්වුනත් ඇතිවෙන්න පුළුවන්.

මාකස් ප්‍රියන්ත පෙරේරා

05/11/2019

පාස්කු ප්‍රහාරයට මාස 6යි, තුවක්කුව බැන්දේ කවුද කියලා තේරෙනවලු දඩයම කරේතියන් යද්දී

''තුවක්කුව බැන්දේ කවුද කියලා තේරෙනවලු, 

දඩයම කරේ තියන් යන විදිහෙන්" 

ඉහත පැරණි කියමන නැවත භාවිතයට පැමිණ ඇත්තේ සිය අපේක්ෂකයා දිනවීම සදහා දේශපාලන වේදිකා තුල පාස්කු ප්‍රහාරය නින්දිත ලෙස යොදා ගන්නා ආකාරයත් සමගිනි.  

අදට (21/10/2019) පාස්කු ප්‍රහාරයට මාස 6කි. ඉන් විපතට පත්වූවෝ දිනපතා කදුළු සලමින්ද, එදිනෙදා ජීවිතයට කෙසේ හෝ මුහුණදෙමින්ද, තවමත් රෝහල්වල ප්‍රතිකාර ලබමින්ද සෝසුසුම් මැද දිවිගෙවමින්ද සිටී. රජයෙන් ලැබුන රු.75,000 සහ කාදිනල්තුමා ප්‍රමුඛ කතෝලික පල්ලියෙන්ලද ආධාර උපකාරද, වෙනත් සංවිධාන, ආයතන සහ පුද්ගලයින්ගේලද ආධාර උපකාර සහ සහයෝගයන් හැරුණු කොට ඔවුන්ට වෙනත් හව්හරණක් නැත. 

පාස්කු ඉරැදින පල්ලි ගිය ඔවුන්ට මේ අපරාධය සිදුකල, සිදුකිරීමට සැලසුම් කල, ඊට ආධාර අනුබල දුන්, ප්‍රහාරය ගැන සියළු තොරතුරු දැන දැනත් එය නොවලක්වා, මුලික වශයෙන් කිතුනු ජනයා බිල්ලට යෑමට දී බලා සිටි නිලධාරීන් කවුද? ඔවුන් එසේ කලේ ඇයිද? යන්න ගැන මේ දක්වා විදිමත් පරීක්ෂණයක් සිදුකර නැත. මේ පිලිබදව සොයා බැලීමට පිහිටවූ කොමිෂන් සභා, පාර්ලිමේන්තු කාරක සභා ආදියෙන්ද ඉහත ප්‍රශ්නවලට තවමත් නිසි පිළිතුරු ලැබී නැත.  

තත්වය මෙසේ තිබියදී දේශපාලන වාසී ලබා ගැනීමේ අටියෙන්, සිය අපේක්ෂකයා ජයග්‍රහණ කරවීමේ අභිලාෂයෙන්, පාස්කු ප්‍රහාරය සහ ඉන් විපතට පත්වූවන්ගේ දුක්සෝසුසුම් ජනාධිපතිවරණ වේදිකාවේ වෙන්දේසියේ විකුණමින් සිටී. ඇත්තවශයෙන්ම, පාස්කු  ප්‍රහාරය මෙසේ ගෙඩිපිටින් විකුණමින් සිටින්නේ වෙන කිසිවෙකු නොව පොහොට්ටුවේ (පොදුජන එක්සත් පෙරමුණේ) අපේක්ෂකයාවන ගෝඨාභය රාජපක්ෂ මහතා දිනවීමට සිදුකරන මැතිවරණ ප්‍රචාරක ව්‍යාපාරය විසිනි. ඔවුන් එසේ සිදුකරනුයේ පාස්කු ප්‍රහාරයෙන් විපතටපත් ජනයා ගැන සානුකම්පිත හැගීමකින්වත්, සිදුවූ අපරාදය සම්බදයෙන් ශ්‍රී ලංකා රාජ්‍ය යාන්ත්‍රණයේ ඇති නොසලකා හැරීමේ ස්වරූපය සහ ආරක්ෂාව නොසැලසීම ගැන හෙළිදරව් කිරීමේ අදිටනින්වත් නොව හුදෙක් තුච්ඡ ලෙස දේශපාලන වාසි ලබාගෙන සිය අපේක්ෂකයාගේ ජය තහවුරු කරගැනීමේ කුහක අපේක්ෂාවෙන් පමණක් බව පැහැදිලිය. 

''තුවක්කුව බැන්දේ කවුද කියලා තේරෙනවලු, දඩයම කරේ තියන් යන විදිහෙන්" යන්න කරලියට පැමිණ ඇත්තේ පොහොට්ටුවේ ජනාධිපතිධුර අපේක්ෂකයා වන ගෝඨාභය රාජපක්ෂ මහතාව දිනවීම සදහා සිදුකරන ප්‍රචාරක ව්‍යාපාරය විසින් පාස්කු ප්‍රහාරය විකුණමින් ලබාගැනීමට දරන දේශපාලන වාසිය වඩා වඩා ඉස්මතුවීම තුලය. 

රාජපක්ෂලා පාස්කු ප්‍රහාරය පිටිපස්සේ සිටීද? නැද්ද? යන ගැන අපි තවමත් නොදනිමු. එහෙත් පාස්කු ප්‍රහාරයෙන් දේශපාලන වාසිලබා ගන්නා ප්‍රධාන පාර්ශවය බවට ඔවුන් දැන් පැහැදිලිවම පත්ව ඇත. විශේෂයෙන්ම, රටේ ජාතික ආරක්ෂාව අනතුරේ, කොටි නැගීටී,  මුස්ලිම් ව්‍යාප්තවාදය ඇතුළු ජනයා තුල අනියත බියක්, හීතියක්, ආතතියක්, කම්පනයක්, වික්ශෝපයක් සහ භ්‍රාන්තියක් ඇතිකිරීමේ දේශපාලන ව්‍යායාමයක නිරතවූ ඔවුන්ට පාස්කු ප්‍රහාරය යනු 'ඉබ්බා දියේ දැමීමක්' විය. ඉන් ඔවුන් ජපකරමින් සිටි ජාතික ආරක්ෂාව අනතුරේ යැයි යන්න දැන් ඇස් පනාපිටම ඔප්පුකර පෙන්විය හැකි අවස්ථාවක් උදාවිය. 

එහෙත්, ජාතික ආරක්ෂාව පැහැදිලිවම අනතුරේ වැටුනේ රාජපක්ෂලා සිරිසේන සමග එක්ව හොර ආණ්ඩු සෑදීමට ඉකුත් ඔක්තෝබර් 26 සිදුකල කුමන්ත්‍රණයෙන් පසුව බව ඔවුන් ජනතාවගෙන් සගවමින් සිටී. ඔක්තෝබර් 26 කුමන්ත්‍රණය අසාර්ථකවීමෙන් පසුව 'කපන්න බැරි අත සිබිමින්' ජනාධිපති සිරිසේන නැවත රනිල් වික්‍රමසිංහව අගමැතිධුරයේ පිහිටුවුවද ශ්‍රී ලංකා ආණ්ඩුව 'යා දෙක නොරත රථ' විය. ආරක්ෂාව වැනි විෂයන්ගෙන්ද, ආරක්ෂක මණඩලයෙන්ද අගමැති රනිල් වික්‍රමසිංහ පමණක් නොව පොලිස්පති පුජිත ජයසුන්දරවද එළියෙන් තබන ලදී. රටේ  ජාතික ආරක්ෂාව පැහැදිලිවම අනතුරේ වැටුනේ රාජපක්ෂලා සිරිසේන සමග එක්ව හොර ආණ්ඩු සෑදීමට ඉකුත් ඔක්තෝබර් 26 සිදුකල කුමන්ත්‍රණයෙන් පසුව බව පැහැදිලිය. සහරාන්ලාට කිසිදු බාධාවකින් තොරව ක්‍රියාත්මකවීමට ඉන් තව තවත් ඉඩ ප්‍රස්ථා සැලසුනි. ඔක්තෝබර් 26 කුමන්ත්‍රණයේ පූර්ව ජවනිකාව වූ 'ජනාධිපති ඝාතන කුමන්ත්‍රණය'ට සමබන්දයැයි කියමින් සහරාන්ලා ගැන පරීක්ෂණ පත්වමින් සිටි නියෝජ්‍ය පොලිස්පතිවරයෙකු  අත්අඩංගුවට පත්වී සිරගතවීම එසේ ඉඩ ප්‍රස්ථා සැලසීමට හේතුවිය. පාස්කු ඉරිදා බෝම්බ ප්‍රහාරයෙන් පසුව ඔක්තෝබර් 26 කුමන්ත්‍රණයේ පූර්ව ජවනිකාව වූ 'ජනාධිපති ඝාතන කුමන්ත්‍රණය' බොරුවක් යැයි කියමින්  ඉහත කී නියෝජ්‍ය පොලිස්පතිවරයාව පසුව නිදහස් කෙරුණි. ඒ වනවිටත් සහරාන්ලාගේ මෙලේච්ච ආගමික ත්‍රස්තවාදයට අහිංසක කිතුනු ජනයා බිලිදී හමාරය. රටේ ජාතික ආරක්ෂාව අනතුරේ යැයි කියමින් මහජනයා තුල අනියත බියක්, හීතියක්, ආතතියක්, කම්පනයක් සහ භ්‍රාන්තියක් ඇතිකිරීමේ පොහොට්ටුවේ දේශපාලන ව්‍යායාම ඒසමග යථාභූතවිය. 

2015 පරාජයෙන් පසුව නැවත දේශපාලන බලය අත්කරගැනීමට රාජපක්ෂලා නොලකල දෙයක් නැත. සහරාන්ලා ලවා බෝම්බ පිපිරවීමවුවද ඔවුන්ට නොකළ හැක්කක් නොවේයැයි  පෙනීගියහොත් එයද පුදුමයට හේතුවක් නොවනු ඇත.  

අප කවුරුත් දන්නා ලෙස සහරාන්ලා මෙන්ම 'තවුහික් ජමාත්' සංවිධානයත් ගෝඨාභය රාජපක්ෂ ආරක්ෂක ලේකම්ව සිටියදී ආරක්ෂා අමාත්‍යාංශයෙන් වැටුප් ලැබුවන්ය. ඔවුන්ගේ සමාජිකත්වය, සංවිධාන ව්‍යහුය, සම්බන්දතා ජාලය ගැන තොරතුරු පැහැදිලිවම රාජපක්ෂලා සතුව  තිබිය හැක. අප දන්නා ලෙස සහරාන් 'තවුහික් ජමාත්' සංවිධානයෙන් පසුව වෙන්වී 'ජාතික තවුහික් ජමාත්'  නමින් නව සංවිධානයක් ගොඩ නගාගෙන තිබේ. එකී සංවිධානය බොහෝදුරට අනුගමනය කර ඇත්තේ ISIS ඉස්ලාමිය ත්‍රස්තවාදී සංවිධාන භාවිතා කරන සංවිධාන ව්‍යහුය ය. ඔවුනට උපදෙස් දෙන්නේ කවුද? කොහෙන්ද? කුමන අරමුණකින්ද? යන්න ඔවුහු නොදනී. ලැබෙන අණ පමණක් ක්‍රියාත්මක කරයි. එවැනි සංවිධාන  ව්‍යහුයක් යොදාගනිමින් අවශ්‍ය අයෙකුට සිය දේශපාලන අභිලාෂයන් පවා මුදුන්පත්කර ගත හැක.  ISIS ඉස්ලාමිය ත්‍රස්තවාදී සංවිධානය CIA සහ මොසාර්ඩ් වැනි ඔත්තු සේවාවන් විසින් ක්‍රියාත්මක කරන්නේයැයි කියවෙන තර්ක-විතර්ක මතුවෙන්නේ එම පදනම තුලය. කෙසේවුවද, ඉස්ලාමීය ත්‍රස්වාදී ප්‍රහාර සමග  CIA සහ මොසාර්ඩ් වැනි ඔත්තුසේවා සංවිධානය, ඇමරිකාව සහ ඊශ්‍රරායලය වැනි රටවල් හෝ ආයුධ ජාවාරම්කරුවන්ට ඇති සම්බන්දය ගැන විවිධ තොරතුරු පැවතියද ඒ සම්බදයෙන් තවමත් විධිමත් පරීක්ෂණ සිදුකර නොමැත. 

එහෙත්, ලංකාවේ පාස්කු ඉරිදා බෝම්බ ප්‍රහාරය පිටුපස  ISIS ඉස්ලාමිය ත්‍රස්තවාදය මෙන්ම 'කූබියෝද' සිටින බව අපි මුලසිටම කිව්වෙමු. 'කූබියෝ' යනුවෙන් අදහස්කලේ කූට දේශපාලන 'ගේම්කරුවන්' යන්නය. එය 'කූබියෝ' ටෙලිනාට්‍ය ඔස්සේ පෙරට පැමිණි යෙදුමකි. ශ්‍රී ලංකාවේ පාස්කු ඉරිදා බෝම්බ ප්‍රහාරය පිටුපස ISIS මෙන්ම කූට දේශපාලන ගේම්කරුවන් හෙවත් 'කූබියෝද' ඉන්නේයැයි පෙනී ගියේ එකී බෝම්බ පුපුරාගිය කාලය, ස්ථාන, ප්‍රදේශ සහ දේශපාලන සිතියම ගැන සලකා බැලීම තුලය.  

පැහැදිලිවම පාස්කු ඉරිදා ප්‍රහාරය දියත්වෙන්නේ ඔක්තෝබර් 26 කුමන්ත්‍රණයත් සමග වඩාත් මෝදුවූ  ශ්‍රී ලංකා  දේශපාලනයේ ආරාජික සමයකය. මහනුවර සිංහල-මුස්ලිම් කෝලාහල ඇතිවී අවුරුද්දකට පසුවය. ජාත්‍යන්තරව නම් නවසීලන්තයේ මුස්ලිම් පල්ලියකට ප්‍රහාරය එල්ලවීමෙන් පසුවය. එමෙන්ම ප්‍රහාරය දියත්වන්නේ විදේශීය සංචාරකයින් සිටි තරුපන්තියේ හෝටල් සහ කිතුනු ආගමික දේවස්ථානවලටය. බැලු බැල්මට එය ISIS වර්ගයේ ප්‍රහාරයක් බව  පෙනීයයි. මන්දයත් ඉස්ලාමිය ආගමික ත්‍රස්තවාදී ISIS ප්‍රහාරකයන්ගේ ප්‍රකට ඉලක්ක ඒවාය.  හෙළිදරව්වී ඇති තොරතුරු අනුව සහරාන්ලා මුලින්ම බලාපොරොත්තුවී ඇත්තේ මහනුවර සිංහල-මුස්ලිම් කෝලාහලයවී වසරක් ගෙවීම සැමරීමට බෞද්ධාගමික ස්ථානවලට ප්‍රහාරයක් දියත්කිරීමය. එහෙත් එය ඔවුන්ගේ සම්බන්දතා ජාලය විසින් පාස්කු ඉරිදා දිනය-කිතුනු ආගමික ස්ථාන සහ විදේශිකයන් ලැගුම් ගන්නා හෝටල් බවට ප්‍රතිඉලක්ක ගතකර ඇත. එසේ සිදුකලේ කවුද? කවදාද? යන්න තවම හෙලිදරුව්වු වගක් නොකියවේ. තවද එසේ ප්‍රහාර එල්ල කරන්නේ මීගමුවේ කටුවාපිටිය දේවස්ථාන, කොච්චිකඩේ දේවස්ථානය සහ මඩකලපුවේ සාන්ත මරියා දේවස්ථානය ආදිය සහ අනෙකුත් හෝටල් මේවා යැයි නිශ්චිතව තීරණය කලේ කවුදැයි යන්නද තවමත් හෙළිවූ බවක් නොපෙනේ. එහෙත් මීගමුවේ කටුවපිටිය දේවස්ථාන අසල නිවසක් ඔවුන් කුලියට ගෙන ඇත්තේ ප්‍රහාරයට මාස 04 කර පෙර ජනවාරියේය. එමෙන්ම මඩකලපුවේ සාන්ත මරියා දේවස්ථානය අතහැර පසුව මඩකලපුව සියොන් කිතුනු පල්ලියට ප්‍රහාරකයින් තෝරා ගත්තේ මඩකලපුවේ සා. මරියා දේවස්ථානයේ දේව මෙහෙය අවසන්වී තිබු නිසා බව කියවේ. එහෙත් දැනගැනීමට ලැබී ඇති තොරතුරැවලට අනුව දේවමෙහෙය අවසන්වී තිබුනද තරමක ජනතාවක් දේවස්ථාන භූමියේ ඒ වනවිටද රැදී සිට ඇත. එහෙත් එම ඉල්ලකය අතහැර ප්‍රහාරකයා ඒ ලගම ඇති සියොන් පල්ලියට ගියේ ඇයි? ඔහුව එහි යාමට කිසිවෙකු විසින් දුරකථන ඇමතුමක් ඔස්සේ හෝ ඔහුව යොමුකලේද? මඩකලපුව සා.මරියා දේවස්ථානයට ප්‍රහාරයක් එල්ල කළහොත් ඒම දේවස්ථානය තුල නත්තල්දා රාත්‍රී දේව මෙහෙයේදී මරාදැමූ දෙමළ සන්ධාන මන්ත්‍රී ජෝසප් පරරාජසිංහම් පිළිබද මතකය (ඒගැන මෙතනින් කියවන්න) නැවත අලුත්විය හැකියැයි කාරණය ගැන ප්‍රහාරකගේ දිශානතිය වෙනස්කල කල තැනැත්තා හෝ තැනැත්තන්ගේ සිත්හි පැවතියද යන්නද අපි නොදනිමු. 

තවද මෙම ප්‍රහාර එල්ලවෙන්නේ මීගමුව/කටාන, උතුරු කොළබ  සහ මඩකලපුව නගරය වැනි කිතුනුවන් වැඩියෙන් සිටින ප්‍රදේශවලය. ප්‍රහාරය නිසා කිතුනු ජන්දවලට විශාල බලපෑමක් කලහැකි බව පැහැදිලිය.  ශ්‍රී ලංකාවේ ජනාධිපතිවරණය පැවැත්වීමට ආසන්න සමයක, ශ්‍රී ලංකා දේශපාලන සිතියම දිගහැරෙන සමයක, කිතුනු චන්ද සම්බන්දයෙන් ජනාධිපතිවරණයට තරගකරන අපේක්ෂකයින් මෙන්ම ඔවුන්ගේ පක්ෂද අවධානය යොමුකරන බව පැහැදිලිය. විශේෂයෙන්ම පසුගිය 2015 ජනාධිපතිවරණයේදී  මීගමුව ආසනය වැඩි චන්ද 30 000කට ආසන්න ප්‍රමාණයකින් සහ ඊට යාබද කටාන ආසනය හංසයාගෙන් තරගකළ සිරිසේන මහතා දිනාගෙන තිබුණිත් ගැන ජනාධිපතිවාරණයකදී දේශපාලන සිතියම ගැන අවධානය යොමුකරන්නන් සලකා බලනු ඇත. කටුවපිටිය දේවස්ථානය පිහිටා ඇත්තේ මීගමුව සහ කටාන ආසන අතරය. එවැනි තත්වයක් තුල එක්සත් ජාතික පක්ෂයට සාමාන්‍යයෙන් බරයැයි ප්‍රචලිත කතෝලික චන්දවලට පාස්කු ප්‍රහාරය ඔස්සේ සිදුකල හැකි බලපෑම සුළු පටු නොවේ.  පාස්කු ප්‍රහාරය පිටුපස ISIS ඉස්ලාමීය ත්‍රස්තවාදීන් මෙන්ම 'කූබියෝද' සිටින්නේ යැයි පෙනී යන්නේ එවැනි පදනමකය. 

මේ දිනවල පොහොට්ටුවේ ජනාධිපතිවරණ අපේක්ෂකයාවන ගෝඨාභය රාජපක්ෂ මහතා දිනවීමට පොහොට්ටුවේ වේදිකාව තුල පාස්කු ප්‍රහාරය සිය චන්ද ගොඩ වැඩිකරගැනීම සදහා තුච්ඡ ලෙස යොදාගන්නා ආකාරය අනුව ''තුවක්කුව බැන්දේ කවුද කියලා තේරෙනවලු, දඩයම කරේ තියන් යන විදිහෙන්" යන්න කියවෙන්නේද එවැනි පසුබිමකය. 

එහෙත් දේශපාලන වශයෙන් වාසියක් ලැබිය හැකිනම් මීකුණක් හෝ කරේතියන් යෑමට රාජපක්ෂ කදවුරට හිරිකිතයක් නැති බව ඔවුන්ගේ දේශපාලන චරියාවෙන් ඕනෑ තරම් පෙන්වා දී ඇත. ඔවුන්ටඒසදහා එය කිසිදු හිරිකිතයක් හෝ සදාචරයක් නොමැතිබව ඔවුන්ගේ අතීත දේශපාලන ක්‍රියාකාරීත්වයද සාක්ෂිදරයි. එහෙත් ජනාධිපතිවරණයෙන් ජය ලබාගැනීම සදහා පාස්කු ප්‍රහාරය තුච්ඡ ලෙස යොදාගැනීම පිළිකුලෙන් යුතුව හෙලාදකිමු.

මාකස් ප්‍රියන්ත පෙරේරා 
21/10/2019
පාස්කු ප්‍රහාරයට මාස 06ක් පිරෙනදා. 

    

මීගමුවේ ක්‍රීඩකයින්ට මීටත් වඩා ඉහල පිළිගැනීමක් ලබාදීමට අවස්ථාව උදාවේවා!!

ශ්‍රී ලංකා ක්‍රිකට් කණ්ඩායමේ පාකිස්ථාන සංචාරයේදී 20විස්ස ක්‍රිකට් තරගාවලිය සදහා නායකත්වයදී, තරග 3-0ට, 20විස්ස ජාත්‍යන්තර ශ්‍රේණිගත කිරීම්වල අංක එකේ කණඩායමවූ පාකිස්ථානු කණඩායම පරදවා, ශ්‍රී ලංකා 20 විස්ස ක්‍රිකට් ඉතිහාසයේ මුල්වරට සියළු තරග ජයගත් සාර්ථක තරගාවලියක් නිමකල, දසුන් ශානකව පිළිගැනීමේ උත්සවයක් මීගමුවේ සංවිධානය කර තිබුණි. 

එහිදී ගනු ලැබූ ඉහත ජයාරූපය මට සිහිපත්කලේ ආසියානු තරගාවලියක රන්පදක්කම දිනු මීටර් 200 සහය දිවීමේ කණ්ඩායමේ සිටි රුවන් ව පිළිගැනීම සදහා මීගමුවේ දළුපොත ගම්වාසීන් බැනර් ගසා මහත් උජාරුවට සංවිධානය කරතිබු උත්සවයය. එමෙන්ම බර ඉසිලීමේ ක්‍රීඩාවෙන් එවැනිම ආසියානු ශුරයෙක්වු සුදේෂ් ප්‍රනාන්දුව පිළිගැනීමටද මීගමුව කඩොල්කැලේ ජනයා බැනර් ගසා එවැනිම පිලිගැනීමේ උත්සවයක් සංවිධානය කර තිබුණි. 

දසුන් ශානක තවමත් ශ්‍රී ලංකාවේ 20විස්ස ක්‍රිකට් කණඩායමේ නිල නායකයා නොවුවද, ඔහු පාකිස්ථාන සංචාරයේ 20විස්ස කණඩායමේ නායකයා ලෙස දැක්වූ දක්ෂතා සහ දිනාදුන් ජයග්‍රහණ මීගමුවේ ජනයාට ඔහුට ඉහල පිළිගැනීමක් ලබාදීමට තරම් ප්‍රමාණවත්විය. මෙවර ඒ සදහා මුලිකත්වය ගෙන තිබුනේ ඔහු ඉගෙන ගත් පාසැල් වූ මීගමුව සා. පීතර සහ මාරිස්ටෙලා විදුහල්ය.

මම දන්න ලෙස මෙතෙක් මීගමුව සමස්ථ නගරයක් ලෙස ඔවුන් ඔවුන්ගේ ක්‍රීඩයන්ට සිදුකල ඉහලම පිළිගැනීම සිදුකර ඇත්තේ මීගමුව ජුපිටර්ස් (Jupiter's football club) සහ යුත් (Youth football club) පාපන්දු කණ්ඩායම් ලංකා ලීග් පාපන්දු ශුරතාව දිනා පැමිණි පසු සිදුකල විශාල පිළිගැනීමය.

දැනටමත්, අඩුම තරමින්, අපේ පළාත්වලින් බිහිවු  ක්‍රීඩකයන් තිදෙනෙක්වත් ශ්‍රී ලංකා ක්‍රිකට් කණ්ඩායමට ක්‍රීඩා කරන අතර මළල ක්‍රීඩා, පාපන්දු, ටෙනිස්, පාපැදි, පිහිනුම් සහ අනෙක් ක්‍රීඩාවලද ශ්‍රී ලංකා සංචිතවල මීගමුවේ ක්‍රීඩකයින් රාශියක් සිටී.  ඔවුන් සියළු දෙනාට මීටත් වඩා ඉහල පිළිගැනීමක් එළබෙන 20විස්ස ක්‍රිකට් ලෝක ශුරතාවෙන් පසුව සහ වෙනත් ජාත්‍යන්තර තරග ජයග්‍රහණවලින් අනතුරුව ලබාදීමට ලැබේවායි ප්‍රාර්ථනා කරමු. 

මාකස් ප්‍රියන්ත පෙරේරා

18/10/2019

තුච්ඡ දේශපාලන වාසි සදහා පාස්කු ප්‍රහාරය භාවිතා කිරීමට විරුද්ධවෙමු!!

ලාංකීක කිතුනු ජනයාට එල්ලකල මෙලේච්චම ප්‍රහාරයක්වූ පාස්කු ඉරිදා ප්‍රහාරය දැන් දැන් ජනාධිපතිවරණ වේදිකාවේ ක්‍රමයෙන් අලෙවිකරණ තත්වයට නින්දිත දේශපාලකයින් පත්ව සිටීම ගැන අප පිළිකුලින් යුතුව හෙළාදැකිය යුතුවෙමු.

ජනාධිපතිවරණ වේදිකාවල පාස්කු ඉරිදා ප්‍රහාරය ගැන සදහන් කරනුයේ ඉන් විපතට පත් ජනයා ගැන සානුකම්පිත හැගීමකින්වත්, සිදුවූ අපරාදය සම්බදයෙන් ශ්‍රී ලංකා රාජ්‍ය යාන්ත්‍රණයේ ඇති නොසලකා හැරීමේ ස්වරූපය සහ ආරක්ෂාව නොසැලසීම ගැන හෙළිදරව් කිරීමේ අදිටනින්වත් නොව හුදෙක්තුච්ඡ ලෙස දේශපාලන වාසි ලබාගෙන සිය අපේක්ෂකයින්ගේ ජය තහවුරු කරගැනීමේ කුහක අපේක්ෂාවෙන් පමණක් බව පැහැදිලිය.

එවැනි කුහක, තුච්ච දේශපාලකයින් සහ ඔවුන්ගේ කුහක දේශපාලන අපේක්ෂාවන් පරාජයකල යුතුමය. කිසිවෙක් පාස්කු ඉරිදා ප්‍රහාරයෙන් දේශපාලන වාසි අත්කර ගැනීමට උත්සහ කරන්නේ නම් ඔවුහුද එම ප්‍රහාරයේම කොටස්කරුවන්වනු නොවනුමානය. 

ජීවිත අහිමිවුයේ අපේ මිනිස්සුන්ගේය, විපතට පත්වුයේ අපේ මිනිස්සුන්ය. ඒමතින් කිසිවෙක් සිය තුච්ඡ දේශපාලන අභිලාෂයන් වෙනුවෙන් පාස්කු ප්‍රහාරය ජනාධිපතිවරණයෙන් ජය ලබාගැනීම සදහා කුහකලෙස යොදාගැනීම පිළිකුලෙන් යුතුව හෙලාදකිමු.

මාකස් ප්‍රියන්ත පෙරේරා

15/10/2019

පාස්කු ප්‍රහාරයෙන් මියගිය කිතුනුවන් මෙන්ම ජෝශප් පරරාජසිංහම්ද ශ්‍රී ලංකා රාජ්‍ය අනුග්‍රහයෙන් දියත්වූ ත්‍රස්තවාදයට ලක්වූ කිතුනුවෙකි

අප්‍රියල් 21 පාස්කු ප්‍රහාරය මෙන්ම 2005 දෙසැම්බර් 24දා රෑ නත්තල් පුජාවට සහභාගීවෙමින් සිටියදී මඩකලපුවේ සා. මරියා පල්ලිය තුලදී මරා දැමු දෙමළ සන්ධානයේ මන්ත්‍රී ජෝශප් පරරාජසිංහම්ද ශ්‍රී ලංකා රාජ්‍ය අනුග්‍රහයෙන් දියත්කල ත්‍රස්තවාදයට ලක්වූ කිතුනුවෙකි.

මඩකලපුව සා. මරියා පල්ලිය පිහිටා තිබෙන්නේ සා. මයිකල් පාසලත්, මඩකලපුව රදගුරු නිවසත් (Bishop House) මැදය. අප්‍රියල් 21 ප්‍රහාරයට ලක්වූ මඩකලපුව කිතුනු දේවස්ථානය ඇත්තේ ඉන් මීටර් 200 පමණ එහායිනි. ලැබී ඇති තොරතුරුවලට අනුව බෝම්බකරුගේ මුල් ඉල්ලකය වී තිබුනේ මඩකලපුවේ ඇති ප්‍රධාන කතෝලික පල්ලිය වන මෙම සා. මරියා පල්ලිය. එහෙත් එදින එහි පුජාව කලින්ම අවසන්වී ඇත. නැතිනම් නත්තල් දා මෙම පල්ලිය තුලදී මරාදැමූ හිටපු මන්ත්‍රී ජෝශප් පරරාජසිංහම්ගේ නමද නැවත මතුවීමට ඉඩ තිබුණි.

2005 දෙසැම්බර් 25 නත්තල් පුජාවට ජෝශප් පරරාජසිංහම් මන්ත්‍රීවරයා සහභාගීවීමට පැමිණෙන බව දැන සිට ඇත්තේ ඔහුගේ ආරක්ෂාවට සිටි පොලිස් නිලධාරීන් පමණි. මන්ත්‍රීවරයා සත්ප්‍රසාද ලබා හිසනමා, දණගසා යාක්ච්නා කරමින් සිටියදී සිවිල් ඇදුමෙන් සැරසුන (ආ)රාක්ෂකයන් අතරින් මතුවූ තුවක්කුකරුවෙක් විසින් වෙඩිතබා ඝාතනය කර පලාගියේය. මුලින්ම එය කරුණා පාර්ශ්වය වෙතත් පසුව Sennan Padai නම් කණඩායමකටත් පැවරිය. එකී කණ්ඩයමට වගකීම පවරමින් පත්‍රිකා බෙදුවේද ආරක්ෂක හමුදාවට සම්බන්ද පිරිස්යැයි වාර්තා පලවිය. එහෙත් අපරාධකරුවෝ අත්අඩංගුවට ගත්තේ නැත. ඔව්හු අද ද නිදැල්ලේය.

එම ඝතනය ගැන කතෝලික සභාව පැත්තෙන් තදින් හඩ නැගුවේ එදින රාත්‍රියේ එම පුජාව පවත්වමින් සිටි මඩකලපුවේ රදගුරු කිංස්ලි ස්වාමිපිල්ලේ රදගුරුවරයාය. මැල්කම් රන්ජිත් කදිනල්වරයාද, ලංකා කතෝලික රදගුරු මණ්ඩලය ප්‍රමුඛ කතෝලික සභාවද දැක්වුයේ තරමක් ඇල්මැරුණු විරෝධයකි. ජෝශප් පරරාජසිංහම් මන්ත්‍රීවරයා වෙනුවෙන් පෙනීසිටීමට ගොස් ලංකා කතෝලික සභාවට කොටි ලේබලය ඇලවේ යැයි ඔවුහු බියවිය.

එදා නත්තල් දා එක් පුද්ගලයෙකුගේ මරණය වෙනුවෙන් යුක්තියේ හඩ නොනැගීම සහ නැවතත් එවැන්නක් සිදුවීමට කටයුතු නොකල අපිට මෙදා 300 කටත් අධික මරණයන් සහ විපත්වෙනුවෙන් කිසිසේත්ම නිහඩ විය නොහැක.

මාකස් ප්‍රියන්ත පෙරේරා 

18/09/2019

මහාචාර්ය කාලෝ පොන්සේකා - ශ්‍රී ලංකාවේ අඩුවෙන්ම ප්‍රතික්ෂේපවූ ඉහලම ප්‍රගතිශීලියෙක්

අසූ හය වසරක් (86) ආයු වළදා මහාචාර්ය කාලෝ පොන්සේකා මියගොස් තිබේ. වෛද්‍යවරයෙක්, මහාචාර්යවරයෙක්, ගුරුවරයෙක්, හේතුවාදියෙක්, සම සමාජකාරයෙක්, ජන අරගලවල ඉදිරියෙන් සිටියෙක් සහ සාහිත්‍යකරුවෙක් ලෙසද, විජය කුමාරතුංගගේ මෙන්ම රන්ජන් රාමනායකගේද මාමා කෙනෙක් සහ සීයා කෙනෙක් ලෙසද ප්‍රසිද්ධව සිටි කාලෝ පොන්සේකා මහතා,  බොහෝදුරට ලංකාවේ අඩුවෙන්ම ප්‍රතික්ෂේපවූ ඉහලම ප්‍රගතිශීලීන්ගෙන් කෙනෙකු ලෙස හදුන්වාදිය හැකි බව මගේ අදහසය. 

විශේෂයෙන් ලංකාව තුල මුල්බැසගෙන ඇති දේවවාදී මෙන්ම අදේවවාදී  සම්මතයන්ටද, පදනම් විරහිත විකාර සම්ප්‍රදායන්ට, ඊනියා පසුගාමී සංස්කෘතික නැබුරුවන්ටද, ගිනි පෑගීම, නිවන, නැවත ඉපදීම, පුනරුප්පත්තිය ආදී රට තුල මුලබැසගත් අදහස් සම්බන්දයෙන්ද, මිත්‍යාවටද විරුද්ධව ප්‍රසිද්ධියේ  අභියෝග කල, සිංහල බෞද්ධ ජාතික රාජ්‍යයක් ගොඩනැගීමේ ව්‍යාපෘතිය ප්‍රතික්ෂේප කර ඒ වෙනුවට ජාතීන් අතර සමානාත්මතාවය සහ සම අයිතිවාසිකම් මුල්කරගත් රාජ්‍ය බලය බෙදාහැරීමේ පදනම සහිත රාජ්‍යයක් ගොඩනැගීමේ අදහස් වෙනුවෙන් ප්‍රසිද්ධියේ පෙනී සිටි, බටහිර-ක්‍රිස්තියානි සංස්කෘතික පදනමක් සහිතව ගොඩනැගුනු, වාමවාදී කාලෝ පොන්සේකා වැනි ප්‍රගතිශිලීන්ට වර්තමාන ලංකාව තුල සාමාන්‍යයෙන් උරුමවන්නේ ගැරහුම, නින්දාව සහ ප්‍රතික්ෂේප කිරීමය. විශේෂයෙන්ම සිංහල-බෞද්ධ-දේශීය-ජාතික ආදී බලවේග එකට එක් තැන්ව එක පෙරමුණකට එක්ව රෝදබැදගෙන ඇති තත්වයක් තුල පවා කාලෝ පොන්සේකාව සතුරෙක් ලෙස සලකා ප්‍රතික්ෂේපකලේ නැති තරම්ය. හතුරෙක් නොවී නමුත් ප්‍රතිපක්ෂ කදවුරක කෙනෙක් ලෙස ඔහු යහතින් වැජබුණි. මින් අදහස් වන්නේ ඔහු විවේචනයට හෝ ගර්භවයට පත්නොවූබව නොවේ. විශේෂයෙන්ම හින්දු-බමුණු පදනමක් සහිත ඉන්දියානු උප මහාද්වීපයේන් බොහෝදේ උරුමකරගත් සංස්කෘතික, එකී සමාජ, සංස්කෘතික සහ සම්ප්‍රදායන් මුල්බැසගත් ශ්‍රී ලංකාව තුල කාලෝ පොන්සේකා එල්ලකල අභියෝග, විවේචන, උපහාසයන් කිසිසේත්ම ප්‍රතිපක්ෂ කදවුරුවල නිර්ධය ප්‍රතිප්‍රහාරයන්ට ලක් නොවන ඒවා නොවිණි.

එක් උදාහරණයක් ලෙස හින්දු සම්ප්‍රදායක්වන කතරගම ගිනිපෑගීම ආදියට ඔහු අභියෝගකලවිට දේවවාදී සම්ප්‍රදායන්  ප්‍රතික්ෂේප කරන බෞද්ධ සමාජයෙන් මෙන්ම බෞද්ධ භික්ෂූන් කෙරෙන් සිදුවිය යුතුව තිබුනේ කාලෝ ආදීන් වඩ වඩාත් ඔසවා තැබීමය. එහෙත් සිදුවුයේ පත්තරවල පිටු ගණන් කාලෝව විවේචනය කිරීමය. කාලෝ ඒ විවේචන හමුවේ අඩියක් හෝ පස්සට ගත්තේ නැත. ඒ වෙනුවට ඔහු වඩ වඩාත් දරුණු සහ උපහාසාත්ම ප්‍රහාර එල්ල කළේය. වරක් ඔහු දක්වා තිබුනේ තමා ''තරුණ කාලයේදී කතරගම ගොස් ඌරුමස් කා අරක්කු බිවූ නමුත් කතරගම දෙවියන්ට ඔහුට කිසිවක්  කිරීමට අද තව වෙනතුරු නොහැකිවූ බවයි''. මීට සමාන ප්‍රකාශයක් W.D. ජයසිරි  අනුරාධපුරයේ 'ජයසිරි මහ බෝධිය' සම්බන්දයෙන්ද මෑතකදී සිදුකල බව අපට මතකය. එහිදී ඔහුට එල්ලවුණු විවේචන, නින්දා-අපහාසවලට නොඅඩු ප්‍රමාණයක් කාලෝ පොන්සේකාගේ කතරගම අරක්කු බී ගැන කියවුණු ප්‍රකාශය සම්බන්දයෙන්ද එල්ලවිය. එහෙත් ඒ කිසිවකින් කාලෝව නතරකිරීමට හෝ කාලෝ  යන නාමය කෙසේවත් යටගැසීමට ඔවුනට නොහැකිවිය. සිදුවුයේ ''දෙවියෝ සහ භූතයෝ'', ''මා කල ගවේශන'' ආදී පොත් ලියූ ඒබ්‍රහම් ටී කොවුර්ටත් වඩා හේතුවාදියෙක් ලෙස කාලෝ පොන්සේකා ලාංකික සමාජතුල මුල් බැසගැනීමය. 

හේතුවාදියෙක් ලෙස ප්‍රකටවුවද, කාලෝ උපතින්ම කතෝලිකයෙක් විය. මීගමුව මාරිස්ටෙලා සහ කොළබ 10 සා. ජෝශප් යන ප්‍රකට කතෝලික විදුහල්වලින් අධ්‍යාපනය ලැබුවෙක් විය. ඔහු පල්ලියෙන් ඈත්වන්නේ උසස්පෙළ අවධියේදීම ලංකා සමසමාජ පක්ෂයේ ඔස්සේ මාක්ස්වාදය-ට්‍රෝට්ස්කිවාදය පෙරටුකරගත් ලංකා සමසමාජ පක්ෂයේ දේශපාලනයට ප්‍රවිෂ්ටවීමත්,  වෛද්‍යවරක්වීමට  වෛද්‍ය පීඨයට ඇතුල්විමෙනුත් අනතුරුවය. එහෙත් ජේසු ක්‍රිස්තුස් වහන්සේ යනු සිය ජීවිතයේ හමුවූ මුල්ම විප්ලවිය චරිතය යැයි ඔහු  විජේ කුමාරතුංග රගපෑ ''ක්‍රිස්තු චරිතය'' චිත්‍රපටිය ගැන අදහස් දක්වමින් පවසන ලදී. සිය ලෝක දැක්ම සකස්කර ගැනීම සම්බන්දයෙන් ක්‍රිස්තියානි ආගම ඉවහල්වුයේ කොයි ආකාරයටද යන්න ඉන් ඉගිකරන බවක් පෙනීයැයි.  

පසුකාලීනව ඔහු  මහාචාර්ය වයි. කරුණාදාසගෙන් බෞද්ධාගම ඉගෙනගත්තද ඔහු බුද්ධාගමේ බොහෝ සංකල්ප ගැන දරණ ලද්දේ ද විවේචනාත්මක ආකල්පයකි. නිවන, කර්මය, නැවත ඉපදීම ආදිය ගැන ඔහු දැරූ මතයන් ඊට උදාහරණය. එහෙත් බුදුන් දේශනා කළ සද්ධර්මය සහ පුද්ගල අධ්‍යාත්මික විමුක්තිය ගැන මෙන්ම සමාජ විශෝධනය ගැන අදහස් ද ඔහු ඉතා ඉහලින් අගය කරන ලදි. 

එක් අතකින් ඔහු නියෝජනය කල  වාමවාදී සහ හේතුවාදී ස්ථාවරයන් ඔහු බෞද්ධයෙක් හෝ ක්‍රිස්තියානිකාරයෙකු ලෙස ආගමික අනන්‍යතාවයක් සහිත පුද්ගලයෙක් නොව අනාගමිකයෙක්ය යන ප්‍රතිරූපයක් ගොඩනගන ලදී. අනෙක් අතින් ලංකාවේ මුල්බැසගත් සම්ප්‍රදායක සමාජ සම්මතයන්, ආගමික වත්පිළිවෙත්, භක්ති අභ්‍යාස සහ මිත්‍යා විශ්වාස ගැන ඔහු දැරූ විවේචනාත්මක ප්‍රවේශයන් නිසාම ඔහුට කිසියම්ම හෝ ආගමික අනන්‍යතාවයන් සහිත ආයතන සමග හෝ සමීපව කටයුතු කිරීමට ඉඩක් නොවිණි. එම නිසාම ඔහු හැදීවැඩුන, ඔහුගේ ළමා කාලය පෝෂණයකල කතෝලික පල්ලියට, එහි ආයතනවලට, ඔහු  උගත්  මීගමුව මාරිස්ටෙලා විදුහලට හෝ කොළබ 10 සා. ජෝශප් කතෝලික විදුහල්වලට ඔවුන් බිහිකළ විශිෂ්ඨ ශිෂ්‍යයෙක් ලෙස සිය විදුහල්වල කටයුතුවලට යොදාගැනීමට සහ ඔහුගේ සාර්ථකත්වයෙන් පෙරලා ආලෝකයක් ලැබීමටවුවද නොහැකිවිය. අඩුම වශයෙන් එකී පාසැල්වල තෑගී බෙදා දීමේ උත්සවයකට හෝ ඔහු සහභාගීවූ බවක් මම අසා නැත. එහෙත් ඔහු තමන්ගේ එකී පසුබිම අමතක කල, ඉන් සම්පුර්නයෙන්ම මිදීගිය, එකී පසුබිම ප්‍රතික්ෂේපකල තැනැත්තෙක්ද නොවීය. සිය සංස්කෘතික පදනම් සකස්වීම සම්බන්දයෙන්  කතෝලික පල්ලිය ප්‍රවර්ධනය කල බටහිර සංස්කෘතියේ බලපෑම ඔහු ලියු ගී සිංදුවල මෙන්ම රච්නාවලද නිරතුරුව ප්‍රදර්ශනය විය. ඔහුගේ බොහෝ ගී සිංදුවල තාලයන් බටහිර පියානෝ වාදනයන් සහ පල්ලියේ කන්තාරු ගායනා මත සකස්වූ ඒවා විය. විජය කුමාරතුංගගේ අවමගුල් උත්සවයේදී ''කාලෝ පොන්සේකා ජුලියස් සීසර් නාට්‍ය රඟ පපා, මාක් ඇන්ටනී වාගේ කතා කළා. වර්තමාන බෲටස් පිස්සෙක්ය කියන්නට ඔහු උත්සාහ කළා'' යැයි සිරිල් බී පෙරේරා ලියු 'විජයගේ කැරිස්මාවේ බීජය කොතනද?' නම් ලිපියේ (චිචිත්‍ර රේඛා 1988.06.25 කලාපය) දැක්වේ. කාලෝ පොන්සේකාට සිය ජීවිතය තුලවූ විශාලතම ඛේදවාචකය විජයගේ මරණය බව ඔහු අවස්ථා කිහිපයකම දක්වා තිබුණි. විජය වැනි මානව දයාවෙන් පිරි උතුම් මිනිසෙකු අහිමිවීම පමණක් නොව ලංකාවේ වාමාංශික පක්ෂ එකතුකල හැකි පුද්ගලයෙකු අහිමිවීමේ අඩුවද ඔහුට තදින් දැනෙන ලදී. විජයගේ මල ගෙදර ගැන තවදුරටත් දක්වන සිරිල් බී පෙරේරා ලියා තිබුනේ අපේ රටේ සම්මත මළගෙවල්වල ස්වභාවය පවා විජයගේ අවමගුල් උත්සවයේදී වෙනස්වූ බවට ගාමිණි පොන්සේකා  පවා චෝදනාකල බවයි. ඇත්තවශයෙන්ම අප සිරිල් බී පෙරේරා අනුව යමින්  විජයගේ කැරිස්මාවේ බීජය කොතනද, කාලෝ පොන්සේකාගේ කැරිස්මාවේ බීජය ඇත්තේද එතනමයි යනුවෙන් තර්ක කල හැක. සිරිල් බී පෙරේරාට අනුව විජයගේ කැරිස්මාවේ බීජ ඇත්තේ ඔහු වටාවූ පරිසරය (මීගමුවේ වෙරළ අද්දර සිට හොරගොල්ල) සහ ඔහුගේ අධ්‍යාපන පසුබිමය (බටහිර, කතෝලික, ආගම, පල්ලිය, st. බෙනඩික් පාසැල). කාලෝටද එය එසේමය. 

කාලෝගේ ජීවිතයේ හොරගොල්ල  හමුවන්නේ විජයගේ බිරිද චන්ද්‍රිකා ඔස්සේය. ඇය ජනාධිපතිවරිය ලෙස කටයුතු කරද්දී ජනවාර්ගික අර්බුධයට විසදුමක් සෙවීමේ උත්සහයට කාලෝ නන්අයුරින් සහයවිය. බලය බෙදා රට නොබෙදීම සම්බන්දයෙන්වූ උත්සහයන් වෙනුවෙන්වූ කාලෝගේ දායකත්වය සම්බන්දයෙන්වුවද  ඔහුගේ ප්‍රතිපක්ෂ කදවුරු කාලෝව සහමුලින්ම ඉල්ලක කරගෙන ප්‍රහාර එල්ලකල බවක් නොපෙනේ. අනෙක් අතට ඊට ඉදුරාම වෙනස් ක්‍රියාමාර්ගයකට ගිය  මහින්ද රාජපක්ෂ රජය සමග ඇතැම් ක්‍රියාමාර්ගවලට එලබීමෙදීද කාලෝ එතරම් විවේචනයකට ලක්වූ බවක් නොපෙනේ. 

ඒ අනුව ගත්කල කාලෝ යනු පැහැදිවම ප්‍රතික්ෂේපවීමට ලක්වීමට ඉඩ තිබු ක්‍රියාධරයන්ගෙන් කෙනෙකි. එහෙත් ඔහු පොදු ජනයා අතර ප්‍රතික්ෂේපවීමට ලක්වුයේ ඉතා අඩුවෙනි. මා සිතන්නේ කාලෝ අඩුවෙන්ම ප්‍රතික්ෂේපවීමට හේතුව ඔහු ගතකල සරල චාම් ජීවිතයත්, ඔහු සියල්ල කලේ සිය පෞද්ගලික ප්‍රතිලාභයන් වෙනුවෙන් නොව සමාජ පරිවර්තනයන් වෙනුවෙන් බව පොදු අදහසක් ගොඩනැගී තිබීම නිසාය යන්නය. විශේෂයෙන් නිදහස් අධ්‍යාපන අයිතිය වෙනුවෙන් සයිටම් අරගලය වැනි ලාංකික ජන සමාජයේ පොදු මිනිස් අයිතිවාසිකම් වෙනුවෙන් සිය අවසාන මොහොත දක්වාම හඩ නැගීම ඔහුට සිය දිවිය අවසන දක්වාම මහජනයා අතර යම් ගෞවරවයක් ඇතිකිරීමට හේතුවූ බව පෙනේ. එනයින් බලන කල කාලෝ පොන්සේකා යනු  ශ්‍රී ලංකාවේ අඩුවෙන්ම ප්‍රතික්ෂේපවූ ඉහලම ප්‍රගතිශීලියෙක් බව මාගේ අදහසයි.

මාකස් ප්‍රියන්ත පෙරේරා 

04/09/2019

   

    

තිරිගු පිටි ගණන් ගියා නේද? ඇට ටිකක් එවන්නද?

පාන් හදන තිරිගු පිටි ලංකාවේ ජනයා අතර මුල්බැසගන්නේ වැඩි ඈතකදී නොවේ, දෙවන ලෝක යුද්ධ සමයේය. ඒ ශ්‍රී ලංකාවේ සහල් අවශ්‍යතාවය සපුරාගැනීම සදහා සහල් ගෙනාවගත් බුරුමය දෙවන ලෝක යුද්ධ සමයේදී ජපන් ආක්‍රමනයට නතුවීම නිසා රටේ ඇතිවු සහල් හිගය පියවා ගැනීමට බ්‍රිතාන්‍ය යටත් විජිත පාලකයන් ඕස්ට්‍රේලියාවෙන් තිරිගු පිටි ගෙන්වා පුද්ගලයෙකුට ග්‍රෑම් 225 බැගින් බෙදාදීමත් සමග තිරිගු පිටි මහජනයා අතර වඩා ප්‍රචලිතවිය. 

එම කාලයේම ශ්‍රී ලංකාවේ සහල් හිගය පියවීම සදහා ශ්‍රී ලංකාවේ සහල් නිෂ්පාදනය දිරිමත් කිරීමටත් බ්‍රිතාන්‍යයන් කටයුතු කළේය. එවකට පැවති රාජ්‍ය මන්ත්‍රණ සභා යුගයේ කෘෂිකර්ම ඇමතිවරයාවූ D.S. සේනානායකගේ ව්‍යාපෘති සම්බන්දයෙන් බ්‍රිතාන්‍යයන්ගේ ප්‍රවේශයවුයේ එමගින් යුද්ධ සමයේ ඇතිවී තිබු සහල් හිගයට යම් පිළිසරණක් වේය යන්නය. ''සිරිපාද කන්ද තරම් මුදල් වියදම් උනා'' යැයි ප්‍රතිවාදීන් D.S. ගේ මින්නේරිය, කන්තලේ, කලලු වැව, කහගහ කොලනිය වැනි ගොවිජනපද ව්‍යාපාර සම්බන්දයෙන් චෝදනා නගද්දී එම ව්‍යාපෘති  සාර්ථකත්වයකට ගෙන ඒමට හැකිවුයේ යුද්ද සමයේ යටත් විජිත පාලකයා ලබාදුන්න එකී සහයෝගයත් සමගය.

කෙසේවුවද, යුද්දෙන් පස්සෙත් ලංකාවට තිරිගු පිටි දිගින් දිගටම ගෙන්වන්නට සිදුවිය. මන්දයත්, පාන් සදහා රටේ විශාල ඉල්ලුමක් පැන නැගී තිබුණ බැවිනි. එම නිසාම නිදහසින් පසුව පත්වූ සෑම රජයක්ම  ඕස්ට්‍රේලියාවෙන් පමණක් නොව ඇමරිකා එක්සත් ජනපදයෙන් පවා පාන්පිටි ගෙන්වීමට කටයුතු කළේය. ඇමරිකාවේ PL480 ගිවිසුමෙනුත් පාන්පිටි ලංකාවට ගෙන්වා ගන්නා ලදී. තිරිගුපිටි හෙවත් පාන්පිටි ඒ කාලේ හදුන්වාදුන්නේ 'ඇමරිකන් පිටි' නමිනි. පාන්, බනිස්, රොටි කෑම ලක්වැසියන් අතර ප්‍රචලිතවීමත් සමග පාන්පිටි පිටරටින් ගෙන්වාගැනීමට ශ්‍රී ලංකා ආර්ථිකයට විශාල වියදමක් දැරීමට සිදුව ඇත.    

මේ තත්වය තුල පාන්පිටි ගෙන්වීම වෙනුවට ශ්‍රී ලංකාවට තිරිගු ඇට ගෙනවිත් පාන්පිටි නිෂ්පාදනය කිරීම අරභම්බ කරනුයේ සිරිමාවෝ බණ්ඩාරනායක මැතිනිය අගමැතිනියව සිටි ''සිය රට දේ සිරිසැප දේ'' යැයි යන ආදර්ශ පාඨය පෙරටුකරගත් 'සමගි පෙරමුණ ආණ්ඩුව' පැවති 1976 දීය. ත්‍රිකුණාමල වරායේ කොනක සිංගප්පූරු සමාගමක් තිරිගු ඇට පිටි කරන කර්මාන්තශාලාවක් ආරම්භ කරනුයේ ඒ සමයේය. එම සිංගප්පූරු සමාගම ලාභය පමණක් නෙව තිරිගු ඇට පිටි කිරීමෙන් ඉතිරිවන හොදම හරියවු 30%ක් පමණවන නිවුඩ්ඩ සහිත කොටස සිංගප්පුරුවට රැගෙන යන ලදී. සිංගප්පූරුව විසින් එම යුගයේ සිදුකල සාර්ථක ආයෝජනවලින් එකක් ලෙස ත්‍රිකුණාමලයේ පිහිටවූ ඔවුන්ගේ ඉහත කර්මාන්ත ශාලාව නම් කර තිබුණි.  

ත්‍රිකුණාමලයේ දැන්ඇති තට්ටු 07ක් උස ප්‍රීමා තිරිගුපිටි කම්හල බිහිවෙන්නේ 1977 පසුවය. එකම කර්මාන්ත ශාලාව සදහා විවිධ රටවලින් තිරිගු ඇට ගෙන්වනු ලැබේ. වර්තමානයේ  ලෝකයේ ප්‍රධාන වශයෙන් තිරිගු නිපදවන රටවල් වනුයේ චීනය, ඉන්දියාව, රුසියාව, ඇමරිකාව, ප්‍රංශය, ඕස්ට්‍රේලියාව, පාකිස්ථානය සහ යුරෝපා සංගමයට අයත් වෙනත් රටවල්ය. මේ දිනවල තිරිගු මොට්‍රික් ටොන් එකක මිල  ඇමරිකන් ඩොලර් 223 සිට 142 දක්වා විවිධ වර්ගවල අනුව මිල ගණන් නියමවන තිරිගු මිල දර්ශකය එතරම් වේගයෙන් උච්චාවචනය වෙනබවක් නොපෙන්වයි. එසේ වනුවේ තිරිගු නිපදවන රටවල් සියල්ලම පාහේ සිය දේශීය අවශ්‍යතාවය සදහා ප්‍රමුඛතාවයදීම නිසාය. එහෙත් තිරිගු නිපදවන සෑම රටක්ම පාහේ අපනයනය සදහාද ප්‍රමාණවත් තරම් තිරිගු නිපදවනු ලැබේ. බ්‍රිතාන්‍යයේ වුවද වාර්ෂිකව මෙට්‍රික් ටොන් මිලියන පහක පමණ ප්‍රමාණයක් තිරිගු නිපදවන අතර ඉන් 84%ක්ම දේශීය පරිභෝජනය සදහා යොදාගැනේ. 

එසේ ගත්කල පේනී යනුවේ පාන්, බනිස්, පේස්ට්‍රි, කේක්, රොටි ආදී කෑම ජාති බහුලව භාවිතාකරන රටවල් ඔවුන් වවා ඔවුන් පරිබෝජනය කරන අතර, ශ්‍රී ලංකාව වැනි රටවල ජනයා ඔවුන් වවන දේ ණය වී ආනයනකර පරිබෝජනය කරයි. එය එම රටවලට ආර්ථිකමය වශයෙන් මෙන්ම පරිබෝජන රටාව අනුවද ගැටළුවකි. 

මාකස් ප්‍රියන්ත පෙරේරා

18/07/2019