ෂෙල්ටන් මුතුනමගේ නියෝජනය කල මීගමුවේ අනන්‍යතාවය කුමක්ද?

මීගමුව නගර මධ්‍යයේ පිහිටි බන්දුල වෙලද සංකිර්ණයට අනුයුක්තව මාළු කඩ බිහිවීමට පෙර මීගමුව නගර මාධ්‍යයේ පැවැති මාලු කඩයවූයේ වර්තමානයේ බාටා ප්‍රදර්ශනාගාරය පැවතින, කලින් නැෂනල් බේකරිය පැවැති, ගොඩනැගිල්ලට යාබදව පැවැති 'කුට්ටි දූවේ සලමන් අයියා'ගේ මාලු කඩය.

මීගමුව ලෙල්ලමේන්ද, වෙරලේ හෝ කලපුවේ හෝ හැමිල්ටන් ඇලේ හෝ නවතා ඇති බොට්ටුවලින් සුලබව මාලූ මිලදී ගතහැකි බැවින් මාලු කඩයක් දැමීමට මීගමුවේ ධිවර ප්‍රජාව අතරින් කවරෙකු හෝ උනන්දුවන්නේ නම් ඔහු සැබවින්ම රැල්ලෙන් පිට පීනන, තරමක් වෙනස් තැනැත්තෙක්වනු නොවනුමානය.

කුට්ටි දූවේ සලමන් අයියාගේ පුත්‍රයාවූ ෂෙල්ටන් මුතුනමගේද තරමක් එවැන්නෙකි. ඔහු පියාගේ මාලූ වෙලද ව්‍යාපාරය පවත්වාගෙන යෑමට හෝ ධිවර කර්මාන්තයේ නිරතවීමට වඩා ප්‍රියකලේ සංගීතයටය.

ඔහුද මීගමුවෙන් බිහිවෙන බොහෝ කලාකරුවන් මෙන්ම සංගීතයට මුල්ගල තබන්නේ පාසැලෙන් සහ පල්ලියෙනි. මුලින්ම මීගමුවේ සා. මරියා පාසැලට ගිය ෂෙල්ටන් මුතුනමගේ පසුව මීගමුව සා. පීතර විදුහල බිහිකලවිට එයට ඇතුල්වූ මීගමුව සා. පීතරයේ ප්‍රාරම්භක සිසු පරපුරේ අසහය සිසුවෙකු විය. ඇත්තවශයෙන්, මීගමුව සා. පීතර විදුහල ආරම්හයේදී කතෝලික සභාවට අයත් පිරිමි පාසැලක් විය. ඒවන විට මීගමුවේ පාසැල් 6ක් හැර අනෙක් සියලුම පාසැල් කතෝලික පල්ලියට අයත්විය. එකී පාසැල්ද ගැහැනු පාසැල් සහ පිරිමි පාසැල් ලෙස වර්ගකර තිබුනි. එහෙත් ඒ වනවිටද මිශ්‍ර පාසැල් බිහිකිරීමට යුරෝපයේ කතෝලික අධ්‍යනවේදීන් කටයුතු කරමින් සිටි අතර ශ්‍රී ලංකා කතෝලික සභාවද ඒ අනුව යමින් මිශ්‍ර පාසැල් ක්‍රමය ප්‍රවර්ධනය කරන්නට කටයුතු කලේය. එහි ප්‍රතිපලයවුයේ එතෙක් පිරිමි පාසැලක් ලෙස පැවැති මීගමුව සා.පීතර විදුහල මිශ්‍ර පාසැලක් බවට පත්වීමය. ඒම නිසාම ෂෙල්ටන් මුතුනමගේට පමනක් නොව ඔහුගේ සහෝදරියටද එම විදුහලේම ඉගැනිමට අවස්ථාව උදාවිය.

පාසැල් සමයේ සිට විවිධ සංගීත සහ ගායනා කටයුතුවලට ෂෙල්ටන් මුතුනමගේ සහභාගීවී සිටියද ඔහු ගායකයෙකු ලෙස ක්‍රමයෙන් ඉදිරියට පැමිණෙන්නේ මීගමුවේ සංගීත කණ්ඩායමක් වූ ෂර්ලි මෙන්ඩිස්ගේ, 1963 පිහිටවූ, “ලොස් මුචාචෝස්” ( පෘතුගීසි සහ ස්පාඤ්ඤ භාෂාවලින් Los muchachos යනු ඉංග්‍රීසි භාෂාවෙන් the boys/mates යන්න) කැලිප්සෝ සංගීත කන්ඩායමට එක්වීමෙනි. කලක් එම සංගීත කන්ඩායම සමග ‘මුළු ගතම වෙහෙසුනා’ ගීතය ගැයු මීගමුවේ ජෝ.බී. පෙරේරා මහතා ඒවන විට “ලොස් මුචාචෝස්” කන්ඩායමෙන් ඉවත්ව 1966 දී 'මී මැස්සෝ සංගීත කන්ඩායම පිහිටුවාගෙන තිබුනි. ඉන් වසර කිහිපයකට පසුව “ලොස් මුචාචෝස්” කණ්ඩායමේ ගායනයට එක්වෙන ෂෙල්ටන් මුතුනමගේ මහතා කලින් ජෝ.බී. පෙරේරා මහතා ගායනා කල ‘මුළු ගතම වෙහෙසුනා’ ගීත ගයමින් ගායන ලොවට පිවිසි බව කියවේ.

තමාගේ ගීතයක් ගායනා කරමින් තවත් කලාකරුවෙක් හිස ඔසවනවාට මීගමුවේ ජෝ.බී.පෙරේරා මහතා කිසිසෙත්ම විරෝධය දැක්වීමක් හෝ බාල්දි පෙරලීමක් සිදුකර නොමැත. ඒ වෙනුවට තව තවත් ගායන ශිල්පීන් හදුන්වා දෙමින්, ඔහුගේ හඩට ගැලපෙන අනෙකුත් ගීතද හදුන්වා දෙමින් ෂෙල්ටන් මුතුනමගේට කලා ලොවේ තව තවත් ඉදිරියට යෑමට උදව් කර තිබේ.

ඇත්ත වශයෙන්ම, ඔය කාලය වනවිට මීගමුව කුරණ ප්‍රදේශයේ සංගීත කන්ඩායම් රාශියක්ද නෙවිල් ප්‍රනාන්දු, ජෝ. බී පෙරේරා ආදී ප්‍රකට ගායකයින් ගනනාවක්ද මුල් බැසගත් ප්‍රදේශයක් විය. ෂෙල්ටන් මුතුනමගේ සහ එකී සංගීත කන්ඩායම් සහ සංගීත ශිල්පීන් අතර වැඩි ගිය බැදීම කෙත්රම්ද වූවේදයත් පසුව ඔහු ස්ථීර පදිංචියට තොරාගන්නේද මීගමුව කුරණය.

කැලිප්සෝ කණ්ඩායම් ගායකයෙකු ලෙස කටයුතු කරමින් සිටි ෂෙල්ටන් මුතුනමගේ මහතාගේ ගායන ජීවිතයේ මීලග වෙනස සිදුකල තැනත්තා වුයේ ප්‍රියා සුරියසේන මහතාය. මිල්ටන්, ප්‍රියා, පුන්සිරි ත්‍රිත්වය 1980 දශකයේ ප්‍රවර්ධනය කල රොමැන්ටික් ගීත ශෛලියට ඔබින ලයාන්විත කඩහඩක් ෂෙල්ටන් මුතුනමගේට ඇතිබව නිතර පසක් කරදුන් ප්‍රියා සුරියසේන ඔහුට ඔවුන්ගේ ආරයේ ගීත ගායනය වඩා උචිතබව ඒත්තු ගන්වන ලදී.

ජෝර්ජ් රොබින්සන් ද සිල්වා රචනාකල 'දීග නොයන් රත්තරනේ', 'මේ දෙව් මැදුරේ පුදසුන අභියස ඉද', 'සමාව ඉල්ලා දෙපා සිබින්නට'... ආදී ප්‍රකට ප්‍රේමාන්විත ගීත ඔහුගේ මුවින් ගැයෙනුයේ එකී පසුබිමකය. එම ගීත එක්තරා ආකාරයකට මිල්ටන්, ප්‍රියා, පුන්සිරි ත්‍රිත්වය ඇරබු රොමැන්ටික් රැල්ලේ දෙවන පරපුරේ නවතම රැල්ල බිහිකලා පමණක් නොව එක්තරා ආකාරයක නව විලාෂයක්ද නිර්මාණය කළේය. ඒ අතරම ෂෙල්ටන් මුතුනමගේ තමන්ගේමවූ අනන්‍යතාවයක් නිර්මාණය කරගත් 'මහසයුරේ ගැබුරු දියේ', 'වාරුනගෙන් සිත', 'අවන්හලක ඉපදී මා මියයනවා නම්', 'මනෝහාරී කථා නැති තියා කුන්කුමන්', ආදී ගීතත් ඒ අතරවිය. එම බොහොමයක් ගීත මීගමුවේ අනන්‍යතාවය, මීගමුවේ හද ගැස්ම, මීගමුවේ ඇති නානාවිධ විවිධ්ත්වන්ගේ මිත්‍රශීලී මිශ්‍රනය කැටිකොට ගත්තක්විය. එහි ලා ඔහුගේ ගීත පබදවු 'ජයන්ත බුවා' ගේ දායකත්වය කිසිසේත්ම අමතක කල නොහැක. ෂෙල්ටන් මුතුනමගේ මහතා ඉදිපත්කරන අදහසක් හෝ ඔහුගේ කටු සටහනක් සිත් කාවදින ජනකාන්ත ගීතයක පදවැල් බවට පත්කිරීමට ජයන්ත බුවා සමත්ව සිටියේය. ඇත්තවශයෙන්ම, අවහන්හලක ඉපදී මා මිය යනවා නම් ගීතය ලියවී ඇත්තේ ජයන්තගේ මාමා කෙනෙක්වූ 'කෙනත්' ගැනය. එම ගීතයේ කියවෙන ''මේ සසරේ පින්කර ඇති එකම 'කෙනා' මන්'' යන්නෙන් ජයන්තගේ 'කෙනත්' මාමාව හැදින්වීමට භාවිතා කල කෙටි යෙදුමක් වූ බව ඔහු දක්වා තිබුණි (සාරවිට. LK 26/06/2018)

කෙනාලා, ජයන්තලා පමණක් නොව ප්‍රියාලා, ජෝතිලාද ෂෙල්ටන් මුතුනමගේ සමග සෙට් වෙන්නට බොහෝ සෙයින් ප්‍රියකර තිබුණි. ජෝති ෂෙල්ටන් මුතුනමව හැදින්වුයේ 'මීගමුවේ මගේ බොක්ක ලෙස' බව සත්සර පත්තරයට 'මීගමු සවාරිය' නම් මීගමුවේ කලාකරුවන් ගැන දිර්ග ලිපි පෙළක් ලියු ආනන්ද පද්මසිරි දක්වා තිබුණි. මීගමුවේ කලා කරුවන් සොයා ආනන්ද පද්මසිරි සමග මීගමුව පුරාම ඇවිදීමට ෂෙල්ටන් මුතුනමගේ මහතා විශාල කාලයක් මිඩංගු කර තිබුණි.

ඇත්තවශයේන්ම, 1980 දශකය අග භාගයවන විට ෂෙල්ටන් මුතුනමගේ යනු ලංකාවේ සංගීත සංදර්ශන වේදිකාවට නැතිව බැරි ගායකයෙක්වී තිබුණි. 1989 J.V.P. කැරලිකාර සමයේදී උඩුබද්දාවේ දීද, L.T.T.E යුද්ධ සමයේදී මුලතිව් හිදීද සංගීත සංදර්ශනවලට නොබියව සභභාගීවී සිය ජීවිතය රැකගෙන ආපසු පැමිණීමට ඔහුට හැකිවිය. ගායකයෙක් ලෙස මෙන්ම අවංක කුළුපග මිතුරෙකු ලෙස සංගීත ශිල්පින් අතර නමක් දිනාගෙන සිටීම නිසාම ෂෙල්ටන් මුතුනමගේ මහතා දක්ෂ සංගීත ප්‍රසංග සංවිධායකයෙක් හා සාර්ථක සම්බන්ධීකාරක වරයෙක් වශයෙන් වසර ගණනාවක් කටයුතු කළේයේ. මීගමුව අවට පලාත්වල නිතර සංවිධානය කරන සංගීත ප්‍රසංගවලට දුර ඈත සිට සභභාගීවෙන ශිල්පීන් සදහා ඔහු සිය නිවසේ නවාතැන් පහසුකම් පවා සලසාදීමට කටයුතුකල සොදුරු මිනිසෙක් විය. 'කානිවල් නම් මීගමුවේ කොටුව පිට්ටනිය තමයි' ලෙස ප්‍රකට මීගමුව කොටුව පිට්ටනියේ අන්තිමට පැවති සැණකෙළියේද සංගීත ශිල්පීන් සහ සංගීත කණ්ඩායම් සම්බන්දී කරණය කලේ ෂෙල්ටන් මුතුනමගේ මහතා සහ රුවන් ශ්‍රී ලාල් දල්පදාදුගේ පියා විසින් බව සැලය.

කෙසේවුද, සිය බිරිද අසනීපවීමත් සමග සියළු කටයුතුවලින් ඉවත්වූ ෂෙල්ටන් මුතුනමගේ මහතා නැවත යම් ආකාරයක ක්‍රියාකාරීත්වයක් දැකිය හැකිවුයේ 2015 මීගමුව ආවේ මරියා බාලිකා විද්‍යාලයේ ශ්‍රවනාගාරයේ පැවති ෂෙල්ටන් මුතුනමගේ ගේ සංගීත දිවියට වසර 35 පිරීමේ උපහාර උළලේදී සහ 2018 මීගමුව කුරණ පැවති සනිධප ප්‍රසංගයේදීය. ඒ අතරින්-පතර රූපවාහිනී ප්‍රසංග වැඩසටහන් කිහිපයක්ද ඔහු ගී ගායනා කර තිබුණි. එහෙත් සිය අසනීපවූ බිරිද සහ එකම දියණිය දමා සංගීත ප්‍රසංගයකට හෝ ඈතක යාමට ෂෙල්ටන් මතුනමගේ මහතා කිසිවිටක එකග නොවෙන ලදී. ඔහු ඒ තරමට සිය පවුල සහ දරුවා කෙරෙහි ලෙන්ගතු සැමියෙකු සහ පියෙක් විය. එහෙත් සිය බිරිදගේ සෞඛ්‍ය තත්වය යහපත්වෙන විටම ෂෙල්ටන් මුතුනමගේ මහතා දියවැඩියා රෝගයට ගොදුරුවිය. වසර ගන්නනාවක් පැවති මෙම රෝගය ක්‍රමයෙන් උත්සන්නව ඔහුට වසර 73 වෙනවිට ඔහුගේ ජීවිතය උදුරාගත්තේය. ඒ පසු ගිය දෙසැම්බර් 28දාය. ඔහුගේ කුළුපග මිතුරෙක්ව සිටි කලකට පෙර මියගියඇ සංගීත ශිල්පී ග්‍රේෂන් ආනන්ද මහතා මියගියේ දෙසැම්බර් 29 වෙනිදාවකය.

කලාකරුවන්ගේ පාරාදීසයක් බදුවූ මීගමුවේන් බිහිවූ තවත් ජනකාන්ත කලාකරුවෙකුවූ ෂෙල්ටන් මුතුනමගේ මහතා කලා ලොවින් සමුගන්නේ සිය ජීවිතකාලය පුරාම ජීවත්කරවූ මීගමු සලකුණු ලාංකික හදවත් තුල සනිටුහන් කරමිනි.  

"අවන්හලක ඉපදී මා මිය යනවානම්, මේ සසරේ පින් කර ඇති එකම කෙනා මං" කියලා කිව්වේ මීගමුවේ ඉපදිලා මීගමුවේම මියයනවා කියන එකටද ෂෙල්ටන් අයියේ???

May you Rest In Peace Shelton Aiyya!!! 

Our deepest sympathies!!!

 මෙහි ඇති සුළු කලක විනෝදේ... මතු දෙවියන් යැයි රඟන මෙවේලේ... මළ පසු මට හිමි සොහොන් කොතේ... මම මිතුරෙක් වෙමි ඒ අවන්හලේ... මම මිතුරෙක් වෙමි ඒ අවන්හලේ..

ඔබට මොක්සුව අත්වේවා !!!

මාකස් ප්‍රියන්ත පෙරේරා

30/12/20 

CEO Sri Lankaත් ඉවරයි

The CEO Sri Lanka කියන්නේ ලංකාවේ ව්‍යාපාරික ක්ෂේත්‍රයේ නැගී එන ව්‍යාසායකයින්ව, ව්‍යාපාරිකයන්ව, කලමනාකාර අධ්‍යක්ෂකවරුන්ව, බිස්නස් ලෝකයේ කප් ගහපු ශ්‍රී ලංකිකයින්ව හදුන්වාදුන්, ඔවුන්ගේ කැපවීම් අගයකල, ව්‍යාපාරිකයින් සහ ව්‍යාවසායකයින් ප්‍රවර්ධනය කල කල නමක් දිනාගෙන සිටි සගරාවක්.

ඒම සගරාවේ ලබන වසරේ, 2021 ජනවාරි, මුල්ම කලාපයේ කවරය (front cover) වෙන්කර ඇත්තේ සහ කවරයේ කතාව (front-page story) වී ඇත්තේ අගමැති කාර්‍යාලය මන්ඩල ප්‍රධානී යෝශිත රාජපක්ෂ වෙනුවෙනුයි. ඔහු එහි දිගහරින කතාව තමයි "මහන්සිවී වැඩකිරීමෙන් තොරව ජීවිතයේ කිසිවක් පහසුවෙන් නොලැබේනු ඇත" යන්නයි (nothing in life comes easy you need to work hard for it).

ඕක ඉතින් කවුරුත් දන්න පට්ට ගහපු කතාවක්නේ... 

ඕක කියන්න එයා එන්න ඔනේ නැහැනේ. රටේ මිනිස්සු දන්නේ නැද්ද එයා ගෙදර ඉදන් නාවික හමුදාවේ එයා මහන්සිවෙලා වැඩ කරලා පදක්කමුත් ගැහැව්වා කියලා. ඒ කොරෝනා කාලෙට කලින්, ඔන්ලයින් ගෙදර ඉදන් වැඩ කරන්න (Working From Home) පටන් ගන්න බොහෝ කාලෙට කලින් (එන්න ඒ ක්‍රමය රටට හදුන්වා දුන්නේ එයාලා කිව්ව නම් තව කමක් නෑ). ඒ විතරක්ද නාවික හමුදාවේ ඉන්න ගමන් කොච්චර මහන්සිවෙලා වැඩකලාද කියනවා නම් Carlton Sports Network (CSN channel) කියලා රූපවාහිනී සේවයකුත් පටන්ගත්තා. ඒවට සල්ලි ආවේ කොහොමද කියලා කියන්න ඩේසී ආච්චිගේ මැණික් මල්ලටත් බැරිවුනා.

දැන් මෙහෙම මහන්සිවෙලා වැඩකල අයෙක්ගෙන්ද ලංකාවේ ව්‍යාපාරක ප්‍රජාව අතර නමක් දිනාගෙන සිටින The CEO Sri Lanka වගේ සගරාවක් සිය මුල් පිටුව සහ කවරේ කතාව සරසන්නේ? අනෙක අගමැති කාර්‍යාලය මන්ඩලයේ ප්‍රධානියා ලෙස කටයුතු කිරීමට ඔහුට ඇති සුදුසුකම් මොනවාද?

ඇත්තටම, ඔය කිසිවක් දැන් ඔය පත්තර, සගරාවලට වැදගත් නෑ. මොනම හෝ කුනුගොඩක්දාලා තමන්ගේ අලවිය වැඩිකර ගැන්න පුලූවන් නම් එච්චරයි. අනික අගමැති කාර්‍යාලය මන්ඩලයේ ප්‍රධානියා යෝශිත වගේ කෙනෙක් ගේ පින්තූරයක් දාලා මොකක් හරි පල්හැල්ලක් දාපුවහම ඔය සගරාවටත් හොදයයි. ආන්ඩුවේ දැන්වීම් (ad) ටිකක් හරි ගන්න පුලුවන්.

ලංකාවේ විතරක් නෙමේ පිටරටවල පත්තර/සගරාවලත් ඔය ගේම ගහනවා. ඒ කියන්නේ ව්‍යාපාරිකයා ගැන අර්ටිකල් (article) එකක් කරනවා, ඒ අතරේම ඔවුන්ගේ නිෂ්පාදන සහ සේවා ගැන දැන්වීම් (ad) යනවා. එහෙම බලද්දී අර ව්‍යාපාරිකයා ගැන අර්ටිකල් (article) එකත් මුදල් ගෙවා ප්‍රදර්ශනය කරගත්ත එකක්ම තමයි.

දැන් ලංකාව වගේ රටවල පත්තර/සගරා පවතින්නේම ඔහොම තමයි. ඇත්තටම හොදටම පවතින්න නම් හොදම ක්‍රමය ආන්ඩුවෙන් දැන්වීම් (ad) ගන්න ක්‍රමයක් හදාගන්න එක තමයි හොදම ක්‍රමය කියලා ඒ අය හොදටම දන්නවා. ඉතින් ඔය යෝශිත රාජපක්ෂලාගෙන් මුල් පිටුව සකස්කරලා, පොඩි විස්තරයකුත් දාලා මුට්ටිය දාලා බලන්නෙත් ඒකටමයි. අනික යෝශිත රාජපක්ෂලා හරහා රාජපක්ෂලා එක්ක ඩීල් එකක් දාගන්න පුලුවන් නම් ව්‍යාපාරික සගරාවකට, එහි කතෘවරුන්ට විතරක් නෙමේ ඒවගේ සම්බන්දකම් ඔස්සේ ඩීල් දාගන්න බලාපොරොත්තුවෙන අනෙක් ව්‍යාපාරිකයන්ටත් හොදයි.

ඇත්තටම මේවායින් අපිට පෙන්වා දෙන්නේ ලංකාවේ ප්‍රකට, නමක් තිබෙන, ව්‍යාපාරික සගරාවකට අත්වී ඇති ඉරනම විතරක්වත්, ලංකාවේ ව්‍යාපාරික ක්ෂේත්‍රයට අත්වී ඇති ඉරනම ගැන විතරක්වත් නෙමේ; රාජපක්ෂ රෙජීමය යටතේ ආපහු මේ රටේ තවත් එක් ක්ෂේත්‍රයකට අත්වෙමින් යන ඉරනමක් සහ රටේ එක එක ක්ෂේත්ර ක්‍රමයෙන් කුරුවල්වෙන ආකාරය කොයි ආකාරද යන්නයි.

කමක් නෑ වැටිලා ඉන්න රටක් තියෙනවා නේ...

මාකස් ප්රියන්ත පෙරේරා.

29/12/20

පාස්කු ප්‍රහාරයට මාස 20යි. විමර්ශන 3යි. ලිපිගොනු 8යි. 267 අත්අඩංගුවේ. 33කට මිනීමැරුම් චෝදනා. එත් නීතිපති දෙපාර්තුමේන්තුව නඩුදාන්නේ නැහැ

මේ නත්තල වූ කලී පාස්කු ප්‍රහාරයෙන් විපතට  පත් ජනයා ගෙවන  දෙවන නත්තලය. පාස්කු ප්‍රහාරයෙන් විපතට පත් ජනයා තවමත් කදුළු  සලමින්  සිටිද්දී පාස්කු ප්‍රහාරය පිලිබදව සොයාබැලීමට වත්මන් ජනාධිපති ගෝඨාභය රාජපක්ෂ මහතා පත්කළ ජනාධිපති කොමිසමද දැන් අවසන් වෙමින් තිබේ. කොමිසමේ වාර්තාව ප්‍රකාශයට පත්කිරීමට තවත් මාස කිහිපයක්වුද ගතවිය හැක. 

එහෙත් පසුගියදා දළදා සමිඳුන් වැඳපුදා ගැනීමට ගිය මහජන ආරක්ෂාව පිළිබඳ අමාත්‍ය සරත් වීරසේකර මහතා අනතුරුව මල්වතු අස්ගිරි උභය මහ විහාර වෙත ගොස් මහනායක වරකාගොඩ ශ්‍රී ඤාණරතන මහනාහිමිවරයා සමඟ රටේ වත්මන් තත්ත්වය පිළිබඳව සාකච්ඡා කරමින් දක්වා තිබුනේ පාස්කු ප්‍රහාරය සම්බන්ධයෙන් 267 දෙනෙකු පොලීසිය විසින් අත්අඩංගුවට ගත් බවත් ඔවුන් අතරින් 33 දෙනෙකුට මිනීමැරුම් චෝදනා යටතේ නඩු පැවරීමට නියමිත බවත්ය. මෙහිදී අත්අඩංගුවට පත් පිරිස අතරින් කීදෙනෙක් ඇපමත නිදහස්වී ඇද්ද? එසේ ඇප මත නිදහස්වී ඇති අයට එරෙහිවද නඩු පවරන්නේද යන්න ගැන ඔහු කිසිදු සදහනක් කලේ නැත. පාස්කු ප්‍රහාරය දියත්කල සහරාන්ව වරක් ඉන්දියාවට බෝට්ටුවෙන් යැව්වේ යැයි චෝදනා එල්ලවූ හිටපු ඇමති රිෂාඞ් බදියුදීන් මෙන්ම ඔහුගේ සොහොයුරාවන හිස්බුල්ලා බදියුදීන්ද එලෙස ඇපමත නිදහස්වී සිටින්නන් අතරවේ. 

පාස්කු ප්‍රහාරයට සම්බන්ද සිදුවීම් 8කට අදාළව පොලීසිය විමර්ශන සිදුකර අවසන්කර එම ලිපිගොනු 8ට නීතිපතිවරයාට බාරදී තිබෙන බවත්, පාස්කු ප්‍රහාරය සම්බන්ධයෙන් අත්අඩංගුවට ගත් සැකකරුවන් අතරින් පිරිසක් රැඳවුම් නියෝගමතත්, තවත් පිරිසක් රක්ෂිත බන්ධනාගාර ගතවත් සිටින බවත් මීට පෙරද මහජන ආරක්ෂාව පිළිබඳ අමාත්‍ය සරත් වීරසේකර මහතා ප්‍රකාශකර තිබුණි. එහෙත් මෙසේ විමර්ශන අවසන්කර බාර දුන් ලිපිගොනු 8 සම්බන්දයෙන් පවා නඩු පැවරීමට නීතිපති දෙපාර්තුමේන්තුව මෙතෙක් පියවරගෙන නොමැත. එයට හේතුව ලෙස නීතිපති දෙපාර්තුමේන්තුව දක්වා තිබුනේ දැනටමත් ජනපති කොමිසමක් ක්‍රියාත්මකවන බැවින් එම කොමිසමේදී මතුවන අලුත් සාක්කි මත නඩු පැවරීම් කළ හැකි නිසාත්, මෙයට අමතරව පාස්කු ප්‍රහාරය සම්බන්ධයෙන් පාර්ලිමේන්තු තේරීම් කාරක සභාවක් පත්කර තිබෙන නිසාත්, එහිදීද මතුවිය හැකි නව සාක්ෂි මත ඇතිවිය හැකි පරස්පරතා මඟ හරවා ගැනීම සදහා ජනාධිපති කොමිසමේ මෙන්ම පාර්ලිමේන්තු තේරීම් කාරක සභාවේ වාර්තාවත් නිකුත්වෙනතුරු සිට නඩු පැවරීම නුවනට හුරු බවයි. 

ඉන් කියවෙන්නේ එකී වාර්තා දෙකම නිකුත්වෙන තුරුම නඩු පවරන්නේ නැති බවකි. මෙම වාර්තා දෙක බලාපොරොත්තුවෙන් සිටින අපට මතක්කර සිටින තවත් යතාර්ථයක්වී ඇත්තේ හිටපු ජනාධිපති සිරිසේන මහතා විසින් පත්කල පාස්කු ප්‍රහාරය විමර්ශනය කිරීමේ පළමු ජනාධිපති කොමිසමේ වාර්තාවවත් තවමත් නිකුත්කර නැති බවයි. ඒඅනුව දැනට අවසන්වීමට නියමිත ජනාධිපති ගෝඨාභය රාජපක්ෂ මහතා පිහිටුවූ දෙවෙනි ජනාධිපති කොමිසමේ වාර්තාවත්, දැනට ක්‍රියාත්මකවන පාර්ලිමේන්තු තේරීම් කාරක සභාවේ වාර්තාවත්, හිටපු ජනාධිපති සිරිසේන මහතා පත්කල පළමුවන ජනාධිපති කොමිසමේ වාර්තාවත් නිකුත් වෙනතුරු නීතිපති දෙපාර්තුමේන්තුව බලාසිටින්නේ නම් පාස්කු ප්‍රහාරයට සම්බද අයට එරෙහිව කවදා නඩු පැවරේද? අඩුම තරමින් පොලිස් විමර්ශන අවසන් කර ඇති පාස්කු ප්‍රහාරයට සම්බන්ද ලිපිගොනු 8ට අදාලව පියවර ගැනීමටවත් නීතිපති දෙපාර්තුමේන්තුව තවත් කොච්චර නම් කල් ගත කරයිද? 

නඩු පැවරීම කළ යුත්තේ සියලු කාරනා අධ්‍යනය කිරීමෙන් පසුව බවට නීතිපතිවරයා දක්වන මතය ගැන කිසිදු ගැටළුවක් නැත. නීතිපතිවරයා දැනටමත් එකී ලිපිගොනු සම්බන්ධයෙන් මෙන්ම පාස්කු ප්‍රහාරය ගැන සිදුකරන අධ්‍යන ඔස්සේ හෙළිවෙන කරුණු සම්බදයෙන් නීතිමය කෝණයකින් අධ්‍යනය කිරීමට නීතිපතිවරයා විසින් නීතීඥයින් 12 දෙනෙකු පූර්ණ කාලීනව යොදවා තිබෙන බවද අපි දනිමු. ඒමෙන්ම නීතිපති දෙපාර්තුමේන්තුව සහ පොලීසිය අතර කලක පටන් දිග්ගැස්සුණු කබ ඇදිල්ලක් තිබෙන බවට මාධ්‍ය මතුකරන කාරණා සම්බන්දයෙන්ද අපි දැනුවත්ව සිටිමු. 

පසුගියදා ශමින්ද්‍ර ෆර්ඩිනැන්ඩෝ මහතා දිවයින පුවත්පතට (20/12/2020) ලියු ලිපියට අනුව ඇත්තවශයෙන්ම නීතිපති දෙපාර්තමේන්තුවේ ක‍්‍රියා කලාපය පළමුවරට විමර්ශනයට ලක්වූයේ පාස්කු ප‍්‍රහාරය පිළිබඳව විමසූ පාර්ලිමේන්තු කාරක සභාව ඉදිරියේය. ඒ පසුගිය වසරේදීය. පාස්කු ප‍්‍රහාරය එල්ල වන අවස්ථාවේ නීතිපති වූයේ වර්තමාන අගවිනිසුරු ජනාධිපති නීතිඥ ජයන්ත ජයසූරිය බව සදහන් කළ යුතුය. දප්පුල ද ලිවේරා වැඩබලන නීතිපති ලෙස පත්වීම ලබන්නේ 2019 අපේ‍්‍රල් 29 දිනය. පාස්කු ප‍්‍රහාරය එල්ල වන්නේ ඊට සතියකට පෙරය. එතුමා ස්ථිර පත්වීම මැයි මාසයේදී ලබාගන්නා අවස්ථාවේ පාස්කු ප‍්‍රහාරය සම්බන්ධයෙන් පාර්ලිමේන්තු කාරක සභාව ක‍්‍රියාත්මක නැත. අදාළ වාර්තාව 2019 ඔක්තෝබර් මස අවසානයේදී පාර්ලිමේන්තුවට භාර දුන්නේය. පාස්කු ප‍්‍රහාරය පිළිබඳව විමර්ශනය කිරීමේදී නීතිපති දෙපාර්තමේන්තුව පූර්ණ විමර්ෂණයකට ලක්විය යුතුමය. ශමින්ද්‍ර ෆර්ඩිනැන්ඩෝ දක්වන  ආකාරයටම  'සහරාන්ලාගේ අන්තවාදී තර්ජනය සම්බන්ධයෙන් නීතිපති දෙපාර්තමේන්තුවේ ක‍්‍රියාකලාපය අදහගත නොහැක. තව්හිත් නායක සහරන් හෂීම් සම්බන්ධයෙන් ක‍්‍රියාකළ යුතු ආකාරය පිළිබඳව ත‍්‍රස්තවාදී විමර්ශන අංශය නීතිපති දෙපාර්තමේන්තුවෙන් පළමු වරට විමසා සිටින්නේ 2017 ජුනි මාසයේ 7 වැනි දිනය. එහෙත් ඒ සම්බන්දයෙන් නිසි ක්‍රියාත්මකවීමක් නොවිණි.      

ජනාධිපති කොමිසම ඉදිරියේ නීතිපති දෙපාර්තමේන්තුව එහි වරද පොලිසිය පිට පටවා ඇත. පොලිස් විමර්ශකයන් එල්ලවන ත‍්‍රස්තවාදී තර්ජනය සම්බන්ධයෙන් තමන්ව නිසියාකාරව දැනුවත් නොකළ බව චෝදනාවට ලක්වී ඇති නීතිපති දෙපාර්තමේන්තුව ප‍්‍රකාශ කර ඇත. එම ප‍්‍රකාශය සලක බැලිය යුත්තේ නීතිපති දෙපාර්තමේන්තුව විශේෂ අභ්‍යන්තර පරීක්ෂණයක් කර එම වගකීම් නිසියාකාරව ඉටු නොකල බවට චෝදනාවට ලක්වී සිටින නිලධාරීන් දෙදෙනෙකු සම්බන්ධයෙන් කළ පරීක්ෂණ වාර්තාව රාජ්‍ය සේවා කොමිසමට ඉදිරිපත් කර ඇති නිසාය.

ශමින්ද්‍ර ෆර්ඩිනැන්ඩෝ මහතා දක්වන ආකාරයටම පාස්කු ප‍්‍රහාරය සම්බන්ධයෙන් ක‍්‍රියාත්මක සමස්ත පොලිස් විමර්ශන ක‍්‍රියාවලිය සහ අධිකරණ කාර්යය බරපතළ අභියෝගයකට මුහුණ දී ඇති බව පැහැදිලිය. ජනාධිපති කොමිසම ඉදිරියේදී චෝදනාවට ලක්වී සිටින නියෝජ්‍ය සොලිසිටර් ජනරාල් අසාඞ් නවාවීගේ ප‍්‍රධානියා සිට වර්තමාන නීතිපති දප්පුල ද ලිවේරා දක්වාද හෙළිදරව් වී ඇත. අධිකරණ ඇමැති අලි සබ්රිද ජනාධිපති නීතිඥයකු බව අමතක කළ නොහැක. 

පාස්කු ප‍්‍රහාරය වළක්වා ගැනීමට නොහැකිවූයේ නීතිපති දෙපාර්තමේන්තුවේ නොසැලකිල්ල නිසා පමණක්ද?

කිසිසේත්ම නැත. ඉන්දියානු රහස් ඔත්තු සේවයෙන් 2019 අපේ‍්‍රල් 4 වැනි දින තව්හීත් ජමාත් ප‍්‍රහාරය සම්බන්ධයෙන් එවකට ජාතික බුද්ධි ප‍්‍රධානි විශ‍්‍රාමික නියෝජ්‍ය පොලිස්පති සිසිර මෙන්ඩිස්ට ලබාදුන් තොරතුරු සම්බන්ධයෙන් 2019 අපේ‍්‍රල් මස 21 දින ප‍්‍රහාර මාලාව එල්ලවන තුරුම නිසි ක‍්‍රියාමාර්ගයක් නොගැනීම සමාව දිය නොහැකි වරදකි. ඒ සම්බන්දයෙන්ද නීතිය  ක්‍රියාත්මකවිය යුතුය. මෙහිදී විශේෂයෙන්ම අවධානයට ලක්විය යුත්තේ එවකට ජනාධිපති මෛත‍්‍රිපාල සිරිසේන එම බුද්ධි තොරතුර පිළිබඳව දැනුවත් වී සිටි /නොසිටි බවට වඩා පොලිසිය, රාජ්‍ය බුද්ධි සේවය සහ සමස්ත ආරක්ෂක යාන්ත‍්‍රණය ක‍්‍රියාත්මක වූ ආකාරයයි. සති තුනකට ආසන්න කාලයක් තුළ ඉන්දියානු බුද්ධි සේවා කිහිපවරක් එල්ලවිය හැකි මෙම ප්‍රහාරය  පිලිබදව ශ‍්‍රී ලංකාවට අනතුරු ඇඟවිය. එහෙත් එම ඉන්දියානු අනතුරු ඇගවීම් නොසලකා හැරියේය. ශමින්ද්‍ර ෆර්ඩිනැන්ඩෝ දක්වන ලෙසම පාස්කු ප‍්‍රහාරය සම්බන්ධයෙන් කොළඹ අගරදගුරු කාදිනල් කාදිනල් මැල්කම් රංජිත්  සහ කතෝලික පල්ලියේ වෙනුවෙන් පාස්කු කොමිසමට කරුණු දැක්වීමට නීතිඥ කණ්ඩායමක් පත් කිරීමට මූලික හේතුව සමස්ත දේශපාලන - විමර්ශන - අධිකරණ ක‍්‍රියාවලිය සම්බන්ධයෙන් තිබූ අවිනිශ්චිතභාවයයි. එම නීතිඥ කණ්ඩායමේ ප‍්‍රධානි ජනාධිපති නීතිඥ ෂමිල් පෙරේරා එවකට ජනාධිපතිවරයා සහ ඔහු පත්කළ රාජ්‍ය බුද්ධි සේවාවේ ප‍්‍රධානි නියෝජ්‍ය පොලිස්පති නිලන්ත ජයවර්ධන අතර තිබූ කිට්ටු සම්බන්ධතාවය මතුකර ගත්තේ එම දෙපළ අතර සිදුවූ දුරකථන සංවාද ප‍්‍රමාණය ජනාධිපති කොමිසමේ අවධානයට ලක්කරමිනි. නීතිඥ ෂමිල් පෙරේරා මතුකළ කරුණු අනුව ජනාධිපතිවරයා ඉන්දියාවෙන් ලැබුණ අනතුරු ඇගවීම් පිලිබදව දැනුවත්ව සිටියේ නැතැයි යන්න පිළිගත නොහැක. 

පාස්කු ප්‍රහාරය සම්බන්දයෙන් හිටපු ජනාධිපති සිරිසේන මෙන්ම යහපාලන ආණ්ඩුවද පැහැදිලිවම වගකිවයුතුය. පාස්කු ප්‍රහාරයෙන් පසු එවකට යහපාලන ආණ්ඩුව එකිනෙකාට ඇඟිල්ල දිගුකර ගත්තේ තම තමන්ගේ වැරදි වහගන්නටය. ඒ අතර මුලින්ම සිටින්නේ හිටපු ජනාධිපති  සිරිසේන ය. ඔහු යහපාලන ආණ්ඩුවේ ප්‍රධානියා ය. ප්‍රබල ආරක්ෂක අමාත්‍යංශය පැවතියේ ඔහු යටතේය. රටේ නායකයා වුවත් තමා ඊට කිසිසේත්ම වග නොකියන බවට සපථ කරමින් තමා හැර අන් සියල්ලන් උල තැබිය යුතුයැයි ඔහු ගෝරනාඩු කළේය. ඔහු පාස්කු ප්‍රහාරයට වගකිවයුතු අයට දඬුවම් දිය යුතු බව කියමින් ඒ පිළිබඳ සොයා බැලීමට කොමිසමක් පත් කළේය. එම කොමිසමේ අවසන් වාර්තාව අදටත් ජනතාව අතට පත් කොට නැත. එහි කුමක් තිබුණාද යන්න ජනතාවට අවබෝධයක් නැත. එහෙත් ඒ වෙනුවට වැරදිකරුවන් දෙදෙනෙක් සොයාගෙන තිබුණි.

ඒ හිටපු පොලිස්පති පූජිත් ජයසුන්දර සහ හිටපු ආරක්ෂක ලේකම් හේමසිරි ප්‍රනාන්දුය. මෙහි ඇති වැදගත්ම කොටස නම් පාස්කු ප්‍රහාරය ගැන සොයා බලන කොමිසම පත් කරන්නටත් පෙරම හිටපු ජනපති සිරිසේන මේ දෙපළ පාස්කු ප්‍රහාරයට සම්පූර්ණ වගකිව යුතු බවත්, ඔවුන් දඬුවම් විඳිය යුතු බවත් ප්‍රසිද්ධියේ කීමය. ජනපති සිරිසේනගේ කැමැත්ත අනුව පත් කළ පාස්කු ප්‍රහාරය පිළිබඳ සොයා බලන කොමිසමේ තීන්දුව වී තිබුණේද හේමසිරි සහ පූජිත් වැරදිකරුවන් බවය. එවකට ජනපති මෙන්ම නීතිපතිද හේමසිරි සහ පූජිත් මෙයට වගකිව යුතුම යැයි කියමින් ජනපති සිරිසේනගේ අඩිපාරේම ගියෝය. නීතිපති, ජනපති සිරිසේනගේ සිතැඟි අකුරටම පිළිපැද්දෙකි. ඔහුට අනාගත අගවිනිසුරු වීමේ නොනිම් ආශාව ජනපති සිරිසේන ලවා ඉටුකර ගැනීමට මේ කැපකිරීම් කළා විය හැකිය. තවමත් එම කැපකිරීමේ අවසානයක් නැත. නොබෝදා ඔහු වත්මන් පොලිස්පතිගෙන් වර්තමාන කොමිසමේදී හේමසිරි සහ පූජිත්ගේ සාක්ෂි ඉල්ලා සිටිනුයේ තීන්දුවක්ද ලබාදෙමිනි. එනම් ‘පාස්කු ඉරු දින ත්‍රස්ත ප්‍රහාරය එල්ල වන බවට නිසි බුද්ධි තොරතුරු ලැබී තිබියදීත් ඒවා වළක්වා ගැනීමට අවශ්‍ය පියවර නොගැනීමෙන් රාජකාරිය පැහැර හැරීම සම්බන්ධයෙන් හිටපු පොලිස්පති පූජිත් ජයසුන්දර හා හිටපු ආරක්ෂක ලේකම් හේමසිරි ප්‍රනාන්දු යන සැකකරුවන්ට එරෙහිව නීතිමය පියවර ගැනීමට තමන් සූදානම් බව කියමිනි.

නීතිපතිවරයාට හේමසිරි සහ පූජිත් සමග ඇත්තේ වෙනම ආරෝවක් බව පැහැදිලිය. මේ කඩිනම් ප්‍රකාශ හරහා නීතිපති ඉටු කරන්නේ නැවත සිරිසේනගේ කොන්ත්‍රාත්තුව බව පැහැදිලිය. ඔහුට වුවමනා මෙවරත් එම නිලධාරීන් දෙපළගේ කර මත තබා ප්‍රශ්නය අහවර කළ හැකි බවට ඉඟි සැපයීමටය. මේ ඉක්මන් ප්‍රකාශ ඒ අරමුණෙන්ම බව පැහැදිලිය. කොමිසමේ සාක්ෂි ගෙන තමා තීන්දු කරනවාට පෙර කොමිසමම නිගමනයකට ආ යුතුය.

මෙතෙක් කොමිසම ඉදිරියේ සාක්ෂි සැපයූ සියලුදෙනාගේම කරුණු නිසි අධ්‍යයනය කළ යුතුය. ප්‍රසිද්ධ වූ ඒ සියලු කරුණු දෙස ඉතා පරීක්ෂාකාරීව බලන කල ජනපති සිරිසේන රටේ ආරක්ෂාව ගැන සතේකට මායිම් කර නැති බව පැහැදිලිය. ඔහු බුද්ධි මණ්ඩල රැස්වීම් නොවැදගත් කොටම සලකා ඇති බව පැහැදිලිය. මේ සාක්ෂි පුරාම ඇත්තේ සැවොම එකිනෙකාට බෝලය පාස් කිරීමකි. මෙම කොමිසම හමුවේ සාක්ෂි දුන් හිටපු ජනපතිගේ අරමුණ තවමත් තමා කිසිවක්ම නොදත් තොත්ත බබා සේ ජනතාව ඉදිරියේ රඟපෑමය. එලෙස ඔහුට තම වගකීම්වලින් පහසුවෙන්ම ගැලවිය හැකිද? තමා හිටපු ජනපති නිසාත් වත්මන් ආණ්ඩුවේ මන්ත්‍රීවරයකු වන බැවිනුත් ඔහු සහසුද්දෙටම තමා ගැලවෙන බව සහ  තමාට චෝදනා එල්ල නොවන විශ්වාසයේ ගිලෙන බව පෙනේ. බුද්ධි ප්‍රධානීන්ද තමා තොරතුරු අහවලුන්ට දුන්නා යන තැන සිට අත පිහදා ගන්නා තත්ත්වයක් ඇත. ජනපති ආරක්ෂක ඇමති වූ අතර තමා රට සවාරි යන විට නිසි ලෙස ආරක්ෂාව තව කෙනෙකුට බාර දෙන්නටද ඔහු අකමැති විය. ආරක්ෂක රාජ්‍ය ඇමති රුවන් විජේවර්ධන නමට සිටියෙක් බව පැහැදිලිය. එසේ කියා ඔහුටද මෙයින් තමා නිදොස් කියා කරබාගෙන සිටිය හැකිද?

පාස්කු ප්‍රහාරය හුදකලා කොට ගෙන හිටපු ආරක්ෂක ලේකම් හෝ හිටපු පොලිස්පතිට දඬුවම් පැමිණුවැයි කියා සාධාරණයක්  ඉටු නොවූ බව පසුගිය කාලයේ සමාජයම දැන ගත්හ. එම දෙපළ බන්ධනාගාර ගත කිරීමත් සමග සමාජය තුළ යහපාලනය කෙරෙහි හාස්‍යයක් ඉපැදීය. යහපාලන ආණ්ඩුවේ විශ්වාසය බිඳ වැටීම ආරම්භ වන්නේ පාස්කු ප්‍රහාරයටත් වඩා එයට වැරදිකරුවන් සෙවීමේ විකාර ස්වරූපය නිසාය. එදා අඩුම තරමේ ආණ්ඩුවක් ලෙසත්, එහි නායකයා ලෙසත් පාස්කු ප්‍රහාරයක් එල්ල වීම පිළිබඳ තමන් කනගාටු වන බවත්, ආරක්ෂාව පිළිබඳ අඩුපාඩුවලින්මේ තත්ත්වය උදාවූ බවත් එහි සියලු වරද ආණ්ඩුව පිළිගන්නා බවත් ඉදිරියේදී මෙවැනි දෑ නොවන්නට මෙයම පරමාදර්ශයක් කරගන්නා බවවත් ජනතාව ඉදිරියේ සිරිසේන-රනිල් ආණ්ඩුව පිළිගත්තේ නම් ඒ අය කෙරෙහි ජනතා අප්‍රසාදය එතරම් විශාල නොවන්නට ඉඩ තිබුණි. එහෙත් සිදුවූයේ හිටපු ආරක්ෂක ලේකම් සහ හිටපු පොලිස්පති නිසා මේ දේ වූවා යැයි රටට කීමෙන් ඒ අයම පචමවීමය.

මේ සියල්ල දෙස හැරී බැලීමේදී පෙනී යන්නේ ඔවුන් කිසියම් ප්‍රහාරයක්  සිදුවීමට ඉඩ ඇතිබව දැන දැනත් එයට ඉඩ හැරි බවය. ඒ ජනාධිපති  සිරිසේන සහ අගමැති  රනිල් වික්‍රමසිංහ අතර ඇතිවූ දේශපාලන ගැටුම නිසාද? කිසියම් ප්‍රහාරයක් ඔස්සේ වික්‍රමසිංහගේ රජය බිදදැමීමට හිටපු ජනාධිපති සිරිසේනට සුදුසු වටපිටාවක් සකසා ගැනීමට අවශ්‍යවීද? එහිලා බිලිවුයේ මෙරට අහිංසක ජනයා ය. ඔවුනොවුන්ගේ දේශපාලන  එදිරිවාදීකම් පරිමසා ගත්තේ  මෙරට  අහිංසක ජනයා බිලිදීමෙනි.  

පාස්කු ප‍්‍රහාරය සම්බන්ධයෙන් කාදිනල් මැල්කම්  රංජිත්  ඇතුළු ශ්‍රී ලංකා කතෝලික  පල්ලිය ගත් දැඩි ස්ථාවරය නොවන්නට එම සිදුවීම තවත් ත‍්‍රස්තවාදී ක‍්‍රියාවක් ලෙස පමණක් සැලකීමට හෝ නැතහොත් තවත්  එක ප්‍රහාරයක්, ලේ වැගිරීමක් හෝ තවත්  එක අවාසනාවන්ත  සිද්දියක් පමනක්වීමට  ඉඩ තිබුණි. තවමත්  පාස්කු ප්‍රහාරය සමබන්දයෙන් සිදුවන විමර්ශනවලට එම ඉරණම අත්වීමට  ඇති ඉඩකඩ වැඩිය. ඒ සදහා  කාදිනල් මැල්කම්  රංජිත්  ඇතුළු ශ්‍රී ලංකා කතෝලික පල්ලිය තවදුරත් පෙරමුණගෙන ක්‍රියාකල යුතුය. ඇත්තවශයෙන්ම, පාස්කු ප්‍රහාරය සම්බන්දයෙන්  නිසි විමර්ෂණයක් කර එම අපරාදයට දායකවූ මෙන්ම  එය වලක්වා නොගත් සියලුදෙනා නීතිය ඉදිරියට පමුණුවා සාධාරණ නඩු විභාගයකට යොමුකිරීම සදහා හඩනැගීම ශිෂ්ට සම්පන්න සෑම මනුෂ්‍යයෙකුගේම යුතුකමකි. 

මාකස් ප්‍රියන්ත  පෙරේරා  

21/12/2020    

චම්පික රණවකගේ නව දේශපාලන පිම්ම සහ ක්‍රිස්තියානීන්ට ඇති අභියෝගය

චම්පික රණවක මහතා හෙළ උරුමයෙන් ඉවත්ව නව දේදේශපාලන  ව්‍යාපාරයක් ආරම්භ කරන බව පසුගියදා ප්‍රකාශයට පත්කරන ලදි. එය දැනට ඔහු සාමාජිකත්වය දරන සජිත් ප්‍රේමදාසගේ සමගි ජනබලවේගය හෝ ඊට වඩා පුළුල් පෙරමුණක් වියහැකි බවද ඔහු දැක්වන ලදි. එහිලා ප්‍රබුද්ධ භික්ෂුන් වහන්සේලාට, උගත් තරුණ-තරුණයින්ට, 'දේශප්‍රේමී සිංහල-බෞද්ධ' ජනයාට පෙරමුණ ගෙන ක්‍රියාකරන්න යැයි ඔහු ඉල්ලා සිටියේය.

 

ජනතා මිතුරෝ, සිංහල වීර විදානය, ත්‍රස්‌ත විරෝධී ජාතික ව්‍යාපාරය, සිහළ උරුමය සහ ජාතික හෙළ උරුමය ආදී එකක් පසු පස එකක් ලෙස දේශපාලන සංවිධාන, පක්ෂ ආදිය ගොඩනගමින් ශ්‍රී ලංකාවේ දේශපාලන බලය අත්කර ගැනීම සදහාවු සීඝ්‍ර ගමනක නිරතවන චම්පික රණවක මහතා, හෙළ උරුමයෙන් ඉවත්වෙමින් සිදුකල කථාව එක්තරා ආකාරයක දේශපාලන වැඩ පිළිවෙලක ප්‍රකාශණයක් (manifesto) ලෙස පැහැදිලිවම සැලකිය හැක්කකි. 

එකී කථාව තුල ඔහු : 

1.ත්‍රස්‌ත විරෝධී ජාතික ව්‍යාපාරය බිහිකරමින් ප්‍රභාකරන්ගේ කොටි සංවිධානය පරදවා ශ්‍රී ලංකාවේ ඒකීය රාජ්‍ය ව්‍යූහය රැකගැනීමට ඔහු ඇතුළු ඔහුගේ දේශපාලන ව්‍යාපාරය ගෙනගිය දේශපාලන වැඩපිළිවෙළ ගැන විස්තර කරන ලදී .

2. නිදහසින් පසු ශ්‍රී ලංකාවේ දේශපාලන විකාශනය විග්‍රහ කරමින් 'සිංහල බෞද්ධයින්ගේ දුක් ගැනවිලි, අභියෝග සහ දේශපාලන අභිලාෂයන් විස්තර කරන ලදී. 

3. නිදහසින් පසු පැවති රජයන් යටතේ මෙතෙක් සිංහල-බෞද්ධයින් ඉටුකරගත් දේශපාලන ඉල්ලීම් සහ වර්තමානයේ බලසම්පන්නව නැගී ඇති 'නව සිංහල - බෞද්ධ මධ්‍යම පාන්තික' ජනතාවගේ දේශපාලන අභිලාෂයන් මුදුන්පත් කරගත හැකි රාජ්‍ය පාලනයක් ඇතිකරගැනීම සදහා නවතම දේශපාලන ව්‍යායාමයක අවශ්‍යතාවය මතුකරන ලදී. 

පැහැදිලිවම චම්පික රණවක මහතාගේ දේශපාලන දෘෂ්ටිය සිංහල-බෞද්ධ ස්වොත්මක ජාතිකවාදී (chauvinistic nationalism) දෘෂ්ටිවාදයක් සහ වැඩපිළිවෙලක් අනුව සකස්වුවක් බව නොරහසකි. ලංකික ශිෂ්ටාචාරය ගොඩනැගුවේ සිංහල-බෞද්ධයන්ය, ලාංකික අනන්‍යතාවයේ පදනම සිංහල-බෞද්ධ සංස්කෘතිය ය යන්න ඔහු නිතර නිතර දක්වන්නකි. ඔහුට අනුව හින්දු, මුස්ලිම් , ක්‍රිස්තියානි ආදී සෙසු ජාතීන් සහ අනන්‍යතාවයන් ලාංකික ශිෂ්ටාචාරය නම්වූ සිංහල-බෞද්ධ මහා වෘක්ෂයේ එතුන 'වැල්' ය. තවද සිංහල-බෞද්ධ නොවන අනෙකුත් ජන කණ්ඩායම් නම්වූ 'වැල්' වලට හොදින් වැඩී, මල්පල ගැන්වීමට තරම් 'සිංහල-බෞද්ධ ජනයාගේ සහනශීලීත්වය' ඉඩ ප්‍රස්ථාවක් ලබාදී ඇති බවත්, එය සිංහල-බෞද්ධ ශිෂ්ටාචාරය තුල ඇති ලක්ෂණයක් බවත්, අනෙක් ජාතීන් සහ සංස්කෘතික අන්‍යයතාවයන් එකී 'සිංහල-බෞද්ධ සහනශීලීත්වය' හොදින් අවබෝධකර ගතයුතු බවත්, 2017 මැයි 01 දින හෙළ උරුමයේ මැයි දින උත්සවයේදී ඒ.ඊ. බුල්ජන්ස්, අනගාරික ධර්මපාල, ඒ.ඊ. ගුණසිංහ ආදින් සමරමින් චම්පික රණවක මහතා දක්වා තිබුණි. (ඒගැන මෙම යොමුව ඔස්සේ කියවිය හැක. )

චම්පික රණවක මහතාගේ දේශපාලන දෘෂ්ටිය සිංහල-බෞද්ධ ස්වොත්මක ජාතිකවාදී (chauvinistic nationalism) දෘෂ්ටිවාදී වැඩපිළිවෙලක් තුල සකස්වුවක්යැයි දක්වන්නේ ඔහු මේ ආකාරයට සිංහල-බෞද්ධ අනන්‍යතාවය/ජාතිකත්වය රටේ සෙසු සියලු ජාතික, ආගමීක සහ සංස්කෘතික අනන්‍යතාවයන් අභිබවමින්, යටපත්කරමින්, සෙසු සියල්ලටම වඩා ඉහලින් අධිපතිවාදීව ඔසවා තබන නිසාය. එවැනි ව්‍යාපෘතියක් සමාන වන්නේ ජර්මනියේ ජර්මන් ජනයා වුකලී සුපිරිසිදු, උදාර, ආර්ය ජනවර්ගයක් යැයි කියමින්, යුදෙව්, ජිප්සි, කොමියුනිට්ස්, ඇනාකීස්ට් ආදී සෙසු සියලු ජාතීන් සහ දේශපාලනිකව වෙනත් මත දැරූවන් සමූලඝාතන කරමින් ලෝක යුද්ධයකට මුල පුරමින් ජර්මනිය විනාශයට ගෙනගිය හිට්ලර්ගේ නාසිවාදී ව්‍යාපෘතියටය.

කෙසේවෙතත්, ලාංකික දේශපාලන විභවයන්ගෙන් සමහරක් කාලාන්තරයක් තිස්සේ හිට්ලර් කෙනෙක් සොයමින් සිටින බව අපි දනිමු. ගෝඨාභය රාජපක්ෂලට හිට්ලර් කෙනෙක් වෙන්න යැයි ලංකාවේ ප්‍රමුඛ පෙලේ භික්ෂූන් වහන්සේ නමක් ප්‍රසිද්ධියේම ඉල්ලා සිටි බව සියල්ලෝම දනිති. බටහිර රටක නොව ජපානය හෝ වෙනත් දියුණු රටක කිසිවෙක් හිට්ලර් කෙනෙක් ඉල්ලා සිටින්නේ හෝ ඔහු ගැන පාරම්බාන්නේ නැත. එසේ කිරීම අපරාධයක් මෙන්ම, අපරාධයටකට අනුබලදීමක් ලෙස එකී රටවල් සලකති. 

එහෙත් ලංකාවේ උගත්, වැදගත්, ප්‍රබුද්ධ යැයි කියන්න පිරිස් පවා හිට්ලර් ගැන තියා, ලෝක ඉතිහාසය, ලෝකයේ ශිෂ්ටාචාර ගත පැවැත්ම ගැන මෙලෝ හසරක් දන්නේ නැත. ඔවුන් විවිධ විභාග පාස්කර දොස්තරවරු, නීතිඥයින්, ඉංජිනේරුවන්, පරිඝණක මෘදුකාංග ඉංජිනේරුවන්, විද්‍යාඥනයින්, වාස්තු විද්‍යාඥනයින්, ගණකාධිකාරීන්, කලමනාකරුවන්, ආචාරවරු, මහාචාර්යවරු, කලාකරුවන්, අතිසාර්ථක ව්‍යාපාරිකයන්, රාජ්‍ය නායකයින් ඇතුළු දේශපාලකයින් බවට පත්ව සිටියද ඔවුන්ට දියුනු සමාජයන්වලින් පැමිණි එම ශ්‍රේණිවල සමාන සාමයිකයින් සමගවත් හරි හරිට පෑහීමට නොහැක. මේ තත්වය මා ලංකාව තුලදී මෙන්ම වෙනත් රටවලදීද අනන්තවත් දැක ඇත්තකි.

ඇත්තවශයෙන්ම, ලෝකයේ සුප්‍රකට විශ්වවිද්‍යාලට නොගියද, ලෝකප්‍රකට නිර්මාණයන්ගේ පහස සහ අත්දැකීම අත්නොවිදියද, සම්භාව්‍ය සහ කලාකෘතීන්මක සංස්කෘතික නිෂ්පාදනයන්ගෙන් පන්නයක් නොලද ද, භාෂා කිහිපයක් පිළිබද පරිචයක් නොමැතිවුවද, අපේ රටින් බිහිවෙන වෘත්තිකයන්ගේ දක්ෂතා ලෝකයේ දියුණු රටවලින් බිහිකර ඇති එම ශ්‍රේණිවල සමාන සාමයිකයින්ගේ දක්ෂතා පරයා යන සුළුය. දක්ෂතා අතින් නම් ඔවුන් කිසිසේත්ම කිසිවෙකුට දෙවෙනි නැත. එහෙත් දියුනු සමාජයන්වලින් පැමිණි එම ශ්‍රේණිවල සමාන සාමයිකයින් සමගවත් හරි හරිට පෑහීමට නොහැකි බව ලංකික ඔවුන්ට පමණක් නොව බොහෝ ආසියානු සහ අප්‍රිකානු වෘත්තිකයන්ද නිරතුරුවම අත්දකින යතාර්ථයක් වී තිබේ. 

අවාසනාව වී ඇත්තේ මෙසේ විවිධ විභාග පාස්කර දොස්තරවරු, නීතිඥයින්, ඉංජිනේරුවන්, පරිඝණක මෘදුකාංග ඉංජිනේරුවන්, විද්‍යාඥන්, වාස්තු විද්‍යාඥනයින්, ගණකාධිකාරීන්, කලමනාකරුවන්, ආචාරවරු, මහාචාර්යවරු, කලාකරුවන්, අතිසාර්ථක ව්‍යාපාරිකයන්, රාජ්‍ය නායකයින් ඇතුළු දේශපාලකයින් පවා පිටරටකදී පමණක් නොව තමන්ගේ රටේදී පවා තම ශ්‍රේණිවල සමහරුන්ගෙන් පමණක් නොව, කිසිසේත්ම එම ශ්‍රේණිවලට අදාල නොවන එකී ශ්‍රේණිවලට පිටතින් සිටින ඇතැම් පිරිස් සමග පවා පෑහීමට නොහැකිව තිබීමය. ඔවුන්ට පරයා යා නොහැකි, ඔවුන්ට පෑහීමට නොහැකි, පිරිසක් හමුවීම සහ එවැන්නන් පිරිසක් සිටීම ම ඔවුන්ට අභියෝගයකි. එය ඔවුන් නොරිස්සන්නකි. ඔවුන් මෙන් එතරම් අධ්‍යාපනයක්, දැනුමක් හෝ සුදුසුකම් නොතිබුණද, ඔවුන් කෙතරම් උඩකට පැමිණියද, ඔවුන් භක්ති නොවදින, ඔවුන්ට භුක්තිවිදිය නොහැකි, ඔවුන්ට පෑහීමට-අත්විදීමට නොහැකි සතුටක්, නිදහසක්, සමාජ තත්වයක්, වින්දනයක්, භුක්තිවිදින පිරිසක් සිටින බව අවබෝධවීම ම එක්තරා ආකාරයට ඔවුන්ගේ සියලු ජයග්‍රහණයන්ගේ හුලං බැස්සවීමකි. ඔවුන්ගේ සියලු මස්තකප්‍රාප්තියන් (achievements) බොදකර දැමීමකි. 

සියළු කඩඉම් පැන, විවිධ විභාග පාස්කර, බොහෝ ජයග්‍රහණ අත්කරගත්තද තමන්ට අත්කර ගතනොහැකි, තමන්ට විදිය නොහැකි, ලගාවිය නොහැකි, අන්තයන් ඔවුහු පන්තිය, පැලැන්තිය, බටහිර, ඉංග්‍රීසි භාෂාව සහ ක්‍රිස්තියානි ආගම ලෙස වර්ගීකරණය කර එයට එරෙහිව රෝද බැදගැනීම දැකිය හැක්කකි. ලංකාවේ නිදහසින් පසුව බිහිවූ, සිංහල භාෂාවෙන් සිප්සතර හදාරා රජයේ රැකියාවලට ඇතුළුවූ දෙමාපියන්ට පමණක් නොව, ඔවුන්ගේ දැඩි කැපකිරීම් තුල ප්‍රසිද්ධ පාසල්වලට යවා, ඉංග්‍රීසි උගන්වා, උසස් රැකියාවලට උසවා තැබු ඔවුන්ගේ දරුවන්ද, පරිඝනක, සෙල්ෆෝන් ආදිය හසුරුවන ඔවුන්ගේ දරුවන්ගේ දරුවන් දක්වාද ඉහත කොටස් කෙරෙහි ජනිත කරන ලද විරෝධය අඛණ්ඩවම රැගෙනවිත් ඇති තිබෙන බව පැහැදිලිය. 

චම්පික රණවක මහතා නව දේශපාලන පෙරමුණක් පිහිටවීම සදහා හෙළ උරුමයෙන් ඉවත්වෙමින් ආමන්ත්‍රණය කරන්නේ ඔවුන්ටය. ඔහු ආමන්ත්‍රණය කරන්නේ නිදහසින් පසුව බිහිවූ සිංහලෙන් අධ්‍යාපනය ලබා විවිධාකාරයෙන් සාර්ථකත්වයන් අත්කරගත් නව සිංහල - බෞද්ධ මධ්‍යම පන්තියටය. ඔවුන්ගේ දැවෙන ප්‍රශ්නය වන ඔවුන් අත්නොවිදින එහෙත් අනෙකා අත්විදින සතුට අත්කරගන්නේ කෙසේද යන්නටය. එකී සතුට අතකරගත හැකි දේශපාලන ව්‍යාපාරයක් සහ රාජ්‍යයක් ගොඩනැගීම චම්පික රණවක මහතා සිය දේශපාලන අහිලාෂය කරගෙන තිබේ.

චම්පික රණවකලාගේ මේ මදිපඩු පුරවා ගැනීමේ ව්‍යායාමය, ඇරියස් කවර්කර ගැනීමේ ව්‍යාපාරය, විවිධ කාලවල විවිධ ආකාරයෙන් ක්‍රියාවට නැන්වුහ. විටක එය ඊළාම් විරෝධයක් ඔස්සේ දෙමළ විරෝධයක් දක්වා ද, තවත් විටක එය සිංහල ව්‍යාපාර ප්‍රවර්ධනය කිරීමේ අරමුණින් දියත්කල මුස්ලිම් විරෝධයක් දක්වාද වර්ධනයවිය. හෙළ උරුමයෙන් ඉවත්වෙමින් චම්පික රණවක මහතා සිදුකල කතාවේදී තවත් විරෝධයක් ප්‍රවර්ධනය කිරීමටද කටයුතු කරන බවක්ද පෙනීගියේය. ඒ වූකලී ක්‍රිස්තියානි විරෝධය ය. 1962 අසාර්ථක හමුදා කුමන්ත්‍රණය පිටුපස සිටින්නේ කතෝලික - ක්‍රිස්තියානි පල්ලි බවත්, එය 1960 දශකයේ කතෝලික/ක්‍රිස්තියානි පාසැල් රජයට පවරාගැනීමට එරෙහිව සිරිමාවෝ බණ්ඩාරනායකගේ ආණ්ඩුව පෙරලීමට කල කුමන්ත්‍රණයක් ලෙස ඔහු දක්වා තිබුණි. 

මෙය හිතා මතාම කරුණු විකෘතිකර මහජනයා නොමග යැවීමට කෙලි පචයකි. 1962 අසාර්ථක හමුදා කුමන්ත්‍රණයට පල්ලිවල කිසිදු සම්බන්දයක් නොතිබි බවත්, එය කිසිසේත්ම කතෝලික /ක්‍රිස්තියානි පාසල් ආණ්ඩුවට පවරාගැනීමට එරෙහිව ඇතිවුවක් නොවන බවත් එම කුමන්ත්‍රණය පිලිබදව සිදුකල අධිකරණ විමර්ශනයේදී මෙන්ම අනෙකුත් පරීක්ෂණ සහ අධ්‍යනයන්වලින්ද තහවුරුවී ඇත. 

කරුණු එසේ තිබියදී ප.ච. රණවක හෙවත් පඨලී චම්පක රණවක මෙවැනි මහජනයා නොමගවන ප්‍රකාශ කරන්නේ ඇයි? පැහැදිලිවම, ඔහුගේ/ඔවුන්ගේ මදි පාඩු පුරවාගැනීමටය. 'ඇරියස් කවර්' කරගැනීමටය. ඔහුට /ඔවුන්ට භුක්තිවිදිය නොහැකි එහෙත් අනෙකා භුක්තිවිදින සතුට විනාශ කරලීමටය. එහිලා ඔවුන් ප්‍රවර්ධනය කරන දෘෂ්ටිවාදය නම් ලංකික ශිෂ්ටාචාරය ගොඩනැගුවේ සිංහල-බෞද්ධයන්ය, ලාංකික අනන්‍යතාවයේ පදනම සිංහල-බෞද්ධ සංස්කෘතිය යන අධිපතිවාදයය. 

 

එහෙත් අපි විශ්වාස කරන්නේ කිසියම් ශිෂ්ටාචාරයක් හෝ සංස්කෘතියක් එක ජාතියකට හෝ එක් ආගමකට ලඝුකල නොහැකි බවය. සෑම ශිෂ්ටාචාරයක්ම මෙන්ම සෑම සංස්කෘතියක්ම අනෙක් ශිෂ්ටාචාරයන්ගෙන් සහ සංස්කෘතියන්ගෙන් පෝෂණයවූ පොදු මිනිස් ශිෂ්ටාචරය. එහෙත් ඒ බව නොතකමින් සිය බල දේශපාලන ව්‍යාපෘතිය වෙනුවෙන් සිංහල-බෞද්ධ ස්වොත්මක ජාතිකවාදී (chauvinistic nationalism) දෘෂ්ටිවාදයක් සහ වැඩපිළිවෙලක් භාවිතාකරයි. එසේ කරමින් ප.ච. රණවකලා දැන් පටන්ම හින්දු, මුස්ලිම් , ක්‍රිස්තියානි ආදී සෙසු ජාතීන් සහ අනන්‍යතාවයන් ලාංකික ශිෂ්ටාචාරය නම්වූ සිංහල-බෞද්ධ මහා වෘක්ෂයේ එතුන 'වැල්' ය යනුවෙන් දක්වමින්, එකී සිංහල-බෞද්ධ නොවන අනෙකුත් ජන කණ්ඩායම් නම් 'වැල්' වලට හොදින් වැඩී, මල්පල ගැන්වීමට තරම් 'සිංහල-බෞද්ධ ජනයාගේ සහනශීලීත්වය' ඉඩ ප්‍රස්ථාවක් ලබාදී ඇතයි දක්වමින්, සෙසු ජාතීන් සහ සංස්කෘතික අන්‍යයතාවයන් එකී 'සිංහල-බෞද්ධ සහනශීලීත්වය' හොදින් අවබෝධකර ගතයුතු යැයි දක්වමින්, අනතුරු අගවමින් සිටී. 

අප මෙම අනතුරු ඇගවීම් කිසිසේත්ම සුලුවෙන් සැලකිය යුතු හෝ බැහැර කල යුතු නොවේ. ඒ පිලිබදව පැහැදිලි අවබෝධයෙන් සහ අවධානයෙන් පසුවිය යුතුය.

මාකස් ප්‍රියන්ත පෙරේරා 

17/12/2020 

Bête Noire - විජේවීර, ප්‍රභාකරන් සහ සිරකරුවෝ

Bête noire යනු ප්‍රංශ යෙදුමකි. එහි වචනාර්ථය 'කළු මෘගයා' (black beast) යන්නය. බැලූබැල්මට එය කළු ජනයා ඉලක්ක කරගත්, වර්ගවාදී යෙදුමක් ලෙස හැගීයනු ඇත. එහෙත් Bête noire යන යෙදුම ප්‍රංශ භාෂාවේ භාවිතයට පැමිණෙන්නේ 1799 සිට 1815 දක්වා කාලය තුල විහිදුනු නැපෝලියානු යුගය (Napoleonic era) තුලය. 

ජාතිකවාදී, මිලිටරි යුග‍යක්වූ නැපෝලියානු යුගය තුල ජාතියේ ප්‍රෞඩත්වයද, ජාතියේ විජයග්‍රහණයන් පිලිබදව මෙන්ම ජාතියේ හතුරන් මර්ධනය කිරීමට ඔවුන්ව පිලිකුලෙන් හෙලාදැකිය හැකි, ජාතියේ, සතුරන්, යක්ෂයි ආදී ලෙස හැදින්විය හැකි විවිධ අර්ථයන්, නිර්මිතයන්, විවරණයන් ඉදිරිපත් කල යුගයක් විය. 

Bête noire යන ප්‍රංශ යෙදුමද නැපෝලියා පාලන සමය තුල භාවිතයට පැමිණෙන්නේ ඒ අනුව 'කළු මෘගයා' (black beast) යන වචනාර්ථයට වඩා කිසියම් පුද්ගලයෙක්, සිද්ධියක්, ක්‍රියාමාර්ගයක් හෝ වැඩපිළිවෙළක් පිලිබදව අපූලක්, අකමැත්තක්, දැඩි විරෝධයක්, පිලිකුලෙන් යුතුව හෙලාදැකීමක් ජනිත කිරීම සදහාය. 

නැපෝලියානු යුගය තුල ඉස්මතු කල ජාතියේ ප්‍රෞඩත්ව සහ විජයග්‍රහණයන් වැඩිකල් නොගොස්ම දියවී ගියද, එම යුගයේදී නිර්මාණයකර, භාවිතයට ගත් විවිධ අර්ථ, නිර්මිත, විවරණයන් පමණක් නොව එහිලා භාවිතාකල උපමා, රූපක, පද, වදන් මෙන්ම අර්ථ නිරූපණයන් පවා ප්‍රංශ භාෂාව තුල මුල් බැසගත්තේය. Bête noire යන්නද එසේ මුල් බැසගත් නැපෝලියානු යුගයේ නිර්මාණයකල සතුරන් පිලිකුලෙන් යුතුව හෙලාදැකීමට භාවිතාකල ප්‍රංශ යෙදුමක් විය. 

නැපෝලියානු යුගයේදී පාලක පන්තියේ හතුරන් මර්ධනය කිරීමට, එකී හතුරන්ව පිලිකුලෙන් හෙලාදැකීමට, ඔවුන් ජාතියේ සතුරන් ලෙස හංවඩු ගැසීමට භාවිතා කල ඉහතකී Bête noire යන්න එම යුගයෙන් පසුව 1871 පැරිස් කොමියුනිය (Paris Commune) බිහිකළ ප්‍රංශ සමාජවාදීන්ට විරුද්ධවද, පලමු ලෝක යුද්ධයේදී ප්‍රංශය අක්‍රමණය කල කයිසාර් විලියම්ගේ ජර්මන් හමුදා හැදින්වීමටද, දෙවන ලෝක යුද්ධයේදී ප්‍රංශය අක්‍රමණය කල හිට්ලර්ගේ නාසි ජර්මන් හමුදා හැදින්වීමටද භාවිතා කලා පමනක් නොව මෑතක සිට නොනවත්වාම දියත්වෙන කහ කබා කරුවන්ගේ (Gilets Jaunes) විරෝධතාවයන් පිලිබදව විරෝධයක්, අපූලක්, පිලිකුලක්, හෙලාදැකීමක් ජනිත කිරීම සදහාද භාවිතයට ගත්හ. 

මේ ආකාරයට ඕනෑම සමාජයක පාලක පංතියේ ආදිපත්‍යයට එරෙහිව නැගී එන ප්‍රවනතාවයන්, කණ්ඩායම්, පුද්ගලයින්, සංවිධානයන් මර්ධනය කිරීමට, එකී හතුරන්ව පිලිකුලෙන් හෙලාදැකීමට, ඔවුන් ජාතියේ සතුරන් ලෙස හංවඩු ගැසීමට භාවිතා කරන කිසියම්ම පදයක් හෝ පද මාලාවක් ඕනෑම භාෂාවක් තුල දැන් දැකිය හැකි අතර එය ප්‍රංශයේ නැපෝලියානු යුගයේදී මෙන් පාලක පංතියේ බල දේශපාලන අභිලාෂයන් වෙනුවෙන් භාවිතා කිරීමද පැහැදිලිවම දැකිය හැක්කකි. 

ලංකාවේ 1971 කැරලි සමයේදී ජනතා විමුක්ති පෙරමුණේ සමාජිකයින් හැදින්වීමට භාවිතා කල චේගුවෙරාකාරයින් යන්න ඊට එක් උදාහරණයකි. එමගින් එවකට රැවුල කොන්ඩේවත් වවා නොසිටි රෝහණ විජේවීර ඇතුලු ජනතා විමුක්ති පෙරමුණේ සමාජිකයින් හංවඩු ගැසීමට උත්සහකලේ රැවුල් කොන්ඩේ වවාගත් චේගුවෙරා වැනි කැරලිකරුවන් ලෙස යම් ආකාරයක සමාජ විරෝධයක් ප්‍රවර්ධනය කිරීමේ Bête noire අටියකිනි. එහෙත් වැඩිකල් නොගොස්ම චේ ජනප්‍රිය සංකේතයක් ලෙස ලාංකිකයන් අතර මුල් බැසගත් අතර විජේවීර ප්‍රමුඛ ජනතා විමුක්ති පෙරමුණ චේගුවෙරාට ඇදගත්හ. 

පසුව ඔවුන්ව චේගුවෙරාකාරයින් ලෙස හැදින්වීමට වඩා ජේවීපී කාරයින් ලෙස හැදින්වීම පාලක පංතියට පහසුවිය. අද ද ඔවුන් ගැන ආපුලක්, විරෝධයක්, පිලිකුලක් ඇතිකිරීමට පාලක පංතියේ අනුකාරකයින්ට චේගුවෙරාකාරයින් යන්නට වඩා ජේවීපී කාරයින් ලෙස හැදින්වීම පහසුවී ඇති අතර Bête noire කරනය ඔවුන් සම්බන්දයෙන් ලංකා දේශපාලනය තුල විකාශනයවී ඇත්තේ එසේය. 

දකුණේ සිංහල-බෞද්ධ දේශපාලන ආදිපත්‍යයට අභියෝග කරමින් වෙනම ඊලාම් රාජ්‍යයක් වෙනුවෙන් සටන්කල දෙමළ බෙදුම්වාදීහු සිංහලයන්ගේ සිංහයා වෙනුවට කොටියා භාවිතයට ගත්තේද සටනට සටනක් දිය හැකි සංකේතාත්මක මුර්ගයා කරලියට කැදවීමටය. දේපාර්ශවයම එකිනෙකා පිලිකුලෙන් හෙලාදැකීමට සමත් ලෙස සිය මුර්ග සලකුණු භාවිතයේ යෙදවුහ. සත්‍යය ලෙසම ලාංකික දේශපාලනය තුල පාලක පංතියේ Bête noireට එරෙහි කැරලිකාර Bête noire මුහුණට මුහුණ හමුවුයේ දෙමළ ඊලාම් අරගලයේදීය. 

මුල්වටයේ සටනට සටනක් දුන් සිංහ - කොටි මුර්ගයන් ක්‍රමයෙන් ඉවත්කර යුද්ධයට සුදුනෙළුම්ද, 'මානුෂික මුහුනක්ද' ඇන්දවීම තුල දෙමළ ඊලාම් අරගලය ක්‍රමයෙන් වෙනත් අන්තයක් කරා ගෙනියන ලදි. ඒ අනුව තවදුරටත් කොටියා වෙනුවට Bête noire ලෙස ආදේශවුයේ ප්‍රභාකරන් සහ LTTEය ය. ඔවුන් ඇතැම්විට කොටි සංවිධානය ලෙස හැදින්වු අවස්ථා ඒමට තිබුනද ඇත්තවශයෙන් මර්දනය පහසුකලේ ප්‍රභාකරන් සහ LTTEය ය හිට්ලර්කරනය කිරීම තුලය යන්නද ඉහතකී Bête noire කරනය පිලිබදවු තර්කය තුල මතුකල හැක්කකි. 

තර්කය කුමක්වුවද මෙහිදී මතුකරන අදහස වන්නේ කිසියම් පාලක පන්තියක් සිය සතුරන් මර්ධනය කිරීමට, එකී හතුරන්ව පිලිකුලෙන් හෙලාදැකීමට Bête noire වැනි කිසියම හෝ භාෂාත්මක නිර්මිතයක් ගොඩනගන අතර එය ප්‍රංශයේ නැපෝලියානු යුගයට පමණක් අදාල වන්නක් නොව ලංකාව වැනි ලොව ඕනෑම බල දේශපාලන ව්‍යුහයක දැකිය හැක්කක්ය යන්නය. 

ලංකාව ඇසුරිනි කතා කරන්නේ නම් චේගුවෙරාකාරයින්ගේ සිට ජේවීපී කාරයින් දක්වාද, බෙදුම්වාදීන්ගේ සිට ප්‍රභාකරන්, LTTEය, කොටි සංවිධානය සහ කොටියා දක්වා පමණක් නොව, අද වන විට බයියන්, ටොයියන්, බටහිරයන්, NGO කාරයින්, දේශද්‍රෝහීන් පමනක් නොව සිරකරුවන්, කුඩුකාරයින් දක්වාද ඉහතකී Bête noire කරනය විකාශනයවී ඇති බව පැහැදිලිවම පෙනීයයි. 

ඇත්තවශයෙන්ම, අප මෙහිදී Bête noire කරනය යටතේ තේරුම් ගත යුත්තේ ඉහතකී සෑම හංවඩුවකම පාලක පන්තියේ දේශපාලනය අභිලාෂයන් ඇති බවත් එහි අවසාන අරමුණ මර්ධනයවන බවත්ය. එය දැන් භාවිතාකරන Bête noire කරනයට අදාලවන්නකි. මහර බන්ධනාගාරයේ අමානුෂික ඝාතනයන් එහි එක් ප්‍රකාශනයක් පමණකි.

මහර බන්ධනාගාරයේ සිරකරුවන් ඝාතනය එක්තරා ආකාරයට පසුගිය යහපාලන ආණ්ඩුව සහ වර්තමාන ගෝඨාභය ආණ්ඩුව අතර කාලය තුල ලාංකික මිනිස් සමාජය කෙතරම් නම් විපරිවර්තනයකට ලක්ව ඇද්ද යන්න තේරුම් ගැනීමටද අවස්ථාව සපයන්නකි. පසුගිය පාලනය සමය තුල ප්‍රවර්ධනය කල ''සිරකරුවෝද මනුෂ්‍යයෝය'' යන ආකල්පය වත්මන් පාලන රෙජීමය යටතේ ''සිරකරුවෝ නම් මරාදැම්මාට කම් නැත'' යන තත්ත්වයක් දක්වා විපරිණාමයට ලක්ව ඇත්තේ පාලක පන්තියේ දේශපාලනය අභිලාෂයන්ගේ ප්‍රකාශනයන්ට අනුකූලවය. 

එකී අභිලාෂයන් පාලක පංතියේ අනුකාරකයන් කෙතරම් පුලුල් ලෙස සමාජ ගතකර ඇද්දයත් ''සිර ගෙවල්වල ඉන්නේ හොද මිනිස්සුද?'' / ''කොරෝනා තියා මොනවා තිබුණත් උන් හිරෙන් පැන්න නම් මිනිස්සුන්ගේ ආරක්ෂාවට මොකද වෙන්නේ?, රටම අනතුරේ නේද?''/ ''හිරේ ඉදලත් දගලනව නම් පාර දෙන්නම ඕනේ'' ආදී ප්‍රකාශන මහර සිරකරුවන් මරාදැමීම ගැන විවිධ පුද්ගලයන් සමාජ මාධ්‍ය තුල පලකලකර තිබූ අදහස් ඔස්සේ පලව තිබුනා පමණක් නොව එහිලා විශාල ප්‍රතිචාරයක්ද ලැබී තිබුනි. සිරකරුවන් වූකලී සමාජ තුල සිටින පිලිකුලෙන් හෙලාදැකීය යුතු පිරිසක් ලෙස රාජ්‍ය යන්ත්‍රයන් විසින් දිගුකාලයක් තිස්සේ ගොඩනගා ඇති Bête noire ආකල්පය සිරකරුවන් කැරලි ගසන අවස්ථාවක ඔවුන්ගේ ගෙල සිරකර දැමීම සදහා කෙතරම් නම් පහසුවක් සපයන්නේද යන්න බන්ධනාගාර සමුහ ඝාතනයන් සම්බන්දයෙන් දැක්වුනු ඉහත ආකාර ප්‍රතිචාරයන් විමසීමේදී පෙනීයනු ඇත. 

එහෙත් ඇත්තවශයෙන්ම හිරගෙවල්වලට වඩා අපරාදකාරයෝ ඉන්නේ එළියේ බව, එළිමහන් සමාජයේ බව මහමහජනයාගෙන් සගවා ඇති කරුනකි. ලොකුම අපරාදකරුවන් ලේසියෙන් හිරේ නොයන, නීතියට වැලිගසමින්, නීතියෙන් රිංගායමින් යහතින් සිටී. තවද ඔවුන් අපරාදකරුවන් පාලනය කරමින් සිටිනවා පමණක් නොව පාලකයන් පාලනය කරමින් හෝ එක්කෝ ඍජුව රට පාලනය කරමින් සිය විරුද්ධවාදීන්, අපරාදකරුවන්, කුමන්ත්‍රණකරුවන් ලෙස හංවඩු ගසමින් අනෙකාට මරන වරෙන්තු ලියමින්, අනෙකාව මරාදැමීමට අණ කරමින්, මිනීමරුවන් මෙහෙයවමින්, එකී ඝාතනයන් සාධාරණයක කරමින් සිටී. 

අවාසනවකට සමාජය මේ තත්වය අවබෝධකර නොගෙන පාලක පංතිය විසින් Bête noire කරනය කරන ලද කොටස් කෙරෙහි පිලිකුල සහ වෛරය පෙරදැරිකරගෙන පෙලගැසීමය. එහි ඇති කනගාටුදායකම සත්‍යය නම් මෙලෙස ටොයියන්, බයියන්, කොටි, JVP, LTTE, දේශද්‍රෝහින්, බටහිරයන්, NGOකාරයින්, සිරකරුවන්, කුඩුකාරයින් ආදී Bête noire කරන ලද කුලකයන්වලින් පිටත නිරුපද්‍රිතව සිටින්නේ පාලක පන්තිය සහ ඔවුන්ගේ බැල මෙහෙවරකරුවන් කිහිප දෙනෙකු පමනක් වීම සහ ඔවුන් සෙසු සියල්ලන්ගේම ඉරනම තීන්දුකල හැකි තරම් සුපිරිපන්නව බලවත්වී සිටින බව තෙරුම් නොගැනීමය.

ඇත්තවශයෙන්ම, අප මුලික ලෙසම අවබෝධකර ගත යුත්තේ අප  සමාජයක් ලෙස ගමන් කරමින් සිටින්නේ කොහෙටද යන්නය.

අප ගමන් කරමින් සිටින්නේ ''සිරකරුවෝද මනුෂ්‍යයෝය'' යනුවෙන් පිලිගන්නා මිනිස්සුන්ට මානුෂිකව සළකන සමාජයක් දෙසටද? නොඑසේනම් එකිනෙකා සතුරන් , මුර්ගයන්, අධමයන් ලෙස සලකමින් එකිනෙකා මරාදමන, එකිනෙකා මරාගන්නා කාලකන්නි අධම යුගයකටද? 

ඇත්තටම අද මුළු ලංකාවම සිර කදවුරකි, එලිමහන් සිරකදවුරකි. නීතිය නොතකන, නීතියෙන් රිංගායන අපරාදකරුවන්ගේ පාලනය යටතේ ඇති එළිමහන් හිරකදවුරකි. මතවාදීමය වශයෙන් කොටුකරන ලද, පාලක පංතිය විසින් විවිධ ලේබල අලවමින් සිය විරුද්ධවාදින් Bête noire කරන ලද, ඒ ඔස්සේ මහජනයා මානසික වශයෙන් එක්තරා ආකාරයට ගාල්කරන ලද, එලිමහන් සිරකදවුරකි. ඒබැවින් මහර බන්දනාගාරයේ රැදිවියන්ට අත්වූ ඉරණම හෙට රටේ තවකෙකුට කෙසේ හෝ කොහේ හෝ කවුදා හෝ අත්වීමට ඇති ඉඩකඩ අඩුවක් නැත. එවැනි ඉරණමකට මුළු මහත් සමාජයම ලක්නොවීමට නම් සමාජය තමන්ගේම කොටසක් Bête noire කරනය කිරීමට එරෙහිව නැගී සිටිය යුතුය. පාලක පන්තියේ මර්දනයට එරෙහිව පෙලගැසීමට එය ඇවැසිම මුල්ම පියවර එයය. 

මාකස් ප්‍රියන්ත පෙරේරා 

13/12/20

ෆෝක්ලන්තය ජයගත් එංගලන්තයට 'දෙවියන්ගේ අත' ත්, මැරඩෝනාගේ හිසත්, පයත්, අත්කරදුන් දුන් පරාජය !!!

1982 ලෝක පාපන්දු ශුරතා තරගාවලිය පැවත්වුයේ ස්පාඤ්ඤයේය. එම තරගාවලිය ලෝක පාපන්දු ශුරතා ඉතිහාසයේ එක් සුවිශේෂී කඩඉමක් සටහන් කල තරගාවලියක්විය. එතෙක් රටවල් 16කට පමණක් සභභාගීවීමට අවස්ථාව සලසා තිබු ලෝක පාපන්දු ශුරතා තරගාවලියට 1982 සිට රටවල් 24කට සභභාගීවීමට හැකි ලෙස තවදුරටත් පුළුල් කරන ලදී. ඒ අනුව ආසියාව නියෝජනය කරමින් කුවේටයද, ඔස්ට්‍රේලේසියා කලාපය නියෝජනය කරමින් නවසීලන්තයද, අප්‍රිකානු කලාපය නියෝජනය කරමින් ඇල්ජීරියාව සහ කැමරූන් යන රටවල්ද ප්‍රථමවතාවට ලෝක පාපන්දු ශුරතාවට තරගවැදීමට සුදුසුකම් ලබා ගතහ. තරගාවලිය ඇරබීමට පෙර සිටම ඉතාලිය, (එවකට පැවති බටහිර) ජර්මනිය, බ්‍රසීලය, ප්‍රංශය සහ බෙල්ජියම තරගාවලිය තුල සුවිශේෂී දස්කම් දක්වනු ඇතයි යන්න පුරෝකතනය කලේය.

එහෙත් මාධ්‍ය ලෝකය තුල වඩා අවධානය දිනා සිටියේ එංගලන්තය ය. ඇත්තවශයෙන්ම ආපහු හැරී බලතහොත් 1982 වසර පුරාම මාධ්‍ය ලෝකයේ වැඩිම අවධානයක් යොමුවී තිබු රටවී තිබුනේ එංගලන්තය ය. 

අගමැති මාග්‍රට් තැචර්ගේ පුතා සහරා කාන්තාරයේදී අතුරුදහන්වීමත්, ගල් අගුරු ආකර කම්කරුවන්ගේ සිට කසල එකතු කරන්නන් දක්වා දිවගිය නිමක් නැති වැඩ වර්ජන රැල්ලත්, උතුරු අයර්ලන්තයේ IRA ගරිල්ලන්ගේ ප්‍රහාර සහ බෝම්බ පිපිරවීම් මාලාව හමුවේ පවා ත්‍රස්තවාදීන්ට මරන දඩුවම පැමිණවීම තැචර් අගමැතිනිය ප්‍රතික්ෂේප කිරිමත්, IRA සංවිධානයේ ජෙරී ඇඩම්ස් බෙල්ෆාස්ට් ආසනය දිනාගැනීමත්, දෙවන ජුවාම් පාවුලු පාප්වහන්සේ බ්‍රිතාන්‍යයට සම්ප්‍රාප්තවී එංගලන්ත ක්‍රිස්තියානි සභාවේ මුලස්ථානයවන කැන්ටබරි දේවස්ථානයට ගොස් සමගි සම්මුතියකට එලබීමත්, තැචර්ගේ දැඩි දක්ෂිණාංශික පාලනයට අහියෝග කරමින්, වමේ බලාපොරොත්තු දල්වමින්, සමාජ ප්‍රජාතන්ත්‍රවාදී පක්ෂයේ රෝයි ජෙන්කින්ස් ග්ලාස්ගොව් අතුරු මැතිවරණයෙන් එම ආසනය දිනාගැනීමත්, බ්‍රිතාන්‍යයේ ආරොන් ක්ලග් (Aaron Klug) රසායන විද්‍යාව සදහාවූ නොබෙල් ත්‍යාගය දිනාගැනීමත්, බෙන් කිංස්ලි රගපෑ ගාන්ධි චිත්‍රපටිය තිරගත්වීමත් සමග බ්‍රිතාන්‍යය යටත් විජිතවාදී පාලනය සම්බන්දයෙන් දැඩි කථා බහක් නැවත මතුවීමත්, ආදීය 1982 වසර තුල මාස්පතා, සතිපතා, දිනපතා මාධ්‍ය ලෝකය තුල බ්‍රිතාන්‍යය ගැන අවධානය යොමුවන්නට හේතුවිය. 

එහෙත්, ඒ සියල්ලටම වඩා 1982 වසරේදී බ්‍රිතාන්‍යය වෙත මුළු ලෝකයේම අවධානය යොමුවුයේ ෆෝක්ලන්ත දූපතේ අයිතිය වෙනුවෙන් බ්‍රිතාන්‍ය සහ ආර්ජන්ටිනාව යුද්ධ වැදීමය. 1982 අප්‍රියල් 2වෙනිදා ආර්ජන්‍ටිනාව ෆෝක්ලන්ත දුපත පවරා ගැනීමට විරුද්ධව, නැවත එය බ්‍රිතාන්‍යය සතුකර ගැනීමට ඇරබි ෆෝක්ලන්ත යුද්ධය, 1982 අප්‍රියල් මාසේ සිට ජුනි 14 දින අර්ජන්ටිනා හමුදා බ්‍රිතාන්‍යයට යටත්වීමෙන් අවසන්විය. 

1982 ලෝක පාපන්දු ශුරතාව ඇරබෙන්නේ ආර්ජන්ටිනාව සහ බ්‍රිතාන්‍ය අතර ෆෝක්ලන්ත යුද්ධය පවතින සමයේමය. මෙකී ලෝක කුසලානයට උතුරු අයර්ලන්තයද සුදුසුකම් ලබා තිබුණි. තරගකාරී අනෙකුත් ක්‍රීඩා කණ්ඩායම් අතර බ්‍රිතාන්‍යයට දේශපාලනිකව සතුරැ පිලවල් දෙකක් ලෙස මේ අනුව උතුරු අයර්ලන්තයත්, ආර්ජන්ටිනාවත් ඉස්මතුව පෙනුනි. බ්‍රිතාන්‍යයට එරෙහි එකී සතුරැ කදවුරුවල හතුරුකම් එළිපිටම එළිදැක්වූ එක් ක්‍රීඩකයෙක් වෙත වැඩි අවධානයක් යොමුව තිබුණි. හේ දියාගෝ මැරඩෝනා නම් විය. 

අඩිපහක් 5ක් වත් උස නැති මේ පුංචි ක්‍රීඩකයා කටමැද දොඩවන්නෙක්වූ අතරම අති දක්ෂ පාපන්දු ක්‍රීඩකයෙක්ද විය. තමාට එංගලන්තය සමග ක්‍රීඩා කිරිමට අවස්ථාවක් සැලසෙතොත් එංගලන්තයට අමතක නොවන තරගයක් ක්‍රීඩාකරන බව පුන පුනා කියන්නට විය. ඇත්තවශයෙන්ම දියාගෝ මැරඩෝනා අර්ජන්ටිනා කණ්ඩායම නියෝජනය කරමින් ප්‍රථමවරට ලෝක කුසලාන තරගාවලියට සහභාගීවුයේද 1982දීය. එහෙත් අර්ජන්ටිනා රට තුල මෙන්ම ඉන් පිටතත්, විශේෂයෙන්ම ලෝක කුසලාන තරගාවලිය පැවති ස්පාඤ්ඤ තුලත් මැරඩෝනා ඉතා විශාල ප්‍රසිද්ධියක් හිමිකරගෙන සිටියේ ඔහු ඒ වනවිටද සුප්‍රකට බාසිලෝනා කණ්ඩායම සමග ගිවිසුම් ගතවී සිටි නිසාය. එහෙත් 1982 ලෝක කුසලාන තරගාවලිය තුල බ්‍රිතාන්‍යයට, ආර්ජන්ටිනාව හෝ උතුරු අයර්ලන්තය හමුවුයේ නැත. එම නිසාම දියාගෝ මැරඩෝනා කියූ අමතක නොවන තරගයක්දීමටද ඔහුට නොහැකිවිය. එකී ලෝක කුසලානයේ මුල්ම තරගය වූ ආජන්ටිනාව සහ බෙල්ජියම අතර තරගයෙන් ආර්ජන්ටිනාව 0-1 ලෙස පරාජයට පත්විය. තත්වය වඩා දරුනුවුයේ ආර්ජන්ටිනාව, බෙල්ජියම ඇතුළත්වූ කාණ්ඩය තුල සිටි හංගේරියාව, එල් සැල්වදෝර් රාජ්‍යයට එරෙහිව ගෝල 10-1ක විශාල ජයග්‍රහණයක් අත්කර ගැනීමත් සමගය. බ්‍රිතාන්‍යය මාධ්‍ය ආර්ජන්ටිනාව සහ දියාගෝ මැරඩෝනාව හාස්‍යට ලක්කරමින් කියා සිටියේ ඔවුන්ට බ්‍රිතාන්‍යයට අමතක නොවන තරගයක් ලබාදීමට පෙර කොමියුනිස්ට් හංගේරියාවට අමතක නොවන පාඩමක් ඉගැන්වීමට සිදුව ඇති බවයි. ඇත්තවශයෙන්ම, එය එසේම සිදුවිය. ආර්ජන්ටිනාව තරගාවලියේ විශාල පෙරලියක් කල හංගේරියාව ගෝල 4-1ක් ලෙස පරාජය කළේය. එහිදී මැරඩෝනා සිය සුවිශේෂී දස්කම් පෙළහර පාමින් විශිෂ්ඨ ගෝල ද්වීත්වයක් වාර්තා කළේය. දියාගෝ මැරඩෝනාට සිය බලාපොරොත්තුවවූ බ්‍රිතාන්‍යයට අමතක නොවන තරගයක්දීමට නොහැකිවුවද, ආර්ජන්ටිනාව සහ බ්‍රිතාන්‍යය අතර තරගයක් 1982 ලෝක කුසලාන තරගාවලියේදී නොයෙදුනද, මැරඩෝනාගේ මෙන්ම ආර්ජන්ටිනාවේද බලාපොරොත්තු බිදවැටුනද, ක්‍රීඩකයෙක් ලෙස මැරඩෝනාගේ නැගීම කිසිවෙකුට නැවතිමට නොහැකිවිය. 

ඔහු බාසිලෝනා ක්‍රීඩා සමාජයට ක්‍රීඩා කරමින් තරග 36 කදී ගෝල 22ක් වාර්තා කරමින් සිය නාමය ඉහලින්ම රුන්දුහ. 1984 දී, එවකට වාර්තාවූ විශාලතම මුදලකට මැරඩෝනාව ඉතාලියේ නාපොලි ක්‍රීඩා සමාජය මිලදී ගත්තේය. නාපොලි ක්‍රීඩා සමාජය වෙනුවෙන් පමණක් මැරඩෝනා ගෝල 81 ක් වාර්තා කළේය. මැරඩෝනා වූ කලී දෙවියන්ගෙන් වරම් ලැබුවෙකු යැයි පාපන්දු ලෝකය තුල ඔහුව හැදින්වුයේ මේ සියළු තත්වයන් හමුවේය. දෙවියන්ගෙන් වරම් ලද්දෙකුටවුවද දෙවියන් දෙවන අවස්ථාවක් දෙයිදෝයි යන්න කිසිවෙක් නොදනී. එහෙත් පැහැදිලිවම මැරඩෝනාට නම් දෙවියන් දෙවන අවස්ථාවක්ද ප්‍රධානය කළේය. ඒ 1986 ලෝක පාපන්දු ශුරතා තරගාවලියේදීය. ඔහු පුන පුනා බලා සිටි එංගලන්තයට අමතක නොවන තරගයක් ක්‍රීඩා කිරීමට අවස්ථාව 1986දී අර්ධ අවසාන වටයේදී මැරඩෝනාට හිමිවිය.

ෆොර්ක්ලන්ත යුද්ධය පිළිබද අහිමිහිරි මතකය මැක්සිකොවේ පැවති 1986 ලෝක පාපන්දු ශුරතා තරගාවලියේ අර්ධ අවසාන වටයට එංගලන්තය සහ ආර්ජන්ටිනාව මුහුණට මුහුණ හමුවෙනවිට අළුයටලූ ගිනි අගුරුමෙන් එකවර බුර බුරා නැගෙන්නට විය. ආර්ජන්ටිනාවේ ජාතික ගෞවරවය ඔසවාලීමේ වගකීම සුපිරි පාපන්දු ක්‍රිඩක මැරඩෝනා අතට පැවරුණි. ඔහු ඒවන විට ලෝකයේ සිටි විශිෂ්ඨම පාපන්දු ක්‍රීඩකයා පමණක් නොව ආර්ජන්ටිනා කණ්ඩායමේ නායකයාද විය. ඉතා උණුසුම් සහ උද්වේගකරවූ එංගලන්තය සහ ආර්ජන්ටිනාව අතර අර්ධ අවසානවට තරගයේ පනස් එක්වන මිනිත්තුවේදී මැරඩෝනා හිසින් පන්දුවට පහර දෙමින් ගෝලයක් වාර්තා කලේ මුළු පිටියම දෙදරවමින් ජයගෝසා නැගෙද්දීය. එහෙත් එංගලන්ත කන්ඩායමේ දැල් රකින්නා මෙන්ම එංගලන්ත කණ්ඩායමද එය හිසින් නොව අතින් ගැසූ පහරක් යැයි කියමින් කෑගැසුහ. හැකි උපරිමයෙන් විරෝධයපෑහ. එහෙත් අද මෙන් නැවත නැවත පෙරලා ආපස්සට ගොස් බැලිය හැකි රූපවාහිණි තාක්ෂණයක් නොතිබි එකල එංගලන්ත කාණ්ඩායමේ විරෝධය මධ්‍යයේ වුවද එය නිල ගෝලයක් ලෙස පිළිගත්හ. එංගලන්තයට කල හැකි කිසිවක් නොවිණි. විනිසුරු තීරණය පිළිගනිමින් ඔවුහු නැවත තරගයට අවතීර්ණය විය. කඩා වැටුන එංගලන්ත කණ්ඩායම අන්දමන්ද කරමින් මැරඩෝනා ඉන් විනාඩි හතරකට පසුව එංගලන්ත ක්‍රීඩකයින් පස් දෙනෙකු පරාජය කරමින් වේගයෙන් තවත් ගෝලයක් වාර්තා කළේය. 1986 ලෝක කුසලාන තරගාවලියේ විශිෂ්ඨම ගෝලය හෙවත් සියවසේ ගෝලය ලෙස හැදින්වූ එම ගෝලය එංගලන්ත කණ්ඩයමේ ලෝක කුසලාන බලාපොරොත්තු සුනුවිසුනු කලේය. 1986 අවසන් පුර්ව වටයේදී බෙල්ජියමත්, අවසාන තරගයේදී (බටහිර) ජර්මනියත් පරාජය කරමින් ආර්ජන්ටිනාව 1986 ලෝක කුසලානය දිනාගත්තේය. මැරඩෝනා තරගාවලියේ විශිෂ්ඨම ක්‍රීඩකයා වෙමින් ''රන්පා වැසුම'' ද හිමිකර ගත්තේය. 

මැරඩෝනා 1982 දී ප්‍රාර්ථනාකල එංගලන්තයට අමතක නොවන තරගයක් දීමේ උවමනාව ඉෂ්ට කරගැනීමෙන් පසු සිය ජීවිත කාලය රිසි රිසි සේ ගෙවා දැමුවේය. එංගලන්තය සමග තරගයේදී ඔහු වාර්තාකල මුල්ම ගෝලය ගැන ඔහු මුලින්ම කිව්වේ එය ඔහුගේ හිසෙන් සහ 'දෙවියන්ගේ අතින්' වාර්තාකළ ගෝලයක් බවය. පසුව එය තම හිසින් නොව දෙවියන්ගේ අතින් ගැසූ ගෝලයක් බව කීහ. කෙසේ හෝ තරගය දිනීමට, ඔවුන්ට හේතු තිබෙන බවද ඔහු කිව්වේය. මැරඩෝනා නම් සිය ජීවිත අරමුණ සාක්ෂාත් කරගත් අයෙකු ලෙස මියගියේය. එහෙත් එංගලන්තය අදද එම තරගයෙන් පරාජයවීමේ වේදනාවෙන් මිරිකෙමින් සිටි. 

මාකස් ප්‍රියන්ත පෙරේරා

26/11/2020

Indecent Proposal චිත්‍රපටිය ගැන පුනරාවර්ජනයක්

මේ දවස්වල lockdown වෙලා ගෙදර ඉන්න නිසා වැඩිපුර යමක් කියවන්න, අහන්න, බලන්න වෙලාවක් ලැබිලා තියෙනවා. එහෙම කාලය ගතකරමින් ඉන්න වෙලාවක අපි A/L කරලා ගෙදර ඉන්න කාලෙදී බැලුව පරණ ඉංග්‍රීසි චිත්රපටියක් Netflix එකේ තියෙනවා දැක්කා. ඒ Adrian Lyne ගේ Indecent Proposal (1993) චිත්‍රපටිය. බ්‍රිතාන්‍ය ජාතික Adrian Lyne කියන්නේ චිත්‍රපට ඔස්සේ දක්ෂ කථා කියන්නෙක්. ඔහුගේ Lolita (1997), Unfaithful (2002) ආදී චිත්‍රපටිත් මම ආසාවෙන් බලපු චිත්‍රපට.

ඒත් Indecent Proposal චිත්‍රපටිය මගේ හදවතේ කිදාබැස තිබුන චිත්‍රපටියක්. සමහරවිට එකට හේතුව මම ආස කරපු Robert Redford සහ Demi Moore වැනි නළු / නිළියන් එහි ප්‍රධාන චරිත රගපාපු නිසා වෙන්න ඇති. Demi Moore මගේ හදවත වෙලාගත්තේ ඇය රගපෑ Ghost (1990) චිත්‍රපටියේ ඉදන් වෙන්න පුළුවන්. Ghost චිත්‍රපටියේ Righteous Brothersලා ගායනාකල Unchained Melody (Woah, my love, my darling, I've hungered for your touch..) ගීතය අදත් මම නිතර රසවිදන ආදරණීය ගීතයක්. කොහොමත් Ghost චිත්‍රපටියේ සංගීතය අධ්‍යක්ෂණය කල ප්‍රංශ ජාතික Maurice Jarre විශිෂ්ඨ සංගීත අධ්‍යක්ෂකවරයෙක්, ඔහු බ්‍රිතාන්‍යයෙන් බිහිවූ විශිෂ්ඨ චිත්‍රපටි අධ්‍යක්ෂකවරයෙක්වූ David Leanගේ Lawrence of Arabia (1962) චිත්‍රපටියේ සංගීත නිර්මාණය කිරීම වැනි දේවල සිට අදටත් මෙරට පාසැල් ළමුන් පවා සහභාගීවෙන orchestraවල වැයෙන සංගීත නිර්මාණ රාශියක නිර්මාපකයෙක්.

මේ සියල්ල මගේ මතකයට ආවේ Demi Moore ගැන, ඇය රගපෑ Indecent Proposal චිතරපටිය ගැන කතාකරන්න ගිහිල්ලයි.

ඒත් මම දන්නවා ඇත්තටම මම Indecent Proposal චිතරපටියට වඩා කැමති Demi Moore නිසාවත් Robert Redford (ඔහුගේ Butch Cassidy and the Sundance Kid (1969), An Unfinished Life (2005),The Way We Were (1973), Spy Game (2001) වැනි චිත්‍රපටි කොහොම නම් අමතක කරන්නද?) නිසාවත් නෙමේයි: මම Indecent Proposal චිතරපටියට වඩා කැමති එහි කථා සාරය සහ දෙබස් නිසයි.

Indecent Proposal චිත්‍රපටිය පුරාම දිව යන්නේ එකම එක තේමාවක්. ඒ තමයි සල්ලිවලට සියල්ල ගන්න පුලුවන්ද? ප්‍රකෝටිපති ව්‍යාපාරිකයෙක්වු  John Gage (Robert Redford)පුළුවන් තරම් උත්සහ කරන්නේ සල්ලිවලට සියල්ල ගන්න පුළුවන් කියලා ඔප්පු කරන්නයි. ඔහු එය ආර්ථික අර්බුධය නිසා රැකියාව අහිමිවෙලා, විශාල පීඩනයකට ලක්වෙලා, ලාස්වෙගාස්වල කැසිනෝ පොලවල සිය වාසනාව උරගා බලන්න ආව ආදරෙන් බැදුන තරුණ යුවලක්වූ Diana (Demi Moore) සහ David Murphy (Woody Harrelson)ටත් ඔප්පු කරන්න උත්සහ කරනවා. John Gage (Robert Redford) ගේ ඇහැ ගැටෙන Diana Murphy (Demi Moore)ව දිනාගන්න ඔහු අපමණ උත්සහයක් ගන්නවා. එත් Diana Murphy (Demi Moore) දිගටම කියන දෙයක් තමයි සල්ලිවලට මිනිස්සු ගන්න බැහැ... ආදරය දිනාගන්න බැහැ.. කියන එක. ඒ දෙබස් ඉතාම ආකර්ෂණීයයි...

“- John Gage: That's naive, Diana. I buy people every day.

- Diana Murphy: In business, maybe, but you can't buy people not when real emotions are involved.

- John Gage: So you're saying you can't buy love? That's a bit of a cliché don't you think?

- Diana Murphy: It's absolutely true.”

Diana Murphy (Demi Moore) කොහොම මොනවා කිව්වත් අන්තිමට ප්‍රකෝටිපති John Gage කියනවා ඇගේ සැමියාට ඩොලර් මිලියනක් දෙන්නම් ඔයාගේ ගෑනිව එක දවසකට මට එවන්න කියලා...අශිලාචාර යෝජනාව හෙවත් Indecent Proposal චිත්‍රපටිය දිගහැරෙන්නේ අන්න එතන සිටයි. එක මහා එපාකරපු, හදවත කීරි ගැසෙන යෝජනාවක්. පිළිකුලෙන් යුතුව හෙළාදැකිය යුතු යෝජනාවක්. මරාගෙන මැරෙන්න හිතෙන යෝජනාවක්. ඒත් අන්තිමට සිය ණයතුරුස්වලින් නිදහස් වෙන්න, ඇයගේ සැමියා සමග ජීවිතය ජයගන්න දෙදෙනාගේම කැමැත්ත මත  අර ප්‍රකෝටිපති John Gageගාවට යන්න Diana Murphy (Demi Moore) කැමති වෙනවා. යෝජනාවට කැමතිවෙලා ගෑනී ගියාට පස්සේ තමයි ඇගේ සැමියාවූ David Murphy (Woody Harrelson) හදවත මොරගහන්නේ. පපුව පැලෙන්නේ...ඔහු එතැනින් එහාට සම්පුරණයෙන්ම කඩා වැටෙනවා...ඔහු සමග වගේම ඇය සමගත් තරහක් ඇතිවෙනවා.. ඔහු පිස්සෙක් පිහාට්ටෙක්වෙනවා... කෙළවරක් නැති සැකකිරීමවලට යනවා... එය අවසාන වශයෙන් ඔවුන් දෙදෙනා වෙන්කිරීම දක්වා ගමන්කරනවා...ඒ මොහොත වෙනකම් Diana Murphy (Demi Moore)ගේ සැමියාවු David Murphy (Woody Harrelson) දැනගෙන හිටියේ නැහැ ඔහු ඇයට කෙතරම් ආදරය කලාද වග...ඇය තමා ලග හිටියත් තමාට ඇයව නොදැනෙන තරමට ඔහු අසංවේදීවූ බව ඔහුට හැගෙන්න පටන් ගන්නවා... ඇත්තටම චිත්‍රපටියේ පළමු වාක්‍යත් එකයි: “Losing Diana is like losing a part of me. I thought nothing could change the way we felt about each other. I thought we were invincible.”

කොහොමවුනත් Diana Murphy (Demi Moore)ගේ ශරීරය ප්‍රකෝටිපති John Gage ගාවට ගියත්, ඇයගේ ආදරය John Gageට එහෙම ලේසියෙන් නතුවෙන්නේ නැහැ...එක ප්‍රකෝටිපති John Gageත් ඉතා හොදින් දන්නවා...ඔහු ටික ටික ඇයව දිනාගන්න උත්සහ කරනවා. ඇති තරම් වියදම් කරනවා...ඇයව සතුටට පත්කරන්න පුළුවන් බොහෝ දේවල් කරනවා. ඇගේ හදවත දිනාගන්න පුළුවන් සියල්ල කරනවා...

අවසානයේ ඇය ඇගේ පැරණි සැමියාවූ David Murphy (Woody Harrelson)ට දික්කසාදය ඉල්ලා යවනවා. ඒ වෙනකොට විවිධ දුඛ්‍යවේදනාවන්ගෙන් අපමණ කඩාවැටීමකට ලක්වූ David ගුරුවරයෙක් ලෙස අලුත් ජීවිතයක් පටන් අරන්...ඔහු ඇයගේ දික්කසාද ඉල්ලුම් පත්‍රය පුරවා ඇය හමුවීමට ගොස් ඇයට කියනවා ''මම හිතුවා අපි එකිනෙකාව නොපෙනෙන නොදැනෙන ගානටයි හිටියේ...නමුත් මම දැන් දන්නවා මිනිස්සු ආදරයෙන් ඉද්දී එකිනෙකාට කලකී සියල්ල අමතක කරන්න බැහැ...එත් ඒ අය තවදුරටත් එකට ඉන්නවා නම් ඒ ඉන්නේ ඒ සියල්ල අමතක කරන නිසා නෙමෙයි, ඒ අය එකිනෙකාට සමාවදීම නිසයි'' කියලා (“I thought we were invincible. But now I know that the things that people in love do to each other, they remember. And if they stay together, it's not because they forget. It's because they forgive.”)

ඒ දෙබස ඒ චිත්‍රපටියේ සියල්ල එක මොහොතකදී එක පෙලට කැටිකොට ගන්නවා...David ගේ සහ Diana ගේ දෙබස දෙස ඈත සිට බලන් ඉන්න ප්‍රකෝටිපති John Gage තේරුම්ගන්නවා මම කොච්චර කොහොමකලත් Dianaගේ දෑස්වලින් ඇගේ සැමියා වූ Davidට ගලාහැලුන ආදරය කවදාවත් ඔහුට දිනාගන්න බැහැ කියලා. ප්‍රකෝටිපති John Gage හිතාගන්නවා සල්ලිවලට සියල්ල ගන්න බැහැ කියලා.

Diana Murphy (Demi Moore) සහ David Murphy (Woody Harrelson) අළුතින්ම ජීවිතය පටන්ගන්නවා..නැවත ආදරයෙන් වෙලෙනවා... ඒ සියල්ලේම පදනම වුනේ ඔවුන් එකිනෙකාට සමාව දී ඔවුන් එකිනෙකා මනුෂ්‍යන් වශයෙන් එකිනෙකාව නැවත පිළිගැනීමයි.. ඇත්තටම සමාවදීම කියන්නේ මොනතරම් තීරණාත්මක දෙයක්ද? 'මට අමතක කරන්න බැහැ..මට හිතින් අයින්කරගන්න බැහැ' කිය කියා වදවෙන, වදදෙන, වදවිදින සියල්ලන්ටම සමාවදීම කියන්නේ මොනතරම් දිව්‍ය ධානයක්ද? සමාවදීම නොදන්නා මිනිස්සු ඒ සහනය කොහොම අත්දකින්නද? බයිබලේ එක තැනකදී ජේසුගෙන් අහනවා අපි කීපාරක් සමාව දෙන්න ඕනද කියල. ජේසු කියනවා හැත්තෑ වාර හැත්තෑවක් (“seventy times seven times” - Matthew 18:22). ඒ කියන්න සීමා මායිම්වලින් තොරව (boundlessness) සමාවදෙන්න කියලයි. ආදරේ නම් එක කරන්න පුළුවන් දෙයක්...සමාව දෙන්න පුළුවන් නම් කිසිවක් කවදාවත් අහිමිවෙන්නේ නැහැ. සමාවදිය හැකි ආදරයක් කවදාවත් නැතිවෙන්නේ නැහැ...ඔය චිත්‍රපටිය පටන්ගද්දීම ඒ ගැන කියනවා, අපි ඒක 1990 ගණන්වල ඉදලා නිතරම අහලා තියෙන දෙයක් “If you ever want something badly, let it go. If it comes back to you, then its yours forever. If it doesnt, then it was never yours to begin with.”

මාකස් ප්‍රියන්ත පෙරේරා

13/11/2020

කොරෝනා එන්නත සහ රුසියාව

ඇමරිකානු ජනාධිපතිවරණය අවසන්වූ වහාම කොරෝනාවලට එන්නතක් හොයාගත්තේ යැයි යන ප්‍රවෘත්තිය පලවෙන්නට විය. එය සමස්ත ලෝකයේම දැන් වැඩිම දෙනෙක් බලා ඇති ප්‍රවෘත්තියවී හමාරය. 

කොරෝනා නිසා දිනකට දහස්ගානක් මියයන මොහොතක කොරෝනාවලට බෙහෙතක් හොයාගත්තේයැයි පුවත ලෝක ප්‍රවෘත්ති අතර මුල් තැනට පත්වීම අරුමයක් නොවේ. ඒකී ප්‍රවෘත්තිය නිසා ලෝකය පුරාම කොටස් වෙළදපොලවල මිල ඉහල ගිය බව දැක්වෙන පුවතද ඒ අනුව අපට තේරුම්ගැනීමට පුළුවන.  කොරෝනා උවදුර නිසා කඩාවැටුන කොටස් වෙළදපොලවල කොටස් ලොව  මහා පරිමාන ධනවතුන් සහ කොම්පැනිකරුවන් විසින් ඉතා අඩු මුදලකට මිලදී ගනිමින් සිටීයැයි පහුගිය කාලයපුරාම වාර්තාවිය. එවැනි තත්වයක් තුල කොරෝනා වසංගතය සදහා ප්‍රතිකාරයක් සොයාගත්තේයැයි වාර්තාවූ  සැනින් කොටස් වෙලදපොලවල ආයෝජකයින් ක්ෂණිකයෙන් ලාභ ඉපැයීමකට යොමුවන්නටද ඇත. ඒ සියල්ල සිදුවුයේ කොරෝනා වසංගතයට බෙහෙතක් සොයාගත්තේයැයි යන පුවත නිසාය.

කොරෝනා වසංගතයට ප්‍රතිකාරයක් හොයාගත්තේයැයි ප්‍රකාශකලේ  ඇමරිකාව කේන්ද්‍රකරගත් බහුජාතික ඖෂධ සමාගමක් වන Pfizer සමාගම සහ ඔවුන්ගේ අනුබද්ධ ආයතනයක් වන BioNTech සමගම විසිනි. BioNTech ආයතනය පිළිකා රෝග සදහා භාවිතා කරන ඖෂධ නිෂ්පාදනය සම්බන්දයෙන් ප්‍රසිද්ධියක් උසුලන ජර්මන් සමාගමකි.

මේම සමාගම් කොරෝනා රෝගය සදහා ප්‍රතිකාරයක් සොයාගත්තේ යැයි නිවේදනය කිරීමට පෙර පවා, පසුගිය ජුලි මාසේම, රුසියාව කොරෝනා වසංගතයට ප්‍රතිකාරයක් හොයාගත්තේ යැයි නිවේදනය කළේය. එම දවස්වලම කොරෝනා වසංගතයට එන්නතක් සොයමින් සිටි බ්‍රිතාන්‍යයේ  ඔක්ස්ෆඩ් විශ්වවිද්‍යාලයේ පරීක්ෂන කණ්ඩායම් වාර්තාකල පුවතක්වුයේ ඔවුන්ට රුසියන් සයිබර් ප්‍රහාරයක් එල්ලවුන බවත්, ඔවුන්ගේ දත්ත සොරාගැනීමට රුසියානු සයිබර් හැකරුන් උත්සහකල බවත්ය.

රුසියාව ඔක්ස්ෆඩ් විශ්වවිද්‍යාලයේ පරීක්ෂනවල දත්ත සොරාගත්තාද? නැද්ද? යන්න ගැන අපි නොදනිමු. එහෙත් Pfizer සහ BioNTech සමාගම්  කොරෝනාවට ප්‍රතිකාරයක් සොයාගත්තායැයි දැක්වූ සැනින්ම රුසියාවද නිවේදනයක් නිකුත්කරමින්  දැක්වුයේ ඔවුන් සතුවද කොරෝනා වසංගතය සදහා එන්නතක් ඇති බවත් එහෙත් එය සදහා ලෝක සෞඛ්‍ය සංවිධානයෙන් (WHO) නිසි අනුමැතිය ලබාදී නැති බවත්ය. ලෝක සෞඛ්‍ය සංවිධානයේ ප්‍රතිචාරයවුයේ රුසියානු කොරෝනා ප්‍රතිකාරය නියමිත පිළිවෙත්  සහ ක්‍රමවේදයන් අනුගමනය කරමින් සිය ප්‍රතිකාරයේ සාර්ථකත්වය තවමත් තහවුරු කරගෙන නැති බවයි. එහෙත් රුසියානු ප්‍රතිකාරය සාර්ථක බව රුසියාව ප්‍රකාශකලා පමණක් නොව පුටින්ගේ පවුලේ එක් දියණියක් පවා ඔවුන්ගේ  කොරෝනා එන්නත අත්හදා බලා සාර්ථක ප්‍රතිපල ලබාගත් බව පුටින්ම දක්වා තිබුනි. ඇත්ත වශයෙන්ම කොරෝනා වසංගතය සදහා එවැනි සාර්ථක ප්‍රතිකාරයක් රුසියාව සතුව තිබේද? සාර්ථක නොවන ප්‍රතිකාරයක් සිය පවුලේ සමාජිකයෙකුට ලබාදීමට පුටින් ඉඩ ලබාදෙයිද? තමන්ගේ පවුලේ කෙනෙකුට ප්‍රතිකාරය ලබාදී සාර්ථකවූ පමණින් ලෝක සෞඛ්‍ය සංවිධානයේ නියාම ක්‍රියාපටිපාටිය තහවුරු කිරීමට එය ප්‍රමාණවත්ද? යන්න වෙනම තර්කයකි.

එහෙත් ලෝක සෞඛ්‍ය සංවිධානයේ අදහස කුමක්වුවද කිසිදු රාජ්‍යයක් රුසියාවේ ප්‍රතිකාරය ඉල්ලුම් කලබවක් හෝ, අඩුම තරමින් රුසියාවවත් සිය එන්නත තම රටේ ජනයාට ලබාදීමට පියවරගත් බවක් හෝ තවමත් වාර්තාවී නොමැත. සිය එන්නත සාර්ථක බව පමණක් රුසියාව දක්වමින් සිටී. 

කොරෝනා වසංගතය සදහා එසේ රුසියානු ප්‍රතිකාර ක්‍රමය සාර්ථක යැයි දැක්වුවද Pfizer සහ BioNTech සමාගම් කොරෝනාවට ප්‍රතිකාරයක් සොයාගත්තේයැයි දැක්වූ සැනින්, ලෝක සෞඛ්‍ය සංවිධානයේ අනුමැතියවත් තවමත් සම්පුර්ණයෙන්ම ලබාදී නොමැති තත්වයක් තුල පවා, Pfizer සහ BioNTech සමාගම්වල ප්‍රතිකාරයට විශාල ඉල්ලුමක් දැනටමත් ගෝලීය මට්ටමින් ගලා එමින් තිබේ. බ්‍රිතාන්‍යය රජය පවා එම සමාගමේ ප්‍රතිකාර සදහා පවුම් මිලියන ගණනක ඇනවුමක් ලබාදී ඇත.

Pfizer සහ BioNTech යන සමාගම් බහුජාතික සමාගම්ය. රුසියාව යනු රාජ්‍යයකි. බ්‍රිතාන්‍ය ඇතුළු බටහිර රටවල පසමිතුරු රාජ්‍යකි. එවැනි රාජ්‍යයකින් කොරෝනා වසංගතය සදහා ප්‍රතිකාර මිලදී ගන්නවා වෙනුවට බහුජාතික සමාගම්වලින් බෙහෙත මිලදී ගැනීමට විවිධ රටවල් පෙලගැසෙන්නේ පසමිතුරු රාජ්‍යයකට වඩා තම තමන්ගේ රටවලටත් බදුගෙවන සමාගම්වලට ලාභාංශ ලැබෙන සමාගමකින් බෙහෙත මිලදී ගැනීම වඩා යහපත් යැයි ඔවුන් සිතන නිසාද?

ඇතැම්විට, කලක් ගතවෙනවිට, කොරෝනා වසංගතය යනු  මිනිස් වර්ගයා මුහුණ දුන් භයානක වසංගතයක් විද්‍යාවේ සහ තාක්‍ෂණයේ දියණුවෙන් ජයගත් අවස්ථාවක් ලෙස දැක්වීමට මෙන්ම, මේ යුගයේ ධනවාදය ක්‍රියාත්මක වෙන්නේ කෙසේද යන්න ගැන පෙන්වාදීමට හැකි හොද උදාහරණයවීමටද ඉඩ තිබේ.

එවිටද අපට කීමට ඇත්තේ අපි හම්බකොලොත් අපි බෙහෙත් ගන්නවා කියාද? 

මාකස් ප්‍රියන්ත පෙරේරා

10/11/20 

සන්තියාගෝ ප්‍රනාන්දු නම් මීගමුවේ සාන්තුවරයා

1904 මීගමුව කුඩාපාඩුවේ දිළිදු ධීවර පැල්පතක ඉපිද, 1991 නොවැම්බර් මස 02 දින, දිළින්දෙක් ලෙසම මියගිය සන්තියාගෝ ප්‍රනාන්දු හෙවත් ව. ස. ප්‍රනාන්දු හෙවත් ‘සන්ති ගුරුන්නාන්සේ’, සියළු ආත්මයන් සමරන (All Souls' Day) අද (02/11) වැනි දිනක කතෝලික ජනයා අමතක නොකළ යුතු තරම් වටිනා පුද්ගලයෙකි.

ඒ ඔහුගේ මරණය සිදුවුයේ අද වැනි දිනක නිසාම නොව, කෙතරම් බාධක පැමිණියද තමා තේරුම්ගත් ක්‍රිස්තු චරිතය තම ජීවන දැක්ම ලෙස සලකමින් මීගමුවේ පිඩිත ජනයාගේ ප්‍රශ්න වෙනුවෙන් මෙන්ම සමස්ථ ශ්‍රී ලංකික පිඩිතයන් වෙනුවෙන් සිය මරණය දක්වාම සටන් කල පුද්ගලයෙක්වීම නිසාය.

එහෙත් 1970 දශකයේ අගභාගය දක්වාම ශ්‍රී ලංකා කතෝලික පල්ලිය ඔහුට එරෙහිව දැඩි පිළිවෙතක් අනුගමනය කළේය. ඒ ඔහු 1935 දී පිහිට වූ ශ්‍රී ලංකා සම සමාජ පක්ෂයට එක්වූ පළමු කතෝලිකයා වී කතෝලිකයන් බහුතරයක් වෙසෙන මීගමුවේ වාමාංශික දේශපාලනයක නිරතවීම නිසාත්, කතෝලික පල්ලිය වාමාංශික දේශපාලනය ආගමික නිදහස තහනම් කරන ව්‍යාපාරයක් ලෙස වැරදි වැටහීමක සිටි නිසාත්ය.

එමෙන්ම ඔහු කතෝලික පල්ලිය දේශීයකරණය වියයුතු බවත්, දේශීය භාෂාවන්ගේන් සියළු කටයුතු සිදුකළයුතු බවත්, නිදහස් අධ්‍යාපනයේ නිසි පල පිඩිත ජනයාට ලැබීමට නම් කතෝලික පාසැල් ජන සතුවිය යුතු බවත් සිතා කටයුතු කළේය.

ඔහුගේ මෙම ප්‍රතිපත්ති කතෝලික පල්ලියේ ප්‍රතිපත්තිවලට වඩා වෙනස්ම නිසාම, 1947 පැවති පළමු ශ්‍රී ලංකා පාර්ලිමේන්තු මැතිවරණයට සම සමාජ පක්ෂයෙන් මීගමුව ආසනයට තරගකල ඔහුව ඡන්ද 926කින් පරාජය කිරීමට හේතුවක්වු බවට තර්කයක් වේ. 

කතෝලික පල්ලියෙන් මෙන්ම ඇතැම් සිංහල-බෞද්ධ බලවේගවල හැරහීමටද මෙතුමා පත්විය, ඒ 1955 දී බණ්ඩාරනායකගේ භාෂා ප්‍රතිපත්තිය තීරණය කරන රැස්වීමකට පිලිප් ගුණවර්ධනගේ පක්ෂයෙන් සහභාගීවූ ඔහු ඒහිදී සිංහල භාෂාව රාජ්‍යය භාෂාව මෙන්ම දෙමළ භාෂාවද අඩුම තරමින් උතුරු-නැගෙනහිර රාජකාරී භාෂාව ලෙසවත් පිළිගත යුතුයැයි තර්කකල නිසාය. මේ සම්බන්දයෙන් 56 බලවේගයේ සිංහල-බෞද්ධවාදී ස්ථාවරය නියෝජනය කල මෙත්තානන්ද ආදීන් ඔහුව විවේචනය කලේ 'කතෝලික පල්ලියේ පිල්ලි විවිධ ස්වරූප දරන බවත්, සන්තියාගෝ ප්‍රනාන්දු ද තවත් කතෝලික පල්ලියේ පිල්ලියක්' බවත් දක්වමිනි.

මියයනතුරුම පිලිප් ගුණවර්ධනගේ මහජන එක්සත් පෙරමුණේ සභාපතිවරයා ලෙස කටයුතු කල මෙතුමාට 1989 දී එම පක්ෂයට ලැබුණ ජාතික මන්ත්‍රි අසුන පුදකළ මුත්, එය බරනොගත් මෙතුමා, තමා ජීවිතය පුරාම දේශපාලනය කලේ මන්ත්‍රිකම් වෙනුවෙන් නොවන බවත්, එය 85 හැවිරිදි තමාට වඩා තරුණයකුට දෙන ලෙසත් ඉල්ලා සිටින ලදී. එයින් ප්‍රයෝජනය ගත් පක්ෂ නායක දිනේෂ් ගුණවර්ධන එය සිය සහෝදරයා වන ගිතාංජන ගුණවර්ධනට ලබාදී මහජන එක්සත් පෙරමුණ තුල සිය පවුලේ බලය තහවුරු කරගන්නා ලදී. 

1986 දී මෙතුමා හමුවට පැමිණි එවකට අගරදගුරුවරයා වූ ගරු නිකලස් මාකස් ප්‍රනාන්දු බිෂෝප්වරයා ඇතුළු කතෝලික පුජකවරු පිරිසක්, ඔහු සම්බන්දයෙන් කතෝලික පල්ලිය අනුගමනය කල ප්‍රතිපත්තිය වැරදි බවත් ඒවෙනුවෙන් සමාවෙන ලෙසත් ඉල්ලා සිටින ලදී. 

ඔහු ද කතෝලික පාසැල් ජනසතුවීම නිසා කිසිම සෙතක් නොවු බව පිළිගන්නා ලදී. ඔහු මියයාමට ප්‍රථම කතෝලික පල්ලිය 'කතෝලික ජන ප්‍රසාද' සම්මානය ඔහුට ලබදෙන ලදී. 

එතුමාගේ ආභාෂය ලද ලංකා සම සමාජ පක්ෂයෙන් මීගමුව ආසනය නියෝජනය කල හිටපු පාර්ලිමේන්තු මන්ත්‍රි හෙක්ටර් ප්‍රනාන්දු මෙන්ම නොයෙකුත් තාඩන පීඩනවලට ලක්වෙමින් ශ්‍රී ලංකාවේ අතුරුදහන් වුවන්ගේ සංවිධානයේ කැදවුම්කරු ලෙස කටයුතු කරන බ්‍රිටෝ ප්‍රනාන්දු ද, එක්සත් කම්කරු සම්මේලනයේ කැදවුම්කරු ලීනස් ජයතිලක, ඇතුළු කතෝලික පුද්ගලයන් රාශියක් තවදුරටත් එතුමාගේම අඩිපාරේ ගිය බව පෙනේ. 

හිටපු මහ අධිකරණ විනිසූරු W. T. A ලෙස්ලි ප්‍රනාන්දු මහතා මෙතුමාගේ පුත්‍රයාය. 

මාකස් ප්‍රියන්ත පෙරේරා 

02/11/2014

ටෙනී Double Meaningද? Single Meaning ද?

මීට වසර 4කට පෙර විජය නන්දසිරි කලාකරුවා මියගිය විට මා ලියු ''විජය නන්දසිරිගේ මරණය ගැන දුක්වෙන අය ටෙනිසන් කුරේ මියගියවිට කුමක් කරයිද?'' යන ලිපිය  අවසාන  කරමින්  මම  මෙසේ සටහන් කලෙමි: 'විජය නන්දසිරි මැරුණවිට අඩපු අය ටෙනිසන් කුරේ මැරුණවිට අඩන්නේ නැහැ නේද ?' (එම ලිපිය මෙතනින් කියවිය හැක)

ඉන් හතර වසරකට පසුව ටෙනිසන්  කුරේ කලාකරුවා  පසුගියදා  මියගියේය. ඉහතින් දැක්වූ ප්‍රශ්නය මම  නැවත  මතුකලවිට  ලැබුන  ප්‍රතිචාර කිහිපයක් පහතින් දැක්වේ.

1. ''ටෙනිසන් කුරේගේ අන්තිමට ආව චිත්‍රපට බලන්න. ඒවාට හිනා යන්න ගුලි කන්න ඕනී.. පහත් කුනුහරප පිරුනු විහිලු.. විජය නන්දසිරි ගේ චිත්‍රපට බලන්න.. ඒ චිත්‍රපට වල තියෙන class එක ටෙනිසන් කුරේ ගෙ නෑ..එකයි වෙනස..''

2. ''ටෙනිසන් කුරේගෙ ගොන් ජෝක් තියෙන්නේ දෙපිට කාට්ටු වචන කුනුහර්ප භාවිතය තුලින් බැන පහත් විනෝදශීලී ක්‍රමයක් අනුගමනය කලේ. මට මතකයි අපි ස්කොලෙ යන කාලේ ඇන්ඩන්ගේ කතා කියල ඉස්කොලේ ලමයි අතර තිබුනා අන්න ඒ වගේ ලාමක විහිලු සමහර විට ලො බජට ෆිල්ම් නිසා මේවගේ චරිත දෙක තුනක් දාල පිල්ම් එකක් කරන්න පුළුවන් වියකැකියි. දැන්කාලෙ යූටියුබ් චැනල් තියෙන්නේ ජෝක් කරන ඒවගේ අනූව දසකයේ දී මේ වගේ බාලවර්ගයේ ෆිල්ම් ගොඩක් ආව ඒකෙන් උනේ සිංහල සිනමාව නැත්තටම නැතුවන තරමට කඩාගෙන වැටෙන මට්ටමට ආව. දැන් ෆිල්ම් හැදෙන්නෙත් අකලට ප්‍රේක්ෂකයත් නෑ ඉන්න ඈයො ෆිල්ම් බලන්න යන අයම නෙවෙයි වෙන වෙන අරමුණු වලට ෆිල්ම් හෝල්වලට යන්නේ...''

3. ''මේ වෙලාවේ විජය නන්දසිරි සහ ටෙනිසන් කුරේ යන කලාකරුවන් දෙදෙනාව සංසංදනය කරන එක සුදුසු නෑ නේද?විජය නන්දසිරි යනු ජෝ අබේවික්‍රම මහතා තරමටම ඉහළට යා හැකිව තිබුණු , සිනමාකරුවන් විසින් හරිහමන් වැඩක් නොකරගත්තු විශිෂ්ට ගණයේ චරිතාංග නලුවෙක්. ඔහුව සම කරන්න බෑ ටෙනිසන් කුරේ මහතාට. ටෙනිසන් කුරේ කියන්නෙ ඉතා හොඳ විකට නලුවෙක්. එතුමා මෙහෙයවපු අයගේ වරදින් මිසක් එතුමාගේ වරදකින් නෙවෙයි පහත් රසිකත්වය කියන තලයට වැටුණේ. සමහරවිට එතුමාට බැරෑරුම් චරිත ලැබුණා නම් ඔය තත්ත්වය වෙනස් වෙන්න තිබ්බා. ඔය කවුරුත් අවසානයේ මුදල් මත යැපෙන අය. ඔවුන්ගේ ප්‍රධාන ආදායම රඟපෑම වුණාම ජීවිතේ සමහර කාලවකවානුවල ඕනෑම එකක රඟපාන්න හිත හදාගන්නවා. ටෙනිසන් කුරේ මහතා දෙපිට කැපෙන වචන කිව්ව පළියට එතුමාව කුණුහරුප කාරයෙක් කරන එක වැරදියි. එතුමාගේ ඇතැම් වේදිකා නිර්මාණවල සූක්ෂම විදියට දේශපාලනය විවේචනය කරනවා. ඒ වේදිකා නාට්‍ය බහුතරයක් නැරඹුවේ මේ රටේ උගත් බුද්ධිමත් දොස්තරවරු, ඉංජිනේරුවෝ සහ නීතඥවරු . ඔය කියන තරං අවර ගණයේ නං ඒ කියන බුද්ධිමත්තු මානසික රෝගියෝ වෙන්න ඕන ඒවා බලන්න. ඊටත් , මනුස්සයෙක් මැරුණම එහෙම කියන එක වැරදියි. මොකද අපි අපේ ජීවිත වලදි කොයි තරං විහිලු සහගත ගොං වැඩ කරල ඇද්ද.''

4. ''I'm not insulting a man who is dead. But as an observer, you seriously cannot compare Wijaya Nandasiri and Tenison. Wijaya Nandasiri never did cheap jokes like Tenny. And the acting by Wijaya Nandasiri as Maname is superb. Bandu and Tenny dng jokes by all disgusting acts and filth. ඇඟේ මඩ /Cake ulagena, මඩ කාලා, කුණුහරුප කියාගෙන කරන විකාර comedy නෙමෙයි. But I respect Tenison as an artist and wish him RIP.''

5. ''ටෙනී අහිංසක මනුස්සයෙක් ....ටෙනීගෙ කුනුහරුප ගැන කියන අය ඉතිං සැබෑ ලෝකෙත් කුනුහරුප නොකියපු, තව එකෙකුට හිනායන්න වත් දෙපැත්ත කැපෙන වචන නොකියපු සත්ගුනවත් මහත්තුරු නෝනලා නිසා ටෙනියට බැන්නට කමක් නෑ...ජෝතිපාල ට පීචං ගායකයා කිව්වා වගේ තමයි ඉතිං මේ රට බයිලා...හම්මේ සම්භාව්‍ය පොරවල් ඉන්න රට...''.

ඉහත කී අදහස් වලට අනුව විජය නන්දසිරි  සහ ටෙනිසන් කුරේ සමාන කල නොහැකි අතර විජය නන්දසිරිගේ රංග ප්‍රතිභාව හා සැසදීමේදී  ටෙනිසන් කුරේ සිටින්නේ ගව්ගානක් ඈතිනි. එහෙත් ඒ සම්බන්ද මිනුම්දඬු කවරක්ද යන්න ගැන පොදු නිර්නායකයක් සොයාගැනීම අපහසුය.  

විජය නන්දසිරිද ටෙනිසන් කුරේ මෙන්ම විකට නළුවෙක් වෙන නමුදු ටෙනීසන් කුරේගේ විහිළු 'ගොන් ජෝර්ක්' වන අතර විජය නන්දසිරිලාගේ ජෝර්ක් 'ප්‍රබුද්ධ ජෝර්ක්ය'. එයට හේතුව ලෙස පෙනෙන්නේ විජය නන්දසිරි ටෙනිසන් කුරේ තරම් කුණුහර්ප හෝ දෙපැත්ත කැපෙන වචන  කියන්නෙක් නොවේයැයි අදහසක් පවතී. එහෙත් ඇත්ත තත්වය නම් සිංහල සිනමාවේ මුල්ම විකට නළුවා වූ හියුගෝ ප්‍රනාන්දු හැර එඩී ජයමානගේ සිට සියල්ලෝම කුණුහර්ප හෝ දෙපැත්ත කැපෙන වචන කියන්නන් වීමය. අපි එක් උදාහරණයක් ගතහොත් ටෙනිසන් කුරේගේ මුල් කාලීන ප්‍රසිද්ධ විහිළුවක් වන ''බළලා මීයන් අල්ලයි......බල බල හිටියෝත් අල්ලයිද?..."  ආදී කථා අවශ්‍ය නම් කිසිවෙකුට Double Meaning කථා ලෙස ලෙසද, නැතහොත් එසේ නොවන හුදු හාස්‍යජනක යෙදුම් ලෙසද හදුනාගත හැක. එහෙත් මගේ නිරීක්ෂණය වන්නේ විජය නන්දසිරි ඉහත කී බළලා මීයන් අල්ලයි කථාවම කියනවාට වඩා හාස්‍යජනක ලෙස ටෙනිසන් කුරේට එය ඉදිරිපත්කල හැකිවුවද විජය නන්දසිරිට හිමිවන 'ප්‍රබුද්ධ' 'රෙද්ද' ටෙනිසන් කුරේට කිසිලෙසක හිමි නොවනු ඇති බවය.   

ඉහතින් දැක්වූ විවිධ ඇයගේ අදහස් අතරවූ තවත් අදහසක් සමබන්දයෙන් අදහස් දක්වන්නේ නම් ටෙනිසන්  කුරේලා  බිහිවුයේ මෙරට සිනමාව කර්මාන්තයක් ලෙස කඩා වැටෙමින් තිබුන අවධියක වන අතර අත්තවශයෙන්ම ඔවුන්ගේ දායකත්වය තුල සිනමා කර්මාන්ත තවත් ටික කලක් හෝ දුවගැනීමට හැකිවිය.  ඒ අනුව ඔවුන් නිසා සිනමා කර්මාන්තය කඩා වැටුනා නොව කඩා වැටෙමින් තිබු සිනමා කර්මාන්තය ඔවුන්ගේ  රංගදායකත්වය තුල යම්කලක් අල්ලාගෙන සිටීමටත්, කඩා වැටෙමින් තිබු එම සිනමාවට පවා ජනතා ආකර්ෂණයක් දිනාදීමටත් ඔවුන්ට හැකිවිය. සිනමා කර්මාන්තයේම පැවති නොහැකියාව නිසාම රංගන ක්ෂේත්‍රයට පිවිසි ටෙනිසන් කුරේට පමණක් නොව විජය නන්දසිරිට පවා සිය රංගන  හැකියාවන් දියුණුකර ගැනීමට නිසි  සහයක් ලැබී නොතිබුණු අතරම රංග ශිල්පීන් පුහුණු කරන ආයතනයන් හෝ ක්‍රමවේදයන් ලංකාව තුල මුල්බැසගෙන නොතිබීමද ඔවුන් වැනි සිනමාවට පිවිසෙන්නන්ට නිසි මගපෙන්වීමක් නොලැබීමට හේතුවිය. 

කෙසේවුවද ටෙනිසන් කුරේ සහ විජය නන්දසිරි සම්බන්දයෙන් දක්වා තිබු අදහස්වල  සත්‍ය  අසත්‍යතාවය හෝ නිරවද්‍යතාවය පිලිබදව සලකා බලමින් හෝ කිසිසේත්ම කිසිවක් බැහැරකල නොහැක්කේ පැහැදලිවම  එකී අදහස් දැක්වීම තුල පුද්ගල රුචිකත්වයන් සහ  රසවින්දනයන්ගේ ඇති වෙනස්කම්ද ගැබ්ව ඇති නිසාත් එකී අදහස් දැක්වීම පිළිබදව පොදු නිර්නායකයන් හෝ නැති නිසාත්ය. පොදුවේ ගතකල පීචන්  සහ ප්‍රබුද්ධ බෙදීම  හාස්‍යය උත්පාදනයට / ප්‍රභාසනය අදාල වන්නේ කෙසේද?   ගොන් කථා හෝ වේවා, කුනුහර්ප හෝ වේවා, දෙපිට කැපෙන කථා හෝ වේවා,  විජය නන්දසිරිගේ මෙන්ම ටෙනිසන් කුරේගේ  ජෝක්වලටද ලාංකිකයන් හිනාවුයේ නැතිද? එසේ බඩ අල්ලන් හිනාවෙන ගමන් මේක පීචන්, අරක ප්‍රබුද්ධ කියන්නේ, හෝ මේවා 'ගොන් ජෝර්ක්' අරවා 'මරු ජෝක්'  කියන්නේ කෙසේද?  මොකකින් හෝ ප්‍රේක්ෂකයා සිනා සාගරයක ගිල්විය හැකි නම් එතනදීම ඔවුන් දක්ෂ හාස්‍ය උත්පදකයින් වන්නේ නැතිද? 

එසේ නොවන්නේ නම්, එනම් විහිළුවක් විහිළුවක් ලෙස සලකා සීනාසීමට නොහැකි නම්, එතන ඇත්තේ යමෙකුට හිනාවිය නොහැකිකම පිළිබද ප්‍රශ්නයකි. විකසිත සිතකට මිස විවිධ සීමාවල හිර කලගත් සිත්වලට සැබෑවටම සිනා සිය නොහැක...අද ශ්‍රී ලාංකිකයන් සෑම අතින්ම සීමාවූ ජනතාවක් බවට පත්වී ඇත. ඔවුන්ට විජය නන්දසිරිව මෙන්ම ටෙනිසන් කුරේ යන දෙදෙනාවම එකම ලෙස රසවිදිය නොහැක..රසවිදිය හැක්කේ දෙකෙන් එකක් පමනි..ඔවුන් ඒතරමටම සීමා සහිත මනසක් නඩත්තු කරමින් සිටී. ඇත්තවශයෙන්ම, විජය නන්දසිරි මෙන්ම ටෙනිසන් කුරේ ඇසුරින් සලකුණු කල හැක්කේ ශ්‍රී ලාංකිකයන්ගේ මෙකී බෙදීම හාස්‍ය උත්පාදනය නම් සුන්දර ක්ෂේත්‍රයක පවා තීව්‍රව විහිදී ඇති ආකාරයයි. 

විජය නනදසිරිගේ ජෝර්ක් රස විදින්නන් විජය නන්දසිරි යනු  විද්‍යුත් මාධ්‍යවල විවිධ වැඩසටහන්වලට පවා සුඛනම්‍යලෙස, ලාලිත්‍යයක් ඇතිව, දේශිය උරුවකින් යුතුව සිංහල භාෂාව හසුරවමින් ජනහිත් ජයගත් විකට නළුවෙක් පමණක් නොව මහාචාර්ය එදිරිවීර සරත්චන්ද්‍රයන්ගේ මනමේ හී සිට වෙනත් බොහෝ ප්‍රබුද්ධ චරිත රගදැක්වූ කුසලතා පිරි නළුවෙක් යැයි පාරම් බාන අතර ටෙනී ලා එවැන්නො නොවේ. ඔවුන්ට අනුව ටෙනිසන් කුරේලා ඔහේ හාල් කෑලිය. එහෙත් ටෙනිසන් කුරේ පවා ඉංග්‍රීසි සාහිත්‍ය ඉගැන්වූ ගුරුවරයෙකුගේ පුතෙක් බවත් කිසියම් සංස්කෘතික සන්දර්භයක් තුල ගොඩ නැගුන චරිතයක් බවත් ඔවුන් නොසලා හරිති. ඊටත් වඩා ටෙනිසන් කුරේ යනු ඉතාමත් ඉහල මනුෂ්‍ය වටිනාකම්වලින් යුතු පුද්ගලයෙක් බව ඔහුගේ මරණයදා ඔහුත් සමග ඔහුගේ ගමේ එකට හැදී වැඩී පසුව කතෝලික පියතුමෙක්වූ ගරු ටෙරන්ස් බෝදියාබදුගේ පියතුමා දැක්වූ පහත සටහන සාක්ෂිදරයි: 

//''අපායේ තත්පර එක්දහස් අටසීය" වෙසක් සමයේ, එක්දාස් නවසිය හැත්තෑ ගණන්වල, අපේ ගමේ පෙන්වපු වෙසක් නාට්‍යය යි. ලී කොටන් බාපු වත්ත සුද්ධ කොට, පොල් කොටන් උඩ තනපු ලෑලි වේදිකාවේ, දවස් තුනක් පුරා නොමිලේ පෙන්වපු එම නාට්‍යය, වේදිකාව ඉස්සරහම ඉඳන් නරඹපු කොලු ගැටව් අතර මාද එකෙකු විය. එම නාට්‍යය ටෙනිසන් කුරේ ගේ නිර්මාණයක් විය.

ඉන්පසු ටෙනිසන් කුරේ ගේ රංගනයන් වේදිකාව, ටෙලිනාට්‍ය, හා චිත්‍රපටය ආක්‍රමණය කරන අයුරු අපි සතුටින් බලා සිටියෙමු. මොරටුව, විල්ලෝරාවත්ත ගමට ආඩම්බරය රැගෙන ආ එක් පුරුකක් බවට ඔහු පත් විය.

ඔහු සැමට සිනහව රැගෙන ආ නළුවෙකු විය. නමුත් බොහෝ විට එම දෙබස් වල ගැබ්ව තිබුණේ දෙපැත්ත කැපෙන කතා ය. කුණුහරුප ය. ඒවා අහපු,නරඹපු ඇත්තෝ බඩ අල්ලාගෙන සිනාසුනහ.

ඔහුගේ දෙබස් තුළ කුණුහරුප තිබුණද, ඔහුගේ ජීවිතය 'කුණුහරුපයක්' නොවී ය. බොහෝ නළුවන්, නිළියන් තුල නොතිබුණු දෑ ඔහුගේ ජීවිතයේ විය. ඔහු යහපත් බිරිදක් හා යහපත් දරුවන් සමග යහපත් පවුල් දිවියක් ගත කළ යහපත් ස්වාමි පුරුෂයෙක් හා පියෙක් විය. පවුලක් ලෙස ගමේ පල්ලියේ මෙහෙයට සහභාගි වූ යහපත් කිතුනුවකු විය. ගමේ මඟුලට, අවමඟුලට නිතර දායක වූ පින්වතෙක් විය. ඔහුගේ කාර් රථයෙන් දේවස්ථානයට 

මනාලියන් ලෙස පැමිණි අය අප ගමේ බොහෝ ය. වෙලට වතුර දමා ගෙවල් කඩා වැටුණු විට, ඉස්කෝලේ යන්නට දරුවන්ට පොත් ගන්නට මුදල් නැති වු විට, පාසල් මාසික ගාස්තු ගෙවා ගන්නට බැරි වූ විට, හාල් තුනපහ ටික ගෙදරට ගන්නට බැරි වූ විට, දොස්තර ලියා දුන් බෙහෙත් ටික ගන්නට බැරි වූ විට, ඔහුගේ දෑත් කාටත් හොරා ඒ අසරණයින් වෙත යොමු වූ බව සත්‍යයකි. 

ඔහු සැබැවින්ම මෙතෝදිස්ත ධර්මය ජීවත් කළ කිතුනුවකු විය. එනමුදු ගමේ පන්සල, කතෝලික පල්ලිය, කිසි දින අමතක නොකළ පින්වතෙක් විය.

ටෙනිසන් කුරේ අද අපෙන් සමුගෙන ඇත. "ටෙනිසන් කුරේ" කියූ පමණින් අප දැන සිටියේ කුණුහරුප කියා හෝ වෙනත් වචන යොදාගෙන අනුන් සිනා ගැස්සූ පුද්ගලයෙකු ලෙස ය. එනමුදු ඔහුගේ හැබෑ රුව දැනගෙන සිටියේ කිහිප දෙනෙක් පමණි. මිනිසුන් ඇස් දෙකෙන් දකින දෙයට වඩා මිනිසුන්ගේ ජීවිත වල බොහෝ යහපත් දේ රැඳී ඇති බව අපට කියා දී ඔහු අද අපෙන් සමුගෙන ඇත. ප්‍රශ්න අමතක කොට සිනාසෙන්නට කියා දී ඔහු අද අපෙන් සමුගෙන ඇත. ප්‍රශ්නවලදී පවා සිනාසෙන්නට අපට උගන්වා සමුගෙන ඇත. අඩන මිනිස්සුන්ට සිනහව ලං කර දිය හැකි අයුරු කියා දී අපෙන් සමුගෙන ඇත. ජීවිතය යනු විඳවන්නට ඇති දෙයක් නොව, විඳින්නට ඇති දෙයක් බව කියා දී අපෙන් සමුගෙන ඇත. අපටත් කඳුළු අතරින් සිනාසෙන්නට මිනිසුන්ට කියා දෙන්නට හැකිනම් ජීවිතය කොයිතරම් සුන්දර වන්නේ ද?(ගරු ටෙරන්ස් බෝදියාබදුගේ පියතුමා. 30/09/2020) //

අවසාන වශයෙන් විජය නන්ද සිරි සහ ටෙනිසන් කුරේ යන චරිත දෙකක් අසුරුන් මම සාකච්ඡා කිරීමට අදහස් කලේ කුමක්ද යන්න පිලිබදව සදහන් කරමින් මෙම සටහන අවසාන කරමි. විජය නන්දසිරිගේ මෙන්ම ටෙනිසන් කුරේද හාස්‍ය, හාස්‍යය ලෙස රසවිදීමට ශ්‍රී ලාංකිකයන්ට නොහැකිවන්නේ නම් එසේ වෙන්නේ ඔවුන් දෙපළගේම හාස්‍යවල ඇති ප්‍රබුද්ධ හෝ පීචන් කමක් නිසා නොව අපේ ඇති රුචි අරුචිකම් තුලය. එය අපි මෙතෙක් කලක් අත්විදි සංස්කෘතික ගොඩනැංවීවල ප්‍රතිපලයක් ලෙසය. එකී සංස්කෘතික ගොඩනැංවීම් අපිව කිසියම් සීමාවල හිරකර ඇතිවා පමණක් නොව අපේ සිනහව පවා පාලනය කරමින් සිටී.

ඉතින් අපි  සිනහ නොමසෙන් දසුන් දක්වා වෙනුවට කොක් හඩලා සිනාසීමට පුරුදුවෙමු !!!

මාකස් ප්‍රියන්ත පෙරේරා

25/10/2020

හින්දු කෝවිලක්වූ මීගමුවේ වලව්වක් ගැන මේ දවස්වල කථා වෙනවා දැක්කද?

 

මේ තමයි ඔය කියන ඊනියා වලව්ව. මීගමුවේ ඔය වලව් කියන ඒවා තිබ්බේ නෑ. ඔය වලව් කියලා කියන ලොකු ගෙවල් දොරවල් වතුපිටි ආදිය තියෙන්න පවුල් කිහිපයක් මීගමුව අවට බිහිවන්නේ ලංකාවේ බ්‍රිතාන්‍යය යටත් විජිත යුගයේදී. ඒ යටත් විජිත පාලකයින්ට විවිධ සේවා සපයනමින්, රා/අරක්කු විකිනීමේ (රා රේන්ද) බලපත් හිමිකරගෙන යහමින් මුදල් උපයමින්, පොල් වතු, කුරුදු වතු ආදිය මිලදී ගනිමින් ධනවත්වූ පිරිස් බ්‍රිතාන්‍යයන් බිහිකළ ක්‍රිස්තියානි ඉංග්‍රීසි පාසැල්වලින් සිය දරුවන්ට අධ්‍යාපනය ලබාදී ඔවුන් රාජ්‍ය සේවයට පිවිසීමෙන් අනතුරුව සිය මුල්ගම්බිම්වලින් එපිට මීගමුව ආදී ප්‍රදේශවල දේපල මිලදී ගනිමින් විශාල ගෙවල් දොරවල් හදමින් මීගමුව අවට පදිංචිවීමෙන් අනතුරුව තමයි දැන් ඔය කියන වලව් කියන කිහිපයක් මීගමුවේ බිහිවෙන්නේ. 

මේ ජයාරූපයේ දැක්වෙන මීගමුවේ (ඊනියා) මිරැන්ඩෝ වලව්වත්, අබේසිංහ-රාජපක්ෂ වලව් කියන ඒවත්, ඩේවිඩ්-විජයපාල මෙන්ඩිස් ආදිනුත් බිහිවෙන්නේ එහෙමයි. ඔවුන් සියල්ලෝම දකුණේ ගාල්ල, බලපිටිය ආදී ප්‍රදේශවලින් පැමිණි පිරිස්. ඔවුන් තමයි මීගමුවේ පන්සල් හදන්නේ. මීගමුවේ පොල්වතු කුරුදුවතු මිලදී ගෙන පසුව විශාල ගෙවල් දොරවල් හදන් ඊනියා වලව්කාරයෝ කියලා පෙනී සිටියේ ඔවුන්. මීගමුවේ මුල් බැසගෙන තිබු කරාව-දුරාව කුල අතරට සලාගම කුලයත් පෙරටුකරගෙන මීගමුවේ කුල ධුරාවලිය තුල තරගකාරී තවකෙක් ලෙස තමයි ඔවුන් ඉස්මතුවෙන්නේ. දකුණෙන් පැමිණි ඔවුන් අමරපුර නිකායේ අඹගහපිටිය පාර්ශවයේ ප්‍රධාන බෞද්ධ දායකයින්. ඔවුන් බෞද්ධ වගේම යන්ත්‍ර මන්ත්‍රණ ගුරුකම් කට්ටඩි ආදී හින්දු ආගමික විශ්වාසයනුත් කරපින්නාගත් පිරිසක්. 

ඔය කියන මීගමුවේ (ඊනියා) මිරැන්ඩෝ වලව්ව හිමිවෙලා තිබුන මුහන්දිරම් මගිනා මර්සිලිස් හෙන්රි මිරැන්ඩෝගේ සීයා මාකස් මිරැන්ඩෝ. ගාල්ල, මාගාල්ලේ ඇපොතිකරියක් කරපු මනුෂයෙක්. එයාගේ පුතා තමයි ඇන්ඩෲ පෝල් මිරැන්ඩෝ. මීගමුව කටාන ප්‍රදේශවල කලින් ලන්දේසීන් වගාකළ පොල් සහා කුරුදු ඉඩම් බ්‍රිතාන්‍ය ආණ්ඩුව විකුණද්දී 1840 ගණන්වල තමයි ඔවුන් ඉඩම් අරන් මීගමුවට පදිංචියට එන්නේ. එයා විතරක් නෙමේ අර කලින් කියපු දකුණින් ආපු කට්ටිය බොහොමයක් මීගමුවේ පදිංචියට එන්නේ එහෙමයි. සමහරු නම් දකුණෙන් ඇවිත් තියෙන්නේ කුරුදු වතුවල වැඩකරන්න. කුරුදු පොතු ගලවන්න. ඇන්ඩෲ පෝල් මිරැන්ඩෝ (පසුව මුදලිදු) බදින්නේ වලිසිංහ ජුවානිස් ද සිල්වාගේ දියණියක් වන ඇනා ද සිල්වා. ඒගොල්ලොත් දකුණෙන් ආපු අය. ඇනා ද සිල්වා බ්‍රහ්මචාරී වලිසිංහ හරිශ්චන්ද්‍රතුමාගේ නෑ වෙන කෙනෙක්. 

1870 උපන් ඔවුන්ගේ පුතෙක් තමයි මුහන්දිරම් මගිනා මර්සිලිස් හෙන්රි මිරැන්ඩෝ කියනේ. මුලින්ම නිවුස්ටඩ් විදුහලටත් (ඒ කාලේ කිව්වේ වෙස්ලියානු මිෂනාරි පාසැල කියලයි) පසුව කොලබ රාජකීය විදුහලටත් ගිහින් මීගමුව දිස්ත්‍රික් උසාවියේ ලිපිකරුවෙකු ලෙස පත්වීම ලබා පසුව එම උසාවියේම භාෂා පරිවර්තකයෙකුත් වෙනවා විතරක් නෙමේ මීගමුව නගරය කේන්ද්‍ර කරගත් උතුරු අලුත්කුරු කෝරළයේ මුහන්දිරම් පදවියටත් පත්වෙනවා. ඔහුට පිය පාර්ශවයෙන් ගාල්ල, මාගාල්ල ප්‍රදේශයෙන් පොල්වතු රාශියකුත්, ඔවුන් මිලදී ගත්ත මීගමුවේ පොල් ඉඩමුත් එක්ක ධනය, බලය, උගත්කම සහ නිලතලත් හිමි තැනැත්තෙක් බවට පත්වෙනවා. ඔහු විවාහ වෙන්නේ කුරුණෑගල දිස්ත්‍රික්කයේ ඉඩම් හිමි වැවිලිකරුවෙකු හා මිනිරන් වෙලෙන්දෙකු වූ මුහන්දිරම් සීමන් ද සිල්වාගේ වැඩිමහල් දියණිය වූ නැන්සි මාරියා එක්කයි. ඒ විවාහයත් සමග මුහන්දිරම් හෙන්රි මිරැන්ඩෝ 1902 වෙද්දී ලංකාවේ නැගී එන නව ප්‍රභූවරයෙක් ලෙස ඉස්මතුවෙනවා. ඔහු ගැන Arnold Wright සම්පාදනය කරපු Twentieth Century Impressions of Ceylon: Its History, People, Commerce පොතේ 696 පිටුවෙත් සදහන් වෙනවා.

එහෙත් 1930 වෙද්දී කුමන හෝ හේතුවක් මත ව්‍යාපාර ආසාර්ථකවීම සහ සෞඛ්‍ය තත්වය පිරිහීම නිසා ඔවුන් ක්‍රමයෙන් පරිහානියට පත්වෙන්න පටන්ගෙන තියෙනවා. සමහර තොරතුරුවලට අනුව පෙනී යන දෙයක් තමයි මුහන්දිරම් හෙන්රි මිරැන්ඩෝ කෙතරම් වියදම් කලත් ලංකාවේ නැගී එන නව දේශපාලන ප්‍රභූ පරම්පරාවට ඇතුල්වීමට නොහැකිවීම ඔවුන්ගේ බිදවැටීමට එක් හේතුවක් වියහැකි බව. 

ඉතින් කෙතරම් ප්‍රකට බෞද්ධ දානපතියෙක්වුනත් ඕවට උත්තර හොයන්න මුහන්දිරම් හෙන්රි මිරැන්ඩෝ යන්න පුරුදුවෙලා තියෙන්නේ හදහන්, වෙලාවල් පිටි පස්සෙයි, යාන්ත්‍රණ මන්ත්‍රණ ගුරුකම් පිටුපස්සෙයි, හින්දු කට්ටඩියෝ පස්සෙයි. අන්තිමට මලයාලම් කට්ඩියෙක් කිව්වලු ගෙදර ලිදේ හින්දු දේව ප්‍රතිමාවක් තියෙනවා එක අරන් ගෙදර දේවාලයක් කෙරුවේ නැතිනම් ඔය මිරෑන්ඩෝ පරම්පරාව නැත්තටම නැතිවෙලා යනවා කියලා. ඉතින් මීගමුවේ ඔය කියන මීගමුව - දිවුලපිටිය ප්‍රධාන මාර්ගය අසල මහහුණුපිටිය ප්‍රදේශයේ පිහිටා ඇති (ඊනියා) මිරැන්ඩෝ වලව්ව 1950දී දේවාලයක් වුනේ එහෙමයි කියලා තමයි ගමේ මිනිස්සු කියන්නේ... දැන් එය හදුන්වන්නේ මීගමුවේ නාටු දේවාලය කියලයි.

තව විස්තර මම පසුව සදහන් කරන්නම්.. දැනට මට නම් කියන්න තියෙන්නේ බ්‍රිතාන්‍ය යටත්විජිත යුගයේ නැගී ආව ලංකාවේ නව සිංහල ප්‍රභූ පරම්පරාවල එක ඛේදවාචකයක් තමයි මේ හින්දු කෝවිලෙන් පෙන්නවා කියන එකයි. 

මාකස් ප්‍රියන්ත පෙරේරා 

23/10/2020