මීගමුව මහ නගර සභාව අන්ජබජල් ද?

නිමල් ලන්සාගේ තක්සේරුවට අනුව නම් හෙට මීගමුව මහ නගර සභාවේ බලය පිහිටවනුයේ ඔහුගේ සහෝදරයාවන පොහොට්ටුවෙන් තරගකල දයාන් ලන්සාය. පළාත් පාලන මැතිවරණයේදී මීගමුව මහනගර සභාව ජයගත් එක්සත් ජාතික පක්ෂයේ මීගමුව සංවිධායක රොයිස් විජිත ප්‍රනාන්දුට අනුව හෙට මීගමුව මහ නගර සභාවේ බලය පිහිටවනුවේ ඔහුය. එහෙත් ඇත්ත තත්වය නම් මීගමුවේ මහනගරසභාවේ බලය පිහිටුවන්නේ කවුද, නැද්ද යන්න තීරණය කරනුයේ රොයිස් විජිත ප්‍රනාන්දුවත්, නිමල් ලන්සාවත් නොව වෙනත් දේශපාලන බලවේගයන් විසින් බව දැන් පැහැදිලිය. 

තත්වය මෙසේ වී ඇත්තේ මීගමුව මහනගර සභාවේ කොට්ටාශ 29 යෙන් 19 ක්ම එක්සත් ජාතික පක්ෂය ජයගත්තද නව මැතිවරණ ක්‍රමය අනුව ආසන බෙදී ගිය ආකාරය සහ අවසාන ප්‍රතිපලය පහත සදහන් ආකාරයක් ගත් නිසාය. 

එ. ජා. පක්ෂය ඡන්ද  32,045   40.34% ආසන 19 

පොහොට්ටුව ඡන්ද    26,129   32.9%   ආසන  16 

ශ්‍රී. නි. පක්ෂය       9,661          12.16%    ආසන 6 

JVP   4,971      6.26%       ආසන 3 

ACMC (මොනරා)  2,224   2.8% ආසන 1 

කෙහෙල් ඇවරිය  2,053   2.58% ආසන 1 

ස්වාධීන (මාළුවා) 884 1.11% ආසන 1 

ස්වාධීන (සරුංගලේ)  795 1% ආසන 1 

මුළු සාමාජිකයන් 48 

වලංගු ඡන්ද 79,428 

ප්‍රතික්ෂේප වූ ඡන්ද 1,465 

මුළු ප්‍රකාශිත ඡන්ද 80,893 

ලියාපදිංචි ඡන්ද 110,383

ප්‍රතිපල නිකුත්වීමෙන් අනතුරුව නිමල් ලන්සා ප්‍රකාශ කල පරිදි ඔහු මීගමුව නගර සභාවේ බලය පිහිටවන බව දැක්වීය. මන්දයත්, ඔහු අනුග්‍රහය දැක්වූ, ඔහු වියදම් කර ඉදිරිපත්කර තිබු  ස්වාධීන කණ්ඩායම් දෙක වන මාළුවා සහ සරුංගලේ සහයෝගය පමණක් නොව කෙහෙල් ඇවරියේ මන්ත්‍රීවරයාගේ සහයෝගයද ඔහුට ඇති නිසාය. ඒ අනුව පරාජයවූ මීගමුවේ ලන්සා පාලනය යටිකූට්ටු ලෙස මන්ත්‍රී ධුර 19ක සහයෝගයක් ගොනුකරගෙන  ඇත. එය මීගමුවේ මැතිවරණ කොට්ටාශ වලින් 3න් 2ක් ජයග්‍රහණය කල එක්සත් ජාතික පක්ෂයේ ආසන19 හා සමවීමේ තත්වයකි. 

ඒ අනුව මීගමුව මහ නගර සභාවේ බලය පිහිටවීමට ඊලග විකල්පයවන ශ්‍රී ලංකා නිදහස් පක්ෂයේ මන්ත්‍රීවරුන් වෙත යොමුවිය. වර්තමාන මීගමුවේ ශ්‍රී ලංකා නිදහස් පක්ෂයේ සංවිධායකයාවන  ලලිත් ටෙන්සින් මහතාගේ නායකත්වය යටතේ ඔවුන් ආසන 06ක් දිනාගන්නා ලදී. ඒ ඔවුන්ගේ හිටපු මන්ත්‍රීවරුන්16 දෙනාගෙන් 3ක් හැර සෙසු සියල්ලෝම පොහොට්ටුවෙන් තරගකරන වාතාවරණයක් තුලය.  කෙසේවුවද, ශ්‍රී ලංකා නිදහස් පක්ෂයේන් තරගකර ජයගත් මන්ත්‍රීවරුන් අතරින් බහුතරයක් සිටිනුයේ නිමල් ලන්සාට පක්ෂපාතවය. ඒ අතරින් සකාවුල්ලා, පරීස් පමණක් නොව දෙමළ මන්ත්‍රීවරියක්ද වේ. 

මේ තත්වය තුල මීගමුවේ එක්සත් ජාතික පක්ෂයේ සංවිධායක රොයිස් විජිත ප්‍රනාන්දු මහතා හිටපු ජනාධිපති චන්ද්‍රිකා බණ්ඩාරනායක කුමාරතුංග මහත්මියව මුණගැසී ඇය ලවාද, ඇගේ  හිතවතෙක් යැයි සැලකෙන මීගමුවේ ශ්‍රී ලංකා නිදහස් පක්ෂයේ සංවිධායකයාවන  ලලිත් ටෙන්සින් මහතාගේ සහයෝගය ස්ථීර කරගැනීමට කටයුතු කළේය. ඉන් නොනැවතිනු රොයිස් විජිත ප්‍රනාන්දු මහතා ඊයේ (21/03/18) ජනාධිපතිවරයාගේ ප්‍රධානත්වයෙන් ජාතික ආර්ථික සභාව පැවති අතරතුර ක්‍රිස්තියානි කටයුතු සහ සංචාරක කටයුතු ඇමති ජෝන් අමරතුංග සමග පැමිණ මීගමුව මහ නගර සභාවේද ශ්‍රී ලංකා නිදහස් පක්ෂයේ සහයෝගය ඇතිව කුඩා ජාතික ආණ්ඩුවක් පිහිටවීමට ස්ථීර සහයෝගය ලබාදෙන ලෙස ඉල්ලා සිටියේය. පසුගිය ජනාධිපතිවරණයේදී සිරිසේන මහතාව ජයග්‍රහණය කිරීමට මීගමුවෙන් වැඩි ඡන්ද 30, 000 වඩා ලබාදීම නිසා රොයිස්ට උදව්වක් කලයුතු බව ජනාධිපතිවරයාගේ අදහසවිය.  "ඇරත් මේගොල්ලෝ දිනලා තියෙද්දී, එහෙම කරන්න පුලුවන්ද?" , "දුමින්ද මේ ගැන බලන්න" යනුවෙන් ශ්‍රී. නි. පක්ෂයේ ලේකම්වරයා වන දුමින්ද දිසානායක මහතාට අදාල කටයුත්ත පවරන ලදී.  "සර් මේගොල්ලෝ සල්ලි දීලා ගන්න යන්නේ" යැයි රොයිස් විජිත ප්‍රනාන්දු මහතා දැක්වුවිට, ශ්‍රී. නි. පක්ෂයේ ලේකම්වරයා දුමින්ද දිසානායක මහතාගේ අදහසවුයේ පැහැදිලිවම පක්ෂයේ ලේකම්වරයාගේ අණට පිටින් ක්‍රියාකරන සියලු මන්ත්‍රීවරුන් නෙරපා හැරීමට නව මැතිවරණ පනත අනුව තමන්ට හැකිබවය. 

මේ කාරණය නිමල් ලන්සා මිගමුව මහ නගර සභාවට  ශ්‍රී. නි. පක්ෂයේන් තේරී පත්වූ මන්ත්‍රීවරුන්ගේ සහයෝගය ඉල්ලාසිටි විට ඔවුන්ද ඔහුට දක්වා තිබේ. එහෙත් නිමල් ලන්සා කියා ඇත්තේ ඒ සියල්ල තමා බලාගන්නා බවත් ඒ ගැන 100ට 100ක වගකීම ඔහු ගන්නා බවත්ය. මේ අනුව ජනාධිපතිගේ හෝ පක්ෂ ලේකම්වරයාගේ අදහස් නොතකමින් කටයුතු කිරීමට අවශ්‍ය පසුබිමක් නිමල් ලන්සා අනෙක් පැත්තෙන් එම මන්ත්‍රීවරු අතර ගොඩ නන්වමින් ඇත. 

මේ තත්වය තුල ඊලග වැදගත් අවධානය යොමුව ඇත්තේ රිෂ්ඩ් බදුර්දීන්ගේ ACMC (මොනරා) පක්ෂයෙන් තේරීපත්වූ මන්ත්‍රීවරයාවන ඉයිෂාන්ගේ සහයෝගය ලබාගැනීම සම්බන්දයෙන්ය. මීගමුවට ප්‍රථමවරට තරගකල රිෂ්ඩ් බදුර්දීන්ගේ ACMC (මොනරා) පක්ෂයවටා බොහෝසේ ගොනුවී සිටියේ මීට පෙර මුස්‌ලිම් කොංග‍්‍රසයට (ගස සලකුණ) සහය දැක්වූ පිරිස්ය. ඉයිෂාන් මීට පෙර මුස්‌ලිම් කොංග‍්‍රසයෙන් තරගකර මන්ත්‍රීවරයෙකු පත්වී සිටි අතර ඔහු බොහෝදුරට දයාන් ලන්සාගේ සමීපතයෙක් ලෙස කටයුතුකර තිබේ. කෙසේවුවද රිෂ්ඩ් බදුර්දීන්ගේ ACMC (මොනරා) පක්ෂය යහපාලන රජයේ හවුල් පක්ෂයක් ලෙස කටයුතුකරන බැවින් ඔවුන්ගේ සහයෝගය ලබාගැනීමට  මීගමුවේ එක්සත් ජාතික පක්ෂයේ සංවිධායක රොයිස් විජිත ප්‍රනාන්දු මහතා අවස්ථා කිහිපයකදීම උත්සහකර තිබේ. පසුගිය 20දා (20/03/2018) ඔහු පෙරියමුල්ලේ අල් අමීරා හෝටලයේදී මීගමුවේ  ACMC (මොනරා) පක්ෂයේ  ප්‍රධානින්ව මුණගැසී මේ පිලිබදව සාකච්ඡා කලේය. ඒ රිෂ්ඩ් බදුර්දීන් ඇමතිවරයා මන්නාරම බලා යන අතර මීගමුවේ නැවතී සිය පක්ෂ ක්‍රියාකාරීන් හමුවී සාකච්ජා කර පැය කිහිපයකට පසුවය.  රොයිස් විජිත ප්‍රනාන්දු මහතා මීගමුවේ ACMC (මොනරා) පක්ෂ ක්‍රියාකාරීන් හමුවුවිට ACMC (මොනරා) පක්ෂය ඔහුගෙන් විමසා ඇත්තේ "ඔබට පැහැදිලිවම බහුතරයක් ඔප්පුකල හැකිද ?" යනුවෙනි.  රොයිස් විජිත ප්‍රනාන්දු මහතා දක්වා ඇත්තේ තමන්ට මන්ත්‍රීවරුන් 22දෙදෙනෙකුට වඩා වැඩි සහයෝගයක් ඇතිබවය. එවිට මීගමුවේ  ACMC (මොනරා) පක්ෂ  ප්‍රධානින් ඔහුට දක්වා ඇත්තේ. ඔබට බහුතරය ඇත්නම් අපි ඔබට සහයෝගය දෙන්නම්, නැතිනම් ලන්සලාට සහයෝගය දෙන්නම් ලෙසය. එහිදී ඔවුන් දක්වා ඇත්තේ තමන්ගේ මන්ත්‍රීවරයා විපක්ෂ මන්ත්‍රීවරයෙකු ලෙස වාඩිකරවීමට තමන්ට ඡන්දය දුන් ජනතාවගේ බලාපොරුත්තුව නොවන බවයි.  කෙසේවුද, මීගමුවේ  ACMC (මොනරා) පක්ෂ  ප්‍රධානින් මෙසේ කටයුතු කරමින් සිටින විට මීගමුවේ ප්‍රබල මුස්ලිම් තරුණ ව්‍යාසායකයෙක් රිෂ්ඩ් බදුර්දීන් ඇමතිවරයා මුණගැසීමට ගොස් මේ මොහොතේ නිමල් ලන්සගේ සහෝදරයා මීගමුවේ නගරාධිපති කිරීම වෙනුවට එක්සත් ජාතික පක්ෂයේ රොයිස් විජිත ප්‍රනාන්දු මහතාව නගරාධිපති කිරීමට සහයෝගයදීම සදාචාරාත්මක සහ නිවැරදිම දෙයලෙස පෙන්වා දී ඇත. එය රිෂ්ඩ් බදුර්දීන් ඇමතිවරයාද පිළිගත්බව පෙනේ. එහෙත් එහි මන්ත්‍රී  ඉයිෂාන් එය පිළිගනීවිද?

මේ සියලු ගණනය කිරීම සිදුවනුවේ මීගමුවේ JVP මන්ත්‍රීවරුන් තිදෙනා ලන්සලාට හෝ රොයිස්ට සහයෝගය දැක්වීමෙන් වැළකී සිටීයැයි යන උපකල්පනය මත සිටය. එහෙත්  දෙපාර්ශ්වයේම සහයෝගය ලබාගත හැකි නගරාධිපතිවරයෙක් යෝජ්නාකිරීමට ඔවුන්ගෙන් ඉඩක් පවතී. එම නම් අතර පොහොට්ටුවේ ජයවීර, ෂෙල්ටන් බෝතලේ ගම මෙන්ම එ. ජා. පක්ෂයේ මොහොමඩ් නිස්මිහාර්ගේ නම වුවද තිබීමට ඉඩ ඇත. 

කෙසේවුවද, නිමල් ලන්සාට කෙසේ හෝ මීගමුව නගර සභාවේ බලය ඇල්ලීමට අවශ්‍යවී තිබේ. ඒ සදහා මුදල් කෝටි ගනනින් වියදම් කර  මන්ත්‍රීවරයෙක්ගේ පක්ෂය මාරු කිරීමට හෝ මන්ත්‍රීවරයෙක් සභාගැබට පැමිණීම වැලක්වීමට හෝ වෙනත් කුමන හෝ ක්‍රියාමාර්ගයක් ගැනීමට හෝ ඔහු පසුබට නොවනු ඇත. 

ඒ සියල්ල බැරි උවහොත් මීගමුව බීච් පාක් එක සිය පියාට දිගටම කරගෙන යෑමට ඉඩදෙන්නේ නම් එක්සත් ජාතික පක්ෂයේ රොයිස් විජිත ප්‍රනාන්දු මහතාව නගරාධිපති කිරීමට සහයෝගය දීමට හෝ ඔහු ඉදිරිපත්වෙනු ඇත. මීගමුව නගරසභාවේ බලය ඔවුනට අවශ්‍ය වන්නේ  මීගමු නගරය දියුණු කිරීමට වඩා තම තමන්ගේ නිල සහ නිල නොවන සියළු ව්‍යාපාර තවදුරටත් කරගෙන යෑමට බව දැන් ඉතා පැහැදිලිය. මම මිට පෙරද මේ සම්බන්දව ලියා ඇත එය මීගමුවේ ලාන්සලාගේ පොහොට්ටුව පැරදවිය යුත්තේ ඇයි ? යන ලිපිය ඔස්සේ කියවිය හැක. 

නිමල් ලන්සාගේ මෙම අරමුණු දැන් මීගමුවේ මහජනයාට ඉතා හොදින් තේරුම් ගොස් හමාරය. ඔහුගේ රෙදිගැලවී හමාරය. මීගමුව ජනයාගේ අභිමතයට පිටින්ගොස් යටි කූට්ටු මාර්ග ඔස්සේ නැවත මීගමුව නගරසභාවේ බලය ඇල්ලීමට උත්සහකලහොත් එය ඔහු සිය දේශපාලන ජීවිතයේ සිදුකරන ලොකුම අනුවණකම වනු ඇත. එහින් පරාජය බාරගෙන මහත්මයෙක් ලෙස ඊලග අවස්ථාව වනතුරු පෙලගැසී සිටීම වඩාත් උචිත ක්‍රියාමාර්ගය වනු ඇත. මේ කාලයේදී සිදුවිය යුත්තේ නිමල් ලන්සා නම්වූ ජවසම්පන්න දේශපාලකගේ යහපත වඩා මතුකරගැනීමට ක්‍රියාකිරීම මිස. නිවැරදි නොවන ක්‍රියාමාර්ග ඔස්සේ තව තවත් අගාදයට වැටීම නොවේ. මේ තත්වය මීගමුවේ කතෝලික පියතුමන්ලා කිහිපදෙනෙක්ම ඔහුට පැහැදිලිකර දී තිබේ. නිමල් ලන්සා මෙන්ම දයාන් ලන්සාද ඔවුනට ඉතා හොදින් ඇහුම්කන් දෙයි, එහෙත් "ආත්මය කැමතිය, ශරීරය දුර්වලය'' - එය සැපම ඉල්ලයි. 

දුසමාන ආරංචි මාර්ගවලට රොයිස් විජිත ප්‍රනාන්දු මහතා  ජනාධිපතිවරයා (21/03/18) හමුවීමට ක්‍රිස්තියානි කටයුතු සහ සංචාරක කටයුතු ඇමති ජෝන් අමරතුංග සමග ගිය අවස්ථාවේ කිසියම් මුද්‍රා තැබු ලිපියක් ජෝන් අමරතුංග මහතා ජනාධිපතිවරයාට දුන් බවත්. එහි මුද්‍රාව බොහෝදුරට කාදිනල්වරයාගේ මුද්‍රාවට සමාන යැයි කියනු ලැබේ. මීගමුවේ එක්සත් ජාතික පක්ෂ මන්ත්‍රීවරු සියලු දෙනාම මැල්කම් රන්ජිත් කදිනල්වරයා මුණගැසී ඔහුගෙන් ආශිර්වාදයද ලබාගන්නා ලදී.   

කෙසේවුවද, මීගමුවේ මෙවැනි තත්වයක් උදාවෙන බව මැතිවරණ ප්‍රතිපල නිකුත්වීමටත් පෙර මම Facebook පිටුවේ පහත දැක්වෙන ලෙස සටහන් කරන ලදී:

මෙම මැතිවරණයේදී අපි බලාපොරොත්තුවූ ප්‍රතිපලය හෙට දිනය වනවිට නිකුත් වෙනු ඇත. එනම් මීගමුවේ ලාන්සලාගේ පොහොට්ටුව පරාජය වෙනු ඇත. මීගමුවේ UNPය ජයගත්තද, රටපුරාම ප්‍රතිපලය UNPයට සුභ නොවන බව අපි දැනන් සිටියෙමු. ඒ අනුව මීගමුවේ තියා රට තුළවත් UNPයට සිතු සිතු සෙල්ලම් කල නොහැකි වෙනු ඇත.
Marcus Priyantha Perera
10 February · ·

පැහැදිලිවම මෙම මැතිවරණයේදී අපිට අවශ්‍යවූයේ මීගමුවේ ලාන්සා පාලනය පරාජය කිරීමට. එහිලා අපට හේතු තිබුණි. එම හේතු සමහරවිට අදට වඩා හෙට වඩා වැදගත්වීමට ඉඩ තිබේ. එහින් එම හේතු සටන්පාඨ ලෙස සමාජ ගතකිරීමට අප නොපසුබට වන්නෙමු.

මාකස් ප්‍රියන්ත පෙරේරා
22/03/2018

පසුව ලියමි. 

දැන් ලැබුන තොරතුරුවලට අනුව මීගමුව මහනගර සභාවේ බලය අල්ලාගැනීමට නිමල් ලන්සා මෙහෙයවන පොහොට්ටුවට සමත්ව තිබේ. ඒඅනුව ඔහු මන්ත්‍රීවරුන් 25දෙනෙකුගේ සහයෝගය ඇතිව දයාන් ලාංසාව නගරාධිපති ලෙස පත්කර ඇත. පෙරියමුල්ලේ පරීස්ට උපනගරාධිපතිකම හිමිව තිබේ. ලාන්සලාට පක්ෂව ජන්දය දුන් අය අතර පොහොට්ටුවේ 19 දෙනාද, මාළුවාගේ සහ සරුංගලය ලකුණ යටතේ තරගකළ ස්වාධීන කණ්ඩායම් වල මන්ත්‍රීවරු 2 නාද, කෙහෙල් ඇවරියේ සහ මොනරාගේ පක්ෂයේ මන්ත්‍රීවරුන් දෙදෙනාද, ශ්‍රී ලංකා නිදහස් පක්ෂයේ ලලිත් ටෙන්සිල් මහතා හැර ඉතිරි මන්ත්‍රීවරු 5දෙනාද ජන්දය දී ඇත. එක් එක්සත් ජාතික මන්ත්‍රීවරයෙක් අද නගරාධිපතිවරයා තේරීමේ චන්දයට පැමිණ නැත. එක්සත් ජාතික පක්ෂයේ රොයිස් විජිත ප්‍රනාන්දු මහතාට සිය මන්ත්‍රීවරුන් අතරින් 18 දෙනෙකුගේ චන්දයත්,  ශ්‍රී ලංකා නිදහස් පක්ෂයේ ලලිත් ටෙන්සිල් මහතාගේ ඡන්දයත් පමණක් ලැබී තිබේ. ඒඅනුව 19ට 25ක් ලෙස නිමල් ලන්සා මෙහෙයවන පොහොට්ටුව මීගමුව මහනගර සභාවේ බලය අල්ලාගෙන සිය සොහොදරයා වන දයාන් ලන්සා නගරාධිපති ලෙස පත්කර ඇත. 

දෙතැනක මිහිදන් කල වස්කෝ ද ගාමා ඉන්දියාවට මෙන්ම බ්‍රසීලයටද යන පාර කිව්වාද?

පෘතුගීසි දේශගවේෂකයෙකු වූ වස්කෝද ගාමා ක්‍රි.ව. 1498 මැයි 20 දින නිරිතදිග ඉන්දියාවේ කැලිකට්‌ වරායට පැමිණිමත් සමග යුරෝපීන්ට පෙරදිගට පැමිණීමට නව මුහුදු මාර්ගයක් විවිර කරදුන්නේය.  ඒ මග ඔස්සේ පසුව පැමිණි ලන්දේසින්ද (ඕලන්ද), ඉංග්‍රීසින්ද, ප්‍රංශ ජාතිකයන්ද  ආසියාවේ විවිධ යටත්විජිත පිහිටවුහ. ඒ අනුව යුරෝපා ඉතිහාසය තුල වස්කෝද ගාමාට සුවිශේෂ ස්ථානයක් හිමිවේ. සිය මව්රට වන  පෘතුගාලය  තුල ඔහුට හිමිවෙනුවේ ඊටත් වඩා අද්විතීය ස්ථානයකි. ජාතික වීරයෙක් ලෙස සලකන ඔහු නමින් මුද්දර, කාසි, මුදල් නෝට්ටු, මංමාවත්, පාලම්, ගොඩනැගිලි පමණක් නොව පාපන්දු කණ්ඩායමක්ද පෘතුගාලය තුල තිබේ.  වස්කෝද ගාමාව ඔවුන් සලකනුයේ යුරෝපයේ මායිමේ තිබු කුඩා රාජ්‍යක්වූ පෘතුගාලය ධනවත් මහ අධිරාජ්‍යයක් බවට පත්කළ සැබෑ දේශමාපකයෙක් ලෙසය. 

නූතන ඉතිහාසඥයින්ට  අනුව  වස්කෝ ද ගාමා යනු ක්‍රිස්ටෝපර් කොලොම්බස්ටත් වඩා වීරයෙකි. මන්දයත් පෙරදිගට පැමිණීම සදහා ගාමා දැරූ ව්‍යායාමය  කොලොම්බස්ටත් වඩා අති විශාලය. ක්‍රි.ව. 1497 ජුලි 09 දින පෘතුගාලයේ ලිස්බන් නුවර හරහා ගලාබසින ටෙගාස්‌ ගඟ ඔස්සේ යාත්‍රාකොට එතැන් සිට අත්ලාන්තික් සාගරයට පිවිස අප්‍රිකානු මහාද්වීපය වටා යාත්‍රාකර ඉන්දියාවට ලගාවීමටත්, නැවත ඉන්දියාවේ සිට ලිස්බන් නුවරට ආපසු පැමිණීමටත් වස්කෝ ද ගාමාට පුරාවසරක් ගතවී තිබුන අතර එම මුළු ගමන සදහා නාවික සැතපුම් 27, 000ක දුරක් ඔහු ගෙවා දමා තිබුණි. ආසන්න වශයෙන් එය ලොව වටා යෑමට සමානය. වස්කෝ ද ගාමාගේ මුල්ම ගමන සදහා මෙතරම් දුරක් ගියේ ඇයිදැයි සෙවීමට බොහෝ ඉතිහාසඥයින් උනන්දුවේ. 

ලිස්බන් නුවර සිට සති කිහිපයක් ඇතුළත උතුරු අප්‍රිකාවට ඉහලින් පිහිටි කැනරි දූපත්වලට ලගාවූ වස්කෝ ද ගාමාගේ නැව් 4කින් සමන්විතවූ නාවික පන්තිය පසුව වයඹ දිග අප්‍රිකානු වෙරළේ වාර්තමාන  සියරාලියොන් රාජ්‍යයෙන්  බටහිරට යාත්‍රා කර  නැවත මාස 05කින් පසු    දකුණු අප්‍රිකාවේ  සුබ පැතීමේ තුඩුවට (කේප් තුඩුවට)  පැමිණ තිබේ. ගතවූ මාස 05ක කාලය තුල  වස්කෝ ද ගාමාගේ නාවික පන්තිය එතෙක් සොයාගෙන නොතිබූ දකුණු ඇමරිකාවේ බ්‍රසීලයට ඉතා ආසන්නව ගමන් කර තිබුණි. ඔහු මෙතරම් බටහිරට බරව ගමන් කලේ ඇයි? ඔහුට ඉන්දියාවට පැමිණීමට අමතරව වෙනත් කාර්යභාරයක් පැවරී තිබුනාද? 

ගාමාට බටහිරට යෑම සදහා යම් පෙළබවීමක් තිබු බවට සාක්ෂි පැවැතී. විශේෂයෙන්ම,පෘතුගාලයේ 3 වැනි ජෝන් රජුගේ හා පිලිප්පා බිසවගේ තුන්වැනි පුත්‍රයා වූ (නාවික) හෙන්රි එම යුගයේ සිටි ගණිතය, තාරකා විද්‍යාව, භූගෝල විද්‍යාව පිළිබද උගතුන්  එක්කර, දකුණු පෘතුගාලයේ වින්සන්ට්‌ තුඩුවේ සාග්‍රේස්‌ නගරයේ පිහිටි තාරකා විද්‍යාගාරයත්, නාවික කටයුතු පිළිබඳ පර්යේෂණ ආයතනයත්  අනුබද්දකර ආරම්භකල පෘතුගාලයේ නාවික විශ්ව විද්‍යාලය විසින් දැක්වූ ප්‍රධාන මතයන් අතර ඉන්දියාවට යෑමට අප්‍රිකාව වටා යාත්‍රාකිරීම මෙන්ම බටහිරට ඍජුව ගමන් කිරීම තුලද කල හැකියැයි යන මත දෙකම වස්කෝද ගාමාට එක ලෙස බලපෑ බව පෙනේ. ඔහු එම මාර්ග දෙකම පිලිබදව සලකා බැලූ බව ඉන් කියවේ. 

එහෙත්, බ්‍රසීලයට ආසන්නව මාස 4ක පමණ කාලයක් ගාමා ගමන්කලද, බටහිර දෙසින් විශාල මහාද්වීපයක්වන් ගොඩබිමක් ඇතිබව වටහාගත්තද, ඔහු සිය මුලික ඉලක්කය සපුරාගැනීම සදහා  බර්තලොමියෝස් දියෙස් ජයගත් දකුණු අප්‍රිකාවේ කේප් තුඩුව හෙවත් සුභපැතීමේ තුඩුවට පැමිණ  එතැන් සිට නැගෙනහිරට ගමන් කර ඉන්දියාවට යෑම තෝරාගෙන ඇත. එය එක් අතකින් ඔහුට පෙර දකුණු අප්‍රිකාවේ කේප් තුඩුවට යාත්‍රාකල විශිෂ්ඨ, ජේෂ්ඨ පෘතුගීසි නාවිකයෙකුවූ  බර්තලොමියෝස් දියෙස් පෙන්වාදුන් අත්ලාන්තික් සාගරය හරහා ඉන්දියන් සාගරයට ඇතුල්වීම නම් වූ ප්‍රවේශය සහ එම දැනුම තවත් ඉදිරියට ගෙන යාමකි. අනිත් අතින්, ඔහුට පෙර (1492දී) ඉන්දියාව බලා බටහිරට යාත්‍රාකළ ස්පාඤ්ඤ නැවියෙකුවූ ක්‍රිස්ටෝපර් කොලොම්බස් ඉන්දියාවට නොව මෙතෙක් හදුනානොගත් වෙනත් ගොඩබිමකට ලගාවී ඇති බව දැන සිටි නිසා  වස්කෝ ද ගාමා ඉන්දියාව සොයා බටහිරට යාත්‍රා කිරීම වෙනුවට  අප්‍රිකාව ඔස්සේ නැගෙනහිරට යෑම ඉතා විශ්වාස කටයුතු මාර්ගයක් යැයි සිතු බව පෙනේ.

කේප් තුඩුවට ලගාවෙන විටද සිය නැව් 04න් දෙකක් නැවත පිළිසකර කිරීමටත් 170වක් වූ සිය පිරිවරින්  තුනෙන් එකක් මියගොස්, තවත් තුනෙන් එකක් ශීතාද රෝගයෙන් ඔත්පලව සිට ඇත. ගාමා ගමන් කල කාලතුවක්‌කු 20ක් ගෙන ගිය ශා. ගේබ්රියල් ගැලියන්ස්‌ නෞකාව ද, ඔහුගේ සොහොයුරු පාවුලෝ ගාමා ගමන්කල  ශා. රෆායෙල් නෞකාවද එසේ පිළිසකර කිරීමට සිදුව තුබූ නෞකා අතර විය. ඉදිරියෙන් සහ පිටු පසින් ගමන් කල යුධායුද සහ සැපයුම් ද්‍රව්‍ය රැගෙන ගිය කුඩා නෞකා දෙක  නාවික හෙන්රි කුමාරයාගේ මග පෙන්වීම ඔස්සේ නිපදවූ  දුර ගමන්වලට ඔරොත්තු දෙන සැහැල්ලු සහ ශක්‌තිමත් නෞකාවිය. 

දකුණු අප්‍රිකාවේ කේප් තුඩුවට පැමිණි සිය ගමන සංකේතවත් කිරීම සදහා කුරුස සලකුණ රැගත් ස්ථම්භයක් සිටවූ වස්කෝ ද ගාමාගේ නැවියන් ඉන් අනතුරුව අප්‍රිකාවේ නැගෙනහිර වෙරළ ඔස්සේ වර්තමාන සන්සිබර් රාජ්‍යයට ද අනතුරුව වර්තමාන කෙන්යාවේ මලින්දී වරායටද ගොඩ බසින ලදී. එතැන් සිට එක එල්ලේ නැගෙනහිරට  ගමන්කල ගාමා ඇතුළු පිරිස ඉන්දියාවේ කැලිකට් වරායට සම්ප්‍රාප්තවිය. ඉන්දියාවේ කැලිකට් සුල්තාන්වරයා වස්කෝ ද ගාමා ඇතුළු පිරිස පිළිගත් අතර  "අපි ක්‍රිස්‌තියානින් සහ කුළුබඩු සොයාගෙන ආවෙමු" යැයි ගාමගේ ප්‍රසිද්ධ ප්‍රකාශය  කරනුයේ එම හමුවේදීය. 

ක්‍රිස්‌තියානින් සහ කුළුබඩු සොයාගෙන ආවෙමු යැයි කී වස්කෝ ද ගාමාගේ ප්‍රකාශය තුල එතෙක් හදුනාගෙන නොතිබූ බ්‍රසීල  වෙරළට ඉතා ආසන්නව ගමන්කල නමුත් ඒ දෙසට ඔහු ලගා නොවීමට හේතුවත්, ඉන්දියාවටම පමණක්ම යාත්‍රාකිරීමට වූ ඔහුගේ උවමනාවත් මැනවින් කියවේ. කුරුස යුද්ධයත් සමග මුස්ලිම්වරුන් අත්කරගත්  කුළුබඩු සැපයුම ඇතුළු පෙරදිග වෙළද සබදතාත්, එමගින් මුස්ලිම්වරුන් ඉපැයූ අධික ලාභයත්, එම ලාභය ඔස්සේ ජෙරුසලම ඇතුළු ක්‍රිස්තියානීන්ගේ ආගමීක වශයෙන් වැදගත් ස්ථාන අත්කරගැනීමට සහ දිගින් දිගටම රදවාගැනීමට ඔවුන් ගෙනගිය කුරුස යුද්ධයත් බිදදැමීට ගාමාට මෙන්ම පෘතුගාල රජටද අවශ්‍යවිය. කුරුස යුද්ධ සමයේදී යුරෝපයේ පාලකයන් මෙන්ම ප්‍රභූ පවුල්ද විවිධ ක්‍රිස්තියානි නිකායවල්වල අනුග්‍රහකයන් වුහ.  වස්කෝ ද ගාමා ගේ පියා පමණක් නොව මුත්තාද කුරුස යුද්ධයේ සටන්කල  'සල්වදොර්' නිකායේ අනුග්‍රහකයන්ය. ඔවුන් සියලු දෙනාටම ක්‍රිස්තුස් වහන්සේගේ ගෝලයෙකු වූ අපෝස්තුලු තෝමස් විසින් ආසියාව පුරාම පිහිටවූ ක්‍රිස්තියානි සංඝයවල් නැවත සොයාගෙන ඔවුන් සම්බන්දකර ගැනීමට අවශ්‍යවිය. ආසියාවේ සහ අප්‍රිකාවේ ක්‍රිස්තියානින් Prester John නම් නායකයෙකු යටතේ පාලනය වෙන බවත් එම සංඝයවල්  නෙස්ටෝරියන් (Nestorian) ක්‍රිස්තියානි  සංඝ ලෙස හැදින්වූ බවත් යුරෝපීන් දැන සිටියහ. ආසියාවේ සහ අප්‍රිකාවේ පිහිටි නෙස්ටෝරියන් (Nestorian) ක්‍රිස්තියානි  සංඝවලින් යුරෝපයට අවසාන වශයෙන් පණිවිඩයක් ලැබී ඇත්තේ කුරුස යුද්ධ සමයේදීය. එනම් ක්‍රි.ව. 1259 දීය. එම පණිවිඩය ඔස්සේ මිත්‍යා දෘෂ්ටිකයන්ගෙන්  සිය ආගම සහ අනුගාමිකයන් රැකගැනීම සදහා ආධාර ඉල්ලාසිටි බව කියවේ (මෙම පණිවිඩය රැගත් යැයි සදහන් සන්නස වතිකානු ලේඛනාගාරයේ තැම්පත්කර තිබේ). වස්කෝ ද ගාමා ඉන්දියාවට පැමිණෙන විට එහි  නෙස්ටෝරියන් (Nestorian) ක්‍රිස්තියානි  සංඝයවල් සිටියේ නැත. විසිවන වන සියවසේ සිදුකල පුරාවිද්‍යාත්මක ගවේෂණ ඔස්සේ සොයාගත් සාක්ෂි රටවල් රාශියකින්ම ලැබෙන තෙක්ම අප්‍රිකාවේ මෙන්ම ආසියාවේද නෙස්ටෝරියන් (Nestorian) ක්‍රිස්තියානි සංඝයවල් හුදෙක් මන:කල්පිතයන් වීමට ඉඩ තිබුණි. ලංකාවේද, අනුරාධපුරයෙන් 5වන සියවසට අයත් නෙස්ටෝරියන් (Nestorian) කුරුසයක්ද, වව්නියාවෙන්  නෙස්ටෝරියන් (Nestorian) පල්ලි විසින් බෞතීස්මය සදහා භාවිතාකරන බෞතීස්ම ජල ස්ථම්භයක්ද (baptismal font) සොයාගෙන ඇත. 

කෙසේවුවද, වස්කෝ ද ගාමා ඉන්දියාවට පැමිණෙනවිට ඉන්දියාවේ පැවතියේ ඔහු මින් පෙර කිසිකලක අසා නොතිබු ආගමක්වූ  හින්දු ආගමය. ඔවුන් වෙළද සම්බන්දතා පැවැත්වුයේ මුසල්මානුවන් සමගය. වස්කෝ ද ගාමා සමග වෙළද ගිවිසුමක් අත්සන් කිරීමට ඉන්දියාවේ කැලිකට් සුල්තාන්වරයා ප්‍රතිෂේප කළේය. ගාමා කුළුබඩු සහ වෙනත් වෙළද ද්‍රව්‍ය කිහිපයක් රැගෙන ඉතිරිව සිටි නැවියන් 57 දෙනාද සමග නැවත ක්‍රි.ව. 1499 සැප්. 18 දින පෘතුගාලයට ආපසු පැමිණියහ. එහිදී ඔවුන්ව ජාතික වීරයන් ලෙස සලකා පිළිගන්නා ලදී. 

ඉන් වසරකට පසු ගාමාගේ උපදෙස් පරිදි  වයඹ දිග අප්‍රිකානු වෙරළේ සිට බටහිරට ගමන්කල පෙද්රෝ අල්වාරිස් කබ්රාල් (Pedro Álvares Cabral) ක්‍රි.ව. 1500 අප්‍රියල් 22 දින බ්‍රසීලයට ගොඩ බැස නැවතත් ඉන්දියාව බලා යාත්‍රා කළේය. පෙද්රෝ අල්වාරිස් කබ්රාල් (Pedro Álvares Cabral)  බ්‍රසීලයට ගොඩ බැසි ප්‍රථම යුරෝපියානුවා මෙන්ම, බ්‍රසීලය හරහා ඉන්දියාවට ගිය ප්‍රථමයාදවේ. පෘතුගාලයට අයත්ව තිබු විශාලම යටත්විජිතයවූ බ්‍රසීලය අත්කර ගැනීමේ පිඹුරැපත් සැකසෙනුයේ ඉන් අනතුරුවය. කෙසේවුද,  කබ්රාල්ගේ ගමනේ මුලික ගමනාන්තයවූ ඉන්දියාවට ඔහු පැමිණිවිට එහිසිටි මුස්ලිම් වෙළෙන්දන් සමග ඔවුන් ගැටුමක් ඇතිකරගත්තේය. එහිදී පෘතුගීසින් 70දෙනෙක් මියගියගොස් තිබේ.

පසුව, පෘතුගාලයේ එවකට පාලකයාවූ පළමුවන ජෝන් රජතුමාගේ ඉල්ලීම අනුව  ක්‍රි.ව. 1502දී 800ක පිරිසක් සමග නැව් 15කින්  නැවත ඉන්දියාව බලා ගමන්කිරීමට වස්කෝ ද ගාමාට  සිදුවිය. එහිදී ඔවුන්  ඉහත පෘතුගීසි ඝාතන සදහා පලිගැනීම් වශයෙන්  විශාල ජීවිතහානි රාශියක් සිදුකර තිබේ. ඒ අතර මක්කම වන්දනාවේ ගොස් පැමිණෙමින් සිටි බාල, මහලු, කාන්තාවන් ඇතුළු 700 රැගත් නෞකාවක් ගිල්වා දැමීමත්, සන්සිබර්, ඔර්මන්, ඒඩන් ආදී මුස්ලිම් වරායවල්වලට පහරදීමත් ඉන්දියාවේ නිරතදිග කැලිකට් සිට දකුණුට වන්නට පිහිටි සියලු මුස්ලිම් ව්‍යාපාර සහ කැලිකට් නගරයට කාලතුවක්කු ප්‍රහාර එල්ලකිරීමත් ඇතුලත්ය. ඒ ඔස්සේ ගාමා සිය දෙවන ගමනේදී ඉන්දියාවේ ප්‍රථම පෘතුගීසි පාලන අදිකාරිය පිහිටුවන ලදී. 

නැවත ක්‍රි.ව. 1503දී පෘතුගාලයේ ලිස්බන් නුවරට පැමිණි ගාමාට, ඉන්දියාවේ පෘතුගාල ප්‍රතිරාජ්‍යා ලෙස පත්වීයන ලෙස ජෝන් රජ  ඉල්ලා සිටියද ඔහු විවාහවී විවේක සුවයෙන් සිටීමට ප්‍රිය කල නිසා එම තනතුර ප්‍රැන්සිස්‌කෝ ද අල්මෙදාට දෙලදී. ප්‍රැන්සිස්‌කෝ ද අල්මෙදා යනු 1505දී ලංකාවට පැමිණි ලොරොන්සෝ ද අල්මේදාගේ  පියාය.  

රජගේ උපදේශකයෙක් මෙන්ම පෘතුගාල නාවික මෙහෙයුම් අධීක්ෂකයා ලෙස පෘතුගාලයේ වසර 20ක් නැවතී සිටි වස්කෝ ද ගාමාට නැවත ඉන්දියාවේ   ප්‍රතිරාජයා ලෙස පත්වී යන ලෙස එතෙක් පෘතුගාලයේ රජකම් කල පළමුවන ජෝන් රජගෙන් පසු බලයට පත්වූ පළමුවන මැනුවෙල් රජ ඉල්ලා සිටින ලදී. ඒ වන විට ඉන්දියාවේ  ප්‍රතිරාජ්‍යා ලෙස කටයුතු කරමින් සිටි ප්‍රැන්සිස්‌කෝ ද අල්මෙදා මෙන්ම ඔහුගේ පුත් ලොරොන්සෝ ද අල්මේදා ද ගැටුම්වලින් මියගොස් ඉන්දියාවේ පෘතුගිසි පාලනය අවුල්වී තිබුණි. මැනුවෙල් රජගේ ඉල්ලීම අනුව නැවත ඉන්දියාවට ගිය  වස්කෝ ද ගාමා ක්‍රි.ව.  1524 දෙසැම්බර් 24 දින නත්තල් සන්ධ්‍යාවේදී මැලේරියා රෝගයෙන් මිය ගියේය. 

ප්‍රථමයෙන් ඉන්දියාවේ කැලිකට් නුවර ශා. ප්‍රැන්සිස් දේවස්ථානයේ මිහිදන් කල ඔහුගේ දේහය ක්‍රි.ව. 1539දී  නැවත පෘතුගාලයේ ලිස්බන් නුවරට ගෙනවිත් පෘතුගීසි වීරවරයන් ගේ දේහ තැම්පත්කරන  Belém හී The Jerónimos Monastery  යේ තැම්පත්කරන ලදී. 

පසුගියදා පෘතුගාලයේ ලිස්බන් නුවරට ගිය මට එම ස්ථානය නැරබීමට අවස්ථාව ලැබුණි. එම ස්ථානය මට එකවරම සිහිකැදවුයේ ස්පාඤ්ඤයේ බාසිලෝනා නුවර Antoni Gaudí විසින් ඉදිකිරීම් ආරම්භකල Sagrada Família දේවස්ථානයය. අන්තෝනියෝ ගෞදී පැහැදිලිවම පෘතුගාලයේ The Jerónimos Monastery යෙන් අභාෂය ලබා ඇත. Sagrada Família දේවස්ථානයේ අභ්‍යන්තරය සහ The Jerónimos Monastery ඇතුළත එකිනෙකට ඉතා සමානය. 

අප  කුඩා කාලයේදී දේශාටකයන් ගැන බොහෝ විස්තර කියවුයෙන් වස්කෝ ද ගාමා, ක්‍රිස්ටෝපර් කොලොම්බස්, බර්තොලොමිස් දියෙස්, ෆර්ඩිනන් මැගලන්, සර් ෆ්‍රැන්සිස් ඩෙරික් ආදීන් ගැන තවතවත් කියවීමටත්, නැරබීමටත් සහ තවත් කරුණු සොයා බැලීමටත් මම විශාල උනන්දුවකින් පසුවූවෙමි. ඔවුන්ගේ ඇතැම් චාරිකා මම පොත් කඩවලින් මිලට ගත් ලෝක සිතියම් පිටපත්වල ඇදීමට පවා ආශා කළේය. එහෙත් මෙවැනි දේශාටකයින්, දේශගවේශකයින් පිලිබදව සොයා බලා දැන කියා ගැනීමට අද ළමයින්ට එවැනි උනන්දුවක් ඇත්තේදැයි මම නොදනිමි. 

මාකස් ප්‍රියන්ත පෙරේරා

13/03/2018